ជាងនេះទៅទៀត Blue Diamond Affair គឺជាពេជ្រខៀវដ៏កម្រមួយដែលវិសេសវិសាលបំផុត មិនអាចកាត់ថ្លៃបានចំពោះស្ដេចអារ៉ាប៊ីសាអូឌីត ពោលគឺជាព្រះរាជអំណោយរបស់ទ្រង់ទុកជូនដល់មហេសីរបស់ព្រះអង្គតែប៉ុណ្ណោះ។

ខាងក្រោមនេះ គឺមូលហេតុដែលគ្រឿងអលង្ការ៥០ការ៉ាត់របស់ស្ដេចប្រេងច្រើនជាងគេលើលោក ក្លាយជាបញ្ហារសើប និងយូរអង្វែងសម្រាប់ប្រទេសអារ៉ាប៊ីសាអូឌីត និងប្រទេសថៃ ។

១. ជាព្រះរាជទ្រព្យដ៏មានតម្លៃមហាសាល

រតនភណ្ឌដែលត្រូវបានគេលួច រួមទាំងពេជ្រពណ៌ខៀវដ៏កម្រ ៥០ការ៉ាត់ ជាកម្មសិទ្ធិរបស់រាជវង្សអារ៉ាប៊ីសាអូឌីតជាន់ខ្ពស់ គឺព្រះអង្គម្ចាស់ Faisal bin Fahd ដែលជាបុត្រារបស់ស្តេច Fahd នាពេលនោះ។ យោងតាមរបាយការណ៍ក៏បានបញ្ចាក់ថា ត្បូងពេជ្រនោះគឺវត្ថុស័ក្តិសិទ្ធិ ដែលទ្រង់បានផ្តល់ជាអំណោយប្រគល់ជូនព្រះរាជវង្សានុវង្សរបស់ទ្រង់។

នៅក្នុងរាជាធិបតេយ្យឈូងសមុទ្រ ទ្រព្យសម្បត្តិរបស់រាជវង្ស ជាពិសេសត្បូងដ៏កម្រ គឺតំណាងឲ្យពូជពង្ស កិត្តិយស និងសេចក្តីថ្លៃថ្នូររបស់សែរាជវង្ស។ ចំណែកឯការបាត់បង់មរតករបស់រាជវង្ស ត្រូវបានគេមើលឃើញថា មិនមែនគ្រាន់តែជាការលួចទេ ប៉ុន្តែជាការបំផ្លាញកិត្យានុភាពរបស់រាជាធិបតេយ្យអារ៉ាប៊ីសាអូឌីតផងដែរ។

២. ការស្លាប់របស់អ្នកការទូតអារ៉ាប៊ីសាអូឌីតដល់ទៅ៣នាក់ និង អ្នកជំនួញម្នាក់ទៀត

ក្នុងឆ្នាំ ១៩៩០ អ្នកការទូតអារ៉ាប៊ីសាអូឌីត៣នាក់ ត្រូវបានសម្លាប់នៅក្នុងទីក្រុងបាងកក ដែលទំនងជាកំពុងស៊ើបអង្កេតពាក់ព័ន្ធនឹងការលួចគ្រឿងអលង្ការ។ អ្វីដែលកានតែធ្វើឲ្យប្រទេសស្ថិតនៅមជ្ឈិមបូព៌ាកាន់តែមានកំហឹងខ្លាំងក្លា នោះគឺអ្នកជំនួញអារ៉ាប៊ីសាអូឌីតម្នាក់ទៀត បានបាត់ខ្លួនយ៉ាងអាថ៌កំបាំងបំផុត ដែលកាលណោះគេសន្មតថាជាករណីឃាតកម្ម។

ទោះជាយ៉ាងណាក៏ដោយ គ្មាន​នរណា​ម្នាក់​ត្រូវ​បាន​កាត់​ទោស​ពី​បទ​សម្លាប់​ឡើយ។ អារ៉ាប៊ីសាអូឌីត យល់ឃើញថា ការបរាជ័យនៃយុត្តិធម៌ ឬការបិទបាំងដោយចេតនាដោយអាជ្ញាធរថៃគឺជារឿងមួយដែលមិនគួរកើតឡើងលើជាតិសាសន៍របស់ពួកគេនោះទេ។ ពេលនោះ គ្រាប់ពេជ្របានក្លាយជាជំហរសម្រាប់ភាពអយុត្តិធម៌កាន់តែទូលំទូលាយ រួមទាំងការស្លាប់របស់ជនជាតិអារ៉ាប៊ីសាអូឌីតជាហូរហែរ។

៣ .មានគោលការណ៍ការទូតដោយសេចក្តីថ្លៃថ្នូរ

អារ៉ាប៊ីសាអូឌីត ដែលជាប្រទេសដែលមានសេចក្តីថ្លៃថ្នូរ និងមោទនភាពរបស់រដ្ឋត្រូវបានផ្សារភ្ជាប់យ៉ាងជិតស្និទ្ធ បានបកស្រាយករណីនេះថា ជាការ​មិន​គោរព​របស់​រដ្ឋាភិបាល​ថៃ​ដែល​មិន​បាន​ដោះស្រាយ​បញ្ហា។ ឧទាហរណ៍នៃអំពើពុករលួយ និងការរួចពីសំណាញ់​ច្បាប់នៅក្នុងស្ថាប័នប៉ូលិស និងតុលាការរបស់ប្រទេសថៃ។

មិនបង្អង់យូរឡើយ ប្រទេសមហាសេដ្ធីនេះរបានជ្រើសរើសផ្ដាច់ទំនាក់ទំនង, បង្កកការធ្វើចំណាកស្រុក និងពន្យារពេលទំនាក់ទំនងសេដ្ឋកិច្ចអស់រយៈពេលជាង ៣០ ឆ្នាំ។

៤. ពេជ្រជានិមិត្តរូបជាតិ និងភាពរុងរឿង

អាថ៌កំបាំង​និង​ពាក្យ​ចចាមអារ៉ាម​ថា​ ការ​ចាត់ចែង​ពេជ្រ​ដោយ​មន្ត្រី​ជាន់​ខ្ពស់​ថៃ​បាន​ពង្រីក​កំហឹង​អារ៉ាប៊ីសាអូឌីតកានតែអូសបន្លាយជាងមុន។ ប្រព័ន្ធផ្សព្វផ្សាយបានរាយការណ៍ថា ត្បូងក្លែងក្លាយត្រូវបានប្រគល់មកវិញ ហើយថាភរិយារបស់ឧត្តមសេនីយ៍ថៃជាច្រើនរូប ត្រូវបានគេឃើញពាក់គ្រឿងអលង្ការដែលត្រូវនឹងពេជ្រដែលបានបាត់ទៅ ដែលនោះកាន់តែបន្ថែមភ្លើង ប្រៀបដូចទៅនឹងការប្រមាថដល់សែរាជវង្ស។

ចំពោះសាធារណៈជន និងរាជាធិបតេយ្យ អារ៉ាប៊ីសាអូឌីត នេះមិនមែនគ្រាន់តែបាត់បង់ទ្រព្យសម្បត្ដិប៉ុណ្ណោះទេ វាជាការអាម៉ាស់របស់ប្រទេសជាតិថែមមួយកម្រិតទៀត។

ដូច្នោះហើយ ទើបធ្វើឲ្យថៃនិងអារ៉ាប៊ីសាអូឌីត ត្រូវចំណាយពេលវេលាដល់ទៅ៣០ឆ្នាំ ដើម្បីស្តារទំនាក់ទំនងឡើងវិញ។ នាពេលនោះ អារ៉ាប៊ីសាអូឌីតបានបដិសេធការធ្វើឲ្យមានលក្ខណៈធម្មតារហូតដល់ពួកគេ បានទទួលការសុំទោសជាសាធារណៈ។ ប៉ុន្តែ ការជឿទុកចិត្តខាងការទូតដែលកសាងឡើងវិញ ត្រូវធ្វើឲ្យប្រុងប្រយ័ត្នបំផុត។

ជាពិសេស មានតែនៅក្នុងឆ្នាំ២០២២ប៉ុណ្ណោះ ដែលគោលនយោបាយការបរទេសដ៏ជាក់ស្តែងរបស់ព្រះអង្គម្ចាស់ Mohammed bin Salman បានសម្រេចចិត្តឆ្ពោះទៅមុខ ទោះបីជាគ្រាប់ពេជ្រពណ៌ខៀវនៅតែបាត់រកមិនឃើញយ៉ាងណាក្ដី៕

អត្ថបទ៖ សាង ស្រីល័ក្ខ

ចុចអាន៖បាត់ខ្លួន ៣៦ ឆ្នាំហើយ តើត្បូងពេជ្រខៀវអារ៉ាប៊ីសាអូឌីតដែលថៃលួចទៅ នៅទីណា?

The post ត្រួសៗពីត្បូងពេជ្រខៀវ សំខាន់ខ្លាំងចំពោះស្ដេចអារ៉ាប៊ីសាអូឌីត ដល់ថ្នាកខឹងថៃជាង៣០ឆ្នាំ appeared first on Kampuchea Thmey Daily.

យ៉ាងណាក៏ដោយ មានពាក្យចចាមអារ៉ាមជាច្រើនបានរីករាលដាលថា មន្ត្រីជាន់ខ្ពស់ថៃ ឬភរិយារបស់ពួកគេ ត្រូវបានគេឃើញពាក់គ្រឿងអលង្ការដែលដូចគ្នានឹងរបស់របរដែលបានបាត់ ដែលបង្ហាញពីការពាក់ព័ន្ធកម្រិតខ្ពស់។ ប៉ុន្តែអ្នកខ្លះមានជំនឿយ៉ាងទូលំទូលាយថា ត្បូងនេះត្រូវបានរក្សាទុក ឬលក់ដោយឯកជនដោយមន្ត្រីជាន់ខ្ពស់ថៃ។

ចំណែកអ្នកជំនាញខាងត្បូងជឿថា ពេជ្រអាចត្រូវបានគេកាត់ចូលទៅក្នុងថ្មតូចៗ ដើម្បីលាក់អត្តសញ្ញាណរបស់វា។ នេះ​នឹង​ធ្វើ​ឲ្យវាស្ទើរតែ​មិន​អាច​តាម​ដាន​បាន វាអាចជា​យុទ្ធសាស្ត្រ​ទូទៅ​ក្នុង​ការ​រត់ពន្ធ​ត្បូង។ អ្នកខ្លះស្មានថា វាត្រូវបានបំផ្លាញ ឬលាក់នៅក្នុងការប្រមូលសម្ងាត់នៃគ្រួសារដែលមានទំនាក់ទំនងនយោបាយ ឬអាចត្រូវគេសម្អាត បំបែកជាផ្នែកតូចៗជាច្រើន ដោយដាក់លក់បន្តនៅលើទីផ្សារ​ងងឹតអន្តរជាតិ ឬរក្សាទុកជាសម្ងាត់ក៏ថាបាន។

ដោយសារតែរកមិនឃើញនូវរបស់ដែលខ្លួនចង់បាន ទើបធ្វើឲ្យទំនាក់ទនងការទូតរវាងថៃ និងប្រទេសសំបូរប្រេងច្រើនជាងគេនៅលើពិភពលោកនេះ មិនអាចចុះសម្រុងគ្នាបានឡើយ។ ការបាត់ខ្លួនរបស់ពេជ្របានក្លាយជានិមិត្តរូបនៃរឿងអាស្រូវដែលមិនអាចដោះស្រាយបាន ដែលជំរុញឲ្យអារ៉ាប៊ីសាអូឌីតខឹងសម្បារ និងការមិនទុកចិត្តចំពោះមន្ត្រីថៃ ដែលរួមចំណែកដល់ការបង្កកការទូតរយៈពេល ៣០ ឆ្នាំ

ជាពិសេស ចាបតាំងពីរឿងក្ដីឃាតកម្មទៅលើអ្នកការទូតអារ៉ាប៊ីសាអូឌីតបីនាក់នៅទីក្រុងបាងកក កាលពីឆ្នាំ១៩៩០ ព្រមទាំងអ្នកជំនួញម្នាក់ទៀតដែលបញ្ចូនមកស៊ើបអង្កេតគ្រឿងអលង្ការដែលត្រូវគេលួច ។

ថ្វីដ្បិតតែ មកដល់សព្វថ្ងៃនេះពេជ្រពណ៌ខៀវដ៏កម្រនោះពុំទាន់រកឃើញនូវឡើយ ក៏ប៉ុន្តែអារ៉ាប៊ីសាអូឌីតបានសម្រេចចិត្តស្តារឡើងវិញនូវទំនាក់ទំនងពេញលេញជាមួយប្រទេសថៃ ក្នុងឆ្នាំ ២០២២ ។ ជាពិសេសថែមទៀត ដោយសារតែមេដឹកនាំ​នៃមជ្ឈិមបូព៌ាបាន​សង្កត់​ធ្ងន់​លើ​ការ​ឈាន​ទៅ​មុខ​ ដោយ​មិនរម្លឹកនូវ​អតីតកាលដ៏ខ្មៅងងឹត​រវាងគ្នាឡើងវិញ​ទេ។

ជាងនេះទៅទៀតដែរ ​ជនជាប់ចោទដែលជាអ្នកយាមជនជាតិថៃឈ្មោះ Kriangkrai Techamong  ថែមទាំងបានសុំទោសជាសាធារណៈ និងលុបកំហុសឆ្គងរបស់ខ្លួនដោយបួសជាព្រះសង្ឃមួយជីវិត។ ជាមួយគ្នានោះ ប្រទេស​ថៃ​ក៏បាន​សម្តែង​ការ​សោកស្ដាយ​យ៉ាង​ខ្លាំង ប៉ុន្តែ​នៅតែគ្មាន​នរណា​ម្នាក់​អាច​ផលិត​ពេជ្រ​ពណ៌​ខៀវ ឬ​ពន្យល់​ពី​ជោគវាសនា​របស់​ខ្លួន​បាន​ឡើយ៕

អត្ថបទ៖ សាង ស្រីល័ក្ខ

ចុចអាន៖ថៃ ធ្លាប់ផ្ទុះរឿងអាស្រូវដ៏អាម៉ាស់២ដង លួចត្បូងពេជ្រក្នុងវាំង និងសម្លាប់អ្នកការទូតអារ៉ាប៊ីសាអូឌីត

The post បាត់ខ្លួន ៣៦ ឆ្នាំហើយ តើត្បូងពេជ្រខៀវអារ៉ាប៊ីសាអូឌីតដែលថៃលួចទៅ នៅទីណា? appeared first on Kampuchea Thmey Daily.

មានដើមកំណើតមកពីប្រទេសឥណ្ឌា

The Hope Diamond បានចាប់ផ្តើមដំណើររបស់វាពីអណ្តូងរ៉ែ Kollur ដែលជាតំបន់សម្បូររ៉ែនៃប្រទេសឥណ្ឌា ប្រហែលសតវត្សទី ១៧ ដើមឡើយវាជាផ្នែកមួយនៃពេជ្ររដុប ១១២ ការ៉ាត់ ដែលទិញដោយអ្នកលក់ត្បូងជនជាតិបារាំង Jean-Baptiste Tavernier ហើយដំបូងឡើយត្រូវបានគេហៅថា Tavernier Blue ។

ថ្មនេះក្រោយមកត្រូវបាគេកាត់ និងលក់ទៅឲ្យស្តេច Louis XIV នៃប្រទេសបារាំងក្នុងឆ្នាំ ១៦៦៨ ដោយបានក្លាយជាផ្នែកមួយនៃរតនាគាររបស់រាជក្រោមឈ្មោះថា French Blue ។ ប៉ុន្តែនេះគ្រាន់តែជាការចាប់ផ្តើមនៃរឿងដ៏វែងមួយប៉ុណ្ណោះ។

បណ្តាសាអាថ៌កំបាំង

អ្វី​ដែល​ធ្វើ​ឲ្យពេជ្រ​ពិសេស ​គឺ​មិន​ត្រឹម​តែ​សម្រស់​របស់​វា​ប៉ុណ្ណោះ​ទេ ប៉ុន្តែ​ក៏​មាន​បណ្តាសា​ដែល​ជាប់​ពាក់ព័ន្ធ​នឹង​វា​ដែរ។ គេ​ថា ​ពេជ្រ​នេះ​នាំ​គ្រោះ​មហន្តរាយ​ដល់​អ្នក​ណា​ដែល​មាន​ឬកាន់កាប់ជាកម្មសិទ្ធ។ បន្ទាប់ពីការសោយទីវង្គត់របស់ស្តេច Louis XIV ប្រទេសបារាំងបានធ្លាក់ចូលទៅក្នុងភាពចលាចលជាមួយនឹងបដិវត្តន៍បារាំង។ ថ្មនេះត្រូវបានគេលួចនៅឆ្នាំ ១៧៩២ ហើយបានបាត់អស់មួយរយៈ។ ក្រោយមកគេបានរកឃើញនៅទីក្រុងឡុងដ៍ក្នុងឆ្នាំ ១៨៣០ វាត្រូវបានកាត់ឲ្យតូចជាងមុន (៤៥.៥២ ការ៉ាត់) និងមានពណ៌ខៀវជ្រៅដែលវាមានសព្វថ្ងៃ។

ម្ចាស់បន្ទាប់គឺ Henry Philip Hope ដែលពេជ្រនេះបានដូរឈ្មោះ ប៉ុន្តែម្ចាស់ថ្មីនៅតែមិនអាចគេចផុតពីសំណាងអាក្រក់ដដែល។ គ្រួសាររបស់គាត់បានធ្លាក់ចូលទៅក្នុងការក្ស័យធន ហើយចាប់ពីពេលនោះមក កេរ្តិ៍ឈ្មោះនៃ បណ្តាសាបានចាប់ផ្តើមរីករាលដាល។

ម្ចាស់ក្រោយៗទៀតដូចជា Evalyn Walsh McLean ដែលជាមហាសេដ្ឋីជនជាតិអាមេរិក ក៏បានជួបសោកនាដកម្មមុនខុសគ្នាដែរ។ កូនប្រុសរបស់នាងបានស្លាប់ក្នុងឧបទ្ទវហេតុមួយ ចំណែកប្តីបានបោះបង់ចោលនាង ហើយទីបំផុតនាងបានស្លាប់នៅក្នុងភាពក្រីក្រ។ តើវាជារឿងចៃដន្យទេ? ឬ​មួយ​ពេជ្រ​ពិត​ជា​ខ្មោច​លង​ដោយ​កម្លាំង​អរូបី? សំណួរនោះនៅតែមិនមានចម្លើយដែលអាចឆ្លើយបាន។

ក្រៅ​ពី​សាច់​រឿង​ដ៏​ជក់​ចិត្ត ពេជ្រ​ក៏​មាន​លក្ខណៈ​ពិសេស​ដោយ​សារ​តែ​ពណ៌ និង​រចនា​សម្ព័ន្ធ​របស់​វា​ផង​ដែរ។ ពណ៌ខៀវជ្រៅនៃថ្មបានមកពីធាតុដ៏កម្រ boron ដែលមានវត្តមានក្នុងអំឡុងពេលដំណើរការបង្កើតត្បូងពេជ្រនៅក្រោមដី។ នៅពេលដាក់នៅក្រោមពន្លឺអ៊ុលត្រាវីយូឡេ វាបញ្ចេញពន្លឺពណ៌ក្រហមដ៏ចម្លែក ដែលជាបាតុភូតដែលពេជ្រមួយចំនួនមាន។ ដោយវាស់ទំហំ ៤៥.៥២ ការ៉ាត់ និងកាត់តាមបែបបុរាណ ពេជ្រ Hope គឺជាការបញ្ចូលគ្នាដ៏ល្អឥតខ្ចោះនៃធម្មជាតិ និងមនុស្ស។

ទោះជាយ៉ាងណាក៏ដោយ មកដល់សព្វថ្ងៃនេះ ពេជ្រជាប់បបណ្ដាសាលែងជារបស់បុគ្គលណាម្នាក់ទៀតហើយ ប៉ុន្តែត្រូវបានដាក់តាំងបង្ហាញនៅសារមន្ទីរប្រវត្តិសាស្ត្រធម្មជាតិ Smithsonian ក្នុងទីក្រុងវ៉ាស៊ីនតោន សហរដ្ឋអាមេរិក។ ពេជ្យនេះបានមកដល់ដីអាមេរិកក្នុងឆ្នាំ ១៩៥៨ នៅពេលដែលគ្រឿងអលង្ការ Harry Winston បានបរិច្ចាគទៅសារមន្ទីរដោយសង្ឃឹមថានឹងបញ្ចប់បណ្តាសា។ គួរឲ្យចាប់អារម្មណ៍ភាគីខាង Winston បានផ្ញើវាតាមរយៈការិយាល័យប្រៃសណីយ៍ ក្នុងកញ្ចប់ធម្មតា ដូចជាការប្រឈមនឹងជោគវាសនាម្តងទៀត។ ចាប់តាំងពីពេលនោះមក ភ្ញៀវទេសចររាប់លាននាក់បានកោតសរសើរភាពស្រស់ស្អាតរបស់វា ប៉ុន្តែគ្មាននរណាម្នាក់ហ៊ានធ្វើជាម្ចាស់របស់វាឡើយ។

ហេតុអ្វីពេជ្រ Hope ពិសេស?

The Hope Diamond គឺជាត្បូងពេជ្រដែលលាយបញ្ចូលគ្នារវាងវិទ្យាសាស្ត្រ សិល្បៈ និងរឿងព្រេង។ វាជានិមិត្តរូបនៃភាពប្រណីត ការភ័យខ្លាច និងការចង់ដឹងចង់ឃើញរបស់មនុស្ស។ រាល់ការកាត់ រាល់ពន្លឺចែងចាំងប្រាប់រឿងមួយ – ពីកន្លែងយកថ្មឥណ្ឌាដាច់ស្រយាលទៅកាន់វិមាន Versailles ពីបណ្តាសានៃការស្លាប់បន្តគ្នាដែលគ្នាអ្នកដឹង៕

អត្ថបទ៖ សាង ស្រីល័ក្ខ

ចុចអាន៖ជឿឬអត់? កាបូបរូបបង្កងយីហោ LV នេះ មានតម្លៃជិត ២ ម៉ឺនដុល្លារ

The post ពេជ្រ​ល្បី​ជាង​គេ​លើ​លោក គ្មាន​នរណា​ហ៊ាន​ធ្វើ​ជា​ម្ចាស់​ ព្រោះ​ជាប់បណ្តាសាដល់ស្លាប់ appeared first on Kampuchea Thmey Daily.

ក្រុមហ៊ុន Lucara Diamond បាននិយាយនៅក្នុងសេចក្តីថ្លែងការណ៍​កាល​ពី​ថ្ងៃ​ទី​២២​ខែ​សីហា​ថា គ្រាប់​ពេជ្រនេះត្រូវបានគេរកឃើញនៅក្នុងអណ្តូងរ៉ែ​ពេជ្រ Karowe នៅភាគឦសានប្រទេស​បុតស្វាណា ដោយប្រើបច្ចេកវិទ្យាស្កេនកាំរស្មីអ៊ិច។

ក្រុមហ៊ុន Lucara មិនបាន​បញ្ជាក់​អំពី​តម្លៃ​ប៉ាន់ស្មាន​នៃ​គ្រាប់​ពេជ្រ​ដែល​មាន​​​ទំហំ​ប៉ុន​បាតដៃ​នេះ​ទេ។ ប៉ុន្តែ​បើ​តាម​ការ​ចុះ​ផ្សាយ​របស់​កាសែត Financial Times ប្រភព​​ពី​ក្រុមហ៊ុន Lucara ដែល​សុំ​​មិន​បង្ហាញ​អត្តសញ្ញាណ បាន​វាយ​តម្លៃ​ថា ពេជ្រ​១​គ្រាប់​​នេះអាច​លក់​បាន​​ដល់​ទៅ ​៤០​លានដុល្លារ​ឯណោះ។

បើ​គិត​ពី​ទំហំ​ការ៉ាត់ គ្រាប់​ពេជ្រ​ដែល​​ទើប​រក​ឃើញ​ គឺ​ជា​គ្រាប់​ពេជ្រ​ធំ​លំដាប់​ទី​២​របស់​ពិភពលោក បន្ទាប់​ពី​ការ​រក​ឃើញ​គ្រាប់​ពេជ្រ​ Cullinan ទំហំ ៣០១៦​ការ៉ាត់​ នៅ​អាហ្វ្រិក​ខាង​ត្បូង​កាល​ពី​ឆ្នាំ​១៩០៥។

ប្រធានក្រុមហ៊ុន Lucara លោក William Lamb បានរៀបរាប់​ថា វា​គឺ​ជា​ការ​រក​ឃើញ​ដ៏​អស្ចារ្យ ដែល​ប្រើប្រាស់​បច្ចេកវិទ្យា​ Mega Diamond Recovery X-ray របស់​ក្រុមហ៊ុន ដែល​​បាន​ដាក់​ឲ្យ​ដំណើរការ​នៅ​ក្នុង​ឆ្នាំ​២០១៧។

បុតស្វាណា គឺជាប្រទេសផលិតពេជ្រដ៏ធំបំផុតមួយរបស់ពិភពលោក។ ការ​ផលិត​ពេជ្រ​​​ ត្រូវ​ចាត់​ទុក​ជា​ប្រភពចំណូលចម្បងរបស់​បុតស្វាណា ដែលស្មើនឹង ៣០%​នៃផលិតផលក្នុងស្រុកសរុប និង ៨០%​នៃការនាំចេញ។

មុនពេលការរកឃើញ​គ្រាប់​ពេជ្រ​​​ដ៏​ធំ​​នេះ ក្រុមហ៊ុន Lucara ក៏​ធ្លាប់​​រក​ឃើញ​គ្រាប់​ពេជ្រ​ធំ​មួយ​ទៀត​នៅ​អណ្ដូង​រ៉ែ Karowe ​កាល​ពី​ឆ្នាំ​២០១៩​ផង​ដែរ ដោយ​កាល​ណោះ​​គ្រាប់​ពេជ្រ​ដែល​រក​ឃើញ​មាន​ទំហំ​ ១៧៥៨​ការ៉ាត់ ហើយ​ដាក់​ឈ្មោះ​ឲ្យ​ពេជ្រ​នោះ​ថា «Sewelo»។

អណ្តូងរ៉ែ​ពេជ្រ Karowe បានចាប់ផ្តើម​បើក​ដំណើរការ​ក្នុង​ឆ្នាំ​២០១២ ដោយ​​លក់ពេជ្រ​បាន​ចំនួន ២១៦​គ្រាប់ ហើយ​ក្នុង​១​គ្រាប់ៗ​មាន​​តម្លៃជាង ១​លានដុល្លារ និង​ពេជ្រ​ប្រហែល​ជា ១១​​គ្រាប់​ផ្សេង​ទៀត​អាច​លក់​​​ក្នុង​១​គ្រាប់​​ៗ​បាន​ជាង ១០​លាន​ដុល្លារ​៕

ដោយ៖ ឈាង

The post រក​ឃើញ​គ្រាប់​ពេជ្រ​ធំ​ជាង​គេ​ទី​២​លើ​លោក ទំហំ​ប៉ុន​បាតដៃ​ នៅ​អាហ្វ្រិក​ខាង​ត្បូង appeared first on Kampuchea Thmey Daily.

ត្បូងពេជ្រនេះត្រូវបានគេរកឃើញនៅអណ្តូងរ៉ែ Mayat ក្នុងសាធារណរដ្ឋ Yakutia ស្ថិតនៅចុងបូព៌ារបស់រុស្ស៊ី តាមបណ្ដោយ​មហាសមុទ្រអាកទិក។

ជាមួយគ្នានេះដែរ ក្រុមហ៊ុន Alrosa បាននិយាយនៅក្នុងសេចក្តីថ្លែងការណ៍មួយថា “យើងបានរកឃើញពេជ្រ ៣៩០.៧ ការ៉ាត់ ដែលមានគុណភាពល្អខ្លាំង ហើយជាពេជ្រដ៏ធំបំផុតនៃទំហំរបស់វា”។

ក្រុមហ៊ុនដដែលបានថ្លែងបន្តទៀតថា វាជាពេជ្រដែលមានរូបរាងមិន​ធម្មតា។ ខុសពីរូបរាងពេជ្រទូទៅ និង ថ្មទាំងមូលត្រូវបានហ៊ុំព័ទ្ធដោយ​ពណ៌លឿងត្នោត។ វាក៏ជាពេជ្រដ៏ធំបំផុត​នៃការរួមផ្សំនៃទំហំ រូបរាង និងពណ៌របស់ពេជ្រនេះ ធ្វើឲ្យវាមានតែមួយគត់លើពិភពលោក៕

ប្រែសម្រួល៖ សាង ស្រីល័ក្ខ

ប្រភព៖reuters

ចុចអាន៖ក្រុមហ៊ុន៣ធំៗនៅ ថៃ រកចំណូលបានច្រើនជាងគេក្នុងប្រទេស

The post រុស្ស៊ី ជីកបានគ្រាប់ពេជ្រធំបំផុតមិនធ្លាប់មានក្នុងប្រទេស appeared first on Kampuchea Thmey Daily.

តាំងពីមានជំងឺរាតត្បាតមក ទីផ្សារពេជ្រ និងទំនិញប្រណីតៗបានធ្លាក់ចុះយ៉ាងខ្លាំង ខណៈ​ពេជ្រចិញ្ចឹមដណ្ដើមចំណែកទីផ្សារពេជ្រធម្មជាតិដល់ទៅ ៩ ភាគរយ ហើយឥណ្ឌាជាកន្លែងផ្គត់ផ្គង់ និងច្នៃពេជ្រចិញ្ចឹមមួយចំនួនធំ ។

ជាឧទាហរណ៍ ក្រុមហ៊ុនពេជ្រយក្ស De Beers ត្រូវកាត់បន្ថយតម្លៃជាង ៤០ ភាគរយ សម្រាប់ពេជ្រពី ២ ទៅ ៤ ការាត់ ដែលមានគុណភាពខ្ពស់ប៉ុន្តែមិនល្អឥតខ្ចោះទេ ។

កាលពីខែមិថុនាកន្លងទៅ ក្រុមហ៊ុនខាងលើ បានគិតប្រាក់ប្រហែល ១ ៤០០ ដុល្លារ ក្នុងមួយការាត់ ដល់ខែកក្កដា វាបានធ្លាក់ចុះមកនៅត្រឹម ៨៥០ ដុល្លារក្នុងមួយការាត់វិញហើយតម្លៃទីផ្សារបន្ទាប់បន្សំនៅតែទាបជាងនេះ ១០ ភាគរយ ដែលមានន័យថាអាចធ្លាក់ចុះបន្ថែមទៀតនាពេលអនាគត ៕

ប្រែសម្រួល៖ វារី

ប្រភព៖ insider

ចុចអាន៖ ការពិតដ៏ឈឺចាប់ នៅពីក្រោយការរុករកពេជ្រធម្មជាតិ

The post ទីផ្សារពេជ្រធម្មជាតិកំពុងធ្លាក់ចុះ ដោយសារតែប្រជាជនអាមេរិកចូលចិត្តពេជ្រចិញ្ចឹមជាង appeared first on Kampuchea Thmey Daily.

ប៉ុន្តែបើក្រឡេកទៅមើលគ្រឿងអលង្ការដែលថ្លៃ ប្រណីត និងមានប្រវត្តិគួរប្លែកៗផងនោះ ពិតជាកម្រមានខ្លាំងណាស់។ បច្ចុប្បន្នគ្រឿងអលង្ការមិនច្រើននោះទេ ដែលជាប់មកជាមួយនូវប្រវត្តិដ៏យូរលង់ ព្រមទាំងលាក់អាថ៌កំបាំងជាច្រើន ដែលមនុស្សជំនាន់ក្រោយពុំដឹងការពិត ឬពិបាកនឹងបកស្រាយ។ តួយ៉ាងគ្រឿងអលង្ការទាំង ៦ ខាងក្រោម៖

១. ខ្សែកត្បូងមរកតរបស់ម្ចាស់ក្សត្រីម៉ារី

នៅខែធ្នូ ឆ្នាំ២០២២ ព្រះនាងម្ចាស់ Kate Middleton នៃប្រទេសវេលស៍ បានពាក់ខ្សែកត្បូងមរកតមួយខ្សែ ក្នុងអំឡុងពេលព្រឹត្តិការណ៍មួយនៅទីក្រុង Boston សហរដ្ឋអាមេរិក។ ខ្សែកត្បូងមរកតមួយខ្សែនេះ គេធ្លាប់ឃើញព្រះនាង Diana បានពាក់ពីមុន ប៉ុន្តែម្ចាស់ពិតប្រាកដរបស់វាគឺម្ចាស់ក្សត្រី ម៉ារី (Mary)។ ខ្សែកនេះដើមឡើយជាអំណោយពីប្រទេសឥណ្ឌាដល់ម្ចាស់ក្សត្រីម៉ារី ក្នុងឆ្នាំ១៩១១។ លុះនៅឆ្នាំ១៩៨៥ ពិភពលោកទាំងមូលមានការភ្ញាក់ផ្អើលយ៉ាងខ្លាំង នៅពេលដែលព្រះនាង Diana ពាក់វានៅលើព្រះនលាតរបស់ទ្រង់ទៅវិញ។ យ៉ាងណាមិញ ខ្សែកត្បូងមរកត ធ្លាក់មកដល់ព្រះហស្តព្រះនាងម្ចាស់ Kate ដោយរបៀបណា គ្មាននរណាច្បាស់ឡើយ។

២. ត្បូងពេជ្រ Tiffany ពណ៌លឿង

ត្បូងពេជ្រពណ៌លឿងដ៏ធំ និងល្អបំផុតមួយនៅក្នុងពិភពលោកមួយនេះ មានទម្ងន់ដល់ទៅ ២៨៧.៤២ការ៉ាត់ ត្រូវបានរកឃើញ កាលពីឆ្នាំ១៨៧៧ នៅអាហ្វ្រិកខាងត្បូង។ ក្រោយមកវាត្រូវបានទិញដោយស្ថាបនិកនៃក្រុមហ៊ុនគ្រឿងអលង្ការ Tiffany គឺលោក Charles Lewis Tiffany ។ ពួក​គេ​បាន​កាត់​ឆិតត្បូង​ដើម្បី​ធ្វើ​ឱ្យ​ពណ៌​របស់​វា​ភ្លឺ​ចែងចាំង​ជាង​មុន ខណៈបច្ចុប្បន្នវានៅសល់​ទម្ងន់ ១២៨.៥៤ការ៉ាត់ប៉ុណ្ណោះ។

ថ្វីត្បិតតែត្បូងពណ៌លឿងមួយនេះមានភាពស្រស់ស្អាត ប៉ុន្តែគេបែរជាហៅវាថា “ត្បូងលោហិត” ព្រោះវាជាប់ទាក់ទងនឹងរឿងសោកនាដកម្មរបស់កម្មករស្បែកខ្មៅពីការជីករកត្បូងពេជ្រ នៅអាហ្វ្រិកខាងត្បូង។

រហូត​មក​ដល់​ពេល​នេះ មាន​ស្ត្រី​តែ ៤នាក់​ប៉ុណ្ណោះ​ដែល​ធ្លាប់​ពាក់​គ្រឿង​អលង្ការ​ដ៏​មាន​តម្លៃមួយ​នេះ។ ជាលើកដំបូងដែលត្បូងពេជ្រពណ៌លឿង Tiffany & Co បង្ហាញខ្លួនជាសាធារណៈគឺនៅឯពិធី Tiffany Feather Ball ក្នុងឆ្នាំ១៩៥៧ ដោយពេលនោះអ្នកស្រី Lady Mary Whitehouse ដែលជាសកម្មជនសង្គមជនជាតិអង់គ្លេស បានពាក់វានៅពេលចូលរួមក្នុងព្រឹត្តិការណ៍នេះ។ នៅឆ្នាំ៩៦១ តារាស្រី Audrey Hepburn បានពាក់ពេជ្រនេះសម្រាប់ថតរូបផ្សព្វផ្សាយខ្សែភាពយន្តរឿង “Breakfast at Tiffany’s” ។

ក្នុងឆ្នាំ២០១៩ តារាប៉ុប Lady Gaga បានពាក់វានៅលើកម្រាលព្រំក្រហម Oscars។ នៅឆ្នាំ២០២១ នៅក្នុងយុទ្ធនាការថ្មីមួយដោយក្រុមហ៊ុន Tiffany & Co តារាចម្រៀង Beyoncé បានក្លាយជាស្ត្រីស្បែកខ្មៅដំបូងគេដែលពាក់ត្បូងព្រេងនិទានមួយនេះ។

៣. ខ្សែដៃខ្លារខិនរបស់អ្នកស្រី Wallis Simpson

ខ្សែដៃខ្លារខិនមួយខ្សែនេះជាកម្មសិទ្ធិរបស់អ្នកស្រី Wallis Simpson ដែលជាអ្នកសង្គមនិយមអាមេរិក និងជាអតីតមហេសីស្តេច Edward ទី៨ ។ គេមិនដឹងច្បាស់ថា អ្នកស្រី Wallis Simpson បានខ្សែដៃប្រណីតនេះមកពីអតីតស្វាមី ឬពីណាឱ្យប្រាកដឡើយ ប៉ុន្តែក្រោយលែងលះជាមួយស្តេច Edward ទី៨ អ្នកស្រីយកវាដាក់ដេញថ្លៃ។  

ក្រោយដាក់ដេញថ្លៃខ្សែដៃរបស់ម៉ាកយីហោ Cartier មួយនេះ បានលក់ក្នុងតម្លៃបំបែកកំណត់ត្រាគឺចំនួន ៧លានដុល្លារ។ វាជាគ្រឿងអលង្ការ Cartier ដែលរកចំណូលបានខ្ពស់បំផុតនៅពេលនោះ។

៤. ត្បូង Hope

ពេជ្រពណ៌ខៀវទំហំ ៤៥.៥២ការ៉ាត់មួយនេះ ត្រូវបានបង្កើតឡើងប្រហែល ១.១ពាន់លានឆ្នាំមុន។ យោងតាមអ្នកជំនាញប្រវត្តិសាស្រ្ត វាបានរកឃើញនៅក្នុងប្រទេសឥណ្ឌាក្នុងសតវត្សទី១៧។ តាំងពីរកឃើញវា ត្បូងនេះ​បាន​បន្ត​ផ្លាស់​ប្តូរ​ដៃមនុស្សជាច្រើន ហើយ​ថែម​ទាំង​ត្រូវ​គេ​លួច​ទៀត​ផង។ វាធ្លាប់ធ្លាក់ដល់ដៃមនុស្សនៅក្នុងប្រទេសឥណ្ឌា បារាំង ចក្រភពអង់គ្លេស និងសហរដ្ឋអាមេរិក។ បច្ចុប្បន្ន​វា​ត្រូវ​បាន​ដាក់​តាំង​បង្ហាញ​នៅ​សារមន្ទីរ​ជាតិ​នៃ​ប្រវត្តិសាស្ត្រ​ធម្មជាតិ​ ក្នុង​ទីក្រុង​វ៉ាស៊ីនតោន សហរដ្ឋអាមេរិក។

ទេវកថា និងអបិយជំនឿជាច្រើនជុំវិញពេជ្រនេះ និយាយថា មនុស្សណាដែលពាក់ព័ន្ធជាមួយវា នឹងជួបនូវសំណាងអាក្រក់មិនស្រាកស្រាន្តនោះទេ។

៥. ខ្សែកពេជ្រ L’Incomparable

ខ្សែកពេជ្រ Mouawad L’Incomparable ត្រូវបានគេចាត់ទុកថាជាខ្សែកថ្លៃបំផុតមួយនៅក្នុងពិភពលោក។ ជាមួយនឹងតម្លៃ ៥៥លានដុល្លារ វាបានបំបែកឯកទគ្គកម្មពិភពលោកក្នុងឆ្នាំ២០១៣ (យោងតាមកំណត់ត្រាពិភពលោក Guinness) ។ ខ្សែកនេះច្នៃឡើងពីបន្ទះពេជ្រពណ៌ស ២២៩.៥២ការ៉ាត់ និងត្បូងពេជ្រពណ៌លឿង ៤០៧.៤៨ការ៉ាត់។ គែមនៃខ្សែកត្រូវបានលម្អជាមួយពេជ្រដែលមានរាង និងទំហំខុសៗគ្នា។

៦. ក្រវិលគុជខ្យងរបស់ម្ចាស់ក្សត្រី Marie Antoinette

ក្រវិលនេះមានអាយុកាល តាំងពីសតវត្សទី១៨មកម្ល៉េះ ហើយធ្លាប់ជាកម្មសិទ្ធិរបស់ម្ចាស់ក្សត្រី Marie Antoinette ។ គេជឿថា ក្រវិលនេះជាគ្រឿងអលង្ការមួយក្នុងចំណោមគ្រឿងអលង្ការដែលម្ចាស់ក្សត្រី Marie Antoinette និងស្ដេច Louis ទី១៦ នាំយកទៅជាមួយ នៅពេលពួកទ្រង់ចាកចេញពីវាំង។ គ្រឿងអលង្ការមួយនេះត្រូវបានខ្ចប់យ៉ាងប្រុងប្រយ័ត្ន រួចបញ្ជូនទៅកាន់ទីក្រុងវីយែន ដើម្បីប្រគល់ឱ្យព្រះរាជនត្តារបស់ម្ចាស់ក្សត្រី Marie Antoinette រក្សាទុក។ ក្នុងឆ្នាំ២០១៨ ក្រវិលគុជនេះត្រូវបានលក់ដេញថ្លៃ ក្នុងតម្លៃ ៣៦ លានដុល្លារ ហើយបានបង្កើតកំណត់ត្រា Guinness ជាគុជថ្លៃជាងគេតែមួយគត់នៅលើលោក៕

ប្រែសម្រួល៖ សន្យា

ចុចអាន៖ ប្រវត្តិ​ត្បូងពេជ្រ​ដែល​មាន​ជាប់​បណ្ដាសា​​ សឹង​មិន​គួរ​ឲ្យ​ជឿ

ចុចអាន៖ ព្រះនាងម្ចាស់វ័យក្មេង ៥អង្គ នឹងក្លាយជាស្ដេចស្រី ក្នុងពេលប៉ុន្មានឆ្នាំខាងមុខ

The post គ្រឿងអលង្ការទាំង ៦ ធ្លាប់ល្បីល្បាញទូទាំងពិភពលោក តែជាប់ប្រវត្តិយ៉ាងអាថ៌កំបាំង appeared first on Kampuchea Thmey Daily.

១. ក្រហម

មកទល់បច្ចុប្បន្នមិនទាន់មានអ្នកស្រាវជ្រាវណាម្នាក់ដឹងពីមូលហេតុធ្វើឲ្យពេជ្រមានពណ៌ក្រហមនៅឡើយទេ លើផែនដីនេះមានពេជ្រក្រហមធម្មជាតិប្រហែល ៣០ គ្រាប់ប៉ុណ្ណោះដែលមានតម្លៃជាងមួយលានដុល្លារក្នុងមួយការាត់ ហើយទំហំធំបំផុតគឺ ៥,១១ ការាត់បន្ទាប់ពីច្នៃរួច ។

២. បៃតង

ពេជ្រ​​ពណ៌​បៃតង​រស់​រវើក​ដូច​ដែល​បាន​បង្ហាញ​នេះ​គឺ​កម្រ​ណាស់ វាមានប្រហែល ៣០០ គ្រាប់ទេដែលលើសពីមួយការាត់ បើពេជ្រពណ៌បៃតងនោះលើសពីបីការាត់នឹងត្រូវគេដាក់នៅក្នុងសារមន្ទីរមិនខាន ។ គួរបញ្ជាក់ថាពេជ្របៃតងបានពណ៌ពីវិទ្យុសកម្មដែលផ្លាស់ទីអាតូមកាបូននៅក្នុងរចនាសម្ព័ន្ធគ្រីស្តាល់ ហើយករណីនេះអាចកើតឡើងនៅពេលពេជ្រស្ថិតនៅជិតថ្មវិទ្យុសកម្មខ្លាំង ចំណែកតម្លៃរបស់វាវិញមានចាប់ពី ៥ ម៉ឺនដុល្លាររហូតដល់ជាង ៣០ ម៉ឺនដុល្លារក្នុងមួយការាត់ ។

៣. ស្វាយ

ក្នុងធម្មជាតិគេរកឃើញពេជ្រពណ៌ស្វាយមិនដល់ ១០០ ការាត់ផង ពណ៌របស់វាបានមកពី​​បរិមាណ​ដ៏​ច្រើន​នៃ​សារធាតុ boron និង​អ៊ីដ្រូហ្សែនដោយសារភាពកម្រទើបពេជ្រពណ៌ស្វាយមានតម្លៃថ្លៃខ្លាំងគឺ ១៥២០០ ដុល្លារសម្រាប់ទំហំ ០,៤២ ការាត់ ។

៤. ទឹកក្រូច

ពេជ្រមានពណ៌ទឹកក្រូចដោយសារភាពមិនបរិសុទ្ធនៃអាសូតដែលដាក់បញ្ចូលក្នុងបន្ទះពេជ្រកំឡុងពេលលូតលាស់យ៉ាងជ្រៅនៅក្នុងផែនដី ទន្ទឹមនេះពេជ្រពណ៌ទឹកក្រូចស្អាត បំផុតមានទំហំប្រហែល ១៤ ការាត់ ហើយធ្លាប់លក់ក្នុងតម្លៃ ២,៣៩៨,១៥១ ដុល្លារក្នុងមួយការាត់ ។

គេសន្មតថាពេជ្រ ៤ ពណ៌ខាងលើជាពេជ្រពណ៌កម្របំផុតព្រោះពួកវាជាត្បូងមួយក្នុងចំណោមត្បូងមួយម៉ឺនការាត់ដែលគេជីកពីធម្មជាតិ ៕ 

ប្រែសម្រួល ៖ វារី

ចុចអាន ៖ ការពិតដ៏ឈឺចាប់ នៅពីក្រោយការរុករកពេជ្រធម្មជាតិ

ចុចអាន ៖ មកស្គាល់ត្បូងពេជ្រថ្លៃជាងគេបំផុតលើពិភពលោក

The post ពេជ្រ ៤ ប្រភេទ ជាពណ៌កម្របំផុតលើលោក appeared first on Kampuchea Thmey Daily.