ក្រុមហ៊ុន Meta Archives - Kampuchea Thmey Daily

Meta ឲ្យអូស្ត្រាលីពិចារណាលើបម្រាមប្រើបណ្តាញសង្គមចំពោះកុមារ ក្រោយលុបគណនីជាង៥៤ម៉ឺន

Chheang — Mon, 12 Jan 2026 02:47:52 +0000

ក្រុមហ៊ុនបច្ចេកវិទ្យាយក្ស Meta បានអំពាវនាវឲ្យរដ្ឋាភិបាលអូស្ត្រាលី ពិចារណាឡើងវិញនូវច្បាប់ជាប្រវត្តិសាស្ត្ររបស់ខ្លួន ដែលហាមឃាត់កុមារអាយុក្រោម១៦ឆ្នាំ មិនឲ្យប្រើប្រាស់បណ្តាញសង្គម ខណៈដែលក្រុមហ៊ុននេះបានរាយការណ៍ថា ខ្លួនបានបិទគណនីអ្នកប្រើប្រាស់អស់ជាង ៥៤៤ ០០០គណនីរួចមកហើយ ចាប់តាំងពីច្បាប់នេះចូលជាធរមាន។

(រូបថត៖ រ៉យទ័រ)

យោងតាម AFP ចាប់តាំងពីថ្ងៃទី១០ខែធ្នូឆ្នាំ២០២៥មក ប្រទេសអូស្ត្រាលីបានតម្រូវឲ្យបណ្តាញសង្គមធំៗ រួមមាន TikTok និង YouTube បញ្ឈប់អ្នកប្រើប្រាស់ដែលមិនទាន់គ្រប់អាយុកំណត់ មិនឲ្យមានគណនីប្រើប្រាស់ បើមិនដូច្នោះទេ នឹងត្រូវប្រឈមនឹងការផាកពិន័យរហូតដល់ ៤៩.៥លានដុល្លារអូស្ត្រាលី។ ក្រុមហ៊ុន Meta បានបង្ហើបថា ត្រឹមតែក្នុងសប្តាហ៍ដំបូងនៃការអនុវត្តច្បាប់ ខ្លួនបានលុបគណនីចំនួន ៣៣១ ០០០គណនី ចេញពី Instagram ១៧៣ ០០០គណនី ចេញពី Facebook និង ៤០ ០០០គណនី ទៀតចេញពី Threads។

ទោះបីជាកំពុងអនុវត្តតាមច្បាប់ក៏ដោយ ក្រុមហ៊ុន Meta បានលើកឡើងថា បម្រាមនេះ ប្រហែលជាមិនអាចសម្រេចបាននូវគោលដៅសុវត្ថិភាពនោះទេ ដោយក្រុមហ៊ុនបារម្ភថា វាអាចធ្វើឲ្យយុវជននៅដាច់ឆ្ងាយពីសង្គម ឬរុញច្រានពួកគេឲ្យទៅប្រើប្រាស់កម្មវិធីដែលគ្មានការត្រួតពិនិត្យ និងមានគ្រោះថ្នាក់ជាងមុន។ ក្រុមហ៊ុនបានស្នើឲ្យរដ្ឋាភិបាលងាកមកបង្កើតស្តង់ដាររួមមួយ ដែលផ្តោតលើឯកជនភាព និងការផ្តល់បទពិសោធន៍តាមអ៊ីនធឺណិតឲ្យសមស្របតាមវ័យ ជំនួសឲ្យការហាមឃាត់ទាំងស្រុង។ ជាមួយគ្នានេះ Meta ក៏បានស្នើជាថ្មីឲ្យបណ្តាញចែកចាយកម្មវិធី (App Stores) ជាអ្នកទទួលខុសត្រូវលើការផ្ទៀងផ្ទាត់អាយុ និងការយល់ព្រមពីមាតាបិតា ព្រមទាំងបានប្រកាសពីការចូលរួមក្នុងគំនិតផ្តួចផ្តើម «OpenAge» ដើម្បីបង្កើតឧបករណ៍ផ្ទៀងផ្ទាត់អាយុដោយឯករាជ្យផងដែរ៕

ប្រែសម្រួល៖ ឈាង

The post Meta ឲ្យអូស្ត្រាលីពិចារណាលើបម្រាមប្រើបណ្តាញសង្គមចំពោះកុមារ ក្រោយលុបគណនីជាង៥៤ម៉ឺន appeared first on Kampuchea Thmey Daily.

ក្រុមហ៊ុន Meta យល់ព្រមសងសំណង ១,៤ពាន់លានដុល្លារឲ្យរដ្ឋតិចសាស់

Chheang — Wed, 31 Jul 2024 09:07:04 +0000

Meta ដែលជាក្រុមហ៊ុនមេរបស់បណ្ដាញសង្គម Facebook និង Instagram បានយល់ព្រមបង់ប្រាក់ចំនួន ១,៤ពាន់លានដុល្លារឲ្យរដ្ឋតិចសាស់ ក្នុងបណ្តឹងមួយដែលបានចោទប្រកាន់ពីបទបំពានច្បាប់រដ្ឋលួចប្រមូលព័ត៌មានខុសច្បាប់ដោយប្រើបច្ចេកវិទ្យាសម្គាល់មុខអ្នកប្រើប្រាស់ច្រើនជាង២០លាននាក់ដោយគ្មានការអនុញ្ញាត។

(រូបភាព៖ Getty)

ដំណោះស្រាយនៅក្នុងបណ្ដឹងនេះ ត្រូវបានប្រកាសឡើងដោយអគ្គមេធាវីរដ្ឋតិចសាស់ លោក Ken Paxton កាលពីថ្ងៃអង្គារទី៣០ខែកក្កដា ហើយក៏ជាអ្នកដែលបានដាក់ពាក្យប្ដឹងក្រុមហ៊ុន Meta នៅក្នុងតុលាការរដ្ឋកាលពីឆ្នាំ២០២២ផងដែរ។

លោក Paxton បាននិយាយថា នេះគឺជាសំណងនៅក្នុងបណ្ដឹងស្ដីពីឯកជនភាពដ៏ធំបំផុតមិនធ្លាប់មាននៅក្នុងរដ្ឋតិចសាស់ ហើយវាក៏ជាការធ្វើឲ្យក្រុមហ៊ុនបច្ចេកវិទ្យាធំៗទទួលខុសត្រូវចំពោះការបំពានច្បាប់ និងរំលោភសិទ្ធិឯកជនភាពប្រជាជននៃរដ្ឋតិចសាស់។

អ្នកនាំពាក្យក្រុមហ៊ុន Meta បានប្រាប់សារព័ត៌មាន The Epoch Times ថា ពួកគេរីករាយនឹងដំណោះស្រាយជាមួយរដ្ឋតិចសាស់។ ក្នុងសេចក្ដីថ្លែងការណ៍របស់ Meta បានសរសេរថា៖ «យើងរីករាយ ដើម្បីដោះស្រាយបញ្ហានេះ ហើយទន្ទឹងរង់ចាំស្វែងរកឱកាសនាថ្ងៃអនាគត ដើម្បីពង្រឹងការវិនិយោគពាណិជ្ជកម្មរបស់ពួកយើងនៅរដ្ឋតិចសាស់ រួមមានមជ្ឈមណ្ឌលអភិវឌ្ឍន៍ទិន្នន័យដ៏មានសក្ដានុពលផងដែរ»។

សំណងនេះ ធ្វើឡើងស្របតាមច្បាប់ដែលបានចែងកាលពីឆ្នាំ២០០៩របស់រដ្ឋតិចសាស់ ពាក់ព័ន្ធនឹងការបំពានឯកជនភាព ដែលក្នុងមួយបណ្ដឹងត្រូវសងការខូចខាតអតិបរមាចំនួន ២៥ ០០០ដុល្លារ។ យោងតាមឯកសារតុលាការ បណ្ដាញសង្គម Facebook បានបំពានឯកជនភាពតាមរយៈការប្រើប្រាស់មុខងារសម្គាល់មុខ «Tag Suggestion» ដែលបានបញ្ចេញកាលពីឆ្នាំ២០១១។ មុខងារនេះ ត្រូវបានលុបចោលវិញកាលពីខែកញ្ញាឆ្នាំ២០១៩។

សំណងជាទឹកប្រាក់ ១,៤ពាន់លានដុល្លារនេះ នឹងត្រូវក្រុមហ៊ុន Meta ប្រគល់ជូនរដ្ឋតិចសាស់ជាដំណាក់កាលក្នុងរយៈពេល៥ឆ្នាំ៕

ដោយ៖ ឈាង

The post ក្រុមហ៊ុន Meta យល់ព្រមសងសំណង ១,៤ពាន់លានដុល្លារឲ្យរដ្ឋតិចសាស់ appeared first on Kampuchea Thmey Daily.

Meta ឆ្លើយតបនឹងម៉ាឡេស៊ី ទាក់ទិនរឿងលុបការបង្ហោះពីជំនួបជាមួយហាម៉ាស

Chheang — Thu, 16 May 2024 05:01:45 +0000

Meta ដែលជាក្រុមហ៊ុនមេរបស់ហ្វេសប៊ុក បានស្ដារឡើងវិញនូវការបង្ហោះព័ត៌មានអំពីជំនួបរវាងនាយករដ្ឋមន្ត្រីម៉ាឡេស៊ី និងមេដឹកនាំក្រុមហាម៉ាស ដែលត្រូវបានលុបចោលកាលពីពេលថ្មីៗកន្លងទៅ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃទី១៦ ខែឧសភា។

ក្រោយមានការជជីកសួរពីរដ្ឋាភិបាលម៉ាឡេស៊ី ក្រុមហ៊ុន Meta បានឆ្លើយតបថា ការលុបនូវមាតិកាព័ត៌មានជំនួបរវាងលោក Anwar Ibrahim និងលោក Ismail Haniyeh កាលពីថ្ងៃទី១៣ សប្ដាហ៍នេះ គឺបណ្ដាលមកពីកំហុសបច្ចេកទេស។ “ការបង្ហោះចំនួន២ ត្រូវបានលុប ដោយកំហុសបច្ចេកទេស ហើយឥលូវត្រូវបានស្ដារយកមកវិញហើយ” នេះជាសារដែលអ្នកនាំពាក្យហ្វេសប៊ុកផ្ញើតាមអ៊ីម៉ែលទៅកាន់ទីភ្នាក់ងារព័ត៌មាន Reuters។

ក្រុមហ៊ុន Meta បានបន្ថែមថា ខ្លួនមិនមានបំណងហាមឃាត់ការបញ្ចេញមតិតាមរយៈបណ្ដាញសង្គមរបស់ខ្លួនឡើយ ហើយវាក៏មិនមែនជាការពិតទេ ដែលអះអាងថា ហ្វេសប៊ុកកំពុងរឹងបន្តឹងនូវរាល់មាតិកាណាដែលគាំទ្រប៉ាឡេស្ទីន។

លោក Ismail Haniyeh មេដឹកនាំក្រុមហាម៉ាស និងលោក Anwar Ibrahim នាយករដ្ឋមន្ត្រីម៉ាឡេស៊ី

សូមរំឭកថា ក្រោយជំនួបជាមួយមេដឹកនាំក្រុមសកម្មប្រយុទ្ធប៉ាឡេស្ទីនរួច លោកនាយករដ្ឋមន្ត្រីម៉ាឡេស៊ី បានថ្លែងថា លោកមានទំនាក់ទំនងល្អជាមួយលោក Ismail Haniyeh តែមិនជាប់ទាក់ទិននឹងរឿងដោះដូរឧបករណ៍យោធាអ្វីឡើយ។ យ៉ាងណាមិញ ការបង្ហោះព័ត៌មានអំពីជំនួបនេះ ត្រូវបានក្រុមហ៊ុនហ្វេសប៊ុកធ្វើការលុបចោល។ កត្តានេះហើយបានបង្កជាការមិនពេញចិត្តជាខ្លាំងសម្រាប់រដ្ឋាភិបាលម៉ាឡេស៊ី ហើយពួកគេបានគំរាមចាត់វិធានតឹងរ៉ឹងប្រឆាំងនឹងក្រុមហ៊ុន Meta ដែលតែងតែលុបចោលនូវមាតិកាណាដែលបង្ហាញការគាំទ្រប៉ាឡេស្ទីន។

គួរបញ្ជាក់ថា ម៉ាឡេស៊ី គឺជាប្រទេសដែលសម្បូរទៅជនជាតិមូស្លីមភាគច្រើន ហើយក៏ជាអ្នកបញ្ចេញសម្លេងគាំទ្រចំពោះប៉ាឡេស្ទីនផងដែរ។ ជាងនេះទៅទៀត ម៉ាឡេស៊ីក៏ធ្លាប់បានបង្ហាញការគាំទ្រចំពោះដំណោះស្រាយរដ្ឋ២ ដែលជាមធ្យោបាយស្វែងរកសន្តិភាពបិទបញ្ចប់ជម្លោះរវាងអ៊ីស្រាអែល និងប៉ាឡេស្ទីន៕

ដោយ៖ ឈាង

អានបន្ថែម៖ ម៉ាឡេស៊ី សួរនាំ Meta ចង់ដឹងមូលហេតុអ្វីបានលុបការបង្ហោះពីជំនួបជាមួយមេដឹកនាំហាម៉ាស

The post Meta ឆ្លើយតបនឹងម៉ាឡេស៊ី ទាក់ទិនរឿងលុបការបង្ហោះពីជំនួបជាមួយហាម៉ាស appeared first on Kampuchea Thmey Daily.

អ្នកលេង Facebook និង Instagram នៅ អឺរ៉ុប អាចបង់លុយប្រចាំខែដើម្បីបិទផ្ទាំងផ្សាយពាណិជ្ជកម្ម

ratanak neang — Tue, 31 Oct 2023 09:05:06 +0000

ក្រុមហ៊ុន Meta បានផ្តល់ជម្រើសដល់អ្នកប្រើប្រាស់បណ្ដាញសង្គម Facebook និង Instagram នៅក្នុងតំបន់អឺរ៉ុប អាចទិញគម្រោងប្រចាំខែដើម្បីចូលប្រើវេទិការទាំងនេះដោយមិនមានលោតផ្ទាំងផ្សាយពាណិជ្ជកម្មក្នុងតម្លៃ ១០.៦០ ដុល្លារ នៅលើកុំព្យូទ័រលើតុ និង ១៣.៧៨ ដុល្លារសម្រាប់ប្រព័ន្ធប្រតិបត្តិការ iOS និង Android ។

ការផ្តល់ជូននេះគឺសម្រាប់អ្នកប្រើប្រាស់នៅក្នុងសហភាពអឺរ៉ុបដូចជា អ៊ីស្លង់ លិចតិនស្តាញ ន័រវេស និងស្វីស ប៉ុន្តែទោះជាយ៉ាងណា ចាប់ពីខែមីនាឆ្នាំក្រោយ ថ្លៃសេវាប្រចាំខែនេះនឹងបន្ថែម ៦.៣៧ ដុល្លារនៅលើគេហទំព័រ និង ៨.៤៨ ដុល្លារ នៅលើ iOS និង Android ។

គម្រោងបង់លុយនេះ គឺជាផ្នែកមួយនៃកិច្ចខិតខំប្រឹងប្រែងក្រុមហ៊ុន Meta ដើម្បីអនុលោមតាមបទប្បញ្ញត្តិអឺរ៉ុប ដែលមានបំណងទប់ស្កាត់ការប្រើប្រាស់របស់ក្រុមហ៊ុនបច្ចេកវិទ្យាអាមេរិកក្នុងការផ្សាយពាណិជ្ជកម្មផ្ទាល់ខ្លួន ស្របពេលដែលកាលពីឆ្នាំមុន សហភាពអឺរ៉ុបបានរឹតបន្តឹងច្បាប់របស់ខ្លួន ហើយឆាប់ៗនេះនឹងតម្រូវឲ្យក្រុមហ៊ុនបច្ចេកវិទ្យាធំៗ Big Tech ស្នើសុំការយល់ព្រមពីអ្នកប្រើប្រាស់ជុំវិញការផ្សាយពាណិជ្ជកម្មបែបនេះផងដែរ ។

ដោយឡែក អ្នកដែលមិនចង់ប្រើគម្រោងបង់លុយនេះនៅតែអាចបន្តលេង Instagram និង Facebook បានជាធម្មតា ប៉ុន្តែនឹងបន្តលោតផ្ទាំងផ្សាយពាណិជ្ជកម្មដូចដើមដដែល ៕

ប្រែសម្រួល៖ នាង រតនៈ

ប្រភព៖ CNN

The post អ្នកលេង Facebook និង Instagram នៅ អឺរ៉ុប អាចបង់លុយប្រចាំខែដើម្បីបិទផ្ទាំងផ្សាយពាណិជ្ជកម្ម appeared first on Kampuchea Thmey Daily.

ក្រុមហ៊ុន Meta ប្រាប់មូលហេតុដែលប្រទេសនៅអឺរ៉ុប មិនអាចប្រើកម្មវិធី Threads ទោះប្ដូរទៅជា VPN ក៏ដោយ

ratanak neang — Tue, 18 Jul 2023 07:58:07 +0000

ក្រុមហ៊ុន Meta បានដាក់ឲ្យដំណើរការកម្មវិធី Threads កាលពីថ្ងៃទី៥ ខែកក្កដា និងអនុញ្ញាតឲ្យប្រទេសជាង ១០០ ចូលប្រើប្រាស់បាន ប៉ុន្តែក្នុងនោះប្រទេសនៅសហភាពអឺរ៉ុប (EU) គឺមិនទាន់អាចចូលប្រើប្រាស់កម្មវិធី Threads នេះបាននៅឡើយទេ ។

ចំពោះមូលហេតុដែលក្រុមហ៊ុន Meta កំពុងរារាំងការចូលប្រើប្រាស់ពីប្រជាជនសហភាពអឺរ៉ុប ទោះបីព្យាយាមដូរទៅជា VPN ក៏ដោយនោះ គឺដោយសារតែព្រួយបារម្ភអំពីឯកជនភាពកម្មវិធី ប៉ុន្តែក្នុងនោះលើកលែងសម្រាប់ចក្រភពអង់គ្លេសមួយប៉ុណ្ណោះ អាចចូលប្រើប្រាស់កម្មវិធី Threads បាន ។

នៅក្នុងសេចក្តីថ្លែងការណ៍មួយទៀតកាលពីពេលថ្មីៗនេះ ក្រុមហ៊ុន Meta បានលើកឡើងថា ខ្លួនកំពុងអនុវត្តវិធានការថ្មីបន្ថែមទៀត គឺហាមប្រាម EU មិនឲ្យចូលប្រើប្រាស់កម្មវិធីបណ្តាញផ្សព្វផ្សាយសង្គមថ្មីៗ ដោយសារតែការបង្ខិតបង្ខំពីសំណាក់សហភាពអឺរ៉ុបទៅលើកម្មវិធី Facebook ទើបធ្វើឲ្យក្រុមហ៊ុន Meta ចង់ចេញពីទីនោះ ។

សូមបញ្ជាក់ថា Threads ជា App អភិវឌ្ឍន៍ដោយក្រុមបច្ចេកទេស Instagram របស់ក្រុមហ៊ុន Meta ដែលទទួលបានការគាំទ្រយ៉ាងឆាប់រហ័ស ជាពិសេសក៏ជាដៃគូរប្រជែងដ៏គួរឱ្យព្រួយបារម្ភសម្រាប់ Twitter ផងដែរ ៕

ប្រែសម្រួល៖ នាង រតនៈ

ប្រភព៖ VOI

ចុចអាន ៖ Twitter បន្តបាត់ចំណូលជាងពាក់កណ្តាលពីការផ្សាយពាណិជ្ជកម្ម

The post ក្រុមហ៊ុន Meta ប្រាប់មូលហេតុដែលប្រទេសនៅអឺរ៉ុប មិនអាចប្រើកម្មវិធី Threads ទោះប្ដូរទៅជា VPN ក៏ដោយ appeared first on Kampuchea Thmey Daily.

Meta បញ្ចេញ App ថ្មីជាផ្លូវការ ដើម្បីប្រជែងជាមួយ Twitter

ratanak neang — Thu, 06 Jul 2023 05:03:42 +0000

ក្រុមហ៊ុន Meta កាលពីថ្ងៃពុធបានបញ្ចេញ App ថ្មីជាផ្លូវការមួយទៀតឈ្មោះ Threads ដែលជាគូរប្រជែងរបស់ Twitter ក្នុងគោលបំណងផ្តល់នូវវេទិកាសម្រាប់ការសន្ទនាដូចពិតៗតាមអ៊ីនធឺណិត ក៏ដូចជាការចែករំលែកអត្ថបទផ្សេងៗជាដើម ។

App ថ្មីមួយនេះ ត្រូវបានបង្កើតឡើងដោយក្រុមការងារ Instagram ដោយមានលក្ខណៈស្រដៀងគ្នាណាស់ទៅនឹង Twitter ។ ជាមួយ App នេះ អ្នកប្រើប្រាស់អាចបង្ហោះម្តងៗបានរហូតដល់ ៥០០ តួអក្សរ ហើយអាចរួមបញ្ចូលតំណភ្ជាប់ (Link) រូបថត និងវីដេអូដែលមានរយៈពេលរហូតដល់ ៥ នាទី ។

មិនតែប៉ុណ្ណោះ អ្នកដែលមានគណនី Instagram រួចហើយ នឹងអាចភ្ជាប់ជាមួយ Threads បាន ដោយទទួលបានឈ្មោះគណនីប្រើប្រាស់ដូចគ្នា ។

ពាក់ព័ន្ធនឹងបញ្ហានេះដែរ នាយកប្រតិបត្តិក្រុមហ៊ុន Meta លោក Mark Zuckerberg បាននិយាយថា ចក្ខុវិស័យរបស់កម្មវិធីថ្មីនេះ គឺបង្កើតជម្រើស និងកន្លែងដែលងាយស្រួលសម្រាប់ការសន្ទនាជាមួយគ្នាទៅវិញទៅមក ហើយចំពោះកម្មវិធី Threads នេះនឹងត្រូវបានដាក់ឲ្យប្រើប្រាស់លើប្រព័ន្ធ iOS និង Android នៅក្នុងប្រទេសជាង ១០០ ៕

ប្រែសម្រួល៖ នាង រតនៈ

ប្រភព៖ Anadolu

The post Meta បញ្ចេញ App ថ្មីជាផ្លូវការ ដើម្បីប្រជែងជាមួយ Twitter appeared first on Kampuchea Thmey Daily.

Meta តម្រូវឲ្យបង់លុយប្រចាំខែដូច Twitter បើអ្នកប្រើប្រាស់ចង់បាន Verified គណនីខ្លួនឯង

ratanak neang — Mon, 20 Feb 2023 07:35:47 +0000

ប្រធានក្រុមហ៊ុន Meta លោក Mark Zuckerberg ប្រកាសថា Facebook និង Instagram នឹងដាក់ដំណើរការសេវាកម្មជាវប្រចាំខែឈ្មោះថា “Meta Verified” ហើយតម្រូវឲ្យបង់ប្រាក់ចំនួន ១១.៩៩ ដុល្លារក្នុងមួយខែសម្រាប់នៅលើគេហទំព័រ និង ១៤.៩៩ ដុល្លាក្នុងមួយខែសម្រាប់លើប្រព័ន្ធប្រតិបត្តិការ IOS និង Android ចំពោះអ្នកចង់បានសញ្ញាធីកពណ៌ខៀវ (Verified) ក្នុងគណនីរបស់ពួកគេ ។

កញ្ចប់សេវាកម្មថ្មីនេះ នឹងត្រូវចាប់ផ្តើមដំណើរការមុនគេនៅក្នុងប្រទេសអូស្ត្រាលី និងនូវែលសេឡង់នៅក្នុងសប្តាហ៍នេះ ចំណែកប្រទេសផ្សេងៗទៀតនឹងដំណើរការនៅពេលក្រោយ ។

ទន្ទឹមនោះ សម្រាប់កញ្ចប់សេវាកម្មថ្មីនេះដែរ គឺធ្វើឡើងសម្រាប់តែអ្នកប្រើប្រាស់ដែលមានអាយុចាប់ពី ១៨ ឆ្នាំឡើងទៅប៉ុណ្ណោះ ទើបអាចស្នើសុំបាន ហើយវាជួយឲ្យគណនី Facebook របស់អ្នកប្រើប្រាស់លែងមានការក្លែងបន្លំ និងកាន់តែមានសុវត្ថិភាពជាងមុន ។

ដូចគ្នានេះ កាលពីខែធ្នូកន្លងទៅបណ្ដាញសង្គម Twitter ក្រោមការគ្រប់គ្រង់របស់មហាសេដ្ឋី Elon Musk ក៏បានដាក់ឲ្យដំណើរការសេវាកម្មបង់ប្រាក់ ៨ ដុល្លារក្នុងមួយខែនៅលើគេហទំព័រ និង ១១ ដុល្លារនៅលើ IOS និង Android សម្រាប់អ្នកចង់បានសញ្ញាធីកពណ៌ខៀវ (Verified) ក្នុងគណនីរបស់ពួកគេ ៕

ប្រែសម្រួលដោយ ៖ នាង រតនៈ

ប្រភព ៖ CNBC

ចុចអាន ៖ អង់គ្លេស ប្រាប់ចំនួនទ័ព រុស្ស៊ី ស្លាប់ និងរបួស តាំងពីផ្ទុះប្រតិបត្តិការសឹកនៅ អ៊ុយក្រែន

The post Meta តម្រូវឲ្យបង់លុយប្រចាំខែដូច Twitter បើអ្នកប្រើប្រាស់ចង់បាន Verified គណនីខ្លួនឯង appeared first on Kampuchea Thmey Daily.

Facebook កើនអ្នកប្រើប្រាស់ ២ ពាន់លាននាក់ កាលពីចុងឆ្នាំមុន

ratanak neang — Thu, 02 Feb 2023 08:15:22 +0000

ចំនួនអ្នកប្រើប្រាស់បណ្ដាញសង្គម Facebook ប្រចាំថ្ងៃបានកើនឡើងដល់ជាមធ្យម ២ ពាន់លាននាក់កាលពីខែធ្នូ ឆ្នាំ ២០២២ កន្លងទៅ ពោលប្រហែល ២៥ ភាគរយនៃចំនួនប្រជាជនពិភពលោក សូម្បីតែនៅអាមេរិក អឺរ៉ុប និងកាណាដា ក៏មានចំនួនអ្នកប្រើប្រាស់កើនឡើងផងដែរ ។

ក្រុមហ៊ុន Meta បាននិយាយថា ចំណែកចំនួនមនុស្សដែលសកម្មនៅលើកម្មវិធីទាំងអស់របស់ខ្លួនជារៀងរាល់ថ្ងៃ គឺកើនឡើង ៥ ភាគរយ បើធៀបនឹងឆ្នាំមុន ។

ជាមួយគ្នានោះ លោក Mark Zuckerberg បានប្រកាសថា ២០២៣ នេះ ក្រុមហ៊ុនគិតថា ជាឆ្នាំដ៏មានប្រសិទ្ធភាពចំពោះភាគហ៊ុនរបស់ Meta ដោយអាចនឹងកើនឡើងជាង ១៥ ភាគរយ ។

បន្ថែមពីនេះ កាលពីឆ្នាំមុន Meta ដែលជាម្ចាស់ក្រុមហ៊ុន Instagram និង WhatsApp បានប្រកាសពីការរៀបចំរចនាសម្ព័ន្ធសំខាន់ៗ រួមទាំងការកាត់បន្ថយទំហំការិយាល័យ និងកាត់បន្ថយការងារប្រហែល ១៣ ភាគរយនៃបុគ្គលិករបស់ខ្លួន ។

តាមរយៈការកាត់បន្ថយនេះ បានធ្វើឲ្យប៉ះពាល់ដល់ប្រាក់ចំណេញេជាងពាក់កណ្តាល ប៉ុន្តែក្រុមហ៊ុននៅតែរកចំណូលបានជាង ២៣.២ ទៅ ៣២.២ ពាន់លានដុល្លារ ។ ទោះជាយ៉ាងនេះក្ដី ចំនួននេះគឺធ្លាក់ចុះប្រមាណ ៤ ភាគរយ បើធៀបនឹងឆ្នាំមុន ។

ទន្ទឹមនឹងនោះ លោក Zuckerberg បានឲ្យដឹងទៀតថា ក្រុមហ៊ុនកំពុងធ្វើការផលិតវីដេអូ Reels កាន់តែលេចធ្លោដើម្បីកាន់តែទាក់ទាញពីសំណាក់យុវវ័យ ដោយអាចប្រកួតប្រជែងជាមួយ TikTok បាន ។

ដោយឡែក Meta ក៏បានប្រាប់ផងដែរថា ក្រុមហ៊ុននឹងចំណាយលុយចំនួន ៤០ ពាន់លានដុល្លារ ដើម្បីទិញភាគហ៊ុនត្រឡប់មកវិញ បន្ទាប់ពីបានធ្លាក់ចុះយ៉ាងខ្លាំងកាលពីឆ្នាំមុន ចំពេលមានការសង្ស័យពីសំណាក់វិនិយោគិនអំពីទិសដៅរបស់ក្រុមហ៊ុន ៕

ប្រែសម្រួលដោយ ៖ នាង រតនៈ

ប្រភព ៖ BBC

ចុចអាន ៖ មកដឹងចំនួនអ្នកស្លាប់ និងផ្លាស់ផ្ទះសម្បែងនៅ មីយ៉ាន់ម៉ា ក្រោយរដ្ឋប្រហារ ២ ឆ្នាំមកនេះ

The post Facebook កើនអ្នកប្រើប្រាស់ ២ ពាន់លាននាក់ កាលពីចុងឆ្នាំមុន appeared first on Kampuchea Thmey Daily.

ក្រុមហ៊ុន Meta Archives - Kampuchea Thmey Daily

Meta ឲ្យអូស្ត្រាលីពិចារណាលើបម្រាមប្រើបណ្តាញសង្គមចំពោះកុមារ​ ក្រោយលុបគណនីជាង៥៤ម៉ឺន

ក្រុមហ៊ុន Meta យល់​ព្រម​សង​សំណង ១,៤​ពាន់​លាន​ដុល្លារ​ឲ្យ​រដ្ឋតិចសាស់

Meta ឆ្លើយ​តប​នឹង​ម៉ាឡេស៊ី ទាក់ទិន​រឿង​លុប​ការ​បង្ហោះ​ពី​ជំនួប​ជាមួយ​ហាម៉ាស

អ្នកលេង Facebook និង Instagram នៅ អឺរ៉ុប អាចបង់លុយប្រចាំខែដើម្បីបិទផ្ទាំង​ផ្សាយពាណិជ្ជកម្ម

ក្រុមហ៊ុន Meta ប្រាប់មូលហេតុដែលប្រទេសនៅអឺរ៉ុប មិនអាចប្រើកម្មវិធី Threads ទោះប្ដូរទៅជា VPN ក៏ដោយ

Meta បញ្ចេញ App ថ្មីជាផ្លូវការ ដើម្បីប្រជែង​​ជាមួយ Twitter

Meta តម្រូវឲ្យបង់លុយប្រចាំខែដូច Twitter បើអ្នកប្រើប្រាស់ចង់បាន Verified គណនីខ្លួនឯង

Facebook កើនអ្នកប្រើប្រាស់ ២ ពាន់លាននាក់ កាលពីចុងឆ្នាំមុន

Meta ឲ្យអូស្ត្រាលីពិចារណាលើបម្រាមប្រើបណ្តាញសង្គមចំពោះកុមារ ក្រោយលុបគណនីជាង៥៤ម៉ឺន

ក្រុមហ៊ុន Meta យល់ព្រមសងសំណង ១,៤ពាន់លានដុល្លារឲ្យរដ្ឋតិចសាស់

Meta ឆ្លើយតបនឹងម៉ាឡេស៊ី ទាក់ទិនរឿងលុបការបង្ហោះពីជំនួបជាមួយហាម៉ាស

អ្នកលេង Facebook និង Instagram នៅ អឺរ៉ុប អាចបង់លុយប្រចាំខែដើម្បីបិទផ្ទាំងផ្សាយពាណិជ្ជកម្ម

Meta បញ្ចេញ App ថ្មីជាផ្លូវការ ដើម្បីប្រជែងជាមួយ Twitter