កីឡា

លោក ភា សុភ័ត្រា លើកឡើងពីអារម្មណ៍ផ្ទាល់អំឡុងស្ថានភាពដ៏លំបាករបស់ក្រុមនៅពេលនេះ

បានផុស

៤ ខែ មុន

នៅ

ថ្ងៃអង្គារ ២៤ កុម្ភៈ ២០២៦

ដោយ

លោក ភា សុភ័ត្រា ក្នុងស្ថានភាពក្លឹបបែបនេះលោកបញ្ជាក់ថាលោកមិនទៅណាដើម្បីរួចខ្លួន ឬសុខស្រួលតែម្នាក់ឯងនោះឡើយ ប៉ុន្តែអាស្រ័យលើថ្នាក់ដឹកនាំជាអ្នកគិតគូរនោះទេ ខណៈការរបូតគ្រាប់បាល់ច្រើនៗកន្លងទៅនេះគឺមានហេតុផល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ភា សុភ័ត្រា

លោក ភា សុភ័ត្រា គ្រូបង្វឹកក្រុមបាល់ទាត់កងយោធពលខេមរភូមិន្ទ បានឲ្យដឹងថា មួយរយៈពេលនេះគឺសុខកាយ ប៉ុន្តែមិនសូវសប្បាយចិត្តនោះទេ ព្រោះក្រុមចាញ់ច្រើនពិសេសរបូតគ្រាប់បាល់ច្រើនៗនៅក្នុងការប្រកួតក្រោយៗនេះ។ ដូចអ្នកគាំទ្របាល់ទាត់បានដឹងហើយពីការបង្ហោះផ្សព្វផ្សាយៗនៅលើបណ្ដាញសង្គមកន្លង ស្របពេលបញ្ហាទាំងនោះគឺប៉ះពាល់ដល់អារម្មណ៍កីឡាករខ្លាំង និងបញ្ហារបួសរបស់កីឡាករក្នុងក្រុមផងទើបធ្វើឲ្យមានលទ្ធផលមិនល្អសោះនៅប៉ុន្មានប្រកួតចុងក្រោយ។

លោក ភា សុភ័ត្រា

គ្រូបង្វឹករូបនេះបន្តទៀតថា ក្នុងស្ថានភាពក្រុមបែបនេះបើឲ្យលោកសម្រេចចិត្តចេញទៅដឹកនាំក្រុមផ្សេងគឺលោកមិនធ្វើជាដាច់ខាត និងមិនចេញទៅរកភាពសុខស្រួលសម្រាប់តែខ្លួនឯងនោះឡើយ។ យ៉ាងណាអនាគតគ្រូបង្គោលនៅទីនេះគឺអាស្រ័យលើថ្នាក់ដឹកនាំជាអ្នកសម្រេច។

ក្រុមកងយោធពលខេមរភូមិន្ទ

ចំពោះការរបូតគ្រាប់បាល់ច្រើនកន្លងមកលោកបញ្ជាក់ថា ដោយសារកីឡាករសំខាន់ៗមួយចំនួនមានរបួសស្ទើរតែគ្មានកីឡាករសម្រាប់លេងតែម្ដង។ ដូច្នេះក្នុងស្ថានភាពនេះលោកផ្ដល់ឱកាសដល់យុវជនចូលលេងឲ្យបានច្រើនវិញដើម្បីទទួលបទពិសោធពីការប្រកួតធំៗ។ ធម្មតាយុវជនគឺស្ទើរបទពិសោធលើទីលានហេតុនេះទើបមិនសូវទទួលបានលទ្ធផលល្អ។ មួយវិញទៀតនេះជាចរិកនៃការដឹកនាំក្រុមរបស់លោកគឺមិនខ្លាច និងប្ដូរក្នុងការស្វែងរកគ្រាប់បាល់មកវិញនោះឡើយ។ ជាក់ស្ដែងដូចប៉ះ ភ្នំពេញក្រោន ប៉ះ ព្រះខ័នរាជ្យស្វាយរៀង គឺលោកមិននៅចាំតែបិទកុំឲ្យចាញ់គ្រាប់បាល់ច្រើននោះទេ។ ពោលហ៊ានប្ដូរដើម្បីរកគ្រាប់បាល់ពីការប្រកួតនោះមកវិញ ដូច្នេះហើយទើបរបូតគ្រាប់ក៏ច្រើនវិញដែរ។

លោក ភា សុភ័ត្រា

បញ្ជាក់ដែរថា ការបញ្ចប់ដំណាក់កាលទី១ នៃលីគកំពូលកម្ពុជាគឺក្រុមកងយោធពលខេមរភូមិន្ទ ជាប់ចំណាត់ថ្នាក់លេខ៨ ក្នុងចំណោម ១១ក្រុមចូលរួម។ ក្រុមរបស់លោក ភា សុភ័ត្រា នឹងត្រូវប្រកួតនៅដំណាក់កាលទី២ បន្តទៀតដើម្បីដណ្ដើមយកចំណាត់ថ្នាក់ល្អនៅបញ្ចប់លីគតែម្ដង៕