តាមសេចក្តីរាយការណ៍របស់ VN Express, ភ្លៀងបានធ្លាក់យ៉ាងចាស់ដៃនៅព្រឹកថ្ងៃព្រហស្បតិ៍ទី១៣ខែកុម្ភៈឆ្នាំ២០២៥ ដោយធ្លាក់ប្រហែល៥ម៉ោងដល់ម៉ោង៨ព្រឹក បណ្តាលឲ្យទីតាំងមួយចំនួនត្រូវជន់លិចយ៉ាងខ្លាំង បង្កការកកស្ទះចរាចរណ៍និងបិទផ្លូវក្រោមដី។

ក៏មានសេចក្តីរាយការណ៍អំពីការជន់លិចផ្ទះសម្បែងរបស់ប្រជាពលរដ្ឋផងដែរ ដោយកន្លែងខ្លះ ទឹកបានលិចចូលផ្ទះជម្រៅត្រឹមចង្កេះ ឯណោះ។

ទោះបីជាយ៉ាងណាក៏ដោយ មិនមែនតែហូជីមិញទេ សូម្បីខេត្តនៅជាប់នោះដូចជា Binh Duong, Ba Ria-Vung Tau និង Dong Nai ក៏រងគ្រោះធ្ងន់ដោយភ្លៀងកក់ខែនេះដែរ។

នេះគឺជាកំណត់ត្រាដ៏អាក្រក់មួយដែលទីក្រុងហូជីមិញ មិនធ្លាប់ជួបភ្លៀងកក់ខែធ្ងន់ធ្ងរបែបនេះឡើយ ចាប់តាំងពីឆ្នាំ២០០៦មក​ ដោយត្រឹមតែរយៈពេលខ្លីប៉ុណ្ណោះ ភ្លៀងបានធ្លាក់ហួសកម្រិតជាមធ្យមប្រចាំខែកុម្ភៈទាំងមូលទៅទៀត៕

អត្ថបទ៖ សុខ សុវណ្ណ

ចុចអាន៖ កម្ពុជានឹងមានភ្លៀងកក់ខែ គ្របដណ្តប់លើផ្ទៃដី១០-១៥% ចាប់ពីថ្ងៃទី១៣ ដល់ថ្ងៃទី២០

The post ភ្លៀងកក់ខែខ្លាំងបំផុតក្នុងរយៈពេល២០ឆ្នាំនៅវៀតណាម បង្កការជន់លិចធ្ងន់ធ្ងរ appeared first on Kampuchea Thmey Daily.

តាមរយៈរូបភាពដែលបង្ហោះលើគេហទំព័រ Vietnamnet.vn គេឃើញថា ទីក្រុងនេះពោរពេញដោយអ័ព្ទក្រាស់មើលសឹងតែមិនឃើញ។

ជុំវិញបញ្ហានេះ លោកស្រី Le Thi Xuan Lan អតីតអនុប្រធាននាយកដ្ឋានព្យាករ នៃស្ថានីយជលសាស្ត្រភាគខាងត្បូង បានឲ្យដឹងថា ក្រោយមេឃភ្លៀងខ្លាំងពេលយប់ ខ្យល់ក៏ខ្សោយវិញ ជាហេតុនាំឲ្យកើតមានអ័ព្ទក្រាស់បែបនេះ។

ស្របពេលជាមួយគ្នានោះដែរ អាជ្ញាធរក្រុងបានព្រមានដល់ពលរដ្ឋ ត្រូវមានការប្រុងប្រយ័ត្នឲ្យបានខ្ពស់ព្រោះថា កាលណាប៉ះពាល់ទៅនឹងអ័ព្ទបែបនេះច្រើនពេក វាអាចបង្កឲ្យមានបញ្ហាដូចជាកើតជំងឺផ្លូវដង្ហើម ឬឈឺបំពង់កជាដើម។

សូមបញ្ជាក់ថា បើយោងកម្មវិធីផ្តល់ទិន្នន័យអំពីការបំពុលខ្យល់ «IQAir», ហូជីមិញ គឺជាប់ចំណាត់ថ្នាក់ទី៧ក្នុងចំណោមទីក្រុងធំៗចំនួន១២០នៅលើពិភពលោក ដែលជាទីក្រុងមានខ្យល់ពុលអាក្រក់បំផុត គិតត្រឹមថ្ងៃពុធទី១៦ខែតុលាឆ្នាំ២០២៤។

កាលពីសប្តាហ៍មុន សូម្បីរាជធានីបាងកកនៃប្រទេសថៃ ក៏ត្រូវរងគ្រោះដោយខ្យល់បំពុលឬកម្ទេចធូលី PM2.5 ផងដែរ ដែលគ្របដណ្តប់លើសង្កាត់ចំនួន១៦។

ពេលនោះ រដ្ឋបាលក្រុងនិយាយថា PM2.5 នៅបាងកក បានកើនឡើងដល់កម្រិតគ្រោះថ្នាក់៣៧.៥មីក្រូក្រាមក្នុងខ្យល់មួយម៉ែត្រគូប ចាប់ពីម៉ោង៥ដល់ម៉ោង៧ព្រឹក ខណៈ WHO កំណត់ថា កម្រិតសុវត្ថិភាពរបស់ PM2.5 គឺត្រឹម ១៥មីក្រូក្រាមក្នុងខ្យល់មួយម៉ែត្រគូបប៉ុណ្ណោះ។

PM 2.5 គឺជាកំហាប់តូចៗ មានអង្កត់ផ្ចិត២.៥មីក្រូម៉ែត្រឬតូចជាងនេះ ដែលអាចជ្រៀតចូលទៅក្នុងចរន្តឈាម ឬសូម្បីតែសួត ហើយការប៉ះពាល់ធាតុបំពុលទាំងនេះ អាចបណ្តាលឲ្យរលាកនិងរមាស់ក្នុងភ្នែក និងស្បែក ក៏ដូចជាក្អក និងតឹងទ្រូងផងដែរ។ មិនត្រឹមប៉ុណ្ណឹង ពេលណាមនុស្សស្រូបខ្យល់បំពុលនេះយូរៗទៅ វាអាចបង្កឲ្យមានជំងឺមហារីកសួត និងគាំងបេះដូងជាដើម៕

អត្ថបទ៖ សុខ សុវណ្ណ

ចុចអាន៖ ទីក្រុងបាងកក គ្របដណ្តប់ដោយខ្យល់បំពុល ក្នុងកម្រិតគ្រោះថ្នាក់

The post អ័ព្ទពុលគ្រោះថ្នាក់ គ្របដណ្តប់ទីក្រុងហូជីមិញ តាំងពីព្រឹក ដល់ថ្ងៃរសៀល appeared first on Kampuchea Thmey Daily.

យោងតាមទីភ្នាក់នេះ, តំបន់ភាគខាងត្បូង នឹងជួបប្រទះភ្លៀងធ្លាក់ខ្លាំងជាពិសេសពេលរសៀលនិងពេលល្ងាច ហើយក្រៅពីទឹកភ្លៀង ក៏មានបាតុភូតផ្សេងទៀតកើតឡើងផងដែរ ដូចជាផ្គររន្ទះជាដើម។

ហេតុដូច្នេះហើយ ទើបវៀតណាម ចេញការព្រមានឲ្យអ្នករស់នៅតាមតំបន់វាលទំនាប ត្រូវប្រុងប្រយ័ត្ន និងត្រៀមខ្លួនជាប់ជានិច្ច។ 

តាមការព្យាករ, ដោយសារតែប្រព័ន្ធសម្ពាធទាប ទីក្រុងហូជីមិញ នឹងត្រូវវាយប្រហារដោយភ្លៀងធ្លាក់និងខ្យល់បក់ខ្លាំង ចាប់ពីថ្ងៃអង្គារដល់ថ្ងៃពុធ ខណៈចាប់ពីថ្ងៃព្រហស្បតិ៍ទៅ ខេត្តដែលរងគ្រោះផ្សេងទៀតមានដូចជា Long An, Ben Tre, Tien Giang, និង Dong Thap។

ពាក់ព័ន្ធនឹងគ្រោះធម្មជាតិនេះដែរ រដ្ឋាភិបាលវៀតណាម បានចេញរបាយការណ៍ថា គិតត្រឹមម៉ោង៣រសៀលថ្ងៃព្រហស្បតិ៍ទី១២ខែកញ្ញា តួលេខមនុស្សស្លាប់បានកើនឡើងដល់១៩៩នាក់ ខណៈ១២៨នាក់ កំពុងបាត់ខ្លួននៅឡើយ៕

អត្ថបទ៖ សុខ សុវណ្ណ

ចុចអាន៖ ចំនួនមនុស្សស្លាប់ដោយគ្រោះធម្មជាតិនៅវៀតណាម លោតឡើងដល់ជិត ២០០នាក់

The post សប្តាហ៍ក្រោយ ភ្លៀងធ្លាក់ខ្លាំងនឹងវាយប្រហារទីក្រុង ហូជីមិញ វិញម្តង អាចបង្កជាជំនន់ appeared first on Kampuchea Thmey Daily.

នៅសង្កាត់មួយចំនួនដូចជា Binh Thanh និង Go Vap ក៏ដូចជាកណ្តាលទីក្រុងផងដែរនោះ ទឹកបានជន់លិចជម្រៅកន្លះម៉ែត្រ លិចទាំងរថយន្ត ហើយមនុស្សត្រូវជាប់គាំង ចង់ចេញទៅណាក៏មិនរួច។

មិនត្រឹមប៉ុណ្ណឹង ព្យុះភ្លៀងពាំនាំមកជាមួយកម្លាំងខ្យល់បក់ខ្លាំង ក៏បានផ្តួលរំលំដើមឈើតាមដងផ្លូវ បាក់សង្កត់យានយន្ត បង្កជាការកកស្ទះចរាចរណ៍នៅទីតាំងមួយចំនួនផងដែរ។

សូមបញ្ជាក់ថា ពេលនេះ ប្រទេសវៀតណាម បានឈានចូលរដូវវស្សាហើយ ហើយភ្លៀងធ្លាក់ខ្លាំង ជាមួយផ្គររន្ទះ និងព្យុះ បានវាយប្រហារទីក្រុងហូជីមិញ ជាញឹកញាប់។

យោងតាមស្ថានីយ៍ជលសាស្ត្របានឲ្យដឹងថា តំបន់ខ្លះនៃទីក្រុង បានជួបប្រទះកម្រិតភ្លៀងធ្លាក់ ១៥០មិល្លីម៉ែត្រ, ​ខ្លះ៦១មិល្លីម៉ែត្រ និងខ្លះទៀត ៤០មិល្លីម៉ែត្រ៕

អត្ថបទ៖ សុខ សុវណ្ណ

ចុចអាន៖ ទីក្រុងហូជីមិញ ធ្លាក់ភ្លៀងមួយមេជួយឲ្យមេឃត្រជាក់ប្រហែល ៥ នាទី

The post ធ្លាក់ភ្លៀងមួយម៉ោង ទីក្រុងហូជីមិញ ត្រូវទឹកជន់លិច ល្ហាចល្ហឹម appeared first on Kampuchea Thmey Daily.

ផ្ទៃមេឃនៅផ្នែកជាច្រើននៃទីក្រុងហូជីមិញប្រមូលផ្ដុំទៅដោយពពកខ្មៅខ្មួលខ្មាញ់ ហើយទឹកភ្លៀងចាប់ផ្ដើមបង្អុរធ្លាក់មកលើតំបន់ភាគកណ្ដាលរបស់ទីក្រុងនៅជិតសង្កាត់ទី ៤, សង្កាត់ Binh Thanh, សង្កាត់ Phu Nhuan និងតំបន់ជាយក្រុងក្នុងសង្កាត់ទី ១២ និងសង្កាត់ Hoc Mon ជាដើម ។

ពលរដ្ឋមួយចំនួនដែលធ្វើដំណើរតាមម៉ូតូ និងមិនមានអាវភ្លៀងពាក់ត្រូវបង្ខំចិត្តជិះរកកន្លែងជ្រកនៅក្រោមសំយ៉ាបផ្ទះរហូតដល់មេឃរាំងនៅម៉ោង ៨ ព្រឹក ។ ក្រោយភ្លៀងបង្អុរមួយមេនេះហើយ អាកាសធាតុក្នុងទីក្រុងប្រែជាត្រជាក់ស្រស់ស្រាយ ពោលសីតុណ្ហភាពធ្លាក់ចុះ ៣ ទៅ ៤ អង្សាសេមកនៅត្រឹម ៣០ អង្សាសេ ក្រោយមេឃបើកថ្ងៃចង់ខ្លោចជាច្រើនថ្ងៃកន្លងមកនេះ ។

លោក Le Dinh Quyet ប្រធាន​នាយកដ្ឋាន​ព្យាករណ៍​ឧតុនិយម​ប្រចាំ​ស្ថានីយ​ជលសាស្ត្រ​តំបន់​ភាគ​ខាងត្បូង​បាន​ចេញការសន្មត​ថា ​ភ្លៀង​ធ្លាក់​មួយមេរយៈពេលប្រហែល ៥ នាទីនេះអាចជាការប្រែប្រួលបរិយាកាស ។ យ៉ាងណាក៏ទឹកភ្លៀងបានជួយសម្រាលការព្រួសកម្ដៅបន្តិចផងដែរ ប៉ុន្តែមេឃអាចនឹងបើកថ្ងៃមកវិញនៅពេលថ្ងៃត្រង់ និងអាចមានសីតុណ្ហភាព ៣៩ អង្សាសេ ។

ស្របពេលជាមួយគ្នានេះ ភ្នាក់ងារ​ឧតុនិយម​ក៏បានឲ្យដឹងដែរថា ចាប់ពីថ្ងៃទី៤ ដល់ថ្ងៃទី៥ ខែឧសភា វៀតណាមក៏នឹងមានភ្លៀងធ្លាក់បន្ថែមផងដែរ ប៉ុន្តែភ្នាក់ងារឧតុនិយមបាន​ណែនាំឲ្យ​ប្រជាពលរដ្ឋ​មានការ​ប្រុង​ប្រយ័ត្ន​ចំពោះ​ភ្លៀង​ធ្លាក់​ខុស​រដូវ​ទាំងនេះ ដោយសារ​ទឹកភ្លៀងធ្លាក់ថ្មីៗនេះផ្ទុកទៅដោយអាស៊ីត បើទោះបីជាវាជួយកាន់បន្ថយកម្ដៅក៏ដោយ ។

ក្នុងរយៈពេល ៤ ខែកន្លងមកនេះ តំបន់ទាំងមូលបានប្រឈមមុខនឹងអាកាសធាតុក្ដៅចង់ឆេះ ដោយសារតែបាតុភូត El Nino ទើបទាញឲ្យមេឃលែងបង្អុរទឹកភ្លៀងនៅក្នុងតំបន់ទូទាំងប្រទេសវៀតណាម ជាពិសេសតំបន់ខ្ពង់រាបកណ្តាល និងតំបន់ភាគខាងត្បូង ។

ទោះយ៉ាងណា កាលពីមួយសប្តាហ៍មុន នៅតំបន់ដីសណ្តទន្លេមេគង្គមួយចំនួនដូចជា Can Tho, Hau Giang, Tien Giang និង Kien Giang ក៏មានភ្លៀងធ្លាក់មួយមេផងដែរ ដោយជួយចាក់បំពេញដល់ប្រព័ន្ធធារាសាស្រ្តសម្រាប់តំបន់ដំណាំស្រូវ និងផ្លែឈើជាច្រើនឲ្យមានដង្ហើមដកឡើងវិញ បន្ទាប់ពីស្ងួតហួតហែងមួយរយៈពេលធំ ខណៈតំបន់មួយចំនួននៅតំបន់ខ្ពង់រាបភាគកណ្តាលក៏បានជួបប្រទះនូវភ្លៀងធ្លាក់រាយប៉ាយនាពេលថ្មីៗនេះផងដែរ ៕

ដោយ ៖ សុខ ជីវ័ន្ត

ចុចអាន ៖ នៅ បាងកក មេឃបើកថ្ងៃចង់ឆេះ សីតុណ្ហភាពឡើងដល់ ៥២ អង្សាសេ

The post ទីក្រុងហូជីមិញ ធ្លាក់ភ្លៀងមួយមេជួយឲ្យមេឃត្រជាក់ប្រហែល ៥ នាទី appeared first on Kampuchea Thmey Daily.

លោក Le Dinh Quyet ប្រធានមជ្ឈមណ្ឌលឧតុនិយមប្រចាំតំបន់ភាគខាងត្បូងបាននិយាយកាលពីថ្ងៃអង្គារថា រកលកកម្ដៅនេះអូសពេលតាំងតែពីខែមុនមកម្ល៉េះ ដោយសារតែឥទ្ធិពលនៃបាតុភូត El Nino ខណៈនៅខេត្ត Binh Phuoc បានកត់ត្រាសីតុណ្ហភាព ៣៨.៥ អង្សាសេ ដែលជាសីតុណ្ហភាពក្ដៅបំផុតមិនធ្លាប់មាន ចាប់តាំងពីដើមឆ្នាំមក ហើយរយៈពេលក្តៅស្ងួតហួងហែងនៅឆ្នាំនេះនឹងយូរជាងឆ្នាំមុនៗ ដូច្នេះ​រដូវវស្សា​អាច​នឹង​មក​ដល់​ប្រហែល​ពាក់កណ្តាល​ខែឧសភា​ឯណោះ ។

មជ្ឈមណ្ឌលបានបញ្ជាក់បន្ថែមថា ទោះយ៉ាងណា រលកកម្ដៅនឹងធ្លាក់ចុះអន់ថយវិញនៅចុងខែមីនា និងខែមេសា ខណៈនៅថ្ងៃពុធ ទី១៣ ខែមីនានេះ សីតុណ្ហភាពខ្ពស់បំផុតនៅក្នុងតំបន់នឹងមានប្រហែល ៣៦ ដល់ ៣៨ អង្សាសេ ខណៈទីក្រុងហូជីមិញអាចនឹងមានសីតុណ្ហភាពលើសពី ៣៨ អង្សាសេ ហើយតំបន់ភាគខាងត្បូងមួយចំនួននឹងកត់ត្រាសីតុណ្ហភាពលើសពី ៣៩ អង្សាសេ ។

ទន្ទឹមនោះ បាតុភូត El Nino ក៏បង្កភាពរាំងស្ងួតផងដែរ ដែលបណ្តាលឲ្យមានទឹកហូរចូលទៅកាន់ទន្លេមេគង្គតិចតួចប៉ុណ្ណោះ ខណៈអាកាសធាតុកាន់តែក្ដៅ ទឹកប្រៃនឹងហូរជ្រៀតចូលទន្លេកាន់តែច្រើនដែលបង្កផលប៉ះពាល់ដល់ការរស់នៅរបស់មនុស្សរាប់លាននាក់ ស្របពេលដែលទន្លេជាច្រើននៅទីក្រុងហូជីមិញ ជាពិសេសទន្លេសៃហ្គន កំពុងមានទឹកប្រៃហូរចូល ។

ចំណែកវិទ្យាស្ថានវិទ្យាសាស្ត្រឧតុនិយម និងបម្រែបម្រួលអាកាសធាតុ ចំណុះក្រោមក្រសួងធនធានធម្មជាតិ និងបរិស្ថាន ក៏បានឲ្យដឹងផងដែរថា ប្រទេសវៀតណាមអាចនឹងទទួលរងសីតុណ្ហភាពខ្ពស់បំបែកកំណត់ត្រាក្នុងរយៈពេល ៣ ទៅ ៤ ខែខាងមុខ ជាមួយនឹងភ្លៀងធ្លាក់តិចជាងឆ្នាំមុនៗ ជាពិសេសនៅតំបន់ប៉ែកខាងត្បូងប្រទេសតែម្ដង ៕

ដោយ ៖ សុខ ជីវ័ន្ត

ចុចអាន ៖ សេវាជួលរថយន្តនៅ វៀតណាម ត្រូវប៉ាន់ខ្លាំង ក្រោយចប់ចូលឆ្នាំថ្មី

The post ឆ្នាំនេះ វៀតណាម ក៏ប៉ះអាកាសធាតុក្ដៅហួតហែង appeared first on Kampuchea Thmey Daily.

យោងតាមការចុះផ្សាយដោយសារព័ត៌មាន Toui Tre នៅថ្ងៃទី២ ខែកុម្ភៈនេះបានឲ្យដឹងថា មន្ត្រីនគរបាលព្រហ្មទណ្ឌក្រុងបានសម្របសម្រួល និងសហការជាមួយប៉ូលិសសង្កាត់៦, សង្កាត់៨, សង្កាត់១២, សង្កាត់ Binh Tan, និងសង្កាត់ Hoc Mon ទើបឈានដល់ការបំបែកសម្បុកជួញដូរអាវុធខុសច្បាប់ដឹកនាំបុរសម្នាក់ឈ្មោះ Doan Quoc Thai អាយុ ៣២ ឆ្នាំ រស់នៅក្នុងសង្កាត់៨ ។

ចំណែកនៅប្រទេសថៃវិញ មានមេក្លោងឈ្មោះ Tran Ba Loc អាយុ ២៧ ឆ្នាំជាអ្នកមកពីខេត្ត Quang Ngai ភាគកណ្តាលប្រទេសវៀតណាម ហើយអាវុធខុសច្បាប់ដូចជា កាំភ្លើង និងគ្រាប់កាំភ្លើងដែលកម្លាំងសមត្ថកិច្ចរឹបអូសបាននោះ គឺដាក់លក់នៅលើវេទិកាប្រព័ន្ធផ្សព្វផ្សាយសង្គមដូចជា Facebook, Zalo និង Telegram ។

ប៉ូលិសបានឲ្យដឹងទៀតថា ជនសង្ស័យទាំងពីរនាក់បានរត់ពន្ធអាវុធខុសច្បាប់ចេញពីប្រទេសថៃ និងកម្ពុជា និងលួចលាក់ទុកនៅកន្លែងផ្សេងៗគ្នា ហើយជាបន្តបន្ទាប់ជនសង្ស័យបានបង្ហាញអាវុធទាំងនោះតាមបណ្តាញសង្គម ខណៈក្រុមអ្នកជួញដូរបានដាក់លក់កាំភ្លើងមួយដើមក្នុងតម្លៃ ១០ លានដុង ស្មើនឹង ៤០៥.៨ ដុល្លារ ។

​បន្ទាប់ពីប្រទះឃើញសកម្មភាពលក់អាវុធ និងដើម្បីទប់ស្កាត់អំពើខុសច្បាប់នេះ កម្លាំងសមត្ថកិច្ចបានឆ្មក់ចូលទៅទីតាំងសង្ស័យ និងចាប់ឃាត់ជនសង្ស័យទាំងនោះតែម្ដង ។ ស្របពេលជាមួយគ្នានេះប៉ូ លិសក្រុងហូជីមិញក៏កំពុងបើកការស៊ើបអង្កេតករណីនេះបន្ថែមទៀតផងដែរ ខណៈកាលពីឆ្នាំ ២០១៩ ប៉ូលិសក្រុងក៏ចាប់ផាកពិន័យជនជាតិថៃពីបទរក្សាទុកប្រដាប់ក្មេងលេងបង្កគ្រោះថ្នាក់ ៕

ដោយ ៖ សុខ ជីវ័ន្ត

ចុចអាន ៖ ប៉ូលិស ថៃ បង្ក្រាបល្បែងស៊ីសងខុសច្បាប់តាមអនឡាញខ្នាតយក្ស រឹបអូស​របស់ទ្រព្យមានតម្លៃជិត ៩ លានដុល្លារ

The post ប៉ូលិស ក្រុងហូជីមិញ ចាប់ក្រុមជួញដូរអាវុធខុសច្បាប់ រត់ពន្ធពី ថៃ និងកម្ពុជា មកលក់បន្តនៅ វៀតណាម appeared first on Kampuchea Thmey Daily.

រឿងនេះកើតឡើង បន្ទាប់ពីប្រទេសវៀតណាម ទើបរកឃើញវីរុសកូវីដបំប្លែងខ្លួន JN.1 លើកដំបូង ខណៈករណីឆ្លងបានកើនឡើងសាជាថ្មី ដល់ថ្នាក់មានអ្នកជំងឺត្រូវបញ្ជូនទៅមន្ទីរពេទ្យទៀត។

លោក Le Hong Nga អនុប្រធានមជ្ឈមណ្ឌលគ្រប់គ្រងជំងឺទីក្រុងហូជីមិញ (HCDC) បាននិយាយកាលពីថ្ងៃសុក្រទី២៦ខែមករាថា ករណីឆ្លងថ្មីបង្ហាញថា JN.1 ពិតជាខ្លាំងជាងកូវីដពូជផ្សេង ហើយមានសមត្ថភាពយកឈ្នះប្រព័ន្ធភាពស៊ាំក្នុងខ្លួនមនុស្សទៀតផង។ ទោះបីជាយ៉ាងណាក៏ដោយ វ៉ាក់សាំង នៅតែមានប្រសិទ្ធភាពការពារសេចក្តីស្លាប់ និងការធ្លាក់ខ្លួនឈឺធ្ងន់។

អ៊ីចឹងហើយ ទើបទីក្រុងហូជីមិញ ផ្តល់អនុសាសន៍ឲ្យក្រុមងាយរងគ្រោះក៏ដូចជាស្រ្តីមានផ្ទៃពោះ និងចាស់ជរា ត្រូវទទួលវ៉ាក់សាំងឲ្យបានគ្រប់ដូស។ លើសពីនេះ ទីក្រុងក៏នឹងពិនិត្យអ្នកដែលរស់នៅជាមួយក្រុមមនុស្សងាយរងគ្រោះ ថាតើពួកគេពិតជាបានចាក់វ៉ាក់សាំងគ្រប់ដូសមែនឬអត់ផងដែរ។

តាមសេចក្តីរាយការណ៍របស់ VN Express កាលពីដើមសប្តាហ៍, អ្នកជំងឺកូវីដ១២នាក់ក្នុងចំណោម១៦នាក់ ដែលបញ្ជូនចូលព្យាបាលក្នុងមន្ទីរពេទ្យទីក្រុងហូជីមិញកាលពីខែមុន គឺត្រូវបានតេស្តរកឃើញមានផ្ទុកវីរុសបំប្លែងខ្លួនប្រភេទ JN.1។

ចាប់ពីថ្ងៃទី១៨ខែធ្នូឆ្នាំ២០២៣ ដល់ថ្ងៃទី២២ខែមករាឆ្នាំ២០២៤ មជ្ឈមណ្ឌលប្រយុទ្ធប្រឆាំងជំងឺឆ្លងទីក្រុងហូជីមិញ បានរាយការណ៍អ្នកជំងឺកូវីដចូលសម្រាកព្យាបាលក្នុងមន្ទីរពេទ្យចំនួន៩៤ករណី បូករួមទាំងករណីដែលផ្ទេរទៅព្យាបាលនៅខេត្តជិតៗផងដែរ។

ក្នុង​ចំណោម​នោះ មាន​ករណី​ធ្ងន់ធ្ងរឈានដល់ដាក់​អុកស៊ីសែនចំនួន១៧ករណី ប៉ុន្តែ​មិន​មាន​អ្នក​ស្លាប់​ឡើយ ហើយករណីធ្ងន់ធ្ងរទាំងអស់ សុទ្ធតែជាក្រុមមានហានិភ័យខ្ពស់ ដូចជាអ្នកមិនចាក់វ៉ាក់វាំងឬមិនបានចាក់គ្រប់ដូសជាដើម៕

អត្ថបទ៖ សុខ សុវណ្ណ

ចុចអាន៖ វៀតណាម រកឃើញកូវីដបំប្លែងខ្លួនឆ្លងលឿន មានអ្នកចូលព្យាបាលក្នុងមន្ទីរពេទ្យច្រើនឡើងៗ

The post ទីក្រុងហូជីមិញ គិតគូរឲ្យចាក់វ៉ាក់សាំងកូវីដឡើងវិញ ដើម្បីការពារវីរុសបំប្លែងថ្មីឆ្លងខ្លាំង appeared first on Kampuchea Thmey Daily.