នារី Archives - Kampuchea Thmey Daily

មន្ត្រីរាជការជានារី ជាង ១០០ រូប កំពុងបំពេញការងារ នៅសាលារាជធានីភ្នំពេញ

អ៊ិន ពិសី — Wed, 06 Mar 2024 06:53:45 +0000

នៅសាលារាជធានីភ្នំពេញ មានមន្ត្រីរាជការក្របខណ្ឌជិត ៣០០ រូប ក្នុងនោះ នារី ចំនួនជាង ១០០ រូប ស្មើនឹង ៣៤,៧% ដែលបាននិងកំពុងបំពេញការងារក្នុងមុខតំណែងជាសមាជិកាក្រុមប្រឹក្សារាជធានី,អភិបាលរង នាយករងរដ្ឋបាល អនុប្រធានការិយាល័យប្រជាពលរដ្ឋ នាយិកា-នាយិការងទីចាត់ការ-អង្គភាព និងនៅថ្នាក់ការិយាល័យ។

នេះជាការលើកឡើងរបស់ លោក ឃួង ស្រេង អភិបាល នៃគណៈអភិបាលរាជធានីភ្នំពេញ ក្នុងពិធីអបអរសាទរខួបលើកទី ១១៣ ទិវាអន្តរជាតិនារី ៨ មីនា ឆ្នាំ ២០២៤ ក្រោមប្រធានបទ“ស្ត្រី និងក្មេងស្រី ក្នុងបរិវត្តកម្មឌីជីថល ដែលបានធ្វើឡើងនៅសាលារាជធានីភ្នំពេញ កាលពីព្រឹកថ្ងៃទី ៦ ខែមីនា ឆ្នាំ ២០២៤ នេះ ដោយមានវត្តមាន លោក ម៉ប់ សារិន ប្រធានក្រុមប្រឹក្សារាជធានីភ្នំពេញ ផងដែរ។

លោក ឃួង ស្រេង បានមានប្រសាសន៍លើកឡើងថា នៅសាលារាជធានីភ្នំពេញ មានមន្ត្រីរាជការក្របខណ្ឌសរុបចំនួន ២៩៧ រូប ក្នុងនោះ នារី ១០៣ រូប ស្មើនឹង ៣៤,៧% កំពុងកាន់មុខតំណែងជាសមាជិកាក្រុមប្រឹក្សារាជធានី អភិបាលរងរាជធានី នាយករងរដ្ឋបាល អនុប្រធានការិយាល័យប្រជាពលរដ្ឋ នាយិកា-នាយិការងទីចាត់ការ-អង្គភាព និងថ្នាក់ការិយាល័យ ដោយបានបំពេញការងារ និងទទួលខុសត្រូវលើការដឹកនាំអង្គភាព គ្រប់គ្រងរដ្ឋបាល ជំនាញបច្ចេកទេស និងជាប្រតិបត្តិករជួរមុខ ក្នុងការផ្តល់សេវាសាធារណៈជូនដល់ប្រជាពលរដ្ឋយ៉ាងសកម្មបំផុត។ មន្ត្រីរាជការក្របខណ្ឌ ជានារី ក្នុងរចនាសម្ព័ន្ធរដ្ឋបាលរាជធានីភ្នំពេញ បានសហការចូលរួមជ្រោមជ្រែងបំពេញភារកិច្ចជូនជាតិមាតុភូមិពីដំណាក់កាលមួយទៅដំណាក់កាលមួយ ជាពិសេសការផ្តល់សេវាសាធារណៈជូនប្រជាពលរដ្ឋក្នុងដែនសមត្ថកិច្ច ដោយមិនខ្លាចនឿយហត់ និងបានចូលរួមចំណែកជាច្រើនក្នុងសកម្មភាពសង្គម សកម្មភាពមនុស្សធម៌ និងការអភិវឌ្ឍរាជធានីភ្នំពេញ រហូតទទួលបានជោគជ័យយ៉ាងធំធេងជាបន្តបន្ទាប់។

លោកបន្តថា បច្ចុប្បន្ន នារី នៅតែជាដៃគូមិនអាចខ្វះបាន និងបានចូលរួមចំណែកយ៉ាងសំខាន់ក្នុងដំណើរការអភិវឌ្ឍជាតិមាតុភូមិ។ ទន្ទឹមនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានចូលរួមចំណែកលើកកម្ពស់សិទ្ធិនារី និងកុមារ យ៉ាងសំខាន់ ក្នុងការទប់ស្កាត់អំពើហិង្សាក្នុងគ្រួសារ ការធ្វើអាជីវកម្មផ្លូវភេទលើស្ត្រី និងកុមារ ការប្រយុទ្ធប្រឆាំងគ្រឿងញៀន ការយកចិត្តទុកដាក់លើទុរគតជន-ក្មេងកំព្រា និងការប្រយុទ្ធនឹងជំងឺកូវីដ-១៩ ព្រមទាំងសកម្មភាពមនុស្សធម៌ជាច្រើនទៀត។

លោកបន្តទៀតថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និង លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជានិច្ចកាល តែងគាំទ្រលើកកម្ពស់ និងជំរុញនារីកម្ពុជា ឱ្យចូលរួមក្នុងសកម្មភាពអភិវឌ្ឍន៍ជាតិ មាតុភូមិ តាមរយៈការបង្កើនចំនួនស្ត្រីជាមន្ត្រីរាជការស៊ីវិល កងកម្លាំងប្រដាប់អាវុធ និងមន្ត្រីមុខងារសាធារណៈ ក្នុងមុខតំណែងជាថ្នាក់ដឹកនាំក្រសួង-ស្ថាប័ន រាជធានី-ខេត្ត ក្រុង-ស្រុក-ខណ្ឌ ឃុំ-សង្កាត់ និងមន្ទីរ-អង្គភាពគ្រប់លំដាប់ថ្នាក់។

លោកបន្ថែមថា នាពេលបច្ចុប្បន្ននេះ បច្ចេកវិទ្យាគមនាគមន៍ និងព័ត៌មានវិទ្យា បានដើរតួនាទីកាន់តែសំខាន់ សម្រួលដល់ការប្រាស្រ័យទាក់ទង និងការផ្សារភ្ជាប់រវាងមនុស្ស និងមនុស្ស សង្គម និងសង្គម ប្រទេស និងប្រទេស គាំទ្រដល់ការអភិវឌ្ឍសេដ្ឋកិច្ច-សង្គម លើគ្រប់វិស័យ។ ប៉ុន្តែភាពរីកចម្រើន និងភាពសម្បូរបែបក្នុងបរិវត្តកម្មឌីជីថលនេះ មនុស្សគ្រប់ប្រភេទ និងគ្រប់អាយុ ជាពិសេសស្ត្រី និងក្មេងស្រី អាចនឹងក្លាយជាជនរងគ្រោះ ប្រសិនបើពួកគេមិនបានយល់ដឹងអំពីល្បិចបច្ចេកវិទ្យា ខ្វះសមត្ថភាពវិភាគ ឬ ខ្វះការការពារពីក្រុមគ្រួសារ និងសង្គមជាតិ ដូចជា ការឆបោកតាមប្រព័ន្ធឌីជីថល ការជួញដូរស្ត្រី-ក្មេងស្រី និងការបៀតបៀនតាមរូបភាពផ្សេងៗ ដែលធ្វើឱ្យប៉ះពាល់ដល់តម្លៃស្ត្រីខ្មែរ ជាដើម។

គួរបញ្ជាក់ថា នារី បម្រើការងារនៅសាខាកាកបាទក្រហមកម្ពុជារាជធានីភ្នំពេញ,នៅមន្ទីរបក្សរាជធានី និងនៅសាលារាជធានី សរុបចំនួន ២៦៥ នាក់ ដែលចូលរួមក្នុងកម្មវិធីនេះ ទទួលបានប្រាក់ឧបត្ថម្ភពី លោក ឃួង ស្រេង អភិបាលរាជធានី ដោយក្នុងម្នាក់ៗ ទទួលបានថវិកាចំនួន ៤០ ម៉ឺនរៀល៕

អត្ថបទ ៖ ស្រីរ័ត្ន

The post មន្ត្រីរាជការជានារី ជាង ១០០ រូប កំពុងបំពេញការងារ នៅសាលារាជធានីភ្នំពេញ appeared first on Kampuchea Thmey Daily.

រឿងមិនអាចរំលង ៦ យ៉ាងទាំងប្រុសនិងស្រី គួរគិតមុនឈានដល់អាពាហ៍ពិពាហ៍ជាមួយគ្នា

សាង ស្រីល័ក្ខ — Fri, 21 May 2021 03:41:04 +0000

មង្គលការគឺរឿងធំធេង មិនមែនមានតម្លៃត្រឹមល្អមើលឬពិធីធំដុំ របៀបកូនក្មេងគិតឡើយ ។ មុនពេលដែលអ្នកទាំងពីរបោះជំហានបន្តនៅក្នុងជីវិតមួយជាមួយគ្នា គួរគិតពិចារណានៅរឿងខ្លះៗសិន។ កុំគិតថារៀបការហើយគឺចប់ ជីវិតនៅមានរឿងច្រើនត្រូវធ្វើជាមួយគ្នា។

នេះជារឿងសំខាន់ៗជាច្រើន ដែលអ្នកទាំងពីរគួរតែពិចារណា មុនសម្រេចចិត្តរៀបអាពាហ៍ពិពាហ៍៖

១. សេពគប់មើលចិត្តគ្នាជាមុន

ជាធម្មតាមុនសម្រេចចិត្តរៀបការ ដៃគូគ្រប់គ្នាតែងតែធ្វើជាសង្សារគ្នា ដោយការស្វែងយល់មើលចិត្តថ្លើមគ្នាសិន។ នៅពេលដែលអ្នកទាំងពីរបានបង្កើតពិភពលោករួមគ្នាហើយ នោះនឹងបានដឹងពីចរិតលក្ខណៈនិងចំណាប់អារម្មណ៍ថាស្រដៀងគ្នា ឬយ៉ាងណា។ កុំប្រញាប់រៀបការព្រោះខ្លួនចាស់ គេថាឲ្យ ឬបង្រ្គប់កិច្ចដោយសារតែគ្មានអ្នកយក! សំខាន់ស្វែងយល់មើលចិត្តសងខាង ព្រោះដៃគូខ្លះពេលស្រលាញ់គ្នាមិនបញ្ចេញចរិតពិតធាតុពិតឡើយ តែពេលរៀបការជាប្ដីប្រពន្ធតាំងបង្ហាញមកអស់ពីចរិតអាក្រក់ៗខ្លួន។

២. ធ្វើបញ្ជីនូវលក្ខខណ្ឌផ្ទាល់ខ្លួន

គ្រប់គ្នាតែងតែមានមានជម្រើសនៅក្នុងការជ្រើសរើសនរណាម្នាក់ មកធ្វើជាដៃគូជីវិត។ ជាពិសេសគឺមនុស្សស្រី តែងតែមានបញ្ជីមួយរាយនូវគោលការណ៍ របស់មនុស្សដែលខ្លួនចង់បាន។ វាមើលទៅដូចជាហួសសម័យ ប៉ុន្តែនេះក៏ជាគំនិតល្អមួយថា តើដៃគូពិតជាសក្ដិសមជាមួយយើងឬអត់។

ប្រសិនបើមិត្តប្រុសមិនយល់ពីក្រុមគ្រួសារនិងមិត្តភ័ក្ដិរបស់យើង នេះគឺជាបញ្ហាដ៏សំខាន់សម្រាប់ឲ្យយើងពិចារណានូវទំនាក់ទំនងរបស់នេះ មុនពេលបង្កើតកំហុស ក្រោយរៀបការរួច។

ចងចាំថាស្នេហាជាការស្រលាញ់ពីរនាក់ តែបើខាងណាមិនពេញចិត្តគ្រួសារយើងផង តើថ្ងៃមុខទៅនឹងទៅជាយ៉ាងណា។ តែបើគិតថាស្រលាញ់គ្នាហើយចោលម៉ែឪក៏ធ្វើចុះ! គ្រាន់ថាប្រយ័ត្មកូនយើងធ្វើចឹងដាក់វិញ គិតមែនទែន ទាំងស្រីនិងប្រុស។

៣. រៀននៅម្នាក់ឯងដោយមិននៅឯកោ

អាពាហ៍ពិពាហ៍មានន័យថាបុគ្គលពីរនាក់ត្រូវបានផ្សារភ្ជាប់គ្នា។ នេះជារឿងមានសារៈសំខាន់ខ្លាំងណាស់មុនពេលដើរទៅក្នុងជីវិតមានគូ។ ចូររៀនពីរបៀបនៅម្នាក់ឯងជាមួយខ្លួនឯងដោយឯករាជ្យ មិនចាំបាច់ភ័យខ្លាចឬមានអារម្មណ៍ឯកោ និងត្រូវគេបដិសេធ។ ពេលវេលាដែលយើងលះបង់ចំពោះខ្លួនឯង អាចជាពេលវេលាមួយដែលរីករាយបំផុត។

៤. រៀនពីរបៀបគ្រប់គ្រងហិរញ្ញវត្ថុ

យើងបានដោះស្រាយការគ្រប់គ្រងហិរញ្ញវត្ថុផ្ទាល់ខ្លួន នៅពេលដែលនៅលីវ ប៉ុន្តែអ្វីៗគឺខុសគ្នានៅពេលយើងមានដៃគូ។ ដូច្នេះនេះជារឿងគួរចងចាំនិងចាំបាច់បំផុត ក្នុងការស្វែងយល់ពីវិធីដែលយើងត្រូវចែកចាយហិរញ្ញវត្ថុរបស់យើង ជាមួយដៃគូអាពាហ៍ពិពាហ៍។ កុំពេលស្រលាញ់សងខាងល្អដៃគូចង់បានអីឲ្យហ្នឹងនោះ! តែរៀបការរួច លុយជាអាទិភាពសំខាន់ហើយ។

៥. សំអាតនូវរឿងអតីតកាល

មុនពេលយើងរៀបការជាមួយនរណាម្នាក់ យើងច្បាស់ជាឆ្លងកាត់រឿងល្អនិងឆ្លងកាត់គ្រាដ៏អាក្រក់មួយមិនខាន (ព្រោះនៅក្នុងជីវិតគឺមានទាំងពីរ) ។ បន្ទាប់មកពីឆ្លងកាត់នូវរឿងទាំងនេះរួចមក ត្រូវជម្រះឬបំភ្លេចចោល ដើម្បីបោះជំហានទៅថ្ងៃមង្គលការ ដោយសុវត្ថិភាព រឹងមាំគ្រប់គ្រាន់ និងមានស្ថិរភាព សូម្បីតែមានព្យុះបោកបកក៏ដោយ។

៦. និយាយពីអនាគតរួមគ្នា

ស្នេហាពិតគឺនៅពេលមនុស្សពីរនាក់កំពុងសម្លឹងមើលទិសដៅតែមួយ មិនមែននៅជាមួយគ្នាតែចិត្តមិនដូចគ្នាឡើយ។ ដូច្នេះវាសំខាន់ណាស់ក្នុងការពិភាក្សាជាមួយស្វាមីនាពេលអនាគតថា តើផែនការរបស់អ្នកទាំងពីរមានអ្វីខ្លះសម្រាប់អនាគត ដែលនៅជិតនិងឆ្ងាយ។

ប្រសិនបើអ្នកទាំងពីរមានគោលដៅនិងបំណងប្រាថ្នាប្រហាក់ប្រហែលគ្នា នេះពិតជាអស្ចារ្យណាស់។

ប៉ុន្តែទោះយ៉ាងណា នៅក្នុងការសន្ទនាអាចលេចឡើងនូវភាពខុសគ្នា ហើយនេះជាអ្វីដែលគួរតែពិចារណាមុនពេលយឺតពេល៕

ប្រែសម្រួល៖ សាង ស្រីល័ក្ខ

ប្រភព៖weddingtips

ចុចអាន៖៣ ចំណុចលើកកម្ពស់ជីវិតអាពាហ៍ពិពាហ៍ឲ្យរឹងមាំជាងមុនទ្វេដង

ចុចអាន៖កុំរើសយកអាជីពដែលបំផ្លាញជីវិតអាពាហ៍ពិពាហ៍ដោយមិនដឹងខ្លួន

The post រឿងមិនអាចរំលង ៦ យ៉ាងទាំងប្រុសនិងស្រី គួរគិតមុនឈានដល់អាពាហ៍ពិពាហ៍ជាមួយគ្នា appeared first on Kampuchea Thmey Daily.

៥ យ៉ាងនារីៗគួរតាមឲ្យទាន់អំពីជីវិតក្នុងសម័យកាលដែលខ្លួនរស់នៅ

សាង ស្រីល័ក្ខ — Tue, 11 May 2021 06:18:00 +0000

ឆ្នាំ ២០២០ហើយ កុំនៅត្រាំត្រែងចិត្តច្រណែននិន្ទាគ្នាដូចរឿងភាគ ទោះនេះជាឆ្នាំកើតមានរឿងអាក្រក់ៗពាសពេញពិភពលោកក៏ដោយ យ៉ាងណាក្នុងនាមជាស្ត្រីសម័យទំនើប យើងត្រូវមានផែនការសម្រាប់ឆ្នាំបន្ទាប់ទៀតដែរ។ ទោះយ៉ាងណាយើងក៏មានពេលវេលាគ្រប់គ្រាន់ ដើម្បីមើលពីចំណុចខ្លាំងនិងចំណុចខ្សោយ ហើយស្វែងរកកន្លែងដែលដែលយើងត្រូវបន្តដំណើរទៅមុខទៀត។

នេះជាអ្វីដែលស្ត្រីគ្រប់រូបត្រូវដឹងអំពីជីវិតសព្វថ្ងៃនេះ៖

១. រាល់សកម្មភាពទុកដូចជាជាឥដ្ឋ

ចងចាំរឿងនេះសម្រាប់ឆ្នាំក្រោយ រាល់សកម្មភាពដែលយើងធ្វើគឺជាឥដ្ឋដែលបង្កើតជា“ ជញ្ជាំង” ។ តើជញ្ជាំងប្រភេទណាដែលយើងចង់បង្ហាញសម្រាប់ឆ្នាំក្រោយ? បំណែកមួយចំណែកៗ សកម្មភាពដែលយើងធ្វើ មិនត្រឹមតែជះឥទ្ធិពលដល់របៀបរស់នៅប្រចាំថ្ងៃប៉ុណ្ណោះទេ ប៉ុន្តែថែមទាំងរបៀបដែលអ្នកដទៃមើលឃើញមកយើងដែរ។

២. យើងគ្រប់គ្នាគឺជាអ្វីដែលយើងខ្លួនឯងកំពុងតែប្រើប្រាស់

សៀវភៅដែលយើងបានអាន ទូរទស្សន៍ដែលយើងមើល និងរបស់ដែលយើងញ៉ាំ។ របស់ទាំងនោះធ្វើឲ្យយើងជានរណា។ ប្រសិនបើយើងតែងតែនឿយហត់នឹងទុទ្ទិដ្ឋិនិយម សូមចាប់ផ្ដើមពីរឿងទាំងនេះ។ តើយើងកំពុងញ៉ាំអ្វី? នៅឆ្នាំក្រោយដើម្បីធ្វើឲ្យខ្លួនឯងប្រសើរជាងមុន មានតែញ៉ាំរបស់ដែលបន្ថែមដល់អាយុជីវិតរបស់យើង។ បរិភោគអាហារត្រឹមត្រូវ មើលភាពយន្តឯកសារនិងទូរទស្សន៍ដែលយើងមិនធ្លាប់មើលពីមុន។ រុញខ្លួនឯងចេញពីតំបន់ឯការបស់យើង ហើយសាកល្បងអ្វីដែលថ្មី។

៣. ទំនាក់ទំនងសំខាន់បំផុតដែលយើងមានគឺខ្លួនឯង

នេះគឺជាផ្នែកសំខាន់បំផុតមួយនៃដំបូន្មាន កុំលះបង់អាជីពរបស់យើងសម្រាប់ទំនាក់ទំនងឬមិត្តភាព។ កុំធ្វើសម្បទានជាមួយនរណាព្រោះតែការមិនពេញចិត្តឬគ្រាន់តែអាណិតគេ។ ផ្ទុយទៅវិញត្រូវដឹងថាខ្លួនឯងជាមនុស្សបែបណា មុនពេលមានអ្នកណាមកស្រលាញ់យើង។ ដូច្នេះចូរនៅម្នាក់ឯង ហើយអភិវឌ្ឍជាមួយភាពខ្លាំងនិងខ្សោយដែលមាននៅក្នុងខ្លួនសិន។

៤. រៀបចំគោលដៅ

ការធ្វើផែនការគឺជាចំណុចសំខាន់នៃអ្វីៗទាំងអស់។ ប្រសិនបើយើងចង់ឲ្យរឿងនេះក្លាយជាឆ្នាំល្អបំផុត មានន័យថា យើងត្រូវអង្គុយហើយគិតអំពីកន្លែងដែលយើងចង់នៅ មិនត្រឹមតែក្នុងរយៈពេល ១២ខែនោះទេ ប៉ុន្តែក្នុងរយៈពេល ១ ខែ ៥ ខែ ឬ ៨ ខែ។ យើងអាចរៀបចំផែនការមួយនេះបានល្អ ដោយប្រើសៀវភៅកំណត់គោលដៅប្រចាំឆ្នាំមួយ រួមទាំងទិដ្ឋភាពទូទៅប្រចាំខែរបស់យើង។

៥. ប្រថុយប្រថានដើម្បីលូតលាស់

ត្រូវប្រថុយប្រថានដើម្បីរីកលូតលាស់ ប្រឈមមុខនិងយកឈ្នះការភ័យខ្លាចដើម្បីអភិវឌ្ឍទំនុកចិត្ត និងជំរុញខ្លួនឯងចេញពីតំបន់សុខស្រួល ដើម្បីទទួលបានជោគជ័យ។ ការទទួលបានជោគជ័យ មិនបានកើតឡើងពេលមួយយប់ទេ ត្រូវព្យាយាមរិះរកវិធីដើម្បី “ក្លាយជាអ្នកមានរហ័ស” ឬធ្វើឲ្យភាពជោគជ័យកើតឡើងក្នុងរយៈពេលទ្វេដង។

ការក្លាយជាអ្នកមានលឿន ក៏មិនមែនមកពីត្រូវឆ្នោតជាតិដែរ។ គ្រប់យ៉ាងគឺត្រូវមានការខិតខំ។ ហើយការប្រថុយប្រថានគឺជាមេរៀនពីកំហុសបរាជ័យ ដើម្បីទទួលបានជោគជ័យ ដែលនៅចុងបញ្ចប់នៃការខិតខំប្រឹងប្រែងរបស់យើង៕

ប្រែសម្រួល៖ សាង ស្រីល័ក្ខ

ប្រភព៖careergirldaily

ចុចអាន៖គន្លឹះងាយៗ ៦ យ៉ាងវាយយកឈ្នះរយៈពេលឯកា

ចុចអាន៖វិធីបណ្ដុះបណ្ដាលខួរក្បាលឲ្យមានតែរឿងសុទិដ្ឋិនិយម

The post ៥ យ៉ាងនារីៗគួរតាមឲ្យទាន់អំពីជីវិតក្នុងសម័យកាលដែលខ្លួនរស់នៅ appeared first on Kampuchea Thmey Daily.

គន្លឹះរកស៊ីធ្វើជាអ្នកមានរបស់មនុស្សស្រី ដោយមិនចាំបាច់ពឹងបុរស

Sonya — Tue, 17 Nov 2020 04:44:00 +0000

ក្លាយជាអ្នកមាន ឬអ្នកក្រ មិនកំណត់លើភេទនោះទេ។ បុរសជាច្រើនលើលោកនេះ អាចក្លាយជាសេដ្ឋី រីឯស្ត្រីក៏អាចក្លាយជាសេដ្ឋីនីបានដូចគ្នា។

មនុស្សស្រីសម័យទំនើបមិនគួររស់នៅរង់ចាំការជ្រោមជ្រែងពីបុរសទៀតឡើយ ព្រោះយើងអាចក្លាយជាអ្នកមានដោយមិនចាំបាច់ពឹងមនុស្សប្រុស។

បើអ៊ីចឹង គួរចាប់ផ្ដើមរកស៊ីរបៀបណា ដើម្បីមានទ្រព្យជារបស់ខ្លួន ដោយមិនតោងទ្រព្យបុរស?

១. ចេះរៀបចំផែនការ

មនុស្សស្រីគ្រប់រូបត្រូវតែចេះរៀបចំផែនការជីវិតឲ្យបានល្អ ពោលទាំងជីវិតការងារ ព្រមទាំងជីវិតខ្លួនឯង ព្រោះមនុស្សជោគជ័យ និងសេដ្ឋីគ្រប់រូបពោរពេញទៅដោយផែនការជីវិតរៀងៗខ្លួន។

រីឯការរកស៊ីក៏ដូចគ្នាដែរ បើសិនជាចេះរៀបចំផែនការបានល្អ និងច្បាស់លាស់ជាមួយវាទោះបីជាមុខរបរតូចតាចក៏ដោយ វាគង់តែអាចពង្រីកជោគជ័យនៅថ្ងៃណាមួយជាមិនខាននោះទេ។

២. មិនបោះបង់ការរៀន

គ្មានរឿងណាមួយដែលអាចទទួលបានជោគជ័យដោយខ្វះការសិក្សានោះទេ ទោះបីអ្នកនោះក្លាយជាបុគ្គលជោគជ័យកម្រិតកំពូលក៏ដោយ ក៏ការដែលបន្តរៀនសូត្រជានិច្ច ជាការចាំចាច់ត្រូវមានជាទម្លាប់ជាប្រចាំ។ បន្តសិក្សា ជាគន្លឹះដើម្បីពង្រីកចំណេះដឹងរបស់ខ្លួនបន្ថែមទៀត ដើម្បីឲ្យដើរទាន់សង្គម។ បើសិនជាស្ត្រីមានអាជីវកម្មខ្លួនឯងផ្ទាល់ ការរៀនសូត្របន្ថែមស្វែងយល់ពីទីផ្សារ ព្រមទាំងដៃគូប្រកួតប្រជែងកាន់តែជារឿងត្រូវយកចិត្តទុកដាក់។

៣. តស៊ូជានិច្ច

មានមនុស្សជាច្រើនដែលបានជួបការលំបាក ជាទូទៅតែងតែបោះបង់វាចោល ជាហេតុធ្វើឲ្យពួកគេមិនអាចស្គាល់នៅភាពជោគជ័យនោះទេ។ ប៉ុន្តែស្រ្តីទាំងឡាយត្រូវដឹង គ្មានអ្នកណាម្នាក់អាចគេចផុតនៅការបរាជ័យនោះឡើយ ហើយបើជួបវា យើងគួរតែអរគុណហើយរឹងមាំឡើង។

នៅពេលដែលយើងបោះបង់ចោលពាក់កណ្តាលទី ប្រាកដកណាស់ យើងពិបាកក្នុងការត្រឡប់មកវិញ ហើយចាប់ផ្តើមពីបាតក្រោមម្តងទៀត។ ដូច្នេះយើងត្រូវតែតស៊ូ ទោះបីបរាជ័យមួយពេលក៏ដោយ នោះទើបអាចទទួលបានជោគជ័យនៅទីបំផុត៕

ប្រែសម្រួល៖ សន្យា

ប្រភព៖ Forbes

ចុចអាន៖ ៨ចំណុច ដែលសហគ្រិនស្ត្រីក្នុងតំបន់អាស៊ីគួរតែយល់ដឹង

The post គន្លឹះរកស៊ីធ្វើជាអ្នកមានរបស់មនុស្សស្រី ដោយមិនចាំបាច់ពឹងបុរស appeared first on Kampuchea Thmey Daily.

មេរៀនដឹកនាំដ៏សំខាន់ ពីសហគ្រិនឆ្នើមអ្នកស្រី shelia lirio marcelo

Sonya — Mon, 09 Nov 2020 07:29:12 +0000

សហគ្រិនឆ្នើមអ្នកស្រី Shelia Lirio Marcelo បានចែករំលែកទស្សនៈមួយសម្រាប់សហគ្រិនដទៃឲ្យចេះ “បង្កើតអ្នកដឹកនាំ” ជំនាន់ក្រោយខ្លួន ដើម្បីជម្រុញអាជីវកម្មមានភាពរឹងមាំ និងទទួលបានជោគជ័យយូរអង្វែង។

អ្នកស្រី Shelia Lirio Marcelo ជាស្ថាបនិក ក៏ជានាយកប្រតិបត្តិនៃគេហទំព័រ Care.com ដែលជាអាជីវកម្មផ្ដល់សេវាឲ្យឪពុកម្តាយស្វែងរកអ្នកមើលថែកូនៗ។

មុនពេលបើក Care.com ស្ថានិករូបនេះ មានបញ្ហាប្រឈមក្នុងការស្វែងរកការថែទាំកុមារដែលមានតម្លៃសមរម្យក្នុងនាមជាម្តាយដែលធ្វើការម្នាក់។ ដូច្នេះ នៅឆ្នាំ ២០០៦ គេហទំព័រ Care.com ត្រូវបានបង្កើតឡើង ហើយមកទល់នឹងបច្ចុប្បន្នស្ថាប័នេះកំពុងបម្រើប្រជាជនប្រមាណជាង ២៧ លាននាក់ ក្នុងបណ្ដាប្រទេសចំនួន ២០ ។

ក្រោយពីបើកដំណើរការជិត ២០ ឆ្នាំមកនេះ Care.com បានពង្រីកខ្លួនទៅក្នុងសេវាកម្មថែរក្សាគេហដ្ឋានផ្សេងទៀតគឺ សេវាកម្មអ្នកបម្រើ និងអ្នកមើលថែសត្វចិញ្ចឹម។

នាយកប្រតិបត្តិ Marcelo ទទួលស្គាល់ថា ខ្លួនមិនអាចធ្វើឲ្យគេហទំព័ររបស់ខ្លួនដើរបានតែម្នាក់ឯងនោះទេ។ អ្នកស្រីមានប្រសាសន៍ថា ការដែលចេះ បង្កើតអ្នកដឹកនាំ ជំនាន់ក្រោយខ្លួនជារឿងចាំបាច់ដែលសហគ្រិនត្រូវតែមានគ្រប់គ្នា។ បើធ្វើបែបនេះបាន សហគ្រិនមិនចាំបាច់គ្រប់គ្រងអាជីវកម្មទាំងមូលក្នុងពេលតែមួយនិងតែម្នាក់ឯងទេ។ អ្នកស្រីបន្តថា ក្នុងនាមជាមេដឹកម្នាក់ ត្រូវចេះប្រើចំណុចខ្លាំងរបស់បុគ្គលិក និងជម្រុញទឹកចិត្តពួកឲ្យក្លាយជាអ្នកដឹកនាំបន្ទាប់ពីខ្លួនឯង ទើបអាជីវកម្មជោគជ័យទៅបាន។ នេះបើយើងតាមបទសម្ភាសន៍ជាមួយកាសែត New York Times៕

ប្រែសម្រួល៖ សន្យា

ប្រភព៖ The New York Times

The post មេរៀនដឹកនាំដ៏សំខាន់ ពីសហគ្រិនឆ្នើមអ្នកស្រី shelia lirio marcelo appeared first on Kampuchea Thmey Daily.

សហគ្រិនស្ត្រីកំពូលៗ ដែលកសាងឥទ្ធិពលកម្រិតពិភពលោក

សាង ស្រីល័ក្ខ — Sat, 07 Nov 2020 11:39:29 +0000

សម័យនេះស្ត្រីមិនមែនដូចពាក្យថាបង្វិលចង្ក្រានមិនជុំទៀតឡើយ។ ស្ត្រីអាចធ្វើកិច្ចការមួយចំនួនដូចបុរស ហើយឡើងកាន់តំណែងដោយបានបង្ហាញពីឥទ្ធិពលរបស់ខ្លួនជូនពិភពលោក។

ខាងក្រោមនេះជាស្ត្រីទាំង ៥ រូប គ្រប់ជាតិសាសន៍ដែលតស៊ូក្រាញននៀល បង្ហាញគំរូដល់ស្ត្រីដទៃ ទោះបីអ្នកខ្លះកើតក្នុងគ្រួសារធូរធារក្ដី៖

១. Estina Ang

អាយុ ៦៤ ឆ្នាំ ជាស្ថាបនិកនិងជាប្រធាននាយកប្រតិបត្តិ Ghim Li Group សិង្ហបុរី។ អ្នកស្រីបានចាប់ផ្ដើមអាជីវកម្មផលិតសំលៀកបំពាក់នៅទសវត្សរ៍ឆ្នាំ ១៩៧០ ក្នុងនាមជាអ្នកម៉ៅការបន្តដោយមានប្រាក់ត្រឹមតែ ៣ ០០០ ដុល្លារនិងម៉ាស៊ីនដេរ ៦ ។

សព្វថ្ងៃនេះការផ្គត់ផ្គង់វាយនភណ្ឌនិងសំលៀកបំពាក់គឺជាផលិតផលធំជាងគេមួយនៅអាស៊ី ដែលដឹកជញ្ជូនប្រមាណ ៦០ លានដុំជារៀងរាល់ឆ្នាំ ដោយភាគច្រើននៃការបញ្ជាទិញគឺបានមកពីអ្នកលក់រាយធំ ៗ នៅអាមេរិកខាងជើង រួមទាំងហាងលក់ទំនិញWalmartនិងហាង Chain។

២. Lorraine Belo-Cincochan

អាយុ ៣៩ ឆ្នាំនាយកប្រតិបត្តិនិងជាប្រធានក្រុមហ៊ុន Wilcon Depot ហ្វីលីពីន។ ចាប់តាំងពីការលក់រាយផលិតផលកែលំអគេហដ្ឋាននិងផលិតផលអគារឈានមុខគេ បានបង្ហាញខ្លួនជាសាធារណៈ នៅខែ មិនា ឆ្នាំ ២០១៧ ក្រុមហ៊ុន Belo-Cincochan បានដឹកនាំអាជីវកម្មគ្រួសាររីកចម្រើនយ៉ាងខ្លាំងបំផុត។

គាត់ក៏បានបង្កើតប្រព័ន្ធសៀវភៅដៃ Wilcon និងដឹកនាំហាងរបស់ខ្លួនរហូតដល់ទ្រង់ទ្រាយធំ ក៏ដូចជាធ្វើឲ្យអតិថិជនកាន់តែងាយស្រួលក្នុងការបង់ប្រាក់តាមកាតឥណទាន។ ក្រុមហ៊ុន Wilcon បានបង្ហាញពីប្រាក់ចំណូលកើនឡើង ១១ % សម្រាប់ឆ្នាំ ២០១៧។ ចាប់តាំងពី IPO របស់ខ្លួន ភាគហ៊ុនបានកើនឡើងទ្វេដងដោយផ្ដល់ឲ្យនូវមូលធននីយកម្មទីផ្សារ ៨៨៧ លានដុល្លារ។

៣.

ស្ថាបនិកនិងជាប្រធានក្រុមហ៊ុនដឹកជញ្ជូន Minh Phuong វៀតណាម។ លោកស្រីជាអ្នកជំនួញអៀនប្រៀនម្នាក់នៅក្នុងទីផ្សារដែលកំពុងអភិវឌ្ឍ ប៉ុន្តែបែរជាមានការរីកចម្រើនយ៉ាងឆាប់រហ័ស។ លោកស្រីបានបង្កើតក្រុមហ៊ុន MP Logistics ក្នុងឆ្នាំ ១៩៩៥ ដែលដែលមានទឹកប្រាក់ប្រហែល ១ ម៉ឺនដុល្លារ និងយានយន្តជាង ១ ០០០ គ្រឿង ផ្ដល់សេវាបញ្ជូនបន្ត ហើយភាគច្រើនគឺដឹកជញ្ជូនតាមក្រុមហ៊ុនជប៉ុន ក៏ដូចជាការដឹកជញ្ជូនតាមផ្លូវអាកាសនិងមហាសមុទ្រ ឃ្លាំងស្តុកទំនិញ និងគម្រោងដឹកទំនិញផ្សេងទៀត។

៤. Miwako Date

អាយុ ៤៦ ឆ្នាំ ជាប្រធាន Mori Trust ជប៉ុន។ កូនស្រីរបស់លោក Akira Mori និងជាចៅរបស់លោក Taikichiro Mori ដែលជាស្ថាបនិកនៃអាណាចក្រអចលនទ្រព្យ Mori បានក្លាយជាប្រធានក្រុមហ៊ុនអភិវឌ្ឍន៍អចលនទ្រព្យដ៏ធំមួយកាលពី ២ ឆ្នាំមុន។

ចាប់តាំងពីឆ្នាំ ២០០៨ លោកស្រីបានដឹកនាំការពង្រីកអាជីវកម្មរបស់ក្រុមហ៊ុននៅក្នុងអាជីវកម្មសណ្ឋាគារ ដោយធ្វើកិច្ចព្រមព្រៀងជាមួយក្រុមហ៊ុនធំ ៗ ដូចជា Marriott អន្តរជាតិនិងជាអ្នកត្រួសត្រាយហាងសណ្ឋាគារ Schrager ។

៥. Jyoti Deshpande

អាយុ ៤៧ ឆ្នាំ ជាប្រធានការិយាល័យនៃប្រព័ន្ធផ្សព្វផ្សាយនិងការកម្សាន្តឧស្សាហកម្មពឹងផ្អែក ឥណ្ឌា។ Deshpande បានផ្លាស់ប្ដូរមុខតំណែងថ្មីរបស់គាត់នៅឯក្រុមហ៊ុន Reliance Industries កាលពីខែមេសា ដោយបានដើរតួយ៉ាងសំខាន់នៅក្នុងវិស័យប្រព័ន្ធផ្សព្វផ្សាយនិងការកម្សាន្តចំនួន ២០ ពាន់លានដុល្លាររបស់ឥណ្ឌា។

គាត់ទទួលបានអតិថិជន ១៦០ លាននាក់ក្នុងក្រុមហ៊ុន Reliance ដោយប្រើសេវាកម្មអ៊ីនធឺណិតល្បឿនលឿន និងបង្កើតមាតិកាពិសេសក្នុងទម្រង់ជាតន្ត្រីភាពយន្ត និងស៊េរីដើមចំនួន ១១ ភាសា៕

ប្រែសម្រួល៖ សាង ស្រីល័ក្ខ

ប្រភព៖forbes

The post សហគ្រិនស្ត្រីកំពូលៗ ដែលកសាងឥទ្ធិពលកម្រិតពិភពលោក appeared first on Kampuchea Thmey Daily.

តាមពិតប្រវែងសក់ បង្ហាញពីចរិតលក្ខណៈទៀត?

Sonya — Fri, 06 Nov 2020 01:30:13 +0000

តាមពិត ប្រវែងសក់របស់មនុស្សស្រីដែលចូលចិត្តទុកឬកាត់ គឺអាចឆ្លុះបញ្ចាំងថានាងជាមនុស្សបែបណាបាន។

ដូច្នេះ ចង់ដឹងថា ចរិតនារីតាមប្រវែងសក់នោះបែបណា មកអានខាងក្រោមនេះ៖

មនុស្សស្រីសក់ខ្លីខ្លាំង (ម៉ូដដូចមនុស្សប្រុស)

ជាមនុស្សដែលមានទំនុកចិត្តខ្ពស់ ចូលចំណោមគេ និងមានភាពរីករាយជាប់ខ្លួនជានិច្ច។ នាងក៏ជាមនុស្សដែលរាប់អានជាមួយមនុស្សថ្មីៗបានងាយ និងលឿនបំផុត។ ចូលចិត្តធ្វើការដោយប្រើបញ្ញា និងដោះស្រាយបញ្ហាដោយសច្ចភាព និងមិនកម្អៀង។

មនុស្សស្រីសក់ខ្លី (ត្រឹម ក លើស្មា)

ជាមនុស្សចូលចិត្តនិយាយត្រង់ទៅត្រង់មក ទោះបីជាដឹងថា និយាយចេញមកប៉ះពាល់អ្នកស្តាប់ក៏ដោយ។ នាងចេះគ្រប់គ្រងជីវិតផ្ទាល់ខ្លួន និងជីវិតការងារបានយ៉ាងល្អ។ នារីសក់ខ្លី ក៏ជាមនុស្សមិនចេះភ័យខ្លាច មានរបៀបរបប ជាពិសេសចូលចិត្តសាកល្បងបទពិសោធន៍ថ្មីៗ។

មនុស្សស្រីសក់ប្រះស្មា

ជាមនុស្សដែលមានភាពសក្តិសមជានារីឥតខ្ចោះ មានភាពថ្លៃថ្នូរ រូបរាងបែបទាន់សម័យ និងមានសុជីវធម៌ខ្ពស់។ នាងចូលចិត្តនិយាយច្រើនបន្តិច ប៉ុន្តែមនុស្សជុំវិញស្រឡាញ់ចូលចិត្តនាងណាស់។ ជាមនុស្សស្រីដែលចូលចិត្តការប្រកួតប្រជែង បង្កើតគម្រោងថ្មីៗ ជាពិសេសជំនាញខាងរាប់អានមិត្តថ្មី និងរក្សាមិត្តភាពបានរឹងមាំ។

មនុស្សស្រីសក់វែងអន្លាយ

ជាមនុស្សដែលពោរពេញដោយការប្រុងប្រយ័ត្ន មានការអត់ធ្មត់ខ្ពស់ និងមានក្តីស្រមៃច្រើន។ ចំពោះរឿងស្នេហានាងមិនចូលចិត្តស្នេហាបែបផ្លេកបន្ទោរឡើយ និងស្រឡាញ់ស្មោះអស់ពីខ្លួន ប៉ុន្តែទាមទារច្រើនពីដៃគូបន្តិច។ ជាមនុស្សស្រីមានស្មារតីដ៏មោះមុត បើដាក់គោលដៅហើយ នាងនឹងធ្វើគ្រប់យ៉ាងឲ្យតែបានសម្រេច៕

ប្រែសម្រួល៖ សន្យា

ប្រភព៖ Bright Side

ចុចអាន៖ ក្លិនទឹកអប់អាចប្រាប់ពីនិស្ស័យពិតនៃមនុស្សម្នាក់ៗបាន

The post តាមពិតប្រវែងសក់ បង្ហាញពីចរិតលក្ខណៈទៀត? appeared first on Kampuchea Thmey Daily.

នារី Archives - Kampuchea Thmey Daily

មន្ត្រីរាជការជានារី ជាង ១០០ រូប កំពុងបំពេញការងារ នៅសាលារាជធានីភ្នំពេញ

រឿង​មិន​អាច​រំលង ៦ យ៉ាងទាំងប្រុសនិងស្រី គួរ​គិត​មុន​ឈាន​ដល់​អាពាហ៍ពិពាហ៍ជាមួយគ្នា

៥ យ៉ាង​នារី​ៗ​គួរ​តាម​ឲ្យ​ទាន់​អំពី​ជីវិត​ក្នុង​សម័យកាល​ដែល​ខ្លួន​រស់នៅ​

គន្លឹះរកស៊ីធ្វើជាអ្នកមានរបស់មនុស្សស្រី ដោយមិនចាំបាច់ពឹងបុរស

មេរៀនដឹកនាំដ៏សំខាន់ ពីសហគ្រិនឆ្នើមអ្នកស្រី shelia lirio marcelo

សហគ្រិន​ស្ត្រី​កំពូលៗ ​ដែល​កសាង​ឥទ្ធិពល​កម្រិតពិភពលោក

តាមពិតប្រវែងសក់ បង្ហាញពី​ចរិតលក្ខណៈទៀត?

រឿងមិនអាចរំលង ៦ យ៉ាងទាំងប្រុសនិងស្រី គួរគិតមុនឈានដល់អាពាហ៍ពិពាហ៍ជាមួយគ្នា

៥ យ៉ាងនារីៗគួរតាមឲ្យទាន់អំពីជីវិតក្នុងសម័យកាលដែលខ្លួនរស់នៅ

សហគ្រិនស្ត្រីកំពូលៗ ដែលកសាងឥទ្ធិពលកម្រិតពិភពលោក

តាមពិតប្រវែងសក់ បង្ហាញពីចរិតលក្ខណៈទៀត?