ទីក្រុងហូជីមិញ ធ្លាក់ភ្លៀងមួយមេជួយឲ្យមេឃត្រជាក់ប្រហែល ៥ នាទី

តំបន់ជាច្រើនក្នុងទីក្រុងហូជីមិញនៅព្រឹកថ្ងៃព្រហស្បតិ៍នេះមានអារម្មណ៍ត្រជាក់មួយភ្លែត ក្រោយមេឃបង្អុលទឹកភ្លៀងមួយមេក្នុងរយៈពេលប្រហែល ៥ នាទី បន្ទាប់ពីពលរដ្ឋក្នុងទីក្រុងមួយនេះរស់នៅក្រោមរលកកម្ដៅក្នុងកម្រិតបំបែកកំណត់ត្រាលើសពី ៣៥ អង្សាសេ ចាប់តាំងពីចុងខែមីនាមកម្ល៉េះ ។ នេះបើយោងតាមការចេញផ្សាយដោយសារព័ត៌មាន VN Express នៅថ្ងៃទី២ ខែឧសភានេះ ។

ផ្ទៃមេឃនៅផ្នែកជាច្រើននៃទីក្រុងហូជីមិញប្រមូលផ្ដុំទៅដោយពពកខ្មៅខ្មួលខ្មាញ់ ហើយទឹកភ្លៀងចាប់ផ្ដើមបង្អុរធ្លាក់មកលើតំបន់ភាគកណ្ដាលរបស់ទីក្រុងនៅជិតសង្កាត់ទី ៤, សង្កាត់ Binh Thanh, សង្កាត់ Phu Nhuan និងតំបន់ជាយក្រុងក្នុងសង្កាត់ទី ១២ និងសង្កាត់ Hoc Mon ជាដើម ។

ពលរដ្ឋមួយចំនួនដែលធ្វើដំណើរតាមម៉ូតូ និងមិនមានអាវភ្លៀងពាក់ត្រូវបង្ខំចិត្តជិះរកកន្លែងជ្រកនៅក្រោមសំយ៉ាបផ្ទះរហូតដល់មេឃរាំងនៅម៉ោង ៨ ព្រឹក ។ ក្រោយភ្លៀងបង្អុរមួយមេនេះហើយ អាកាសធាតុក្នុងទីក្រុងប្រែជាត្រជាក់ស្រស់ស្រាយ ពោលសីតុណ្ហភាពធ្លាក់ចុះ ៣ ទៅ ៤ អង្សាសេមកនៅត្រឹម ៣០ អង្សាសេ ក្រោយមេឃបើកថ្ងៃចង់ខ្លោចជាច្រើនថ្ងៃកន្លងមកនេះ ។

លោក Le Dinh Quyet ប្រធាន​នាយកដ្ឋាន​ព្យាករណ៍​ឧតុនិយម​ប្រចាំ​ស្ថានីយ​ជលសាស្ត្រ​តំបន់​ភាគ​ខាងត្បូង​បាន​ចេញការសន្មត​ថា ​ភ្លៀង​ធ្លាក់​មួយមេរយៈពេលប្រហែល ៥ នាទីនេះអាចជាការប្រែប្រួលបរិយាកាស ។ យ៉ាងណាក៏ទឹកភ្លៀងបានជួយសម្រាលការព្រួសកម្ដៅបន្តិចផងដែរ ប៉ុន្តែមេឃអាចនឹងបើកថ្ងៃមកវិញនៅពេលថ្ងៃត្រង់ និងអាចមានសីតុណ្ហភាព ៣៩ អង្សាសេ ។

ស្របពេលជាមួយគ្នានេះ ភ្នាក់ងារ​ឧតុនិយម​ក៏បានឲ្យដឹងដែរថា ចាប់ពីថ្ងៃទី៤ ដល់ថ្ងៃទី៥ ខែឧសភា វៀតណាមក៏នឹងមានភ្លៀងធ្លាក់បន្ថែមផងដែរ ប៉ុន្តែភ្នាក់ងារឧតុនិយមបាន​ណែនាំឲ្យ​ប្រជាពលរដ្ឋ​មានការ​ប្រុង​ប្រយ័ត្ន​ចំពោះ​ភ្លៀង​ធ្លាក់​ខុស​រដូវ​ទាំងនេះ ដោយសារ​ទឹកភ្លៀងធ្លាក់ថ្មីៗនេះផ្ទុកទៅដោយអាស៊ីត បើទោះបីជាវាជួយកាន់បន្ថយកម្ដៅក៏ដោយ ។

ក្នុងរយៈពេល ៤ ខែកន្លងមកនេះ តំបន់ទាំងមូលបានប្រឈមមុខនឹងអាកាសធាតុក្ដៅចង់ឆេះ ដោយសារតែបាតុភូត El Nino ទើបទាញឲ្យមេឃលែងបង្អុរទឹកភ្លៀងនៅក្នុងតំបន់ទូទាំងប្រទេសវៀតណាម ជាពិសេសតំបន់ខ្ពង់រាបកណ្តាល និងតំបន់ភាគខាងត្បូង ។

ទោះយ៉ាងណា កាលពីមួយសប្តាហ៍មុន នៅតំបន់ដីសណ្តទន្លេមេគង្គមួយចំនួនដូចជា Can Tho, Hau Giang, Tien Giang និង Kien Giang ក៏មានភ្លៀងធ្លាក់មួយមេផងដែរ ដោយជួយចាក់បំពេញដល់ប្រព័ន្ធធារាសាស្រ្តសម្រាប់តំបន់ដំណាំស្រូវ និងផ្លែឈើជាច្រើនឲ្យមានដង្ហើមដកឡើងវិញ បន្ទាប់ពីស្ងួតហួតហែងមួយរយៈពេលធំ ខណៈតំបន់មួយចំនួននៅតំបន់ខ្ពង់រាបភាគកណ្តាលក៏បានជួបប្រទះនូវភ្លៀងធ្លាក់រាយប៉ាយនាពេលថ្មីៗនេះផងដែរ ៕

ដោយ ៖ សុខ ជីវ័ន្ត

ចុចអាន ៖ នៅ បាងកក មេឃបើកថ្ងៃចង់ឆេះ សីតុណ្ហភាពឡើងដល់ ៥២ អង្សាសេ