ព័ត៌មានជាតិ

ក្រុងសំរោងជាប់ជាយដែន នឹងមានផ្លូវភ្លោះបេតុងដំបូងគេ កំពុងសាងសង់គ្រោងបញ្ចប់ឆាប់ៗនេះ

បានផុស

១ ខែ មុន

នៅ

ថ្ងៃព្រហស្បតិ៍ ២១ ឧសភា ២០២៦

ដោយ

អាជ្ញាធរខេត្តឧត្តរមានជ័យបានកំពុងស្ថាបនាផ្លូវភ្លោះបេតុងដំបូងគេនៅក្នុងក្រុងសំរោង ជាគម្រោងអភិវឌ្ឍហេដ្ឋារចនាសម្ព័ន្ធដ៏សំខាន់មួយ ដែលនឹងចូលរួមលើកកម្ពស់សោភណភាព និងរំលេចមុខមាត់ថ្មីខេត្តជាប់ព្រំដែនបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ផុន ចាន់និល អភិបាលនៃគណៈអភិបាលក្រុងសំរោងបានឲ្យកម្ពុជាថ្មីដឹងថា ទីប្រជុំជនក្រុងសំរោងមានបណ្តាញផ្លូវជាច្រើនខ្សែ ហើយចំពោះប្រភេទផ្លូវភ្លោះក្នុងក្រុងពីមុនមានតែចំនួន ១ ខ្សែ ជាផ្លូវកៅស៊ូដែលមានទីតាំងនៅខាងមុខសាលាខេត្ត។

ដោយឡែកផ្លូវភ្លោះថ្មីមួយខ្សែទៀត គឺជាផ្លូវបេតុងភ្លោះដំបូងគេក្នុងក្រុងសំរោងដែលកំពុងដំណើរការស្ថាបនាចាប់ពីរង្វង់មូលព្រះបាទជ័យវរ្ម័នទី ៧ រហូតដល់រង្វង់មូលលោកកេស្វរៈ (ដៃប្រាំបី) មានប្រវែងជាង ៣ ០០០ ម៉ែត្រ។

លោកថា ផ្លូវបេតុងដែលកំពុងស្ថាបនានេះមានទទឹងចាប់ពី ១៥ ម៉ែត្រ ហើយគ្រោងបញ្ចប់នៅអំឡុងខែសីហា ឬខែកក្កដាខាងមុខនេះ។

ផ្លូវគឺជាសរសៃឈាមសេដ្ឋកិច្ច ខណៈក្រុងសំរោងគឺជាបេះដូងនៃខេត្តឧត្តរមានជ័យ។ ការស្ថាបនាផ្លូវបេតុងភ្លោះនៅក្នុងក្រុងសំរោង ដែលមានប្រវែងសរុប ៣,៤៦០ ម៉ែត្រ មានទទឹងចាប់ពី ១៥ ម៉ែត្រ ក៏មានរៀបការ៉ូឡាសងខាង បង្គោលភ្លើងដៃភ្លោះ និងមានសួនច្បារទ្រូងផ្លូវយ៉ាងស្រស់ស្អាតផងដែរ។

ថ្លែងនៅក្នុងពិធីបើកការដ្ឋានស្ថាបនាផ្លូវបេតុងភ្លោះនៅក្រុងសំរោង លោក មាន ចាន់យ៉ាដា អភិបាលខេត្តឧត្តរមានជ័យបានណែនាំឲ្យក្រុមបច្ចេកទេសសាងសង់ផ្លូវត្រូវពង្រឹងគុណភាព ដោយលោកសង្កត់ធ្ងន់គោលការណ៍ការស្ថាបនាគឺ “ដើម្បីឱ្យឡានខ្លាចផ្លូវ មិនមែនឱ្យផ្លូវខ្លាចឡាននោះទេ”៕