ក្រុមបាល់ទាត់ជម្រើសជាតិកម្ពុជា Archives - Kampuchea Thmey Daily

ក្រោយឃើញបញ្ជីឈ្មោះជម្រើសជាតិ លោក ឃួន ឡាប៊ូរ៉ាវី លើកឡើងថា «តើយើងវង្វែងផ្លូវមែនទេ?

chean virakbot — Wed, 08 Jul 2026 05:38:00 +0000

អ្នកគាំទ្របានកំពុងរិះគន់យ៉ាងខ្លាំងអំពីបញ្ជីឈ្មោះក្រុមបាល់ទាត់ជម្រើសជាតិកម្ពុជាដែលបានចេញកាលពីល្ងាចថ្ងៃទី៧ ខែកក្កដា ឆ្នាំ ២០២៦ ដើម្បីត្រៀមខ្លួនប្រកួតពានរង្វាន់អាស៊ានកម្រិតទី១ ASEAN Championship ឆ្នាំ ២០២៦នេះ។

បញ្ជីឈ្មោះក្រុមជម្រើសជាតិកម្ពុជា លើកនេះមិនមានកីឡាករសំខាន់ៗជាច្រើនដែលធ្វើឲ្យអ្នកគាំទ្រមិនពេញចិត្ត និងមានមតិយោបល់ផ្សេងៗ។ ក្នុងចំណោមនោះ លោក ឃួន ឡាប៊ូរ៉ាវី ដែលជាគ្រូបង្វឹកក្រុមបាល់ទាត់ជម្រើសជាតិនារីកម្ពុជា ក៏បានបញ្ចេញទស្សនៈផ្ទាល់ខ្លួនថា ផ្អែកតាមកម្រិតលីគកំពូលកម្ពុជាដែលមានក្រុមប្រកួតពានរង្វាន់អាស៊ីកម្រិតទី២ ប៉ុន្តែមានកីឡាករជាប់ជម្រើសជាតិតាមបញ្ជីឈ្មោះប៉ុណ្ណេះគឺមានន័យថា កំពុងមានបញ្ហា និងអាចដើរផ្ទុយទៅនឹងផែនការអនាគត។

លោកបានរៀបរាប់ថា ៖«អបអរសាទរចំពោះកីឡាករថ្មីៗដែលមានឱកាសជាប់ជម្រើសជាតិ។ ជាទស្សនៈរបស់ខ្ញុំ លីគមួយដែលមានក្រុម ២ លេងក្នុងពានរង្វាន់ AFC ទី២ ហើយមានក្រុមនីមួយៗចាយថវិកាច្រើនសន្ធឹក តែយើងផលិតបានកីឡាករលេងតំណាងជាតិតែកម្រិតប៉ុននេះ ខ្ញុំគិតថា យើងកំពុងមានបញ្ហាហើយ»។

លោកបានបញ្ជាក់បន្ថែមថា ៖«កាលពីប៉ុន្មានខែមុន យើងបានបង្ហោះពីឆ្នាំ ២០៤៦ តែការអនុវត្តជ័យជម្នះរបស់ក្រុមក្នុងស្រុកមានតម្លៃជាងការឈ្នះប្រទេសក្នុងតំបន់ទៅវិញ។ បែបនេះហើយដែលខ្ញុំធ្លាប់លើកឡើងថា តើយើងវង្វែងផ្លូវមែនទេ?

ការលើកឡើងរបស់ លោក ឃួន ឡាប៊ូរ៉ាវី ពីឆ្នាំ ២០៤៦ គឺសំដៅទៅលើផែនការអនាគតរបស់ សហព័ន្ធកីឡាបាល់ទាត់កម្ពុជាដែលបានកំណត់សម្រាប់ក្រុមបាល់ទាត់ជម្រើសជាតិកម្ពុជា ឈានដល់ជុំចុងក្រោយក្នុងព្រឹត្តិការណ៍បាល់ទាត់ពិភពលោក World Cup នៅឆ្នាំ ២០៤៦។

ការលើកឡើងរបស់លោក ឃួន ឡាប៊ូរ៉ាវី និងអ្នករិះគន់ ដោយសារបញ្ជីឈ្មោះមិនមានកីឡាករសំខាន់ៗជាច្រើន សូម្បីតែកីឡាករចូលសញ្ជាតិមួយចំនួនទៀត។ មិនមានការលើកឡើងពីមូលហេតុច្បាស់លាស់ជុំវិញអវត្តមានកីឡាករសំខាន់ៗទេ ប៉ុន្តែពានរង្វាន់ ASEAN Championship ប្រកួតនៅក្នុងពេលវេលាដែលមិនមែនជាថ្ងៃ FIFA Day ដូច្នេះក្លិបដែលមានភារកិច្ចប្រកួតសំខាន់គឺមិនអនុញ្ញាតឲ្យកីឡាករចេញពីក្រុមដើម្បីចូលរួមជាមួយជម្រើសជាតិឡើយ។ លើកលែងតែក្លិបដែលគ្មានភារកិច្ចប្រកួតនៅពេលដ៏ខ្លីខាងមុខនេះទើបអនុញ្ញាតឲ្យកីឡាករចូលរួមជាមួយក្រុមជម្រើសជាតិ៕

អត្ថបទ៖ វិរបុត្រ

The post ក្រោយឃើញបញ្ជីឈ្មោះជម្រើសជាតិ លោក ឃួន ឡាប៊ូរ៉ាវី លើកឡើងថា «តើយើងវង្វែងផ្លូវមែនទេ? appeared first on Kampuchea Thmey Daily.

ក្រុមជម្រើសជាតិកម្ពុជា មានស្ថិតិល្អការប្រកួត ASEAN Championship នៅស្តាតមរតកតេជោ

chean virakbot — Wed, 24 Jun 2026 01:16:54 +0000

សហព័ន្ធកីឡាបាល់ទាត់កម្ពុជា បានប្រកាសជាផ្លូវការពីការប្រើប្រាស់ពហុកីឡដ្ឋានជាតិ មរតកតេជោ សម្រាប់ការប្រកួតជើងឯកអាស៊ាន ASEAN Championship ឆ្នាំ ២០២៦។

នេះជាលើកទី២ ដែលសហព័ន្ធកីឡាបាល់ទាត់កម្ពុជា សម្រេច ប្រើប្រាស់ពហុកីឡដ្ឋានជាតិមរតកតេជោ ដើម្បីប្រកួតពានរង្វាន់ផ្លូវការលំដាប់លេខ ១ ប្រចាំតំបន់អាស៊ាន។ កាលពីលើកទី១ ឆ្នាំ ២០២២ កម្ពុជា បានរៀបចំការប្រកួតនៅពហុកីឡដ្ឋានជាតិនេះចំនួន ២ ប្រកួតនៅក្នុងដីពានរង្វាន់ ASEAN Championship ហើយទទួលបានលទ្ធផលល្អទាំងពីរប្រកួតគឺ បានឈ្នះក្រុមជម្រើសជាតិ ហ្វីលីពីន ដោយលទ្ធផល ៣-២ និងឈ្នះ ក្រុមជម្រើសជាតិ ព្រុយណេ ៥-១។

ទោះបីជាយ៉ាងណា នៅចន្លោះអន្តរកាលនោះ ក្រុមបាល់ទាត់ជម្រើសជាតិកម្ពុជាធ្វើមិនសូវបានល្អលើឆាកអន្តរជាតិ និងពហុកីឡដ្ឋានជាតិមរតកតេជោ ឆ្ងាយពីរាជធានីភ្នំពេញផង បានធ្វើឲ្យធ្លាក់ចំនួនអ្នកគាំទ្រខ្លាំងមែនទែន។ ការប្រកួតជាមួយ ហ្វីលីពីន មានអ្នកទស្សនាផ្ទាល់តែ ៤៨៦០នាក់ និងការប្រកួតជាមួយ ព្រុយណេ មានអ្នកទស្សនាផ្ទាល់ចំនួន ៦១៦៩នាក់ប៉ុណ្ណោះដែលជាស្ថិតិតិចបំផុត។

ចាប់តាំងពីនោះមក សហព័ន្ធកីឡាបាល់ទាត់កម្ពុជា បានរៀបចំការប្រកួតនៅពហុកីឡដ្ឋានជាតិអូឡាំពិកវិញ។ រហូតដល់ឆ្នាំ ២០២៦ នេះទើបសម្រេចរៀបចំការប្រកួតនៅពហុកីឡដ្ឋានជាតិមរតកតេជោវិញ ដោយសារទីលានមានស្មៅធម្មជាតិកម្រិតស្តង់ដា ប្រព័ន្ធទឹក និង ភ្លើងគ្រប់គ្រាន់ បន្ទប់ធ្វើការធំ កៅអីអង្គុយច្រើន និងជាទីកន្លែងធំទូលាយសម្រាប់ចំណតយានយន្ត។

សូមបញ្ជាក់ថា ពានរង្វាន់ ASEAN Championship ឆ្នាំ ២០២៦នេះ ក្រុមបាល់ទាត់ជម្រើសជាតិកម្ពុជា ស្ថិតនៅពូល A ជាមួយ ជម្រើសជាតិ វៀតណាម ឥណ្ឌូណេស៊ី សិង្ហបុរី និងទីម័រខាងកើត។ សម្រាប់ការប្រកួតក្នុងដី កម្ពុជា ទទួលក្រុមជម្រើសជាតិ សិង្ហបុរី នាថ្ងៃទី២៤ ខែកក្កដា ឆ្នាំ ២០២៦ និងទទួលក្រុមជម្រើសជាតិ ទីម័រខាងកើត នៅថ្ងៃទី៣ ខែសីហា ឆ្នាំ ២០២៦ នៅពហុកីឡដ្ឋានជាតិមរតកតេជោ។

ចំពោះការប្រកួតនៅក្រៅដី កម្ពុជា ត្រូវទៅប្រកួតជាមួយម្ចាស់ផ្ទះ ឥណ្ឌូណេស៊ី នាថ្ងៃទី២៧ ខែកក្កដា និងធ្វើដំណើរទៅប្រកួតជាមួយ វៀតណាម នៅថ្ងៃទី៧ ខែសីហា ឆ្នាំ ២០២៦។

ប្រសិនបើ កម្ពុជា មានឱកាសឡើងទៅកាន់វគ្គពាក់កណ្តាលផ្តាច់ព្រ័ត្រ ក៏នឹងប្រើប្រាស់ពហុកីឡដ្ឋានជាតិមរតកតេជោទៀត៕

អត្ថបទ៖ វិរបុត្រ

The post ក្រុមជម្រើសជាតិកម្ពុជា មានស្ថិតិល្អការប្រកួត ASEAN Championship នៅស្តាតមរតកតេជោ appeared first on Kampuchea Thmey Daily.

កម្ពុជា សម្រេចប្រើ ស្តាតមរតកតេជោ ជាលើកទី២ ដើម្បីប្រកួតពាន ASEAN Championship

chean virakbot — Tue, 23 Jun 2026 07:26:52 +0000

ក្រុមបាល់ទាត់ជម្រើសជាតិកម្ពុជា ស្ថិតនៅពូល A ជាមួយ ជម្រើសជាតិ វៀតណាម ឥណ្ឌូណេស៊ី សិង្ហបុរី និងទីម័រខាងកើត។ សម្រាប់ការប្រកួតសន្សំពិន្ទុក្នុងពូល កម្ពុជា នឹងមានការប្រកួតក្នុងដីចំនួន ២ ប្រកួត និងក្រៅដីចំនួន ២ ប្រកួត។

សម្រាប់ការប្រកួតក្នុងដី កម្ពុជា ទទួលក្រុមជម្រើសជាតិ សិង្ហបុរី នាថ្ងៃទី២៤ ខែកក្កដា ឆ្នាំ ២០២៦ និងទទួលក្រុមជម្រើសជាតិ ទីម័រខាងកើត នៅថ្ងៃទី៣ ខែសីហា ឆ្នាំ ២០២៦ នៅពហុកីឡដ្ឋានជាតិមរតកតេជោ។ ចំពោះការប្រកួតនៅក្រៅដី កម្ពុជា ត្រូវទៅប្រកួតជាមួយម្ចាស់ផ្ទះ ឥណ្ឌូណេស៊ី នាថ្ងៃទី២៧ ខែកក្កដា និងធ្វើដំណើរទៅប្រកួតជាមួយ វៀតណាម នៅថ្ងៃទី៧ ខែសីហា ឆ្នាំ ២០២៦។

ប្រសិនបើ កម្ពុជា មានឱកាសឡើងទៅកាន់វគ្គពាក់កណ្តាលផ្តាច់ព្រ័ត្រ ក៏នឹងប្រើប្រាស់ពហុកីឡដ្ឋានជាតិមរតកតេជោទៀត។

មូលហេតុដែលនាំឲ្យប្រើប្រាស់ពហុកីឡដ្ឋានជាតិមរតកតេជោ គឺ ដោយសារស្មៅធម្មជាតិកម្រិតស្តង់ដា ប្រព័ន្ធទឹក និង ភ្លើងគ្រប់គ្រាន់ បន្ទប់ធ្វើការធំ កៅអីអង្គុយច្រើន និងជាទីកន្លែងធំទូលាយសម្រាប់ចំណតយានយន្ត។

នេះមិនមែនជាលើកទី១ទេដែល កម្ពុជា ប្រើប្រាស់ពហុកីឡដ្ឋានជាតិមរតកតេជោ សម្រាប់រៀបចំការប្រកួតជើងឯកអាស៊ាន។ កាលពីឆ្នាំ ២០២២ កម្ពុជា បានរៀបចំការប្រកួតនៅទីលានថ្មីនេះម្តងដែលមានចំនួន ២ ប្រកួតគឺឈ្នះទាំង ២ ប្រកួត លើក្រុមជម្រើសជាតិហ្វីលីពីន ៣-២ និង ព្រុយណេ ៥-១។

ទោះបីជាយ៉ាងណា ការប្រកួតទាំងពីរលើកនោះមានអ្នកទស្សនាសរុបចំនួនជាង ១ ម៉ឺននាក់ប៉ុណ្ណោះ គឺ ជាមួយ ហ្វីលីពីន មានអ្នកទស្សនាផ្ទាល់ ៤៨៦០នាក់ និងជាមួយ ព្រុយណេ ចំនួន ៦១៦៩នាក់៕

អត្ថបទ៖ វិរបុត្រ

The post កម្ពុជា សម្រេចប្រើ ស្តាតមរតកតេជោ ជាលើកទី២ ដើម្បីប្រកួតពាន ASEAN Championship appeared first on Kampuchea Thmey Daily.

ក្រុមបាល់ទាត់កម្ពុជាទាំង បុរស និងនារី ទទួលបានចំណាត់ថ្នាក់កាន់តែល្អ FIFA Ranking ក្រោយជ័យជម្នះក្នុងប្រកួតមិត្តភាព

Kosal Sem — Wed, 17 Jun 2026 08:43:10 +0000

ក្រុមបាល់ទាត់ជម្រើសជាតិ កម្ពុជា ទាំងក្រុមបុរសដៃទី ១ និង នារីដៃទី ១ សុទ្ធតែបានឡើងចំណាត់ថ្នាក់ក្នុងតារាងចំណាត់ថ្នាក់ FIFA Ranking បន្ទាប់ពីធ្វើបានល្អនៅក្នុងការប្រកួតមិត្តភាពអន្តរជាតិនាដើមខែ មិថុនា កន្លងមក។

ក្រុមបុរសដៃទី ១ ទទួលបានពិន្ទុយ៉ាងច្រើន រហូតដល់ ១០.៧៨ ពិន្ទុ បន្ទាប់ពីឈ្នះក្រុមជម្រើសជាតិ ប៊ូតាន ៤-០ និង ឈ្នះក្រុមជម្រើសជាតិ ចិនហុងកុង ២-០ ក្នុងការប្រកួតមិត្តភាពកាលពីដើមខែ មិថុនា កន្លងទៅ។ ស្របពេលជាមួយគ្នានេះ ក្រុមគោព្រៃបានឡើង ៥ ចំណាត់ក្នុងចំណាត់ថ្នាក់ FIFA ពីលេខ ១៨០ មកលេង ១៧៥។

ដោយឡែកក្រុមជម្រើសជាតិនារីកម្ពុជាវិញ ក៏ធ្វើបានល្អផងដែរ ដោយទទួលបានពិន្ទុចំនួន ៧.១៥ ពិន្ទុក្នុងតារាង FIFA បន្ទាប់ពីឈ្នះក្រុម សិង្ហបុរី ៥-០ និងស្មើ ឥណ្ឌូណេស៊ី ១-១ ក្នុងការប្រកួតមិត្តភាពកាលពីដើមខែ មិថុនា កន្លងទៅ។ ជុំវិញជ័យជម្នះនេះ បានធ្វើឱ្យក្រុមនារីបច្ចុប្បន្ន ឡើងមកចំណាត់ថ្នាក់លេខ ១១៣ ក្នុងចំណាត់ថ្នាក់ FIFA។

នេះ គឺជាសញ្ញាណវិជ្ជមានសម្រាប់ក្រុមបាល់ទាត់នារី កម្ពុជា បន្ទាប់ចេញប្រកួតមិត្តភាពអន្តរជាតិនៅក្រៅប្រទេសលើកដំបូង មិនទាន់ស្គាល់បរាជ័យទាល់តែសោះ។ បញ្ជាក់ ថា ក្រុមនារី កម្ពុជា ទើបបង្កើតឡើងដោយទទួលស្គាល់ពី FIFA ត្រឹម ៨ ឆ្នាំប៉ុណ្ណោះ ពោលគឺកាលពីឆ្នាំ ២០១៨។

សម្រាប់ការប្រកួតនាពេលខាងមុខទៀតរបស់ក្រុមនារីកម្ពុជានឹងមានការប្រកួតពាន AFF Women’s Cup នាខែកក្កដា នៅប្រទេសម៉ាឡេស៊ី ស្របពេលក្រុមបុរស រូវចូលរួមប្រកួតពានរង្វាន់ ASEAN Championship 2026 ពីថ្ងៃទី ២៤ ខែ កក្កដា ដល់ថ្ងៃទី ២៦ ខែ សីហា ឆ្នាំ ២០២៦។

ក្រុមគោព្រៃ កម្ពុជា ស្ថិតនៅក្នុងពូល A ជាមួយជម្រើសជាតិ វៀតណាម ឥណ្ឌូណេស៊ី សិង្ហបុរី និង ទីម័រ៕

អត្ថបទ៖ សេម កុសល

The post ក្រុមបាល់ទាត់កម្ពុជាទាំង បុរស និងនារី ទទួលបានចំណាត់ថ្នាក់កាន់តែល្អ FIFA Ranking ក្រោយជ័យជម្នះក្នុងប្រកួតមិត្តភាព appeared first on Kampuchea Thmey Daily.

អន បូរីហ្សា គ្រាន់តែប្រឡងចប់មកគាំទ្របាល់ទាត់ជម្រើសជាតិភ្លាម និងសន្យាបន្តមកលើកក្រោយៗទៀត

Sina Noun — Thu, 11 Jun 2026 01:52:02 +0000

កញ្ញា អន បូរីហ្សា ថាក្នុងការប្រកួតមិត្តភាពរវាងកម្ពុជា ប៉ះ ប៊ូតង់ លើកមុនរូបគេមិនបានចូលរួមទេដោយសារតែជាប់ប្រឡង ខណៈលើកទី២ ប៉ះ ហុងកុង ដែលទើបបញ្ចប់នេះគឺមិនអាចឃាត់ចិត្តខ្លួនបានឡើងត្រូវតែមកគាំទ្រ និងកាន់តែពេញចិត្តមិនខកបំណងដោយជម្រើសជាតិកម្ពុជាធ្វើបានល្អទៀតផង។

កញ្ញា អន បូរីហ្សា

យុវតីថ្នាក់ទី៩ អន បូរីហ្សា បានឲ្យដឹងថា រូបគេចាប់គាំទ្រវិស័យបាល់ទាត់នៅកម្ពុជាតាំងពីអំឡុងឆ្នាំ២០២០ មកម្ល៉េះ។ ក្នុងជំនួបមិត្តភាពអន្តរជាតិ ២លើកកន្លងទៅនេះរូបគេមិនបានមកទស្សនាគាំទ្រជំនួបជាមួយក្រុមជម្រើសជាតិ ប៊ូតង់ នោះទេដោយសារតែរវល់ប្រឡង។

អ្នកគាំទ្រខាងលើបន្ថែមទៀតថា នៅជំនួបជាមួយ ហុងកុង នេះរូបគេទំនេរក៏ឆ្លៀតមកចូលរួមលើកទឹកចិត្តដល់ក្រុមកម្ពុជាតែម្ដង។ ការមកចូលរួមគាំទ្រនៅថ្ងៃទី៩ មិថុនា ឆ្នាំ២០២៦ នេះគឺមិនធ្វើឲ្យខ្លួនខកបំណងនោះឡើយ ពោលមានកម្លាំងឡើងវិញតែម្ដងបន្ទាប់ពីឃើញលទ្ធផលប្រកួតបើទោះជានឿយហត់ពីការសិក្សាយ៉ាងណាក្ដី។

ក្រុមជម្រើសជាតិកម្ពុជា

កញ្ញា អន បូរីហ្សា ថានឹងបន្តមកគាំទ្រក្រុមបាល់ទាត់ជម្រើសជាតិរហូត ព្រោះការគាំទ្រពីមហាជនគឺបានផ្ដល់កម្លាំងចិត្តដល់កីឡាករ និងបានធ្វើឲ្យវិស័យកីឡាមួយនេះកាន់តែរីកចម្រើនទៅមុនជាបន្តបន្ទាប់ទៀតពិសេសការប្រកួតលើឆាកអន្តរជាតិ។

កញ្ញា អន បូរីហ្សា

បញ្ជាក់ដែរថា រយៈពេលថ្មីៗនេះក្រុមបាល់ទាត់ជម្រើសជាតិកម្ពុជាបានធ្វើការប្រកួតមិត្តភាពអន្តរជាតិចំនួន ២ប្រកួតគឺឈ្នះទាំង ២ប្រកួតគឺលើកទី១ យកឈ្នះលើក្រុមជម្រើសជាតិប៊ូតង់ ដោយលទ្ធផល ៤-០ និងលើកទី២ កាលពីថ្ងៃទី៩ ខែមិថុនា ឆ្នាំ២០២៦ នេះយកឈ្នះលើ ហុងកុង ដោយលទ្ធផល ២-០ ក្រោមក្រសែភ្នែកអ្នកគាំទ្រជាង ២ម៉ឺននាក់៕

អត្ថបទដោយ៖ នួន ស៊ីណា

The post អន បូរីហ្សា គ្រាន់តែប្រឡងចប់មកគាំទ្របាល់ទាត់ជម្រើសជាតិភ្លាម និងសន្យាបន្តមកលើកក្រោយៗទៀត appeared first on Kampuchea Thmey Daily.

ពូឈីវ បើជាទោះរវល់មុខរបររកស៊ីទាំង ១០សាខាយ៉ាងណាក្ដីនៅតែឆ្លៀតមកគាំទ្របាល់ទាត់កម្ពុជាដែរ

Sina Noun — Wed, 10 Jun 2026 04:26:32 +0000

អ្នកគាំទ្របាល់ទាត់យ៉ាងស្ម័គ្រស្មោះ ពូឈីវ ថាបើទោះជារវល់ចំពោះមុខរបររកស៊ីទាំង ១០សាខាយ៉ាងណាក្ដី ប៉ុន្តែរូបលោកនៅតែឆ្លៀតមកគាំទ្រក្រុមជម្រើសជាតិ និងលើកទឹកចិត្តជាការបង្ហាញពីទំហំទឹកចិត្តស្រឡាញ់ចំពោះកីឡាមួយនេះ។

ពូឈីវ មកគាំទ្រកម្ពុជាប៉ះហុងកុង

ពូឈីវ បានឲ្យដឹងថា បច្ចុប្បន្ននេះលោកមានហាងលក់ចំណីអាហាររហូតដល់ទៅ ១០សាខាឯណោះ និងមានភាពមមាញឹកច្រើនផងដែរ។ បើទោះជារវល់ជាមួយមុខរបររកស៊ីដូចបានលើកឡើងនេះក្ដីក៏រូបលោកនៅតែឆ្លៀតមកគាំទ្រក្រុមបាល់ទាត់ជម្រើសជាតិកម្ពុជាផងដែរកាលពីម្សិលមិញនេះ។

ពូឈីវ មកគាំទ្រកម្ពុជាប៉ះហុងកុង

អ្នកគាំទ្រស្ម័គ្រស្មោះរូបនេះបន្ថែមទៀតថា គិតមកដល់ពេលនេះលោកនៅជាមួយបាល់ទាត់ និងលើកទឹកចិត្តក្រុមបាល់ទាត់កម្ពុជាបានរយៈពេល ១០ឆ្នាំមកហើយ។ ការមកគាំទ្រនេះគឺជាក្ដីស្រឡាញ់ និងចង់ជំរុញលើកទឹកចិត្តកីឡាករផង និងលើកស្ទួយវិស័យបាល់ទាត់ឲ្យមានភាពរីកចម្រើនតទៅមុខទៀត។ លោកចង់ឲ្យវិស័យបាល់ទាត់កាន់តែរីកចម្រើនកាន់តែមានសមត្ថភាពខ្លាំងជាបន្តបន្ទាប់ឈានពីមួយកម្រិតទៅមួយកម្រិត និងសំណូមពរប្រជាជនកម្ពុជាចូលរួមគាំទ្រវិស័យបាល់ទាត់កម្ពុជាឲ្យបានកាន់តែច្រើនថែមទៀត។

ពូឈីវ មកគាំទ្រកម្ពុជាប៉ះហុងកុង

បញ្ជាក់ដែរថា ពូឈីវ ក្នុងជំនួបមិត្តភាពអន្តរជាតិរវាង កម្ពុជា ប៉ះ ហុងកុង កាលពីយប់ថ្ងៃទី៩ ខែមិថុនា ឆ្នាំ២០២៦ នេះលោកក៏បានមកចូលរួមលើកទឹកចិត្តក្រុមបាល់ទាត់ជម្រើសជាតិកម្ពុជានៅពហុកីឡដ្ឋានជាតិផងដែរ។ ពូឈីវ ត្រូវបានមហាជនស្គាល់ថាជាអ្នកគាំទ្របាល់ទាត់យ៉ាងស្ម័គ្រស្មោះរយៈពេល ១០ឆ្នាំមកហើយ និងតែងតែបង្ហាញមុខគ្រប់កម្មវិធីប្រកួតបាល់ទាត់ និងការងារសប្បុរសធម៌៕

ពូឈីវ មកគាំទ្រកម្ពុជាប៉ះហុងកុង

អត្ថបទដោយ៖ នួន ស៊ីណា

The post ពូឈីវ បើជាទោះរវល់មុខរបររកស៊ីទាំង ១០សាខាយ៉ាងណាក្ដីនៅតែឆ្លៀតមកគាំទ្របាល់ទាត់កម្ពុជាដែរ appeared first on Kampuchea Thmey Daily.

រឿងល្អ ៥ យ៉ាងត្រូវចងចាំសម្រាប់ក្រុមបាល់ទាត់កម្ពុជា ក្នុងខែមិថុនានេះ

chean virakbot — Wed, 10 Jun 2026 02:23:56 +0000

ថ្ងៃទី៩ ខែមិថុនា ឆ្នាំ ២០២៦ អាចត្រូវបានចារទុកជាថ្ងៃល្អបំផុតសម្រាប់ក្រុមបាល់ទាត់ជម្រើសជាតិកម្ពុជាទាំងក្រុមបុរសដៃទី១ ក្រុមនារីដៃទី១ និងក្រុមយុវជនអាយុ ១៩ ឆ្នាំ ដែលបានសាងកំណត់ត្រាដ៏ល្អលើឆាកអន្តរជាតិ។ សារព័ត៌មាន«កម្ពុជាថ្មី» សូមលើកយករឿងល្អគួរឲ្យចងចាំ ៥ យ៉ាងសម្រាប់បាល់ទាត់កម្ពុជានៅក្នុងខែមិថុនានេះ។

ក្រុមបាល់ទាត់បុរសកម្ពុជា បានឈ្នះ ហុងកុង ជាលើកដំបូង

ក្រុមកម្ពុជាជម្រើសដៃទី១

ក្រុមបាល់ទាត់ជម្រើសជាតិកម្ពុជាបុរសដៃទី១ បានបញ្ចប់កំណត់ត្រាមិនល្អរយៈពេល ៦៩ ឆ្នាំដោយបានយកឈ្នះ ចិនហុងកុង ជាលើកដំបូងក្នុងលទ្ធផល ២-០ នាថ្ងៃទី៩ ខែមិថុនា ឆ្នាំ ២០២៦ នៅពហុកីឡដ្ឋានជាតិអូឡាំពិកដែលមានអ្នកទស្សនាផ្ទាល់ជាងពីរម៉ឺននាក់។ នេះជាការជួបគ្នាលើកទី១២ នៅក្នុងប្រវត្តិសាស្ត្ររវាងប្រទេសទាំងពីរគិតចាប់តាំងពីឆ្នាំ ១៩៥៧។ សម្រាប់ការជួបគ្នា ១១ លើកកន្លងមក ហុងកុង ឈ្នះ ៨ ដង និងស្មើគ្នា ៣ លើក ប៉ុន្តែការជួបគ្នាលើកទី១២ កម្ពុជា បានឈ្នះជាលើកដំបូង។

ក្រុម U19 កម្ពុជា ឡើងវគ្គ ៤ ក្រុមចុងក្រោយលើកដំបូងពាន ASEAN U19

ក្រុម U19 កម្ពុជា

ក្រុមបាល់ទាត់ជម្រើសជាតិអាយុ ១៩ ឆ្នាំ បានឡើងទៅកាន់វគ្គពាក់កណ្តាលផ្តាច់ព្រ័ត្រជាលើកដំបូងនៅក្នុងពានរង្វាន់យុវជនអាស៊ាន ASEAN U19 Boys Championship ក្នុងនាមជាក្រុមលេខ ២ ល្អបំផុតក្នុងពូល បន្ទាប់ពីបានឈ្នះ ហ្វីលីពីន ៣-០ និងស្មើ អូស្ត្រាលី ២-២ វគ្គសន្សំពិន្ទុក្នុងពូល។ ពានរង្វាន់ ASEAN U19 Boys Championship ត្រូវបានបង្កើតឡើងតាំងពីឆ្នាំ ២០០២ មានរយៈពេល ២៤ ឆ្នាំដែល ក្រុម U19 កម្ពុជាមិនធ្លាប់ឆ្លងផុតវគ្គសន្សំពិន្ទុក្នុងពូលឡើយ ប៉ុន្តែឆ្នាំ ២០២៦ បានឆ្លងផុតដោយជោគជ័យជាលើកដំបូង។

ក្រុមនារីកម្ពុជា ចេញប្រកួតមិត្តភាពអន្តរជាតិក្រៅប្រទេស ២ លើកដំបូង មិនចាញ់

ក្រុមបាល់ទាត់ជម្រើសជាតិនារីកម្ពុជា បានចេញប្រកួតមិត្តភាពអន្តរជាតិ ២ ប្រកួតដំបូងនៅក្រៅប្រទេសមិនទាន់ចាញ់សោះ។ ការប្រកួតទី១ ក្រុមនារីកម្ពុជា បានឈ្នះ ក្រុមនារីសិង្ហបុរី ៥-០ កាលពីថ្ងៃទី៦ ខែមិថុនា ឆ្នាំ ២០២៦ នៅប្រទេសឥណ្ឌូណេស៊ី និងប្រកួតទី២ បានស្មើម្ចាស់ផ្ទះ នារីឥណ្ឌូណេស៊ី ១-១ កាលពីថ្ងៃទី៩ ខែមិថុនា ឆ្នាំ ២០២៦។

ក្រុមនារីកម្ពុជា អបអរពេលឈ្នះ សិង្ហបុរី ៥-០

នេះជាការចេញប្រកួតមិត្តភាពអន្តរជាតិនៅក្រៅប្រទេសលើកដំបូង បន្ទាប់ពីក្រុមនារីកម្ពុជាត្រូវបានបង្កើតឡើងដោយទទួលស្គាល់ពី FIFA កាលពីឆ្នាំ ២០១៨ ហើយជាការប្រកួតមិត្តភាពអន្តរជាតិផ្លូវការលើកទី ៣ សម្រាប់ក្រុមនារីកម្ពុជា បន្ទាប់ពីលើកទី១ ឈ្នះ ក្រុមនារីកោះ ហ្គាំ ដោយលទ្ធផល ១-០ នៅពហុកីឡដ្ឋានជាតិអូឡាំពិកកាលពីថ្ងៃទី២៥ ខែមិថុនា ឆ្នាំ ២០២៥។

គ្រូបង្វឹកជនជាតិជប៉ុន ២ នាក់បង្កើតប្រវត្តិសាស្ត្របាល់ទាត់កម្ពុជាក្នុងថ្ងៃតែមួយ

លោក Koji Gyotoku

គ្រូបង្វឹកសញ្ជាតិជប៉ុន ២ រូបបាននាំក្រុមបាល់ទាត់កម្ពុជាបង្កើតប្រវត្តិសាស្ត្រថ្មីលើឆាកអន្តរជាតិ។ លោក Koji Gyotoku បានដឹកនាំក្រុមបុរសដៃទី ១ ឲ្យស្គាល់ជ័យជម្នះលើកដំបូងលើ ក្រុមចិនហុងកុង កាលពីថ្ងៃទី៩ ខែមិថុនា ដែលកម្ពុជាមិនធ្លាប់ឈ្នះសោះក្នុងពេល ៦៩ ឆ្នាំកន្លងមក។ ចំណែកលោក Yasuhiro Yoshida បានដឹកនាំក្រុម U19 កម្ពុជា បានឡើងវគ្គពាក់កណ្តាលផ្តាច់ព្រ័ត្រ ពានរង្វាន់ ASEAN U19 Boys Championship ជាលើកដំបូង ក្រោយស្មើ អូស្ត្រាលី ២-២ នៅថ្ងៃទី៩ ខែមិថុនា បន្ទាប់ពីពានរង្វាន់ត្រូវបានបង្កើតឡើងជាលើកដំបូងតាំងពីឆ្នាំ ២០០២។

លោក Yasuhiro Yoshida

៦ប្រកួតអន្តរជាតិ ក្រុមកម្ពុជាមិនចាញ់សោះក្នុងខែមិថុនា

នៅដើមខែមិថុនា ឆ្នាំ ២០២៦ ក្រុមបាល់ទាត់បុរសកម្ពុជា ក្រុមបាល់ទាត់នារីកម្ពុជា និងក្រុម U19 បានប្រកួតអន្តរជាតិក្នុងពេលជាមួយគ្នាសរុបចំនួន ៦ ប្រកួតគឺមិនចាញ់សោះឡើយ។ ក្រុមបុរស បានឈ្នះ ប៊ូតាន ៤-០ និងឈ្នះ ហុងកុង ២-០ ខណៈ ក្រុមនារីកម្ពុជា បានឈ្នះ នារីសិង្ហបុរី ៥-០ និងស្មើ នារីឥណ្ឌូណេស៊ី ១-១ ហើយក្រុម U19 កម្ពុជា បានឈ្នះ ហ្វីលីពីន ៣-០ និងស្មើ អូស្ត្រាលី ២-២។ នេះជារឿងកម្រសម្រាប់ក្រុមបាល់ទាត់កម្ពុជាដែលចេញប្រកួតក្នុងពេលជាមួយគ្នា និងទទួលបានលទ្ធផលល្អដូចគ្នា៕

កីឡាករកម្ពុជា អបអរ ពេលឈ្នះ ប៊ូតាន ៤-០

ក្រុមនារីកម្ពុជា អបអរ ពេលឈ្នះ សិង្ហបុរី ៥-០

ក្រុម U19 កម្ពុជា អបអរពេលឈ្នះ ហ្វីលីពីន ៣-០

អត្ថបទ៖ វិរបុត្រ

The post រឿងល្អ ៥ យ៉ាងត្រូវចងចាំសម្រាប់ក្រុមបាល់ទាត់កម្ពុជា ក្នុងខែមិថុនានេះ appeared first on Kampuchea Thmey Daily.

ទីបំផុត កម្ពុជា បញ្ចប់កំណត់ត្រាមិនឈ្នះ ៦៩ ឆ្នាំជាមួយ ហុងកុង តាមរយៈជ័យជម្នះ ២-០

chean virakbot — Tue, 09 Jun 2026 14:06:54 +0000

ក្រុមបាល់ទាត់ជម្រើសជាតិកម្ពុជា បានបញ្ចប់កំណត់ត្រាដែលឈ្នះរយៈពេល ៦៩ ឆ្នាំ របស់ខ្លួនរយៈពេលការយកឈ្នះលើ ចិនហុងកុង ដោយលទ្ធផល ២-០ សម្រាប់ការប្រកួតមិត្តភាពអន្តរជាតិ នៅថ្ងៃទី៩ ខែមិថុនា ឆ្នាំ ២០២៦ នៅពហុកីឡដ្ឋានជាតិអូឡាំពិក។

នៅវគ្គទី១ ក្រុមម្ចាស់ផ្ទះកម្ពុជាធ្វើបានយ៉ាងល្អដោយគ្រប់គ្រងបាល់ និងមានឱកាសស៊ុតជាច្រើនលើក ប៉ុន្តែរហូតដល់វគ្គទី១ទើបខ្សែបម្រើ យូឌៃ អូកាវ៉ា ស៊ុតចូលដើម្បីនាំមុខ ១-០។ នៅវគ្គទី២ ហុងកុង បានព្យាយាមដាក់សម្ពាធដើម្បីរកឱកាសតាមស្មើ ប៉ុន្តែត្រូវបានកម្ពុជាវាយបករកបាន១គ្រាប់ទៀតដោយកីឡាករ សៀង ចន្ធា។

នេះជាការជួបគ្នាលើកទី១២ នៅក្នុងប្រវត្តិសាស្ត្ររវាង កម្ពុជា និង ហុងកុង គិតចាប់តាំងពីឆ្នាំ ១៩៥៧។ សម្រាប់ការជួបគ្នា ១១ លើកកន្លងមក ហុងកុង ឈ្នះ ៨ ដង និងស្មើគ្នា ៣ លើក ប៉ុន្តែការជួបគ្នាលើកទី១២ កម្ពុជា បានបញ្ចប់កំណត់ត្រារយៈ ៦៩ ឆ្នាំ ដោយទទួលបានជ័យជម្នះជាលើកដំបូងនៅក្នុងប្រវត្តិសាស្ត្ររបស់ខ្លួន៕

អត្ថបទ៖ វិរបុត្រ

The post ទីបំផុត កម្ពុជា បញ្ចប់កំណត់ត្រាមិនឈ្នះ ៦៩ ឆ្នាំជាមួយ ហុងកុង តាមរយៈជ័យជម្នះ ២-០ appeared first on Kampuchea Thmey Daily.

ក្រុមបាល់ទាត់ជម្រើសជាតិកម្ពុជា Archives - Kampuchea Thmey Daily

ក្រោយ​ឃើញ​បញ្ជី​ឈ្មោះ​ជម្រើស​ជាតិ លោក ឃួន ឡាប៊ូរ៉ាវី លើក​ឡើង​ថា «តើយើង​វង្វែង​ផ្លូវ​មែន​ទេ?

ក្រុម​ជម្រើស​ជាតិកម្ពុជា មាន​ស្ថិតិ​ល្អ​ការ​ប្រកួត ASEAN Championship នៅ​ស្តាត​មរតកតេជោ

កម្ពុជា សម្រេច​ប្រើ​ ស្តាត​មរតក​តេជោ ជាលើក​ទី២ ដើម្បី​ប្រកួតពាន ASEAN Championship

រឿង​ល្អ​ ៥ យ៉ាងត្រូវ​ចង​ចាំ​​សម្រាប់​ក្រុម​បាល់ទាត់កម្ពុជា ក្នុង​ខែ​មិថុនា​នេះ

ទី​បំផុត កម្ពុជា បញ្ចប់​កំណត់​ត្រាមិនឈ្នះ​ ៦៩ ឆ្នាំជាមួយ ហុងកុង តាម​រយៈ​ជ័យជម្នះ ២-០

ក្រោយឃើញបញ្ជីឈ្មោះជម្រើសជាតិ លោក ឃួន ឡាប៊ូរ៉ាវី លើកឡើងថា «តើយើងវង្វែងផ្លូវមែនទេ?

ក្រុមជម្រើសជាតិកម្ពុជា មានស្ថិតិល្អការប្រកួត ASEAN Championship នៅស្តាតមរតកតេជោ

កម្ពុជា សម្រេចប្រើ ស្តាតមរតកតេជោ ជាលើកទី២ ដើម្បីប្រកួតពាន ASEAN Championship

រឿងល្អ ៥ យ៉ាងត្រូវចងចាំសម្រាប់ក្រុមបាល់ទាត់កម្ពុជា ក្នុងខែមិថុនានេះ

ទីបំផុត កម្ពុជា បញ្ចប់កំណត់ត្រាមិនឈ្នះ ៦៩ ឆ្នាំជាមួយ ហុងកុង តាមរយៈជ័យជម្នះ ២-០