កីឡាបាល់ទាត់ជាតិ Archives - Kampuchea Thmey Daily

ក្រុមអ្នកសារព័ត៌មានកម្ពុជា ប៉ះ សមាគមធនាគារនៅកម្ពុជា ក្នុងជំនួបមិត្តភាព ស៊ុតគ្នាដល់ ១២ គ្រាប់

Kosal Sem — Mon, 22 Jun 2026 07:52:16 +0000

ក្រុមបាល់ទាត់អ្នកសារព័ត៌មានកម្ពុជា (Cambodia Media football) និងក្រុមបាល់ទាត់សមាគមធនាគារនៅកម្ពុជា (ABC) បានជួបប្រកួតគ្នាលក្ខណៈមិត្តភាពជាលើកទី ២ នៅតារាងបាល់ទាត់ NBC Sports កាលពីល្ងាចថ្ងៃទី២០ ខែមិថុនា ឆ្នាំ២០២៦។

ការប្រកួតនេះ បានប្រព្រឹត្តទៅយ៉ាងរលូនរយៈពេល ៩០ នាទីពេញ ដោយពុំមានអ្នកឈ្នះ និងចាញ់ឡើយ ពោលគឺស្មើគ្នាក្នុងលទ្ធផល ៦ ទល់នឹង ៦។ អំឡុងពេលប្រកួត ក្រុមទាំង ២ បានបង្ហាញស្មារតីជាអ្នកកីឡាយ៉ាងពិតប្រាកដ ដោយលេងប្រកបដោយមិត្តភាព សាមគ្គីភាព និងយោគយល់គ្នាទៅវិញទៅមក។

លោក លឹម ជាវុត្ថា អគ្គនាយកអង្គភាពព័ត៌មាន Fresh News និងជាប្រធានក្រុមបាល់ទាត់អ្នកសារព័ត៌មានកម្ពុជា បានបង្ហាញនូវក្តីរីករាយ ដែលបានចូលរួមប្រកួតមិត្តភាព ជាមួយសមាគមធនាគារនៅកម្ពុជា ជាលើកទី២ ដែលជួយឱ្យចំណងមិត្តភាពរវាងអ្នកសារព័ត៌មានកម្ពុជា និងថ្នាក់ដឹកនាំរបស់គ្រឹះស្ថានធនាគារ កាន់តែស្និតស្នាល។

លោកបន្ថែមថា គោលបំណងនៃការប្រកួតបាល់ទាត់នេះ ដើម្បីតែមិត្តភាព និងសុខភាពប៉ុណ្ណោះ ហើយការប្រកួតនេះ គ្មានអ្នកឈ្នះ ក៏គ្មានអ្នកចាញ់ដែរ គឺឈ្នះទាំងអស់គ្នា ឈ្នះមិត្តភាព និងឈ្នះសុខភាព។ លោកបានអំពាវនាវដល់បងប្អូនប្រជាពលរដ្ឋ ពិសេសបងប្អូនអ្នកសារព័ត៌មាន ដែលមានសុខភាពមិនសូវល្អ សូមនាំគ្នាលេងកីឡាឱ្យបានគ្រប់ៗគ្នា។

ចំណែកលោក រ័ត្ន សោភ័ណ ប្រធានសមាគមធនាគារនៅកម្ពុជា និងនាយកប្រតិបត្តិ ក៏ដូចជានាយកប្រចាំប្រទេសនៃធនាគារ មេយប៊ែង ខេមបូឌា បានដឹកនាំសមាជិករបស់សមាគម ដែលជាប្រធាននាយកប្រតិបត្តិ និងថ្នាក់ដឹកនាំជាន់ខ្ពស់របស់ធនាគារនានានៅកម្ពុជា ចូលរួមក្នុងការប្រកួតបាល់ទាត់មិត្តភាពជាមួយក្រុមអ្នកសារព័ត៌មានកម្ពុជា។

លោក សោភ័ណ និងសមាជិកក្រុមទាំងសុទ្ធតែ បង្ហាញការសប្បាយរីករាយ ចំពោះការប្រកួតប្រកបដោយការយោគយល់គ្នាទៅវិញទៅមក។ ការប្រកួតបាល់ទាត់មិត្តភាពនេះ បានជួយឱ្យថ្នាក់ដឹកនាំរបស់បណ្តាគ្រឹះស្ថានធនាគារពាណិជ្ជកម្មនៅកម្ពុជា ស្គាល់ និងរាប់អានគ្នាជាលក្ខណៈបុគ្គល ជាមួយបងប្អូនអ្នកសារព័ត៌មានកាន់តែច្រើនជាងមុន ហើយពិសេសនោះ គឺជួយឱ្យយើងអាចស្គាល់ពីសុខភាពរបស់ខ្លួន និងចេះថែរក្សាសុខភាព។

ទន្ទឹមនឹងនេះ ប្រធានក្រុមទាំងពីរសុទ្ធតែអះអាងដូចគ្នាថា ការប្រកួតលើកទី២នេះ មិនមែនជាការប្រកួតលើកចុងក្រោយនោះទេ ពោលគឺនឹងមានការប្រកួតលើកក្រោយៗទៀត ដែលនឹងអាចរយៈពេល ២ ឬ ៣ ខែជួបគ្នាម្តង។

សូមជម្រាបថា ក្រុមបាល់ទាត់អ្នកសារព័ត៌មានកម្ពុជា មានការចូលរួមពីថ្នាក់ដឹកនាំស្ថាប័នព័ត៌មាន និងអ្នកសារព័ត៌មានជាច្រើនទៀតរួមមាន អង្គភាពព័ត៌មាន Fresh News, អង្គភាពអ្នកនាំពាក្យរាជរដ្ឋាភិបាល, ទីភ្នាក់ងារព័ត៌មានជាតិ (AKP), សារព័ត៌មានភ្នំពេញប៉ុស្តិ៍, សារព័ត៌មាន AMS, ទូរទស្សន៍ CNC, សារព័ត៌មាន KiriPost, សារព័ត៌មាន KhmerTime, សារព័ត៌មានកម្ពុជាថ្មី, សារព័ត៌មាន CCTimes, សារព័ត៌មាន Camboja, សារព័ត៌មានថ្មីថ្មី និងសារព័ត៌មានឧកញ៉ា News ។

ក្រុមបាល់ទាត់អ្នកសារព័ត៌មានកម្ពុជាក៏ បានសម្តែងការអរគុណជាពិសេស ដល់ធនាគារអភិវឌ្ឍន៍ជនបទ និងកសិកម្ម (ARDB) ផងដែរ ដែលបានចូលរួមឧបត្ថម្ភ ក្នុងការទ្រទ្រង់សកម្មភាពនៃការប្រកួតនានារបស់ខ្លួន៕

ប្រែសម្រួលអត្ថបទ៖ សេម កុសល

The post ក្រុមអ្នកសារព័ត៌មានកម្ពុជា ប៉ះ សមាគមធនាគារនៅកម្ពុជា ក្នុងជំនួបមិត្តភាព ស៊ុតគ្នាដល់ ១២ គ្រាប់ appeared first on Kampuchea Thmey Daily.

ភរិយារបស់កីឡាករ Patrick អរគុណប្រជាជនកម្ពុជាដែលតែងតែស្រឡាញ់ និងគាំទ្រប្ដីរបស់ខ្លួន

Sina Noun — Tue, 26 May 2026 02:04:10 +0000

ភរិយាកីឡាករ Patrick របស់ក្លឹបព្រះខ័នរាជស្វាយរៀង អរគុណចំពោះប្រជាជនកម្ពុជា និងអ្នកគាំទ្រដែលតែងតែស្រឡាញ់ចូលចិត្តប្ដីរបស់ខ្លួនអំឡុងការប្រកួតកន្លងទៅនេះ និងនាឱកាសក្រោយប្រសិនបើមានពេលខ្លួន និងក្រុមគ្រួសារនឹងមកលេងកម្ពុជាជាថ្មីទៀត។

ភរិយារបស់ Patrick

លោកស្រី Carolina Ribeiro ភរិយារបស់ Patrick បានឲ្យដឹងថា រូបគេបានមករស់នៅកម្ពុជានេះរយៈពេលប្រហែលមួយឆ្នាំមកហើយ។ ចំពោះការចងចាំដ៏ល្អ ឬអ្វីដែលមិនអាចបំភ្លេចបាននៅកម្ពុជានេះគឺប្រជាជនខ្មែរតែម្ដងមានភាពរួសរាយរាក់ទាក់។

ភរិយារបស់ Patrick បន្ថែមទៀតថា ខ្លួន និងស្វាមីគឺស្រឡាញ់ក្លឹបព្រះខ័នរាជស្វាយរៀង និងស្រឡាញ់ប្រជាជនកម្ពុជា។ នាឱកាសក្រោយៗប្រសិនបើមានពេលនោះរូបគេ និងគ្រួសារនឹងមកលេងប្រទេសកម្ពុជាជាថ្មីទៀតមិនខាន។ លោកស្រីថ្លែងអំណរគុណដល់អ្នកគាំទ្រប្ដីរបស់ខ្លួនទាំងអស់ដែលបានស្រឡាញ់ចូលចិត្តអំឡុងពេលលេងឲ្យក្លឹបព្រះខ័នរាជស្វាយរៀងនេះ។

គ្រួសាររបស់ Patrick

បញ្ជាក់ដែរថា ខ្សែប្រយុទ្ធក្លឹបព្រះខ័នរាជស្វាយរៀង កីឡាករ Patrick Robson នឹងចាកចេញពីកម្ពុជានៅពេលឆាប់ៗខាងមុខនេះដើម្បីទៅលេងនៅឯលីគប្រទេសឥណ្ឌូណេស៊ី។ កីឡាករសញ្ជាតិប្រេស៊ីលរូបគេមានអ្នកគាំទ្រច្រើននៅកម្ពុជាដោយសារតែរូបគេមានសមត្ថភាពលេងបានល្អនៅក្លឹបព្រះខ័នរាជស្វាយរៀង។ រូបគេបានជួយក្លឹបឲ្យឈ្នះពានរង្វាន់លីគកម្ពុជារដូវកាល ២០២៥-២០២៦ និងជួយក្លឹបឲ្យឈ្នះពានរង្វាន់សម្ដេចតេជោ ហ៊ុន សែន ឆ្នាំនេះទៀតផង៕

គ្រួសាររបស់ Patrick

The post ភរិយារបស់កីឡាករ Patrick អរគុណប្រជាជនកម្ពុជាដែលតែងតែស្រឡាញ់ និងគាំទ្រប្ដីរបស់ខ្លួន appeared first on Kampuchea Thmey Daily.

គ្រូព្រះខ័នរាជស្វាយរៀង សង្ឃឹមក្រោយការប្រកួតជាមួយ Manila Digger នេះទៅជាមោកទភាពមួយសម្រាប់ ម៉េងទា

Sina Noun — Wed, 08 Apr 2026 07:09:54 +0000

គ្រូបង្វឹកក្លឹបបាល់ទាត់ព្រះខ័នរាជស្វាយរៀង សង្ឃឹមថាក្រោយបញ្ចប់ការប្រកួតជាមួយ Manila Digger ថ្ងៃទី៩ ខែមេសា ឆ្នាំ២០២៦ នេះជាមោទកភាពមួយសម្រាប់លោក លី ម៉េងទា ដែលទើបទទួលមរណៈភាពថ្មីៗនេះ ខណៈក្រុមទាំងមូលនៅតែចងចាំអនុស្សាវរីយ៍ជាមួយគ្នា។

លោក Matthew McConkey

លោក Matthew McConkey ដែលជាគ្រូបង្វឹករបស់ក្រុមបាល់ទាត់ព្រះខ័នរាជស្វាយរៀង ថាប៉ុន្មានថ្ងៃកន្លងទៅនេះក្រុមទាំងមូលពិតជាមិនសប្បាយចិត្តនោះឡើយពិសេសអំឡុងការហ្វឹកហាត់។ ព្រោះកន្លងមកនៅកន្លែងហ្វឹកហាត់តែងតែឃើញមុខ លោក លី ម៉េងទា ជាមួយក្រុមជានិច្ច។

គ្រូបង្វឹកខាងលើបន្ថែមទៀតថា លោកសង្ឃឹមថាបន្ទាប់ពីបញ្ចប់ការប្រកួតជាមួយក្រុមភ្ញៀវ Manila Digger នេះទៅអាចជាមោទកភាពមួយសម្រាប់លោក លី ម៉េងទា ផងដែរ។ ក្រុមទាំងមូលនឹងខំប្រឹងប្រែងប្រកួតឲ្យបានល្អ និងធ្វើតាមផែនការដែលបានរៀបចំរួមមកដើម្បីដណ្ដើមជ័យជម្នះនៅវគ្គសំខាន់នេះជូនអ្នកគាំទ្រ និងលោក ម៉េងទា ។

មរណៈភាពលោក លី ម៉េងទា

បញ្ជាក់ដែរថា លោក លី ម៉េងទា ដែលជាក្រុមការងារគ្រប់គ្រងសម្ភាររបស់ក្លឹបបាល់ទាត់ព្រះខ័នរាជស្វាយរៀង បានទទួលមរណៈភាពកាលពីថ្ងៃទី៣០ ខែមីនា ឆ្នាំ២០២៦ ថ្មីៗនេះ។ នៅថ្ងៃទី៩ ខែមេសា ឆ្នាំ២០២៦ ស្អែកនេះក្រុមបាល់ទាត់ព្រះខ័នរាជស្វាយរៀង នឹងត្រូវប្រកួតវគ្គពាក់កណ្ដាលផ្ដាច់ព្រ័ត្រជើងទី១ នៃពានរង្វាន់ AFC Challenge League ជាមួយក្រុមមកពីហ្វីលីពីន Manila Digger នៅពហុកីឡដ្ឋានមរតកតេជោ៕

ក្រុមកីឡាករព្រះខ័នរាជស្វាយរៀងទៅបុណ្យលោក ម៉េងទា

ទិដ្ឋភាពសន្និសីទសារព័ត៌មានព្រឹកមិញ

អត្ថបទដោយ៖ នួន ស៊ីណា

The post គ្រូព្រះខ័នរាជស្វាយរៀង សង្ឃឹមក្រោយការប្រកួតជាមួយ Manila Digger នេះទៅជាមោកទភាពមួយសម្រាប់ ម៉េងទា appeared first on Kampuchea Thmey Daily.

លោក ឈិន ឈឿន៖ បាល់ទាត់សម័យទំនើបខ្សែប្រយុទ្ធក៏ត្រូវចេះការពារ ខ្សែការពារក៏ត្រូវចេះទាត់ទីដែរ

Sina Noun — Tue, 10 Mar 2026 08:52:32 +0000

អតីតកីឡាករជម្រើសជាតិ លោក ឈិន ឈឿន ថាក្នុងវិស័យបាល់ទាត់សម័យទំនើបនេះមិនថាខ្សែប្រយុទ្ធ ឬខ្មែរការពារនោះទេគឺត្រូវចេះទាំងអស់មិនថាការទាត់បញ្ជូលទី និងការចុះមកជួយការពារជាដើមដោយមិនប្រកាន់តួនាទីរបស់ខ្លួននោះឡើយ។

លោក ឈិន ឈឿន (ខាងឆ្វេង)

លោក ឈិន ឈឿន បានលើកឡើងក្នុងវីដេអូចែករំលែកថា នៅក្នុងវិស័យកីឡាបាល់ទាត់បែបទំនើបនេះការពារគឺកីឡាករចុះមកការពារជាក្រុម និងពេលមានបាល់គឺកីឡាករឡើងប្រយុទ្ធជាក្រុមដូចគ្នាដែលនេះគឺខុសពីជំនាន់មុនៗ។ ចំណុចល្អមួយនេះគឺជួយក្រុមបានច្រើនអំឡុងការប្រកួតពិសេសនោះគឺមិនថាពេលខ្លួនឯងបាត់បាល់ ឬមិត្តរួមក្រុមបាត់បាល់ទេ ពោលមានស្មារតីជាក្រុម និងចង់ឈ្នះជូនចង់ជួយក្រុមតែម្ដង។

កីឡាករ BENTO របស់បឹងកេត

គ្រូបង្វឹករបស់ក្រុមបាល់ទាត់តារាកម្ពុជាខាងលើបន្ថែមទៀតថា ជាក់ស្ដែងលោកពិតជាសរសើរចំពោះកីឡាករលេខ៧ របស់ក្រុមបាល់ទាត់បឹងកេតគឺ BENTO IAGO តែម្ដង។ រាល់ពេលបាត់បាល់គឺរូបគេតែងតែដេញយកបាល់វិញ ឬតែងតែចុះជួយក្រុមជានិច្ចដោយមិនប្រចាំតួនាទីនោះឡើយ។ សកម្មភាពបែបនេះគឺមានផលល្អខ្លាំងចំពោះក្រុម និងមិនសូវបង្កជាបញ្ហាខ្លាំងចំពោះក្រុមទេ។ ប្រសិនបើកីឡាករមានឆន្ទៈ ឬយល់ឃើញដូច BENTO IAGO កាន់តែច្រើនជឿជាក់ក្រុមទទួលបានផលល្អច្រើនដូចគ្នា។

រូបភាព CPL

បញ្ជាក់ដែរថា លោក ឈិន ឈឿន អតីតកីឡាករបាល់ទាត់ក្លឹបកងយោធពលខេមរភូមិន្ទ និងអតីកីឡាករជម្រើសជាតិកម្ពុជាផងដែរ។ រូបគេចូលនិវត្តន៍ពីបាល់ទាត់អំឡុងឆ្នាំ២០២២ ដោយសារបញ្ហារបួសជង្គង់។ បើទោះជាអតីតខ្សែការពាររូបនេះចូលនិវត្តន៍មែន ប៉ុន្តែមហាជនតែងតែឃើញរូបគេមានសកម្មភាពជាមួយបាល់ទាត់ជានិច្ច និងកំពុងបង្ហាត់ក្រុមបាល់ទាត់តារាកម្ពុជាទៀតផង។ បន្ថែមពីនេះរូបគេក៏ជាអ្នកបង្កើតមាតិកាកីឡាបាល់ទាត់មួយរូបនៅកម្ពុជាផងដែរ៕

កីឡាករ BENTO របស់បឹងកេត

អត្ថបទដោយ៖ នួន ស៊ីណា

The post លោក ឈិន ឈឿន៖ បាល់ទាត់សម័យទំនើបខ្សែប្រយុទ្ធក៏ត្រូវចេះការពារ ខ្សែការពារក៏ត្រូវចេះទាត់ទីដែរ appeared first on Kampuchea Thmey Daily.

លោក McConkey ប្រាប់កូនក្រុមថាការឈ្នះម្សិលមិញនេះចាត់ទុកជាការឈ្នះវគ្គ៤៥ដំបូងប៉ុណ្ណោះ

Sina Noun — Fri, 06 Mar 2026 00:30:00 +0000

លោក McConkey ដែលជាគ្រូបង្វឹករបស់ក្រុមបាល់ទាត់ព្រះខ័នរាជស្វាយរៀង ថាការឈ្នះលើភ្នំពេញក្រោនម្សិលមិញនេះចាត់ទុកជាការឈ្នះនៅវគ្គ ៤៥នាទីដំបូងប៉ុណ្ណោះ ដូច្នេះនៅប្រកួតជើងទី២ តទៅទៀតសូមកុំសប្បាយរីករាយខ្លាំងពេក។

លោក McConkey

គ្រូបង្វឹករបស់ក្រុមបាល់ទាត់ព្រះខ័នរាជស្វាយរៀង លោក McConkey បន្ទាប់ពីបញ្ចប់ការប្រកួតភ្លាមក៏បានប្រាប់ទៅកូនក្រុមថាកុំសប្បាយរីករាយចំពោះជ័យជម្នះនេះខ្លាំងហួសហេតុពេកឲ្យសោះ ព្រោះនៅមានការប្រកួតជើងទី២ បន្តទៀត។ លោកចាត់ទុកថាការឈ្នះលើភ្នំពេញក្រោននេះគ្រាន់តែជាការឈ្នះនៅវគ្គ ៤៥នាទីដំបូង ឬវគ្គទី១ ប៉ុណ្ណោះទេ។

លទ្ធផលនៃការប្រកួត

ក្រុមទាំងមូលរីករាយចំពោះជ័យជម្នះមួយនេះ ប៉ុន្តែនៅតែខំប្រឹងផ្ដោតអារម្មណ៍លើការប្រកួតជើងទី២ បន្តទៀត ព្រោះបាល់ទាត់អ្វីៗក៏អាចកើកឡើងបានដែរ។ សម្រាប់ម្សិលមិញនេះបន្ទាប់ពីបញ្ចប់នៅវគ្គទី១ លោកក៏មិនមានអ្វីកែប្រែ ឬផ្លាស់ប្ដូរច្រើននោះទេគ្រាន់តែលើកពីកំហុសឆ្គងរបស់ក្រុមហើយព្យាយាមបំបាត់វាចោល និងផ្លាស់ប្ដូរទីតាំងរបស់កីឡាករមួយចំនួនប៉ុណ្ណោះក៏ទទួលបានលទ្ធផលល្អប្រសើរក្នុងការប្រកួតមួយនេះ។

ការប្រកួតម្សិលមិញ

រំលឹកដែរថា ការប្រកួតជើងទី១ វគ្គ ៨ក្រុមចុងក្រោយនៃពានរង្វាន់ AFC Challenge League រវាងភ្នំពេញក្រោន និងព្រះខ័នរាជស្វាយរៀង បានបញ្ចប់ទៅហើយដោយក្រុមមកពីខេត្តស្វាយរៀងជាអ្នកទទួលបានជ័យជម្នះក្នុងលទ្ធផល ៤-១ កាលពីយប់ថ្ងៃទី៥ ខែមីនា ឆ្នាំ២០២៦ នៅពហុកីឡដ្ឋានជាតិ។ ជើងទី២ នឹងធ្វើឡើងនៅទឹកដីរបស់ព្រះខ័នរាជស្វាយរៀង ឯពហុកីឡដ្ឋានមរតកតេជោវិញម្ដងនៅថ្ងៃទី១២ ខែមីនា ឆ្នាំ២០២៦ សប្ដាហ៍ក្រោយនេះ៕

ក្រុមព្រះខ័នរាជស្វាយរៀង

អត្ថបទដោយ៖ នួន ស៊ីណា

The post លោក McConkey ប្រាប់កូនក្រុមថាការឈ្នះម្សិលមិញនេះចាត់ទុកជាការឈ្នះវគ្គ៤៥ដំបូងប៉ុណ្ណោះ appeared first on Kampuchea Thmey Daily.

លោក ភា សុភ័ត្រា លើកឡើងពីអារម្មណ៍ផ្ទាល់អំឡុងស្ថានភាពដ៏លំបាករបស់ក្រុមនៅពេលនេះ

Sina Noun — Tue, 24 Feb 2026 04:29:00 +0000

លោក ភា សុភ័ត្រា ក្នុងស្ថានភាពក្លឹបបែបនេះលោកបញ្ជាក់ថាលោកមិនទៅណាដើម្បីរួចខ្លួន ឬសុខស្រួលតែម្នាក់ឯងនោះឡើយ ប៉ុន្តែអាស្រ័យលើថ្នាក់ដឹកនាំជាអ្នកគិតគូរនោះទេ ខណៈការរបូតគ្រាប់បាល់ច្រើនៗកន្លងទៅនេះគឺមានហេតុផល។

លោក ភា សុភ័ត្រា

លោក ភា សុភ័ត្រា គ្រូបង្វឹកក្រុមបាល់ទាត់កងយោធពលខេមរភូមិន្ទ បានឲ្យដឹងថា មួយរយៈពេលនេះគឺសុខកាយ ប៉ុន្តែមិនសូវសប្បាយចិត្តនោះទេ ព្រោះក្រុមចាញ់ច្រើនពិសេសរបូតគ្រាប់បាល់ច្រើនៗនៅក្នុងការប្រកួតក្រោយៗនេះ។ ដូចអ្នកគាំទ្របាល់ទាត់បានដឹងហើយពីការបង្ហោះផ្សព្វផ្សាយៗនៅលើបណ្ដាញសង្គមកន្លង ស្របពេលបញ្ហាទាំងនោះគឺប៉ះពាល់ដល់អារម្មណ៍កីឡាករខ្លាំង និងបញ្ហារបួសរបស់កីឡាករក្នុងក្រុមផងទើបធ្វើឲ្យមានលទ្ធផលមិនល្អសោះនៅប៉ុន្មានប្រកួតចុងក្រោយ។

លោក ភា សុភ័ត្រា

គ្រូបង្វឹករូបនេះបន្តទៀតថា ក្នុងស្ថានភាពក្រុមបែបនេះបើឲ្យលោកសម្រេចចិត្តចេញទៅដឹកនាំក្រុមផ្សេងគឺលោកមិនធ្វើជាដាច់ខាត និងមិនចេញទៅរកភាពសុខស្រួលសម្រាប់តែខ្លួនឯងនោះឡើយ។ យ៉ាងណាអនាគតគ្រូបង្គោលនៅទីនេះគឺអាស្រ័យលើថ្នាក់ដឹកនាំជាអ្នកសម្រេច។

ក្រុមកងយោធពលខេមរភូមិន្ទ

ចំពោះការរបូតគ្រាប់បាល់ច្រើនកន្លងមកលោកបញ្ជាក់ថា ដោយសារកីឡាករសំខាន់ៗមួយចំនួនមានរបួសស្ទើរតែគ្មានកីឡាករសម្រាប់លេងតែម្ដង។ ដូច្នេះក្នុងស្ថានភាពនេះលោកផ្ដល់ឱកាសដល់យុវជនចូលលេងឲ្យបានច្រើនវិញដើម្បីទទួលបទពិសោធពីការប្រកួតធំៗ។ ធម្មតាយុវជនគឺស្ទើរបទពិសោធលើទីលានហេតុនេះទើបមិនសូវទទួលបានលទ្ធផលល្អ។ មួយវិញទៀតនេះជាចរិកនៃការដឹកនាំក្រុមរបស់លោកគឺមិនខ្លាច និងប្ដូរក្នុងការស្វែងរកគ្រាប់បាល់មកវិញនោះឡើយ។ ជាក់ស្ដែងដូចប៉ះ ភ្នំពេញក្រោន ប៉ះ ព្រះខ័នរាជ្យស្វាយរៀង គឺលោកមិននៅចាំតែបិទកុំឲ្យចាញ់គ្រាប់បាល់ច្រើននោះទេ។ ពោលហ៊ានប្ដូរដើម្បីរកគ្រាប់បាល់ពីការប្រកួតនោះមកវិញ ដូច្នេះហើយទើបរបូតគ្រាប់ក៏ច្រើនវិញដែរ។

លោក ភា សុភ័ត្រា

បញ្ជាក់ដែរថា ការបញ្ចប់ដំណាក់កាលទី១ នៃលីគកំពូលកម្ពុជាគឺក្រុមកងយោធពលខេមរភូមិន្ទ ជាប់ចំណាត់ថ្នាក់លេខ៨ ក្នុងចំណោម ១១ក្រុមចូលរួម។ ក្រុមរបស់លោក ភា សុភ័ត្រា នឹងត្រូវប្រកួតនៅដំណាក់កាលទី២ បន្តទៀតដើម្បីដណ្ដើមយកចំណាត់ថ្នាក់ល្អនៅបញ្ចប់លីគតែម្ដង៕

ចំណាត់ថ្នាក់

អត្ថបទដោយ៖ នួន ស៊ីណា

The post លោក ភា សុភ័ត្រា លើកឡើងពីអារម្មណ៍ផ្ទាល់អំឡុងស្ថានភាពដ៏លំបាករបស់ក្រុមនៅពេលនេះ appeared first on Kampuchea Thmey Daily.

គ្រូបង្វឹកខ្មែរ ២ រូបទៀតនឹងទទួលបានសញ្ញាបត្រ AFC Pro Licence បន្ទាប់ពីលោក ប្រាក់ សុវណ្ណរ៉ា

Kosal Sem — Wed, 11 Feb 2026 05:55:00 +0000

ក្នុងពេលឆាប់ៗខាងមុខ គ្រូបង្វឹកជនជាតិខ្មែរ ២ រូបទៀត នឹងទទួលបានសញ្ញាបត្រគ្រូបង្វឹកកម្រិតអាជីពខ្ពស់បំផុត AFC Pro License បន្ទាប់ពីអតីតគ្រូបង្វឹកក្រុម បឹងកេត និងជម្រើសជាតិកម្ពុជា លោក ប្រាក់ សុវណ្ណរ៉ា កាន់មុនគេ។

លោកប្រាក់ សុវណ្ណរ៉ា

ជាការពិត បច្ចុប្បន្នមានតែលោក ប្រាក់ សុវណ្ណារ៉ា ម្នាក់គត់ ដែលជាគ្រូបង្វឹកបាល់ទាត់ជនជាតិខ្មែរ មានសញ្ញាបត្រគ្រូបង្វឹកអាជីពខ្ពស់ជាងគេបំផុតក្នុងទ្វីបអាស៊ី គឺ AFC Professional Coaching Diploma (AFC Pro License)។

ទោះបីជាយ៉ាណា នាពេលដ៏ខ្លីខាងមុខ គ្រូបង្វឹកក្រុមណាហ្គាវើលដ៍លោក ឃឹម បុរី និងលោក ហុក សុចិត្រា អតីតកីឡាករជម្រើសជាតិកម្ពុជា និងបច្ចុប្បន្នជាអគ្គលេខាធិការក្លិប វិសាខា នឹងក្លាយជាគ្រូបង្វឹកខ្មែរ ២ នាក់បន្ថែមទៀត ដែលមានសញ្ញាបត្រ AFC Pro License នេះ។

លោក ឃឹម បុរី

ថ្មីៗនេះលោក ឃឹម បុរី បានបញ្ចប់ការរៀនសូត្រ និងប្រឡងបញ្ចប់ដោយជោគជ័យ អំពីវគ្គបណ្តុះបណ្តាល AFC Professional Coaching Diploma ដែលធ្វើឡើងនៅប្រទេស កាតា។ ដោយឡែកលោក ហុក សុចិត្រា វិញ បានប្រាប់ «កម្ពុជាថ្មី» ថា បច្ចុប្បន្នលោកកំពុងរៀនសូត្រអំពីវគ្គបណ្តុះបណ្តាល AFC Professional Coaching Diploma នេះនៅប្រទេសឡាវ ហើយការបញ្ចប់របស់លោកនឹងធ្វើឡើងនៅប្រទេសកម្ពុជា នាខែ មិថុនា ខាងមុខ។

លោក ហុក សុចិត្រា

គួរឱ្យដឹង ថា សញ្ញាបត្រគ្រូបាល់ទាត់ប្រចាំទ្វីបអាស៊ីត្រូវបានបែងចែកជា ៤ កម្រិតគឺ AFC C Diploma (C-License ជាកម្រិតមូលដ្ឋាន, AFC B Dimploma (B License) កម្រិតទី២ , AFC A Diploma (A-License) កម្រិតទី១ និង AFC Por Diploma កម្រិតខ្ពស់បំផុត។ ក្នុងកម្រិតនីមួយៗអាចមានវគ្គវគ្គសិក្សាច្រើនតាមលំដាប់ និងមានពេលវេលាកំណត់ថែមទៀត។ ជាទូទៅ គ្រូបង្វឹកសញ្ជាតិខ្មែរដែលដឹកនាំក្រុមជាច្រើននៅកម្ពុជាភាគច្រើនមានសញ្ញាបត្រ AFC A-License។

លោក ហុក សុចិត្រា

គ្រូបង្វឹកកម្ពុជាដែលមានសញ្ញាបត្រ AFC A-License មានដូចជាលោក ទេព ឡុងរចនា, មាស ចាន់ណា, ភា សុភ័ក្ត្រា, អ៊ុង កនយ៉ានិត, ហុក សុជីវន្ត, ហុក សុចិត្រា, ប្រាក់ វុទ្ធី, គឹម ភក្តី, ឡុង រិទ្ធា និងគ្រូបង្វឹកចំនួនទៀតដែលទើបបានរៀនៗបន្តបន្ទាប់នាប៉ុន្មានឆ្នាំចុងក្រោយ៕

អត្ថបទ៖ សេម កុសល

The post គ្រូបង្វឹកខ្មែរ ២ រូបទៀតនឹងទទួលបានសញ្ញាបត្រ AFC Pro Licence បន្ទាប់ពីលោក ប្រាក់ សុវណ្ណរ៉ា appeared first on Kampuchea Thmey Daily.

ក្រុមបាល់ទាត់ Mate JR Sport Club កំពុងបណ្តុះបណ្តាលយុវជនជាច្រើនឲ្យបោះជំហានទៅជាកីឡាករអាជីព

chean virakbot — Sun, 08 Feb 2026 09:11:49 +0000

ក្រុមបាល់ទាត់ Mate JR Sport Club កំពុងបណ្តុះបណ្តាលថ្នាលយុវជននៅរាជធានីភ្នំពេញជាច្រើននាក់រហូតមានយុវជនមួយចំនួនទទួលបានឱកាសចូលរួមជាមួយក្រុមថ្នាលយុវជនរបស់ក្លិបអាជីពថែមទៀត។

អ្នកស្រី គង់ ផល្លា មានកូនប្រុសម្នាក់ កំពុងហ្វឹកហាត់នៅក្រុម Mate JR បានឲ្យដឹងថា អ្នកស្រីបានឲ្យកូនចូលហ្វឹកហាត់កីឡាបាល់ទាត់នៅ Mate JR Sport Club ដែលមានទីតាំងស្ថិតនៅបុរីប៉េងហួត រយៈប្រមាណ ៤ ឆ្នាំមកហើយ។ ការហ្វឹកហាត់ជាមួយក្រុមបានប្រមាណ ៦ ខែដំបូង កូនរបស់អ្នកស្រីត្រូវធ្វើតេស្តជាប់ និងជ្រើសរើសទៅហ្វឹកហាត់នៅប្រទេសអាល្លឺម៉ង់រយៈពេលមួយខែ ក្នុងចំណោមយុវជនកម្ពុជាចំនួន ១២នាក់។

អ្នកស្រីបានបន្តថា តាមអ្នកស្រីដឹង មានក្មេងៗជាច្រើនកំពុងហ្វឹកហាត់នៅ Mate JR Sport Club។ ទាំងនេះហើយដែលជួយបើកផ្លូវឲ្យកុមារអភិវឌ្ឍខ្លួនឆ្ពោះទៅរកការក្លាយជាកីឡាករបាល់ទាត់អាជីពនៅក្នុងប្រទេសកម្ពុជា។ ជាក់ស្តែងមានយុវជនជាច្រើនបានធ្វើតេស្តជាប់នៅក្រុមយុវជនរបស់ក្លិបអាជីពមានដូចជា វិសាខា ព្រះខ័នរាជស្វាយរៀង និងកងយោធពលខេមរភូមិន្ទ ជាដើម។ ជាមួយគ្នានេះ យុវជនជាច្រើននាក់ទទួលបានឱកាសទៅហ្វឹកហាត់ និងប្រកួតនៅក្រៅប្រទេស។

ជាមួយគ្នានេះ អ្នកស្រី ហែម វ៉ាន់ណៃ ដែលមានកូនប្រុស ៣ នាក់កំពុងហ្វឹកហាត់នៅ Mate JR បានយល់ថា៖«ខ្ញុំរីករាយដែលក្លិប Mate JR បណ្តុះបណ្តាលថ្នាលយុវជនកម្ពុជា ពីព្រោះក្រុមមាន គ្រូៗល្អច្រើន មានសកម្មភាពប្រកួតច្រើន មានការយកចិត្តទុកដាក់ខ្ពស់ជាមួយក្មេងៗ ធ្វើឱ្យក្មេងៗមានភាពរីករាយ។ កូនៗរបស់អ្នកស្រីទាំង ៣ នាក់បានកំពុងអភិវឌ្ឍខ្លួនយ៉ាងល្អទាំងកាយសម្បទា ស្មារតី និងសុខភាព។

យុវជន ម៉ាក សុទ្ធាពិសិដ្ឋ នាយកប្រតិបត្តិក្លិបបាល់ទាត់ Mate JR Sport Club បាននិយាយថា ខ្លួនពិតជារីករាយដែលទទួលបានដៃគូក្នុងការឧបត្ថម្ភគាំទ្រនឹងជួយឲ្យក្រុមមានកម្លាំងចិត្តក្នុងការបណ្តុះបណ្តាលថ្នាលឲ្យចាប់ក្តីស្រមៃរបស់ខ្លួន ឃ្លាតឆ្ងាយពីការប្រើប្រាស់ពេលវេលាឥតប្រយោជន៍។

យុវជន ម៉ាក សុទ្ធាពិសិដ្ឋ ក៏ជាសមាជិករបស់ក្រុម U16 វិសាខា ដែលកំពុងលេងក្នុងលីគយុវជនកម្ពុជាអាយុ១៦ ឆ្នាំ (Cambodian Youth League 2026) ដែលរៀបចំដោយសហព័ន្ធកីឡាបាល់ទាត់កម្ពុជា។

តាមរយៈការបណ្តុះបណ្តាលថ្នាលយុវជនរាប់រយនាក់អស់រយៈពេលជាច្រើននាក់ ក្រុម Mate JR Sport Club ទទួលបានការលើកទឹកចិត្តពីសហគមន៍ និងការរឧបត្ថម្ភគាំទ្រពីក្រុមហ៊ុនឯកជនក្នុងនោះមានធនាគារស៊ីអាយអិមប៊ីរយៈពេល ១ ឆ្នាំ ដើម្បីរួមចំណែកជួយអភិវឌ្ឍធនធានកីឡាករ កីឡាការិនីបាល់ទាត់នៅកម្ពុជា។ ក្លិបបាល់ទាត់ Mate JR Sport Club ក្រៅពីបណ្តុះបណ្តាលយុវជនថ្នាល ដោយគ្រូបង្វឹកខ្មែរ និងបរទេសដែលមានបទពិសោធន៍ច្រើន ក៏មានចូលរួមប្រកួតប្រជែងតាមពានរង្វាន់យុវជននានា នៅក្នុងប្រទេសផងដែរ៕

អត្ថបទ៖ វិរបុត្រ

The post ក្រុមបាល់ទាត់ Mate JR Sport Club កំពុងបណ្តុះបណ្តាលយុវជនជាច្រើនឲ្យបោះជំហានទៅជាកីឡាករអាជីព appeared first on Kampuchea Thmey Daily.

កីឡាបាល់ទាត់ជាតិ Archives - Kampuchea Thmey Daily

ក្រុមអ្នកសារព័ត៌មានកម្ពុជា ប៉ះ សមាគមធនាគារនៅកម្ពុជា ក្នុង​ជំនួប​មិត្តភាព ស៊ុតគ្នាដល់ ១២ គ្រាប់

ភរិយា​របស់​កីឡាករ​ Patrick អរគុណ​ប្រជាជន​កម្ពុជា​ដែល​តែងតែ​ស្រឡាញ់​ និង​គាំទ្រ​ប្ដី​របស់​ខ្លួន​

គ្រូ​​ព្រះខ័នរាជស្វាយរៀង​ សង្ឃឹម​ក្រោយ​ការ​ប្រកួត​ជា​មួយ​ Manila Digger​ នេះ​ទៅ​ជា​មោកទភាព​មួយ​សម្រាប់​ ម៉េងទា​

លោក​ McConkey ប្រាប់​កូន​ក្រុម​ថា​ការ​ឈ្នះ​ម្សិលមិញ​នេះ​ចាត់​ទុក​ជា​ការ​ឈ្នះ​វគ្គ​៤៥​ដំបូង​ប៉ុណ្ណោះ​

លោក​ ភា សុភ័ត្រា​ លើក​ឡើង​ពី​អារម្មណ៍​ផ្ទាល់​អំឡុង​ស្ថានភាព​ដ៏​លំបាក​របស់​ក្រុម​នៅ​ពេល​នេះ​

គ្រូបង្វឹកខ្មែរ ២ រូបទៀតនឹងទទួលបានសញ្ញាបត្រ AFC Pro Licence បន្ទាប់ពីលោក ប្រាក់ សុវណ្ណរ៉ា

ក្រុម​បាល់ទាត់ Mate JR Sport Club កំពុង​បណ្តុះ​បណ្តាល​​យុវជន​ជា​​ច្រើនឲ្យ​បោះ​ជំហាន​ទៅ​ជា​កីឡាករ​អាជីព

ក្រុមអ្នកសារព័ត៌មានកម្ពុជា ប៉ះ សមាគមធនាគារនៅកម្ពុជា ក្នុងជំនួបមិត្តភាព ស៊ុតគ្នាដល់ ១២ គ្រាប់

ភរិយារបស់កីឡាករ Patrick អរគុណប្រជាជនកម្ពុជាដែលតែងតែស្រឡាញ់ និងគាំទ្រប្ដីរបស់ខ្លួន

គ្រូព្រះខ័នរាជស្វាយរៀង សង្ឃឹមក្រោយការប្រកួតជាមួយ Manila Digger នេះទៅជាមោកទភាពមួយសម្រាប់ ម៉េងទា

លោក McConkey ប្រាប់កូនក្រុមថាការឈ្នះម្សិលមិញនេះចាត់ទុកជាការឈ្នះវគ្គ៤៥ដំបូងប៉ុណ្ណោះ

លោក ភា សុភ័ត្រា លើកឡើងពីអារម្មណ៍ផ្ទាល់អំឡុងស្ថានភាពដ៏លំបាករបស់ក្រុមនៅពេលនេះ

ក្រុមបាល់ទាត់ Mate JR Sport Club កំពុងបណ្តុះបណ្តាលយុវជនជាច្រើនឲ្យបោះជំហានទៅជាកីឡាករអាជីព