កីឡដ្ឋាន Archives - Kampuchea Thmey Daily

ស្តាតចាស់អាចប្រកួតបាន២ពេល ក្រោយដាក់ភ្លើងបំភ្លឺថ្មីត្រៀមស៊ីហ្គេម២០២៣

chean virakbot — Wed, 19 Apr 2023 08:22:17 +0000

កីឡដ្ឋានកងយោធពលខេមរភូមិន្ទ (ស្តាតចាស់)អាចរៀបចំការប្រកួតបានពីរពេលក្នុងមួយថ្ងៃ ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ហើយ បន្ទាប់ពីបានធ្វើការជួសជុលកែលម្អរួចមក។

សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានគណៈកម្មាធិការជាតិ CAMSOC-CAMAPGOC នៅក្រោយការត្រួតពិនិត្យទីលានប្រកួតស្តាតចាស់នាព្រឹកថ្ងៃទី១៩ ខែមេសានេះមានប្រសាសន៍ថា ៖«នៅថ្ងៃនេះ យើងឃើញគ្រប់ទីកន្លែងប្រកួតទាំងអស់បានរៀបរយរួចរាល់ ជិត១០០%ហើយ។ ចំពោះទីលានប្រកួតនៅស្តាតចាស់ សម្រាប់បាល់ទាត់នារី ពីមុនយើងបារម្ភ ព្រោះអាចប្រកួតបាន១ពេល ប៉ុន្តែពេលនេះយើងបានដោះស្រាយទាន់ពេលវេលា។ ក្រោយការខិតខំប្រឹងប្រែងកែលម្អ និងបំពាក់ភ្លើងបំភ្លឺ គឺអាចប្រកួតបាន ២ពេល ឱ្យស្របតាមស្តង់ដា ដើម្បីធានាឱ្យការប្រកួតនៅទីលាន មួយនេះប្រកបដោយភាពរលូន»។

សម្តេចពិជ័យបន្ថែមថា ៖«ពេលវេលាយើងជិតមកដល់ហើយ។ ជាពិសេសគឺការប្រកួតស៊ីហ្គេម លើកទី៣២ នៅសល់តែ១៦ថ្ងៃទៀតប៉ុណ្ណោះ ដូច្នេះគ្រប់គណៈកម្មការ ក៏ដូចជាគ្រប់ផ្នែកនានា កំពុងមមាញឹកមែនទែន ក្នុងការត្រួតពិនិត្យគ្រប់ផ្នែក គ្រប់វិស័យទាំងអស់។ ជាពិសេសគឺទីលានប្រកួត ត្រូវតែរួចរាល់មុនអ្វីៗទាំងអស់ ដើម្បីធានាឱ្យបានស្អាត អនាម័យ ព្រមទាំងត្រឹមត្រូវតាមស្តង់ដាអន្តរជាតិ។ ជារួមគ្រប់ទិសទីទាំងអស់ យើងបានត្រួតពិនិត្យជាបន្តបន្ទាប់រួចរាល់ចប់សព្វគ្រប់អស់ហើយ ដោយនៅសល់តែការសម្អាតអនាម័យ តុបតែងស្លាកសញ្ញា និមិត្តសញ្ញា ឱ្យកាន់តែស្រស់ប្រិមប្រិយប៉ុណ្ណោះ»។

គួរដឹងដែរថា ទីលានបាល់ទាត់ មាន៤កន្លែងសម្រាប់បម្រើដល់ការប្រកួតកីឡាស៊ីហ្គេម លើកទី៣២ ឆ្នាំ២០២៣ គឺនៅពហុកីឡដ្ឋានជាតិ (អូឡាំពិក) ស្តាតចាស់ កីឡដ្ឋានស្មាតអរអេសអិន របស់ក្លិបភ្នំពេញក្រោន និងកីឡដ្ឋានព្រីនស៍ របស់ក្លិបវិសាខា ហើយប្រភេទកីឡាបាល់ទាត់ត្រូវដំណើរការប្រកួតមុនគេ ដោយចាប់ផ្តើមប្រកួត ពីថ្ងៃទី២៩ ខែមេសា ឆ្នាំ២០២៣៕

អត្ថបទ៖ មន្នីរ័ត្ន

The post ស្តាតចាស់អាចប្រកួតបាន២ពេល ក្រោយដាក់ភ្លើងបំភ្លឺថ្មីត្រៀមស៊ីហ្គេម២០២៣ appeared first on Kampuchea Thmey Daily.

កីឡដ្ឋានសង់ពីកុងតឺន័រ ត្រូវបានរុះរើ និងដឹកយកទៅសង់ឡើងវិញ នៅអ៊ុយរូហ្គាយ សម្រាប់ World Cup

អ៊ិន ពិសី — Tue, 13 Dec 2022 01:27:38 +0000

ការប្រកួតបាល់ទាត់ពិភពលោក (FIFA World Cup 2022) កាន់តែជិតដល់ទីបញ្ចប់ហើយ ដោយនៅសល់ប្រទេសចំនួន ៤ កំពុងដណ្ដើមតំណែងជើងឯកគ្នា ប៉ុន្តែអ្វីដែលគួរឲ្យចាប់អារម្មណ៍ កីឡដ្ឋានមួយត្រូវបានរុះរើរួចទៅហើយ នោះគឺកីឡដ្ឋានបណ្ដោះអាសន្ន ៩៧៤ (Stadium 974)។

នាវិកបានទៅធ្វើការលើការបំបែក កីឡដ្ឋានបណ្ដោះអាសន្ន ៩៧៤ ក្នុងតំបន់ Ras Abu Aboud នៃទីក្រុង Doha។ កីឡដ្ឋាននេះប្រើដីតែមួយគត់ ត្រូវបានសាងសង់ជាចម្បងដោយប្រើកុងតឺន័រដឹកជញ្ជូនដែលបានរៀបចំឡើងវិញចំនួន ៩៧៤ កុងតឺន័រ។ ៩៧៤ គឺជាលេខកូដហៅទូរស័ព្ទសម្រាប់ប្រទេសកាតា។

នៅខាងក្នុងវាមានកៅអីប្រហែល ៤០,០០០ កៅអី ហើយបានកើនឡើងជាផ្លូវការចំនួន ៤,០៨៩ បន្ទាប់ពីការប្រកួតបានចាប់ផ្ដើម។

កីឡដ្ឋាននេះត្រូវបានបើកដំណើរការនៅថ្ងៃទី ២០ ខែវិច្ឆិកា ឆ្នាំ ២០២១ ហើយវារៀបចំការប្រកួតត្រឹមតែ ១៣ ប្រកួតប៉ុណ្ណោះ។ នេះរាប់បញ្ចូលទាំង ៦ ប្រកួត នៅក្នុងពាន Arab Cup និង ៧ ប្រកួត នៅក្នុងពាន FIFA World Cup ដែលជាការប្រកួតចុងក្រោយរបស់ប្រេស៊ីលឈ្នះ ៤-១ លើកូរ៉េខាងត្បូង កាលពីយប់ថ្ងៃចន្ទ។ ទោះបីជាយ៉ាងណាក៏ដោយ ក្នុងរយៈពេលប៉ុន្មានម៉ោងបន្ទាប់ពីការប្រកួតរថយន្តដឹកទំនិញ និងរថយន្តលើកដាក់កុងតឺន័រ បានចាប់ផ្ដើមការងាររុះរើ។

ទោះជាយ៉ាងណាក៏ដោយនេះមិនត្រូវបានគេរំពឹងថានឹងបញ្ចប់រឿង កីឡដ្ឋាន 974 នោះទេ។ ដោយសារតែដូចដែលបានរាយការណ៍ដោយ Financial Times ផែនការ គឺដើម្បីដឹកជញ្ជូនកុងតឺន័រ សន្មតថាតាមទូក ដែលមានចម្ងាយ ៨,០០០ ម៉ាយ ទៅអ៊ុយរូហ្គាយ។

ប្រទេសនៅទ្វីបអាមេរិកខាងត្បូងមួយនេះ គ្រោងនឹងសាងសង់កីឡដ្ឋាននេះឲ្យដូចគ្នាឡើងវិញ ដើម្បីធ្វើជាម្ចាស់ផ្ទះការប្រកួតបាល់ទាត់ពិភពលោក (FIFA World Cup) នៅទីនោះ ក្នុងឆ្នាំ ២០៣០។

អ៊ុយរូហ្គាយ សង្ឃឹមថា គំនិតដែលបានស្នើឡើងដើម្បីកាត់បន្ថយកន្លែងចោលសំរាមដែលខ្ជះខ្ជាយ នឹងជួយជំរុញការបោះឆ្នោតសម្រាប់សិទ្ធិធ្វើជាម្ចាស់ផ្ទះសម្រាប់ការប្រកួតក្នុងរយៈពេល ៨ ឆ្នាំខាងមុខ ដែលស្មើនឹង ១០០ ឆ្នាំគត់ ចាប់តាំងពីពួកគេបានរៀបចំព្រឹត្តិការណ៍នេះជាលើកដំបូង។

ការដេញថ្លៃរបស់ពួកគេនឹងក្លាយជាកិច្ចខិតខំប្រឹងប្រែងរួមគ្នាជាមួយអាហ្សង់ទីន ឈីលី និងប៉ារ៉ាហ្គាយ។ ប៉ុន្តែវាប្រឈមនឹងការប្រកួតប្រជែងពីការដេញថ្លៃរបស់ប្រទេសនៅទ្វីបអឺរ៉ុប រួមមាន អេស្ប៉ាញ ព័រទុយហ្គាល់ និងអ៊ុយក្រែន។ ការដេញថ្លៃពីប្រទេសម៉ារ៉ុក និងពីប្រទេសដែលឆ្លងសហព័ន្ធគ្នា រវាងសហព័ន្ធពីប្រទេសអេហ្ស៊ីប (អាហ្វ្រិក), ក្រិក (អឺរ៉ុប) និងអារ៉ាប៊ីសាអូឌីត (អាស៊ី) ក៏ត្រូវបានស្នើឡើងផងដែរ៕

ប្រភព ៖ thesun.co.uk

អត្ថបទ ៖ មន្នីរ័ត្ន

The post កីឡដ្ឋានសង់ពីកុងតឺន័រ ត្រូវបានរុះរើ និងដឹកយកទៅសង់ឡើងវិញ នៅអ៊ុយរូហ្គាយ សម្រាប់ World Cup appeared first on Kampuchea Thmey Daily.

ទម្លាយមូលហេតុ កីឡដ្ឋានមួយរបស់ កាតា ដាក់ឈ្មោះពិសេស

Sok Sovann — Thu, 01 Dec 2022 23:30:00 +0000

ការប្រកួតបាល់ទាត់ពិភពលោកឆ្នាំ ២០២២ នៅប្រទេសកាតា មានការប្រកួតសរុបចំនួន ៦៤ ប្រកួតនៅលើកីឡដ្ឋានចំនួន៨ផ្សេងៗគ្នា ក្នុងរយៈពេលមួយខែ។

ទីលានចំនួនប្រាំពីរ ក្នុងចំណោមទីលានទាំងប្រាំបី ត្រូវបានបង្កើតឡើងក្នុងរយៈពេលមួយទសវត្សរ៍កន្លងមកនេះ។

ដោយសារតែនេះជា World Cup លើកដំបូង ត្រូវលេងនៅតំបន់មជ្ឈិមបូព៌ា, ម្ចាស់ផ្ទះ បានខិតខំប្រឹងប្រែងអស់ពីដៃពីជើង ដើម្បីរៀបចំព្រឹត្តិការណ៍ឲ្យដំណើរការទៅដោយរលូន និងដើម្បីលើកមុខមាត់ជាតិ ព្រមទាំងទាក់ទាញចំណាប់អារម្មណ៍ផងដែរ។

ក្រៅពីហេដ្ឋារចនាសម្ព័ន្ធអស្ចារ្យៗ កីឡដ្ឋានមួយចំនួន ក៏ត្រូវបានគេដាក់ឈ្មោះពិសេសផងដែរ ហើយថ្ងៃនេះ កម្ពុជាថ្មី សូមបកស្រាយអំពីមូលហេតុ ដែលកីឡដ្ឋានមួយ ត្រូវបានគេដាក់ឈ្មោះថា ៩៤៧។

ហេតុអ្វីបានជាគេដាក់ឈ្មោះបែបនេះ?

កីឡដ្ឋាន ៩៧៤ ស្ថិតនៅចម្ងាយ ៧គីឡូម៉ែត្រ ពីកណ្តាលទីក្រុង ដូហា។

កីឡដ្ឋាន ៩៧៤ គឺជាកីឡដ្ឋានដែលអាចរុះរើបានទាំងស្រុង ដំបូងគេក្នុងប្រវត្តិសាស្ត្របាល់ទាត់ពិភពលោក ហើយត្រូវបានសាងសង់ឡើងដោយប្រើទូកុងតឺន័រដែលមានការបញ្ជាក់ស្តង់ដារ និងដែកម៉ូឌុល។

ឈ្មោះខ្លួនវា គឺសំដៅទៅលើទូកុងតឺន័រចំនួន៩៧៤ដែលត្រូវបានប្រើដើម្បីសាងសង់កីឡដ្ឋាន។ ហើយលេខ៩៧៤នេះ ក៏ជាលេខកូដទូរស័ព្ទអន្តរជាតិសម្រាប់កាតាផងដែរ។

កីឡដ្ឋាន៩៧៤ ត្រូវចំណាយពេលសាងសង់ប្រហែល១៨ខែ ហើយអាចផ្ទុកមនុស្សបាន ៤០០០០នាក់។ កីឡដ្ឋាននេះ នឹងត្រូវរុះរើបន្ទាប់ពីចប់ព្រឹត្តិការណ៍ World Cup 2022៕

ប្រែសម្រួល៖ Vann Vann

ប្រភព៖ Sporting News

ចុចអាន៖ អ្នកគាំទ្រ កាន់ទង់ឥន្ទធនូ រត់ចូលទីលាន ដើម្បីតវ៉ា ក្នុងជំនួប ព័រទុយហ្គាល់- អ៊ុយរូហ្គាយ

The post ទម្លាយមូលហេតុ កីឡដ្ឋានមួយរបស់ កាតា ដាក់ឈ្មោះពិសេស appeared first on Kampuchea Thmey Daily.

កាតា សុខចិត្តខាតប្រាក់ជិត ៧ពាន់លានដុល្លារដើម្បីរុះរើកីឡដ្ឋានធំៗចោល ក្រោយចប់ World Cup

Sonya — Wed, 30 Nov 2022 11:50:00 +0000

ទោះបីជាបានចំណាយប្រាក់ជិត ៧ពាន់លានដុល្លារ ដើម្បីសាងសង់ និងជួសជុលកីឡដ្ឋានចាស់ សម្រាប់ធ្វើជាម្ចាស់ផ្ទះព្រឹត្តិការណ៍ World Cup ឆ្នាំ២០២២ ក៏ដោយ ក៏ប្រទេសកាតានឹងរុះរើកីឡដ្ឋានចំនួន ៥ ចោលចេញ ដើម្បីបម្រើគោលបំណងផ្សេងវិញ បន្ទាប់ពីការប្រកួតបានបិទបញ្ចប់។

នៅក្នុងព្រឹត្តិការណ៍ World Cup 2022 ម្ចាស់ផ្ទះកាតាបានវិនិយោគយ៉ាងច្រើនមហាសាលទៅលើកីឡដ្ឋានចំនួន ៨ ដែលខ្ទង់ចំណាយអស់ប្រាក់ប្រមាណ ៦.៥ពាន់លានដុល្លារ និងចាយពេលអស់ជាង ៣ឆ្នាំយ៉ាងណាក្ដី ក៏ប្រទេសមជ្ឈិមបូព៌ាមួយនេះ ព្រមខាតបង់ប្រាក់ចំណាយទាំងនេះ ដើម្បីរុះរើ និងកែច្នៃកីឡដ្ឋានចំនួន ៧ សារឡើងវិញ សម្រាប់បម្រើលើវិស័យកីឡា អប់រំ វេជ្ជសាស្ត្រ និងពាណិជ្ជកម្ម ក្រោយការប្រកួត FIFA World Cup 2022 ចប់សព្វគ្រប់។

យោងតាមសារព័ត៌មាន Daily Mail បន្ទាប់ពីការប្រកួតបាល់ទាត់ពិភពលោក ប្រធានគណៈកម្មាធិការរៀបចំការប្រកួត នៅប្រទេសកាតា លោក Hassan Al Thawadi បាននិយាយថា កីឡដ្ឋានទាំងអស់ត្រូវបានសាងសង់ឡើងដោយអនុលោមតាមស្តង់ដារ និរន្តរភាព ដើម្បីធានាបាននូវការប្រើប្រាស់ក្រោយរដូវកាល World Cup ។ ក្នុងនោះ មានតែកីឡដ្ឋាន ២កន្លែងប៉ុណ្ណោះដែលទុកនៅបម្រើវិស័យកីឡាដដែល គឺកីឡដ្ឋាន Ahmad Bin Ali និងកីឡដ្ឋាន Al Janoub ដែលអាចផ្ទុកមនុស្ស ៤ពាន់នាក ត្រូវកាត់បន្ថយមកត្រឹម ២ពាន់នាក់ សម្រាប់ការប្រកួតបាល់ទាត់នាពេលអនាគត។ រីឯកីឡដ្ឋានធំៗចំនួន ៥ទៀត នឹងត្រូវជួសជុលឡើងវិញ និងមានខ្លះត្រូវរុះរើទាំងស្រុងតែម្ដង។

កីឡដ្ឋាន 974 ជាកីឡដ្ឋានពិសេស ត្រូវបានប្រមូលផ្តុំពីកុងតឺន័រ ដូច្នេះបន្ទាប់ពីបញ្ចប់ការប្រកួតបាល់ទាត់ពិភពលោក កាតា នឹងដកផ្នែកខ្លះនៃកុងតឺន័រដើម្បីដាក់វាឱ្យប្រើប្រាស់ឡើងវិញសម្រាប់ការប្រគល់ទំនិញ។ នៅសល់នឹងត្រូវប្រើប្រាស់សម្រាប់ការសាងសង់មជ្ឈមណ្ឌលពាណិជ្ជកម្ម និងគោលបំណងមួយចំនួនទៀត។

ចំណែកកីឡដ្ឋាន Lusail ដែលជាកីឡដ្ឋានដែលមានសមត្ថភាពធំជាងគេ និងជាកន្លែងសម្រាប់ការប្រកួតវគ្គផ្តាច់ព្រ័ត្រ World Cup ឆ្នាំ២០២២ នឹងត្រូវបានកែលម្អទៅជាមជ្ឈមណ្ឌលសហគមន៍ដែលមានអគារ ហាង ភោជនីយដ្ឋាន សាលារៀន និងកន្លែងថែទាំសុខភាព ដើម្បីបម្រើដល់ការអភិវឌ្ឍន៍សេដ្ឋកិច្ច សម្រាប់រកប្រាក់ចំណេញត្រឡប់មកវិញ។

ដោយឡែកកីឡដ្ឋាន Al Bayt ដែលជាកន្លែងប្រកួតបើកឆាកនឹងត្រូវកម្ទេចចោលមួយផ្នែក ដើម្បីសាងសង់មន្ទីរពេទ្យវេជ្ជសាស្ត្រកីឡា សណ្ឋាគារលំដាប់ផ្កាយ ៥ ផ្សារទំនើប និងគ្រឿងបរិក្ខារមួយចំនួនផ្សេងទៀតសម្រាប់សហគមន៍។ កីឡដ្ឋាន Al Thumama នឹងត្រូវប្តូរទៅជាសណ្ឋាគារ និងមន្ទីរពេទ្យកីឡា។ ចុងក្រោយគេ កីឡដ្ឋាន Education City នឹងត្រូវបានកែប្រែ និងកាត់បន្ថយកៅអីចំនួន ២ពាន់ ដើម្បីប្រើប្រាស់ជាមូលដ្ឋានសម្រាប់សិស្សានុសិស្សចូលរៀននៅសាកលវិទ្យាល័យក្នុងស្រុក។

តាមរយៈការរុះរើ និងកែច្នៃទាំងនេះ គេអាចមើលឃើញថា កាតា ពិតជាមានភាពវៃឆ្លាត និងមានសុទិដ្ឋិនិយមក្នុងការគណនា និងរកប្រាក់ចំណេញសម្រាប់ប្រទេស បន្ទាប់ពីចំណាយទឹកប្រាក់ដ៏ច្រើនលើសលុបដែលពួកគេបានបណ្តាក់ទុកសម្រាប់ការប្រកួតបាល់ទាត់ពិភពលោកឆ្នាំនេះ

ប្រែសម្រួល៖ សន្យា

ចុចអាន៖ រាជវង្ស កាតា មានសមាជិក ៨ពាន់នាក់ និងក្ដោបក្ដាប់ទ្រព្យសម្បត្តិលើស ៣០០ពាន់លានដុល្លារ

ចុចអាន៖ កីឡដ្ឋានធំៗទាំង ៨ ដែលកាតាជះលុយរាប់សិបលានសាងសង់ សម្រាប់ការប្រកួត World Cup ឆ្នាំ២០២២

The post កាតា សុខចិត្តខាតប្រាក់ជិត ៧ពាន់លានដុល្លារដើម្បីរុះរើកីឡដ្ឋានធំៗចោល ក្រោយចប់ World Cup appeared first on Kampuchea Thmey Daily.

មកដឹងលម្អិត អំពីកីឡដ្ឋានខេត្តកំពង់ស្ពឺ ចំណាយថវិកាសាងសង់ជិត ៣ លានដុល្លារ សម្ពោធឲ្យប្រើប្រាស់នៅថ្ងៃនេះ

sopheak khoun — Tue, 06 Sep 2022 04:17:51 +0000

ដូចការគម្រោងទុក កីឡដ្ឋានខេត្តកំពង់ស្ពឺ ដែលចំណាយថវិកាសាងសង់ជិត ៣ លានដុល្លារអាមេរិក ត្រូវបានសម្ពោធដាក់ឲ្យប្រើប្រាស់ជាផ្លូវការហើយ នៅព្រឹកថ្ងៃទី ៦ ខែកញ្ញា ឆ្នាំ ២០២២នេះ ក្រោមអធិបតីភាពលោកឧបនាយករដ្ឋមន្ត្រី ជាសុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ តំណាងដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃ កម្ពុជា។

យោងតាមរដ្ឋបាលខេត្តកំពង់ស្ពឺ បានឲ្យដឹងថា កីឡដ្ឋានត្រូវបានសាងសង់លើផ្ទៃដីទំហំ ៤៣.៤០២ ម៉ែត្រក្រឡា មានទីតាំងស្ថិតនៅតាមបណ្ដោយផ្លូវជាតិលេខ ៤៤ ដែលមានចម្ងាយប្រមាណជាង ៤គីឡូម៉ែត្រ ពីផ្លូវជាតិលេខ ៤ ក្នុងភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ។

កីឡដា្ឋននេះ ត្រូវបានបើកការដ្ឋានសាងសង់ នៅថ្ងៃទី ២១ ខែកុម្ភៈ ឆ្នាំ ២០២១ និងបានបញ្ចប់ការដ្ឋានសាងសង់នៅថ្ងៃទី ២១ ខែសីហា ឆ្នាំ ២០២២នេះ។ គម្រោងសាងសង់កីឡដ្ឋានខេត្តកំពង់ស្ពឺ ត្រូវបានសាងសង់ជា ២ ដំណាក់កាល គឺដំណាក់កាលរៀបចំសាងសង់របង និងក្លោងទ្វារធំទាំងពីរ នៃកីឡដ្ឋាន និងបន្ទាប់ការសាងសង់សំណង់អគារ ទីលានបាល់ទាត់ ហេដ្ឋារចនាសម្ព័ន្ធនានា ទាំងក្នុង និងក្រៅបរិវេណកីឡដ្ឋាន ស្របពេលជាមួយការសាងសង់សួនកុមារ កន្លែងហាត់ប្រាណសម្រាប់សាធារណជន និងការបំពាក់អំពូលសូឡាក្នុងបរិវេណកីឡដ្ឋាន ជាដើម។

ចំពោះកិច្ចការសាងសង់ហេដ្ឋារចនាក្នុងកីឡដ្ឋាន ដែលសម្រេចបាន រួមមាន៖

១. សាងសង់ក្លោងទ្វារ ចំនួន ២ កន្លែង និងរបងព័ន្ធជុំវិញ ៨០០ម៉ែត្រ

២. សាងសង់កន្លែងសម្រាប់អ្នកទស្សនាចំនួន ៣០០០ កម្ពស់ ៣ ជាន់ ដែលជាន់ផ្ទាលដីចែកចេញជា ២៥ បន្ទប់ ជាន់ទី ១ (ជាន់ VIP) ចែកជា ៨ បន្ទប់ និងជាន់ទី ២ ចែកចេញជា ២បន្ទប់ (សម្រាប់អ្នកអធិប្បាយការផ្សាយផ្ទាល់ និងបន្ទប់ការិយាល័យ)។

៣. ទីលានបាល់ទាត់ ដែលមានបណ្ដោយ ១១០ម៉ែត្រ និងទទឹង ៧៣ម៉ែត្រ ក្រាលស្មៅសិប្បនិម្មិត និងមានរៀបចំប្រព័ន្ធលូបង្ហូរទឹកព័ន្ធជុំវិញតារាង។

៤. ទីលានរត់ប្រណាំង បានអ៊ុតកៅស៊ូមួយជុំទីលានបាល់ទាត់ ប្រវែង ៤០០ម៉ែត្រ ដែលមានទទឹង ៩,៤៧ម៉ែត្រ និងទទឹងពីទីលានរត់មករបងប្រវែង ១០ម៉ែត្រ។

៥. ភ្លើងបំភ្លឺទីលានបាល់ទាត់ ចំនួន ៤ដើម ដែលមានកម្ពស់ ៤០,២០ម៉ែត្រ និងអំពូលភ្លើងចំនួន ៤២គ្រាប់ កម្រិតពន្លឺ ១.២០០ lumen និងអំពូលសឡាបំភ្លឺជុំវិញបរិវេណកីឡដ្ឋាន ចំនួន ២០០ដើម។

៦. សួនកុមារ និងកន្លែងហាត់ប្រាណសម្រាប់សាធារណជន ដែលមានទំហំ ២.០០០ម៉ែត្រការ៉េ បំពាក់ឧបករណ៍ក្មេងលេង និងឧបករណ៍ហាត់ប្រាណ ១០គ្រឿង។

៧. ទីតាំងតម្កល់រូបសំណាកព្រះបាទជ័យវរ្ម័នទី ៧ និងរូបសំណាកសម្ដេចសង្ឃរាងជួន ណាត

៨. ហេដ្ឋារចនាសម័ន្ធក្រៅរបងកីឡដ្ឋាន រួមមានការរៀបចំតទឹក ភ្លើង និងរៀបចំប្រព័ន្ធលូរំដោះទឹកពីក្នុងកីឡដ្ឋាន ព្រមទាំងចាក់ផ្លូវបេតុង និងដាំដើមឈើលម្អ ទាំងក្នុង និងក្រៅបរិវេណកីឡដ្ឋាន ត្រូវបាន ជួយសម្របសម្រួលដោយរដ្ឋបាលខេត្តកំពង់ស្ពឺ។

សូមជម្រាបថា សមិទ្ធផលកីឡដ្ឋានខេត្តកំពង់ស្ពឺនេះ ជាគំនិតផ្ដួចផ្ដើមរបស់ឯកឧត្តម ហ៊ុន ម៉ានី តំណាងរាស្ត្រមណ្ឌលខេត្តកំពង់ស្ពឺ និងជាប្រធានសហភាពសហព័ន្ធយុវជនកម្ពុជា ក្នុងស្មារតីរួមគ្នាដើម្បីលើកមុខមាត់ និងគិត្យានុភាពរបស់ខេត្តផង និងក្នុងគោលបំណងចូលរួមចំណែក ជាមួយរាជរដ្ឋាភិបាលក្នុងការអភិវឌ្ឍវិស័យកីឡា ឲ្យកាន់តែរីកចម្រើនឆ្ពោះទៅការធ្វើជាម្ចាស់ផ្ទះ នៃការប្រកួតកីឡាស៊ីហ្គេម ឆ្នាំ ២០២៣ខាងមុខនេះផងដែរ។

ជាមួយការប្ដេជ្ញាចិត្តដ៏មោះមុតរបស់ឯកឧត្តម ហ៊ុន ម៉ានី និងបន្ទាប់ពីទទួលបានការឯកភាពគាំទ្រពីភាគីពាក់ព័ន្ធ ជាពិសេសរដ្ឋបាលខេត្តកំពង់ស្ពឺ ក្នុងការផ្ដល់ជម្រើសទីតាំងដីមួយចំនួន សម្រាប់ការសាងសង់នៅឆ្នាំ ២០១៨។ ក្រុមការងារ បានចាប់ផ្ដើមសិក្សាលើគម្រោងទាំងមូល ដោយចាប់ផ្ដើមពីការកំណត់យកទីតាំងសាកសម និងការសិក្សាលើប្លង់ទីលានបាល់ទាត់អាគារកីឡដ្ឋាន ប្រព័ន្ធទឹក ភ្លើង និងហេដ្ឋារចនាសម្ព័ន្ធជុំវិញ ជាពិសេសគឺការងារកៀរគរសប្បុរសជន ឲ្យមានការចូលរួមឧបត្ថម្ភគាំទ្រទាំងសម្ភារៈ និងថវិកា ដើម្បីដំណើរការគម្រោង។

កីឡដ្ឋានខេត្តកំពង់ស្ពឺនេះ ក៏នឹងក្លាយជាទីលានគោលសម្រាប់ក្រុមបាល់ទាត់ណាហ្គាវើលដ៏អ្វេសស៊ី ដោយក្រុមបាល់ទាត់អាជីពនេះ នឹងយកទីលានកីឡដ្ឋានខេត្តកំពង់ស្ពឺ សម្រាប់ការហ្វឹកហាត់ និងទទួលជាម្ចាស់ផ្ទះ ក្នុងជំនួបជាមួយក្រុមបាល់ទាត់នានា។ លើសពីនេះផងដែរក្រុមបាល់ទាត់នេះ នឹងជួយហ្វឹកហាត់ដល់ថ្នាលកីឡាករ-កីឡាការីនីបាល់ទាត់ខេត្តកំពង់ស្ពឺ ដោយគ្រូបង្ចឹកជំនាញ នឹងផ្លាស់ប្ដូរបទពិសោធន៍ជាមួយកីឡាករអាជីពផងដែរ។ កីឡដ្ឋាននេះ នឹងក្លាយជាទីតាំងបណ្ដុះបណ្ដាលថ្នាលកីឡាករ-កីឡាការីនីក្នុងខេត្តកំពង់ស្ពឺ ឲ្យកាន់តែមានសក្ដានុពល និងដើម្បីប្អូនៗកីឡាករ កីឡាការីនីក្នុងខេត្តកំពង់ស្ពឺ អាចបំពេញក្ដីស្រម៉ៃរបស់ខ្លួន៕

The post មកដឹងលម្អិត អំពីកីឡដ្ឋានខេត្តកំពង់ស្ពឺ ចំណាយថវិកាសាងសង់ជិត ៣ លានដុល្លារ សម្ពោធឲ្យប្រើប្រាស់នៅថ្ងៃនេះ appeared first on Kampuchea Thmey Daily.

កីឡដ្ឋានខេត្តកំពង់ស្ពឺ ត្រូវសម្ពោធដាក់ឲ្យប្រើប្រាស់ជាផ្លូវការ នៅថ្ងៃនេះ

sopheak khoun — Tue, 06 Sep 2022 01:20:11 +0000

កីឡដ្ឋានខេត្តកំពង់ស្ពឺ ត្រូវសម្ពោធដាក់ឲ្យប្រើប្រាស់ជាផ្លូវការ នៅថ្ងៃទី ៦ ខែកញ្ញា ឆ្នាំ ២០២២នេះ ក្រោមអធិបតីភាពលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។

កីឡដ្ឋានខេត្តកំពង់ស្ពឺនេះ បានរៀបចំពិធីក្រុងពាលី បើកការដ្ឋានសាងសង់ជាផ្លូវការ កាលពីថ្ងៃទី ២១ ខែកុម្ភៈ ឆ្នាំ ២០ ២១ ក្រោមគំនិតផ្ដួចផ្ដើមរបស់ឯកឧត្តម ហ៊ុន ម៉ានី តំណាងរាស្រ្ដមណ្ឌលកំពង់ស្ពឺ និងជាប្រធានសហភាពសហព័ន្ធយុវជនកម្ពុជា (ស.ស.យ.ក) ដោយចំណាយថវិកាប្រមាណជិត ៣លានដុល្លារ។ កីឡដ្ឋានបាល់ទាត់ខេត្តកំពង់ស្ពឺ ជាកីឡដ្ឋានដែលមានលក្ខណៈស្ដង់ដារមួយ ហើយមានទីតាំងស្ថិតនៅភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ ដោយសាងសង់លើផ្ទៃដីជាង ៤ហិកតា។

កីឡដ្ឋានខេត្តកំពង់ស្ពឺ នឹងក្លាយជាទីលានគោលរបស់ក្រុមបាល់ទាត់ NagaWorld FC ដែលក្រុមបាល់ទាត់នេះ នឹងយកទីតាំងកីឡដ្ឋាននេះ សម្រាប់ការហ្វឹកហាត់ និងជាទីតាំងម្ចាស់ផ្ទះ ទទួលការប្រកួតជាមួយក្រុមបាល់ទាត់នានា ទាំងក្នុងប្រទេស និងក្រុមបាល់ទាត់អន្ដរជាតិ។ ក្នុងដំណាក់កាលទី ១ នៃការសាងសង់ ដែលបានបញ្ចប់ការសាងសង់ដោយជោគជ័យនេះ កីឡដ្ឋានខេត្តកំពង់ស្ពឺ មានកន្លែងអង្គុយចំនួន ៣០០០កៅអី និងទីតាំងសម្រាប់ភ្ញៀវ VIP។

លើសពីនេះទៅទៀតក្រុមបាល់ទាត់ NagaWorld FC នឹងគាំទ្រដល់ការហ្វឹកហាត់សមត្ថភាពកីឡាករ- កីឡាការីនីខេត្តកំពង់ស្ពឺ ដោយគ្រូបង្វឹកជំនាញ និងផ្លាស់ប្ដូរបទពិសោធន៍ជាមួយកីឡាករអាជីពរបស់ក្រុមបាល់ទាត់នេះ ផងដែរ។ នេះបើយោងតាមទំព័រហ្វេសប៊ុកឈ្មោះថា កីឡដ្ឋានកំពង់ស្ពឺ-Kampong Speu Stadium។

កាលពីថ្ងៃទី ២៥ ខែសីហាកន្លងទៅនេះ ឯកឧត្ដម ហ៊ុន ម៉ានី ដែលជាអ្នកផ្ដួចផ្ដើមសាងសង់កីឡដ្ឋាននេះឡើង បានលើកឡើងថា កីឡដ្ឋានខេត្តកំពង់ស្ពឺនេះ ជាសមិទ្ធផលថ្មីមួយ ដែលនឹងលើកកម្ពស់មុខមាត់បន្ថែមទៀតដល់ខេត្តកំពង់ស្ពឺ ជាមួយនឹងការអភិវឌ្ឍរីកចម្រើនគ្រប់វិស័យផ្សេងទៀត ក្រោមម្លប់នៃសុខសន្តិភាព។ ឯកឧត្ដម ហ៊ុន ម៉ានី បានអំពាវនាវឲ្យប្រជាពលរដ្ឋ ចូលរួមគាំទ្រ និងថែរក្សាកីឡដ្ឋាននេះដើម្បីជាប្រយោជន៍ ដល់ការលើកកម្ពស់វិស័យកីឡាក្នុងខេត្តកំពង់ស្ពឺផង និងឈានឆ្ពោះទៅបង្កើតស្នាដៃថ្មីលើឆាកជាតិ និងអន្តរជាតិបន្ថែមទៀត៕

The post កីឡដ្ឋានខេត្តកំពង់ស្ពឺ ត្រូវសម្ពោធដាក់ឲ្យប្រើប្រាស់ជាផ្លូវការ នៅថ្ងៃនេះ appeared first on Kampuchea Thmey Daily.

CAMSOC ចុះពិនិត្យសាលសម្រាប់ត្រៀមការប្រកួតកីឡា ក្នុងសាលស៊ីហ្គេម និងអាស៊ានប៉ារ៉ាហ្គេម ២០២៣

Sorn Phanith — Wed, 01 Sep 2021 07:29:38 +0000

អគ្គលេខាធិការគណៈកម្មាធិការជាតិ រៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) នៅព្រឹកថ្ងៃទី១ ខែកញ្ញានេះ បានដឹកនាំគណៈកម្មការជំនាញ ដើម្បីពិនិត្យពីលក្ខណៈបច្ចេកទេសនៃសាល សម្រាប់ត្រៀមរៀបចំការប្រកួតកីឡាស៊ីហ្គេម ឆ្នាំ២០២៣។

លោក វ៉ាត់ ចំរើន បញ្ជាក់ថា «ការចុះត្រួតពិនិត្យនេះ មានគណៈកម្មការជំនាញរបស់ CAMSOC ដូចជាគណៈកម្មការទីលានប្រកួត គណៈកម្មការបទប្បញ្ញត្តិ ដើម្បីត្រៀមរៀបចំទីលានកីឡាក្នុងសាល នៅទីនេះឲ្យចេញជាផែនការច្បាស់លាស់ ដើម្បីទទួលធ្វើម្ចាស់ផ្ទះស៊ីហ្គេម-អាស៊ានប៉ារ៉ាហ្គេម ឆ្នាំ២០២៣។ តាមការចង្អុលបង្ហាញរបស់លោកបណ្ឌិត ថោង ខុន រដ្ឋមន្ត្រីក្រសួងទេស ចរណ៍ និងជាអនុប្រធានអចិន្ត្រៃយ៍CAMSOC បានណែនាំនិងជំរុញឲ្យគ្រប់គណៈកម្មការជំនាញរបស់ខ្លួនទាំងអស់រៀបចំសកម្មភាពការងារទាំង អស់ឲ្យបានរួចរាល់ ត្រឹមដំណាច់ឆមាសទី២ ឆ្នាំ ២០២១នេះ ស្របតាមអនុសាសន៍ដ៏ខ្ពង់ខ្ពស់របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC»។

ក្រោយការត្រួតពិនិត្យឃើញថា សាលទាំងនេះមានស្តង់ដារបច្ចេកទេសខ្ពស់ល្អមានហេដ្ឋារចនា សម្ព័ន្ធបន្ទប់ទីធ្លាចតយានយន្តជាដើមនោះ មានលក្ខណៈសមស្រប ដែលអាចរៀបចំការតុបតែងលម្អ បំពាក់សម្ភារការប្រកួតបានយ៉ាងល្អប្រសើរ ។

លោក វ៉ាត់ ចំរើន បានបញ្ជាក់ថា ទីតាំងសាលនេះ មានភាពសមស្របសម្រាប់ការរៀបចំការ ប្រកួតកីឡាក្នុងសាលតាមស្តង់ដារអន្តរជាតិ ហើយស័ក្ដិសមនឹងកិត្តិយសរបស់ម្ចាស់ផ្ទះស៊ីហ្គេមអាស៊ានប៉ារ៉ាហ្គេមឆ្នាំ២០២៣។ ជាមួយគ្នានោះលោកនាយកប្រតិបត្តិក្រុមហ៊ុនOCICក៏បានចូលរួមក្នុងការត្រួតពិនិត្យសាលនេះ ជាមួយនឹងការធ្វើបទបង្ហាញពីសារសំខាន់ៗនៃសាលនេះ ព្រមទាំងផ្តល់ការគាំទ្រយ៉ាងពេញទំហឹង ចំពោះការរៀបចំសាលនេះ ឲ្យក្លាយជាទីលានប្រកួតកីឡាក្នុងសាលសម្រាប់ព្រឹត្តិការណ៍កីឡាដ៏ធំប្រចាំតំបន់អាស៊ីអាគ្នេយ៍ ជាប្រវត្តិសាស្ត្ររបស់ព្រះរាជាណាចក្រកម្ពុជាទៀតផង៕

អត្ថបទ៖ វិសិទ្ធ

The post CAMSOC ចុះពិនិត្យសាលសម្រាប់ត្រៀមការប្រកួតកីឡា ក្នុងសាលស៊ីហ្គេម និងអាស៊ានប៉ារ៉ាហ្គេម ២០២៣ appeared first on Kampuchea Thmey Daily.

អាជ្ញាធរខេត្ត សាមុតសាខន សម្រេចយកទីតាំងមួយនេះធ្វើជាមន្ទីរពេទ្យដាក់អ្នកជំងឺកូវីដ

Sok Chivon — Sun, 27 Dec 2020 01:01:29 +0000

ពហុកីឡដ្ឋានខេត្ត សាមុតសាខន ត្រូវបានគេយកធ្វើជាមន្ទីរពេទ្យបន្ថែមដើម្បីព្យាបាលអ្នកជំងឺកូវីដ ១៩ ដែលមានរោគសញ្ញាស្រាល បន្ទាប់ពីប្រជាជននៅក្នុងខេត្តជំទាស់នឹងសំណើរសុំប្រើប្រាស់ទីតាំងពីរផ្សេងទៀត ។

នៅក្នុងបទបញ្ជាដែលចុះហត្ថលេខាដោយអភិបាលខេត្តលោក Verasak Vichitsangsri កីឡដ្ឋានដែលមានទីតាំងនៅជិតលំនៅដ្ឋានរបស់អភិបាលខេត្តនឹងត្រូវប្រើជាមណ្ឌលថែទាំសម្រាប់ប្រជាជន សាមុតសាខន ។

ទន្ទឹមនោះមនុស្សដែលគ្មានការអនុញ្ញាតត្រូវបានហាមឃាត់មិនឲ្យចូលទៅក្នុងតំបន់នោះ ហើយអ្នករំលោភបំពានត្រូវទទួលការផ្តន្ទាទោសដាក់ពន្ធនាគាររយៈពេលមួយឆ្នាំ ពិន័យជាប្រាក់ ១០០,០០០ បាត ឬត្រូវជាប់ទាំងពីរតែម្ដង ក្រោមច្បាប់ស្តីពីការការពារជំងឺឆ្លង ហើយនឹងជាប់ពន្ធនាគាររយៈពេល ២ ឆ្នាំ ពិន័យជាប្រាក់ចំនួន ៤ ម៉ឺនបាត ឬជាប់ទាំងពីរ ក្រោមអនុក្រឹត្យប្រកាសអាសន្នដើម្បីប្រយុទ្ធប្រឆាំងនឹងជំងឺកូវីដ ១៩ ។

មជ្ឈមណ្ឌលនេះត្រូវបានកំណត់ដើម្បីផ្តល់ការព្យាបាល និងថែទាំអ្នកជំងឺកូវីដ ១៩ ដែលកំពុងសម្រាកព្យាបាល ។

បន្ថែមពីនេះវានឹងត្រូវបានបំពាក់ដោយអង្គភាពរដ្ឋបាល ឡានដឹកទំនិញធុនធ្ងន់ និងប្រព័ន្ធគ្រប់គ្រងកាកសំណល់ដែលបង្កគ្រោះថ្នាក់ដល់ជីវឧស្ម័នជាដើម ។

បទបញ្ជារបស់លោកអភិបាលខេត្តធ្វើឡើង បន្ទាប់ពីការបើកមន្ទីរពេទ្យនៅផ្សារបង្គាដែលជាចំណុចផ្ទុះថ្មីនៃការឆ្លងជំងឺកូវីដ ១៩ ក្នុងចំណោមពលករចំណាកស្រុក ។

ស្របពេលជាមួយនេះគ្រែចំនួន ២០០ នឹងត្រៀមសម្រាប់អ្នកជំងឺកូវីដ ១៩ ដែលមានរោគសញ្ញាស្រាល ។ ចំនួនគ្រែត្រូវបានគេរំពឹងថានឹងកើនឡើងដល់ ៥០០ នាក់នៅដំណាច់ឆ្នាំនេះ ។

គួរបញ្ជាក់ថា ផែនការរបស់អាជ្ញាធរខេត្តក្នុងការបង្កើតមន្ទីរពេទ្យនៅឯសាកលវិទ្យាល័យកីឡាជាតិខេត្ត សាមុតសាខុន និងនៅសួនទឹក Phan Thai Norasing ត្រូវបានជំទាស់ដោយអ្នកស្រុកដែលមានការព្រួយបារម្ភអំពីការរីករាលដាលនៃវីរុសនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ថៃកាន់តែធ្ងន់កហើយ! ឆ្លងមួយថ្ងៃជាងមួយរយនាក់ បាងកកឆ្លងច្រើនជាងគេ

ចុចអាន ៖ វ៉ាក់សាំងកូវីដរបស់ក្រុមហ៊ុន Moderna អាចបណ្តាលឲ្យអ្នកកែសម្ផស្ស ហើមមុខ

The post អាជ្ញាធរខេត្ត សាមុតសាខន សម្រេចយកទីតាំងមួយនេះធ្វើជាមន្ទីរពេទ្យដាក់អ្នកជំងឺកូវីដ appeared first on Kampuchea Thmey Daily.