ដោយដកស្រង់ចេញពីសេចក្ដីថ្លែងការណ៍របស់ក្រុមហ៊ុន សារព័ត៌មាន Fox Business បាននិយាយកាលពីថ្ងៃសុក្រថា “នៅក្នុងព្រឹត្តិការណ៍ដែលវីរុសបំប្លែងខ្លួនអាចគេចពីវ៉ាក់សាំង ក្រុមហ៊ុន Pfizer-BioNTech រំពឹងថានឹងអាចបង្កើត និងផលិតវ៉ាក់សាំងប្រឆាំងនឹងមេរោគថ្មី ក្នុងរយៈពេលប្រហែល ១០០ ថ្ងៃ បើមានការយល់ព្រមពីនិយ័តករ” ។

ក្រុមហ៊ុន Pfizer-BioNTech បាននិយាយថា ពួកគេរំពឹងនឹងមានទិន្នន័យបន្ថែមលើវីរុសបំប្លែងខ្លួន Omicron ក្នុងរយៈពេល ២ សប្តាហ៍ខាងមុខ ហើយបានកត់សម្គាល់ពីមេរោគនេះខុសគ្នាយ៉ាងខ្លាំងពីអ្វីដែលបានសង្កេតពីមុន ។

ក្រុមហ៊ុនឱសថបានគូសបញ្ជាក់ថា កន្លងមកពួកគេក៏បានចាប់ផ្តើមធ្វើការលើការបង្កើតវ៉ាក់សាំងដែលអាចសម្របខ្លួនទៅនឹងមេរោគថ្មីផងដែរ ។ ក្រុមហ៊ុនបន្ថែមថា បច្ចុប្បន្នវ៉ាក់សាំងរបស់ពួកគេអាចចាក់បានក្នុងគម្លាតរយៈពេល ៦ សប្តាហ៍ និងដឹកជញ្ជូនដំបូងក្នុងរយៈពេល ១០០ ថ្ងៃ ។

គួរបញ្ជាក់ថា អង្គការសុខភាពពិភពលោក (WHO) បានប្រកាសពីរកឃើញវីរុសបំប្លែងខ្លួនប្រភេទថ្មី B.1.1.529 នៅអាហ្វ្រិកខាងត្បូង ។ WHO បានដាក់ឈ្មោះវីរុសថ្មីនេះដោយអក្សរក្រិកថា Omicron ហើយមេរោគថ្មីនេះគឺអាចឆ្លងច្រើនជាងប្រភេទមុនៗ ហើយមានការវិវត្តច្រើនមិនធម្មតា ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ WHO ប្រកាស វីរុសបំប្លែងថ្មីជាក្តីព្រួយបារម្ភ និងដាក់ឈ្មោះ Omicron

The post ក្រុមហ៊ុន Pfizer សុំពេល ១០០ ថ្ងៃផលិតវ៉ាក់សាំងកម្ចាត់វីរុសបំប្លែងខ្លួន Omicron appeared first on Kampuchea Thmey Daily.

ដោយសារគ្មានប្រភពបង្ហើបពីតួលេខនៃប្រាក់ខែគោលឱ្យបានជាក់លាក់ ដូចនេះប្រាក់ចំណូលដែលនឹងលើកមកនិយាយនេះ ជាប្រាក់ចំណូលដែលហៅថា “ប្រាក់សំណង” ។ ប្រាក់នេះរួមបញ្ចូលទាំងប្រាក់ខែគោល ប្រាក់លើកទឹកចិត្ត ធានារ៉ាប់រង និងអត្ថប្រយោជន៍ផ្សេងទៀតដែលក្រុមហ៊ុននីមួយៗបានកំណត់។

មួយវិញទៀត ដោយមូលហេតុឆ្នាំថ្មី ២០២១ នៅមិនទាន់មានរបាយការណ៍ណាចេញផ្សាយពីប្រាក់សំណងរបស់នាយកប្រតិបត្តិក្រុមហ៊ុនផលិតវ៉ាក់សាំងទាំង ៥ ដែលនឹងទទួលបាននៅឡើយ ដូច្នេះក្នុងអត្ថបទនេះ យើងនឹងមកដឹងអំពីចំណូលប្រចាំឆ្នាំ ២០២០ របស់ពួកគេ។

១. លោក Albert Bourla នាយកប្រតិបត្តិក្រុមហ៊ុន Pfizer

លោក Albert Bourla ប្រធាននាយកប្រតិបត្តិរបស់ក្រុមហ៊ុន Pfizer ទទួលបានប្រាក់សំណងចំនួន ២១ លានដុល្លារក្នុងឆ្នាំ ២០២០ ក្រោយក្រុមហ៊ុនរបស់លោកសហការជាមួយក្រុមហ៊ុន BioNTech របស់ប្រទេសអាល្លឺម៉ង់។

យោងតាមការវិភាគរបស់ Bloomberg អំពីកញ្ចប់សំណងរបស់ Bourla សម្រាប់ឆ្នាំ ២០២០ គឺមានការកើនឡើង ១៧% លើសកញ្ចប់ឆ្នាំចាស់  ដែលឆ្នាំ ២០១៩ លោកមានប្រាក់ចំណូល ១៧.៩ លានដុល្លារអាមេរិក។

២. លោក Ugur Sahin នាយកប្រតិបត្តិក្រុមហ៊ុន BioNTech

លោក Sahin នាយកប្រតិបត្តិក្រុមហ៊ុន BioNTech ទទួលបានប្រាក់ចំនួន ៧,០៦៤,០០០ ដុល្លារអាមេរិកក្នុងឆ្នាំ ២០១៩ ដែលនេះជាថវិកាសំណងសរុប។ យោងតាមវិទ្យាស្ថានស្រាវជ្រាវសេដ្ឋកិច្ចបានផ្សាយថា បុរសរូបនេះ មានប្រាក់ខែ ៣១១,០០០ ដុល្លារប៉ុណ្ណោះ។

ដោយឡែក ទីភ្នាក់ងារព័ត៌មាន Bloomberg បានរាយការណ៍ថា លោក Sahin គឺជាម្ចាស់ភាគហ៊ុនតែមួយគត់របស់ក្រុមហ៊ុនអាល្លឺម៉ង់ដែលគ្រប់គ្រងភាគហ៊ុនច្រើនជាងគេចំនួន ១៨ ភាគរយ។ ។ បន្ទាប់ពីទទួលបានកិច្ចព្រមព្រៀងអភិវឌ្ឍន៍ជាមួយក្រុមហ៊ុន Pfizer និងកិច្ចព្រមព្រៀងចែកចាយវ៉ាក់សាំង ទ្រព្យសម្បត្តិសុទ្ធរបស់លោក Sahin បានកើនឡើងដល់ ៥.១ ប៊ីលានដុល្លារ ដែលធ្វើឱ្យលោកក្លាយជាអ្នកមានបំផុតទី ៤៩៣ នៅលើលោក។

៣. លោក Stéphane Bancel នាយកប្រតិបត្តិក្រុមហ៊ុន Moderna

យោងតាមប្រភពពី SEC បានឱ្យដឹងថា នាយកប្រតិបត្តិ Moderna លោក Stéphane Bancel បានចំណូលចំនួន ១២.៨៥ លានដុល្លារអាមេរិកក្នុងឆ្នាំ ២០២០។ ក្នុងនោះប្រាក់ខែគោលរបស់លោក Bancel គឺ ៩៥០,០០០ ដុល្លារអាមេរិក។

៤. លោក Alex Gorsky នាយកប្រតិបត្តិក្រុមហ៊ុន Johnson & Johnson

លោក Alex Gorsky ប្រធាននិងជានាយកប្រតិបត្តិក្រុមហ៊ុនជីវវិទ្យាសាស្ត្រ Johnson & Johnson បានទទួលសំណងជាផ្ទះដែលគិតជាលុយមានចំនួន ២៥,៣៦៥,៨០០ ដុល្លារអាមេរិក។ ចំណែកប្រាក់សំណងប្រចាំខែរបស់លោកបានកើនឡើង ៤.២ លានដុល្លារ នៅឆ្នាំ ២០២០ ។

៥. លោក Pascal Soriot នាយកប្រតិបត្តិក្រុនហ៊ុន AstraZeneca

នៅឆ្នាំ ២០២០ លោក Pascal Soriot បានយកសំណងផ្ទះចំនួន ២១.៤ លានដុល្លារជាថ្លៃសំណងប្រចាំឆ្នាំ។ ដោយឡែក ប្រាក់ខែគោលរបស់លោកគឺ ១.៧៩ លានដុល្លារ។ ក្រៅពីនេះ លោកបានទទួលប្រាក់រង្វាន់ប្រចាំឆ្នាំចំនួន ៣.១៩ លានដុល្លារអាមេរិក ក៏ដូចជាប្រាក់លើកទឹកចិត្តរយៈពេលវែងចំនួន ១៥.៤ លានដុល្លារអាមេរិកពីក្រុមហ៊ុន៕

ប្រែសម្រួល៖ សន្យា

ប្រភព៖ BioSpace

ចុចអាន៖ ចំណូល CEO ក្រុមហ៊ុនវ៉ាក់សាំង Sinovac មួយខែរកបានមិនក្រោម១០ម៉ឺនដុល្លារ

ចុចអាន៖ មកដឹងបទពិសោធន៍ការងារនិងប្រាក់ចំណូលរបស់មេធំក្រុមហ៊ុនផលិតវ៉ាក់សាំង Sinopharm

The post ទម្លាយប្រាក់ចំណូលកប់ក្ដោងរបស់មេធំក្រុមហ៊ុនផលិតវ៉ាក់សាំងធំៗទាំង ៥ appeared first on Kampuchea Thmey Daily.

ក្រុមគ្រូពេទ្យនិយាយថា ពួកគេបានដឹងថាបុគ្គលិកពេទ្យម្នាក់អាយុ ២០ ឆ្នាំត្រូវបានគេធ្វើតេស្តវិជ្ជមាន ហើយត្រូវបញ្ជូនទៅមន្ទីរពេទ្យ បន្ទាប់ពីនាងបានទទួលការចាក់វ៉ាក់សាំងដូសដំបូងកាលពីចុងខែកុម្ភៈ ។

ក្រុមអ្នកស្រាវជ្រាវនិយាយថា របាយការណ៍ជំងឺនេះបានកើតឡើង ៦ ថ្ងៃ ហើយអ្នកទទួលចាក់វ៉ាក់សាំងទំនងជាឆ្លងវីរុសនេះ បន្ទាប់ពីការចាក់ ។ ប៉ុន្តែក្រោយមកពួកគេបន្ថែមថា ស្ថានភាពរបស់នាងមានភាពល្អប្រសើរ ហើយនាងបានចេញពីមន្ទីរពេទ្យផងដែរ ។

ក្រុមនេះកំពុងតាមដានស្ថានភាពសុខភាពរបស់បុគ្គលិកសុខាភិបាលប្រមាណ ១៩,០០០ នាក់នៅប្រទេសជប៉ុនដែលត្រូវបានចាក់វ៉ាក់សាំងរួច ។ វានិយាយថា នេះជាករណីដំបូងនៃការឆ្លងជំងឺកូវីដ ១៩ ដែលត្រូវបានបញ្ជាក់ បន្ទាប់ពីបុគ្គលិកសុខាភិបាលបានទទួលការចាក់វ៉ាក់សាំងរួច ។

ក្រុមអ្នកស្រាវជ្រាវនិយាយថា វាប្រហែលចំណាយពេល ១៤ ថ្ងៃសម្រាប់អ្នកទទួលវ៉ាក់សាំង Pfizer-BioNTech ដើម្បីបង្កើតកម្រិតនៃភាពស៊ាំ ។

មជ្ឈមណ្ឌលគ្រប់គ្រង និងបង្ការជំងឺអាមេរិក (CDC) បាននិយាយនៅក្នុងខែមីនាថា សូម្បីតែមនុស្សដែលត្រូវបានទទួលការចាក់វ៉ាក់សាំងពេញ ២ ដូសក៏នៅតែមានឱកាសឆ្លងតិចតួច និងឆ្លងវីរុសនេះទៅអ្នកដទៃដែរ ។ អ្នកចាក់វ៉ាក់សាំងហើយនៅតែត្រូវចាត់វិធានការបង្ការដូចជា ការពាក់ម៉ាសនៅតាមទីសាធារណៈ រក្សាគម្លាតសង្គម លាងសម្អាតដៃនឹងអាល់កុល ឬជែលជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ NHK

The post ជប៉ុន ជំរុញបន្តវិធានការការពារប្រឆាំងកូវីដ ទោះអ្នកចាក់វ៉ាក់សាំងហើយក៏ដោយ appeared first on Kampuchea Thmey Daily.

កាលពីថ្ងៃព្រហស្បតិ៍ក្រុមហ៊ុនបានចេញផ្សាយលទ្ធផលនៃការសាកល្បងព្យាបាលមួយដែលពួកគេបានធ្វើឡើង បន្ទាប់ពីវ៉ាក់សាំងរបស់ពួកគេទទួលបានការអនុញ្ញាតសម្រាប់ការប្រើប្រាស់ជាបន្ទាន់ពីរដ្ឋបាលចំណីអាហារ និងឪសថអាមេរិក (FDA) កាលពីខែធ្នូ ។

ទិន្នន័យដែលបានធ្វើបច្ចុប្បន្នភាពពីការសាកល្បងរបស់អ្នកចូលរួមជាង ៤៦,០០០ នាក់រហូតដល់ថ្ងៃទី ១៣ ខែមីនា បានឲ្យដឹងថា មានតែ ៩២៧ ករណីប៉ុណ្ណោះបង្ហាញរោគសញ្ញាជំងឺកូវីដ ១៩ ។

ក្រុមហ៊ុនបាននិយាយថា ក្នុងចំណោមករណីទាំងនោះ មាន ៨៥០ ករណីបានបង្ហាញរោគសញ្ញាក្នុងចំណោមអ្នកចូលរួមដែលបានប្រើថ្នាំ placebo ខណៈ ៧៧ នាក់ស្ថិតក្នុងក្រុមទទួលការចាក់វ៉ាក់សាំងបង្ការ ។

ពួកគេបាននិយាយថា ការសាកល្បងខាងលើគឺត្រូវនឹងអត្រាប្រសិទ្ធភាព ៩១.៣ ភាគរយក្នុងការការពារករណីបង្ហាញរោគសញ្ញាពី ៧ ថ្ងៃរហូតដល់ ៦ ខែ បន្ទាប់ពីចាក់ដូសទី ២ ។

ក្រុមហ៊ុនបាននិយាយថា លទ្ធផលនេះមានផ្ទុកទិន្នន័យអ្នកចូលរួមជាង ១២,០០០ នាក់ដែលបានទទួលការវ៉ាក់សាំងពេញ ២ ដូសហោចណាស់រយៈពេលយ៉ាងតិច ៦ ខែ ។

ពួកគេក៏បានចេញផ្សាយលទ្ធផលនៃការសាកល្បងរបស់អ្នកចូលរួម ៨០០ នាក់នៅក្នុងប្រទេសអាហ្វ្រិកខាងត្បូងជាកន្លែងដែលជំងឺកូវីដ ១៩ បំប្លែងខ្លួនប្រភេទថ្មីកំពុងតែរីករាលដាលខ្លាំងផងដែរ ។ ពួកគេបាននិយាយថា មានករណីឆ្លងកូវីដចំនួន ៩ ករណី ខណៈដែលករណីទាំងអស់ត្រូវបានគេសង្កេតឃើញនៅក្នុងក្រុមប្រើថ្នាំ placebo ។ ចំណែកករណីចំនួន ៦ ក្នុងចំណោម ៩ ករណីត្រូវបានបញ្ជាក់ថាជាវ៉ារ្យង់អាហ្រ្វិកខាងត្បូង ។ ក្រុមហ៊ុនបាននិយាយថា ទិន្នន័យនេះបង្ហាញពីប្រសិទ្ធភាពខ្ពស់របស់វ៉ាក់សាំងប្រឆាំងនឹងវ៉ារ្យ៉ង់នេះ ។

ទន្ទឹមនោះក្រុមហ៊ុន Pfizer និង BioNTech និយាយថា ពួកគេមានគម្រោងចែករំលែកលទ្ធផលនេះជាមួយភ្នាក់ងារនិយតករទូទាំងពិភពលោកក្នុងពេលឆាប់ៗនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ វ៉ាក់សាំង BioNTech-Pfizer មានប្រសិទ្ធភាព ១០០ភាគរយ ចំពោះក្មេងអាយុពី ១២ ដល់ ១៥ ឆ្នាំ

ចុចអាន ៖ ដំណឹងល្អ! វ៉ាក់សាំង Pfizer និង Moderna កាត់បន្ថយហានិភ័យឆ្លងកូវីដដល់ទៅ ៩០ ភាគរយ ក្រោយចាក់ពេញ ២ ដូស

The post វ៉ាក់សាំង Pfizer-BioNTech បង្ហាញប្រសិទ្ធភាពការពារកូវីដរយៈពេល ៦ ខែ ក្រោយចាក់ពេញ ២ ដូស appeared first on Kampuchea Thmey Daily.

ក្រុមហ៊ុនបាននិយាយនៅក្នុងសេចក្តីថ្លែងការណ៍មួយថា ការសាកល្បងដំណាក់កាលទី៣ដែលធ្វើឡើងលើមនុស្សវ័យជំទង់ចំនួន២,២៦០នាក់នៅក្នុងសហរដ្ឋអាមេរិក បានបង្ហាញពីប្រសិទ្ធភាព១០០ភាគរយ និងការឆ្លើយតបអង់ទីគ័រដ៏រឹងមាំ។

លោក Albert Bourla នាយកប្រតិបត្តិក្រុមហ៊ុន Pfizer បានលើកឡើងថា “យើងគ្រោងបញ្ជូនទិន្នន័យទាំងនេះទៅឲ្យនិយតករអាមេរិក (FDA) ជាការស្នើសុំធ្វើវិសោធនកម្មលើការអនុញ្ញាតឲ្យប្រើប្រាស់ជាបន្ទាន់ក្នុងរយៈពេលប៉ុន្មានសប្តាហ៍ខាងមុខនេះ និងទៅឲ្យនិយតករដទៃទៀតនៅជុំវិញពិភពលោកជាមួយក្តីសង្ឃឹម ក្នុងការចាប់ផ្តើមចាក់វ៉ាក់សាំងលើក្រុមអាយុនេះមុនពេលសាលារៀនបើកបវេសនកាលថ្មី”។

នាយកប្រតិបត្តិក្រុមហ៊ុនអាល្លឺម៉ង់ BioNTech បានឲ្យដឹងថា លទ្ធផលដែលបង្ហាញពីការការពារខ្ពស់សម្រាប់មនុស្សវ័យជំទង់គឺជាការលើកទឹកចិត្តខ្លាំងបំផុត ដោយសារតែនិន្នាការដែលយើងបានឃើញនៅក្នុងរយៈពេលប៉ុន្មានសប្តាហ៍ថ្មីៗនេះ ទាក់ទងនឹងការរីករាលដាលនៃវីរុសបំប្លែងខ្លួនចក្រភពអង់គ្លេស B117។

វ៉ាក់សាំង BioNTech-Pfizer គឺផ្អែកលើបច្ចេកវិទ្យា Novel mRNA និងជាវ៉ាក់សាំងការពារជំងឺកូវីដ-១៩ដំបូងគេបង្អស់ ដែលត្រូវបានអនុម័តនៅប្រទេសខាងលិចកាលពីចុងឆ្នាំមុន៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ វ៉ាក់សាំងកូវីដ Johnson & Johnson ១៥លានដូស ត្រូវបំផ្លាញចោលដោយសារ មិនត្រូវតាមស្តង់ដារគុណភាព

The post វ៉ាក់សាំង BioNTech-Pfizer មានប្រសិទ្ធភាព ១០០ភាគរយ ចំពោះក្មេងអាយុពី១២ដល់១៥ឆ្នាំ appeared first on Kampuchea Thmey Daily.

យោងតាមទិន្នន័យបានបង្ហាញថា ក្នុងចំណោមបុគ្គលិកថែទាំសុខភាព ក្រុមហានិភ័យជួរមុខ និងបុគ្គលិកសំខាន់ដទៃទៀតដែលបានទទួលការចាក់វ៉ាក់សាំងទាំងពីរនេះដែលត្រូវបានបង្កើតឡើងដោយប្រើបច្ចេកវិទ្យាស្រដៀងគ្នានេះ ហានិភ័យនៃការឆ្លងជំងឺកូវីដ ១៩ ត្រូវបានកាត់បន្ថយ ៩០ ភាគរយ ក្រោយចាក់វ៉ាក់សាំងពេញលេញចំនួន ២ ដូស បានរយៈពេល ២ សប្ដាហ៍ ឬច្រើនសប្ដាហ៍ជាងនេះ ។

លោកស្រីវេជ្ជបណ្ឌិត Rochelle P. Walensky នាយក CDC បាននិយាយក្នុងសន្និសីទសារព័ត៌មានមួយថា “វ៉ាក់សាំងទាំងពីរនេះបានផ្តល់ការការពារយ៉ាងពិតប្រាកដប្រឆាំងនឹងការឆ្លងជំងឺកូវីដ ១៩ ដល់បុគ្គលិកសុខាភិបាល ក្រុមហានិភ័យជួរមុខ និងបុគ្គលិកសំខាន់ដទៃទៀតរបស់យើង” ។

ការវិភាគនេះបានវាយតម្លៃពីប្រសិទ្ធភាពនៃវ៉ាក់សាំង Pfizer-BioNTech និង Moderna ក្នុងការការពារការឆ្លងក្នុងចំណោមបុគ្គលិកព្យាបាល ប៉ូលិស បុគ្គលិកអគ្គិភ័យ និងបុគ្គលិកសេវាកម្មប្រៃសណីយ៍អន្តរជាតិ (EMS) ចំនួន ៣,៩៥០ នាក់ និងបុគ្គលិកជួរមុខផ្សេងទៀតនៅក្នុងរដ្ឋចំនួន ៦ ក្នុងរយៈពេល ១៣ សប្តាហ៍ចាប់ពីថ្ងៃទី ១៤ ខែធ្នូ ឆ្នាំ ២០២០ ដល់ថ្ងៃទី១៣ ខែមីនា ឆ្នាំ ២០២១ ។

បើយោងតាម ​​CDC បានឲ្យដឹងថា ក្នុងចំនោមអ្នកចូលរួមការសិក្សាមាន ៦៣ ភាគរយបានទទួលការចាក់វ៉ាក់សាំងពីរដូសនៃវ៉ាក់សាំងទាំងពីរ ខណៈ ១២ ភាគរយផ្សេងទៀតទទួលបានតែមួយដូសប៉ុណ្ណោះ ។

CDC បាននិយាយថា ដោយសារវាត្រូវចំណាយពេលប្រហែល ២ សប្តាហ៍ បន្ទាប់ពីការចាក់វ៉ាក់សាំងនីមួយៗសម្រាប់រាងកាយដើម្បីផលិតអង្គបដិបក្ខ ឬអង់ទីគ័រដែលការពារប្រឆាំងនឹងការឆ្លង មនុស្សត្រូវបន្តអនុវត្តវិធានការការពារខ្លួនរយៈពេល ២ សប្ដាហ៍ បន្ទាប់ពីចាក់ដូសដំបូង និងពេញ ២ សប្ដាហ៍ទៀតក្រោយចាក់ដូសទី ២ ។

ទន្ទឹមនោះលទ្ធផលបង្ហាញទៀតថា អ្នកចូលរួមចាក់វ៉ាក់សាំងពេញ ២ ដូសចំនួន ៣ នាក់ក្នុងចំណោមអ្នកចូលរួមចំនួន ២,៤៧៩ នាក់ និងអ្នកចូលរួមចាក់វ៉ាក់សាំងដូសដំបូងចំនួន ៨ នាក់ក្នុងចំណោម ៤៧៧ នាក់បានធ្វើតេស្តវិជ្ជមានជំងឺកូវីដ ១៩ បន្ទាប់ពីការចាក់ថ្នាំបង្ការរោគ ហើយវាជាចំនួនឆ្លងតិចបំផុត ខណៈអ្នកចូលរួម ១៦១ នាក់ក្នុងចំណោម ៩៨៩ នាក់ដែលមិនបានទទួលការចាក់វ៉ាក់សាំងបានឆ្លងមេរោគ ។

បន្ថែមពីនេះការស្រាវជ្រាវបានបង្ហាញថា វ៉ាក់សាំងទាំងពីរនេះកាត់បន្ថយហានិភ័យនៃការឆ្លងទាំងករណីមិនចេញរោគសញ្ញាផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ UPI

ចុចអាន ៖ អាមេរិក រកឃើញអ្នកឆ្លងកូវីដបំប្លែងខ្លួនថ្មីជាង ១ ម៉ឺនករណី និងព្រមានពីជំងឺថ្មីផ្សេងទៀត

ចុចអាន ៖ តីសង្ឃឹមដ៏ធំរបស់ពិភពលោក! អាមេរិកកំពុងធ្វើតេស្តថ្នាំលេប ដែលអាចព្យាបាលទាំងជំងឺកូវីដ-១៩ធម្មតា និងបំប្លែងខ្លួន

The post ដំណឹងល្អ! វ៉ាក់សាំង Pfizer និង Moderna កាត់បន្ថយហានិភ័យឆ្លងកូវីដដល់ទៅ ៩០ ភាគរយ ក្រោយចាក់ពេញ ២ ដូស appeared first on Kampuchea Thmey Daily.

ទន្ទឹមនោះក្រុមហ៊ុនក៏បាននិយាយផងដែរថា ការវិភាគចុងក្រោយនៃទិន្នន័យរបស់អ៊ីស្រាអែលបង្ហាញថា វ៉ាក់សាំងនេះមានប្រសិទ្ធភាពរហូតដល់ ៩៧ ភាគរយក្នុងការការពារជំងឺកូវីដបង្ហាញរោគសញ្ញា ការឆ្លងជំងឺធ្ងន់ធ្ងរ និងការស្លាប់ ។

នោះជាមូលដ្ឋានស្របតាមប្រសិទ្ធភាព ៩៥ ភាគរយរបស់ក្រុមហ៊ុន Pfizer-BioNTech ដែលបានរាយការណ៍ពីការសាកល្បងព្យាបាលវ៉ាក់សាំងដំណាក់កាលចុងក្រោយកាលពីខែធ្នូ ។

ការវិភាគនេះក៏បង្ហាញផងដែរនូវភស្តុតាងជាក់ស្តែងនៃប្រសិទ្ធភាពរបស់វ៉ាក់សាំងប្រឆាំងនឹងការឆ្លងដ៏ខ្លាំងនៃជំងឺកូវីដ ១៩ បំប្លែងខ្លួនប្រភេទថ្មីដែលត្រូវបានរកឃើញដំបូងនៅក្នុងប្រទេសអង់គ្លេស និងត្រូវបានគេស្គាល់ថា B.1.1.7 ។ ជាង ៨០ ភាគរយនៃសំណាកដែលបានធ្វើតេស្ត នៅពេលដែលការវិភាគត្រូវបានធ្វើគឺលើវ៉ារ្យង់ B.1.1.7 ។

បន្ថែមពីនេះមានការឆ្លងតិចតួចប៉ុណ្ណោះនៃវីរុសអាហ្រ្វិកខាងត្បូងដែលត្រូវបានគេស្គាល់ថាជា B 1.351 នៅក្នុងប្រទេសអ៊ីស្រាអែល ដូច្នេះពួកគេមិនអាចវាយតម្លៃប្រសិទ្ធភាពនៃវ៉ាក់សាំងប្រឆាំងនឹងវីរុសនេះនោះទេ ។

អ៊ីស្រាអែលកំពុងនាំមុខគេក្នុងការចាក់វ៉ាក់សាំង Pfizer-BioNTech ។ គិតត្រឹមថ្ងៃពុធប្រហែល ៥៥ ភាគរយនៃប្រជាជន ៩ លាននាក់របស់ខ្លួនត្រូវបានចាក់វ៉ាក់សាំងកូវីដ ១៩ ដូសដំបូងរបស់ក្រុមហ៊ុន Pfizer-BioNTech ហើយ ៤៣ ភាគរយបានទទួលការចាក់វ៉ាក់សាំងដូសទីពីរ ។

កន្លងមកក្រសួងសុខាភិបាលអ៊ីស្រាអែលបានរកឃើញថាវ៉ាក់សាំង Pfizer-BioNTech កាត់បន្ថយការឆ្លងរួមមានករណីមិនបង្ហាញរោគសញ្ញា ៨៩.៤ ភាគរយ និងក្នុងករណីបង្ហាញរោគសញ្ញា ៩៣.៧ ភាគរយ  ហើយទិន្នន័យនេះប្រមូលបាននៅចន្លោះថ្ងៃទី ១៧ ខែមករាដល់ថ្ងៃទី ៦ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ SCMP

ចុចអាន ៖ ក្រុមហ៊ុន Pfizer-BioNTech បង្ហាញលទ្ធភាពផលិតវ៉ាក់សាំងក្នុងឆ្នាំ ២០២២

ចុចអាន ៖ ស្រ្តីម្នាក់រៀបរាប់អាការចម្លែកៗក្រោយជាសះស្បើយពីជំងឺកូវីដ១៩

The post វ៉ាក់សាំង Pfizer-BioNTech បង្ហាញប្រសិទ្ធភាពពិតប្រឆាំងកូវីដ appeared first on Kampuchea Thmey Daily.

នាយកប្រតិបត្តិក្រុមហ៊ុន BioNTech លោក Ugur Sahin បានថ្លែងក្នុងបទសម្ភាសន៍ជាមួយទូរទស្សន៍ Bloomberg ថា “ជាគោលការណ៍យើងអាចបង្កើនសមត្ថភាពផលិតកម្មបន្ថែមទៀត ។ វាអាស្រ័យលើតម្រូវការ អាស្រ័យលើកត្តាដូចជា ប្រសិនបើមានការជម្រុញបន្ថែមចំពោះការចាក់វ៉ាក់សាំង” ។

តម្រូវការកំពុងតែកើនឡើងនៅទូទាំងពិភពលោកចំពោះវ៉ាក់សាំងការពារជំងឺកូវីដ ១៩ ដែលប្រទេសនានាត្រូវការវិលទៅរកសកម្មភាសេដ្ឋកិច្ច បញ្ជូនកុមារទៅសាលារៀន និងឲ្យមនុស្សត្រឡប់ទៅអូហ្វីស និងហាងវិញ ។ ទាំងសហរដ្ឋអាមេរិក និងអ៊ឺរ៉ុបបានព្យាយាមពន្លឿនការចាក់វ៉ាក់សាំងនៅឆ្នាំនេះដោយសារតែមានការរីករាលដាលបន្ថែមនៃជំងឺកូវីដ ១៩ បំប្លែងខ្លួនប្រភេទថ្មី ។

លោក Sahin បាននិយាយថា “យើងមានការកត់ត្រានៃការបញ្ជាទិញវ៉ាក់សាំងចំនួន ១.៣ ពាន់លានដូសរួចហើយ ។ យើងក៏កំពុងពិភាក្សាអំពីជម្រើសបន្ថែមនៃវ៉ាក់សាំងរាប់រយលានដូសជាមួយអង្គការរដ្ឋាភិបាល” ។

ក្រុមហ៊ុន Pfizer និង BioNTech បានប្តេជ្ញាថានឹងបង្កើតវ៉ាក់សាំងចំនួន ២ ពាន់លានដូសក្នុងឆ្នាំនេះ ។ ក្រុមហ៊ុន Pfizer បានសន្យាថានឹងដឹកជញ្ជូនវ៉ាក់សាំងចំនួន ២ ភាគ ៣ នៃការបញ្ជាទិញចំនួន ៣០០ លានដុល្លារសហរដ្ឋអាមេរិកនៅចុងខែឧសភា ។ ចំណែកនៅសហភាពអ៊ឺរ៉ុបដៃគូសហការ BioNTech បានសន្យាថានឹងដឹកជញ្ជូនយ៉ាងហោចណាស់ ៥០០ លានដូសក្នុងឆ្នាំនេះជាមួយនឹងជម្រើសសម្រាប់ ១០០ ដូសបន្ថែម ។

ក្រុមហ៊ុន Pfizer បានព្យាករអំពីប្រាក់ចំណូលប្រហែល ១៥ ពាន់លានដុល្លារនៅឆ្នាំនេះពីការលក់វ៉ាក់សាំងការពារជំងឺកូវីដ ១៩ ហើយនាយកប្រតិបត្តិលោក Albert Bourla បាននិយាយថា តម្លៃនៃការចាក់ថ្នាំបង្ការរោគអាចនឹងកើនឡើង ៕

ប្រែសម្រួលដោយ ៖ ជីវ័ន្ត

ប្រភព ៖ Bloomberg

ចុចអាន ៖ ដោយសារបញ្ហានេះ វ៉ាក់សាំងកូវីដជាង ១,០០០ ដូសនៅជប៉ុនត្រូវបោះចោលទទេៗ

ចុចអាន ៖ ស្រ្តីម្នាក់រៀបរាប់អាការចម្លែកៗក្រោយជាសះស្បើយពីជំងឺកូវីដ១៩

The post ក្រុមហ៊ុន Pfizer-BioNTech បង្ហាញលទ្ធភាពផលិតវ៉ាក់សាំងក្នុងឆ្នាំ ២០២២ appeared first on Kampuchea Thmey Daily.