មកដឹងចំនួនអ្នកស្លាប់ និងផ្លាស់ផ្ទះសម្បែងនៅ មីយ៉ាន់ម៉ា ក្រោយរដ្ឋប្រហារ ២ ឆ្នាំមកនេះ

យោងតាមក្រុមសិទ្ធិមនុស្សនៅក្នុងប្រទេសមីយ៉ាន់ម៉ាបានឲ្យដឹងថា មនុស្សចំនួន ២,៩៤០ នាក់ ត្រូវបានសម្លាប់ដោយអាជ្ញាធរ ចាប់តាំងពីយោធាបានផ្ដួលរំលំរដ្ឋាភិបាលជាប់ឆ្នោតតាមបែបប្រជាធិបតេយ្យរបស់លោកស្រី អ៊ុងសាន ស៊ូជី ដោយសាររដ្ឋប្រហារកាលពីឆ្នាំ ២០២១ មក ។

ទន្ទឹមនោះ រដ្ឋប្រហាររបស់លោក មីន អ៊ុងឡាំង ដែលគិតមកដល់ពេលនេះ មានរយៈពេល ២ ឆ្នាំទៅហើយនោះ ក៏បង្ខំឲ្យមនុស្សជាង ១.១ លាននាក់ផ្លាស់ទីលំនៅ ហើយមនុស្ស ១៧.៦ លាននាក់ប្រហែលជានឹងត្រូវការជំនួយមនុស្សធម៌នៅឆ្នាំ ២០២៣ នេះ ។

ពាក់ព័ន្ធនឹងបញ្ហានេះដែរ អ្នកជំនាញសិទ្ធិមនុស្សរបស់អង្គការសហប្រជាជាតិ (UN) បានអំពាវនាវឲ្យមានការឆ្លើយតបដោយសម្របសម្រួលប្រឆាំងនឹងយោធាមីយ៉ាន់ម៉ា ដោយចាត់ទុកក្រុមប្រឹក្សាគ្រប់គ្រងរបស់យោធាមិនមែនជារដ្ឋាភិបាលស្របច្បាប់របស់មីយ៉ាន់ម៉ានោះទេ ។

ទន្ទឹមនោះ អ្នកជំនាញក៏បាន​អំពាវនាវ​ឲ្យរដ្ឋ​សមាជិក​អង្គការសហប្រជាជាតិ (UN) ​ទាំងអស់ដាក់អ្នកការទូតក្រុមប្រឹក្សាយោធាឲ្យនៅឯកោផងដែរ ជាពិសេសជំរុញប្រទេសនានា រួមទាំងរុស្ស៊ី ចិន និងឥណ្ឌា កុំផ្តល់ជំនួយផ្នែកហិរញ្ញវត្ថុ និងសម្ភារៈដល់យោធាមីយ៉ាន់ម៉ាផងដែរ ។

គួរបញ្ជាក់ថា យោធាបានធ្វើរដ្ឋប្រហារនៅថ្ងៃទី០១ ខែកុម្ភៈ ឆ្នាំ ២០២១ ដោយអះអាងអំពីភាពមិនប្រក្រតីនៅក្នុងការបោះឆ្នោតសកល ដែលគណបក្សសម្ព័ន្ធជាតិដើម្បីលទ្ធិប្រជាធិបតេយ្យ ឬ NLD ដឹកនាំដោយលោកស្រី អ៊ុងសាន ស៊ូជី ទទួលជ័យជម្នះភ្លូកទឹកភ្លូកដី ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ខួប ២ ឆ្នាំនៃរដ្ឋប្រហារ៖ អាមេរិក ដាក់ទណ្ឌកម្មថ្មីលើ មីយ៉ាន់ម៉ា ខណៈអំពើហិង្សានៅតែបន្ត