ការិយាល័យអប់រំក្រុងសំរោង រៀបចំថ្នាក់រៀនបណ្ដោះអាសន្ន ដើម្បីធានាថា «កុមារគ្រប់រូបនៅតែទទួលបានការសិក្សា» ទោះស្ថិតក្នុងស្ថានភាពអាសន្ន

កាលពីល្ងាចថ្ងៃទី ១៨ ខែឧសភា ឆ្នាំ ២០២៦ ម្សិលមិញ ដោយទទួលបានការណែនាំយកចិត្តទុកដាក់ខ្ពស់ពី លោក ផុន ចាន់និល អភិបាល នៃគណៈអភិបាលក្រុងសំរោង លោក ប្លុង កូយ ប្រធានការិយាល័យអប់រំ យុវជន និង កីឡា ក្រុងសំរោង បានដឹកនាំមន្ត្រីជំនាញក្រោមឱវាទចំនួន ៥ រូប ចុះយុទ្ធនាការរៀបចំថ្នាក់រៀនបណ្ដោះអាសន្នជូនដល់កុមារ និង សិស្សានុសិស្សនៅជំរំសុវត្ថិភាពវត្តបាតថ្កៅ ក្រុងសំរោង ដើម្បីធានាថា «កុមារគ្រប់រូបនៅតែទទួលបានការសិក្សា» ទោះស្ថិតក្នុងស្ថានភាពអាសន្នក៏ដោយ។

ការអប់រំ និង ការសិក្សារបស់កុមារ គឺជាអាទិភាពខ្ពស់បំផុតដែលមិនអាចបង្អង់ ឬ រំលងបានឡើយ ទោះជាស្ថិតក្នុងស្ថានភាពលំបាក ឬ ការផ្លាស់ប្ដូរទីលំនៅដោយសារស្ថានភាពណាមួយក៏ដោយ។

ការរៀបចំទីតាំងសិក្សា ក្រុមការងារ បានកែច្នៃទីតាំងសមស្របឲ្យក្លាយជាថ្នាក់រៀនបណ្ដោះអាសន្ន មានរបៀបរៀបរយ បរិស្ថានស្អាត និង សុវត្ថិភាពខ្ពស់ សម្រាប់កុមារងាយស្រួលក្នុងការជួបជុំក្រេបជញ្ជក់ចំណេះដឹង។

ការធានានិរន្តរភាពការអប់រំការបង្កើតថ្នាក់រៀននេះឡើង ដើម្បីបង្ការមិនឲ្យកុមារ និង សិស្សានុសិស្សដែលកំពុងស្នាក់នៅក្នុងជំរំ ត្រូវខកខាន ឬ បោះបង់ចោលការសិក្សា ស្របតាមគោលនយោបាយជាតិ «ការអប់រំសម្រាប់ទាំងអស់គ្នា និង ទាំងអស់គ្នា ដើម្បីការអប់រំ»។ ការលើកកម្ពស់ផ្លូវចិត្ត ថ្នាក់រៀននេះមិនត្រឹមតែផ្ដល់ចំណេះដឹងប៉ុណ្ណោះទេ ប៉ុន្តែថែមទាំងជាកន្លែងជួយសម្រួលដល់ស្មារតី ផ្លូវចិត្ត និង បង្កើតភាពរីករាយ ភាពកក់ក្ដៅជូនដល់កុមារនៅក្នុងជំរំផងដែរ។

​ក្នុងឱកាសនោះ លោកប្រធានការិយាល័យអប់រំក្រុង និង ក្រុមការងារ បានសម្ដែងនូវការប្ដេជ្ញាចិត្តយ៉ាងមុតមាំក្នុងការបន្តតាមដាន ជួយសម្របសម្រួលផ្នែកសម្ភារសិក្សា សៀវភៅ ប៊ិច និង គ្រូបង្រៀន ដើម្បីធានាឲ្យដំណើរការបង្រៀន និង រៀននៅថ្នាក់រៀនបណ្ដោះអាសន្ននេះ ប្រព្រឹត្តទៅបានល្អប្រចាំថ្ងៃ ស្របតាមការគិតគូរជាប្រចាំរបស់ថ្នាក់ដឹកនាំរដ្ឋបាលក្រុងសំរោង៕