បឹងកេត Archives - Kampuchea Thmey Daily

ព្រះខ័នរាជស្វាយរៀង ឬ បឹងកេត ឡើងវគ្គផ្តាច់ព្រ័ត្រ ជួប វិសាខា ពានសម្តេចតេជោ?

chean virakbot — Tue, 19 May 2026 02:32:30 +0000

បន្ទាប់ពីចប់ភារកិច្ចក្នុងពានរង្វាន់ផ្សេងៗ នៅសល់តែ ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៩ តែមួយប៉ុណ្ណោះសម្រាប់ក្លិបបាល់ទាត់កម្ពុជាដែលប្រជែងគ្នានៅចុងរដូវកាលនេះ។

ក្លិបដែលបន្តប្រជែងគ្នាមានតែ ៣ ប៉ុណ្ណោះគឺ វិសាខា កំពុងរង់ចាំវគ្គផ្តាច់ព្រ័ត្រ ខណៈ ព្រះខ័នរាជស្វាយរៀង និង បឹងកេត ត្រូវប្រជែងគ្នា ក្នុងជើងទី២ វគ្គពាក់កណ្តាលផ្តាច់ព្រ័ត្រ នាថ្ងៃទី២០ ខែឧសភា ឆ្នាំ ២០២៦ នេះនៅពហុកីឡដ្ឋានជាតិមរតកតេជោ។

ក្នុងជើងទី១ នៅពហុកីឡដ្ឋានជាតិអូឡាំពិក កាលពីថ្ងៃទី២៩ ខែមេសា ឆ្នាំ ២០២៦ ក្រុមទាំងពីរបានបញ្ចប់ដោយលទ្ធផលស្មើគ្នា ១-១ ដូច្នេះសម្រាប់ជើងទី ២ នេះត្រូវការឈ្នះ និង ចាញ់ដើម្បីស្វែងរកក្រុមខ្លាំងឡើងទៅវគ្គផ្តាច់ព្រ័ត្រ ជួប វិសាខា។

បឹងកេត ធ្វើយ៉ាងណាដើម្បីបានឡើងដល់វគ្គផ្តាច់ព្រ័ត្រ ដែលជាក្តីសង្ឃឹមតែមួយគត់ក្នុងរដូវកាលនេះ បន្ទាប់ពីមិនជោគជ័យក្នុងពានរង្វាន់ផ្សេងៗ។ មុនឈានដល់វគ្គពាក់កណ្តាលផ្តាច់ព្រ័ត្រ បឹងកេត បានយកឈ្នះក្រុម Lion King ទាំងពីរជើងដោយលទ្ធផល ១០-០ ក្នុងវគ្គ ១៦ ក្រុមចុងក្រោយ ហើយនៅវគ្គ ៨ ក្រុមចុងក្រោយ ពួកគេបានទម្លាក់ក្រុម កងយោធពលខេមរភូមិន្ទ ដោយលទ្ធផលទាំងពីរជើង ៤-០។

ចំណែក ព្រះខ័នរាជស្វាយរៀង បានប្តេជ្ញាស្វែងរក ជើងឯកឲ្យបាន ៣ ក្នុងរដូវកាលនេះ បន្ទាប់ពីឈ្នះជើងឯក ខេមបូឌានស៊ុបភើខាប់ និង ខេមបូឌានព្រីមៀរលីគ។ កាលវគ្គ ១៦ ក្រុមចុងក្រោយ ពួកគេ បានឈ្នះ ក្រុមបាត់ដំបង យូណៃធីត ដោយលទ្ធផលទាំងពីរជើង ១៧-៣ និងវគ្គ ៨ ក្រុមចុងក្រោយឈ្នះ គិរីវង់សុខសែនជ័យ ទាំងពីរជើង ៥-៣។

ក្រុមទាំងពីរសុទ្ធតែហត់នឿយដូចគ្នាកាលពីថ្ងៃអាទិត្យ ទី១៧ ខែឧសភា ក្នុងភារកិច្ចបញ្ចប់លីគបាល់ទាត់កំពូលកម្ពុជា។ ទោះបីជាយ៉ាងណា ក្រុមព្រះខ័នរាជស្វាយរៀង ហាក់ដូចជាមិនសូវធ្វើការធ្ងន់ទេនៅពេលប្រកួតជាមួយ ភ្នំពេញក្រោន ដោយសារជាការបញ្ចប់ភារកិច្ច។ ចំណែក បឹងកេត បានធ្វើការធ្ងន់សម្រាប់ការទទួលបានជ័យជម្នះ ៤-៣ លើក្រុម អឹមអូអាយ កំពង់ដេវ៉ា។

ជួបគ្នា ៥ លើកក្នុងរដូវកាលនេះ ព្រះខ័នរាជស្វាយរៀង ឈ្នះ១ បឹងកេត ឈ្នះ ២ និងស្មើគ្នា ១ នៅលីគកំពូលកម្ពុជា និងស្មើគ្នា ១ ទៀត នៅពានរង្វាន់សម្តេចតេជោ ហ៊ុន សែន។

លទ្ធផលជួបគ្នា ៥ លើករដូវកាលនេះ

ព្រះខ័នរាជស្វាយរៀង ៣-០ បឹងកេត (លីគ)
បឹងកេត ២-១ ព្រះខ័នរាជស្វាយរៀង (លីគ)
បឹងកេត ០-០ ព្រះខ័នរាជស្វាយរៀង (លីគ)
ព្រះខ័នរាជស្វាយរៀង ២-៣ បឹងកេត (លីគ)
បឹងកេត ១-១ ព្រះខ័នរាជស្វាយរៀង (ពានសម្តេចតេជោ)

អត្ថបទ៖ វិរបុត្រ

The post ព្រះខ័នរាជស្វាយរៀង ឬ បឹងកេត ឡើងវគ្គផ្តាច់ព្រ័ត្រ ជួប វិសាខា ពានសម្តេចតេជោ? appeared first on Kampuchea Thmey Daily.

បឹងកេត តាមស្មើពិន្ទុ អង្គរថាយហ្គឺរ ខណៈ ភ្នំពេញក្រោន ធ្លាក់មកលេខ ៣ ក្នុងតារាងពិន្ទុ

chean virakbot — Fri, 08 May 2026 03:13:11 +0000

បន្ទាប់ពីទទួលបានជ័យជម្នះដោយលទ្ធផល ៣-២ លើក្រុមម្ចាស់ជើងឯក ព្រះខ័នរាជស្វាយរៀង ពេលនេះ បឹងកេត បានតាមទាន់ពិន្ទុ ភ្នំពេញក្រោន និង អង្គរថាយហ្គឺរ ដើម្បីប្រជែងតំណែងលេខ ២ នៃលីគបាល់ទាត់កំពូលកម្ពុជា រដូវកាលនេះ។

បឹងកេត មាន ៥០ ពិន្ទុ ស្ថិតនៅលេខ ៤ ស្ថិតក្រោម អង្គរថាយហ្គឺរ និង ភ្នំពេញក្រោន ក៏មាន ៥០ ពិន្ទុដូចគ្នា ស្ថិតនៅលេខ ២ និងលេខ ៣ ប៉ុន្តែ ភ្នំពេញក្រោន និង អង្គរថាយហ្គឺរ នៅសល់ ២ ប្រកួតក្នុងដៃ ខណៈ បឹងកេត នៅសល់តែ ១ ប្រកួតទៀតប៉ុណ្ណោះ។

នៅថ្ងៃអាទិត្យ ទី១០ ខែឧសភា នេះ ភ្នំពេញក្រោន ត្រូវប្រកួតជាមួយ ណាហ្គាវើលដ៍ ហើយ អង្គរថាយហ្គឺរ ត្រូវប្រកួតជាមួយ អឹមអូអាយ កំពង់ដេវ៉ា។ លទ្ធផលនៃការប្រកួតគូទាំងពីរ នឹងធ្វើឲ្យប្រែប្រួលចំណាត់ថ្នាក់ក្នុងតារាង។

ប្រសិនបើ ភ្នំពេញក្រោន និង អង្គរថាយហ្គឺរ ឈ្នះដូចគ្នា តារាងចំណាត់ថ្នាក់នៅដដែល ប៉ុន្តែបើ អង្គរថាយហ្គឺរ ចាញ់ ហើយភ្នំពេញក្រោន ឈ្នះគឺជាអ្នកឡើងទៅលេខ ២ វិញ។ បច្ចុប្បន្ន ភ្នំពេញក្រោន មិនសូវល្អប្រសើរឡើយឡើយដោយចាញ់ច្រើនជាងឈ្នះ។ ៥ ប្រកួតចុងក្រោយ ពួកគេរកបាន ៣ ពិន្ទុប៉ុណ្ណោះ គឺ ឈ្នះ ១ និងចាញ់ ៤ ខណៈ ណាហ្គាវើលដ៍ ឈ្នះ ១ ស្មើ ១ និងចាញ់ ៣ សម្រាប់ ៥ ប្រកួតចុងក្រោយ។

ជួបគ្នា ៣ លើកកន្លងមក នៅក្នុងរដូវកាលនេះ ភ្នំពេញក្រោន ឈ្នះ ២ លើក ខណៈ ណាហ្គាវើលដ៍ ឈ្នះ ១ លើក។ ជុំទី១ ភ្នំពេញក្រោន បានឈ្នះ ១-០ ក្នុងជើងទី១ និងបន្តឈ្នះ ២-១ ក្នុងជើងទី២។ វគ្គ Top 6 ជើងទី១ ណាហ្គាវើលដ៍ ឈ្នះ ១-០ នៅទឹកដីរបស់ខ្លួន ហើយជើងទី២ ត្រូវទៅលេងទឹកដី ភ្នំពេញក្រោន វេលាម៉ោង ៦ ល្ងាច ថ្ងៃអាទិត្យ ទី១០ ខែឧសភានេះ។

អង្គរថាយហ្គឺរ ដែលឡើងមកកាន់លេខ ២ មិនត្រូវបានសហព័ន្ធកីឡាបាល់ទាត់អាស៊ី ទទួលស្គាល់ក្នុងនាមក្លិបបំពេញលក្ខខណ្ឌគ្រប់គ្រាន់ដើម្បីទទួលបានអាជ្ញាប័ណ្ណក្លិបចូលរួមប្រកួតពានអាស៊ីឡើយ ដូច្នេះទោះបីជាពួកគេទទួលបានចំណាត់ថ្នាក់លេខ ២ ក្នុងលីគ ក៏ទំនងជាមិនអាចបានប្រកួតពានអន្តរជាតិដែរ។ ដូច្នេះមានតែ ភ្នំពេញក្រោន និង បឹងកេត ដែលត្រូវប្រជែងគ្នាដណ្តើមកន្លះកៅពានអាស៊ី AFC Champions League Two៕

អត្ថបទ៖ វិរបុត្រ

The post បឹងកេត តាមស្មើពិន្ទុ អង្គរថាយហ្គឺរ ខណៈ ភ្នំពេញក្រោន ធ្លាក់មកលេខ ៣ ក្នុងតារាងពិន្ទុ appeared first on Kampuchea Thmey Daily.

ហេតុផល ២ យ៉ាង បឹងកេត អាចរកបាន ៣ ពិន្ទុពី ព្រះខ័នរាជស្វាយរៀង ល្ងាចនេះ

chean virakbot — Thu, 07 May 2026 00:31:00 +0000

បឹងកេត និង ព្រះខ័នរាជស្វាយរៀង ត្រូវជួបប្រកួតគ្នាទៀតហើយនៅល្ងាចថ្ងៃព្រហស្បតិ៍ ទី៧ ខែឧសភា ឆ្នាំ ២០២៦ នេះ បន្ទាប់ពីក្រុមទាំងពីរបានប្រកួតគ្នាកាលពីថ្ងៃទី២៩ ខែឧសភា ឆ្នាំ ២០២៦។

ជួបគ្នាកាលពីសប្តាហ៍មុន ក្រុមទាំងពីរបានបញ្ចប់ដោយលទ្ធផលស្មើគ្នា ១-១ សម្រាប់ការប្រកួតជើងទី១ ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៩។ វេលាម៉ោង ៦ ល្ងាចនេះនៅពហុកីឡដ្ឋានជាតិអូឡាំពិក គឺជាការប្រកួតសប្តាហ៍ទី២៩ នៃលីគបាល់ទាត់កំពូលកម្ពុជា។

បឹងកេត ត្រូវការរកឲ្យបាន ៣ ពិន្ទុ ដើម្បីតាមឲ្យទាន់ពិន្ទុរបស់ក្រុមចំណាត់ថ្នាក់លេខ ២ ភ្នំពេញក្រោន និងក្រុមលេខ ៣ អង្គរថាយហ្គឺរ ដែលមាន ៥០ ពិន្ទុដូចគ្នា។ ក្រោយឆ្លងកាត់ការប្រកួតឈ្នះ ១៣ ស្មើ ៨ និងចាញ់ ៧ បឹងកេត មាន ៤៧ ពិន្ទុ ស្ថិតនៅលេខ ៣ ក្នុងតារាងពិន្ទុ តាមពីក្រោយតែ ៣ ពិន្ទុប៉ុណ្ណោះ។

ប្រសិនបើ ពួកគេ ឈ្នះ ព្រះខ័នរាជស្វាយរៀង ដូច្នេះពួកគេនឹងមាន ៥០ ពិន្ទុ ស្មើ ប៉ុន្តែ ភ្នំពេញក្រោន និងអង្គរថាយហ្គឺរ នៅសល់ ១ ប្រកួតក្នុងដៃ។ ផ្ទុយទៅវិញ ប្រសិនបើ បឹងកេត ចាញ់ ពួកគេនឹងអស់ឱកាសដណ្តើមចំណាត់ថ្នាក់លេខ ២ ដែលត្រូវប្រកួតជម្រុះពានរង្វាន់អាស៊ីលំដាប់ទី២ AFC Champions League Two ហើយ ពីព្រោះពួកគេនៅសល់តែ ១ ប្រកួតចុងក្រោយជាមួយ អឹមអូអាយ កំពង់ដេវ៉ា នៅថ្ងៃទី១៧ ខែឧសភា។

ទោះបីជាយ៉ាងណា បឹងកេត ត្រូវបានគេមើលឃើញថា អាចនឹងរកបាន ៣ ពិន្ទុសម្រាប់ការប្រកួតនេះ ដោយផ្អែកលើហេតុផលសំខាន់ ២ យ៉ាង។ ហេតុផលទី ១ គឺ ទម្រង់លេងរបស់ បឹងកេត ល្អប្រសើរឡើងវិញ។ ជាពិសេស ខ្សែប្រយុទ្ធសំខាន់ Dehmie Cyrus បានជាសះស្បើយពីរបួស ហើយបានជួយឲ្យក្រុមទទួលបានជ័យជម្នះលើ ភ្នំពេញក្រោន ២-០ កាលពីចុងសប្តាហ៍កន្លងទៅ។

ហេតុផលទី ២ គឺ ព្រះខ័នរាជស្វាយរៀង បានឈ្នះជើងឯកលីគរួចទៅហើយ ដូច្នេះពួកគេទំនងជាប្រើប្រាស់កីឡាករជម្រើសដៃទី ២ ភាគច្រើន ដោយសារត្រូវថែរក្សាកីឡាករកុំឲ្យមានបញ្ហារបួស ទាំងកាយសម្បទា និងកម្លាំងស៊ុហ្វសម្រាប់ត្រៀមប្រកួតវគ្គផ្តាច់ព្រ័ត្រពានរង្វាន់ AFC Challenge League នៅថ្ងៃទី ១៣ ខែឧសភា ឆ្នាំ ២០២៦ នៅប្រទេសគុយវ៉ែត។

សូមបញ្ជាក់ថា ពីរគូទៀតសម្រាប់សប្តាហ៍ទី២៩ វគ្គ Top 6 ប្រកួតនៅថ្ងៃអាទិត្យ ទី១០ ខែឧសភា ឆ្នាំ ២០២៦ ភ្នំពេញក្រោន ទទួល ណាហ្គាវើលដ៍ នៅកីឡដ្ឋានភ្នំពេញក្រោន ហើយ អឹមអូអាយ កំពង់ដេវ៉ា ទទួល អង្គរថាយហ្គឺរ នៅកីឡដ្ឋានវិសាខា៕

អត្ថបទ៖ វិរបុត្រ

The post ហេតុផល ២ យ៉ាង បឹងកេត អាចរកបាន ៣ ពិន្ទុពី ព្រះខ័នរាជស្វាយរៀង ល្ងាចនេះ appeared first on Kampuchea Thmey Daily.

លោក Conor Nestor ម្សិលមិញស្វាយរៀងលេងមានប្រៀបជាង ប៉ុន្តែឱកាសគឺក្រុមរបស់លោកមានច្រើនជាង

Sina Noun — Thu, 30 Apr 2026 02:05:59 +0000

គ្រូបង្វឹកក្រុមបាល់ទាត់បឹងកេត ថាការប្រកួតពានរង្វាន់សម្ដេចជោ លើកទី១៩ នៅជើងទី១ ជាមួយព្រះខ័នរាជស្វាយរៀង ម្សិលមិញនេះគឺក្រុមភ្ញៀវលេងមានប្រៀបជាងដោយសារជាក្រុមលំដាប់កំពូលនៅកម្ពុជាទៅហើយ ប៉ុន្តែការបង្កើតឱកាសគឺក្រុមរបស់លោកមានច្រើនជាង។

លោក Conor Nestor

លោក Conor Nestor បានឲ្យដឹងក្រោយបញ្ចប់ការប្រកួតម្សិលមិញនេះថា លោកពិតជាពេញចំពោះការបង្ហាញទម្រង់លេងរបស់កូនក្រុម និងលទ្ធផលដែលពួកគេធ្វើបានជាមួយក្រុមព្រះខ័នរាជស្វាយរៀង។ ព្រះខ័នរាជស្វាយរៀងជាក្រុមលំដាប់កំពូលនៅកម្ពុជា ដូច្នេះច្បាស់ណាស់ការលេងម្សិលមិញនេះគឺពួកគេធ្វើបានល្អ និងបង្ហាញពីការមានប្រៀបជាង។ ប៉ុន្តែចំពោះការបង្កើតឱកាសលោកមើលឃើញថាកូនក្រុមរបស់លោកមានច្រើនជាងក្នុងការប្រកួតមួយនេះ។

លោក Conor Nestor

គ្រូបង្វឹករូបនេះបន្ថែមទៀត ការប្រកួតនេះលោកចម្លែកចិត្តបន្តិចដែរចំពោះអាជ្ញាកណ្ដាលដែលមិនផ្កល់ភាពវិជ្ជមានមកកាន់ក្រុមរបស់លោកជុំវិញការសកម្មភាពមួយចំនួននៅលើទីលាន ស្របពេលមើលទៅគួរតែផ្ដល់យុត្តិធម៌ ឬមានពិន័យកីឡាករជាដើម។ ការប៉ះគ្នានៅជើងទី២ អាចនឹងពិបាកបន្តិចសម្រាប់ក្រុមលោក ព្រោះក្រុមបឹងកេតមានភាពមមាញឹកច្រើន ២-៣ប្រកួតទៀតឯណោះ។ លោកនឹងព្យាយាមរៀបចំក្រុមឲ្យបានល្អដើម្បីត្រៀមនៅការប្រកួតជើងទី២ ពានរង្វាន់សម្ដេចតេជោនេះ។

ការប្រកួតម្សិលមិញ

បញ្ជាក់ដែរថា ការប្រកួតជើងទី១ វគ្គពាក់កណ្ដាលផ្ដាច់ព្រ័ត្រពានរង្វាន់សម្ដេចតេជោ នៅទឹកដីបឹងកេតជាមួយក្រុមភ្ញៀវព្រះខ័នរាជស្វាយរៀងនេះបានត្រឹមលទ្ធផលស្មើ ១-១ ប៉ុណ្ណោះ។ ដោយឡែកមួយគូទៀតនោះគឺបានបញ្ចប់ទាំងពីរជើងហើយគឺក្រុមវិសាខាបានឡើងទៅវគ្គផ្ដាច់ព្រ័ត្រ និងរង់ចាំ បឹងកេត ឬស្វាយរៀងដែលនឹងឡើងទៅប៉ះ។ ការប្រកួតជើងទី២ រវាងព្រះខ័នរាជស្វាយរៀង និង បឹងកេត នឹងធ្វើឡើងនៅថ្ងៃទី២០ ខែឧសភា ឆ្នាំ២០២៦ ខាងមុខ៕

ការប្រកួតម្សិលមិញ

អត្ថបទដោយ៖ នួន ស៊ីណា

The post លោក Conor Nestor ម្សិលមិញស្វាយរៀងលេងមានប្រៀបជាង ប៉ុន្តែឱកាសគឺក្រុមរបស់លោកមានច្រើនជាង appeared first on Kampuchea Thmey Daily.

បឹងកេត ប៉ះ ព្រះខ័នរាជស្វាយរៀង ជាមួយកំណត់ត្រា មិនទាន់ធ្លាយគ្រាប់បាល់ ពានសម្តេចតេជោ រដូវកាលនេះ

chean virakbot — Wed, 29 Apr 2026 01:03:00 +0000

វេលាម៉ោង ៦ ល្ងាច ថ្ងៃពុធ ទី២៩ ខែមេសា ឆ្នាំ ២០២៦ បឹងកេត ត្រូវបើកទ្វារពហុកីឡដ្ឋានជាតិអូឡាំពិកដើម្បីទទួលក្រុម ព្រះខ័នរាជស្វាយរៀង សម្រាប់ការប្រកួតជើងទី១ វគ្គពាក់កណ្តាលផ្តាច់ព្រ័ត្រ ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៩។

មុនឈានដល់វគ្គពាក់កណ្តាលផ្តាច់ព្រ័ត្រ បឹងកេត បានឆ្លងកាត់ ៤ ប្រកួតហើយក្នុងពានរង្វាន់សម្តេចតេជោ រដូវកាលនេះដោយមិនទាន់ស្គាល់បរាជ័យ និងរក្សាសំណាញ់ទីរបស់ខ្លួនបានយ៉ាងស្អាត។ នៅវគ្គ ១៦ ក្រុមចុងក្រោយ បឹងកេត បានទម្លាយសំណាញ់ទីរបស់ក្រុម ឡាយអ៊ិនឃីង ខេត្តសៀមរាប ទាំងពីរជើងចំនួន ១១ គ្រាប់ គឺការប្រកួតជើងទី១ ឈ្នះ ១០-១ និងការប្រកួតជើងទី២ ឈ្នះ ១-០។

នៅវគ្គ ៨ ក្រុមចុងក្រោយ ពួកគេបានយកឈ្នះក្រុម កងយោធពលខេមរភូមិន្ទ ដោយលទ្ធផលទាំងពីរជើង ៤-០ គឺ ជើងទី១ ឈ្នះ ២-០ និងជើងទី២ ឈ្នះ ២-០ ទៀត។ សរុបទៅឆ្លងកាត់ ៤ ប្រកួតកន្លងមក បឹងកេត ស៊ុតចូលដៃគូចំនួន ១៥ គ្រាប់។

ចំណែក ព្រះខ័នរាជស្វាយរៀង វិញសុទ្ធតែត្រូវបានដៃគូស៊ុតចូលគ្រាប់ការប្រកួតក្នុងពានរង្វាន់សម្តេចតេជោរដូវកាលនេះ។ នៅវគ្គ ១៦ ក្រុមចុងក្រោយ ពួកគេបានឈ្នះ ក្រុមបាត់ដំបង យណៃធីត ដោយលទ្ធផលទាំងពីរជើង ១៧-៣ គឺឈ្នះ ៥-២ ក្នុងជើងទី១ និងឈ្នះ ១២-១ ក្នុងជើងទី២។

ចំណែកនៅវគ្គ ៨ ក្រុមចុងក្រោយ ព្រះខ័នរាជស្វាយរៀង បានយកឈ្នះ គិរីវង់សុខសែនជ័យ ដោយលទ្ធផលទាំងពីរជើង ៥-៣។ នៅជើងទី១ គិរីវង់សុខសែនជ័យ បានឈ្នះដោយលទ្ធផល ២-១ ប៉ុន្តែនៅជើងទី២ ព្រះខ័នរាជស្វាយរៀង បានយកឈ្នះ ៤-១។ ដូច្នេះឆ្លងកាត់ ៤ ប្រកួត ព្រះខ័នរាជស្វាយរៀង ឈ្នះ ៣ និងចាញ់ ១ ស៊ុតចូលដៃគូចំនួន ២២ គ្រាប់ និងត្រូវគូស៊ុតចូលវិញ ៦ គ្រាប់។

បើក្រឡេកមើលប្រវត្តិជួបគ្នា ៣ លើកក្នុងលីគរដូវកាលនេះវិញ ក្រុមទាំងពីរឈ្នះ១ ស្មើ១ និងចាញ់១ដូចគ្នា។ ជើងទី១ ជុំទី១ ព្រះខ័នរាជស្វាយរៀង ឈ្នះ ៣-០ នៅពហុកីឡដ្ឋានជាតិមរតកតេជោ ហើយនៅជើងទី២ បឹងកេត បានយកឈ្នះ ២-១ នៅពហុកីឡដ្ឋានជាតិអូឡាំពិក។ វគ្គ Top 6 ជើងទី១ ក្រុមទាំងពីរស្មើគ្នា ១-១។

នៅល្ងាចនេះដែរ វិសាខា ប្រកួតជាមួយ អាយអេសអាយ ដង្កោសែនជ័យ ក្នុងជើងទី២ នៅកីឡដ្ឋាន ISI Park។ វិសាខា មានភាពកក់ក្តៅសម្រាប់ការប្រកួតជើងទី២ បន្ទាប់ពីជើងទី១ ពួកគេបានឈ្នះដោយលទ្ធផល ៣-០៕

អត្ថបទ៖ វិរបុត្រ

The post បឹងកេត ប៉ះ ព្រះខ័នរាជស្វាយរៀង ជាមួយកំណត់ត្រា មិនទាន់ធ្លាយគ្រាប់បាល់ ពានសម្តេចតេជោ រដូវកាលនេះ appeared first on Kampuchea Thmey Daily.

ការប្រកួត បឹងកេត និង ព្រះខ័នរាជស្វាយរៀង ជើងទី១ ពានសម្តេចតេជោ លើកទៅថ្ងៃទី២៩ មេសា

chean virakbot — Mon, 20 Apr 2026 07:51:00 +0000

គណៈកម្មការរៀបចំការប្រកួតកីឡាបាល់ទាត់ពានរង្វាន់សម្តេចអគ្គមហាសេនាបតីតេជោ ហ៊ុន សែន បានសម្រេចលើកពេលការប្រកួតរវាង បឹងកេត និង ព្រះខ័នរាជស្វាយរៀង ជើងទី១ វគ្គពាក់កណ្តាលផ្តាច់ព្រ័ត្រ ពីថ្ងៃទី២២ ខែមេសា ទៅ ថ្ងៃទី២៩ ខែមេសា ឆ្នាំ ២០២៦។

តាមការគ្រោងទុក បឹងកេត និង ព្រះខ័នរាជស្វាយរៀង ត្រូវប្រកួតជើងទី១ វគ្គពាក់កណ្តាលផ្តាច់ព្រ័ត្រ ពានរង្វាន់សម្តេចតេជោ ហ៊ុន សែន លើកទី១៩ នៅថ្ងៃទី២២ ខែមេសា ឆ្នាំ ២០២៦ ប៉ុន្តែគណៈកម្មការរៀបចំការប្រកួតជើងឯកក្លិបកំពូលអាស៊ាន ASEAN Club Championship បានកំណត់ឲ្យ ក្រុមព្រះខ័នរាជស្វាយរៀង និងក្រុមរបស់ថៃ Bangkok United ប្រកួតសន្សំពិន្ទុចុងក្រោយ នាថ្ងៃទី២២ ខែមេសា ឆ្នាំ ២០២៦ នៅប្រទេសវៀតណាម ដូច្នេះជាន់ថ្ងៃគ្នា។ ប្រសិនបើ ព្រះខ័នរាជស្វាយរៀង មិនទៅប្រកួតនៅទឹកដីកណ្តាល ប្រទេសវៀតណាម អាចប្រឈមនឹងពិន័យជាប្រាក់ ១ លានដុល្លារ និងព្យួរការចូលរួមប្រកួតដល់ទៅ ២ ឆ្នាំ។

នៅព្រឹកថ្ងៃទី២០ ខែមេសា ឆ្នាំ ២០២៦ គណៈកម្មការរៀបចំការប្រកួតបានប្រកាសជាផ្លូវការអំពីការលើកពេលពីថ្ងៃទី២២ ទៅ ថ្ងៃទី២៩ ខែមេសា ឆ្នាំ ២០២៦ សម្រាប់ជើងទី១ នៅពហុកីឡដ្ឋានជាតិអូឡាំពិក និងការប្រកួតជើងទី២ នៅថ្ងៃទី២០ ខែឧសភា ឆ្នាំ ២០២៦ នៅពហុកីឡដ្ឋានជាតិមរតកតេជោ។

សូមបញ្ជាក់ថា ព្រះខ័នរាជស្វាយរៀង មិនមានពេលវេលាច្រើនទេសម្រាប់ការត្រៀមខ្លួន និងចេញដំណើរទៅប្រកួតនៅទឹកដីកណ្តាលដែលត្រូវបានគណៈកម្មការរៀបចំការប្រកួតផ្លាស់ប្តូរពីកម្ពុជា ទៅប្រទេសវៀតណាម ដោយសារ ក្រុមរបស់ថៃ Bangkok United មិនមកប្រកួតនៅកម្ពុជា ពាក់ព័ន្ធនឹងបារម្ភពីសុវត្ថិភាព។ ទោះបីជាយ៉ាងណា ការប្រកួតនេះ គ្រាន់តែបង្ក្រប់កិច្ចប៉ុណ្ណោះ ដោយសារក្រុមទាំងពីរសុទ្ធតែបានធ្លាក់ចេញពី ASEAN Club Championship ដូចគ្នា៕

អត្ថបទ៖ វិរបុត្រ

The post ការប្រកួត បឹងកេត និង ព្រះខ័នរាជស្វាយរៀង ជើងទី១ ពានសម្តេចតេជោ លើកទៅថ្ងៃទី២៩ មេសា appeared first on Kampuchea Thmey Daily.

កីឡាករ ណុប ដេវីដ ត្រូវបានបញ្ជូនមកព្យាបាលនៅមន្ទីរពេទ្យកាល់ម៉ែត យប់មិញ

chean virakbot — Mon, 13 Apr 2026 03:25:05 +0000

កីឡាករ ណុប ដេវីដ របស់ក្លិបបាល់ទាត់ បឹងកេត ត្រូវបានបញ្ជូនពីខេត្តកំពង់ស្ពឺ មកព្យាបាលនៅមន្ទីរពេទ្យ កាល់ម៉ែត ក្នុងរាជធានីភ្នំពេញ បន្ទាប់ពីស្ថានភាពមិនទាន់ល្អប្រសើរដោយត្រូវតាមដានឲ្យដិតដល់ខ្លាំងមែន។

ក្លិបបាល់ទាត់ បឹងកេត បានបញ្ជាក់ពីស្ថានភាពថា ៖«ដោយសារស្ថានភាពមិនទាន់ប្រសើរឡើង កាលពីយប់មិញ ដេវីដ ត្រូវបានបញ្ជូនបន្តមកតាមដានរបួសក្បាល នៅមន្ទីរពេទ្យកាល់ម៉ែត ដោយមានការមើលថែទាំ និងយកចិត្តទុកដាក់ពីថ្នាក់ដឹកនាំក្លិប និងក្រុមគ្រួសាររបស់ ដេវីដ។ តាមការពិនិត្យ ត្រូវរង់ចាំ ៧២ម៉ោង ដើម្បីអាចសន្និដ្ឋានអាការៈរបស់ ដេវីដ»។

ណុប ដេវីដ ត្រូវបានបញ្ជូនទៅកាន់មន្ទីរពេទ្យនៅក្នុងខេត្តកំពង់ស្ពឺភ្លាមៗ បន្ទាប់ពីរងការប៉ះទង្គិចក្បាល ពីការលោតរបស់កីឡាករចាំទី រ៉េត លីហេង ក្នុងការប្រកួតសប្តាហ៍ទី២៦ នៃលីគបាល់ទាត់កំពូលកម្ពុជា រវាង ក្រុមបឹងកេត និង ណាហ្គាវើលដ៍ កាលពីល្ងាច ថ្ងៃអាទិត្យ ទី១២ ខែមេសា ឆ្នាំ ២០២៦ នៅលើទីលានស្មៅជ័រនៃកីឡដ្ឋានខេត្តកំពង់ស្ពឺ៕

អត្ថបទ៖ វិរបុត្រ

The post កីឡាករ ណុប ដេវីដ ត្រូវបានបញ្ជូនមកព្យាបាលនៅមន្ទីរពេទ្យកាល់ម៉ែត យប់មិញ appeared first on Kampuchea Thmey Daily.

បឹងកេត ត្រូវការឈ្នះ ណាហ្គាវើលដ៍ ថ្ងៃសៅរ៍នេះដើម្បីធានា ១០០ % វគ្គ Top 6

chean virakbot — Thu, 12 Feb 2026 05:48:00 +0000

ក្រុមបាល់ទាត់ បឹងកេត ត្រូវបញ្ចប់ជុំទី២ នៃលីគកំពូលកម្ពុជា វេលាម៉ោង ៦ ល្ងាច ថ្ងៃសៅរ៍ ទី១៤ ខែកុម្ភៈនេះ នៅពេលពួកគេត្រូវធ្វើដំណើរទៅជួបក្រុម ណាហ្គាវើលដ៍ នៅកីឡដ្ឋានខេត្តកំពង់ស្ពឺ។

លោក ឃឹម បូរី គ្រូបង្វឹកណាហ្គាវើលដ៍

វាជាជំនួបដ៏សំខាន់បំផុតសម្រាប់ក្រុមទាំងពីរដើម្បីធានាបាននៅវគ្គក្រុមលំដាប់កំពូលទាំង ៦ ឆ្ពោះទៅរកឱកាសប្រជែងជើងឯក និងចំណាត់ថ្នាក់ឲ្យកាន់តែល្អ។ បឹងកេត មានភាគរយច្រើនក្នុងការរក្សាខ្លួននៅ Top 6 បន្ទាប់ពីឆ្លងកាត់ ១៩ ប្រកួត រកបាន ៣២ ពិន្ទុ ឈរចំណាត់ថ្នាក់លេខ ៣ ក្នុងតារាង តាមរយៈការឈ្នះ ៩ ស្មើ ៥ និងចាញ់ ៥។

លោក Conor Nestor គ្រូបង្វឹក បឹងកេត

ទោះបីជាយ៉ាងណា បឹងកេត ត្រូវការឈ្នះ ណាហ្គាវើលដ៍ ដើម្បីធានាខ្លួន ១០០ % នៅវគ្គ Top 6 ពីព្រោះពួកគេនៅតែមួយប្រកួតនេះ។ ប្រសិនបើចាញ់ ពួកគេនៅមានឱកាស ប៉ុន្តែត្រូវរង់ចាំមើលលទ្ធផលរបស់ក្រុមផ្សេងៗទៀត។

ក្រុម បឹងកេត

ចំណែក ណាហ្គាវើលដ៍ មាន ២៩ ពិន្ទុ ស្ថិតនៅលេខ ៦ ក្នុងតារាង បន្ទាប់ពីឆ្លងកាត់ ១៨ ប្រកួត គឺ ឈ្នះ ៨ ស្មើ ៥ និងចាញ់ ៥។ ពួកគេត្រូវការឈ្នះ បឹងកេត ដើម្បីបង្កើនភាគយកាន់តែច្រើនក្នុងការរក្សាខ្លួននៅ Top 6។ ផ្ទុយទៅវិញ ប្រសិនបើចាញ់ បឹងកេត ពួកគាត់ ត្រូវពឹងផ្អែកលើការប្រកួតចុងក្រោយជាមួយ ឡាយហ្វ ខេត្តព្រះសីហនុ និងលទ្ធផលរបស់ក្រុមផ្សេងៗ។

ក្រុម ណាហ្គាវើលដ៍

ក្រឡេកមើលប្រវត្តិជួបគ្នាគ្រប់កម្មវិធីសរុប ចំនួន ១៥ លើក គឺមានលទ្ធផលមិនលើសខ្វះគ្នាឡើយ ក្នុងនោះ បឹងកេត ឈ្នះ ៥ លើក ណាហ្គាវើលដ៍ ឈ្នះ ៥ លើក និងស្មើគ្នា ៥ លើក។ ណាហ្គាវើល ស៊ុតចូល បឹងកេត បាន ១៧ គ្រាប់ ខណៈ បឹងកេត ស៊ុតចូល ណាហ្គាវើលដ៍ ២០ គ្រាប់។ ជួបគ្នាជើងទី១ ក្នុងរដូវកាលនេះ ក្រុមទាំងពីរបញ្ចប់ដោយលទ្ធផលស្មើគ្នា ១-១ នៅពហុកីឡដ្ឋានជាតិអូឡាំពិក។

ណាហ្គាវើលដ៍ រក្សាអត្តសញ្ញាណរបស់ខ្លួនបានយ៉ាងល្អ ក្នុងនាមជាក្រុមល្អការពារ។ បើទោះបីជាពួកគេបានផ្លាស់ប្តូរគ្រូបង្វឹកពីរបីនាក់ក៏ដោយ ក៏ពួកគេនៅតែរក្សាទម្រង់លេងបែបការពារ និងវាយបកដ៍ល្អដដែល។

ការប្រកួត រវាង ណាហ្គាវើលដ៍ និង ភ្នំពេញក្រោន

ចំពោះ បឹងកេត វិញ មានទម្រង់ការពារ និងប្រយុទ្ធ ស្មើគ្នាល្អ ប៉ុន្តែពួកគេជាក្រុមស្ទើរប្រយុទ្ធដែលមិនសូវមានកីឡាករប្រយុទ្ធលេចធ្លោជាប់លាប់បានយូរទេ។ កាលពីប៉ុន្មានប្រកួតមុន ពួកគេមានខ្សែប្រយុទ្ធថ្មីសញ្ជាតិអូស្ត្រាលីគឺកីឡាករ Cyrus Dehmie បានស៊ុតជាច្រើនគ្រាប់ធ្វើឲ្យមានការភ្ញាក់ផ្អើល ប៉ុន្តែរូបគេក៏បានរបួស ធ្វើឲ្យលទ្ធផលមិនសូវល្អ ក្នុងនោះចាញ់ អឹមអូអាយ កំពង់ដេវ៉ា ១-០ និងចាញ់ អង្គរថាយហ្គឺរ ១-០ ហើយចុងក្រោយស្មើ វិសាខា ០-០។

ការប្រកួត រវាង បឹងកេត និង អង្គរថាយហ្គឺរ

សរុបមកវិញ ការជួបគ្នារវាង ណាហ្គាវើលដ៍ និង បឹងកេត ពិតជាសំខាន់គ្រប់វិនាទី។ ប្រសិនបើក្រុមណាភ្លាត់ នោះលទ្ធផលអាចនឹងខកចិត្ត។ ចាំមើលតើក្រុមណាទទួលបាន ៣ ពិន្ទុ ឬក៏ចែកគ្នា ១ ពិន្ទុម្នាក់?

អត្ថបទ៖ វិរបុត្រ

The post បឹងកេត ត្រូវការឈ្នះ ណាហ្គាវើលដ៍ ថ្ងៃសៅរ៍នេះដើម្បីធានា ១០០ % វគ្គ Top 6 appeared first on Kampuchea Thmey Daily.

បឹងកេត Archives - Kampuchea Thmey Daily

ព្រះ​ខ័ន​រាជ​ស្វាយរៀង ឬ បឹងកេត ឡើង​វគ្គ​ផ្តាច់​ព្រ័ត្រ ជួប វិសាខា ពាន​សម្តេច​តេជោ?

បឹងកេត តាម​ស្មើ​ពិន្ទុ អង្គរថាយហ្គឺរ ខណៈ ភ្នំពេញក្រោន ធ្លាក់​មក​លេខ ៣ ក្នុង​តារាង​ពិន្ទុ

ហេតុផល ២ យ៉ាង​ បឹងកេត អាចរកបាន ៣ ពិន្ទុ​ពី ព្រះ​ខ័ន​រាជ​ស្វាយ​រៀង ល្ងាច​នេះ​

លោក​ Conor Nestor ម្សិលមិញ​ស្វាយរៀង​លេង​មាន​ប្រៀប​ជាង​ ប៉ុន្តែ​ឱកាស​គឺ​ក្រុម​របស់​លោក​មាន​ច្រើន​ជាង​

ការ​ប្រកួត​ បឹងកេត និង ព្រះ​ខ័ន​រាជ​ស្វាយរៀង ជើង​ទី១ ពាន​សម្តេច​តេជោ លើក​ទៅ​ថ្ងៃ​ទី​២៩ មេសា

កីឡាករ ណុប ដេវីដ ត្រូវ​បានបញ្ជូនមក​​ព្យាបាល​នៅ​​មន្ទីរពេទ្យ​កាល់ម៉ែត យប់មិញ

បឹងកេត ត្រូវ​ការឈ្នះ ណាហ្គាវើលដ៍ ថ្ងៃសៅរ៍​នេះ​ដើម្បី​ធានា ១០០ % ​​វគ្គ Top 6

ព្រះខ័នរាជស្វាយរៀង ឬ បឹងកេត ឡើងវគ្គផ្តាច់ព្រ័ត្រ ជួប វិសាខា ពានសម្តេចតេជោ?

បឹងកេត តាមស្មើពិន្ទុ អង្គរថាយហ្គឺរ ខណៈ ភ្នំពេញក្រោន ធ្លាក់មកលេខ ៣ ក្នុងតារាងពិន្ទុ

ហេតុផល ២ យ៉ាង បឹងកេត អាចរកបាន ៣ ពិន្ទុពី ព្រះខ័នរាជស្វាយរៀង ល្ងាចនេះ

លោក Conor Nestor ម្សិលមិញស្វាយរៀងលេងមានប្រៀបជាង ប៉ុន្តែឱកាសគឺក្រុមរបស់លោកមានច្រើនជាង

ការប្រកួត បឹងកេត និង ព្រះខ័នរាជស្វាយរៀង ជើងទី១ ពានសម្តេចតេជោ លើកទៅថ្ងៃទី២៩ មេសា

កីឡាករ ណុប ដេវីដ ត្រូវបានបញ្ជូនមកព្យាបាលនៅមន្ទីរពេទ្យកាល់ម៉ែត យប់មិញ

បឹងកេត ត្រូវការឈ្នះ ណាហ្គាវើលដ៍ ថ្ងៃសៅរ៍នេះដើម្បីធានា ១០០ % វគ្គ Top 6