ជម្លោះមជ្ឈិមបូព៌ា Archives - Kampuchea Thmey Daily

សម្តេច ប៉ាប លីអូ ព្រមានអំពី«ព្យុះសង្គ្រាម» បោកបក់សារជាថ្មីនៅមជ្ឈិមបូព៌ា រួមទាំង អ៊ុយក្រែន

សាង ស្រីល័ក្ខ — Mon, 13 Jul 2026 04:09:32 +0000

កាលពីថ្ងៃទី១២ ខែកក្កដា សម្តេច ប៉ាប លីអូ ទី១៤ បានព្រមានថា «រលកសង្គ្រាម» កំពុងតែបោកបក់ សារជាថ្មីម្តងទៀត នៅទូទាំងតំបន់មជ្ឈិមបូព៌ា អ៊ុយក្រែន និងផ្នែកផ្សេងទៀតនៃពិភពលោក ព្រមទាំងបានជំរុញឲ្យមានការបន្តកិច្ចខិតខំប្រឹងប្រែងឆ្ពោះទៅរកការសន្ទនា និងការទូត។

សម្តេចប៉ាបលីអូ ទី១៤ (រូបភាព៖Reuters)

មេដឹកនាំបុរីវ៉ាទីកង់រូបនេះ បានលើកឡើងនៅក្នុងការបង្ហោះលើបណ្តាញសង្គម X ថា រលកសង្គ្រាមកំពុងតែបោកបក់សារជាថ្មីម្តងទៀត នៅក្នុងតំបន់មជ្ឈិមបូព៌ា នៅក្នុងប្រទេសអ៊ុយក្រែន និងនៅក្នុងតំបន់ជាច្រើនទៀតនៃពិភពលោក ដោយបានបណ្តុះនូវអំពើហិង្សា ភាពភ័យរន្ធត់ និងសេចក្តីស្លាប់ ព្រមទាំងបានវាយប្រហារទៅលើមនុស្សស្លូតត្រង់ជាច្រើននាក់ម្តងហើយម្តងទៀត។

ទ្រង់ក៏បានអំពាវនាវឲ្យរក្សានូវក្តីសង្ឃឹម សម្រាប់សន្តិភាព ទោះបីជាមានជម្លោះកំពុងបន្តកើតមានក៏ដោយ។ នេះបើយោងតាមការចេញផ្សាយពីសារព័ត៌មាន Anadolu។

ព្រះអង្គមានបន្ទូលថា៖ «សូមកុំបណ្តោយឲ្យខ្យល់ទាំងនេះ ពន្លត់ពន្លឺភ្លើងដ៏តូចនៃក្តីសង្ឃឹម និងសន្តិភាព ទោះបីជាវាមើលទៅហាក់ដូចជាផុយស្រួយ និងរង្គើរក៏ដោយ»។

សម្តេចប៉ាប ក៏បានរំលឹកជាថ្មីនូវការអំពាវនាវរបស់ព្រះអង្គ ឲ្យមានការបន្តធ្វើការសន្ទនា ការជួបប្រជុំ និងកិច្ចខិតខំប្រឹងប្រែងផ្នែកការទូត ដោយក្តីព្យាយាមអត់ធ្មត់។ ព្រះអង្គបានពិពណ៌នាអំពីកិច្ចខិតខំប្រឹងប្រែងទាំងនោះថាជា ផ្លូវតែមួយគត់ដែលអាចដឹកនាំទៅរកសន្តិភាពដ៏ត្រឹមត្រូវ និងយូរអង្វែង ដែលជាកន្លែងដែលប្រជាជនអាចរស់នៅក្នុងការផ្សះផ្សា និងសន្តិសុខទៅវិញទៅមក។

ទន្ទឹមនឹងនេះដែរ សម្តេចសង្ឃក៏បានសង្កត់ធ្ងន់លើតម្រូវការក្នុងការគោរពសេចក្តីថ្លៃថ្នូររបស់មនុស្សគ្រប់រូប ដែលជាផ្នែកមួយនៃកិច្ចខិតខំប្រឹងប្រែង ដើម្បីសម្រេចបាននូវសន្តិភាពប្រកបដោយចីរភាព។

គួរជម្រាបជូនថា ដោយសារតែសង្គ្រាមនៅមជ្ឈិមបូព៌ាកំពុងឡើងកម្តៅខ្លាំង ផ្សំផ្គុំជាមួយសង្គ្រាមនៅអ៊ុយក្រែនដែលមិនទាន់ចប់ផងនោះ ទើបសម្តេចប៉ាបលីអូ ចេញមុខមកសម្តែងការព្រួយបារម្ភយ៉ាងខ្លាំងពី «ខ្យល់សង្គ្រាម» និងទទូចឲ្យងាកមករកផ្លូវការទូតវិញ មុនពេលពិភពលោកធ្លាក់ក្នុងមហន្តរាយខ្លាំងជាងនេះ៕

អត្ថបទ ៖ សាង ស្រីល័ក្ខ

The post សម្តេច ប៉ាប លីអូ ព្រមានអំពី«ព្យុះសង្គ្រាម» បោកបក់សារជាថ្មីនៅមជ្ឈិមបូព៌ា រួមទាំង អ៊ុយក្រែន appeared first on Kampuchea Thmey Daily.

អាមេរិកនិងអ៊ីរ៉ង់ ទំនងចាប់ផ្តើមចរចាជាថ្មីនៅចុងសប្តាហ៍នេះ

Rann Reuy — Sat, 25 Apr 2026 02:40:49 +0000

ការចរចារវាងអ៊ីរ៉ង់និងសហរដ្ឋអាមេរិក ត្រូវបានរាយការណ៍ថា នឹងច្បាប់ផ្តើមជុំទី២នៅចុងសប្តាហ៍នេះ ដោយប្រភពខ្លះរាយការណ៍ថា គ្មានវត្តមានអនុប្រធានាធិបតីអាមេរិក លោក JD Vance នោះទេ ប៉ុន្តែប្រភពខ្លះបានអះអាងថា លោកប្រហែលដឹកនាំប្រតិភូសហរដ្ឋអាមេរិកទៅពិភាក្សានៅទីក្រុងអ៊ីស្លាម៉ាបាដប្រទេសប៉ាគីស្ថាន។

ប្រធានាធិបតីអ៊ីរ៉ង់Masoud Pezeshkian និង ប្រធានាធិបតីអាមេរិក ដូណាល់ ត្រាំ។

កាសែតវ៉ាស៊ីនតោនប៉ុស្តិ៍ បានរាយការណ៍នៅមុននេះបន្តិចថា ប្រតិភូសហរដ្ឋអាមេរិកនឹងបន្តកិច្ចចរចាជាមួយអ៊ីរ៉ង់នៅទីក្រុងអ៊ីស្លាម៉ាបាដ ប្រទេសប៉ាគីស្ថាននៅសប្តាហ៍នេះ ប៉ុន្តែគ្នានវត្តមានរបស់អនុប្រធានាធិបតី JD Vance នោះទេ គឺមានត្រឹមតែបេសកជនពិសេសរបស់ប្រធានាធិបតី ត្រាំ Steve Witkoff និងកូនប្រសាររបស់ លោក ត្រាំ Jared Kushner ប៉ុណ្ណោះ។

ប៉ុន្តែតាមប្រភពទូរទស្សន៍ Al Hadath ដែលមានមូលដ្ឋាននៅប្រទេសអារ៉ាប៊ី សាអ៊ូឌីត និងត្រូវផ្សាយបន្តដោយទីភ្នាក់ងារព័ត៌មានរុស្ស៊ី TASS លោក JD Vance ប្រហែលជាចូលរួមក្នុងកិច្ចប្រជុំលើកនេះ។

ទោះបីជាយ៉ាងណា មិនទាន់មានព័ត៌មានផ្លូវការណាមួយអំពីពេលវេលាដែលភាគីអ៊ីរ៉ង់និងសហរដ្ឋអាមេរិកជួបចរចាគ្នាជុំទី២នោះទេ បន្ទាប់ពីការចរចាលើកដំបូងកាលពីថ្ងៃ២សប្តាហ៍មុនមិនមានលទ្ធផលរហូតសម្រេចបានកិច្ចព្រមព្រៀងនោះទេ។

ប្រធានាធិបតីសហរដ្ឋអាមេរិក លោក ដូណាល់ ត្រាំ បានសម្រេចជាឯកតោភាគីកាលពីថ្ងៃអង្គារកន្លងទៅ ដោយពន្យារបទឈប់បាញ់គ្មានកាលកំណត់រហូតដល់អ៊ីរ៉ង់អាចបញ្ជូននូវសំណើកិច្ចព្រមព្រៀងដែលឯកភាពសម្រាប់ចរចាជាមួយសហរដ្ឋអាមេរិក ដោយលោក ត្រាំ បានអះអាងថា រដ្ឋាភិបាលអ៊ីរ៉ង់មានការបែកបាក់គ្នា មិនអាចរកចំណុចឯកភាពគ្នាសម្រាប់លក្ខខណ្ឌនៃការចរចា។

លោក ដូណាល់ ត្រាំ ក៏បានអះអាងដែរថា កិច្ចការចរចាជាមួយអ៊ីរ៉ង់អាចចាប់ក្នុងរង្វង់៣៦ម៉ោង ឬ៧២ម៉ោង បន្ទាប់ពីលោកពន្យារពេលនៃបទឈប់បាញ់។

ចំណែកភាគីអ៊ីរ៉ង់ ប្រធានាធិបតីអ៊ីរ៉ង់ លោក Masoud Pezeshkhan បានច្រានចោលការអះអាងរបស់លោក ត្រាំ ដែលថា អ៊ីរ៉ង់មានការបែកបាក់ផ្ទៃក្នុង។ រហូតដល់ពេលនេះ អ៊ីរ៉ង់ហាក់បានច្រានចោលលទ្ធភាពចរចាជាមួយសហរដ្ឋអាមេរិក ដោយសារតែការលែងទុកចិត្តចំពោះការសម្រេចចិត្ត និង ល្បិចរបស់ ប្រធានាធិបតី ដូណាល់ ត្រាំ៕

រ៉ាន់ រើយ

The post អាមេរិកនិងអ៊ីរ៉ង់ ទំនងចាប់ផ្តើមចរចាជាថ្មីនៅចុងសប្តាហ៍នេះ appeared first on Kampuchea Thmey Daily.

IEA៖ ជម្លោះនៅអ៊ីរ៉ង់បង្កវិបត្តិថាមពលដ៏ធំបំផុតក្នុងប្រវត្តិសាស្រ្តពិភពលោក

Huon Dina — Tue, 21 Apr 2026 07:14:07 +0000

ប្រធានទីភ្នាក់ងារថាមពលអន្តរជាតិ (IEA) បានលើកឡើងនៅថ្ងៃអង្គារ (២១ មេសា) ថា ជម្លោះរវាងអ៊ីរ៉ង់ សហរដ្ឋអាមេរិក និងអ៊ីស្រាអែល បានធ្វើឱ្យមានវិបត្តិថាមពលដ៏អាក្រក់បំផុតដែលពិភពលោកធ្លាប់ជួបប្រទះក្នុងប្រវត្តិសាស្រ្ត។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោកប្រធាន Fatih Birol បានប្រាប់វិទ្យុ France Inter ក្នុងបទសម្ភាសន៍មួយ ដែលចាក់ផ្សាយនៅថ្ងៃអង្គារថា៖ «វាពិតជាវិបត្តិដ៏ធំបំផុតក្នុងប្រវត្តិសាស្ត្រ»។ លោកបានបន្ថែមយ៉ាងដូច្នេះថា៖ «វិបត្តិនេះគឺធ្ងន់ធ្ងរណាស់ ប្រសិនបើអ្នករាប់បញ្ចូលគ្នាពីផលប៉ះពាល់នៃវិបត្តិប្រេងសាំង និងវិបត្តិឧស្ម័នជាមួយរុស្ស៊ី»។

គួរគូសបញ្ជាក់ថា សង្គ្រាមនៅមជ្ឈិមបូព៌ាបានធ្វើឱ្យស្ទះចរាចរណ៍ច្រកសមុទ្រហ័រមូហ្ស ដែលជាផ្លូវទឹកដ៏សំខាន់សម្រាប់ដឹកជញ្ជូនប្រេង និងឧស្ម័នធម្មជាតិពង្រាវ ១/៥ នៃតម្រូវការពិភពលោក។ ការជាប់គាំងនេះ គឺជាការបន្ថែមបញ្ហាទៅលើផលប៉ះពាល់នៃសង្រ្គាមឈ្លានពានអ៊ុយក្រែនរបស់រុស្ស៊ី ដែលផ្ដាច់លំហូរផ្គត់ផ្គង់ឧស្ម័នពីរុស្ស៊ីទៅអឺរ៉ុប។

កាលពីដើមខែមេសានេះ លោក Birol បាននិយាយថា លោកមើលឃើញថាស្ថានភាពបច្ចុប្បន្ននៅក្នុងទីផ្សារថាមពលពិភពលោក គឺអាក្រក់ជាងវិបត្តិមុនៗក្នុងឆ្នាំ ១៩៧៣ ១៩៧៩ និង ២០២២ រួមបញ្ចូលគ្នាទៅទៀត។ កាលពីខែមីនា IEA បានយល់ព្រមបញ្ចេញប្រេងចំនួន ៤០០ លានបារ៉ែលពីស្តុកប្រេងយុទ្ធសាស្ត្រ ដើម្បីប្រយុទ្ធប្រឆាំងនឹងការកើនឡើងនៃតម្លៃប្រេងដែលបណ្តាលមកពីសង្គ្រាមអាមេរិក-អ៊ីស្រាអែលជាមួយអ៊ីរ៉ង់។

នៅថ្ងៃអង្គារនេះ តម្លៃប្រេងអន្តរជាតិម៉ាក Brent ត្រូវបានជួញដូរក្នុងតម្លៃ ៩៤ ដុល្លារ/បារ៉ែល យ៉ាងណាមិញ តម្លៃនេះតែងតែប្រែប្រួលខ្លាំងប្រចាំថ្ងៃ ដោយផ្អែកលើការវិវត្តនៃជម្លោះ។ កាលពីខែមីនា តម្លៃប្រេងនេះ បានហក់ឡើងប្រមាណជាង ៥០% ដែលជាការឡើងប្រចាំខែដ៏ខ្ពស់បំផុតក្នុងប្រវត្តិសាស្រ្ត៕

The post IEA៖ ជម្លោះនៅអ៊ីរ៉ង់បង្កវិបត្តិថាមពលដ៏ធំបំផុតក្នុងប្រវត្តិសាស្រ្តពិភពលោក appeared first on Kampuchea Thmey Daily.

ឧស្សាហកម្មប្រេងពិភពលោកខាត ៥០ ប៊ីលានដុល្លារ រាប់តាំងពីជម្លោះនៅអ៊ីរ៉ង់ផ្ទុះឡើង

Huon Dina — Sat, 18 Apr 2026 09:44:37 +0000

ឧស្សាហកម្មប្រេងពិភពលោក បានខាតបង់ប្រាក់ចំណូលប្រហែល ៥០ ប៊ីលានដុល្លារ ដោយសារតែការរាំងស្ទះផលិតកម្ម រាប់ចាប់តាំងពីជម្លោះអ៊ីរ៉ង់បានផ្ទុះឡើងជិត ៥០ ថ្ងៃមុន ដោយផលប៉ះពាល់រំពឹងថានឹងមានរយៈពេលច្រើនខែ ឬច្រើនឆ្នាំ។ នេះបើយោងតាមការគណនារបស់ក្រុមហ៊ុនទិន្នន័យអន្តរជាតិ Kpler និងទីភ្នាក់ងារសារព័ត៌មានរ៉យទ័រ។

សេចក្ដីរាយការណ៍ពីបញ្ហានេះ ធ្វើឡើងក្រោយពីអ៊ីរ៉ង់បានប្រកាសពីការបើកច្រកសមុទ្រហ័រមូហ្សសម្រាប់កប៉ាល់ពាណិជ្ជកម្ម ហើយប្រធានាធិបតីសហរដ្ឋអាមេរិក លោក ដូណាល់ ត្រាំ បានអះអាងថា អាមេរិក និងអ៊ីរ៉ង់នឹងសម្រេចបានកិច្ចព្រមព្រៀងសន្តិភាពទូលំទូលាយឆាប់ៗនេះ។

ក្នុងអត្ថបទចេញផ្សាយកាលពីថ្ងៃសុក្រ (១៧ មេសា) រ៉យទ័របានស្រង់ទិន្នន័យរបស់ Kpler ដែលបង្ហាញថា ចាប់តាំងពីចុងខែកុម្ភៈមក ប្រេងឆៅ និងឧស្ម័នជាង ៥០០ លានបារ៉ែល ត្រូវបានបាត់ចេញពីទីផ្សារពិភពលោក ដែលនេះ ជាការរំខានផ្នែកផ្គត់ផ្គង់ថាមពលដ៏ធំបំផុតមួយក្នុងប្រវត្តិសាស្រ្តសម័យទំនើប។

លោក Johannes Rauball មន្រ្តីវិភាគប្រេងឆៅជាន់ខ្ពស់នៅក្រុមហ៊ុន Kpler បាននិយាយថា ដោយតម្លៃប្រេងជាមធ្យមប្រហែល ១០០ ដុល្លារ/បារ៉ែល បរិមាណផលិតកម្មប្រេងដែលបាត់នោះ បើគិតជាប្រាក់ចំណូលទៅ គឺមានប្រហែល ៥០ ប៊ីលានដុល្លារ។ តួលេខនោះ គឺស្មើនឹងប្រហែល ១% នៃផលិតផលក្នុងស្រុកសរុប (GDPរបស់អាល្លឺម៉ង់ ឬក៏ ទិន្នផលប្រចាំឆ្នាំទាំងមូលរបស់សេដ្ឋកិច្ចតូចៗដូចជាឡាតវី ឬអេស្តូនី។

បើនិយាយមួយជ្រុងទៀត គឺថា ការបាត់ប្រេង និងឧស្ម័ន ៥០០ លានបារ៉ែល គឺស្មើនឹងតម្រូវការប្រេងសម្រាប់វិស័យអាកាសចរណ៍អន្តរជាតិរយៈពេល ១០ សប្ដាហ៍, ឬសម្រាប់តម្រូវការដឹកជញ្ជូនពិភពលោករយៈពេល ១១ ថ្ងៃ, ឬស្មើនឹងការប្រើប្រាស់ប្រេងពិភពលោករយៈពេល ៥ ថ្ងៃ។

ផ្អែកលើការប៉ាន់ស្មានមួយទៀតរបស់រ៉យទ័រ ប្រេង ៥០០ លានបារ៉ែល គឺស្មើនឹងជិតតម្រូវការប្រេងរយៈពេល ១ ខែ នៅសហរដ្ឋអាមេរិក ឬជាង ១ ខែនៅអឺរ៉ុប។ បរិមាណប្រេងដដែល អាចផ្គត់ផ្គង់ការដឹកជញ្ជូនតាមផ្លូវទឹកសកលរហូតដល់ទៅ ៤ ខែ។

ទិន្នន័យរបស់ Kpler បានបង្ហាញថា គិតតែក្នុងខែមីនា បណ្ដាប្រទេសនៅឈូងសមុទ្រពែរ្ស បានខកខានមិនបូមប្រេងប្រហែល ៨ លានបារ៉ែល/ថ្ងៃ ដែលបរិមាណនេះ គឺស្មើនឹងផលិតកម្មរបស់ក្រុមហ៊ុនយក្សអាមេរិក Exxon Mobil និង Chevron រួមបញ្ចូលគ្នា។

ការនាំចេញប្រេងឥន្ធនៈយន្តហោះពីប្រទេសអារ៉ាប៊ីសាអូឌីត កាតា អារ៉ាប់រួម គុយវ៉ែត បារ៉ែន និងអូម៉ង់បានធ្លាក់ចុះយ៉ាងខ្លាំង ពីប្រហែល ១៩,៦ លានបារ៉ែលក្នុងខែកុម្ភៈ មកត្រឹម ៤,១ លានបារ៉ែលក្នុងខែមីនា និងដើមខែមេសា៕

The post ឧស្សាហកម្មប្រេងពិភពលោកខាត ៥០ ប៊ីលានដុល្លារ រាប់តាំងពីជម្លោះនៅអ៊ីរ៉ង់ផ្ទុះឡើង appeared first on Kampuchea Thmey Daily.

តម្លៃប្រេងអន្តរជាតិធ្លាក់ចុះគំហុក មកត្រឹម ៩០ ដុល្លារ/បារ៉ែល ក្រោយអ៊ីរ៉ង់បើកច្រកហ័រមូហ្ស

Huon Dina — Sat, 18 Apr 2026 01:36:18 +0000

តម្លៃប្រេងអន្តរជាតិបានធ្លាក់ចុះជាគំហុកមកត្រឹមប្រហែល ៩០ ដុល្លារ/បារ៉ែល ពេលបិទការជួញដូរកាលពីថ្ងៃសុក្រ ដែលជាថ្ងៃបិទការជួញដូរប្រចាំសប្ដាហ៍ ក្រោយអ៊ីរ៉ង់បានប្រកាសបើកច្រកហ័រមូហ្សសម្រាប់កប៉ាល់ពាណិជ្ជកម្ម ហើយប្រធានាធិបតី ដូណាល់ ត្រាំ អះអាងថា អ៊ីរ៉ង់បានព្រមព្រៀងមិនបិទច្រកនេះទៀតឡើយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅម៉ាក Brent បានធ្លាក់ចុះ ៩,០១ ដុល្លារ ឬ ៩,០៧% មកនៅត្រឹម ៩០,៣៨ ដុល្លារ/បារ៉ែល ពេលបិទការជួញដូរ ហើយនៅចំណុចទាបបំផុតនាថ្ងៃសុក្រ តម្លៃនេះបានធ្លាក់ចុះខ្លាំងដល់ ៨៦,០៩ ដុល្លារ/បារ៉ែល។

ដោយឡែកតម្លៃប្រេងឆៅអាមេរិក ម៉ាក WTI ឯណោះវិញ បានធ្លាក់ចុះ ១០,៤៨ ដុល្លារ ឬ ១១,៤៥% មកនៅត្រឹម ៨៣,៨៥ ដុល្លារ/បារ៉ែល ពេលបិទការជួញដូរ បន្ទាប់ពីដាំក្បាលចុះដល់កម្រិតទាបបំផុត ៨០,៥៦ ដុល្លារ/បារ៉ែល។

វាគឺជាការធ្លាក់ចុះតម្លៃប្រចាំថ្ងៃដ៏ធំបំផុតរាប់តាំងពីថ្ងៃទី ៨ ខែមេសា ដោយអ្នកវិភាគទីផ្សារគូសភ្ជាប់ទៅនឹងភាពស្រាកស្រាន្តនៃជម្លោះរវាងអ៊ីស្រាអែល អាមេរិក និងអ៊ីរ៉ង់ ដែលបង្កការបិទច្រកហ័រមូហ្សនាពេលកន្លងមក។

មន្ត្រីជាន់ខ្ពស់អ៊ីរ៉ង់ម្នាក់បានប្រាប់រ៉យទ័រនៅថ្ងៃសុក្រថា កប៉ាល់ទាំងអស់អាចធ្វើដំណើរឆ្លងកាត់ច្រកសមុទ្រហ័រមូហ្សបាន ប៉ុន្តែត្រូវសម្របសម្រួលជាមួយកងឆ្មាំបដិវត្តន៍អ៊ីស្លាមអ៊ីរ៉ង់។

គិតត្រឹមថ្ងៃសៅរ៍ កប៉ាល់ប្រហែល ២០ គ្រឿង កំពុងធ្វើដំណើរពីឈូងសមុទ្រពែរ្សឆ្ពោះទៅច្រកសមុទ្រហ័រមូហ្ស។ នេះបើតាមរ៉យទ័រ ដែលស្រង់ព័ត៌មានពីក្រុមហ៊ុនតាមដានទិន្នន័យនាវាចរណ៍អន្តរជាតិ។

មានសេចក្ដីរាយការណ៍ថា សហរដ្ឋអាមេរិក និងអ៊ីរ៉ង់ ទទួលបានវឌ្ឍនភាពក្នុងការចរចាលើអនុស្សរណៈយោគយល់គ្នាចំនួន ៣ ទំព័រ ដើម្បីបញ្ចប់សង្គ្រាម។ ទោះបីជាយ៉ាងណាក៏ដោយ ពាក់ព័ន្ធនឹងការវិវត្តចុងក្រោយផងដែរនោះ មន្រ្តីអ៊ីរ៉ង់នៅតែបញ្ជាក់ថា ច្រកសមុទ្រហ័រមូហ្ស នឹងបន្តបើកតែក្នុងអំឡុងបទឈប់បាញ់រយៈពេល២សប្តាហ៍ និងក្រោមលក្ខខណ្ឌជាក់លាក់ប៉ុណ្ណោះ ហើយមិនបើកឡើយសម្រាប់កប៉ាល់ទាំងឡាយណាដែលជាប់ពាក់ព័ន្ធនឹងកងកម្លាំងអមិត្តឡើយ ខណៈលោក ត្រាំ បានបញ្ជាក់ថា ការបិទខ្ទប់របស់អាមេរិកនៅតែបន្តជាធរមាន។

ទោះបីជាមានសុទិដ្ឋិនិយមលើដំណើរឆ្ពោះទៅរកកិច្ចព្រមព្រៀងសន្ដិភាព ដូចការអះអាងរបស់លោក ត្រាំ ក្ដី អ្នកវិភាគទីផ្សារនៅតែមើលឃើញពីអស្ថិរភាពសម្រាប់តម្លៃប្រេងអន្តរជាតិ ដោយថា វានឹងផ្អែកលើការវិវត្តប្រចាំថ្ងៃបន្ថែមទៀត។ អ្នកខ្លះព្រួយបារម្ភថា ស្ថានភាពស្រាកស្រាន្តបច្ចុប្បន្ន មានទម្រង់ជាបណ្ដោះអាសន្ន ដោយដំណោះស្រាយរយៈពេលវែងស្ថិតនៅក្នុងភាពមិនប្រាកដប្រជា ដែលបង្ហាញថា ហានិភ័យសម្រាប់ការផ្គត់ផ្គង់ប្រេងនៅតែខ្ពស់ ទោះបីជាតម្លៃប្រេងធ្លាក់ចុះកាលពីថ្ងៃសុក្រក្ដី៕

The post តម្លៃប្រេងអន្តរជាតិធ្លាក់ចុះគំហុក មកត្រឹម ៩០ ដុល្លារ/បារ៉ែល ក្រោយអ៊ីរ៉ង់បើកច្រកហ័រមូហ្ស appeared first on Kampuchea Thmey Daily.

World Bank ៖ សង្រ្គាមនៅមជ្ឈិមបូព៌ាប៉ះពាល់ដល់ការងារយ៉ាងធ្ងន់ធ្ងរ ទៅ១០-១៥ឆ្នាំខាងមុខ

Minea Neu — Mon, 13 Apr 2026 13:24:12 +0000

សង្គ្រាមមជ្ឈិមបូព៌ានឹងត្រូវលើកយកមកពិភាក្សានៅសប្តាហ៍នេះក្នុងទីក្រុងវ៉ាស៊ីនតោនជាមួយមន្ត្រីហិរញ្ញវត្ថុពិភពលោក ខណៈ លោក Ajay Banga ប្រធានធនាគារពិភពលោក (World Bank) កំពុងប្រកាសអាសន្នពីវិបត្តិដ៏ធំមួយដែលកំពុងកើតឡើង។ នោះគឹជាគម្លាតដ៏ធំនៃការងារសម្រាប់មនុស្ស ១,២ ពាន់លាននាក់ ដែលនឹងឈានទៅដល់អាយុធ្វើការរបស់ពួកគេ ក្នុងបណ្តាប្រទេសកំពុងអភិវឌ្ឍន៍រយៈពេល ១០ ទៅ១៥ឆ្នាំខាងមុខ។

លោក Ajay Banga ប្រធានធនាគារពិភពលោក។ រូបភាព៖ Reuters

លោក Banga ប្រាប់ភ្នាក់ងារសារព័ត៌មានរ៉យទ័រនៅថ្ងៃទី១៣ ខែមេសា ឆ្នាំ២០២៦ ថា នៅក្នុងគន្លងបច្ចុប្បន្ន សេដ្ឋកិច្ចទាំងនោះនឹងបង្កើតការងារត្រឹមតែជាង ៤០០លានកន្លែងប៉ុណ្ណោះ ដោយបន្សល់ទុកឱនភាពការងារចំនួន ៨០០លានកន្លែងផ្សេងទៀត។

ប្រធានធនាគាររូបនេះ ទទួលស្គាល់ថា៖ « ការផ្តោតលើមនុស្សក្នុងរយៈពេលវែងគឺជារឿងដ៏គួរឱ្យព្រួយបារម្ភ ដោយសារតែមានផលប៉ះពាល់រយៈពេលខ្លីជាបន្តបន្ទាប់ បន្តវាយប្រហារសេដ្ឋកិច្ចពិភពលោកចាប់តាំងពីជំងឺរាតត្បាត COVID-១៩ និងថ្មីៗនេះគឺសង្គ្រាមនៅមជ្ឈិមបូព៌ា»។

លោកប្តេជ្ញាថា មន្ត្រីហិរញ្ញវត្ថុនៅតែផ្តោតលើបញ្ហាប្រឈមរយៈពេលវែងទាំងនោះ ដូចជាការបង្កើតការងារ ការតភ្ជាប់បណ្តាញអគ្គិសនីទៅឱ្យមនុស្សប្រើប្រាស់ និងធានាថាពួកគេទទួលបានទឹកស្អាតប្រើ។

លោក Banga លើកឡើងក្នុងបទសម្ភាសន៍មួយកាលពីថ្ងៃសុក្រថា៖ « យើងត្រូវដើរនិងទំពារស្ករកៅស៊ូក្នុងពេលតែមួយ។ វដ្តល្បឿនខ្លីគឺជាអ្វីដែលយើងកំពុងឆ្លងកាត់។ ល្បឿនវែងជាងនេះ គឺស្ថានភាពការងារ ឬទឹកស្អាត»៕

ប្រែសម្រួល៖ ណឺ មិនា

The post World Bank ៖ សង្រ្គាមនៅមជ្ឈិមបូព៌ាប៉ះពាល់ដល់ការងារយ៉ាងធ្ងន់ធ្ងរ ទៅ១០-១៥ឆ្នាំខាងមុខ appeared first on Kampuchea Thmey Daily.

អ៊ីរ៉ង់គ្រោងគិតថ្លៃឆ្លងកាត់ច្រកហ័រមូហ្សដោយប្រើ ប្រាក់រៀលរបស់ខ្លួន

Huon Dina — Sat, 11 Apr 2026 07:03:02 +0000

ប្រធានគណៈកម្មការសន្តិសុខជាតិនៃសភាអ៊ីរ៉ង់និយាយថា ក្រោមសំណើរបស់សភា អ៊ីរ៉ង់នឹងគិតថ្លៃឆ្លងកាត់ច្រកហ័រមូហ្សជាប្រាក់រៀល (Rial) ដែលជារូបិយប័ណ្ណជាតិរបស់អ៊ីរ៉ង់។

បណ្ដាញព័ត៌មាន Al Jazeera បានចុះផ្សាយយ៉ាងដូច្នេះកាលពីថ្ងៃសុក្រ (១០ មេសា) ដោយស្រង់ព័ត៌មានពីការបង្ហោះនៅលើបណ្ដាញសង្គម X របស់ស្ថានកុងស៊ុលអ៊ីរ៉ង់ប្រចាំទីក្រុងមុំបៃ(ឥណ្ឌា)កាលពីថ្ងៃសុក្រ។

កន្លងមក មានសេចក្ដីរាយការណ៍ អ៊ីរ៉ង់បានយកថ្លៃឆ្លងកាត់ច្រកសមុទ្រហ័រមូហ្សដែលខ្លួនបានបិទក្រោយការវាយប្រហាររបស់អ៊ីស្រាអែល និងសហរដ្ឋអាមេរិកប្រមាណ ២ លានដុល្លារ ក្នុងនាវាមួយគ្រឿង ហើយសភាអ៊ីរ៉ង់កំពុងរៀបចំអនុម័តច្បាប់ស្ដីពីការកំណត់យកប្រាក់នេះ។

ជាផ្នែកមួយនៃសំណើបញ្ចប់សង្រ្គាមទាំង ១០ ចំណុចទៅកាន់សហរដ្ឋអាមេរិក អ៊ីរ៉ង់ទាមទារការគ្រប់គ្រងច្រកហ័រមូហ្ស ដោយរួមបញ្ចូលទាំងការគិតថ្លៃឆ្លងកាត់ច្រកនេះ ដើម្បីយកប្រាក់ទៅស្ដារផលប៉ះពាល់នៃសង្រ្គាម។ អាមេរិក និងអ៊ីរ៉ង់កំពុងចរចាគ្នានៅប្រទេសប៉ាគីស្ថាននៅចុងសប្ដាហ៍នេះ ក្រោយកិច្ចព្រមព្រៀងបទឈប់បាញ់រយៈពេល ២ សប្ដាហ៍រវាងភាគីទាំង២ ចូលជាធរមានកាលពីដើមសប្ដាហ៍៕

The post អ៊ីរ៉ង់គ្រោងគិតថ្លៃឆ្លងកាត់ច្រកហ័រមូហ្សដោយប្រើ ប្រាក់រៀលរបស់ខ្លួន appeared first on Kampuchea Thmey Daily.

តម្លៃប្រេងអន្តរជាតិកើនទៅជិត ១០០ ដុល្លារ/បារ៉ែល ជាថ្មី ដោយភាពផុយស្រួយនៃបទឈប់បាញ់អាមេរិក-អ៊ីរ៉ង់

Huon Dina — Thu, 09 Apr 2026 09:08:24 +0000

តម្លៃប្រេងអន្តរជាតិបានកើនឡើងទៅក្បែរ ១០០ ដុល្លារ/បារ៉ែលជាថ្មី ក្នុងការជួញដូរនៅថ្ងៃព្រហស្បតិ៍ (៩ មេសា) នេះ ដោយសារតែកង្វល់ពាក់ព័ន្ធនឹងភាពផុយស្រួយនៃបទឈប់បាញ់ ២ សប្ដាហ៍រវាងសហរដ្ឋអាមេរិក និងអ៊ីរ៉ង់ ដែលបង្កើនក្ដីបារម្ភថា លំហូរថាមពលកាត់តាមច្រកហ័រមូហ្សនឹងនៅតែជាប់គាំង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅម៉ាក Brent បានកើនឡើង ៣,៦៩ ដុល្លារ ឬ ៣,៩% ដល់ ៩៨,៤៤ ដុល្លារ/បារ៉ែល គិតត្រឹមម៉ោងជិត ៥ ល្ងាចនៅសិង្ហបុរី ខណៈតម្លៃប្រេងអាមេរិក West Texas Intermediate (WTI) បានកើនឡើង ៣,៤៧ ដុល្លារ ឬ ៣,៧% ដល់ ៩៧,៨៨ ដុល្លារ/បារ៉ែល។

តម្លៃប្រេងទាំង២ធ្លាក់ចុះក្រោយ ១០០ ដុល្លារ/បារ៉ែល ពេលបិទការជួញដូរកាលពីថ្ងៃពុធ ដោយសារតែភាពស្រាកស្រាន្តនៃជម្លោះ ក្រោយប្រធានាធិបតិអាមេរិក លោក ដូណាល់ ត្រាំ បានប្រកាសបទឈប់បាញ់ជាមួយអ៊ីរ៉ង់ ដែលយល់ព្រមបើកច្រកហ័រមូហ្សឡើងវិញ នៅពេលការវាយប្រហារលើខ្លួនត្រូវបានបញ្ឈប់។

យ៉ាងណាមិញ អ្នកវិភាគបានលើកឡើងពីភាពផុយស្រួយនៃបទឈប់បាញ់នោះ ទោះបីជាប្រទេសទាំង២សន្យាជួបចរចាគ្នា ក្រោយពេលដែលអ៊ីស្រាអែលបើកការវាយប្រហារលើប្រទេសលីបង់ ដោយសម្លាប់មនុស្ស ២៥៤ នាក់ ភាគច្រើនជាជនស៊ីវិល ដែលធ្វើឱ្យអ៊ីរ៉ង់លើកឡើងថា «វាមិនសមហេតុផល» ក្នុងការបន្តការចរចាលើកិច្ចព្រមព្រៀងសន្តិភាពអចិន្ត្រៃយ៍។

អ្នកវិភាគយល់ថា ភាពផុយស្រួយ និងភាពស្រពេចស្រពិលនៃបទឈប់បាញ់ នៅតែបង្កក្ដីបារម្ភពីការផ្គត់ផ្កង់ប្រេងពីមជ្ឈិមបូព៌ា ដែលនោះហើយជាហេតុធ្វើឱ្យតម្លៃប្រេងកើនឡើង៕

The post តម្លៃប្រេងអន្តរជាតិកើនទៅជិត ១០០ ដុល្លារ/បារ៉ែល ជាថ្មី ដោយភាពផុយស្រួយនៃបទឈប់បាញ់អាមេរិក-អ៊ីរ៉ង់ appeared first on Kampuchea Thmey Daily.

ជម្លោះ​មជ្ឈិមបូព៌ា Archives - Kampuchea Thmey Daily

សម្តេច​ ប៉ាប លីអូ ព្រមាន​អំពី​​«​ព្យុះ​សង្គ្រាម»​ បោក​បក់​សារ​ជាថ្មីនៅមជ្ឈិមបូព៌ា រួមទាំង អ៊ុយក្រែន

​​អាមេរិកនិង​អ៊ីរ៉ង់​ ទំនង​ចាប់​ផ្តើម​ចរចាជាថ្មី​នៅចុង​សប្តាហ៍នេះ​​