ទេព បូព្រឹក្ស បង្ហាញទំហំចិត្តបងស្រីទៅកាន់ប្អូនប្រុស តាមរយៈពាក្យពេចន៍ដ៏មានន័យ និងវីដេអូចម្រៀង

តារាចម្រៀងល្បី ទេព បូព្រឹក្ស បានឆ្លៀតឱកាសពិធីរៀបអាពាហ៍ពិពាហ៍របស់ប្អូនប្រុស ដើម្បីចេញវីដេអូបង្ហាញ ពាក្យពេចន៍ក្នុងចិត្ត និងចម្រៀងសំរាប់ប្អូនប្រុស ជាទីស្រលាញ់ ធ្វើឱ្យសាធារណជនមួយចំនួន ពិសេសអ្នកគាំទ្ររំជួលចិត្តតាម។

តាមរយៈវីដេអូជាង ៨នាទី តារាចម្រៀង ទេព បូព្រឹក្ស បានរៀបរាប់ពីក្តីសុមង្គលក្នុងគ្រួសារដ៏កក់ក្តៅរបស់ខ្លួន ដែលមិនត្រឹមតែមានជីដូន លោកឪពុកអ្នកម្តាយ បងនិងប្អូនដ៏សែនល្អសម្រាប់ខ្លួន គឺលោក សុីម ទេពនិមិត្ត ដែលមហាជនច្រើនតែបានឃើញ នៅពីក្រោយការថតបទចម្រៀងរបស់ G-Devith និង ទេព បូព្រឹក្ស ។

អ្នកនាង ទេព បូព្រឹក្ស បានលួចសរសើរប្អូនដែលតែងដើរតួនាទីជាប្អូនប្រុសដ៏ល្អសម្រាប់ខ្លួន មិនថារងសម្តីធំតូចយ៉ាងណាក្តី ក៏ប្អូនប្រុសម្នាក់នេះ អត់ធ្មត់មិនដែលតបតសម្តីធំដាក់អ្នកនាងវិញ ក្នុងនាមជាបងស្រីឡើយ។

ឆ្លៀតក្នុងឱកាសនៃថ្ងៃមង្គលប្អូនប្រុសជាទីស្រលាញ់នេះដែរ​ អ្នកនាង ទេព បូព្រឹក្ស ក៏ជូនពរប្អូនទាំងពីរ និងពាំនាំមកជាមួយចម្រៀងដ៏មានន័័យទៅកាន់លោក សុីម ទេពនិមិត្ត និងអ្នកនាង គិន សិលាទេព្ពី ជាចំណងដៃផងដែរ។ ជាមួយគ្នានេះ អ្នកនាងក៏ភ្ជាប់នឹងខ្លឹមសារថា “លើលោកនេះគ្មានបងណាដែលមិនស្រលាញ់ប្អូនទេ បងនឹងមើលថែឯងរហូតដល់ជីវិតចុងក្រោយរបស់បង”។

នេះមិនត្រឹមតែជាចម្រៀង តែបានបង្ហាញឱ្យឃើញនូវទំនាក់ទំនងស្និទ្ធស្នាល និងក្តីស្រលាញ់របស់បងស្រីប្អូនប្រុស ក្នុងគ្រួសារ ធ្វើឱ្យសាធារណជនមួយចំនួន និងអ្នកគាំទ្ររំភើបចិត្ត និងចាប់អារម្មណ៍យ៉ាងខ្លាំងតាមបណ្តាញសង្គម៕