គ្រូបង្វឹកខ្មែរ ២ រូបទៀតនឹងទទួលបានសញ្ញាបត្រ AFC Pro Licence បន្ទាប់ពីលោក ប្រាក់ សុវណ្ណរ៉ា

ក្នុងពេលឆាប់ៗខាងមុខ គ្រូបង្វឹកជនជាតិខ្មែរ ២ រូបទៀត នឹងទទួលបានសញ្ញាបត្រគ្រូបង្វឹកកម្រិតអាជីពខ្ពស់បំផុត AFC Pro License បន្ទាប់ពីអតីតគ្រូបង្វឹកក្រុម បឹងកេត និងជម្រើសជាតិកម្ពុជា លោក ប្រាក់ សុវណ្ណរ៉ា កាន់មុនគេ។

ជាការពិត បច្ចុប្បន្នមានតែលោក ប្រាក់ សុវណ្ណារ៉ា ម្នាក់គត់ ដែលជា​គ្រូ​បង្វឹក​បាល់ទាត់ជនជាតិខ្មែរ ​​មាន​សញ្ញាបត្រ​គ្រូ​បង្វឹក​អាជីព​ខ្ពស់​ជាង​គេបំផុត​​ក្នុង​​ទ្វីប​អាស៊ី គឺ AFC Professional Coaching Diploma (AFC Pro License)។

ទោះបីជាយ៉ាណា នាពេលដ៏ខ្លីខាងមុខ គ្រូបង្វឹកក្រុមណាហ្គាវើលដ៍លោក ឃឹម បុរី និងលោក ហុក សុចិត្រា អតីតកីឡាករជម្រើសជាតិ​កម្ពុជា និងបច្ចុប្បន្នជាអគ្គលេខាធិការក្លិប វិសាខា នឹងក្លាយជាគ្រូបង្វឹកខ្មែរ ២ នាក់បន្ថែមទៀត ដែលមានសញ្ញាបត្រ AFC Pro License នេះ។

ថ្មីៗនេះលោក ឃឹម បុរី បានបញ្ចប់ការរៀនសូត្រ និងប្រឡងបញ្ចប់ដោយជោគជ័យ អំពីវគ្គបណ្តុះបណ្តាល AFC Professional Coaching Diploma ដែលធ្វើឡើងនៅប្រទេស កាតា។ ដោយឡែកលោក ហុក សុចិត្រា វិញ បានប្រាប់ «កម្ពុជាថ្មី» ថា បច្ចុប្បន្នលោកកំពុងរៀនសូត្រអំពីវគ្គបណ្តុះបណ្តាល AFC Professional Coaching Diploma នេះនៅ​ប្រទេស​ឡាវ ហើយការបញ្ចប់របស់លោកនឹងធ្វើឡើងនៅប្រទេស​កម្ពុជា នាខែ មិថុនា ខាងមុខ។

គួរឱ្យដឹង ថា សញ្ញាបត្រ​គ្រូ​​បាល់ទាត់​ប្រចាំ​ទ្វីប​អាស៊ី​ត្រូវ​បានបែង​ចែក​ជា ៤ កម្រិត​គឺ AFC C Diploma (C-License ​ជា​កម្រិត​មូលដ្ឋាន, AFC B Dimploma (B License) កម្រិតទី​២ , AFC A Diploma (A-License) កម្រិត​ទី​១ និង AFC Por Diploma កម្រិត​ខ្ពស់​បំផុត។ ក្នុង​កម្រិត​នីមួយ​ៗ​អាច​មាន​វគ្គ​​វគ្គ​សិក្សា​ច្រើន​តាម​លំដាប់​ និង​មាន​ពេល​វេលា​កំណត់​ថែម​ទៀត។ ជា​ទូទៅ គ្រូ​បង្វឹក​សញ្ជាតិ​ខ្មែរ​ដែល​ដឹក​នាំ​ក្រុម​ជា​ច្រើន​នៅ​កម្ពុជា​​ភាគ​ច្រើន​មាន​សញ្ញាបត្រ AFC A-License។

គ្រូ​បង្វឹក​កម្ពុជា​ដែល​មាន​សញ្ញាបត្រ AFC A-License មាន​ដូច​ជាលោក ទេព ឡុងរចនា, មាស ចាន់ណា, ភា សុភ័ក្ត្រា, អ៊ុង កនយ៉ានិត, ហុក សុជីវន្ត, ហុក សុចិត្រា, ប្រាក់ វុទ្ធី, គឹម ភក្តី, ឡុង រិទ្ធា និង​គ្រូ​បង្វឹក​ចំនួន​ទៀត​ដែល​ទើប​បាន​រៀន​ៗបន្ត​បន្ទាប់​នា​ប៉ុន្មាន​ឆ្នាំ​ចុង​ក្រោយ៕

អត្ថបទ៖ សេម កុសល