តាមរយៈស្នាដៃតន្ត្រីជាច្រើន តារាចម្រៀងល្បីឈ្មោះទាំងពីរដួង បានយកធាតុផ្សំនៃសិល្បៈបុរាណ ដូចជា ចង្វាក់ បទភ្លេង និងទស្សនីយភាពសិល្បៈបុរាណ មកបន្សំជាមួយនឹងបច្ចេកទេសផលិតតន្ត្រីបែបថ្មី។ មិនតែប៉ុណ្ណោះ ស្នាដៃនេះ ក៏បានចូលរួមជួយបង្កើនការយល់ដឹងពីវប្បធម៌ខ្មែរ ដល់អ្នកស្តាប់ជំនាន់ថ្មី និងអន្តរជាតិផងដែរ ពិសេសមានការសាទរ និងចាប់អារម្មណ៍យ៉ាងខ្លាំងពីទស្សនិកជន Round Festival 2026 នៅហ្វីលីពីន ។

ឆ្លៀតក្នុងការឱកាសនេះដែរ នាដការរបាំបុរាណ ចាប សុីដាណាល់ ក្នុងនាមជាអ្នកដឹកនាំក្រុមសិល្បៈបុរាណ និងជាអ្នកសម្តែងផ្ទាល់ ក៏បានបង្ហាញមោទនភាពក្នុងការនាំយកសិល្បៈវប្បធម៌ និងជាអត្តសញ្ញាណជាតិ ទៅបង្ហាញលើឆាកព្រឹត្តិការណ៍ប្រគំតន្ត្រីដ៏អស្ចារ្យនេះផងដែរ។

យ៉ាងណាមិញ ជោគជ័យនេះមិនមែនកើតឡើងដោយចៃដន្យឡើយ ប៉ុន្តែជាលទ្ធផលនៃការខិតខំប្រឹងប្រែងយ៉ាងខ្ពស់ ក្នុងការសិក្សាស្រាវជ្រាវ និងការច្នៃប្រឌិតជាបន្តបន្ទាប់។ ជាក់ស្តែង តារាចម្រៀងទាំងពីរដួង បានយកចិត្តទុកដាក់លើគុណភាពស្នាដៃ ទាំងផ្នែកសំឡេង រូបភាព និងអត្ថន័យ ដើម្បីធានាថា ស្នាដៃនីមួយៗអាចឆ្លុះបញ្ចាំងទាំងរសនិយមបែបសម័យ ទន្ទឹមនឹងដួងព្រលឹងនៃវប្បធម៌ជាតិខ្មែរ ក្នុងចំណោមនោះ មានដូចជា៖

ការចងភ្ជាប់តន្ត្រីជាមួយសាវតារខ្មែរ បង្ហាញពីលទ្ធិទេវរាជ និងជាសារដាស់តឿន

១. បទ «ទេវរាជ» ច្រៀងដោយអ្នកនាង ទេព បូព្រឹក្ស ជាស្នាដៃតន្ត្រីបែបទំនើបលាយបញ្ចូលប្រវត្តិសាស្ត្រយ៉ាងល្អឥតខ្ចោះ ក្នុងន័យលើកតម្កើងមោទនភាពជាតិខ្មែរ តាមរយៈការរំលឹកលទ្ធិទេវរាជ ក្នុងរាជ្យព្រះបាទជ័យវរ្ម័នទី២ និងដើមកំណើតអាណាចក្រអង្គរ។ បទនេះក៏ជាសារសំខាន់ក្នុងការដាស់តឿនយុវជនឱ្យស្គាល់ឫសគល់វប្បធម៌ រួបរួមសាមគ្គី និងអភិវឌ្ឍខ្លួនសម្រាប់ជាតិ ខណៈបញ្ចូលស្ទីល Rap ជាមួយភ្លេងបុរាណ បង្កើតភាពទាក់ទាញ និងសម្គាល់អត្តសញ្ញាណខ្មែរយ៉ាងច្បាស់។

២. យុទ្ធសង្គ្រាម “War Of Warriors” វណ្ណកម្មចម្រៀងថ្មីនេះ គឺធ្វើឡើងស្របពេលនៃការឈ្លានពានរបស់ពូជចោរប្រវត្តិសាស្ត្រ ថៃ រំលោភលើដែនអធិបតេយ្យកម្ពុជា ដោយយកបរិបទប្រវត្តិសាស្ត្រមកបកស្រាយជាសំឡេងតន្ត្រី ហើយពណ៌នាយ៉ាងសុីជម្រៅនៃសាវតាឈ្លានពានរបស់ជាតិសាសន៍នេះ លើដែនកម្ពុជាដ៏ល្អផូរផង់។

៤. ចតុរង្គគុនខ្មែរ ជាបទចម្រៀងបែប Epic/Hip-hop ដែលលើកតម្កើងសិល្បៈ គុនខ្មែរ ឱ្យឃើញនូវភាពអង់អាច ខ្លាំងក្លា និងអត្តសញ្ញាណជាតិយ៉ាងច្បាស់។ សារសំខាន់នៃបទនេះ គឺបង្ហាញពីយុទ្ធគុនខ្មែរដែលមានតឹកតាងយ៉ាងច្បាស់លាស់ពីសម័យដូនតាខ្មែរដ៏រុងរឿង តាមរយៈនិមិត្តរូប “ស្តេចគ្រុឌ” និងដៃរុំអំបោះឆៅ ដែលតំណាងឱ្យភាពស៊ូទ្រាំ និងភាពរឹងមាំ។ បទនេះក៏មានគោលបំណងលើកកម្ពស់គុនខ្មែរ និងវប្បធម៌ជាតិឱ្យឈានដល់ឆាកអន្តរជាតិផងដែរ។

៤. មហានគរ (यशोधरपुर Yaśōdharapura) ជាបទចម្រៀងដែលផ្ទុះការចាប់អារម្មណ៍ខ្លាំងបំផុតក្នុងចំណោមបទចម្រៀងរសនិយមបែបវប្បធម៌របស់ G-Devith រហូតមានការជជែកវែកញែកពីតថភាពប្រវត្តិសាស្ត្រពិត នៃសម័យដ៏រុងរឿងរបស់ជាតិ។ ចំណែកឯអត្ថន័យវិញ ក៏មិនសូវជាមានគោលបំណងខុសពីបទខាងលើដែរ គឺក្នុងន័យផ្សព្វផ្សាយ និងលើកស្ទួយតម្លៃអត្តសញ្ញាណជាតិ។

៥. វីរនារី
តាមរយៈចម្រៀងមួយបទនេះ គឺមានការរួមបញ្ចូលដោយទ្សនីយភាពសិល្បៈបុរាណខ្មែរផងដែរ ដោយមានការរួមសម្តែងដោយក្រុមនាដការរបាំបុរាណ រួមមាននាដការរបាំ ចាប ស៊ីដាណាល់ (CHAB SYDANAL), លាវ ច័ន្ទលិកា (LEAV CHANLYKA), ឌួង សុខជា (DOUNG SOKCHEA), ពឿន ប្រុសពៅ (POEUN BROSPOV), ចេក សាំងថន (CHEK SANGTHORN), ជួន ភារ៉ា (CHOUN PHEARA), ចំរើន វីដ (CHAMROEUN VIT), ចាប ស៊ីដាណែល (CHAB SYDANEL), ពឿន ថារី (POEUN THARY), នក អ៊ែនីវ័ន្ត (NORK AIRNYVONE) ។

ដោយឡែក នៅមានចម្រៀង ២បទទៀត ដែលជាការរួមបញ្ចូលគ្នាមួយបែប ក្នុងន័យជំរុញផ្សាព្វផ្សាយ និងលើកតម្លៃវប្បធម៌ជាតិ គឺ Goblin និង Speechless ។

Speechless ដ្បិតជាចម្រៀងដែលពណ៌នាពីដំណើរជីវិតរបស់តារាចម្រៀងរូបនេះក៏ពិតមែន ប៉ុន្តែចំពោះអត្ថន័យនៃបទចម្រៀងនេះវិញ G-Devith បានពាំនាំនូវសារដ៏សំខាន់ ២ ទៅកាន់យុវជនខ្មែរ គឺកំហុសក្មេងខ្ចីដែលយល់ខុសថាការសិក្សាគ្មានតម្លៃ និងមួយទៀត គឺដាស់តឿនយុវជនខ្មែរ ត្រូវស្គាល់តម្លៃអត្តសញ្ញាណជាតិ ហើយធ្វើអ្វីដែលគួរគប្បីសម្រាប់ទាំងខ្លួនឯង និងសង្គមជាតិ។

ក្រៅពីវណ្ណកម្មចម្រៀង តារាចម្រៀងប្រុសស្រីទាំង ២ដួងនេះ ក៏តែងនាំយកអត្តសញ្ញាណវប្បធម៌ជាតិ ទៅបង្ហាញឆាកព្រឹត្តិការណ៍ជាតិ-អន្តរជាតិនានាផងដែរ។

វណ្ណកម្មតន្ត្រីរបស់សិល្បករទាំងពីរនេះ បានបង្ហាញថា តន្ត្រីមិនមែនត្រឹមជាការកម្សាន្តទេ ប៉ុន្តែជាមធ្យោបាយដ៏មានអានុភាពក្នុងការផ្សព្វផ្សាយវប្បធម៌ ប្រវត្តិសាស្ត្រ និងការបង្កើនស្មារតីស្នេហាជាតិ។ ការច្នៃប្រឌិតរវាងអតីតកាល និងបច្ចុប្បន្ន បានធ្វើឱ្យស្នាដៃរបស់អ្នកទាំងពីរក្លាយជាគំរូសំខាន់សម្រាប់វិស័យតន្ត្រីខ្មែរ នៅសម័យទំនើប៕

The post លទ្ធផលមិនក្បត់ការខំប្រឹង! G-Devith និង ទេព បូព្រឹក្ស មានស្នាដៃជំរុញតម្លៃវប្បធម៌ជាតិ ឱ្យរស់រវើកលើឆាកតន្ត្រីសម័យ appeared first on Kampuchea Thmey Daily.

ក្រោយចាប់ដៃគ្នាធ្វើឱ្យកក្រើកឆាកតន្ត្រី ក្នុងព្រឹត្តិការណ៍តន្ត្រីអន្តរជាតិដ៏ធំ ASEAN⋅Korea Music Festival 2026 ROUND តារាចម្រៀង ទេព បូព្រឹក្ស បានបង្ហើបពីគម្រោងដ៏ជាក់លាក់មួយ ក្នុងការនាំយកស្បៃ និងឧបករណ៍ភ្លេងបុរាណខ្មែរ បង្ហាញលើឆាកអន្តរជាតិ។

គម្រោងនៃការរួមបញ្ចូលគ្នារវាងតន្ត្រីសម័យ និងសិល្បៈបុរាណនេះ ត្រូវបានគេមើលឃើញថា ជាវិធីសាស្ត្រដ៏វិសេសវិសាលមួយ ក្នុងការបង្កើតភាពខុសប្លែក និងបន្ថែមតម្លៃសិល្បៈខ្មែរ នៅក្នុងបរិបទសកលភាវូបនីយកម្មវប្បធម៌។

លើសពីនេះ សារដែលតារាចម្រៀងបានចែករំលែកថា “see you soon again Philippines” បង្ហាញពីការចង់ត្រឡបប់ទៅជួបអ្នកគាំទ្រនៅ Philippines ម្តងទៀត ជាមួយការសម្ដែងដែលមានការរៀបចំកាន់តែអស្ចារ្យជាងមុន។ តួយ៉ាង នេះក៏បញ្ជាក់ពីភាពប្រសើរនៃទំនាក់ទំនងវប្បធម៌ និងការទទួលស្គាល់សិល្បៈខ្មែរ ក្នុងចំណោមទស្សនិកជនអន្តរជាតិផងដែរ។

គួរបញ្ជាក់ថា ASEAN-Korea Music Festival ROUND គឺជាវេទិកាតន្ត្រីអន្តរជាតិដ៏ធំមួយ ដែលប្រមូលផ្តុំសិល្បករពីបណ្តាប្រទេសអាស៊ាន និងកូរ៉េខាងត្បូង ដើម្បីបង្ហាញស្នាដៃ និងជំរុញការផ្លាស់ប្តូរវប្បធម៌។ ការចូលរួមរបស់សិល្បករខ្មែរក្នុងព្រឹត្តិការណ៍នេះ ត្រូវបានវាយតម្លៃថា ជាជំហានសំខាន់មួយក្នុងការពង្រីកសក្តានុពលសិល្បៈជាតិ និងការបង្ហាញអត្តសញ្ញាណខ្មែរ ទៅកាន់ឆាកពិភពលោក។

ជារួម ការត្រៀមបញ្ចូលស្បៃ និងភ្លេងបុរាណក្នុងការសម្ដែងបន្ទាប់ មិនត្រឹមតែបង្ហាញពីភាពច្នៃប្រឌិត និងទេពកោសល្យសិល្បៈរបស់តារាចម្រៀងប្រុសស្រីទាំង ២ដួងទេ ប៉ុន្តែថែមទាំងជាការបញ្ជាក់ពីការប្តេជ្ញាចិត្ត ក្នុងការលើកកម្ពស់ និងអភិរក្សវប្បធម៌ខ្មែរ ឱ្យបន្តរស់រវើក និងទទួលស្គាល់នៅលើឆាកអន្តរជាតិ ខណៈជាសកម្មភាពដែលអ្នកទាំងពីរតែងប្រឹងលើកស្ទួយ និងតម្កល់តម្លៃវប្បធម៌ជាតិកន្លងមក៕

The post ទេព បូព្រឹក្ស គ្រោងបង្ហាញអត្តសញ្ញាណខ្មែរលើឆាកអន្តរជាតិម្ដងទៀត តាមរយៈ «ស្បៃ» និង «ឧបករណ៍ភ្លេងបុរាណ» appeared first on Kampuchea Thmey Daily.

តាមរយៈសារពីទំព័រហ្វេសប៊ុកផ្លូវការរបស់អ្នកអង្គម្ចាស់ក្សត្រិយ៍ បានបង្ហាញការកោតសរសើរចំពោះសមត្ថភាព និងការបង្ហាញខ្លួនដ៏អស្ចារ្យរបស់សិល្បករទាំងពីរ ដែលមិនត្រឹមតែបង្ហាញសមត្ថភាពផ្នែកតន្ត្រីប៉ុណ្ណោះទេ ប៉ុន្តែថែមទាំងបាននាំយកអត្តសញ្ញាណ និងព្រលឹងវប្បធម៌ខ្មែរដ៏ល្អផូរផង់ ទៅបង្ហាញលើឆាកអន្តរជាតិទៀតផង។

អ្នកអង្គម្ចាស់ក្សត្រិយ៍ គូសបញ្ជាក់ថា ការសម្ដែងរបស់ G-Devith និង ទេព បូព្រឹក្ស គឺជាគំរូដ៏ល្អសម្រាប់សិល្បករខ្មែររួមទាំងជំនាន់ក្រោយ ក្នុងការប្រើប្រាស់សិល្បៈជាមធ្យោបាយផ្សព្វផ្សាយវប្បធម៌ជាតិទៅកាន់ពិភពលោក។ ជាពិសេស ការរចនាសម្លៀកបំពាក់ និងរចនាបថលើឆាកដែលបញ្ចូលធាតុនៃវប្បធម៌ខ្មែរ បានធ្វើឱ្យការសម្ដែងមានភាពប្លែក និងមានអត្តសញ្ញាណច្បាស់លាស់។

បន្ថែមពីនេះ អ្នកអង្គម្ចាស់ក្សត្រិយ៍ ក៏បានបង្ហាញក្តីសង្ឃឹមថា សិល្បករទាំងពីរនឹងទទួលបានឱកាសកាន់តែច្រើនបន្ថែមទៀត ក្នុងការចូលរួមលើឆាកអន្តរជាតិ និងបន្តជាអ្នកតំណាងដ៏មានតម្លៃក្នុងការផ្សព្វផ្សាយវប្បធម៌ និងសិល្បៈខ្មែរ។

គួរបញ្ជាក់ថា ព្រឹត្តិការណ៍ ASEAN⋅Korea Music Festival 2026 ROUND in Philippines គឺជាវេទិកាតន្ត្រីអន្តរជាតិដ៏សំខាន់មួយ ដែលប្រមូលផ្តុំសិល្បករពីបណ្តាប្រទេសអាស៊ាន និងកូរ៉េខាងត្បូង ដើម្បីបង្ហាញស្នាដៃ និងបង្កើនការផ្លាស់ប្តូរវប្បធម៌រវាងប្រទេសនានា។ ការចូលរួមរបស់សិល្បករខ្មែរ ក្នុងព្រឹត្តិការណ៍នេះ ត្រូវបានចាត់ទុកថា ជាជំហានសំខាន់មួយទៀត ក្នុងការលើកកម្ពស់ភាពមានសមត្ថភាព និងអត្តសញ្ញាណសិល្បៈខ្មែរលើឆាកអន្តរជាតិ៕

The post អ្នកអង្គម្ចាស់ក្សត្រិយ៍ នរោត្តម ចេណ្ណា មានមោទកភាព ដែលតារាខ្មែរ ២ដួង នាំយកដួងព្រលឹងវប្បធម៌ជាតិ បង្ហាញលើឆាកអន្តរជាតិ appeared first on Kampuchea Thmey Daily.

ក្នុងការសម្តែងលើកនេះ ទេព បូព្រឹក្ស បញ្ជាក់ថា ណងប្រាថ្នាដ៏ធំមួយរបស់ខ្លួន គឺនៅពេលមានឱកាសសម្តែងនៅក្រៅប្រទេស មិនថាទីណាក៏ដោយ គឺតែងតែចង់នាំយកសិល្បៈវប្បធម៌បុរាណខ្មែរទៅបង្ហាញជាមួយខ្លួនជានិច្ច។ ដោយហេតុនេះហើយ ទើបតារាចម្រៀងរូបនេះ បាននាំយកទស្សនីយភាពវប្បធម៌ខ្មែរ ទាំងបែបបុរាណ និងសម័យ ទៅបង្ហាញលើឆាកអន្តរជាតិ ក្នុងន័យឱ្យអន្តរជាតិបានស្គាល់ពីកម្ពុជាកាន់តែទូលំទូលាយ។

ជាមួយគ្នានេះដែរ តារាចម្រៀងរូបនេះក៏បានលើកឡើងថា ទោះបីមានមតិយោបល់ផ្សេងៗពីសាធារណៈ មិនថាពេញចិត្ត ឬមិនពេញចិត្តក្តី អ្វីដែលខ្លួនធ្វើ គឺធ្វើចេញពីចិត្ត និងសេចក្តីស្មោះត្រង់។ ហេតុនេះ អ្នកនាងអំពាវនាវឱ្យប្រជាជនខ្មែរ មានការយោគយល់ និងដាក់រឿងផ្ទាល់ខ្លួនមួយឡែកសិន ដ្បិតអីជាជាតិខ្មែរដែលមានឈាមដូចគ្នា ដូច្នេះគួរតែរួមគ្នាលើកស្ទួយវប្បធម៌ជាតិឱ្យឈានទៅមុខលើឆាកអន្តរជាតិ។

ការចូលរួមរបស់សិល្បករទាំងពីរនេះ ត្រូវបានគេរំពឹងដែរថា នឹងជួយបង្កើនការចាប់អារម្មណ៍លើសិល្បៈខ្មែរ និងបង្ហាញសមត្ថភាពសិល្បករខ្មែរ ទៅកាន់ទស្សនិកជនអន្តរជាតិយ៉ាងទូលំទូលាយ៕

The post ទេព បូព្រឹក្ស នាំអត្តសញ្ញាណវប្បធម៌ខ្មែរ ទៅបង្ហាញលើឆាក KBS ROUND Festival នៅហ្វីលីពីន appeared first on Kampuchea Thmey Daily.

តាមរយៈវីដេអូជាង ៨នាទី តារាចម្រៀង ទេព បូព្រឹក្ស បានរៀបរាប់ពីក្តីសុមង្គលក្នុងគ្រួសារដ៏កក់ក្តៅរបស់ខ្លួន ដែលមិនត្រឹមតែមានជីដូន លោកឪពុកអ្នកម្តាយ បងនិងប្អូនដ៏សែនល្អសម្រាប់ខ្លួន គឺលោក សុីម ទេពនិមិត្ត ដែលមហាជនច្រើនតែបានឃើញ នៅពីក្រោយការថតបទចម្រៀងរបស់ G-Devith និង ទេព បូព្រឹក្ស ។

អ្នកនាង ទេព បូព្រឹក្ស បានលួចសរសើរប្អូនដែលតែងដើរតួនាទីជាប្អូនប្រុសដ៏ល្អសម្រាប់ខ្លួន មិនថារងសម្តីធំតូចយ៉ាងណាក្តី ក៏ប្អូនប្រុសម្នាក់នេះ អត់ធ្មត់មិនដែលតបតសម្តីធំដាក់អ្នកនាងវិញ ក្នុងនាមជាបងស្រីឡើយ។

ឆ្លៀតក្នុងឱកាសនៃថ្ងៃមង្គលប្អូនប្រុសជាទីស្រលាញ់នេះដែរ​ អ្នកនាង ទេព បូព្រឹក្ស ក៏ជូនពរប្អូនទាំងពីរ និងពាំនាំមកជាមួយចម្រៀងដ៏មានន័័យទៅកាន់លោក សុីម ទេពនិមិត្ត និងអ្នកនាង គិន សិលាទេព្ពី ជាចំណងដៃផងដែរ។ ជាមួយគ្នានេះ អ្នកនាងក៏ភ្ជាប់នឹងខ្លឹមសារថា “លើលោកនេះគ្មានបងណាដែលមិនស្រលាញ់ប្អូនទេ បងនឹងមើលថែឯងរហូតដល់ជីវិតចុងក្រោយរបស់បង”។

នេះមិនត្រឹមតែជាចម្រៀង តែបានបង្ហាញឱ្យឃើញនូវទំនាក់ទំនងស្និទ្ធស្នាល និងក្តីស្រលាញ់របស់បងស្រីប្អូនប្រុស ក្នុងគ្រួសារ ធ្វើឱ្យសាធារណជនមួយចំនួន និងអ្នកគាំទ្ររំភើបចិត្ត និងចាប់អារម្មណ៍យ៉ាងខ្លាំងតាមបណ្តាញសង្គម៕

The post ទេព បូព្រឹក្ស បង្ហាញទំហំចិត្តបងស្រីទៅកាន់ប្អូនប្រុស តាមរយៈពាក្យពេចន៍ដ៏មានន័យ និងវីដេអូចម្រៀង appeared first on Kampuchea Thmey Daily.

ជួបរឿងហួសចិត្តមិនចប់មិនហើយបែបនេះ ទេព បូព្រឹក្ស ប្រាប់ G-Devith ឱ្យចេញចម្រៀងមួយបទ ដើម្បីឆ្លើយតបនឹងមតិយោបល់ និងការរិះគន់ដែលបានកើតឡើងមិនចប់។

នេះមិនមែនជាលើកដំបូងទេដែល G-Devith និង ទេព បូព្រឹក្ស ប្រឈមមុខនឹងការរិះគន់មិនសមហេតុផល។ កន្លងមក តារាទាំងពីរដួងនេះ តែងតែមានអ្នកចូលមកវាយប្រហារដោយប្រើពាក្យមិនសមរម្យ ឬចែកចាយព័ត៌មានឱ្យយល់ខុស។ ប៉ុន្តែទោះបីជាមានសកម្មភាពបែបនេះ ក៏ទាំងពីរមានវិធីឆ្លើយតបដោយប្រកបដោយប្រសិទ្ធ និងមិនធ្លាប់បោះបង់គោលដៅរបស់ខ្លួននោះដែរ។

ប៉ុន្មានខែមុន G-Devith ក៏ទើបតែរងការរិះគន់មិនសមហេតុផលមួយ ដែលពាក់ព័ន្ធនឹងរូបភាពផ្សាយពាណិជ្ជកម្មលើកំណាត់ផ្លូវ ដែលមានមនុស្សទូទៅឆ្លងកាត់។ មតិខ្លះលើកឡើងថា ផ្ទាំងផ្សព្វផ្សាយរូប G-Devith ដែលលាតសន្ធឹងលើផ្លូវ មិនសមរម្យទេ ពិសេសចំពោះព្រះសង្ឃដែលនិមន្តកាត់ ដោយទុកថា “ជិះក្រោមជើង G-Devith”។ តែទោះយ៉ាងណា អ្នកសិល្បៈ និងសាធារណជនផ្សេងទៀត យល់ថា មិនទាស់ខុសឡើយ ព្រោះនោះគ្រាន់តែជារូបភាពផ្សព្វផ្សាយ និងខ្លះចោទសួរថា បើប្រកាន់រូបមនុស្សលើផ្ទាំងផ្សព្វផ្សាយ ក៏គួរប្រកាន់អាគារជាន់លើក្រោម ឬស្ពានដែរ ព្រោះមានមនុស្សនៅជាក់ស្តែង និងសូម្បីតែបន្ទប់ទឹក។

ដោយឡែក ករណីនេះស្លាកលេខលើកនេះវិញ ក៏មានអ្នកចេញមុខមកបញ្ជាក់ទៅកាន់បុគ្គលដែលមិនច្បាស់ពីភាពត្រឹមត្រូវនៃស្លាកលេខខាងលើ ដូច្នេះថា “ស្លាកលេខនេះអាចដាក់បានដោយស្របច្បាប់ ព្រោះវាជាប្រភេទស្លាកលេខដែលចេញដោយក្រសួងសាធារណការ និងដឹកជញ្ជូន”។

ម្ចាស់គណនីដដែល គូសបញ្ជាក់ទៀតថា “ស្លាកលេខប្រភេទនេះជាស្លាកលេខផ្ទាល់ខ្លួន (កម្ពុជា) ដែលអនុញ្ញាតឱ្យម្ចាស់រថយន្តអាចដេញថ្លៃ ឬជ្រើសរើសលេខ និង អក្សរដែលខ្លួនពេញចិត្ត ដោយគោរពតាមលក្ខខណ្ឌ និងបទប្បញ្ញត្តិដែលក្រសួងបានកំណត់ Right Now ម៉ូតូក៏អាចដាក់ស្លាកលេខបែបនេះបានដែរ”។

រឿងរ៉ាវនេះ មតិខ្លះក៏បានបង្ហាញការហួសចិត្ត ចំពោះការវាយតម្លៃខុស និងមតិយោបល់មិនសមទំនងដែលត្រូវបានចែកចាយក្នុងបណ្តាញសង្គម។ តែយ៉ាងណា ករណីនេះក៏ឆ្លុះបញ្ចាំងថា ទោះបីជាការរិះគន់មិនចប់ ក៏ស្វាមីភរិយាមួយគូនេះ រឹងមាំជំនះ ហើយនៅតែបន្តបេសកកម្មលើកស្ទួយសិល្បៈ និងការច្នៃប្រឌិតទៅមុខជានិច្ច៕

The post ហត់ម៉េស! ទេព បូព្រឹក្ស ប្រាប់ស្វាមីចេញ ១បទស្អែក ក្រោយមានអ្នកតែងទាស់នឹងខ្លួន សូម្បីស្លាកលេខឡាន appeared first on Kampuchea Thmey Daily.

តាមរយៈសារដែលនាងបានចែករំលែកលើបណ្តាញសង្គម អ្នកនាង ទេព បូព្រឹក្ស បានបង្ហាញខ្លួនក្នុងឈុតស្បៃខ្មែរ ភ្ជាប់នឹងទិដ្ឋភាពប្រាសាទដ៏ល្អវិចិត្ររបស់កម្ពុជា ក្នុងន័យបង្ហាញថា ស្បៃរមិនត្រឹមជាសម្លៀកបំពាក់ប្រពៃណីសម្រាប់ពិធីបុណ្យ ឬពិធីការផ្សេងៗប៉ុណ្ណោះទេ ប៉ុន្តែជានិមិត្តរូបដ៏សំខាន់មួយនៃអរិយធម៌ និងអត្តសញ្ញាណវប្បធម៌ខ្មែរ។

ទេព បូព្រឹក្ស ថា “ស្បៃខ្មែរ គួរតែថែដោយញាតិ អត្តសញ្ញាណជាតិ សម្គាល់ខេមរា ស្បៃខ្មែរយើងតែងមានគេប្រាថ្នា ស្បៃខ្មែរយើងណាចូលអ្នកចងចាំ ចូលអ្នករួបរួមភ្ចាប់និស្ស័យ ប្រយត័្នសម្តីប្រែជាកម្ម យេីងខ្មែរតែមួយ កត់ចំណាំ ស្បៃខ្មែរថែផ្តាំតកូនចៅ” ។

ការចូលរួមរបស់ ទេព បូព្រឹក្ស ក្នុងការផ្សព្វផ្សាយស្បៃខ្មែរ ត្រូវបានមហាជនជាច្រើនសរសើរថា ជាគំរូល្អសម្រាប់សិល្បករជំនាន់ថ្មី ក្នុងការប្រើប្រាស់ឥទ្ធិពលរបស់ខ្លួនដើម្បីលើកកម្ពស់ និងការពារវប្បធម៌ជាតិ។ អ្នកគាំទ្រជាច្រើនបានបង្ហាញការគាំទ្រនៅលើបណ្តាញសង្គម ដោយលើកឡើងថា ការផ្សព្វផ្សាយបែបនេះអាចជួយឱ្យយុវជនជំនាន់ក្រោយមានការយល់ដឹង និងមានមោទនភាពលើអត្តសញ្ញាណវប្បធម៌ខ្មែរ។

កន្លងមក ក្រុមអ្នកវិភាគផ្នែកវប្បធម៌ ពិសេសក្រសួង-ស្ថាប័នពាក់ព័ន្ធ សុទ្ធតែមើលឃើញថា សិល្បករមានតួនាទីសំខាន់ក្នុងការចូលរួមថែរក្សា និងផ្សព្វផ្សាយបេតិកភណ្ឌវប្បធម៌ជាតិ។ នៅក្នុងសម័យដែលបណ្តាញសង្គមមានឥទ្ធិពលខ្លាំង ការបង្ហាញសម្លៀកបំពាក់ប្រពៃណីដូចជា “ស្បៃខ្មែរ” តាមរយៈសិល្បករ ឬបុគ្គលសាធារណៈ អាចជួយបង្កើនការយល់ដឹង និងការទទួលស្គាល់ពីសំណាក់សាធារណជនទាំងក្នុង និងក្រៅប្រទេស។

ជាក់ស្តែង “ស្បៃខ្មែរ” ត្រូវបានចាត់ទុកថា ជាផ្នែកមួយនៃអត្តសញ្ញាណវប្បធម៌ខ្មែរ ដែលតែងតែត្រូវបានប្រើប្រាស់ក្នុងពិធីបុណ្យប្រពៃណី ពិធីមង្គលការ និងពិធីការផ្សេងៗជាច្រើន។ ស្បៃមិនត្រឹមតែបង្ហាញពីសម្រស់នារីខ្មែរប៉ុណ្ណោះទេ ប៉ុន្តែថែមទាំងបង្ហាញពីសិល្បៈរចនាបថ និងបេតិកភណ្ឌវប្បធម៌ដែលមានប្រវត្តិសាស្ត្រយូរអង្វែងផងដែរ។

ក្នុងកាលៈទេសៈដែលថៃ តែងប្រឹងប្រជែងបំភ្លៃវប្បធម៌កម្ពុជា អ្នកពាក់ព័ន្ធជាច្រើនជឿថា ការចូលរួមផ្សព្វផ្សាយ និងការពារអត្តសញ្ញាណវប្បធម៌ គឺជាការទទួលខុសត្រូវរួមរបស់ប្រជាពលរដ្ឋគ្រប់រូប ដើម្បីធានាថាបេតិកភណ្ឌវប្បធម៌ដ៏មានតម្លៃទាំងនេះ នឹងត្រូវបានរក្សាទុក និងបន្តទៅកាន់ជំនាន់ក្រោយដោយមិនបាត់បង់អត្តសញ្ញាណដើម៕

The post ទេព បូព្រឹក្ស ជំរុញផ្សព្វផ្សាយ “ស្បៃខ្មែរ” និងអំពាវនាវឱ្យរួមគ្នាថែរក្សាអត្តសញ្ញាណជាតិ ខណៈគេតែងប្រាថ្នាជាកម្មសិទ្ធិ appeared first on Kampuchea Thmey Daily.

ក្រោយចប់ការសម្តែងលើឆាកតន្ត្រី តារាចម្រៀងរូបនេះ ដាច់ចិត្តលើកឡើងអំពីបញ្ហានៃការជាន់ពន្លិច និងរិះគន់មិនចេះចប់មិនចេះហើយចំពោះខ្លួន និងស្វាមីក្នុងរយៈពេលកន្លងមក ខណៈខិតខំធ្វើគ្រប់បែបយ៉ាង គ្រាន់តែដើម្បីចូលរួមលើកតម្កើង និងផ្សព្វផ្សាយតម្លៃវប្បធម៌ជាតិខ្មែរ តាមរយៈស្នាដៃសិល្បៈប៉ុណ្ណោះ។

ពាក្យពេចន៍ដែលអ្នកនាងបានលើកឡើងនៅលើឆាកនោះ ត្រូវបានមើលឃើញថា បង្កប់ទៅដោយក្តីឈឺចាប់ និងអារម្មណ៍សម្ពាធ ខណៈអ្នកនាងបានបញ្ជាក់ថា ខ្លួនមិនធ្លាប់គិតថានឹងត្រូវប្រឈមមុខនឹងការរិះគន់ ឬការជាន់ពន្លិចខ្លាំងបែបនេះឡើយ ទោះបីជាគោលបំណងនៃការងារសិល្បៈរបស់ខ្លួន គឺចង់ចូលរួមលើកកម្ពស់ និងថែរក្សាអត្តសញ្ញាណវប្បធម៌ជាតិក៏ដោយ។

បើទោះបីជាតែងរងការរិះគន់ជាន់ពន្លិចពីជនអគតិមួយចំនួនតូចជាហូរហែរ តែគូស្នេហ៍តារាចម្រៀងដ៏ល្បីឈ្មោះ G-Devith និង ទេព បូព្រឹក្ស តែងចូលរួមលើកស្ទួយវប្បធម៌ខ្មែរជាបន្តបន្ទាប់ មិនថាតាមរយៈបទចម្រៀងឆ្លុះបញ្ចាំងពីវប្បធម៌ អរិយធម៌កម្ពុជា, ការសម្តែងជាមួយឈុតច្នៃដំឡើងយ៉ាងប្រណិត បង្ហាញអត្តសញ្ញាណជាតិ ឬការរៀបចំព្រឹត្តិការណ៍តន្ត្រីសហសម័យនោះឡើយ។

ខណៈខែក្រោយនេះ អ្នកទាំងពីរនឹងតំណាងឱ្យសិល្បករកម្ពុជាក្នុងន័យចូលរួមលើកស្ទួយវប្បធម៌ខ្មែរ ចូលរួមក្នុងព្រឹត្តិការណ៍ដ៏ធំ ROUND Festival 2026 ដែលរៀបចំធ្វើនៅប្រទេសហ្វីលីពីន ដោយនឹងប្រព្រឹត្តិទៅនាថ្ងៃទី១៩ ខែមេសា ឆ្នាំ២០២៦ ខាងមុខនេះ។

តួយ៉ាង នេះត្រឹមជាការផ្សព្វផ្សាយសិល្បៈវប្បធម៌ខ្មែរប៉ុណ្ណោះទេ តែជាបេសកកម្មមួយក្នុងការនាំយកអត្តសញ្ញាណខ្មែរបង្ហាញលើឆាកអន្តរជាតិឱ្យកាន់តែទូលំទូលាយ ចំពោះមុខទស្សនិកជនលើសពី ២៥ ០០០នាក់ ក្នុងឆាកព្រឹត្តិការណ៍ដ៏ធំមួយ ដែលគ្រោងរៀបចំធ្វើនៅទីក្រុង Manila ប្រទេស Philippines ។

ការត្រៀមខ្លួននាំយកសិល្បៈវប្បធម៌ខ្មែរទៅសម្ដែងនៅប្រទេសហ្វីលីពីននេះ ក៏មានការឱ្យដឹងដែរថា អ្នកនាង ទេព បូព្រឹក្សនិងលោក ជី ដេវីត បានចំណាយថវិការផ្ទាល់ខ្លួនរហូតខ្ទង់ ២ម៉ឺនដុល្លារ ដើម្បីចេញទៅសម្តែងក្នុងកម្មវិធីដ៏ធំ និងអស្ចារ្យនោះ។

ប្រភពខាងលើគូសបញ្ជាក់ដែរថា “លុយគឺអាចជួយឱ្យការងារដំណើរការទៅមុខបាន ប៉ុន្តែវាមិនអាចទិញចក្ខុវិស័យក្នុងការច្នៃប្រឌិតបានទេ។ ការរៀបចំសម្រាប់ឆាកអន្តរជាតិត្រូវការគំនិតល្អប្រព័ន្ធការងារខ្ពស់និងភាពជាអ្នកដឹកនាំ។ បើមិនមានទឹកចិត្តពេលវេលា និងស្មារតីទទួលខុសត្រូវ អ្វីៗទាំងនេះមិនអាចកើតឡើងបានទេ។ ការលះបង់បែបនេះគួរតែត្រូវបានគេមើលឃើញលើកទឹកចិត្ត និងគោរពព្រោះមិនមែនគ្រប់គ្នាអាចដាក់អ្វីៗទាំងអស់ ដើម្បីឱ្យវប្បធម៌ខ្មែរ ឡើងឆាកអន្តរជាតិបានឡើយ”។

ចំណែកលោក ជី ដេវីត និងអ្នកនាង ទេព បូព្រឹក្ស បានឱ្យដឹងដែរថាលោកនឹងត្រៀមនាំយកការសម្ដែងទស្សនីយភាពបង្ហាញពីវប្បធម៌ខ្មែរក្នុងបទចម្រៀង «Goblin» លាយបញ្ចូលទម្រង់សិល្បៈ ទេពអប្សរាល្ខោនខោល និងល្បុក្កតោលើឆាកអន្តរជាតិដ៏ធំ ROUND Festival 2026 នេះ។

ការបង្ហាញអារម្មណ៍លើឆាករបស់តារាចម្រៀងរូបនេះ បានធ្វើឱ្យទស្សនិកជនជាច្រើនមានអារម្មណ៍អាណិត និងយល់ចិត្ត ខណៈមួយចំនួនបានបង្ហាញការគាំទ្រ និងផ្តល់កម្លាំងចិត្ត ដោយលើកឡើងថា សិល្បករជាច្រើនតែងតែប្រឈមមុខនឹងសម្ពាធពីការរិះគន់នៅលើបណ្តាញសង្គម ទោះបីជាពួកគេកំពុងព្យាយាមបង្កើតស្នាដៃ និងចូលរួមផ្សព្វផ្សាយតម្លៃវប្បធម៌ជាតិទៅកាន់សាធារណជនក៏ដោយ៕ ដោយ ៖ ចាន់រ៉ា

The post សម្ពាធការរិះគន់ធ្វើឱ្យ ទេព បូព្រឹក្ស ទប់ទឹកភ្នែកមិនបាន ពេលសម្តែងលើឆាកប្រគំតន្ត្រី appeared first on Kampuchea Thmey Daily.