កីឡាកាយវប្បកម្ម Archives - Kampuchea Thmey Daily

លោក តឹក ប៊ុនវី៖ សហព័ន្ធកីឡាកាយវប្បកម្មពិភពលោកនឹងជួយដោះស្រាយបញ្ហារឿងបញ្ជូនកីឡាករកម្ពុជាទៅប្រកួតនៅក្រៅ

Sina Noun — Thu, 21 May 2026 01:00:00 +0000

លោក តឹក ប៊ុនវី បន្ទាប់ពីវិលត្រឡប់មកពីប្រទេសមីយ៉ាន់ម៉ាក្នុងព្រឹត្តិការណ៍ប្រកួតជើងឯកអាស៊ីអាគ្នេយ៍វិញនេះបានឲ្យដឹងថា សហព័ន្ធកីឡាកាយវប្បកម្មពិភពលោកបានទទួលព័ត៌មានអំពីបញ្ហាបញ្ជូនកីឡាកររបស់កម្ពុជានៅព្រឹត្តិការណ៍អន្តរជាតិនេះហើយ។ សហព័ន្ធកាយវប្បកម្មពិភពលោកនឹងចូលរួមជួយដោះស្រាយអំពីបញ្ហារអាក់រអួលនេះ។

លោក តឹក ប៊ុនវី

ប្រធានសហព័ន្ធកីឡាកាយវប្បកម្មកម្ពុជាខាងលើនេះបន្ថែមទៀតថា ជំហានដំបូងនេះសហព័ន្ធពិភពលោកនឹងធ្វើលិខិតមួយផ្ញើមកកាន់កម្ពុជាដើម្បីសាមីសហព័ន្ធនាំយកទៅប្រគល់ជូនភាគីពាក់ពាក់ព័ន្ធរួមទាំងទីភ្នាក់ងារកម្ពុជាប្រឆាំងដូប៉ា-CADA នៃក្រសួងអប់រំ ដើម្បីស្នើសុំឱ្យមានដំណោះស្រាយសម្របសម្រួលត្រៀមបញ្ជូនកីឡាករចូលរួមប្រកួតជើងឯកពិភពលោក នៅប្រទេសឡាវ ចុងឆ្នាំ២០២៦។ ករណីលិខិតនេះមិនទាន់អាចប្រើប្រាស់ក្នុងការសម្របសម្រួលបាន ឬត្រូវការព័ត៌មានអ្វីបន្ថែមទៀតនោះសហព័ន្ធកាយវប្បកម្មពិភពលោកនឹងជួយជាបន្តបន្ទាប់ទៀត។

ក្រុមកាយវប្បកម្មកម្ពុជា

អតីតកីឡាករជើងខ្លាំង និងជាថ្នាក់ដឹកនាំសហព័ន្ធរូបនេះសង្ឃឹមថានឹងមានការសម្របសម្រួលបានកាន់តែឆាប់ និងអនុញ្ញាតឲ្យក្រុមកាយវប្បកម្មកម្ពុជាបានចេញទៅប្រកួតវិញជាធម្មតា។ មួយវិញទៀតដើម្បីឲ្យក្រុមកីឡាករជម្រើសជាតិកម្ពុជាបានប្រមូលអារម្មណ៍ឡើងវិញ និងត្រៀមខ្លួនឲ្យបានល្អគ្រប់គ្រាន់នៅពេលខាងមុខដើម្បីប្រកួតដណ្ដើមកិត្តិយសជូនជាតិបន្តទៀត។

លោក តឹក ប៊ុនវី កាលនៅមីយ៉ាន់ម៉ា

បញ្ជាក់ដែរថា ការប្រកួតជ្រើសរើសជើងឯកអាស៊ីអាគ្នេយ លើកទី២០ នៅប្រទេសមីយ៉ាន់ម៉ា កាលអំឡុងថ្ងៃទី១៤ ដល់ ១៨ ឧសភា ឆ្នាំ២០២៦ នេះខាងកម្ពុជាមិនបានបញ្ជូនកីឡាករទៅចូលរួមប្រកួតប្រជែងមេដាយនោះទេ។ ករណីដែលកម្ពុជាមិនបានបញ្ជូនកីឡាករទៅនេះគឺដោយសារក្រសួងអប់រំបញ្ជាក់ថា កម្ពុជាជារដ្ឋហត្ថលេខី នៃអនុសញ្ញាអន្តរជាតិប្រឆាំងការប្រើប្រាស់សារធាតុដូប៉ាក្នុងកីឡា និងប្រតិបត្តិតាមក្រមប្រឆាំងសារធាតុដូប៉ាពិភពលោក-WADA ស្របពេលសហព័ន្ធកីឡាកាយវប្បកម្មកម្ពុជាមិនទាន់ស្ថិតក្រោមរចនាសម្ព័ន្ធ WADA នៅឡើយ៕

លោក តឹក ប៊ុនវី កាលនៅមីយ៉ាន់ម៉ា

អត្ថបទដោយ៖ នួន ស៊ីណា

The post លោក តឹក ប៊ុនវី៖ សហព័ន្ធកីឡាកាយវប្បកម្មពិភពលោកនឹងជួយដោះស្រាយបញ្ហារឿងបញ្ជូនកីឡាករកម្ពុជាទៅប្រកួតនៅក្រៅ appeared first on Kampuchea Thmey Daily.

សហព័ន្ធកីឡាកាយវប្បកម្មកម្ពុជា បញ្ចូនមន្ត្រីបច្ចេកទេសចូលរួមកាត់ក្ដីការប្រកួតជើងឯកអាស៊ីអាគ្នេយ៍ លើកទី២០

Sina Noun — Thu, 14 May 2026 07:48:56 +0000

មន្ត្រីសហព័ន្ធកីឡាកាយវប្បកម្មកម្ពុជា បានចេញដំណើរទៅប្រទេសមីយ៉ាន់ម៉ាហើយកាលពីល្ងាចថ្ងៃទី១៣ ខែឧសភា ឆ្នាំ២០២៦ នេះដើម្បីចូលរួមជាមន្ត្រីបច្ចេកទេសក្នុងការកាត់សេចក្ដីលើការប្រកួតជ្រើសរើសជើងឯកអាស៊ីអាគ្នេយ លើកទី២០ ។

លោក តឹក ប៊ុនវី ប្រធានសហព័ន្ធ

ជាមោទកភាពមួយសម្រាប់កម្ពុជាដែលសហព័ន្ធកីឡាកាយវប្បកម្មមានធនធានដែលជាមន្ត្រីចៅក្រមកម្រិតអន្តរជាតិច្រើនរូប និងតែងតែបង្ហាញមុខក្នុងការប្រកួតលើឆាកអន្តរជាតិជានិច្ចនាពេលកន្លងមកនេះ។ នេះជាការបង្ហាញដល់ឆាកអន្តរជាតិពីភាពរីកចម្រើនលើវិស័យកីឡាកាយវប្បកម្មរបស់កម្ពុជាដែលមានទាំងកីឡាករប្រកបដោយសមត្ថភាព និងមានទាំងមន្ត្រីបច្ចេកទេសកម្រិតអន្តរជាតិមិនចាញ់បណ្ដាប្រទេសផ្សេងៗនោះឡើយ។

លោក តឹក ប៊ុនវី ប្រធានសហព័ន្ធកីឡាកាយវប្បកម្មកម្ពុជា បានឲ្យដឹងមុនចេញដំណើរថា ការប្រកួតលើកនេះគឺកម្ពុជាបញ្ចូនតែមន្ត្រីបច្ចេកទេសនោះទេដើម្បីចូលរួមក្នុងការកាត់សេចក្ដីលើការប្រកួតជើងឯកអាស៊ីអាគ្នេយ៍ដែលធ្វើឡើងចាប់ពីថ្ងៃទី១៤ ដល់ ១៨ ខែឧសភា ឆ្នាំ២០២៦ នៅប្រទេសមីយ៉ាន់ម៉ា។

កម្មវិធីប្រកួត

ការចេញទៅលើកនេះដែរគឺមានបញ្ហារអាក់រអួលបន្តិចលើការអនុញ្ញាតឲ្យកីឡាករកម្ពុជាចូលរួមប្រកួតដណ្ដើមមុខមាត់ជូនជាតិមាតុភូមិ។ ក្នុងនាមសហព័ន្ធ និងជាអតីកកីឡាករជម្រើសជាតិឆ្លងកាត់ការប្រកួតជាច្រើនឆ្នាំមកនេះមានការអាក់អន់ចិត្តផងដែរចំពោះបញ្ហាមួយនេះ។ លោកថានឹងលើកយកបញ្ហាដែលជួបនៅពេលនេះទៅជជែកពិភាក្សាក្នុងកិច្ចប្រជុំអាស៊ីអាគ្នេយ៍នេះផងដែរដើម្បីរកដំណោះស្រាយសមស្របណាមួយដល់សហព័ន្ធកីឡាកាយវប្បកម្មកម្ពុជា។

បញ្ជាក់ដែរថា នៅល្ងាចថ្ងៃទី១៣ ខែឧសភា ឆ្នាំ២០២៦ ម្សិលមិញនេះមន្ត្រីសហព័ន្ធកីឡាកាយវប្បកម្មចំនួន ២រូបបានចេញដំណើរទៅប្រទេសមីយ៉ាន់ម៉ាហើយដើម្បីបំពេញការកិច្ចជាមន្ត្រីបច្ចេកទេស។ ការប្រកួតជ្រើសរើសជើងឯកអាស៊ីអាគ្នេយ៍ លើកទី២០ នេះចាប់ផ្ដើមពីថ្ងៃទី១៤ ដល់ ១៨ ខែឧសភា ឆ្នាំ២០២៦ ដោយមានបណ្ដាប្រទេសក្នុងចំបន់អាស៊ានចូលរួម៕

អត្ថបទដោយ៖ នួន ស៊ីណា

The post សហព័ន្ធកីឡាកាយវប្បកម្មកម្ពុជា បញ្ចូនមន្ត្រីបច្ចេកទេសចូលរួមកាត់ក្ដីការប្រកួតជើងឯកអាស៊ីអាគ្នេយ៍ លើកទី២០ appeared first on Kampuchea Thmey Daily.

ស្រិន រាជ្យ ប្រាប់ពីគម្រោងបន្តនៅជាមួយកីឡាកាយវប្បកម្ម ឬទេបន្ទាប់ពីរៀបការអំឡុងខែឧសភានេះហើយ

Sina Noun — Wed, 29 Apr 2026 02:23:08 +0000

កីឡាករ ស្រិន រាជ្យ ដែលជាម្ចាស់មេដាយសំរឹទ្ធកីឡាកាយវប្បកម្មពិភពលោក ២ជំនាន់ថា បើទោះជារៀបការរួចនៅពេលឆាប់ខាងមុខនេះក៏ដោយរូបគេនៅបន្តហ្វឹកហាត់ ឬលេងកីឡាមួយនេះតទៀតបន្ទាប់ពីមានការផ្ដល់កម្លាំងចិត្តពីគូដណ្ដឹងឲ្យបន្ត ព្រោះមានអ្នកស្រឡាញ់គាំទ្រ និងស្គាល់រូបគេច្រើន។

កីឡាករ ស្រិន រាជ្យ

កីឡាករ ស្រិន រាជ្យ បានឲ្យដឹងថា រូបគេនឹងចូលរោងការនៅពាក់កណ្ដាលខែឧសភា ឆ្នាំ២០២៦ ខែក្រោយនេះហើយនៅរាជធានីភ្នំពេញ។ យ៉ាងណាការប្រកួតកម្រិតអន្តរជាតិមួយចំនួនអំឡុង ២-៣ខែនេះរូបគេមិនបានចូលរួមនោះឡើយ ព្រោះជួនចំពេលរៀបការផង និងមិនមានពេលវេលាហ្វឹកហាត់គ្រប់គ្រាន់ ឬធ្វើសាច់នោះឡើយ។

ជើងខ្លាំងផ្នែកកាយវប្បកម្មរូបនេះបន្ថែមទៀតថា តាមគម្រោងរបស់លោកបន្ទាប់ពីរៀបការរួចនឹងបន្ថយការចេញប្រកួត ប៉ុន្តែគូដណ្ដឹងមិនចង់ឲ្យធ្វើបែបនេះឡើយ។ «បងមានគេស្គាល់ដោយសារកីឡាមួយនេះ បងតស៊ូជាមួយកីឡានេះយូរហើយ បើបងឈប់ បងនឹងបាត់បង់អ្វីគ្រប់យ៉ាងដែលមានកន្លងមក» សម្ដីគូដណ្ដឹង ស្រិន រាជ្យ។

ដូច្នេះកីឡាករជម្រើសជាតិផ្នែកកាយវប្បកម្មរូបគេនឹងនៅតែបន្តហ្វឹកហាត់ ឬចេញប្រកួតតទៅទៀតបើទោះជារូបគេរៀបការនៅអំឡុងខែឧសភាព ២០២៧ ខាងមុខនេះយ៉ាងណាក្ដី។

រាជ្យ និងគូដណ្ដឹង (រូបភាពលើហ្វេសបុក រាជ្យ)

បញ្ជាក់ដែរថា ស្រិន រាជ្យ ជាកីឡាករជម្រើសជាតិកម្ពុជាផ្នែកកីឡាកាយវប្បកម្ម និងធ្លាប់ឈ្នះមេដាយសំរឹទ្ធពិភពលោក ២គ្រឿង និងធ្លាប់មេដាយកម្រិតតំបន់ជាច្រើនគ្រឿងទៀតផងដែរ។ រូបគេបច្ចប្បន្ននេះជាកីឡាករចាស់វស្សាមួយរូបក្នុងសហព័ន្ធ និងបានជួយបង្ហាត់បង្រៀនអ្នកជំនាន់ក្រោយរួមទាំងសិស្សប្អូនផងដែរជាការរួមចំណែកពង្រីកផ្សព្វផ្សាយកីឡាមួយនេះ៕

ស្រិន រាជ្យ និងគូដណ្ដឹង

អត្ថបទដោយ៖ នួន ស៊ីណា

The post ស្រិន រាជ្យ ប្រាប់ពីគម្រោងបន្តនៅជាមួយកីឡាកាយវប្បកម្ម ឬទេបន្ទាប់ពីរៀបការអំឡុងខែឧសភានេះហើយ appeared first on Kampuchea Thmey Daily.

កីឡាករ ស្រ៊ិន រាជ្យ ថវិកាលើកទឹកចិត្តនេះនឹងយកទៅបន្តហ្វឹកហាត់ត្រៀមការប្រកួតអន្តរជាតិធំៗនៅឆ្នាំនេះ

Sina Noun — Mon, 13 Apr 2026 04:49:47 +0000

កីឡាករជម្រើសជាតិផ្នែកកីឡាកាយវប្បកម្មកម្ពុជា ស្រ៊ិន រាជ្យ ថាថវិកាដែលជាប្រាក់រង្វាន់លើកទឹកចិត្តដែលទើបទទួលបាននេះនឹងយកទៅប្រើប្រាស់លើការហ្វឹកហាត់បន្តទៅទៀតត្រៀមសម្រាប់ការប្រកួតធំៗកម្រិតអន្តរជាតិនាពេលខាងមុខនេះ។

ស្រ៊ិន រាជ្យ (ខាងឆ្វេងដៃ)

ជើងខ្លាំងផ្នែកកីឡាកាយវប្បកម្ម ស្រ៊ិន រាជ្យ បានឲ្យដឹងថា ថវិកាលើកទឹកចិត្តពីរាជរដ្ឋាភិបាលចំពោះមេដាយប្រាក់ ១គ្រឿងដែលខ្លួនឈ្នះនេះរូបគេនឹងយកទៅប្រើប្រាស់លើការហ្វឹកហាត់ជាបន្តទៀត។ ព្រោះកីឡាកាយវប្បកម្មវិធីត្រូវការចំណាយច្រើនលើរបបអាហារ និងការហ្វឹកហាត់នេះដើម្បីទទួលបានសាច់ល្អស្អាតត្រឹមត្រូវតាមស្ដង់ដា។

កីឡាករចាស់វស្សារូបនេះបន្ថែមទៀតថា រូបគេនឹងត្រូវត្រៀមការប្រកួតជើងឯកពិភពលោកនៅអំឡុងខែធ្នូខាងមុខនេះ ដូច្នេះប្រាក់រង្វាន់ដែលទើបទទួលបាននេះមិនហ៊ានដកប្រើប្រាស់ផ្ដេសផ្ដាសនោះឡើយ។ ការត្រៀមខ្លួននេះធ្វើឡើងរយៈពេល ៦ខែ ដូច្នេះទាំងការតំឡើងសាច់ ៣ខែ និងការសម្រក់មកវិញ ៣ខែទៀតត្រូវការចំណាយថវិកាច្រើន និងពេលវេលាយូរទើបអាចធ្វើឲ្យសាច់ល្អឈានដល់ការប្រកួតប្រជែងបាន។

កីឡាករ ស្រ៊ិន រាជ្យ

បញ្ជាក់ដែរថា កីឡាករ ស្រ៊ិន រាជ្យ កាលពីថ្ងៃទី១០ ខែមេសា ឆ្នាំ២០២៦ នេះក៏បានចូលរួមទទួលប្រាក់រង្វាន់លើកទឹកចិត្តពីរាជរដ្ឋាភិបាលផងដែរ។ រូបគេបានឈ្នះមេដាយប្រាក់ ១គ្រឿងទទួលបានប្រាក់រង្វាន់លើកទឹកចិត្ត ៨លានរៀល។ នៅខែធ្នូ ឆ្នាំ២០២៦ ខាងមុខនេះរូបគេនឹងត្រៀមខ្លួនចូលរួមការប្រកួតជើងឯកពិភពលោកជាថ្មីទៀតតំណាងកម្ពុជា៕

ស្រ៊ិន រាជ្យ និងគូដណ្ដឹង

អត្ថបទដោយ៖ នួន ស៊ីណា

The post កីឡាករ ស្រ៊ិន រាជ្យ ថវិកាលើកទឹកចិត្តនេះនឹងយកទៅបន្តហ្វឹកហាត់ត្រៀមការប្រកួតអន្តរជាតិធំៗនៅឆ្នាំនេះ appeared first on Kampuchea Thmey Daily.

អ្នកជំនាញកីឡាកាយវប្បកម្ម និយាយពីការដុះក្បាលពោះរបស់ប្រជាជនកម្ពុជានាពេលបច្ចុប្បន្ន

Sina Noun — Tue, 27 Jan 2026 03:58:41 +0000

អ្នកជំនាញកីឡាកាយវប្បកម្ម និងជាកីឡាករជម្រើសជាតិកម្ពុជាមួយរូប ថាដូចបានឃើញទាំងអស់គ្នាឥលូវនេះមានអ្នកដុះក្បាលពោះច្រើននៅកម្ពុជាដែលកក្តានេះគឺបណ្ដាលមកពីការញុំអាហារមិនសមស្រប ញុំលើសកំណត់ និងញុំជាតិអាកុលច្រើន។

រូបភាពតំណាង

កីឡាករ ស្រ៊ិន រាជ្យ បានឲ្យដឹងថា ដូចទៅហ្នឹងអ្នកគ្រប់គ្នាឃើញអីចឹងដែរមនុស្សប្រុសភាគច្រើនឥលូវនេះនៅកម្ពុជាមានដុះក្បាលពោះធំៗដែលបញ្ហាមួយនេះវានឹងផ្ដល់ការលំបាក ឬមានផលប៉ះពាល់ខ្លាំងដល់សុខភាពរស់នៅប្រចាំថ្ងៃតែម្ដង។

ម្ចាស់មេដាយសំរឹទ្ធពិភពលោករូបនេះបន្តទៀតថា កក្តាដែលធ្វើឲ្យមានដុះក្បាលពោះធំៗបែបនេះគឺដោយសារតែរបបអាហារញុំហួសប្រមាណ និងការញុំជាតិអាកុលផងដែរ។ អាហារដែលនាំឲ្យដុះក្បាលពោះនេះរួមមានញុំគ្រឿងផ្អែមច្រើន ញុំគ្រឿងបំពងច្រើន ញុំអាហារសម្រេចរូប ញុំសាច់ជាប់ខ្លាញ់ច្រើន និងញុំគ្រឿងអាកុលច្រើនផងដែរ។

កីឡាករ ស្រ៊ិន រាជ្យ

កីឡាករជម្រើសជាតិ និងជាគ្រូបង្ហាត់បែបសុខភាពរូបនេះបន្តទៀតថា បើតាមបទពិសោធបង្ហាត់សិស្សកន្លងមកអ្នកដែលចង់សម្រកក្បាលពោះនេះគឺចំណាយពេលចាប់ពី ៤ខែ ទៅ ៦ខែ ឬឈានដល់ទៅមួយឆ្នាំអាស្រ័យលើការតមអាហាររបស់អ្នកហ្វឹកហាត់ម្នាក់ៗ។

រូបភាពតំណាង

បញ្ជាក់ដែរថា នៅកម្ពុជានាពេលបច្ចុប្បន្ននេះគេសង្កេតឃើញថាមានអ្នកដុះក្បាលពោះច្រើនពិសេសនោះគឺបុរសៗតែម្ដង។ កីឡាករ ស្រ៊ិន រាជ្យ ជាអ្នកជំនាញមួយរូបលើប្រភេទកីឡាកាយវប្បកម្មនេះ និងមានបទពិសោធហ្វឹកហាត់ និងបង្ហាត់សិស្សជាច្រើនឆ្នាំមកហើយរួមទាំងផ្នែកសម្រកក្បាលពោះកន្លងមក៕

អត្ថបទដោយ៖ នួន ស៊ីណា

The post អ្នកជំនាញកីឡាកាយវប្បកម្ម និយាយពីការដុះក្បាលពោះរបស់ប្រជាជនកម្ពុជានាពេលបច្ចុប្បន្ន appeared first on Kampuchea Thmey Daily.

ម្ចាស់មេដាយពិភពលោក ស្រ៊ិន រាជ្យ បង្ហើបពីគម្រោងរៀបការក្រោយស្វែងយល់ចិត្តគ្នាហើយ

Sina Noun — Tue, 23 Dec 2025 02:13:30 +0000

កីឡាករកាយវប្បកម្ម និងជាម្ចាស់កម្រិតពិភពលោក ២ជំនាន់ ស្រ៊ិន រាជ្យ ថាបន្ទាប់ពីខ្លួន និងគូដណ្ដឹងបានភ្ជាប់ពាក្យរួចហើយនេះគ្រោងនឹងរៀបការអំឡុងខែឧសភា ឆ្នាំ២០២៦ ខាងមុខនេះហើយបន្ទាប់ពីបានស្វែងយល់ចិត្តគ្នារួចរាល់នាពេលកន្លងមក។

ស្រ៊ិន រាជ្យ ពេលឈ្នះមេដាយកន្លងមក

ម្ចាស់មេដាយសំរឹទ្ធពិភពលោកនៅប្រទេសឥណ្ឌូណេស៊ី កីឡាករ ស្រ៊ិន រាជ្យ បានឲ្យដឹងថា គូដណ្ដឹងរបស់ខ្លួននេះគឺបានស្គាល់គ្នានៅកន្លែងហាត់ប្រាណ Elite Fintess បណ្ដោយផ្លូវវេងស្រេង រាជធានីភ្នំពេញ អំឡុងពេលខ្លួនហ្វឹកហាត់យកសាច់ត្រៀមប្រកួតកន្លងមក។

កីឡាករ ស៊្រិន រាជ្យ និងគូដណ្ដឹង

ដោយមានចំណងចំណូលចិត្តខាងផ្នែកកីឡាពិសេសសហាត់ប្រាណយកសាច់ដូចគ្នាផងនោះ និងជានិស្ស័យផងទើបជំរុញឲ្យខ្លួនបានចាប់ផ្ដើមស្វែងយល់ចិត្តគ្នារហូតសម្រេចភ្ជាប់ពាក្យរួចរាល់ហើយកាលពីពេលថ្មីៗនេះ។ កីឡាករជម្រើសជាតិផ្នែកកីឡាកាយវប្បកម្មវរូបនេះគ្រោងនឹងចូលរោងការនៅថ្ងៃទី១៤-១៥ ខែឧសភា ឆ្នាំ២០២៥ នៅរាជធានីភ្នំពេញ។

កីឡាករ ស៊្រិន រាជ្យ និងគូដណ្ដឹង

បញ្ជាក់ដែរថា ស្រ៊ិន រាជ្យ ជាកីឡាករជម្រើសជាតិផ្នែកកីឡាកាយវប្បកម្មកម្ពុជា និងជាធនធានសំខាន់មួយរូបសម្រាប់សហព័ន្ធទាំងការចេញទៅប្រកួត និងចូលរួមបណ្ដុះបណ្ដាលថ្នាលបន្តវេនទៀត។ រូបគេធ្លាប់ឈ្នះមេដាយសំរឹទ្ធពិភពលោក ២គ្រឿងអមជាមួយពាន ធ្លាប់ឈ្នះមេដាយប្រាក់អាស៊ីអាគ្នេយ៍ ១គ្រឿងអមដោយពាន។ កាលពីថ្ងៃទី២១ ខែធ្នូ ឆ្នាំ២០២៥ នេះរូបគេនិងកញ្ញា លីម កាំម៉ី បានភ្ជាប់ពាក្យរួចរាល់ផងដែរ៕

អត្ថបទដោយ៖ នួន ស៊ីណា

The post ម្ចាស់មេដាយពិភពលោក ស្រ៊ិន រាជ្យ បង្ហើបពីគម្រោងរៀបការក្រោយស្វែងយល់ចិត្តគ្នាហើយ appeared first on Kampuchea Thmey Daily.

កីឡាកាយវប្បកម្ម ការឈ្នះមេដាយមិនផ្ដោតលើតែសាច់ដុំមួយផ្នែកប៉ុណ្ណោះទេ

Sina Noun — Thu, 11 Dec 2025 02:41:55 +0000

ម្ចាស់មេដាយសំរឹទ្ធពិភពលោក កីឡាករ ស្រ៊ិន រាជ្យ ថាកីឡាកាយវប្បកម្មនេះគឺមិនផ្ដោតលើតែសាច់ដុំមួយផ្នែកហើយឈ្នះមេដាយនោះទេ ពោលមានច្រើនវិញ្ញាសាដូចជាមានមុខមាត់ស្អាត និងកាយវិការសម្ដែងបង្ហាញស៊ីមីទ្រីគ្នាសុទ្ធតែជាំចំណុចនៃការទទួលបានពិន្ទុ។

មេដាយពិភពលោកដែល ស្រ៊ិន រាជ្យ ឈ្នះ

កីឡាករ ស្រ៊ិន រាជ្យ បានឲ្យដឹងថា កីឡាកាយវប្បកម្មនេះគឺមិនផ្ដោតលើតែសាច់ដុំទាំងស្រុងនោះទេទើបអាចឈ្នះមេដាយបាននោះ។ ការឈ្នះមេដាយបានផ្អែកទៅតាមចំណុចសំខាន់ៗនៃវិញ្ញាសាផ្សេងៗគ្នានោះឧទាហរណ៍ដូចជា ការបង្ហាញមានភាពស៊ីមីទ្រីគ្នាជាមួយរាងកាយបានល្អ វិញ្ញាសាខ្លះផ្ដោតលើភាពស្រស់សង្ហាជាមួយសាច់ដុំ និងវិញ្ញាសាខ្លះផ្ដោតលើតែសាច់ដុំធំៗក៏មានដែរ។ ដូច្នេះការឈ្នះមេដាយមិនផ្ដោតលើតែសាច់ស្រុងដូចបានរៀបរាប់អីចឹង។

ស្រ៊ិន រាជ្យ ពេលឈ្នះមេដាយនៅឥណ្ឌូណេស៊ី

ម្ចាស់មេដាយសំរឹទ្ធពិភពលោកខាងលើបន្តទៀតថា ចំពោះជ័យជម្នះ ឬសមិទ្ធផលសម្រាប់ឆ្នាំ២០២៥ ប៉ុណ្ណេះគឺអាចទទួលយកបាន ព្រោះស័ក្តិសមទៅហ្នឹងការខំប្រឹងប្រែង និងភាពជាក់ស្ដែងនៃការចាញ់ទម្ងន់ដៃគូប្រកួតរហូតដល់ទៅ ៤គីឡូក្រាមបែបនេះ។ ដូច្នេះមេដាយសំរឹទ្ធពិភពលោកនៅឥណ្ឌូណេស៊ីនេះមិនអន់ពេក ឬមិនល្អខ្លាំងប៉ុន្មានដែរសម្រាប់ខ្លួន។

មេដាយពិភពលោកដែល ស្រ៊ិន រាជ្យ ឈ្នះ

បញ្ជាក់ដែរថា កីឡាករ ស្រ៊ិន រាជ្យ ជាជម្រើសជាតិនៃសហព័ន្ធកីឡាកាយវប្បកម្មកម្ពុជា។ រូបគេជាជើងខ្លាំងមួយរូបប្រចាំសហព័ន្ធដោយធ្លាប់ឈ្នះមេដាយអន្តរជាតិជាច្រើនគ្រឿងជូនកម្ពុជា។ ថ្មីៗនេះរូបគេទើបឈ្នះមេដាយសំរឹទ្ធពិភពលោកជាលើកទី២ លើវិញ្ញាសា ស្ព័តម៉ូដែល ទម្ងន់ធ្ងន់ និងកម្ពស់ ១.៨០ Cm ឡើង៕

អត្ថបទដោយ៖ នូន ស៊ីណា

The post កីឡាកាយវប្បកម្ម ការឈ្នះមេដាយមិនផ្ដោតលើតែសាច់ដុំមួយផ្នែកប៉ុណ្ណោះទេ appeared first on Kampuchea Thmey Daily.

កីឡាករ ស្រ៊ិន រាជ្យ មេដាយកិត្តិយសដែលទទួលបានពីសហព័ន្ធកាយវប្បកម្មគឺមានអត្ថន័យណាស់សម្រាប់ខ្លួន

Sina Noun — Thu, 27 Nov 2025 02:09:19 +0000

ម្ចាស់មេដាយសំរឹទ្ធពិភពលោក ២ជំនាន់ កីឡាករ ស្រ៊ិន រាជ្យ ថាមេដាយកិត្តិយសដែលសហព័ន្ធកីឡាកាយវប្បកម្មគឺពិតជាមានអត្ថន័យណាស់សម្រាប់ខ្លួនចំពោះការខំប្រឹងប្រែងជួយជំរុញ និងអភិវឌ្ឍន៍របស់ខ្លួនកន្លងមកជាមួយកីឡាមួយនេះជាង ៣ឆ្នាំ។

មេដាយដែល ស្រ៊ិន រាជ្យ ទទួលបាន

កីឡាករ ស្រ៊ិន រាជ្យ បានឲ្យដឹងថា មេដាយដែលសហព័ន្ធបានផ្ដល់ជូននេះគឺជាមេដាយកិត្តិយសដែលរូបលោកបានជួយលើកស្ទួយ និងអភិវឌ្ឍន៍កីឡាកាយវប្បកម្មនេះ ដូចជាការចេញទៅប្រកួតតំណាងឲ្យកម្ពុជា ជួយបណ្ដុះធនធានកីឡាករ និងការទៅបំពេញវគ្គសិក្សាផ្សេងៗនៅលើឆាកអន្តរជាតិរយៈពេលជាង ៣ឆ្នាំមកនេះ។

ស្រ៊ិន រាជ្យ កណ្ដាល

ម្ចាស់មេដាយសំរឹទ្ធពិភពលោក ២ជំនាន់រូបនេះបន្តទៀតថា លោកក៏មិននឹកស្មានថាទទួលបានមេដាយ ឬមានជាការតបស្នងវិញពីសហព័ន្ធបែបនេះទេ ពោលការចូលរួមអភិវឌ្ឍន៍កីឡាមួយនេះគឺដោយទឹកចិត្តស្រឡាញ់ និងចង់ឲ្យសហព័ន្ធមានភាពរីកចម្រើនទាំងសកម្មភាពផ្សព្វផ្សាយ ទាំងកំណើនធនធានកីឡាករ កីឡាការិនី ពិសេសមានការប្រកួតប្រជែងកាន់តែខ្ពស់លើឆាកអន្តរជាតិ។

មេដាយដែល ស្រ៊ិន រាជ្យ ទទួលបាន

បញ្ជាក់ដែរថា មេដាយកិត្តិយសដែលកីឡាករ ស្រ៊ិន រាជ្យ បានទទួលពីសហព័ន្ធកីឡាកាយវប្បកម្មនេះគឺអំឡុងពេលការប្រកួតជើងឯកថ្នាក់ជាតិ កាលពិថ្ងៃទី២៣ ខែវិច្ឆិកា ឆ្នាំប្រចាំ២០២៥ ថ្មីៗនេះ។ អំឡុងការប្រកួតជើងឯកថ្នាក់ជាតិនេះរូបគេក៏បានធ្វើជាគណៈកម្មការរៀបចំផងដែរ។ ស្រ៊ិន រាជ្យ ជាកីឡាករឆ្នើមមួយរូបរបស់សហព័ន្ធ និងតែងតែនាំយកមេដាយលើឆាកអន្តរជាតិជូនប្រទេសកម្ពុជាពិសេសថ្មីៗនេះរូបគេទើបឈ្នះមេដាយសំរឹទ្ធ ១គ្រឿងទៀតក្នុងការប្រកួតកីឡាកាយវប្បកម្មពិភពលោកដែលធ្វើនៅប្រទេសឥណ្ឌូណេស៊ី៕

មេដាយដែល ស្រ៊ិន រាជ្យ ទទួលបាន

ស្រ៊ិន រាជ្យ និងគ្រូៗកាលនៅឥណ្ឌូណេស៊ី

អត្ថបទដោយ៖ នួន ស៊ីណា

The post កីឡាករ ស្រ៊ិន រាជ្យ មេដាយកិត្តិយសដែលទទួលបានពីសហព័ន្ធកាយវប្បកម្មគឺមានអត្ថន័យណាស់សម្រាប់ខ្លួន appeared first on Kampuchea Thmey Daily.

កីឡាកាយវប្បកម្ម Archives - Kampuchea Thmey Daily

អ្នក​ជំនាញ​កីឡា​កាយវប្បកម្ម ​និយាយ​ពី​ការ​ដុះ​ក្បាលពោះ​របស់​ប្រជាជន​កម្ពុជា​នា​ពេល​បច្ចុប្បន្ន​

ម្ចាស់មេដាយពិភពលោក​ ស្រ៊ិន​ រាជ្យ​ បង្ហើប​ពីគម្រោងរៀបការក្រោយ​ស្វែងយល់​ចិត្ត​គ្នា​ហើយ​

កីឡា​កាយវប្បកម្ម​ ការ​ឈ្នះ​មេដាយ​មិន​ផ្ដោត​លើ​តែ​សាច់​ដុំ​មួយ​ផ្នែក​ប៉ុណ្ណោះ​ទេ​

អ្នកជំនាញកីឡាកាយវប្បកម្ម និយាយពីការដុះក្បាលពោះរបស់ប្រជាជនកម្ពុជានាពេលបច្ចុប្បន្ន

ម្ចាស់មេដាយពិភពលោក ស្រ៊ិន រាជ្យ បង្ហើបពីគម្រោងរៀបការក្រោយស្វែងយល់ចិត្តគ្នាហើយ

កីឡាកាយវប្បកម្ម ការឈ្នះមេដាយមិនផ្ដោតលើតែសាច់ដុំមួយផ្នែកប៉ុណ្ណោះទេ