ការណែនាំនេះ ក្នុងឱកាស សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី ប្រធានព្រឹទ្ធសភា និងជាប្រធានសមាគមអតីតយុទ្ធជន និង និវត្តជនកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ-សង្កាត់ និង ថ្នាក់ដឹកនាំ មន្ទីរអង្គភាពនានា ជុំវិញខេត្តសៀមរាប និង ខេត្តឧត្តរមានជ័យ នៅសាលសន្និបាតសណ្ឋាគារសុខា ខេត្តសៀមរាប ដែលមានអ្នកចូលរួមប្រមាណជិត ២,០០០ នាក់ កាលពីព្រឹកថ្ងៃទី ១០ ខែមិថុនា ឆ្នាំ ២០២៦។

មានប្រសាសន៍ក្នុងពិធីសំណេះសំណាលព្រឹកមិញនេះ សម្តេចតេជោ ហ៊ុន សែន បានអំពាវនាវ និង ណែនាំឲ្យថ្នាក់ដឹកនាំ និង អាជ្ញាធរមូលដ្ឋាន នៃខេត្តទាំងពីរ ត្រូវបន្តយកចិត្តទុកដាក់គ្រប់គ្រងវត្តមានអតីតយុទ្ធជន ជាពិសេសក្រុមគ្រួសារយុទ្ធជនពលីនៅសមរភូមិ ដែលជាកិច្ចការដែលយើងត្រូវធ្វើ ដើម្បីពង្រឹងខឿនការពារជាតិឲ្យបានល្អប្រសើរ និង កាត់បន្ថយការលំបាករបស់គ្រួសារយុទ្ធជនពលី។ សម្ដេចតេជោ បានអំពាវនាវឲ្យយកចិត្តទុកដាក់ជាពិសេសដល់ការលើកកម្ពស់ការសិក្សាអប់រំរបស់កូន ចៅ យុទ្ធជនពលី ឲ្យទទួលបានការរៀនសូត្រ និង ត្រូវផ្ដល់អាទិភាពឲ្យពួកគេទទួលបានអាហារូបករណ៍សិក្សាដោយមិនបង់ថ្លៃ។

បន្ថែមពីនេះ សម្តេចតេជោ ប្រធានសមាគម ក៏មានប្រសាសន៍ឲ្យយកចិត្តទុកដាក់ទាំងអតីតមន្រ្តីរាជការស៊ីវិលដែលចូលនិវត្តន៍ ដូចជា អតីតអភិបាលខេត្ត អភិបាលស្រុក អតីតមេឃុំ ចៅសង្កាត់ ជាដើមនោះ គប្បីយកចិត្តទុកដាក់បន្ថែមទៀត ដោយឧស្សាហ៍ចុះសួរសុខទុក្ខ ផ្ដល់ភាពកក់ក្ដៅដល់ពួកគាត់ និង ត្រូវផ្ដល់ឱកាស អញ្ជើញពួកគាត់ចូលរួមក្នុងពិធីជួបជុំ និង សំណេះសំណាលផ្សេងៗ ស្របពេលដែលពេលនេះ សម្ដេចតេជោ បានដាក់បញ្ចូលពួកគាត់ជានិវត្តជន មកក្រោមឆ័ត្រតែមួយរបស់សមាគម ដោយបានធ្វើវិសោធនកម្មលក្ខន្តិកៈពីសមាគមអតីតយុទ្ធជនកម្ពុជា មកជាអតីតយុទ្ធជន និង និវត្តជនកម្ពុជា។

ឆ្លៀតក្នុងឱកាសនេះ សម្ដេចតេជោ ហ៊ុន សែន ក្នុងនាមជាប្រមុខរដ្ឋស្ដីទី ក៏បានមានប្រសាសន៍កោតសរសើរចំពោះយន្តការរបស់រាជរដ្ឋាភិបាល តាមរយៈធនាគារជាតិដែលបានជួយសម្រាលបន្ទុកគ្រួសារយុទ្ធជនពលីទូទាំងប្រទេស ដោយបានផ្ដល់ការអនុគ្រោះ លុបចោលបំណុលដែលខ្ចីពីធនាគារក្នុងស្រុក ព្រមទាំងបានជួយពន្យារការសងត្រឡប់ក្នុងករណីមួយចំនួនដែល សម្ដេច បានហៅយន្តការអនុគ្រោះនេះ គឺជាផ្នែកមួយ នៃការជួយពង្រឹងខឿនការពារជាតិយ៉ាងពិតប្រាកដ ជាពិសេសបានបង្ហាញពីស្មារតី នៃការរួបរួមគ្នាជាកម្លាំងសាមគ្គីជាតិបានល្អបំផុត។

គួរជម្រាបជូនថា ចំពោះការងារគ្រប់គ្រង អតីតយុទ្ធជន និង និវត្តជន ក្នុងខេត្តឧត្តរមានជ័យ យោងតាមរបាយការណ៍របស់ លោក មាន ចាន់យ៉ាដា អភិបាល នៃគណៈអភិបាលខេត្ត បានបញ្ជាក់ថា បច្ចុប្បន្ននេះ មានអតីតយុទ្ធជនសរុប ៤,៩៨៧ នាក់ ក្នុងនោះ អ្នកនៅក្នុងបន្ទុកមានចំនួន ៧,៥៦១ នាក់។ អតីតយុទ្ធជន ចូលជាសមាជិកសមាគមមានចំនួន  ៣,៤៣២ នាក់ (ស្រី ១៥៣ នាក់។ មុខសញ្ញានិវត្តជន ជាអតីតមន្រ្តីរាជការស៊ីវិលក្នុងខេត្តមានចំនួនសរុប ៣៥០ នាក់ (ស្រី ៤១ នាក់)។ បច្ចុប្បន្ន អ.ន.ក ខេត្តឧត្តរមានជ័យ កំពុងគ្រប់គ្រងដីសម្បទានសង្គមកិច្ចសម្រាប់អតីតយុទ្ធជនមាន ២ កន្លែង ដែលមានទំហំ ២,៦៦៥ ហិតា ដែលទីតាំងនៅ ៖ ១.ភូមិអូរតារម៉ែង ឃុំអន្លង់វែង ស្រុកអន្លង់វែង មានទំហំ ៥៤ ហិតា និង ទីតាំងទី ២ ស្ថិតនៅភូមិបាត់ថ្កៅ ឃុំចុងកាល់ ស្រុកចុងកាល់ មានទំហំ ២,៦១១ ហិតា។ ចំពោះការងារសាងសង់ផ្ទះចាប់ពីឆ្នាំ ២០១៦-២០២៦ សាងសង់បាន ៦៥២ ខ្នង ស្មើនឹង ៦៥២ គ្រួសារ ដែលជាអំណោយដ៏ថ្លៃថ្លារបស់ សម្ដេចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។

ដោយឡែកការងារគ្រប់គ្រង អតីតយុទ្ធជន និង និវត្តជន ក្នុងខេត្តសៀមរាប លោក ប្រាក់ សោភ័ណ អភិបាល នៃគណៈអភិបាលខេត្ត បានលើកឡើងក្នុងរបាយការណ៍ថា គិតត្រឹមខែមិថុនា ឆ្នាំ ២០២៦ នេះ ខេត្តសៀមរាប មានអតីតយុទ្ធជនសរុបចំនួន ៩,៣៣៤ នាក់ ក្នុងនោះអ្នកនៅក្នុងបន្ទុកមានចំនួន ១២,៤៧៥ នាក់ អតីតយុទ្ធជនចូលជាសមាជិកសមាគមមានចំនួន ៦,៦៣១ នាក់ , មុខសញ្ញានិវត្តជន ជាអតីតមន្រ្តីរាជការស៊ីវិល មានចំនួនសរុប ២,០៨៨ នាក់។ បច្ចុប្បន្ន អ.ន.ក ខេត្តសៀមរាប កំពុងគ្រប់គ្រងដីសម្បទានសង្គមកិច្ចសម្រាប់អតីតយុទ្ធជនមាន ២ កន្លែង ៖ ១.ស្ថិតនៅឃុំស្លែងស្ពាន ស្រុកស្រីស្នំ ខេត្តសៀមរាប មានទំហំ ៣,០៨០ ហិតា។ ២.ស្ថិតនៅឃុំឃុនរាម និង ឃុំខ្នារសណ្តាយ ស្រុកបន្ទាយស្រី ខេត្តសៀមរាប ដែលមានទំហំ ១,៣១៧ ហិតា និង បែងចែកដីឡូត៍កម្មសិទ្ធជូនអតីតយុទ្ធជនចំនួន ១៥២ គ្រួសារ។ ចំពោះការងារសាងសង់ផ្ទះវិញ ចាប់ពីឆ្នាំ ២០១៧ – ២០២១ បានសាងសង់ផ្ទះសរុបបានចំនួន ៩០ ខ្នងផ្ទះ ជាអំណោយដ៏ថ្លៃថ្លារបស់ សម្ដេចអគ្គមហាសេនាបតីតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន , សម្ដេចធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត៕

The post សម្តេចតេជោ ហ៊ុន សែន បន្តណែនាំអាជ្ញាធរខេត្តសៀមរាប-ឧត្តរមានជ័យ យកចិត្តទុកដាក់ជាពិសេសគ្រួសារយុទ្ធជនពលីនៅសមរភូមិ និង គ្រួសារអតីតយុទ្ធជន appeared first on Kampuchea Thmey Daily.

នៅក្រុង​សំរោង​ ការដ្ឋាន​ការ​ស្ថាបនា​ផ្លូវ​បេតុង​ភ្លោះ​ដំបូង​គេ​កំពុង​លេច​រូបរាង ដែល​នឹង​ប្រែក្លាយក្រុងសំរោងជាបេះដូងនៃសេដ្ឋកិច្ច និងទេសចរណ៍​របស់​ខេត្ត​ឧត្តរមានជ័យ។

​លោក ផុន ចាន់និល អភិបាលនៃគណៈអភិបាលក្រុងសំរោងបាន​ឲ្យ​ដឹង​ថា ផ្លូវបតុង​ភ្លោះ​ដែល​ស្ថាបនា​នេះ​មានប្រវែងសរុប ៣,៤៦០ ម៉ែត្រ (ទទឹងពី ១៥ ម៉ែត្រ កម្រាស់ ២ តឹក) ដែល​ការ​ស្ថាបនា​ក៏​មាន​រៀបការ៉ូឡាសងខាង បង្គោលភ្លើងដៃភ្លោះ និងមានសួនច្បារទ្រូងផ្លូវយ៉ាងស្អាត​ផង​ដែរ។

បើតាមមន្រ្តី​រដ្ឋបាលក្រុង​សំរោង ផ្លូវ​បេតុង​ភ្លោះ​នេះ​គ្រោង​បញ្ចប់​ការ​ស្ថាបនា​ទាំង​ស្រុង​នៅ​អំឡុង​ខែ​កក្កដា ឬ​ខែ​សីហា​ខាង​មុខ​នេះ។

ការ​ស្ថាបនា​ផ្លូវ​បេតុង​ភ្លោះ​ដំបូង​ក្នុង​ក្រុង​សំរោង ក៏​មាន​ការ​ចូលរួមពី​ប្រជាពលរដ្ឋដែលបានស្ម័គ្រចិត្តរុះរើសំយ៉ាបតូប និងរបង ដើម្បីផ្ដល់លទ្ធភាពឱ្យគ្រឿងចក្រដំណើរការតាមផែនការ។

ក្រៅពី​ផ្លូវ​បេតុង​ដែល​ជា​សមិទ្ធផល​ថ្មី​ ផ្លូវកៅស៊ូនៅស្រុកបន្ទាយអំពិល​ដែល​មានប្រវែង ៨ គីឡូម៉ែត្រ និងផ្លូវគ្រួសក្រហមនៅស្រុកអន្លង់វែង​ប្រវែង ៦,៧០០ម៉ែត្រ ក៏​បានកំពុង​ដំណើរការ​ស្ថាបនាទន្ទឹមគ្នា​។

ទន្ទឹមសមិទ្ធផល​ផ្សេងៗ​ដែលនឹង​លេច​រូបរាង​បន្ត​បន្ទាប់​នេះ តាមរយៈការប្ដេជ្ញាចិត្តខ្ពស់និងការខិតខំប្រឹងប្រែងរបស់​រដ្ឋបាល​​ខេត្ត សមិទ្ធផលជាច្រើនបានលេចចេញរូបរាងជាផ្លូវការនៅលើទឹកដីដ៏កំសត់នៃខេត្តឧត្តរមានជ័យនេះ មានការប្រែប្រួលជាវិជ្ជមានគួរឱ្យកត់សម្គាល់ រួមមានការស្ថាបនា និងជួសជុលសួនព្រះគណេស, អគាររដ្ឋបាលខេត្ត, ផ្ទះមុខងារសម្រាប់មន្ត្រីរាជការ, អគារ ប.ស.ស, សាលារៀនចំនួន ០៧ខ្នង និងព្រះវិហារចំនួន ០២កន្លែង។

រដ្ឋបាលខេត្តក៏បានរៀបចំសួននាងគង្ហីងនៅកណ្ដាលបឹងស្នោរ, រង្វង់មូលព្រះលោកេស្វរៈ, ផ្លូវបេតុងក្នុងភូមិបុរីរដ្ឋបាល និងប្រព័ន្ធភ្លើងបំភ្លឺសាធារណៈនៅតាមដងផ្លូវជាតិក្នុងក្រុងសំរោង ស្រុកអន្លង់វែង និងស្រុកបន្ទាយអំពិល ប្រកបដោយសោភ័ណភាព។

គម្រោងជាបន្តបន្ទាប់នឹងមានការរៀបចំ “ផ្សាររាត្រី និងផ្សារបន្លែ” នៅបឹងតូច និងកែលម្អ “សួននាងគង្ហីង” ឱ្យក្លាយជាតំបន់ទេសចរណ៍បៃតង។

​អភិបាល​ខេត្ត​ឧត្តរមានជ័យ លោក​ មាន ចាន់យ៉ាដា បានដាក់បទបញ្ជាយ៉ាងតឹងរ៉ឹងឱ្យពង្រឹងគុណភាពការ​​ស្ថាបនា​ផ្លូវ ក្រោម​ទស្សនៈ​ដ៏មុតមាំ​ ​”ដើម្បីឱ្យឡានខ្លាចផ្លូវ មិនមែនឱ្យផ្លូវខ្លាចឡាននោះទេ”។

បន្ថែមពី​នេះ លោកអភិបាល​ខេត្ត​​បានជម្រុញឱ្យអនុវត្តតាមបច្ចេកទេស ហាមដាច់ខាតការអន្តរាគមន៍បើកទ្រូងផ្លូវចូលផ្ទះអ្នកធំ ឬអ្នកមាន និងត្រូវធានាឱ្យបានថា ផ្លូវថ្មីនេះក្រៅពីផលប្រយោជន៍នៃការប្រើប្រាស់ផ្លូវ គឺអាចរំដោះបញ្ហាទឹកលិចនៅក្នុងក្រុងសំរោង។ ​

ពាក់ព័ន្ធ​សមិទ្ធផល​ដែល​សាងសង់ឡើងដើម្បី​ទុកជាមរតកសម្រាប់កូនចៅអ្នកឧត្តរមានជ័យ លោក មាន ចាន់យ៉ាដា បានសង្កត់ធ្ងន់ថា៖ “ឧត្តរមានជ័យមិនត្រូវជាខេត្តកំសត់រហូតនោះទេ យើងត្រូវប្រឡងប្រណាំងការអភិវឌ្ឍឱ្យស្មើមុខស្មើមាត់នឹងបណ្តា​ខេត្តដទៃ”៕

The post គម្រោង​អភិវឌ្ឍ​​ និង​សមិទ្ធផលមុខមាត់​ថ្មី​​ជា​បន្ត​បន្ទាប់កំពុង​លេច​រូបរាង​ក្នុង​ខេត្ត​ឧត្តរមានជ័យ appeared first on Kampuchea Thmey Daily.

លោក ផុន ចាន់និល អភិបាលនៃគណៈអភិបាលក្រុងសំរោងបាន​ឲ្យ​កម្ពុជា​ថ្មី​ដឹង​ថា ទី​ប្រជុំជនក្រុង​សំរោង​មាន​បណ្តាញផ្លូវ​ជាច្រើន​ខ្សែ ហើយ​ចំពោះប្រភេទផ្លូវភ្លោះ​ក្នុង​ក្រុង​​ពីមុន​មាន​តែ​ចំនួន ១ ខ្សែ ជា​ផ្លូវ​កៅស៊ូ​ដែល​មាន​ទីតាំងនៅខាង​មុខ​សាលាខេត្ត។

ដោយឡែក​ផ្លូវភ្លោះថ្មី​មួយខ្សែ​ទៀត គឺ​ជាផ្លូវបេតុងភ្លោះដំបូង​គេ​ក្នុង​ក្រុង​សំរោងដែល​​​កំពុង​ដំណើរការ​ស្ថាបនា​ចាប់ពីរង្វង់មូលព្រះបាទជ័យវរ្ម័នទី ៧ រហូតដល់រង្វង់មូលលោកកេស្វរៈ (ដៃប្រាំបី) មាន​ប្រវែង​ជាង ៣ ០០០ ម៉ែត្រ។

លោក​ថា ផ្លូវ​បេតុង​ដែល​កំពុង​ស្ថាបនា​​នេះ​មាន​ទទឹង​ចាប់​ពី ១៥ ម៉ែត្រ ហើយ​​​គ្រោង​បញ្ចប់​នៅ​អំឡុង​ខែ​សីហា ឬ​ខែ​កក្កដា​ខាង​មុខ​នេះ។

ផ្លូវ​គឺជាសរសៃឈាម​សេដ្ឋកិច្ច ខណៈ​​ក្រុង​សំរោង​គឺ​ជា​បេះដូង​នៃ​ខេត្ត​ឧត្តរមាន​ជ័យ​។ ការ​ស្ថាបនាផ្លូវបេតុង​ភ្លោះ​នៅក្នុងក្រុង​សំរោង ដែល​​មាន​ប្រវែងសរុប ៣,៤៦០ ម៉ែត្រ មាន​ទទឹង​ចាប់​ពី ១៥ ម៉ែត្រ ​ក៏​​មាន​រៀបការ៉ូឡា​សងខាង បង្គោល​​ភ្លើង​ដៃ​ភ្លោះ និង​មាន​សួន​ច្បារ​ទ្រូង​ផ្លូវ​យ៉ាងស្រស់​​ស្អាត​ផង​ដែរ​។

ថ្លែង​នៅ​ក្នុង​ពិធី​បើក​ការដ្ឋាន​ស្ថាបនា​ផ្លូវ​បេតុង​ភ្លោះ​នៅ​ក្រុង​សំរោង​ លោក មាន ចាន់យ៉ាដា អភិបាល​ខេត្ត​ឧត្តរមានជ័យបាន​ណែនាំ​ឲ្យ​ក្រុម​បច្ចេកទេស​​សាងសង់​ផ្លូវ​​ត្រូវ​​ពង្រឹង​​គុណភាព​​ ដោយ​លោក​សង្កត់ធ្ងន់​​គោលការណ៍​​ការ​ស្ថាបនា​គឺ​ “ដើម្បីឱ្យឡានខ្លាចផ្លូវ មិន​មែន​ឱ្យផ្លូវ​ខ្លាចឡាននោះទេ”៕

The post ក្រុង​សំរោង​ជាប់ជាយដែន​ នឹង​មាន​ផ្លូវភ្លោះបេតុង​ដំបូងគេ កំពុង​សាងសង់​គ្រោង​បញ្ចប់​ឆាប់ៗ​នេះ appeared first on Kampuchea Thmey Daily.

ការអប់រំ និង ការសិក្សារបស់កុមារ គឺជាអាទិភាពខ្ពស់បំផុតដែលមិនអាចបង្អង់ ឬ រំលងបានឡើយ ទោះជាស្ថិតក្នុងស្ថានភាពលំបាក ឬ ការផ្លាស់ប្ដូរទីលំនៅដោយសារស្ថានភាពណាមួយក៏ដោយ។

ការរៀបចំទីតាំងសិក្សា ក្រុមការងារ បានកែច្នៃទីតាំងសមស្របឲ្យក្លាយជាថ្នាក់រៀនបណ្ដោះអាសន្ន មានរបៀបរៀបរយ បរិស្ថានស្អាត និង សុវត្ថិភាពខ្ពស់ សម្រាប់កុមារងាយស្រួលក្នុងការជួបជុំក្រេបជញ្ជក់ចំណេះដឹង។

ការធានានិរន្តរភាពការអប់រំការបង្កើតថ្នាក់រៀននេះឡើង ដើម្បីបង្ការមិនឲ្យកុមារ និង សិស្សានុសិស្សដែលកំពុងស្នាក់នៅក្នុងជំរំ ត្រូវខកខាន ឬ បោះបង់ចោលការសិក្សា ស្របតាមគោលនយោបាយជាតិ «ការអប់រំសម្រាប់ទាំងអស់គ្នា និង ទាំងអស់គ្នា ដើម្បីការអប់រំ»។ ការលើកកម្ពស់ផ្លូវចិត្ត ថ្នាក់រៀននេះមិនត្រឹមតែផ្ដល់ចំណេះដឹងប៉ុណ្ណោះទេ ប៉ុន្តែថែមទាំងជាកន្លែងជួយសម្រួលដល់ស្មារតី ផ្លូវចិត្ត និង បង្កើតភាពរីករាយ ភាពកក់ក្ដៅជូនដល់កុមារនៅក្នុងជំរំផងដែរ។

​ក្នុងឱកាសនោះ លោកប្រធានការិយាល័យអប់រំក្រុង និង ក្រុមការងារ បានសម្ដែងនូវការប្ដេជ្ញាចិត្តយ៉ាងមុតមាំក្នុងការបន្តតាមដាន ជួយសម្របសម្រួលផ្នែកសម្ភារសិក្សា សៀវភៅ ប៊ិច និង គ្រូបង្រៀន ដើម្បីធានាឲ្យដំណើរការបង្រៀន និង រៀននៅថ្នាក់រៀនបណ្ដោះអាសន្ននេះ ប្រព្រឹត្តទៅបានល្អប្រចាំថ្ងៃ ស្របតាមការគិតគូរជាប្រចាំរបស់ថ្នាក់ដឹកនាំរដ្ឋបាលក្រុងសំរោង៕

The post ការិយាល័យអប់រំក្រុងសំរោង រៀបចំថ្នាក់រៀនបណ្ដោះអាសន្ន ដើម្បីធានាថា «កុមារគ្រប់រូបនៅតែទទួលបានការសិក្សា» ទោះស្ថិតក្នុងស្ថានភាពអាសន្ន appeared first on Kampuchea Thmey Daily.

អភិបាលខេត្តឧត្តរមានជ័យលោក មាន ចាន់យ៉ាដា បានបង្ហោះនៅលើបណ្តាញសង្គម ថ្ងៃទី ១១ ខែឧសភា ឆ្នាំ ២០២៦ ឱ្យដឹងថា ក្រុមការងារនៅ​តែបន្តចែករំលែកស្បៀងអាហារជូនដល់បងប្អូនកងទ័ពឈរជើងការពារព្រំដែន និងប្រជាពលរដ្ឋភៀសសឹកតាមរយៈទិន្នផលបានពីកសិដ្ឋានជនភៀសសឹករបស់យើង។ លោកសរសេរថា៖«យើងខ្ញុំទាំងអស់គ្នាពិតជាដឹងគុណចំពោះគំនិតផ្តួចផ្តើមដ៏ឈ្លាសវៃរបស់លោកជំទាវបណ្ឌិត ពេជ ចន្នមុន្នី ហ៊ុនម៉ាណែត ក្នុងការកសាងនូវកសិដ្ឋានផលិតកសិផលផ្គត់ផ្គង់ជាប្រចាំជូនដល់វីរកងទ័ព និងប្រជាពលរដ្ឋភៀសសឹករបស់យើង»។

លោកគូសបញ្ជាក់ថា បើទោះមិនមានសង្គ្រាមក៏ពិតមែន ប៉ុន្តែកងកម្លាំងរបស់យើងនៅតែឈរជើងប្រចាំការគ្រប់គ្រងសភាពការណ៍ពេញ ១០០%ដូចដើម ដូច្នេះតម្រូវការហូបចុករបស់បងប្អូននៅតែជាកត្តាសំខាន់ដែលក្រុមការងារខេត្តត្រូវយកចិត្តទុកដាក់ជួយទំនុកបម្រុងបន្ថែមលើអ្វីដែលមានស្រាប់។

តាមរយៈការចូលរួមយ៉ាងសកម្មរបស់ក្រុមការងារមន្ទីរកសិកម្ម និងអាជ្ញាធរខេត្ត ដំណាំជាច្រើនប្រភេទ ត្រូវបានប្រមូលផលជាបន្តបន្ទាប់ គិតត្រឹមថ្ងៃទី១០ ខែឧសភានេះ ប្រមូលផលបានចំនួន២៦លើក ក្នុងនោះរួមមាន ត្រកួន ស្ពៃចង្កឹះ ស្ពៃក្រញ៉ាញ់ ស្ពៃតឿ ផ្ទី ឪឡឹកក្រហម ឃ្លោក ល្ពៅ ត្រីអណ្តែង និងស៊ុតទាផងដែរ។

គួរជម្រាបថា ដើម្បីសម្រួលបន្ទុក និងការស្នាក់នៅរបស់ប្រជាពលរដ្ឋភៀសសឹក ដែលមិនទាន់អាចវិលត្រឡប់ទៅរស់នៅលំនៅឋានវិញ រាជរដ្ឋាភិបាលបានសាងសង់ផ្ទះបណ្តោះអាសន្នមួយចំនួនជូនពលរដ្ឋភៀសសឹក សម្រាប់ស្នាក់នៅបណ្តោះអាសន្ននៅតាមបណ្តាលខេត្តដែលរងផលប៉ះពាល់ខ្លាំង។

គិតត្រឹមថ្ងៃទី ០៩ ខែឧសភា ថ្ងៃទី៩ ខែឧសភា ឆ្នាំ២០២៦ មានពលរដ្ឋភៀសសឹកចំនួន១៣នាក់បន្ថែមទៀត បានបន្តចាកចេញពីជំរំសុវត្ថិ ភាពត្រឡប់ទៅលំនៅឋានវិញ។ ដូច្នេះក្នុងចំណោមពលរដ្ឋភៀសសឹកសរុបជាង៦សែន៤ម៉ឺននាក់ មានជាង៦សែន១ ម៉ឺននាក់ឬប្រមាណ៩៥% បានវិលត្រឡប់ទៅលំនៅឋានវិញ។ នៅមានពលរដ្ឋចំនួន៣២.៨៩៩នាក់​ទៀត (ស្ត្រី ១៧.០១៩នាក់ និងកុមារ១១.០៧៨នាក់) ពុំទាន់អាចវិលទៅលំនៅឋានវិញ។ នេះបើតាមក្រសួងមហាផ្ទៃ៕

The post កសិដ្ឋានដាំបន្លែផ្តួចផ្តើមដោយជំទាវបណ្ឌិត ពេជ ចន្នមុន្នី កំពុងប្រមូលផលបន្តបន្ទាប់ផ្គត់ផ្គង់ស្បៀងជូនកងទ័ព និងពលរដ្ឋភៀសសឹក appeared first on Kampuchea Thmey Daily.

លោក ស៊ុន មេសា អ្នកនាំពាក្យក្រសួងការងារ និង បណ្តុះបណ្តាលវិជ្ជាជីវៈ បានបញ្ជាក់នៅថ្ងៃទី ១១ ខែឧសភា ថា វេទិកាការងារនេះ មានអតីតពលករខ្មែរមកពីប្រទេសថៃ និង ប្រជាពលរដ្ឋប្រមាណជាង ១ ៤០០ នាក់ បានអញ្ជើញចូលរួមស្វែងរកការងារធ្វើ ក៏ដូចជាស្វែងយល់បន្ថែមអំពីអត្ថប្រយោជន៍ នៃរបបសន្តិសុខសង្គម និង ឱកាសចូលរៀនវគ្គបណ្តុះបណ្តាលបច្ចេកទេស និង វិជ្ជាជីវៈ ដោយឥតគិតថ្លៃផងដែរ។

លោកបន្តថា ក្នុងឱកាសនោះ អតីតពលករមកពីប្រទេសថៃ និង ប្រជាពលរដ្ឋ បានចុះឈ្មោះចូលរៀនជំនាញសរុបចំនួន ២៦ នាក់ ចំណែកអ្នកជាប់ការងារសរុប ១៣២ នាក់ ពីក្រុមហ៊ុន រោងចក្រ សហគ្រាសធំៗ បានចុះទៅផ្សព្វផ្សាយឱកាសការងារ និង ជ្រើសរើសកម្លាំងពលកម្មដល់មូលដ្ឋាន។

លោក ស៊ុន មេសា សង្កត់ធ្ងន់ថា «ការបន្តចុះវេទិកាការងារនៅតាមខេត្តនេះ ជាការគិតគូររបស់រាជរដ្ឋាភិបាល ដែលមាន លោករដ្ឋមន្ត្រី ហេង សួរ ជាសេនាធិការ ក្នុងការផ្តល់ឱកាសការងារជូនដល់ពលរដ្ឋនៅតាមមូលដ្ឋាន ដើម្បីកែសម្រួលជីវភាពបន្ថែមទៀត ដូច្នេះ សូមប្រជាពលរដ្ឋ និង បងប្អូនអតីតពលករចូលរួមវេទិកាការងារនេះឲ្យបានច្រើនកុះករ»។

អ្នកនាំពាក្យរូបនេះ បានអំពាវនាវដល់អតីតពលករខ្មែរត្រឡប់មកពីប្រទេសថៃ និង ពលរដ្ឋខ្មែរ មិនបានចូលរួមវេទិកាការងារលើកនេះ សូមទាក់ទងទៅកាន់លេខ ១២៩៧ ដែលមានមន្ត្រីក្រសួងការងារនៅរង់ចាំទទួលទូរសព្ទ ៧ ថ្ងៃ ក្នុង ១ សប្តាហ៍ ដើម្បីទទួលបានឱកាសការងារ និង ការបណ្តុះបណ្តាលជំនាញបច្ចេកទេស និង វិជ្ជាជីវៈ ដោយឥតគិតថ្លៃ។

សូមរំឭកផងដែរថា គិតមកដល់ពេលនេះ ក្រសួងការងារ និង បណ្តុះបណ្តាលវិជ្ជាជីវៈ បានរៀបចំវេទិកាការងារ សរុបចំនួន ៦០៣ លើក ដែលបានផ្តល់ឱកាសការងារដល់ពលរដ្ឋខ្មែរ និង អតីតពលករត្រឡប់មកពីប្រទេសថៃជាង ៦៥ ម៉ឺននាក់៕

The post វេទិកាការងារនៅខេត្តឧត្តរមានជ័យ មានពលរដ្ឋជាង ១ ៤០០ នាក់ ចូលរួម ទទួលបានឱកាសការងារ និង ចុះឈ្មោះចូលរៀនជំនាញ appeared first on Kampuchea Thmey Daily.

ថ្លែងក្នុងពិធីក្រុងពាលី និងបញ្ចុះបឋមសិលាសាងសង់អគារសិក្សាថ្មី ១ ខ្នង មាន ៦ បន្ទប់ និងអគារបង្គន់អនាម័យ ១ ខ្នង ៥ បន្ទប់ នៅសាលាបឋមសិក្សាអំពិល ស្រុកចុងកាល់ ខេត្តឧត្ដរមានជ័យ នៅព្រឹកថ្ងៃទី២៨ ខែមេសា ឆ្នាំ២០២៦ លោកស្រី គឹម សេដ្ឋានី រដ្ឋលេខាធិការប្រចាំការក្រសួងអប់រំ មានប្រសាសន៍ថា កន្លងមកខេត្តឧត្ដរមានជ័យបានរងផលប៉ះពាល់ខ្លាំងដោយសារការឈ្លានពានពីសំណាក់ប្រទេសថៃមកលើប្រទេសកម្ពុជាដោយមានសាលារៀនចំនួន ២៦០ ត្រូវបានបិទទ្វារ។ ប៉ុន្តែបច្ចុប្បន្ន សាលាភាគច្រើនបានបើកដំណើរការវិញហើយ នៅសេសសល់តែ ៩ សាលាប៉ុណ្ណោះដែលស្ថិតក្នុងតំបន់ហានិភ័យ។

លោកស្រីរដ្ឋលេខាធិការ បានលើកឡើងថា ក្រសួងនឹងបន្តខិតខំប្រឹងប្រែងជួយឧបត្ថម្ភគាំទ្រគ្រប់រូបភាពដល់បុគ្គលិកអប់រំ និងសិស្សានុ សិស្ស ដើម្បីធានាបាននូវការអប់រំប្រកបដោយគុណភាព សមធម៌ និងបរិយាបន្ន ទោះក្នុងស្ថានភាពលំបាកបែបណាក៏ដោយ។ ជាមួយគ្នានេះដែរ លោកស្រីបានលើកទឹកចិត្តដល់ក្មួយៗសិស្សានុសិស្សឱ្យខិតខំរៀនសូត្រ ដើម្បីក្លាយជាធនធានមនុស្សដ៏រឹងមាំ និងជាខឿនការពារជាតិដ៏សំខាន់សម្រាប់អនាគត។

លោកស្រី គឹម សេដ្ឋានី បានវាយតម្លៃខ្ពស់ចំពោះស្មារតីសាមគ្គីភាព «ខ្មែរជួយខ្មែរ ខ្មែរតែមួយ» ដែលបានចូលរួមចំណែកយ៉ាងសំខាន់ក្នុងការស្ដារឡើងវិញនូវហេដ្ឋារចនាសម្ព័ន្ធសាលារៀន និងផ្ដល់សម្ភារៈសិក្សាសម្រាប់ជួយដល់សិស្សា​នុ​សិស្ស​នៅតំបន់ព្រំដែន។

ក្នុងឱកាសនោះដែរ លោកស្រីរដ្ឋលេខាធិការ ក៏បាននាំយកសម្ភារៈប្រើប្រាស់ សម្ភារៈសិក្សា គ្រឿងឧបភោគបរិភោគ និងថវិកាឧបត្ថម្ភមួយចំនួន ប្រគល់ជូនដល់សាលាបឋមសិក្សាអំពិល និងសាលាបឋមសិក្សាពង្រ ដើម្បីបែងចែកបន្តជូនដល់លោកគ្រូ អ្នកគ្រូ និងសិស្សានុសិស្សផងដែរ។

យោងតាមក្រសួងមហាផ្ទៃ គិតត្រឹមថ្ងៃទី ២៧ខែមេសាឆ្នាំ២០២៦ ផលប៉ះពាល់ដោយសារសង្គ្រាមឈ្លានពានថៃមកលើប្រទេសកម្ពុជា មានសាលារៀនប្រមាណ២០និងមណ្ឌលសុខភាព ៨ នៅខេត្តចំនួន៣ បន្តផ្អាកដំណើរការដោយសារសាលាទាំងនោះរងការបំផ្លាញដោយការទម្លាក់គ្រាប់ពីយោធាថៃក្នុងនោះខេត្តឧត្តរមានជ័យមានសាលារៀនចំនួន៨ មណ្ឌលសុខភាព៥ ខេត្តបន្ទាយមានជ័យ មានសាលារៀន ៥ មណ្ឌលសុខភាព១ និងខេត្តព្រះវិហារ មានសាលាចំនួន៧ និងមណ្ឌលសុខភាពចំនួន២៕

អត្ថបទ៖ សំអឿន

The post សាលារៀននៅខេត្តឧត្តរមានជ័យចំនួន៩ បន្តផ្អាកខណៈសាលាជាង២៥០បានបើកដំណើរការឡើងវិញ appeared first on Kampuchea Thmey Daily.

បើតាមសំណេររបស់អភិបាលខេត្តឧត្តរមានជ័យ បានឱ្យដឹងថា ក្រុមការងារបច្ចេកទេសនៃមន្ទីរកសិកម្ម រុក្ខាប្រមាញ់ និងនេសាទ បានប្រមូលកសិផលដែលបានដាំដុះក្នុងមូលដ្ឋាន ដើម្បីយកទៅចែកជូនដល់ប្រជាពលរដ្ឋ និងសិស្សានុសិស្សក្នុងជំរំសុវត្ថិភាព និងកងទ័ពវរៈ២៥២ កងពលតូចអន្តរាគមន៍លេខ៥ កងពលធំលេខ២ ដែកកំពុងបំពេញភារកិច្ចការពារបូរណភាពទឹកដី នៅទិសប្រាសាទតាក្របី ចំនួន ១,០៥០គីឡូក្រាម និងស៊ុតទាចំនួន ១,៦២០គ្រាប់។

លោក មាន ចាន់យ៉ាដា បញ្ជាក់ថា ការប្រមូលផលបន្លែក្នុងមូលដ្ឋាន និងការចែកស្បៀងជូនកងទ័ព និងពលរដ្ឋនៅជំរំសុវត្ថិភាពធ្វើឡើងចំនួន ២២លើករួចមកហើយ ពោល សរុបបានចំនួន ២២,២១០គីឡូក្រាម។ លោកសង្កត់ធ្ងន់ថា ទាំងនេះគឺជាកិច្ចខិតខំរបស់រដ្ឋបាលខេត្ត និងមន្ទីរជំនាញ ដើម្បីជំរុញវិស័យកសិកម្មក្នុងស្រុកឱ្យក្លាយជាបង្អែកស្បៀងដ៏សំខាន់ក្នុងការជួយដល់កងទ័ពជួរមុខ រួមទាំងពលរដ្ឋនៅជំរំសុវត្ថិភាព៕

The post កសិផលក្នុងមូលដ្ឋាននៅខេត្តឧត្តរមានជ័យ បន្តផ្គត់ផ្គង់យ៉ាងសកម្មជូនកងទ័ព និងពលរដ្ឋភៀសសឹក appeared first on Kampuchea Thmey Daily.