បាត់ខ្លួន ៣៦ ឆ្នាំហើយ តើត្បូងពេជ្រខៀវអារ៉ាប៊ីសាអូឌីតដែលថៃលួចទៅ នៅទីណា?

អាថ៌កំបាំងដ៏យូរអង្វែងបំផុតមួយនៅក្នុងប្រវត្តិសាស្ត្រថៃ-អារ៉ាប៊ីសាអូឌីត គឺជោគវាសនានៃត្បូងពេជ្រពណ៌ខៀវដ៏កម្រ ៥០ ការ៉ាត់ ដែលត្រូវបានលួចក្នុងឆ្នាំ ១៩៨៩ ។ គិតត្រឹមឆ្នាំ ២០២៥ វាមានរយៈពេល៣៦ឆ្នាំហើយ​ ដែលពេជ្រពណ៌ខៀវនេះមិនត្រូវបានរកឃើញវិញទេ សូម្បីតែកន្លែងលាក់ខ្លួនពិតប្រាកដករបស់វា ក៏នៅមិនទាន់ដឹងថាតើវាស្ថិតនៅឯណាដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាក៏ដោយ មានពាក្យចចាមអារ៉ាមជាច្រើនបានរីករាលដាលថា មន្ត្រីជាន់ខ្ពស់ថៃ ឬភរិយារបស់ពួកគេ ត្រូវបានគេឃើញពាក់គ្រឿងអលង្ការដែលដូចគ្នានឹងរបស់របរដែលបានបាត់ ដែលបង្ហាញពីការពាក់ព័ន្ធកម្រិតខ្ពស់។ ប៉ុន្តែអ្នកខ្លះមានជំនឿយ៉ាងទូលំទូលាយថា ត្បូងនេះត្រូវបានរក្សាទុក ឬលក់ដោយឯកជនដោយមន្ត្រីជាន់ខ្ពស់ថៃ។

ចំណែកអ្នកជំនាញខាងត្បូងជឿថា ពេជ្រអាចត្រូវបានគេកាត់ចូលទៅក្នុងថ្មតូចៗ ដើម្បីលាក់អត្តសញ្ញាណរបស់វា។ នេះ​នឹង​ធ្វើ​ឲ្យវាស្ទើរតែ​មិន​អាច​តាម​ដាន​បាន វាអាចជា​យុទ្ធសាស្ត្រ​ទូទៅ​ក្នុង​ការ​រត់ពន្ធ​ត្បូង។ អ្នកខ្លះស្មានថា វាត្រូវបានបំផ្លាញ ឬលាក់នៅក្នុងការប្រមូលសម្ងាត់នៃគ្រួសារដែលមានទំនាក់ទំនងនយោបាយ ឬអាចត្រូវគេសម្អាត បំបែកជាផ្នែកតូចៗជាច្រើន ដោយដាក់លក់បន្តនៅលើទីផ្សារ​ងងឹតអន្តរជាតិ ឬរក្សាទុកជាសម្ងាត់ក៏ថាបាន។

ដោយសារតែរកមិនឃើញនូវរបស់ដែលខ្លួនចង់បាន ទើបធ្វើឲ្យទំនាក់ទនងការទូតរវាងថៃ និងប្រទេសសំបូរប្រេងច្រើនជាងគេនៅលើពិភពលោកនេះ មិនអាចចុះសម្រុងគ្នាបានឡើយ។ ការបាត់ខ្លួនរបស់ពេជ្របានក្លាយជានិមិត្តរូបនៃរឿងអាស្រូវដែលមិនអាចដោះស្រាយបាន ដែលជំរុញឲ្យអារ៉ាប៊ីសាអូឌីតខឹងសម្បារ និងការមិនទុកចិត្តចំពោះមន្ត្រីថៃ ដែលរួមចំណែកដល់ការបង្កកការទូតរយៈពេល ៣០ ឆ្នាំ

ជាពិសេស ចាបតាំងពីរឿងក្ដីឃាតកម្មទៅលើអ្នកការទូតអារ៉ាប៊ីសាអូឌីតបីនាក់នៅទីក្រុងបាងកក កាលពីឆ្នាំ១៩៩០ ព្រមទាំងអ្នកជំនួញម្នាក់ទៀតដែលបញ្ចូនមកស៊ើបអង្កេតគ្រឿងអលង្ការដែលត្រូវគេលួច ។

ថ្វីដ្បិតតែ មកដល់សព្វថ្ងៃនេះពេជ្រពណ៌ខៀវដ៏កម្រនោះពុំទាន់រកឃើញនូវឡើយ ក៏ប៉ុន្តែអារ៉ាប៊ីសាអូឌីតបានសម្រេចចិត្តស្តារឡើងវិញនូវទំនាក់ទំនងពេញលេញជាមួយប្រទេសថៃ ក្នុងឆ្នាំ ២០២២ ។ ជាពិសេសថែមទៀត ដោយសារតែមេដឹកនាំ​នៃមជ្ឈិមបូព៌ាបាន​សង្កត់​ធ្ងន់​លើ​ការ​ឈាន​ទៅ​មុខ​ ដោយ​មិនរម្លឹកនូវ​អតីតកាលដ៏ខ្មៅងងឹត​រវាងគ្នាឡើងវិញ​ទេ។

ជាងនេះទៅទៀតដែរ ​ជនជាប់ចោទដែលជាអ្នកយាមជនជាតិថៃឈ្មោះ Kriangkrai Techamong  ថែមទាំងបានសុំទោសជាសាធារណៈ និងលុបកំហុសឆ្គងរបស់ខ្លួនដោយបួសជាព្រះសង្ឃមួយជីវិត។ ជាមួយគ្នានោះ ប្រទេស​ថៃ​ក៏បាន​សម្តែង​ការ​សោកស្ដាយ​យ៉ាង​ខ្លាំង ប៉ុន្តែ​នៅតែគ្មាន​នរណា​ម្នាក់​អាច​ផលិត​ពេជ្រ​ពណ៌​ខៀវ ឬ​ពន្យល់​ពី​ជោគវាសនា​របស់​ខ្លួន​បាន​ឡើយ៕

អត្ថបទ៖ សាង ស្រីល័ក្ខ

ចុចអាន៖ថៃ ធ្លាប់ផ្ទុះរឿងអាស្រូវដ៏អាម៉ាស់២ដង លួចត្បូងពេជ្រក្នុងវាំង និងសម្លាប់អ្នកការទូតអារ៉ាប៊ីសាអូឌីត