ប្រទេសអាហ្សង់ទីន Archives - Kampuchea Thmey Daily

ភ្លើងឆេះព្រៃកាន់តែសាហាវនៅអាហ្សង់ទីន ប៉ុន្តែប្រធានាធិបតី មិនជឿលើការប្រែប្រួលអាកាសធាតុ

Minea Neu — Thu, 05 Feb 2026 07:00:25 +0000

ក្នុងរយៈពេលប៉ុន្មានថ្ងៃនេះ ជម្រកព្រៃដ៏ធំសម្បើមមួយនៃតំបន់ Patagonia របស់ប្រទេសអាហ្សង់ទីន មើលទៅដូចជាតំបន់សង្រ្គាមដ៏ក្តៅគគុក។ ពពកផ្សែងហុយឡើងលើមេឃ ដូចការបាញ់មីស៊ីល។ អណ្ដាតភ្លើងដ៏ធំបំភ្លឺពេលយប់ ដូចព្រះចន្ទពណ៌ទឹកក្រូច។

ភើងឆេះព្រៃនៅតំបន់អឺរុប។ Reuters

ខណៈប្រធានាធិបតី អាហ្សង់ទីន លោក Javier Milei មិនជឿថាការប្រែប្រួលអាកាសធាតុជាបញ្ហាដែលគួរតែយកចិត្តទុកដាក់នោះទេ។ ថែមទាំងបានកាត់បន្ថយលើការចំណាយផ្នែកអគ្គិភ័យនៅក្នុងប្រទេសរបស់ខ្លួនទៀតផង។

ព្រៃដ៏ធំនៃឧទ្យានជាតិ Los Alerces ជាតំបន់បេតិកភណ្ឌពិភពលោករបស់អង្គការយូណេស្កូ (UNESCO) ដែលជាជម្រករបស់ដើមឈើ មានអាយុ ២ ៦០០ ឆ្នាំ ឥឡូវនេះភ្លើងឆាបឆេះហើយ។

ភ្លើងឆេះព្រៃ ក្នុងចំណោមគ្រោះរាំងស្ងួតដ៏អាក្រក់បំផុតដែលបានវាយប្រហារតំបន់ Patagonia ដោយគ្រោះរាំងស្ងួតក្នុងរយៈពេលជាច្រើនទសវត្សរ៍កន្លងមក បានបំផ្លិចបំផ្លាញព្រៃឈើជាង ៤៥ ០០០ហិកតានៃប្រទេសអាហ្សង់ទីនក្នុងរយៈពេលមួយខែកន្លះចុងក្រោយនេះ។ ជាពិសេសស្ថានភាពបានបង្ខំឱ្យប្រជាជនជម្លៀសទៅកន្លែងសុវត្ថិភាព និងប៉ះពាល់ដល់ភ្ញៀវទេសចររាប់ពាន់នាក់។ តួរលេខនេះ គិតត្រឹមថ្ងៃចន្ទ ទី២ ខែកុម្ភៈ គ្រោះមហន្តរាយនេះនៅតែបន្តរីករាលដាល។

ភ្លើងឆេះនៅប្រទេសអាហ្សង់ទីននៅតែបន្ត លោក Luis Schinelli មន្ត្រីអនុរក្សឧទ្យានម្នាក់ក្នុងព្រៃដែលគ្របដណ្តប់លើផ្ទៃដី ២៥៩ ០០០ហិកតា នៃឧទ្យានជាតិ Los Alerces ថា៖ «គឺមានការសម្រេចចិត្តរបស់អ្នកនយោបាយ ក្នុងការរុះរើស្ថាប័នពន្លត់អគ្គិភ័យ។ ចំណែកក្រុមពន្លត់អគ្គិភ័យបានពង្រីកការការពារ លើសដែនកំណត់របស់ពួកគេ»។

បន្ទាប់ពីឡើងកាន់តំណែង ជាមួយយុទ្ធនាការជួយសង្គ្រោះសេដ្ឋកិច្ចរបស់ប្រទេសអាហ្សង់ទីនពីបំណុលជាច្រើនទសវត្សរ៍មក ប្រធានាធិបតី លោក Javier Milei បានកាត់បន្ថយការចំណាយលើសេវាគ្រប់គ្រងអគ្គិភ័យជាតិចំនួន ៨០ ភាគរយ ក្នុងឆ្នាំ ២០២៤ បើប្រៀបធៀបទៅនឹងឆ្នាំមុន។

ក្នុងនោះរួមមាន ទីភ្នាក់ងារទទួលខុសត្រូវលើការដាក់ពង្រាយកងពលតូច ថែទាំនាវាដឹកយន្តហោះ ការទិញឧបករណ៍បន្ថែម និងការតាមដានគ្រោះថ្នាក់ដោយភ្លើងឆេះ។

សេវាកម្មជួយសង្រ្គោះទាំងអស់នោះ ប្រឈមនឹងការកាត់បន្ថយចំនួន ៧១ ភាគរយក្នុងឆ្នាំនេះ។ បើយោងតាមការវិភាគនៃថវិកាឆ្នាំ ២០២៦ ដោយមូលនិធិបរិស្ថាន និងធនធានធម្មជាតិ និងអង្គភាព FARN ដែលជាក្រុមស្រាវជ្រាវ និងតស៊ូមតិបរិស្ថានរបស់ប្រទេសអាហ្សង់ទីន។

យ៉ាងណាភ្លើងឆេះព្រៃដ៏ខ្លាំងនេះ អ្នកវិទ្យាសាស្រ្តបាននិយាយថា វាបណ្តាលមកពីការប្រែប្រួលអាកាសធាតុ ធ្វើឱ្យបរិយាកាសកាន់តែក្តៅ និងធ្ងន់ធ្ងរ នាំឱ្យមានភ្លើងឆេះព្រៃជាបន្តបន្ទាប់។ លើសពីនេះការប្រែប្រួលអាកាសធាតុ គឺកើតឡើងដោយសកម្មភាពមនុស្សធ្ងន់ធ្ងរពេក៕

ប្រែសម្រួល៖ ណឺ មិនា

The post ភ្លើងឆេះព្រៃកាន់តែសាហាវនៅអាហ្សង់ទីន ប៉ុន្តែប្រធានាធិបតី មិនជឿលើការប្រែប្រួលអាកាសធាតុ appeared first on Kampuchea Thmey Daily.

អាហ្សង់ទីន ទំនងទទួលយកជនចំណាកស្រុកដែលបណ្តេញចេញពីអាមេរិក

Minea Neu — Sat, 31 Jan 2026 08:59:00 +0000

ក្រោយការវិលចូលកាន់អំណាចប្រធានាធិបតីសហរដ្ឋអាមេរិកលើកទី២ ប្រធានាធិបតីសហរដ្ឋអាមេរិក លោក ដូណាល់ ត្រាំ បានចេញគោលការណ៍ដ៏តឹងរឹងមួយ ក្នុងការបណ្តេញជនចំណាកស្រុកពីប្រទេសរបស់ខ្លួន ខណៈមានរបាយការណ៍ផ្សេងៗទៀតថា អាមេរិកពើបប្រទះនូវអត្រាចំនួនប្រជាជនធ្លាក់ចុះខ្លាំងជាលើកដំបូង។

លោក ត្រាំ និង លោក Javier Milei អំឡុងពេលមហាសន្និបាតអង្គការសហប្រជាជាតិលើកទី៨០ នៅទីក្រុង New York ។ Reuters

កាសែត New York Times បានរាយការណ៍កាលពីថ្ងៃទី ៣០ខែមករា ថាសហរដ្ឋអាមេរិក និងអាហ្សង់ទីន កំពុងស្ថិតក្នុងកិច្ចពិភាក្សាជាផ្លូវការមួយ ដើម្បីចុះហត្ថលេខាលើកិច្ចព្រមព្រៀង ដែលអនុញ្ញាតឱ្យសហរដ្ឋអាមេរិក អាចនិរទេសជនអន្តោប្រវេសន៍ពីប្រទេសរបស់ខ្លួន ទៅកាន់ប្រទេសអាមេរិកខាងត្បូងមួយនេះ។

យោងតាមរបាយការណ៍មួយឱ្យដឹងថា មន្ត្រីរដ្ឋាភិបាលអាហ្សង់ទីនម្នាក់បានដាក់សំណើ កាលពីដើមខែនេះ ដើម្បីបញ្ចប់កិច្ចព្រមព្រៀងប្រទេសទីបីជាមួយសហរដ្ឋអាមេរិក។

តែយ៉ាងណា អ្នកនាំពាក្យក្រសួងការបរទេសអាមេរិក និងក្រសួងការបរទេសអាហ្សង់ទីនបានបដិសេធមិនធ្វើអត្ថាធិប្បាយលើកិច្ចព្រមព្រងនេះ ជាមួយសារព័ត៌មានរ៉យទ័រនៅឡើយ។

មិនតែប៉ុណ្ណោះ កិច្ចព្រមព្រៀងប្រទេសទីបីជាមួយអាហ្សង់ទីន និងប្រធានាធិបតី លោក ដូណាល់ ត្រាំ នឹងជំរុញឱ្យមានការនិរទេសជនអន្តោប្រវេសន៍រាប់លាននាក់ ពីសហរដ្ឋអាមេរិកដោយខុសច្បាប់។

រដ្ឋបាលរបស់ លោក ដូណាល់ ត្រាំ មានគោលបំណងបង្កើនការនិរទេសចេញទៅកាន់ប្រទេសទីបី រួមទាំង Sudan ខាងត្បូង, Eswatini, El Salvador, Costa Rica និង Panama ។

ខណៈប្រទេសអាហ្សង់ទីនមានគោលនយោបាយអន្តោប្រវេសន៍បើកចំហជាប្រវត្តិសាស្ត្រ។

ប្រធានាធិបតី លោក Javier Milei ដែលជាសម្ព័ន្ធមិត្តជិតស្និទ្ធរបស់លោក ដូណាល់ ត្រាំ បានស្វែងរកច្បាប់រឹតបន្តឹងជនអន្តោប្រវេសន៍ ដោយបង្ក្រាបអ្នកដែលជាប់បទព្រហ្មទណ្ឌ និងតម្រូវឱ្យអ្នកដំណើរទាំងអស់ ត្រូវប្រាកដថាពួកគេទទួលបានការធានារ៉ាប់រងសុខភាព។

តែយ៉ាងណាក្នុងសប្តាហ៍នេះ រដ្ឋមន្ត្រីសន្តិសុខជាតិ លោកស្រី Alejandra Monteoliva បាននិយាយនៅក្នុងវីដេអូមួយថា៖ « ក្នុងខែធ្នូ និងខែមករា មនុស្សជិត ៥ ០០០នាក់ មិនត្រូវបានអនុញ្ញាតឱ្យចូលប្រទេស ឬត្រូវបណ្តេញចេញនៅក្នុងខែនេះ ដែលជាកំណត់ត្រាប្រវត្តិសាស្ត្រ»។

ប្រែសម្រួល៖ ណឺ មិនា

The post អាហ្សង់ទីន ទំនងទទួលយកជនចំណាកស្រុកដែលបណ្តេញចេញពីអាមេរិក appeared first on Kampuchea Thmey Daily.

ប្រជាជន អាហ្សង់ទីន លើកក្បួនតវ៉ារកយុត្តិធម៌ឲ្យស្ត្រីបីនាក់ ត្រូវឃាតកសម្លាប់យ៉ាងឃោរឃៅ

សាង ស្រីល័ក្ខ — Tue, 30 Sep 2025 03:22:45 +0000

យោងតាមការចុះផ្សាយពីសារព័ត៌មាន CBS News នៅថ្ងៃទី ៣០ ខែកញ្ញា បានរាយការណ៍ថា មនុស្សរាប់ពាន់នាក់បានដើរដង្ហែរគ្នាតាមផ្លូវនៃទីក្រុង Buenos Aires ប្រទេសអាហ្សង់ទីន ដើម្បីតវ៉ា និងទាមទារយុត្តិធម៌ឲ្យមនុស្សស្រីបីនាក់ ដែលត្រូវឃាតក រំលោភនិងសម្លាប់យ៉ាងឃោរឃៅរួចផ្សាយបន្តផ្ទាល់ ខណៈជនដៃដល់មិនទាន់ចាប់ខ្លួនបាននូវឡើយទេ។

ស្រ្តី៣នាក់ដែលរងគ្រោះមានឈ្មោះថា Lara Guterres អាយុ ១៥ ឆ្នាំ Brenda del Casitillo អាយុ ២០ ឆ្នាំ និង Morena Verdi អាយុ ២១ ឆ្នាំ។ ឃាតកម្ម រំលោភ និងធ្វើទារុណកម្មត្រូវបានផ្សាយផ្ទាល់តាមបណ្ដាញសង្គម TikTok មួយ។ ប៉ូលិសបាននិយាយថា ក្នុងនោះមានមនុស្ស ៤៥ នាក់ បាបែរជាឈរមើលកន្លែងកើតហេតុដ៏ឃោរឃៅដូចជារឿងធម្មតា។

រូបភាព៖ ndtv

ប៉ូលិសបានបញ្ចាក់បន្ថែមទៀតថា អ្នកទាំងបីត្រូវបានបញ្ឆោតដោយអ្នកជួញដូរគ្រឿងញៀនអន្តរជាតិ ហើយបានល្បួងពួកគេទៅផ្ទះមួយនៅជាយក្រុង Buenos Aires ។ យ៉ាងណា ហេតុផលពិតប្រាកដនោះគឺជាការសងសឹកដ៏សាហាវ។ ការពិនិត្យសាកសពឃើញថា ម្រាមដៃរបស់ពួកគេត្រូវបានកាត់ដាច់ ហើយរងការថប់ដង្ហើម ដោយសារត្រូវឃាតកច្របាច់កជាមួយថង់ប្លាស្ទិក ។

ដោយសារតែមើលឃើញពីភាពអយុត្តិធម៌លើស្រ្តីទាំង៣រូបពេក ក្រុមបាតុករបានកាន់ស្លាកសញ្ញាទាមទាររកយុត្តិធម៌ និងបញ្ជាក់ថា ពេលនេះជាពេលត្រូវការពារស្ត្រីជាងពេលណាៗទាំងអស់។ ស្ថិតិបង្ហាញថា យ៉ាងហោចណាស់ស្ត្រីម្នាក់ត្រូវបានសម្លាប់រៀងរាល់ ៣៦ ម៉ោងនៅក្នុងប្រទេសអាហ្សង់ទីន។

បច្ចុប្បន្ននេះប៉ូលិសបានចាប់ខ្លួនជនសង្ស័យចំនួន ៥ នាក់ហើយ និងបានចេញផ្សាយរូបថតបុរសដែលពួកគេជឿថាជាអ្នកទទួលខុសត្រូវចំពោះការវាយប្រហារមួយនេះ។ ចំណែកឯជនសង្ស័យជាបុរសជនជាតិប៉េរូ អាយុ២០ឆ្នាំម្នាក់ ពេលនេះមិនទាន់ត្រូវបានចាប់ខ្លួននៅឡើយទេ៕

រូបភាព៖(Cristina Sille/Reuters)

អត្ថបទ៖ សាង ស្រីល័ក្ខ

ចុចអាន៖អ៊ីរ៉ង់ ដាក់លក្ខខណ្ឌទៅលោកខាងលិច បើចង់ឲ្យខ្លួនទទួលយកកិច្ចចរចានុយក្លេអ៊ែរ

The post ប្រជាជន អាហ្សង់ទីន លើកក្បួនតវ៉ារកយុត្តិធម៌ឲ្យស្ត្រីបីនាក់ ត្រូវឃាតកសម្លាប់យ៉ាងឃោរឃៅ appeared first on Kampuchea Thmey Daily.

អាហ្សង់ទីនប្រកាសកាន់ទុក្ខបីថ្ងៃចំពោះហេតុការណ៍ទឹកជំនន់ទឹកភ្លៀងដ៏សាហាវ

Bun sopheap — Mon, 10 Mar 2025 09:20:02 +0000

ប្រទេសអាហ្សង់ទីនប្រកាសកាន់ទុក្ខជាតិរយៈពេលបីថ្ងៃ បន្ទាប់ពីចំនួនអ្នកស្លាប់ដោយសារទឹកជំនន់កើនដល់១៦ នាក់ខណៈមានការបាត់ខ្លួនប្រជាជនក្នុងតំបន់រងគ្រោះដោយសារទឹកជំនន់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AFP នៅថ្ងៃទី១០ខែមីនានេះ។

(រូបភាព៖ AP)

ទឹកជំនន់ដ៏សាហាវបានកើតឡើងកាលពីថ្ងៃសុក្រសប្ដាហ៍មុន ដោយសារតែភ្លៀងធ្លាក់យ៉ាងគំហុកក្នុងរយៈពេលប៉ុន្មានម៉ោងនៅក្នុង និងទីក្រុងកំពង់ផែ Bahia Blanca ដ៏សំខាន់មួយស្ថិតនៅភាគខាងត្បូងនៃរដ្ឋធានី Buenos Aires ធ្វើឲ្យសង្កាត់ទាំងមូលត្រូវបានជន់លិច។

ចំនួនអ្នកស្លាប់បានកើនដល់១៦នាក់ ខណៈរាប់សិបអ្នកទៀតនៅតែបន្តបាត់ខ្លួនដែលមានទាំងសោកនាដកម្មនៃការបាត់ខ្លួនក្មេងស្រី២នាក់ដែលមានអាយុ១ឆ្នាំនិង៥ឆ្នាំបន្ទាប់ពីទឹកហូរនាំទៅ។

ប្រធានាធិបតីអាហ្សង់ទីន លោក Javier Milei បាននប្រកាសការកាន់ទុក្ខជាតិរយៈពេលបីថ្ងៃ ចំពោះការស្លាប់នេះ កាលពីល្ងាចថ្ងៃអាទិត្យ ប៉ុន្តែលោកមិនបានបញ្ជាក់ថាតើពេលវេលានឹងចាប់ផ្តើមនៅពេលណានោះទេ។

ទន្ទឹមនឹងនេះដែរ អភិបាលក្រុង Bahia Blanca លោក Federico Susbielles បានប្រាប់សន្និសីទសារព័ត៌មានថា ទឹកជំនន់បានបណ្តាលឱ្យមានការខូចខាតហេដ្ឋារចនាសម្ព័ន្ធចំនួន៤០០លានដុល្លារ ខណៈតំបន់ជាច្រើនគ្មានថាមពលអគ្គិសនីប្រើប្រាស់ ដោយសារបរិមាណទឹកច្រើនពេកចរន្តអគ្គិសនីត្រូវបានផ្អាក។ រដ្ឋាភិបាលបានអនុញ្ញាតឲ្យមានការកសាងឡើងវិញជាបន្ទាន់ចំនួន ១០ ពាន់លានប៉េសូ (៩.២ លានដុល្លារអាមេរិក) ។

ទីក្រុង Bahia Blanca ធ្លាប់បានទទួលរងនូវគ្រោះមហន្តរាយទាក់ទងនឹងអាកាសធាតុកន្លងមក រួមទាំងព្យុះក្នុងខែធ្នូ ឆ្នាំ ២០២៣ ដែលបានឆក់យកជីវិតមនុស្ស ១៣នាក់ផងដែរ បាក់រលំផ្ទះនិងបង្កឱ្យមានការខូចខាតហេដ្ឋារចនាសម្ព័ន្ធយ៉ាងធ្ងន់ធ្ងរ៕

(រូបភាព៖ Reuters)

(រូបភាព៖ AP)

(រូបភាព៖ Reuters)

អត្ថបទ៖ ប៊ុន សុភាព

The post អាហ្សង់ទីនប្រកាសកាន់ទុក្ខបីថ្ងៃចំពោះហេតុការណ៍ទឹកជំនន់ទឹកភ្លៀងដ៏សាហាវ appeared first on Kampuchea Thmey Daily.

ប្រទេសទី១ ដកខ្លួនចេញពី WHO តាមអាមេរិក

Sok Sovann — Thu, 06 Feb 2025 02:09:19 +0000

អាហ្សង់ទីនបានក្លាយជាប្រទេសដំបូងគេ ដែលដកខ្លួនចេញពីអង្គការសុខភាពពិភពលោក (WHO) តាមសហរដ្ឋអាមេរិក ក្រោមហេតុផលថា ស្ថាប័ន UN មួយនេះមានគោលនយោបាយចម្រូងចម្រាស់ ជាពិសេសអំឡុងពេលផ្ទុះជំងឺរាតត្បាតកូវីដ១៩តែម្តង។

ប្រធានាធិបតីអាហ្សង់ទីនលោក Javier Milei (រូបថត៖ Getty)

តាមការចុះផ្សាយរបស់ RT កាលពីថ្ងៃពុធទី៥ខែកុម្ភៈឆ្នាំ២០២៥, លោកប្រធានាធិបតី Javier Milei បានប្រកាសពីការសម្រេចចិត្តនេះ ដោយនិយាយថា WHO បរាជ័យយ៉ាងធំក្នុងការដោះស្រាយជាមួយវិបត្តិកូវីដ១៩។ ការធ្វើចត្តាឡីស័កអូសបន្លាយពេល បានបង្កអន្តរាយដល់សេដ្ឋកិច្ចអាហ្សង់ទីន។ មិនត្រឹមប៉ុណ្ណឹង វិធានការរឹតត្បិតដែលដាក់ដោយរដ្ឋបាលមុនក្រោមការគាំទ្រពី WHO បានបណ្តាលឲ្យមនុស្ស ១៣០ ០០០នាក់ស្លាប់ទៀតផង។

កាលពីខែមុន គ្រាន់តែចូលកាន់តំណែងជាប្រធានាធិបតីអាមេរិកទី៤៧ភ្លាម លោក ដូណាល់ ត្រាំ បានចុះហត្ថលេខាលើបញ្ជាប្រតិបត្តិ ដកខ្លួនចេញពី WHO ដោយលើកហេតុផលស្រដៀងគ្នានេះ។

នោះគឺជាលើកទីពីរហើយ ដែលលោក ត្រាំ ដកអាមេរិកចេញពី WHO ដោយលើកដំបូងគឺក្នុងឆ្នាំ២០២០ ដែលកាលនោះលោកចោទថា ស្ថាប័ន UN មួយនេះ បានជួយប្រទេសចិន លាក់បាំងប្រភពដើមនៃជំងឺកូវីដ១៩។ យ៉ាងណា អាមេរិកបានចូល WHO វិញ ពេលលោក បៃដិន ឡើងកាន់អំណាច។

អាមេរិក ធ្លាប់ជាប្រទេសផ្តល់ជំនួយធំបំផុតរបស់ WHO ពោលគឺបានរួមចំណែកជាទឹកប្រាក់ជិត ៩៥០លានដុល្លារក្នុងឆ្នាំ២០២៤ ស្មើនឹង១៥% នៃថវិកាសរុបរបស់ទីភ្នាក់ងារនេះ៕

អត្ថបទ៖ សុខ សុវណ្ណ

ចុចអាន៖ WHO គ្រោងកាត់បន្ថយថវិកាជាង៤០០លានដុល្លារ ក្រោយអាមេរិកដកខ្លួនចេញ

The post ប្រទេសទី១ ដកខ្លួនចេញពី WHO តាមអាមេរិក appeared first on Kampuchea Thmey Daily.

ដើមឆ្នាំ២០២៥ កើតមានភ្លើងឆេះព្រៃដ៏សាហាវមួយទៀត នៅ អាហ្សង់ទីន

Sok Sovann — Mon, 03 Feb 2025 07:34:37 +0000

ឆ្នាំ២០២៥នេះ ពិតជាកាចណាស់ ដោយភ្លើងឆេះព្រៃថ្មីដ៏សាហាវ បានវាយប្រហារប្រទេសអាហ្សង់ទីន សម្លាប់មនុស្សម្នាក់ និងបង្កការបំផ្លិចបំផ្លាញ ព្រមទាំងបង្ខំឲ្យជម្លៀសមនុស្សរាប់ពាន់នាក់ទៀតផង។

ភ្លើងឆេះព្រៃនៅ Cajón del Azul (រូបថត៖ Reuters)

តាមការចុះផ្សាយរបស់ Viory, ភ្លើងឆេះព្រៃនេះបានចាប់ផ្តើមតាំងតែពីសប្តាហ៍មុនមកម្ល៉េះ ដោយឆាបឆេះផ្ទៃដីប្រហែល ៣ ០០០ហិកតាក្នុងតំបន់ Cajón del Azul ខណៈអ្នកទេសចរក៏ត្រូវជម្លៀសជាបន្ទាន់ផងដែរចេញពីតំបន់El Guadal, Seguel rise, Mallín del Medio, La Aldea និង Zúñiga។

មូលហេតុបណ្តាលឲ្យមានអគ្គិភ័យនេះ ក៏មិនទាន់ត្រូវបានគេបញ្ជាក់ដែរ គ្រាន់តែគេដឹងថា អណ្តាតភ្លើងបានរាលដាលយ៉ាងលឿនដោយសារតែខ្យល់បក់ខ្លាំង និងព្រៃស្ងួត។

គ្រោះអគ្គិភ័យនេះ ធ្វើឲ្យគេនឹកឃើញដល់ភ្លើងឆេះព្រៃដ៏សាហាវនៅរដ្ឋ កាលីហ្វ័រញ៉ា នៃសហរដ្ឋអាមេរិក កាលពីដើមខែមករា ដែលបង្កជាវិនាសកម្មយ៉ាងធំធេង។

នៅថ្ងៃទី៨ រដ្ឋកាលីហ្វ័រញ៉ា ត្រូវជួបវិនាសកម្មភ្លើងឆេះព្រៃ ដោយអគ្គិភ័យសកម្មចំនួន៥ ដូចជា Palisades, Eaton, Kenneth, Hurst និង Lidia បានវាយប្រហារទីក្រុង Los Angeles ខណៈគិតតឹ្រមថ្ងៃសុក្រទី៣១ តួលេខមនុស្សស្លាប់ មាន២៩នាក់។

បើបូករួមទាំងអស់ ត្រឹមមួយខែដើមឆ្នាំនេះ រដ្ឋកាលីហ្វ័រញ៉ា មានភ្លើងឆេះព្រៃសរុប៣០១កន្លែង ដុតកម្ទេចផ្ទៃដីប្រមាណ ២០ ២៣៤ហិកតា បំផ្លាញសំណង់ហេដ្ឋារចនាសម្ព័ន្ធនិងផ្ទះសម្បែងអស់ ១៦ ២៥៥ខ្នង ព្រមទាំងបង្កការខាតបង់សេដ្ឋកិច្ចគិតជាទឹកប្រាក់ប្រហែល ៥០ពាន់លានដុល្លារអាមេរិក៕

អត្ថបទ៖ សុខ សុវណ្ណ

ចុចអាន៖ អ្នកជំនាញព្រមានថា ភ្លើងឆេះព្រៃថ្មីនៅ LA នឹងធំ ដូចផ្ទុះនុយក្លេអ៊ែរអ៊ីចឹង

The post ដើមឆ្នាំ២០២៥ កើតមានភ្លើងឆេះព្រៃដ៏សាហាវមួយទៀត នៅ អាហ្សង់ទីន appeared first on Kampuchea Thmey Daily.

បណ្ដាប្រទេសនៅអាមេរិកខាងត្បូងរងផលប៉ះពាល់យ៉ាងចាស់ដៃពីការប្រែប្រួលអាកាសធាតុ

Bun sopheap — Fri, 22 Mar 2024 07:16:38 +0000

បណ្តាប្រទេសនៅអាមេរិកខាងត្បូងកំពុងទទួលរងផលប៉ះពាល់យ៉ាងខ្លាំងក្លាពីការប្រែប្រួលអាកាសធាតុ ។ នេះបើយោងតាមការចេញផ្សាយរបស់សារព័ត៌មាន CGTN កាលពីថ្ងៃទី២១ ខែមីនាកន្លងទៅ ។

បន្ទាប់ពីជួបគ្រោះរាំងស្ងួតរយៈពេល ១៥ ឆ្នាំ អាងស្តុកទឹកនៅក្នុងប្រទេសឈីលីកំពុងស្ងួតហួតហែង ធ្វើឲ្យមានការប៉ះពាល់ទៅដល់ការផ្គត់ផ្គង់ទឹក ។ អាងស្តុកទឹក Cogoti ក្នុងតំបន់ Coquimbo ភាគខាងជើងប្រទេសឈីលី ដែលជាអាងមានសមត្ថភាពស្តុកទឹក ១៥០ លានម៉ែត្រគូបបានរីងទឹកស្ទើរទាំងស្រុងនៅរដូវក្តៅនេះ ។

បើយោងតាមវិទ្យាស្ថានធនធានពិភពលោកបានឲ្យដឹងថា គ្រោះរាំងស្ងួតជាប្រវត្តិសាស្ត្របានជះឥទ្ធិពលស្ទើរតែគ្រប់ទិដ្ឋភាពនៃជីវិតនៅក្នុងប្រទេសដែលសម្បូរទង់ដែងមួយនេះ ដោយប៉ះពាល់ដល់អ្វីៗគ្រប់យ៉ាងចាប់ពីទិន្នផលរ៉ែ រហូតដល់តំបន់បៃតងក្នុងរដ្ឋធានី ខណៈឈីលីគឺជាប្រទេសមួយក្នុងចំណោមប្រទេសដែលមានសម្ពាធទឹកខ្លាំងបំផុតនៅក្នុងពិភពលោក ហើយអាចនឹងអស់ការផ្គត់ផ្គង់ទឹកត្រឹមឆ្នាំ ២០៤០ ។

ទន្ទឹមនឹងនេះដែរ រដ្ឋធានី Buenos Aires របស់ប្រទេសអាហ្សង់ទីន និងតំបន់ជុំវិញរបស់វាបានឃើញភ្លៀងធ្លាក់ខ្លាំងបំផុតក្នុងកម្រិត ១០០ មិល្លីម៉ែត្រកាលពីថ្ងៃពុធកន្លងទៅ ដែលបានបង្កើតឲ្យមានទឹកជំនន់ និងការបំផ្លិចបំផ្លាញគ្រប់ប្រភេទ ជាពិសេសអាចបំផ្លាញដល់ដំណាំកសិកម្មរបស់ប្រទេសនេះយ៉ាងធ្ងន់ធ្ងរ ។

គិតត្រឹមពេលនេះ អាហ្សង់ទីនដែលជាប្រទេសនាំចេញប្រេងសណ្តែកសៀង និងអាហារលំដាប់កំពូលមួយរបស់ពិភពលោក និងជាប្រទេសធំទីបីនាំចេញពោត តែបែរជាមានភ្លៀងធ្លាក់ខ្លាំងលើសពីកម្រិតធម្មតា ។

គួរបញ្ជាក់ថា បញ្ហាប្រែប្រួលអាកាសធាតុគឺជាបញ្ហាចម្បងមួយដែលប្រទេសនៅជុំវិញពិភពលោកកំពុងជួបប្រទះ និងព្យាយាមរកដំណោះស្រាយ ស្របពេលដែលការកើនឡើងនៃផលប៉ះពាល់ពីការប្រែប្រួលអាកាសធាតុនេះក៏កំពុងតែធ្ងន់ធ្ងរឡើងៗផងដែរ ៕

អត្ថបទ ៖ ប៊ុន សុភាព

The post បណ្ដាប្រទេសនៅអាមេរិកខាងត្បូងរងផលប៉ះពាល់យ៉ាងចាស់ដៃពីការប្រែប្រួលអាកាសធាតុ appeared first on Kampuchea Thmey Daily.

បុរសឯកោបំផុតលើលោក រស់នៅក្នុងទីក្រុងខ្មោចធ្លាប់លិចលង់អស់រយៈពេល ២៥ឆ្នាំនៅ អាហ្សង់ទីន

សាង ស្រីល័ក្ខ — Tue, 09 Jan 2024 03:52:25 +0000

លោកតា Pablo Novak មានវ័យ ៩៣ឆ្នាំ ត្រូវបានគេស្គាល់ថាជាបុរសឯកោបំផុតនៅលើពិភពលោក។ ក្រោយពីត្រឡប់មករស់នៅទីក្រុងខ្មោច Epeguen អាហ្សង់ទីន អស់រយៈពេលជិត ២៥ឆ្នាំ គ្មាននរណាម្នាក់រស់នៅទីនេះចាប់តាំងពីវាបានលិចនៅក្នុងទឹកជំនន់ជិត ៤០ ឆ្នាំមុន។ នេះបើយោងតាមការចុះផ្សាយ vtc.vn។

ថ្លែងនៅក្នុងបទសម្ភាសន៍កាលពីឆ្នាំ ២០១៥ លោក Pablo បាននិយាយថា ប្រពន្ធគាត់មិនបានត្រឡប់ទៅទីក្រុងជាមួយគ្នាទេ ហើយនាងនិងកូនក៏រស់នៅក្នុងក្រុងក្បែរនោះ។ ផ្ទះរបស់គាត់តូច និងមានធូលី កៅអីច្រេះ កាសែតចាស់ ហើយក៏មិនមានអគ្គិសនីផងដែរ។ គាត់ធ្លាប់នៅម្នាក់ឯង ដើរលេងជាមួយឆ្កែរបស់គាត់រាល់ថ្ងៃ រហូតដល់ស៊ាំនឹងការនៅម្នាក់ឯងបែបនេះទៅហើយ។

បុរសចំណាស់ឯកាបំផុតរូបនេះបាននិយាយថា “ខ្ញុំបានមកទីនេះដើម្បីនៅជាមួយហ្វូងគោក្របីរបស់ខ្ញុំ ហើយខ្ញុំមិនដែលចេញទៅក្រៅទៀតទេ។ នៅអាយុរបស់ខ្ញុំ ខ្ញុំគ្រាន់តែរីករាយនឹងជីវិតដោយការដើរកាត់ទីក្រុង Epecuen ដោយសង្ឃឹមថានរណាម្នាក់នឹងសួរខ្ញុំអ្វីមួយ”។

នាឆ្នាំ ១៩៨០ ទីក្រុង Epecuen ស្ថិតនៅចម្ងាយ ៣០០ ម៉ាយ(៤៩២គីឡូម៉ែត្រ) ភាគនិរតីនៃរដ្ឋធានី Buenos Aires របស់ប្រទេសអាហ្សង់ទីន វាមានប្រជាជនសរុប ២,០០០ នាក់ និងរមណីយដ្ឋានមាត់បឹងដ៏ពេញនិយមមួយ។ វាទាក់ទាញអ្នកទេសចរ ២០,០០០ នាក់ក្នុងមួយឆ្នាំ ដែលមករីករាយនឹងទឹកពណ៌ខៀវថ្លា ហើយមនុស្សមួយចំនួនជឿថាមានអំណាចព្យាបាល ជួយប្រឆាំងនឹងជំងឺផ្សេងៗ។

លើសពីនេះទៀតសោត ទីក្រុង Epecuen មានស្ថានីយ៍រថភ្លើងដែលត្រូវបានសាងសង់ក្នុងឆ្នាំ ១៩៧២ និងមានអាជីវកម្មប្រហែល២៨០ រួមទាំងសណ្ឋាគារ សារមន្ទីរ និងទីលានប្រណាំងសម្រាប់មនុស្សរស់នៅទីនោះ។

ទោះយ៉ាងណាក៏ដោយ គ្រោះមហន្តរាយដ៏អាក្រក់មួយបានកើតឡើងនៅខែវិច្ឆិកា ឆ្នាំ ១៩៨៥ ភ្លៀងធ្លាក់ខ្លាំងបានធ្វើឲ្យទំនប់នេះទឹកផ្ទុះបាក់ស្រុត អូសបន្លាយអស់រយៈពេលពីរសប្តាហ៍ កម្ពស់ទឹកក្នុងទីក្រុងបានកើនឡើងរហូតដល់លិចលង់កាន់តែខ្លាំងឡើងៗ។ ប៉ុន្មានឆ្នាំមកនេះ កម្រិតទឹកបានកើនឡើងដល់កំពូល ១០ម៉ែត្រក្នុងឆ្នាំ ១៩៩៣។ បន្ទាប់មក កម្ពស់ទឹកបានកើនឡើងម្តងទៀតក្នុងឆ្នាំ ២០០៩ ។

យ៉ាងណាមិញ ក្រោយពេលដែលអ្នកភូមិភាគច្រើនបានធ្វើចំណាកស្រុក ហើយលែងវិលត្រឡប់ទៅទីក្រុងវិញ ទើបលោកតា Pablo សម្រេចចិត្តវិលមកកាន់ស្រុកកំណើតកាលពី ២៥ឆ្នាំមុន គាត់បានប្រើជីវិតរស់នៅក្នុងផ្ទះដែលគេបោះបង់ចោល និងសួនច្បារដែលស្ងាត់ជ្រងំ។ វាគឺជាអ្នករស់នៅតែមួយគត់នៃទីក្រុងក្នុងជីវិតវ័យចំណាស់របស់គាត់៕

អត្ថបទ៖ សាង ស្រីល័ក្ខ

ចុចអាន៖ជារឿងចម្លែក បុរសតៃវ៉ាន់ម្នាក់រមាស់ត្រចៀករាប់ឆ្នាំ ដោយសារតែផ្សិតដុះពីខាងក្នុង

The post បុរសឯកោបំផុតលើលោក រស់នៅក្នុងទីក្រុងខ្មោចធ្លាប់លិចលង់អស់រយៈពេល ២៥ឆ្នាំនៅ អាហ្សង់ទីន appeared first on Kampuchea Thmey Daily.