ព័ត៌មានអន្ដរជាតិ

អ៊ីរ៉ង់ ដាក់លក្ខខណ្ឌទៅលោកខាងលិច បើចង់ឲ្យខ្លួនទទួលយកកិច្ចចរចានុយក្លេអ៊ែរ

បានផុស

៧ ខែ មុន

នៅ

ថ្ងៃចន្ទ ២៩ កញ្ញា ២០២៥

ដោយ

យោងតាម NHK នៅថ្ងៃទី២៩ ខែកញ្ញា ប្រធានាធិបតីអ៊ីរ៉ង់ លោក Masoud Pezeshkian មានប្រសាសន៍ថា ទីក្រុងតេអេរ៉ង់នឹងប្រឆាំងរាល់កិច្ចចរចានុយក្លេអ៊ែរដែលបង្ហាញពីបញ្ហានាពេលថ្មីៗនេះ។ លោកបានសង្កត់ធ្ងន់ពីគោលជំហរមិនចូលរួមជាមួយប្រទេសលោកខាងលិចដាច់ខាត លុះត្រាតែមានការលើកលែងទណ្ឌកម្ម ឬមានវិធានការផ្សេងទៀត។

**រូបភាព៖REUTERS/Raheb Homavandi Purchase Licensing Rights**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអត្ថាធិប្បាយរបស់មេដឹកនាំរូបនេះ បានធ្វើឡើងបន្ទាប់ពីចំណាត់ការរបស់អង្គការសហប្រជាជាតិកាលពីថ្ងៃអាទិត្យ ដើម្បីដាក់ទណ្ឌកម្មឡើងវិញ លើប្រទេសអ៊ីរ៉ង់ជុំវិញកម្មវិធីនុយក្លេអ៊ែររបស់ខ្លួន។ នៅក្នុងនោះមានប្រទេស បារាំង អង់គ្លេស និងអាល្លឺម៉ង់ បានចូលរួមចោទអ៊ីរ៉ង់ថា បានរំលោភលើកិច្ចព្រមព្រៀងនុយក្លេអ៊ែរ ឆ្នាំ ២០១៥។

យ៉ាងណា នាថ្ងៃដដែលនោះ ប្រធានាធិបតីអ៊ីរ៉ង់បាននិយាយសំដៅទៅលើការចរចាអនាគតជាមួយប្រទេសលោកខាងលិចក្នុងអំឡុងពេលកិច្ចប្រជុំគណៈរដ្ឋមន្ត្រី។ លោកថា អ៊ីរ៉ង់នៅតែត្រៀមខ្លួនសម្រាប់ការពិភាក្សាឡូជីខល (logical) ដោយផ្អែកលើលក្ខណៈវិនិច្ឆ័យច្បាស់លាស់។ ជាពិសេស ខ្លួននឹងប្រឆាំងដាច់ខាតការចរចាដែលនឹងនាំឲ្យមានបញ្ហានាពេលថ្មីៗនេះ។

ថ្វីដ្បិតតែបែបនេះក្ដី ប្រជាជនអ៊ីរ៉ង់ជាច្រើនក៏បានបង្ហាញអំពីក្ដីបារម្ភកាន់តែខ្លាំងឡើង ចំពោះការដាក់ទណ្ឌកម្ម អាចបណ្តាលឲ្យសេដ្ឋកិច្ចដែលកំពុងធ្លាក់ចុះរួចទៅហើយរបស់ប្រទេសកាន់តែយ៉ាប់យ៉ឺនថែមទៀត។ ជាការឆ្លើយតប លោក Pezeshkian បានបញ្ជាក់ថា រដ្ឋបាលរបស់លោក មានបំណងចាត់វិធានការចាំបាច់ ដើម្បីទ្រទ្រង់ជីវភាពរស់នៅរបស់ប្រជាជនទូទាំងប្រទេស៕

អត្ថបទ៖ សាង ស្រីល័ក្ខ

ចុចអាន៖លោក ថាក់ស៊ីន ដាក់សំណើសុំលើកលែងទោស ពីព្រះមហាក្សត្រ