ជីវិតគ្រួសារ Archives - Kampuchea Thmey Daily

ម្តាយក្មេក កូនប្រសាស្រី មិនត្រូវរ៉ូវគ្នា អាចមកពីរឿងទាំងនេះ

Sonya — Fri, 15 Oct 2021 09:35:04 +0000

ទំនាក់ទំនងម្ដាយក្មេក និងកូនប្រសាស្រី ជារឿងស្មុគស្មាញមួយ ដោយមានគ្រួសារខ្លះក៏ត្រូវរ៉ូវ ផ្អែមល្ហែមនឹងគ្នា និងគ្រួសារខ្លះវិញ ហាក់ខ្វែងគំនិត មិនសូវចុះសម្រុងសោះ។

បញ្ហាដែលចម្រូងចម្រាស់ក្នុងគ្រួសាររវាងម្ដាយក្មេក និងកូនប្រសាស្រី អាចបណ្ដាលមកពីកត្តាច្រើនយ៉ាង ជាពិសេសចរិត និងរបៀបទំនាក់ទំនងរបស់អ្នកទាំងពីរតែម្ដង។ ក្នុងនោះរួមមាន៖

១. មិនរាក់ទាក់ដាក់គ្នា

ដើម្បីឱ្យបានស្គាល់ពីចិត្តម្តាយក្មេក កូនប្រសាត្រូវចំណាយពេលវេលាបន្តិច ជាពិសេសប្រសិនបើទើបតែរៀបការថ្មីថ្មោង។ កូនប្រសាស្រីភាគច្រើនចង់បានការស្វាគមន៍យ៉ាងកក់ក្តៅពីម្តាយក្មេកពេលខ្លួនឈានជើងចូលគ្រួសារប្ដី ឯម្ដាយក្មេកក៏ដូចគ្នា គាត់ត្រូវការភាពរាក់ទាក់ពីភរិយាកូនប្រុសគាត់ដែរ។ ផ្ទុយទៅវិញ បើមនុស្សចាស់ប្រកាន់ខ្លួន ឯអ្នកវ័យក្មេងក៏ប្រកាន់ឬក អ្នកទាំងពីរច្បាស់តែពាក់មុខយក្សដាក់គ្នាមិនខាន។

២. យល់តែចិត្តរៀងខ្លួន

មូលហេតុមួយសំខាន់មួយទៀតដែលធ្វើឱ្យម្ដាយក្មេក និងកូនប្រសាមើលមុខគ្នាមិនចំ ក៏ព្រោះតែមនុស្សចាស់មិនទទួលស្គាល់រាល់ការសម្រេចចិត្តរបស់នាង ឯនាងជាកូនក៏មិនយល់ចិត្តម្ដាយថាត្រូវការអ្វី។ បញ្ហានេះធ្វើឱ្យកើតមានជម្លោះរវាងកូនប្រសានិងម្តាយក្មេក ជាញឹកញាប់ ជាពិសេសរឿងទុកដាក់ចង្រ្កានជើងឆ្នាំង។ ម្ដាយចង់សម្លកកូរ កូនស្រីចង់សម្លម្ជូរ ម្នាក់ៗមានៈរៀងខ្លួន ចង់ឈ្នះដូចគូសត្រូវ ទើបបានជាទំនាក់ទំនងកាន់តែមិនល្អរវាងអ្នកទាំងពីរ។

៣. ចូលចិត្តប្រៀបធៀប

ស្ត្រីជាម្ដាយខ្លះ តែងលើកសរសើរកូនប្រសាអ្នកផ្សេងនៅនឹងមុខប្រពន្ធរបស់កូនថាអ៊ីចេះ អ៊ីចុះ រួចតាំងប្រៀបប្រដូចកូនប្រសាខ្លួនឯងខ្វះនេះ ឬខ្វះនោះជាដើម។ ទម្លាប់របស់គាត់ នាំឱ្យនាងអាក់អន់ចិត្ត និងចេះតែមិនចង់និយាយរកម្ដាយក្មេក។ ចំណែកកូនប្រសាស្រីមួយចំនួន ក៏មិនណយដែរ ចូលចិត្តប្រៀបធៀបម្ដាយក្មេកខ្លួនទៅនឹងអ្នកផ្សេងប្រាប់មិត្តភក្ដិឬស្វាមី ថាម្ដាយគេផ្ដល់នេះ ផ្ដល់នោះ រីឯម្ដាយប្ដីខ្លួនឯងវិញ ស្អីគ៏គ្មានឱ្យ។ល។ ទង្វើទាំងនេះហើយ សុទ្ធសឹងនាំអ្នកដែលជាម្ដាយមិនសប្បាយចិត្ត ហើយអាចកើតចិត្តខឹងគុំគួនទៀតផង។

បញ្ហានឹងរីកធំឡើង នៅពេលបុរសជាកូនប្រុស និងជាឧត្តមស្វាមី ឃើញភាពមិនចុះសម្រុងរវាងម្ដាយ និងប្រពន្ធ បែរជាមិនជួយដោះស្រាយ ហើយសុខចិត្តបណ្ដោយឱ្យរឿងកាន់តែស្មុគស្មាញ។ រឿងហេតុនឹងកាន់តែមិនល្អ ប្រសិនបើគេល្អៀងទៅម្ខាងណាជាង។ ម្ដាយស្រឡាញ់កូនប្រុសជាទីបំផុត ឯភរិយាក៏ស្រឡាញ់ស្វាមីអស់ពីបេះដូងដែរ ដូច្នេះបើសិនមនុស្សប្រុសម្នាក់នេះបង្ហាញក្ដីស្រឡាញ់មិនស្មើគ្នា ឱ្យអ្នកទាំងពីរឃើញ ពួកគេអាចច្រណែនគ្នាទៅវិញទៅមក។ អ៊ីចឹងហើយ ដើម្បីបន្ថយបញ្ហាក្នុងគ្រួសារ បុរសត្រូវឈរជាកណ្ដាល និងព្យាយាមផ្សះផ្សារ ទើបជាការប្រសើរ៕

ប្រែសម្រួល៖ សន្យា

ចុចអាន៖ រូបមន្តឈ្នះចិត្តម្ដាយក្មេក ឱ្យស្រឡាញ់អ្នកដូចកូនបង្កើត

ចុចអាន៖ បានម្តាយក្មេកដែលមាន៥ ចំណុចនេះកូនប្រសាជាមនុស្សមានសំណាងបំផុត

The post ម្តាយក្មេក កូនប្រសាស្រី មិនត្រូវរ៉ូវគ្នា អាចមកពីរឿងទាំងនេះ appeared first on Kampuchea Thmey Daily.

ចំណុចតូចៗ តែបង្កបរិយាកាសរីករាយដល់ខ្លួនឯង និងសុភមង្គលគ្រួសារ

Sonya — Fri, 27 Aug 2021 00:49:00 +0000

គ្រួសារជាចំណែកមួយមិនអាចខ្វះបាន សម្រាប់មនុស្សគ្រប់គ្នា ដែលជាសហគមន៍មួយ ជួយទ្រទ្រង់គ្នាទៅវិញទៅមក ដោយភាពកក់ក្តៅ និងជិតស្និទ្ធ។ ជាមួយគ្នានេះ ការចេះបង្កើតបរិយាកាសរីករាយ និងអានុស្សាវរីយ៍ល្អៗ នៅក្នុងគ្រួសារជារឿងមួយ ដែលស្ថិតក្នុងបំណងប្រាថ្នាគ្រប់គ្នាផងដែរ។ តាមរយៈសកម្មភាពសាមញ្ញៗមួយចំនួន អាចរួមចំណែកបង្កើតបរិយាកាសរីករាយ និងសម្ព័ន្ធភាពគ្រួសារឱ្យរឹងមាំបានដូចជា៖

១. ចម្អិនម្ហូបញ៉ាំរួមគ្នា

ប្រាកដណាស់ចម្អិនអាហាររួមគ្នា នឹងបង្កើតពេលវេលា បូករួមទាំងអានុស្សាវរីយ៍ចងចាំជាមួយគ្នាច្រើន តាំងពីការចំណាយពេលទៅទិញម្ហូប និងរៀបចំចម្អិន។ លើសពីនោះ ការរៀបចំចម្អិនម្ហូបអាហារដើម្បីញ៉ាំជុំគ្នា នឹងបង្កើនការយកចិត្តទុកដាក់លើគុណភាពអាហារសម្រាប់សមាជិកគ្រួសារទាំងអស់ ដែលគ្រប់គ្នាបានទាំងសុខភាពល្អ និងទទួលបានអារម្មណ៍កក់ក្តៅដោយការយកចិត្តទុកដាក់ និងរីករាយ។

២. រៀបចំដំណើរកម្សាន្តរួមគ្នា

ការរៀបចំទៅធ្វើដំណើរកម្សាន្តរួមគ្នា ជាមួយសមាជិកគ្រួសារ ជួយបង្កើនសាមគ្គីភាពក្នុងគ្រួសារ ដោយការចូលរួមរបស់សមាជិកគ្រួសារ រាប់ទាំងក្មេងៗផង ប្រាប់អំពីទីដៅដើរលេងដែលត្រូវទៅ។ មិនតែប៉ុណ្ណោះ ដំណើរកម្សាន្តលក្ខណៈគ្រួសារ មិនត្រឹមបង្កើតតែបទពិសោធរីករាយដល់សមាជិកគ្រួសារប៉ុណ្ណោះទេ ប៉ុន្តែនឹងផ្តល់ឱ្យសមាជិកចេះឱ្យតម្លៃលើ ការយោគយល់ និងឯកភាពគ្នា ក្នុងការសម្រេចចិត្តរួមគ្នា។

៣. គោរពពេលវេលាឯកជនគ្នាទៅវិញទៅមក

ការគោរពពេលវេលាឯកជនរបស់សមាជិកគ្រួសារ គឺជាគុណតម្លៃមួយ ដែលចូលរួមចំណែកបង្កើតការគោរពគ្នា និងការឱ្យតម្លៃគ្រប់សមាជិក ធ្វើឱ្យសម្ព័ន្ធភាពគ្រួសាររឹងមាំ។ ពេលវេលាឯកជនសំដៅលើ ពេលដែលសមាជិកណាម្នាក់ ត្រូវការពេលគិតពិចារណារ ដោះស្រាយបញ្ហា ឬសម្រួលអារម្មណ៍នៅពេលពិបាកចិត្ត ឬខឹងជាដើម។

៤. មានពេលស្តាប់សមាជិកគ្រួសារ

ស្តាប់ដោយយកចិត្តទុកដាក់ជាឥរិយាបថល្អមួយជួយឱ្យសមាជិកគ្រួសារមានភាពជិតស្និទ្ធ និងទទួលបានអារម្មណ៍កក់ក្តៅ សម្រាប់ដោះស្រាយបញ្ហាផ្សេងៗ។ ពិសេសការស្តាប់ដោយយកចិត្តទុកដាក់ ជួយឱ្យសមាជិកគ្រួសារឆាប់យល់ពីបំណងគ្នា ទៅវិញទៅមក ដែលផ្លូវជួយឱ្យគ្រួសារមានសុភមង្គល។

៥. ជួយបង្កើតទម្លាប់សុខភាពឱ្យគ្នាទៅវិញទៅមក

អារម្មណ៍ជិតស្និទ្ធ និងកក់ក្តៅនឹងកើតមានឡើងច្រើន នៅពេលសមាជិកគ្រួសារជួយរំលឹកពីសកម្មភាពជាទម្លាប់ល្អសម្រាប់សុខភាព។ មិនថា ការរំឭកក្មេងៗឱ្យដុសធ្មេញមុនចូលគេង ការជូនចាស់ៗទៅពិនិត្យសុខភាព ជាកាយវិការយកចិត្តទុកដាក់ក្នុងគ្រួសារ ដែលបង្កើតការចងចាំល្អៗ និងសុភមង្គលមិនអាចបំភ្លេចបាន ទៅដល់គ្រប់សមាជិកគ្រួសារ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ តិចនិកលើកទឹកចិត្តខ្លួនឯង ធ្វើម៉េចឲ្យមានសុខភាពល្អ

ចុចអាន៖ វិធីសាមញ្ញៗនេះ អាចជួយយើងគេចពីស្រ្តេស និងមានភាពស្រស់ថ្លាឡើងវិញ

The post ចំណុចតូចៗ តែបង្កបរិយាកាសរីករាយដល់ខ្លួនឯង និងសុភមង្គលគ្រួសារ appeared first on Kampuchea Thmey Daily.

មុនសម្រេចចិត្តរៀបការ ផែនការ ៣ចំណុចនេះ ត្រូវគិតគូរទុកឱ្យហើយ

Sonya — Tue, 20 Jul 2021 07:41:02 +0000

ជឿទៅ បន្ទាប់ពីរៀបការ គូជីវិតណាក៏មានបញ្ហារបស់គេរៀងខ្លួន ហើយពិតជាគ្មានទាល់តែសោះដែលថារៀបការរួច មិនឈ្លោះគ្នា។ ទោះយ៉ាងណា បញ្ហានឹងត្រូវកាត់បន្ថយ ប្រសិនបើអ្នកទាំងពីរ ចេះគិតគូរ រៀបចំ ទុកជាមុន មុនពេលឈានដល់ចំណងអាពាហ៍អាពាហ៍។

១. បញ្ហាសុខភាព

សុខភាពជារឿងចម្បងដែលត្រូវគិតគូរ ជាងអ្វីទាំងអស់។ អ្នកមិនអាចរៀបការរួច មកអង្គុយមើលជំងឺឱ្យគ្នានោះទេ។ ក្រោយពីកសាងគ្រួសារ ប្ដីប្រពន្ធត្រូវខំធ្វើការ រកស៊ី ដើម្បីមានទ្រព្យជាប់ខ្លួនខ្លះ ចុះបើម្ខាងៗឈឺមិនឈប់ មានពេលឯណារកលុយកាក់ចូលផ្ទះ។

ការថែទាំសុខភាពខ្លួនឯងឱ្យល្អ មាំទាំ ទាំងមុននិងក្រោយពេលរៀបអាពាហ៍ពិពាហ៍ ពិតជារឿងត្រូវយកចិត្តទុកដាក់ជាទីបំផុត ពុំនោះទេ គ្រួសារអ្នកមុខតែជួបជីវភាពយ៉ាប់យ៉ឺន។

២. បញ្ហាហិរញ្ញវត្ថុ

បន្ទាប់ពីសុខភាព គឺរឿងលុយ។ លុយមិនអាចទិញសុភមង្គលនោះទេ តែយើងនឹងបាត់បង់សុភមង្គលបើគ្មានលុយ។ ទាន់នៅខ្លួនមួយ មិនទាន់ត្រូវចំណាយច្រើន គួររៀនសន្សំខ្លះ ដើម្បីទុកផ្គត់ផ្គង់ថ្ងៃពិសេស និងក្រោយពេលនោះ។ គ្មានលុយ អ្នកមិនអាចធ្វើអ្វីបានទេបូករួមទាំងអាហារ ថ្លៃទឹកភ្លើង និងពេលឈឺថ្កាត់។ មុនចាប់ដៃគ្នា គួរពិភាក្សាគ្នាជាមុនអំពីរឿងហិរញ្ញវត្ថុនេះឱ្យច្បាស់ បើមានបំណុលគួរសងឱ្យអស់សិន ជាពិសេសបើមានលុយតិច ត្រូវប្រឹងរក ប្រឹងសន្សំ។

៣. បញ្ហាកូនចៅ

មុនចាប់ដៃគ្នាជាគូជីវិត គួរនិយាយគ្នាឱ្យហើយ អំពីការយកកូន។ ប្ដីប្រពន្ធខ្លះឈ្លោះគ្នា ព្រោះតែបញ្ហាកូន ដោយមានម្ខាងចង់បាន ម្ខាងទៀតមិនទាន់ចង់បាន។ ហេតុនេះ ដើម្បីបញ្ចៀសបញ្ហា ដាច់ខាតត្រូវជជែកគ្នាឱ្យដាច់ស្រេចថា គួរយកកូនពេលណា? យកប៉ុន្មាន? ចិញ្ចឹមពួកគេរបៀបណា?។ល។ បើអ្នកគិតថា ចាំការហើយ ចាំនិយាយ ដល់ពេលនោះអ្នកអាចឈ្លោះគ្នាបែកផ្សែងផងក៏មិនដឹង។

ផែនការគ្រួសារ មិនមែនទាល់តែរៀបការរួច ទើបរៀបចំទេ។ បើមានគម្រោងទុកជាមុន នោះបញ្ហាជម្លោះក្រោយអាពាហ៍ពិពាហ៍នឹងធ្លាក់មកតិចបំផុត៕

ប្រែសម្រួល៖ សន្យា

ប្រភព៖ Lifehack

ចុចអាន៖ សងបំណុលមុនរៀបការ ពាក់ព័ន្ធអ្វីនឹងជីវិតគូ?

ចុចអាន៖ ៣ឃ្លា ចេញពីមាត់ប្ដី ធ្វើឲ្យប្រពន្ធពោះធំបាក់ទឹកចិត្ត

The post មុនសម្រេចចិត្តរៀបការ ផែនការ ៣ចំណុចនេះ ត្រូវគិតគូរទុកឱ្យហើយ appeared first on Kampuchea Thmey Daily.

បង្កើនសុភមង្គលគ្រួសារ នៅពេលមានដំណើរកម្សាន្តជាមួយគ្នា

Sonya — Sat, 30 Jan 2021 04:04:00 +0000

គន្លឹះមួយក្នុងការធ្វើឱ្យជីវិតគូនិងគ្រួសារមានសុភមង្គល គឺការរស់នៅឲ្យមានអត្ថន័យបំផុតតាមរយៈសកម្មភាពប្រចាំថ្ងៃ។ ក្នុងនោះ ដំណើរកម្សាន្តជាសកម្មភាពមួយដែលមិនអាចខ្វះបាននោះទេ សម្រាប់គ្រួសារទូទៅ។

ហេតុនេះ ទាន់នៅមានពេល គួរដើរលេងនិងសាងពេលវេលាល្អៗជាមួយគ្នាឱ្យបានច្រើន។ ខាងក្រោមនេះជាហេតុផលទាំង ៧ ដែលគួរមានដំណើរកម្សាន្តជាមួយគ្រួសារ៖

១. បង្កើតអនុស្សាវរីយ៍ល្អៗជាមួយគ្នា

ការធ្វើដំណើរកម្សាន្តជាមួយសមាជិកគ្រួសារ តែងតែបង្កើតឱ្យមានអនុស្សាវរីយ៍ទៅថ្ងៃក្រោយ ទោះបីពេលខ្លះជាអនុស្សាមិនសូវល្អ ប៉ុន្តែវានឹងធ្វើឲ្យចងចាំគ្នា។ មិនចាំបាច់ទាល់តែធ្វើដំណើរទៅបរទេស ទើបហៅថា ជាដំណើរកម្សាន្តនោះទេ ត្រឹមតែដើរលេងក្នុងស្រុកក៏គ្រប់គ្រាន់បាត់ទៅហើយ។

២. រឹតចំណងគ្រួសារកាន់តែល្អ

ដំណើរកម្សាន្តជាមួយក្រុមគ្រួសារ អាចបង្កើនភាពស្និតស្នាល និងទំនាក់ទំនងកាន់តែស្អិតរមួតជាមួយចំណងចិត្តរឹងមាំរវាងគ្នានិងគ្នា។

៣. បង្កើតភាពសប្បាយរីករាយ

ការដើរលេងពិតជាអាចជួយឲ្យអារម្មណ៍ស្រស់ស្រាយ និងអាចកាត់បន្ថយភាពតានតឹងបានច្រើនបំផុត។ មិនត្រឹមតែប៉ុណ្ណោះ តាមការសិក្សាប្រាប់ថា ប្រសិនបើមនុស្សអាចសប្បាយចិត្តពេលខ្លួននៅវ័យក្មេង ពួកគេនឹងនៅតែសប្បាយរីករាយនៅ ២០ ឆ្នាំក្រោយជាមួយការចងចាំពីដំណើរកាលពីពេលនៅក្មេង ហើយការចងចាំនោះនឹងដិតដាមជាបទពិសោធន៍ពេញមួយជីវិតរបស់ពួកគេ។

៤. យល់ដឹងបន្ថែមពីការរស់នៅបែបថ្មីៗ

កាលណាមានដំណើរកម្សាន្តជាមួយគ្រួសារ នោះឱកាសបានឃើញនិងស្គាល់នូវវប្បធម៌ថ្មីៗ ការគិតបែបថ្មី ផ្នត់គំនិតថ្មី ការរស់នៅសម័យថ្មី ដែលវាពិតជាមានឥទ្ធិពលខ្លាំងណាស់នៅក្នុងការផ្លាស់ប្តូរការយល់ដឹងរបស់សមាជិកម្នាក់ៗ។ ពិសេសគ្រប់គ្នាអាចមើលឃើញតម្រូវការផ្សេងទៀតនៅជុំវិញពិភពលោក ហើយវាពិតជាមានសារៈសំខាន់ណាស់សម្រាប់ក្មេងៗ។

៥. បង្កើតការទទួលខុសត្រូវចំពោះសមាជិក

ការនាំគ្នាដើលេងនៅខាងក្រៅជួយធ្វើឱ្យសមាជិកគ្រួសារ ជាពិសេសកូនៗអាចចាកចេញពីទម្លាប់ធម្មតាដដែលៗ និងផ្តល់នូវឱកាសថ្មីៗដើម្បីទម្លាប់និងបណ្តុះភាពទទួលខុសរបស់កូនៗពេលគេធំឡើងរួមមាន រៀបវ៉ាលី យកឥវ៉ាន់ទុកដាក់ និងត្រៀមអាហារជាដើម។

៦. បង្វែរអារម្មណ៍ពីការញៀនបច្ចេកវិទ្យា

មិនថាមនុស្សចាស់ ឬក្មេងៗទេ គ្រប់គ្នានឹងមិនសូវញៀនបច្ចេកវិទ្យា បើបាននៅជុំវិញអ្វីដែលថ្មីៗ ដែលអាចនាំពួកគេចចេញពីអេក្រង់។ ជាពិសេសគ្រប់គ្នានឹងចេះស្រឡាញ់បរិស្ថាន និងធម្មជាតិដែលនៅជុំវិញខ្លួន។

៧. ទទួលបានបទពិសោធន៍ថ្មីៗ

ការធ្វើដំណើរកម្សាន្តជិតឬឆ្ងាយក្ដី សុទ្ធតែអាចធ្វើឱ្យគ្រួសារទទួលបានបទពិសោធថ្មីៗ ជាមួយនឹងរសជាតិនៃអាហារថ្មីៗ ទេសភាពថ្មី កន្លែងថ្មី ក្លិនថ្មី ហើយពេលខ្លះសូម្បីភាសាក៏ថ្មីដែរ ។ ទាំងនេះជាការតភ្ជាប់ទំនាក់ទំនងថ្មីៗនៅក្នុងខួរក្បាលរបស់មនុស្ស និងផ្តល់នូវបទពិសោធន៍ថ្មីៗកាន់តែច្រើនដល់កូនៗថែមទៀតផង៕

ប្រែសម្រួល៖ សន្យា

ប្រភព៖ EF

ចុចអាន៖ ហេតុផលធំៗដែលគួរនៅផ្ទះថ្ងៃអាទិត្យ

ចុចអាន៖ មិត្តភក្ដិរៀបការចោលអស់ មិនមែនជាចុងបញ្ចប់នៃពិភពលោកទេ

The post បង្កើនសុភមង្គលគ្រួសារ នៅពេលមានដំណើរកម្សាន្តជាមួយគ្នា appeared first on Kampuchea Thmey Daily.

ឧត្តមភរិយា ដែលបុរសទាំងឡាយគេងស្រមៃប៉ុនប៉ង

Sonya — Wed, 27 Jan 2021 09:20:06 +0000

ចំពោះបុរស រូបសម្បត្តិ និងចរិតឬកពាររបស់ស្រ្តីមានភាពសំខាន់ដូចគ្នានៅពេលរើសគូស្រករ។ បានភរិយាស្អាតជារឿងសំណាងបំផុត ប៉ុន្តែបានភរិយាចរិតប្រពៃរឹតតែសំណាងខ្លាំងបំផុត។

ខាងក្រោមជាលក្ខណៈសម្បត្តិពិសេសរបស់មនុស្សស្រីដែលសក្ដិសមជាឧត្តមភរិយា ធ្វើឲ្យស្វាមីគ្រប់រូបចំរុងចម្រើន!

ចេះមើលថែខ្លួនឯងទោះស្វាមីនៅឆ្ងាយ

ជាមនុស្សស្រីមានលំនឹងក្នុងជីវិត និងមានភាពរឹងមាំគ្រប់គ្រាន់ជាខ្លួនឯង។ ដូច្នេះទើបនាងមិនដែលយកស្នេហាជាឧបករណ៍សម្រាប់ជាទីពឹងនោះទេ។ នាងជាស្ត្រីរឹងប៉ឹងស្រាប់ហើយ ត្រឹមតែអវត្តមានបុរស វាមិនបានបន្ថែមទុក្ខព្រួយលើនាងឡើយ។

តែងតែនៅក្បែរនិងជួយលើកទឹកចិត្តស្វាមីជានិច្ច

រាល់ពេលបញ្ហាកើតឡើង ឬឧបសគ្គរាំងស្ទះដល់ការសម្រេចគោលដៅរបស់ស្វាមី នាងជាមនុស្សទីមួយដែលជឿជាក់លើប្ដីថា គាត់អាចធ្វើបាន។ នាងធ្វើឲ្យគាត់មានអារម្មណ៍មិនបាក់ទឹកចិត្ត និងមិនព្រមចុះចាញ់រាល់បញ្ហាចំពោះមុខ បើទោះមានព្យុះភ្លៀងយ៉ាងណាក៏ដោយ។

បើកចិត្តទូលាយទទួលយកគំនិតស្វាមី

បើទោះបីជាពេលប្ដីប្រពន្ធមានគំនិតពីរផ្សេងគ្នាក៏ដោយ ក៏នាងនៅតែយកចិត្តទុកដាក់ស្តាប់យោបល់គាត់ជានិច្ច។ នាងជាប្រភេទមនុស្សដែលគិតសុខទុក្ខ និងមតិស្វាមី ហើយក៏មិនដែលយកតែចិត្តខ្លួនឯងឡើយ។

មិនប្រើការសន្មតក្នុងការដោះស្រាយជម្លោះ

នាងចេះយល់ចិត្តអ្នកដទៃ និងមិនទម្លាប់សន្មតតាមតែអារម្មណ៍នោះទេ។ នាងតែងតែព្យាយាមយល់ពីស្ថានភាពដែលកំពុងជួបប្រទះ ព្រមទាំងខំដោះស្រាយបញ្ហាដោយផ្អែកតាមហេតុផលជាក់ស្ដែង។ ប្រពន្ធប្រភេទនេះរមែងចេះបង្រួមរឿងធំមកជាតូច និងពីតូចទៅជាគ្មានរឿងអ្វី។

មានគោលដៅក្នុងជីវិតរបស់ខ្លួន

នាងជាមនុស្សស្រីឯករាជ្យ មិនផ្ដេកផ្ដួលលើស្វាមី ដោយមានផែនការជីវិតរបស់ខ្លួនច្បាស់លាស់។ ទោះបីត្រឹមជាមេផ្ទះ ក៏គ្រួសារដែលមាននាងតែងតែងចំរុងចម្រើនដូចពាក្យចាស់ពោលថា “សម្លឆ្ងាញ់ដោយសារគ្រឿង គ្រួសាររុងរឿងដោយសារភរិយា”។

ធ្វើឲ្យប្ដីមានអារម្មណ៍ថា គាត់ជាបុរសសំណាងជាងគេបំផុត

គ្រប់ពេលនៅក្បែរនាង គ្រប់កន្លែងដែលនៅជាមួយ ស្វាមីតែងតែទទួលបានអារម្មណ៍កក់ក្ដៅ និងយល់ថា ខ្លួនជាមនុស្សប្រុសសំណាងខ្លាំងបំផុត។ នាងប្រហែលមិនស្អាតទាក់ទាញ ប៉ុន្តែ ភាពជាស្រ្តីរបស់នាង ធ្វើឲ្យមនុស្សប្រុសដទៃច្រណែនស្វាមីរបស់នាង៕

ប្រែសម្រួល៖ សន្យា

ប្រភព៖ Bright Side

ចុចអាន៖ មិនមែនជាក្ដីស្រឡាញ់ពិតទេ ប្រសិនគូស្នេហ៍ម្ខាងៗប្រកាន់ ៣ ចំណុចនេះ

ចុចអាន៖ ការស្រាវជ្រាវថ្មី៖ ស្ត្រីរៀបការជាមួយបុរសក្មេងជាង ១០ ឆ្នាំ បង្កើនអត្រាមរណភាពខ្ពស់

The post ឧត្តមភរិយា ដែលបុរសទាំងឡាយគេងស្រមៃប៉ុនប៉ង appeared first on Kampuchea Thmey Daily.

កុមារស្ថិតក្នុងគ្រួសារមានឪពុកម្ដាយជាមនុស្សប្រមឹកនឹងប្រឈមបញ្ហាជីវិត ៥ យ៉ាងនេះ

Sonya — Tue, 17 Nov 2020 04:47:54 +0000

វាជារឿងល្អប្រសិនបើយើងចាំពីកុមារភាពនៅក្នុងរូបភាពស្រស់ស្អាត ដែលអាចធ្វើឲ្យបេះដូងយើងកក់ក្ដៅរាល់ពេលដែលគិតដល់វា។

ប៉ុន្តែនៅពេលដែលរូបភាពពីកុមារភាពមានតែរឿងអាក្រក់ តើមានអ្វីកើតឡើងនៅពេលដែលយើងចងចាំតែការឈឺចាប់និងទុក្ខវេទនាដែលជាប់មកជាមួយ? ជាពិសេសនោះគឺមានគឺឪពុកដែលស្រវឹងស្រាសឹងតែរាល់ថ្ងៃ។

១. ចេះទង្វើអាក្រក់ៗដោយគ្មាននរណាម្នាក់បង្រៀន

ល្ងាចថ្ងៃអាទិត្យដ៏ស្ងប់ស្ងាត់នៅក្នុងផ្ទះ ធម្មតាគួរតែជាពេលដែលត្រូវចំណាយជាមួយគ្នាគ្រួសារ ឬមើលទូរទស្សន៍ ប៉ុន្តែកុមារបែរក្លាយជាជនរងគ្រោះនៃការផ្ទុះកំហឹងដែលបណ្ដាលមកពីស្រារបស់ឪពុកក្រេបទៅ។ ដូច្នេះ ទោះគ្មាននរណាបង្រៀនពីការប្រើហិង្សា ក៏ក្មេងអាចនឹងយកគំរូតាមពួកគាត់ដែរ។

២.គ្រប់យ៉ាងស្ថិតក្រោមសម្ពាធ

នៅក្នុងផ្ទះ ដែលពេញទៅដោយភាពវឹកវរ ជាពិសេសប្រសិនបើឪពុកម្ដាយជាមនុស្សប្រមឹក ចង់ឬមិនចង់ក្មេងនឹងរងសម្ពាធខានមិនបាន ។ គេត្រូវចំណាយពេលក្នុងជីវិតដោយភាពរញ៉េរញ៉ៃ គ្រប់យ៉ាងក្នុងគ្រួសារសុទ្ធតែបញ្ហា។ ជាលទ្ធផលពេលគេធំឡើង គេគេចមិនផុតពីគំនាបផ្លូវចិត្ត ព្រោះមិនអាចធ្វើអ្វីដែលខ្លួនចូលចិត្តកាលពីនៅតូច។

៣.ខ្វះក្ដីស្រលាញ់

ខ្វះការគាំទ្រខាងផ្លូវអារម្មណ៍ និងមិនដែលទទួលបានក្ដីស្រឡាញ់ពីឪពុកម្ដាយ ពួកគាត់មិនដែលនៅទីនោះពេលគេត្រូវការ។ ពេលគេត្រូវការអ្នកឱប ឬនរណាម្នាក់យកចិត្តទុកដាក់ គឺមានតែគេម្នាក់ឯង។ នៅពេលពេញវ័យ គេច្រើនតែខ្លាចក្ដីស្រលាញ់ ឬខ្លាចមនុស្សដែលគេស្រលាញ់ត្រូវចាកចេញចោលគេ។

៤.ក្លាយជាមនុស្សលែងជឿលើខ្លួនឯង

នៅពេលធំឡើងតម្រូវការរបស់គេលែងសំខាន់ ដោយសារតែធ្លាប់ឃើញឪពុកម្ដាយជាគម្រូស្រាប់។ គម្រូនៃអាកប្បកិរិយាទាំងនោះ បានវិវត្តគេក្លាយជាមនុស្សភ័យច្រើន បារម្ភច្រើន និងមិនមានទំនុកចិត្តលើខ្លួនឯង។

រាល់ការប្រាស្រ័យទាក់ទងនិងទំនាក់ទំនងនានាក្លាយជារឿងពិបាកសម្រាប់គេ ពីព្រោះគេមិនជឿលើខ្លួនឯងសោះ ព្រមទាំងក្លាយជាមនុស្សខ្លាចការបង្កជម្លោះបំផុត។

៥.មិនដឹងថាខ្លួនឯងពូកែអ្វីឡើយ

ពេលនៅក្មេងកម្រមានអ្វីដែលគេអាចបានធ្វើបានល្អ លើសពីនេះទៅទៀតគេត្រូវប្រឈមមុខនឹងការរិះគន់ ការខកចិត្តឥតឈប់ឈរពីក្មេងៗដទៃ។ ឪពុកម្ដាយដែលប្រមឹកមិនដែលទទួលស្គាល់ឬកត់សម្គាល់អ្វីដែលគេបានធ្វើឡើយ។ ដូច្នេះគេក៏មិនគោរពខ្លួនឯង ហើយមិនថាធ្វើអ្វីក៏ដោយ និងថែមទាំងប្រមាថខ្លួនឯង បន្ទោសបង្អាប់ខ្លួនឯង ព្រោះមិនជឿលើខ្លួនឯង៕

ប្រែសម្រួល៖ សាង ស្រីល័ក្ខ

ចុចអាន៖ មានកូនស្រី កង្វល់ខ្លាចចាញ់បោកព្រាននារី ជាទុក្ខធំនៃឳពុកម្តាយបច្ចុប្បន្ន

The post កុមារស្ថិតក្នុងគ្រួសារមានឪពុកម្ដាយជាមនុស្សប្រមឹកនឹងប្រឈមបញ្ហាជីវិត ៥ យ៉ាងនេះ appeared first on Kampuchea Thmey Daily.

គន្លឹះរកស៊ីធ្វើជាអ្នកមានរបស់មនុស្សស្រី ដោយមិនចាំបាច់ពឹងបុរស

Sonya — Tue, 17 Nov 2020 04:44:00 +0000

ក្លាយជាអ្នកមាន ឬអ្នកក្រ មិនកំណត់លើភេទនោះទេ។ បុរសជាច្រើនលើលោកនេះ អាចក្លាយជាសេដ្ឋី រីឯស្ត្រីក៏អាចក្លាយជាសេដ្ឋីនីបានដូចគ្នា។

មនុស្សស្រីសម័យទំនើបមិនគួររស់នៅរង់ចាំការជ្រោមជ្រែងពីបុរសទៀតឡើយ ព្រោះយើងអាចក្លាយជាអ្នកមានដោយមិនចាំបាច់ពឹងមនុស្សប្រុស។

បើអ៊ីចឹង គួរចាប់ផ្ដើមរកស៊ីរបៀបណា ដើម្បីមានទ្រព្យជារបស់ខ្លួន ដោយមិនតោងទ្រព្យបុរស?

១. ចេះរៀបចំផែនការ

មនុស្សស្រីគ្រប់រូបត្រូវតែចេះរៀបចំផែនការជីវិតឲ្យបានល្អ ពោលទាំងជីវិតការងារ ព្រមទាំងជីវិតខ្លួនឯង ព្រោះមនុស្សជោគជ័យ និងសេដ្ឋីគ្រប់រូបពោរពេញទៅដោយផែនការជីវិតរៀងៗខ្លួន។

រីឯការរកស៊ីក៏ដូចគ្នាដែរ បើសិនជាចេះរៀបចំផែនការបានល្អ និងច្បាស់លាស់ជាមួយវាទោះបីជាមុខរបរតូចតាចក៏ដោយ វាគង់តែអាចពង្រីកជោគជ័យនៅថ្ងៃណាមួយជាមិនខាននោះទេ។

២. មិនបោះបង់ការរៀន

គ្មានរឿងណាមួយដែលអាចទទួលបានជោគជ័យដោយខ្វះការសិក្សានោះទេ ទោះបីអ្នកនោះក្លាយជាបុគ្គលជោគជ័យកម្រិតកំពូលក៏ដោយ ក៏ការដែលបន្តរៀនសូត្រជានិច្ច ជាការចាំចាច់ត្រូវមានជាទម្លាប់ជាប្រចាំ។ បន្តសិក្សា ជាគន្លឹះដើម្បីពង្រីកចំណេះដឹងរបស់ខ្លួនបន្ថែមទៀត ដើម្បីឲ្យដើរទាន់សង្គម។ បើសិនជាស្ត្រីមានអាជីវកម្មខ្លួនឯងផ្ទាល់ ការរៀនសូត្របន្ថែមស្វែងយល់ពីទីផ្សារ ព្រមទាំងដៃគូប្រកួតប្រជែងកាន់តែជារឿងត្រូវយកចិត្តទុកដាក់។

៣. តស៊ូជានិច្ច

មានមនុស្សជាច្រើនដែលបានជួបការលំបាក ជាទូទៅតែងតែបោះបង់វាចោល ជាហេតុធ្វើឲ្យពួកគេមិនអាចស្គាល់នៅភាពជោគជ័យនោះទេ។ ប៉ុន្តែស្រ្តីទាំងឡាយត្រូវដឹង គ្មានអ្នកណាម្នាក់អាចគេចផុតនៅការបរាជ័យនោះឡើយ ហើយបើជួបវា យើងគួរតែអរគុណហើយរឹងមាំឡើង។

នៅពេលដែលយើងបោះបង់ចោលពាក់កណ្តាលទី ប្រាកដកណាស់ យើងពិបាកក្នុងការត្រឡប់មកវិញ ហើយចាប់ផ្តើមពីបាតក្រោមម្តងទៀត។ ដូច្នេះយើងត្រូវតែតស៊ូ ទោះបីបរាជ័យមួយពេលក៏ដោយ នោះទើបអាចទទួលបានជោគជ័យនៅទីបំផុត៕

ប្រែសម្រួល៖ សន្យា

ប្រភព៖ Forbes

ចុចអាន៖ ៨ចំណុច ដែលសហគ្រិនស្ត្រីក្នុងតំបន់អាស៊ីគួរតែយល់ដឹង

The post គន្លឹះរកស៊ីធ្វើជាអ្នកមានរបស់មនុស្សស្រី ដោយមិនចាំបាច់ពឹងបុរស appeared first on Kampuchea Thmey Daily.

ហេតុអ្វីនៅលោកខាងលិចគេមិននិយមយកកូនច្រើនដូចប្រទេសក្រីក្រ?

Sonya — Tue, 10 Nov 2020 01:25:39 +0000

យើងមិនដែលដឹងទេថា តើការចិញ្ចឹមកូនមានតម្លៃថ្លៃកម្រិតណានៅក្នុងប្រទេសអភិវឌ្ឍន៍។

តើជឿអត់? មានការគណនាថា ការចិញ្ចឹមកូនតំាងពីកើតរហូតឈានដល់វ័យ ១៨ ឆ្នាំឪពុកម្តាយនៅប្រទេសអភិវឌ្ឍន៍ នឹងត្រូវចំណាយប្រាក់យ៉ាងហោចណាស់ ២សែន៣ម៉ឺន ដុល្លារអាមេរិក។

បើយោងតាមរបាយការណ៍របស់ក្រសួងកសិកម្មអាមេរិក ការចិញ្ចឹមទារកដែលផ្តល់នូវអាហាររូបត្ថម្ភល្អ ការសិក្សា ការកម្សាន្តដើម្បីផ្តល់ការលូតលាស់ទំាងកាយសម្បទានិងប្រាជ្ញាស្មារតីតាមវ័យរបស់ពួកគេអាចនឹងថ្លៃជាងនេះទៅទៀត។

ប្រមាណជា ២០% នៃថវិកាទំាងនោះមិនរាប់បញ្ចូលបំណុលនិស្សិតនៅឯសាកលវិទ្យាល័យឡើយ។

ខ្មែរយើងគួរមានការពិចារណា ជាពិសេសពលរដ្ឋនៅទីជនបទ។ អ្នកស្រុកនៅតែជឿថាការមានកូនច្រើននឹងផ្តល់ផលល្អទៅអនាគត ប៉ុន្តែស្ត្រីខ្មែរជាច្រើនមានបញ្ហាសុខភាពធ្ងន់ធ្ងរនៅពេលចូលវ័យជរាដោយសារតែការមានកូនច្រើននិងមិនមានអាហាររូបត្ថម្ភគ្រប់គ្រាន់។

តើយើងគួរតែមានកូនតែពីរនាក់ដែលមានអាហារនិងឱកាសលូតលាស់និងពេលវេលាកក់ក្តៅឱ្យពួកគេគ្រប់គ្រាន់ឬមួយក៏មានកូនច្រើនហើយសុខភាពមិនល្អទំាងអស់គ្នា?

ប្រែសម្រួល៖ ចម្រើន តារា

ចុចអាន៖ ជីវិតអាថ៌កំបាំងនាដការីរបាំ GEISHAS ជប៉ុនដែលមិនអាចរៀបការបាន

ចុចអាន៖ នរណាជាភរិយាលោកប្រធានាធិបតី Joe Biden? តើពួកគេមានកូនឬអត់?

The post ហេតុអ្វីនៅលោកខាងលិចគេមិននិយមយកកូនច្រើនដូចប្រទេសក្រីក្រ? appeared first on Kampuchea Thmey Daily.

ជីវិតគ្រួសារ Archives - Kampuchea Thmey Daily

​ម្តាយ​ក្មេក កូនប្រសាស្រី មិនត្រូវរ៉ូវគ្នា អាចមកពីរឿងទាំងនេះ

ចំណុចតូចៗ តែបង្កបរិយាកាសរីករាយដល់ខ្លួនឯង និងសុភមង្គលគ្រួសារ

១. ចម្អិន​ម្ហូប​​ញ៉ាំ​រួម​គ្នា

២. រៀប​ចំ​ដំណើរ​កម្សាន្ត​រួម​គ្នា

៣. គោរព​ពេល​វេលា​ឯក​ជន​គ្នាទៅវិញទៅ​មក​

៤. មាន​ពេល​ស្តាប់សមាជិក​គ្រួសារ​

៥. ជួយ​បង្កើត​ទម្លាប់​សុខភាព​​​ឱ្យ​គ្នា​ទៅ​វិញ​ទៅ​មក

មុនសម្រេចចិត្តរៀបការ ផែនការ ៣ចំណុចនេះ ត្រូវគិតគូរទុកឱ្យហើយ

បង្កើនសុភមង្គលគ្រួសារ នៅពេលមានដំណើរកម្សាន្តជាមួយគ្នា

ឧត្តមភរិយា ដែលបុរសទាំងឡាយគេងស្រមៃប៉ុនប៉ង

កុមារស្ថិត​ក្នុង​គ្រួសារ​មាន​ឪពុកម្ដាយជា​មនុស្ស​ប្រមឹកនឹង​ប្រឈម​បញ្ហា​ជីវិត ៥ យ៉ាងនេះ

គន្លឹះរកស៊ីធ្វើជាអ្នកមានរបស់មនុស្សស្រី ដោយមិនចាំបាច់ពឹងបុរស

ហេតុអ្វីនៅលោកខាងលិច​គេមិននិយមយកកូនច្រើនដូចប្រទេសក្រីក្រ?

ម្តាយក្មេក កូនប្រសាស្រី មិនត្រូវរ៉ូវគ្នា អាចមកពីរឿងទាំងនេះ

១. ចម្អិនម្ហូបញ៉ាំរួមគ្នា

២. រៀបចំដំណើរកម្សាន្តរួមគ្នា

៣. គោរពពេលវេលាឯកជនគ្នាទៅវិញទៅមក

៤. មានពេលស្តាប់សមាជិកគ្រួសារ

៥. ជួយបង្កើតទម្លាប់សុខភាពឱ្យគ្នាទៅវិញទៅមក

កុមារស្ថិតក្នុងគ្រួសារមានឪពុកម្ដាយជាមនុស្សប្រមឹកនឹងប្រឈមបញ្ហាជីវិត ៥ យ៉ាងនេះ

ហេតុអ្វីនៅលោកខាងលិចគេមិននិយមយកកូនច្រើនដូចប្រទេសក្រីក្រ?