ដើមឡើយ សហព័ន្ធបាល់ទាត់ទ្វីប អាស៊ី (AFC) បានកំណត់កៅអីឱ្យ កម្ពុជា តែ ១ កៅអីកន្លះប៉ុណ្ណោះក្នុងពាន AFC2 ដែលមានន័យ ថា ក្រុមជើងឯកលីគទទួលបាន ១ កៅអីនៅវគ្គចែកពូល និងក្រុមលេខ ២ ក្នុងលីគត្រូវប្រកួតជម្រុះ playoff។

ទោះបីជាយ៉ាងណា ព័ត៌មានចុងក្រោយ គឺ ភ្នំពេញក្រោន ដែលជាក្រុមលេខ ២ ក្នុងលីគកំពូលកម្ពុជា ទទួលបានកៅអីចូលលេងវគ្គចែកពូលដោយស្វ័យប្រវត្តិដូចក្រុមជើងឯកលីគ ព្រះខ័នរាជស្វាយរៀង ដែរ។

ប្រការនេះ បានជះសមិទ្ធផល​វិជ្ជមានជាច្រើនសម្រាប់ក្រុមបាល់ទាត់ទាំង ២ ក៏ដូចជាបាល់ទាត់កម្ពុជាទាំងមូល។ ថ្ងៃនេះសារព័ត៌មាន «កម្ពុជាថ្មី» សូមលើកយករឿងរ៉ាវ ៣ ចំណុច ដែលអ្នកគាំទ្រគួរដឹងអំពីក្រុម ព្រះខ័នរាជស្វាយរៀង និង ភ្នំពេញក្រោន បានលេងវគ្គចែកពូលពាន AFC2 រដូវកាល ២០២៦-២០២៧ ខាងមុខ៖

ទី១. នេះគឺជាលើកដំបូងហើយនៅក្នុងប្រវត្តិសាស្ត្របាល់ទាត់ កម្ពុជា ដែលមានក្លិបចំនួន ២ បានចូលលេងវគ្គចែកពូលពាន AFC Champions League Two។ កន្លងមក កម្ពុជា ធ្លាប់មានតែក្លិប ២ បានលេងនៅក្នុងពានកម្រិតទី ៣ AFC Challenge League ប៉ុណ្ណោះ ខណៈនៅក្នុងពាន AFC2 ពុំធ្លាប់មាននោះទេ។

កាលពីឆ្នាំ ២០២១ មានក្លិប កម្ពុជា ២ គឺបឹងកេត និងវិសាខា ធ្លាប់ទទួលបានកៅអីចូលវគ្គ​ចែក​ពូល​ពាន AFC2 នេះដែរ ដែលពេលនោះប្រើឈ្មោះ AFC Cup ប៉ុន្តែត្រូវបានរំសាយទៅវិញ ដោយសារវិបត្តិជម្ងឺកូវីដ១៩។

ទី ២. ការឈានចូលមកដល់វគ្គចែកពូលទាំង ២ ក្លិបបែបនេះ បានផ្តល់នូវរឿងល្អមួយទៀត គឺប្រាក់រង្វាន់។ ប្រាក់រង្វាន់នៅក្នុងពាន AFC2 គឺច្រើនជាងប្រាក់រង្វាន់នៅក្នុងពាន AFC3។ គ្រាន់តែគិតនៅវគ្គចែកពូលនេះ ក្នុងមួយក្រុមទទួលបានទឹកប្រាក់ចំនួន ៣០ ម៉ឺនដុល្លារអាមេរិក។ ដូច្នេះ បើបូកក្លិបកម្ពុជាទាំង ២ ចូលគ្នា គឺទទួលបានសរុបចំនួន ៦០ ម៉ឺនដុល្លារទៅហើយ។

ទី ៣. លីគបាល់ទាត់ កម្ពុជា នឹងទទួលបានចំណាត់ថ្នាក់កាន់តែល្អប្រសើរនៅក្នុងចំណាត់ថ្នាក់ក្លិប AFC។ ការគិតចំណាត់ថ្នាក់ក្លិបនៅក្នុង AFC គឺបានបែងចែកច្បាស់លាស់ទៅតាមកម្រិតពាន និងកម្រិតវគ្គនីមួយៗនៅក្នុងការប្រកួត។ ប្រការនេះ មានន័យ ថា លីគកម្ពុជានឹងទទួលបានពិន្ទុកាន់តែច្រើនជាងឆ្នាំមុនៗ ប្រសិនបើក្លិប ព្រះខ័នរាជស្វាយរៀង និង ភ្នំពេញក្រោន រកជ័យជម្នះបានច្រើននៅក្នុងវគ្គចែកពូល។

តាមបទបញ្ញត្តិរបស់ AFC បានឱ្យដឹង ថា ក្រុម ដែលឈ្នះនៅក្នុងវគ្គចែកពូលពាន AFC 2 នឹងទទួលបាន ៣ ពិន្ទុ ហើយបើស្មើនឹងទទួលបាន ០.៦៦៦ ពិន្ទុ។ ក្រឡេកទៅមើលពាន AFC3 ដែលក្លិប កម្ពុជា បានលេងកាលពីរដូវកាលមុនវិញ គឺបានពិន្ទុតិចជាង។ ក្នុងករណីឈ្នះ ទទួលបាន ១.៥ ពិន្ទុ ហើយបើស្មើទទួលបាន ០.៥ ពិន្ទុ។

បច្ចុប្បន្នលីគ កម្ពុជា កំពុងស្ថិតនៅចំណាត់ថ្នាក់លេខ ៩ ក្នុងតំបន់ អាស៊ីខាងកើត។ នេះជាចំណាត់ថ្នាក់មួយដ៏ល្អ បន្ទាប់ពីក្លិប​ ព្រះខ័នរាជស្វាយរៀង និង ភ្នំពេញក្រោន រួមចំណែកធ្វើបានល្អនៅក្នុងពាន AFC3 នា ២ រដូវកាលកន្លងមក។ ដូច្នេះ ប្រសើបើរដូវកាលខាងមុខ ក្រុមទាំង ២ បន្តធ្វើបានល្អទៀត នឹងធ្វើឱ្យចំណាត់ថ្នាក់លីគកម្ពុជាកាន់តែឡើងខ្ពស់ជាងនេះបន្ថែមទៀត៕

អត្ថបទ៖ សេម កុសល

The post ៣ ចំណុចគួរដឹង ពី ព្រះខ័នរាជស្វាយរៀង និង ភ្នំពេញក្រោន បានលេងវគ្គចែកពូលពា​ន AFC2 appeared first on Kampuchea Thmey Daily.

ដើមឡើយ សហព័ន្ធបាល់ទាត់ទ្វីប អាស៊ី (AFC) បានកំណត់កៅអីឱ្យ កម្ពុជា តែ ១ កៅអីកន្លះប៉ុណ្ណោះក្នុងពាន AFC2 ដែលមានន័យ ថា ក្រុមជើងឯកលីគទទួលបាន ១ កៅអីនៅវគ្គចែកពូល និងក្រុមលេខ ២ ក្នុងលីគត្រូវប្រកួតជម្រុះ playoff។

ទោះបីជាយ៉ាងណា កាលពីថ្ងៃ ពុធ ទី ១០ ខែ មិថុនា ឆ្នាំ ២០២៦ ក្លិប ភ្នំពេញក្រោន បានប្រកាសជាផ្លូវការ ថា ពួកគេទទួលបានកៅអីឡើងទៅវគ្គចែកពូលដោយស្វ័យប្រវត្តិ ពោលគឺពុំមានការប្រកួតជម្រុះឡើយ។ ដូច្នេះ ក្រុមតំណាង កម្ពុជា នឹងមាន ២ ក្រុម ដើម្បីចូលប្រកួតនៅ​វគ្គ​សន្សំពិន្ទុ​ក្នុង​ពូល​ពាន AFC2 រដូវកាលថ្មី ២០២៦-២០២៧។

ងាកទៅមើលការប្រកួតជម្រុះ playoff វិញ គឺគិតត្រឹមពេលនេះ នៅសល់ត្រឹមតែ ២ ក្រុមប៉ុណ្ណោះ ក្នុងនោះមានក្រុមជើងឯកលីគ ឥណ្ឌូណេស៊ី Persib Bandung និងក្រុមជើងឯកលីគ ហ្វីលីពីន Manila Digger។ ការប្រកួតជម្រុះ playoff រវាងក្រុមទាំង ២ នឹងធ្វើឡើងចំនួន ១ ជើង ដែលនឹងធ្វើនៅថ្ងៃទី ១២ ខែ សីហា ឆ្នាំ ២០២៦។

គួរបញ្ជាក់ ថា ការប្រកួតពាន AFC2 រដូវកាល ២០២៦-២០២៧ នេះ នឹងចាប់ផ្តើមពីខែ កញ្ញា ឆ្នាំ ២០២៦ រហូតដល់ខែ ឧសភា ឆ្នាំ ២០២៧៕

អត្ថបទ៖ សេម កុសល

The post ក្រុមហ្វីលីពីន និងឥណ្ឌូណេស៊ី ត្រូវជម្រុះ ខណៈ ភ្នំពេញក្រោន ឡើងវគ្គចែកពូល ដូចព្រះខ័នរាជស្វាយរៀង ពាន AFC2 appeared first on Kampuchea Thmey Daily.

ការ​ទទួល​បាន​កៅអី​វគ្គ​ចែក​ពូល​នេះ ដោយសារ​ ព្រះ​ខ័ន​រាជ​ស្វាយរៀង បាន​ឈាន​ដល់​វគ្គ​ផ្តាច់​ព្រ័ត្រ ពាន​រង្វាន់​កម្រិត​ទី​៣ AFC Challenge League កាល​ពី​រដូវ​កាល​ ២០២៤-២៥ ​ដែល​ផ្តល់​ឲ្យ​សម្រាប់​ក្រុម​ជើង​ឯក​លីគ​កំពូល​កម្ពុជា រដូវ​កាល ២០២៥-២៦ និង​ទទួល​បាន​កន្លះ​កៅអី​ទៀត​សម្រាប់​ក្រុម​ចំណាត់​ថ្នាក់​លេខ ២ នៃ​លីគ​កំពូល​កម្ពុជា។

ជា​ថ្មី​ម្តង​ទៀត ព្រះ​ខ័ន​រាជ​ស្វាយរៀង បានឈាន​ដល់​វគ្គ​ផ្តាច់​ព្រ័ត្រ AFC Challenge League រដូវ​កាល ២០២៥-២៦ ហើយ​កម្ពុជា ទទួល​បាន​កៅអី​វគ្គ​ចែក​ពូល​ទៀត​នៅ​រដូវ​កាល ២០២៧​-២៨ សម្រាប់ក្រុម​ជើង​​ឯក​លីគ​កំពូល​កម្ពុជា​ទៀត។

តាម​លក្ខន្តិកៈ​នៃ​ការ​ប្រកួតពាន​រង្វាន់ AFC Champions League Two រដូវ​កាល ២០២៦-២៧ បាន​ចែង​​ថា ការ​​ប្រកួត​ជម្រុះ​បឋម​ ក្រុម​នីមួយ​ៗ​ ទទួល​បាន​ប្រាក់​ចំនួន ៥ ម៉ឺន​ដុល្លារ​អាមេរិក សម្រាប់​ការ​ធ្វើ​ដំណើរ ដូច្នេះ ​ភ្នំពេញ​ក្រោន នឹង​ទទួល​បាន ៥ ម៉ឺន​ដុល្លារសម្រាប់​ការ​ធ្វើ​ដំណើរ​។

ចំណែក​នៅ​វគ្គ​ចែកពូល ក្រុម​នីមួយ​ៗ​ទទួល​បាន​ចំនួន ៣០ ម៉ឺន​ដុល្លារ​អាមេរិក ដូច្នេះ​ ព្រះ​ខ័ន​រាជ​ស្វាយរៀង នឹង​ទទួល​បាន ៣០ ម៉ឺន​ដុល្លារ​អាមេរិក​សម្រាប់​ការ​ចំណាយ​លើ​ការ​ប្រកួត​វគ្គ​នេះ។ ចំពោះ ភ្នំពេញ​ក្រោន ប្រសិន​បើ​បាន​ឆ្លង​ផុត​វគ្គ​ជម្រុះ ហើយ​ឈាន​ដល់​វគ្គ​ចែក​ពូល នឹង​ទទួល​បាន ៣០ ម៉ឺន​ដុល្លារ​​ដែរ។

នៅ​​ដល់​វគ្គ ១៦ ក្រុម​ចុង​ក្រោយ ក្រុម​នីមួយ​ៗ​នឹង​ទទួល​បាន​ ៨ ម៉ឺន​ដុល្លារ​អាមេរិក​​បន្ថែម​ទៀត ហើយ​​​ឈាន​ដល់​វគ្គ ៨ ក្រុម​ចុង​ក្រោយ ក្រុម​នីមួយ​ៗ​នឹង​ទទួល​បាន ១៦ ម៉ឺន​ដុល្លារ​អាមេរិក​បន្ថែម​ទៀត និង​វគ្គ​ ៤ ក្រុម​ចុង​ក្រោយ ក្រុម​នីមួយ​ៗ​ នឹង​ទទួល​បាន ២៤ ម៉ឺន​ដុល្លារ​អាមេរិក។

ចំណែក​ក្រុម​ចំណាត់​ថ្នាក់​លេខ ២ ដែល​ជា​ជើង​ឯក​រង ទទួល​បាន ១ លាន​ដុល្លារ​អាមេរិក ខណៈ ក្រុម​ជើង​ឯក​ទទួល​បាន ២,៥ លាន​ដុល្លារ​អាមេរិក។

ប្រាក់​ឧបត្ថម្ភ និង​ប្រាក់​រង្វាន់

• ក្រុម​ភ្ញៀវ ទទួល​បាន ៥ ម៉ឺន​ដុល្លារ សម្រាប់​ថ្លៃ​ធ្វើ​ដំណើរ វគ្គ​ជម្រុះ​បឋម
• ក្រុម​នីមួយ​ៗ​ទទួល​បាន ៣០ ម៉ឺន​ដុល្លារ វគ្គ​សន្សំពិន្ទុ​ក្នុង​ពូល
• វគ្គ ១៦ ក្រុម​ចុង​ក្រោយ ក្រុមនីមួយ​ៗ ទទួល​បាន ៨ ម៉ឺន​ដុល្លារ​ទៀត
• វគ្គ ៨ ក្រុម​ចុង​ក្រោយ ក្រុម​នីមួយ​ៗ ទទួល​បាន ១៦ ម៉ឺន​ដុល្លារ​ទៀត
• វគ្គ ៤ ក្រុម​ចុង​ក្រោយ ក្រុម​នីមួយ​ៗ ទទួល​បាន ២៤ ម៉ឺន​ដុល្លារ​ទៀត
• ចំណាត់​ថ្នាក់​លេខ ២ ទទួល​បាន ១ លាន​ដុល្លារ
• ជើង​ឯក ទទួល​បាន ២,៥ លាន​ដុល្លារ

អត្ថបទ៖ វិរបុត្រ

The post គ្រាន់​តែ​វគ្គ​ចែក​ពូល ព្រះ​ខ័ន​រាជ​ស្វាយរៀង ទទួល​បាន ៣០ ម៉ឺន​ដុល្លារ​ក្នុង​ពាន AFC2 appeared first on Kampuchea Thmey Daily.

នៅថ្ងៃ ពុធ ទី ២០ ខែ ឧសភា ឆ្នាំ ២០២៦ ក្រុម ភ្នំពេញក្រោន បានប្រកាសជាផ្លូវការអំពីការចែកផ្លូវគ្នាជាមួយកីឡាករ ៦ នាក់រួមមាន Maksym Pryadun, Makerlo Tellez, Andres Nieto, សាវែង សំណាង, ហាមីសុី មូហាំម៉ាត់ ហើយសូម្បីកីឡាករ យ៉ើ ម៉ូស្លីម ក៏មានឈ្មោះផងដែរ។

កីឡាករភាគច្រើនទើបតែចូលរួមជាមួយក្រុមសិង្ហក្រហមបាន ១ រដូវកាល លើកលែងតែ យ៉ើ ម៉ូស្លីម និង Nieto ប៉ុណ្ណោះ ដែលធ្លាប់នៅទីនេះរយៈពេលយូរឆ្នាំ។ ការរុះរើក្រុមទ្រង់ទ្រាយធំបែបនេះរបស់ ភ្នំពេញក្រោន បន្ទាប់ពីរដូវកាល ២០២៥-២០២៦ កន្លងទៅមិនទទួលបានលទ្ធផលល្អ ដោយមិនអាចឈ្នះពានសូម្បីតែ ១ ក្នុងការប្រជែងពានចំនួន ៤ ផ្សេងគ្នា។

ភ្នំពេញក្រោន ទំនងជានឹងនាំចូលកីឡាករថ្មីឆ្នើមជាច្រើន ដើម្បីមកពង្រឹងក្រុមនៅរដូវកាល ២០២៦-២០២៧ ខាងមុខ ដោយសារពួកគេមានពានរង្វាន់ជាច្រើន ដែលត្រូវលេង ជាពិសេសពាន AFC Champions League Two៕

អត្ថបទ៖ សេម កុសល

The post ចប់​រដូវ​កាល​ភ្លាម ភ្នំពេញក្រោន​ ចាប់​ផ្តើម រុះរើក្រុមទ្រង់ទ្រាយធំ មួយថ្ងៃ​ចែកផ្លូវកីឡាករ ៦ នាក់ appeared first on Kampuchea Thmey Daily.

កត្តាដែល ព្រះខ័នរាជស្វាយរៀង ឡើងដល់វគ្គផ្តាច់ព្រ័ត្រពានរង្វាន់ AFC Challenge League កាលពីរដូវកាល ២០២៤-២០២៥ បានធ្វើឱ្យ កម្ពុជា រកបានពិន្ទុយ៉ាងច្រើននៅក្នុងចំណាត់ថ្នាក់ក្លិប AFC រហូតធ្វើឱ្យក្លិបក្នុងលីគ កម្ពុជា ទទួលបាន ១ កៅអីកន្លះឡើងទៅលេងពាន AFC Champions League Two នៅរដូវកាលក្រោយ ២០២៦-២០២៧។

បច្ចុប្បន្ន កម្ពុជា បានរកឃើញទាំង ២ ក្រុមហើយ ដែលត្រូវឡើងទៅលេងពាន AFC2 នៅរដូវកាលក្រោយ រួមមាន ព្រះខ័នរាជស្វាយរៀង ជាក្រុមជើងឯកលីគកំពូល កម្ពុជា និង ភ្នំពេញក្រោន ជាជើងឯករងលីគកំពូល កម្ពុជា។ ព្រះខ័នរាជស្វាយរៀង នឹងត្រូវចូលវគ្គចែកពូលដោយស្វ័យប្រវត្តិ ខណៈ ភ្នំពេញក្រោន ត្រូវប្រកួតជម្រុះ playoffs។

ដោយឡែកនៅរដូវកាល ២០២៧-២០២៨ កម្ពុជា ក៏ទទួលបានកៅអីលេងពាន AFC2 ១ កៅអីកន្លះផងដែរ បន្ទាប់ពី ព្រះខ័នរាជស្វាយរៀង និង ភ្នំពេញក្រោន ធ្វើបានល្អនៅក្នុងពាន AFC Challenge League រដូវកាលនេះ។

យោងតាម Footy Ranking បន្ទាប់ពី ព្រះខ័នរាជស្វាយរៀង ឡើងដល់វគ្គផ្តាច់ព្រ័ត្រ និង ភ្នំពេញក្រោន ឡើងដល់វគ្គ ៨ ក្រុម បានធ្វើឱ្យ កម្ពុជា ឈរនៅលេខ ៩ ប្រចាំតំបន់អាស៊ីខាងកើតមាន ២៧.៨៥០ ពិន្ទុ លើក្រុមលេខ ១០ ឥណ្ឌូណេស៊ី មាន ២៧.៨៥០។

នៅរដូវកាលក្រោយ ក្លិប កម្ពុជា នឹងកាន់តែអាចសន្សំពិន្ទុបានច្រើន ដោយសារតែបានលេងនៅក្នុងពានអាស៊ីកម្រិតទី ២។ ដូច្នេះប្រសិនបើ ព្រះខ័នរាជស្វាយរៀង និង ភ្នំពេញក្រោន ធ្វើបានល្អ ដោយអាចឡើងដល់វគ្គជ្រៅៗ នោះនឹងអាចរកបានពិន្ទុច្រើន ដើម្បីបន្តលេងក្នុងពាន AFC2 ទៀត៕

អត្ថបទ៖ សេម កុសល

The post គុណសម្បត្តិ ព្រះខ័នរាជស្វាយរៀង និង ភ្នំពេញក្រោន ធ្វើឱ្យកម្ពុជា បានលេង AFC2 ពីររដូវកាលជាប់គ្នា appeared first on Kampuchea Thmey Daily.

កីឡាករ​បាន​ប្រកាស​ថា ៖«ខ្ញុំ​ចង់​អរគុណ​ដល់​ក្លិប​ ភ្នំពេញ​ក្រោន​ សម្រាប់​ច្រើន​ឆ្នាំ​កន្លង​មក​នេះ សម្រាប់​ការ​វិល​ត្រឡប់​មក​ពី​ឥណ្ឌូណេស៊ី​វិញ។ អ្នក​បាន​ស្វាគមន៍​ខ្ញុំយ៉ាង​ល្អ​បំផុត។ ខ្ញុំ​នឹង​ចង​ចាំ​នៅ​ក្នុង​បេះ​ដូង​ជា​និច្ច។ ជា​មួយ​អ្នក ខ្ញុំ​បាន​ឈ្នះ​ពាន​រង្វាន់​ជា​ច្រើន ប៉ុន្តែ​ពេល​វេលា​របស់​ខ្ញុំ​នៅ​ទី​នេះ​បាន​ដល់​ទី​បញ្ចប់​ហើយ។ ខ្ញុំ​​នឹង​ចាកចេញ​ដោយ​ចង​ចាំ​គ្រប់​បែប​យ៉ាង​​នូវ​អ្វី​ដែល​​ខ្ញុំ​ទទួល​បាន​ជោគជ័យ​ជា​លក្ខណៈ​ក្រុម និងជា​បុគ្គល»។

«សូម​អរគុណ​ច្រើន​សម្រាប់​ថ្នាក់​ដឹក​នាំ ម្ចាស់​ក្លិប ក្រុម​ការងារ​គ្រូ​បង្វឹក និង​កីឡាករ​ទាំង​អស់។ ខ្ញុំស្រឡាញ់​អ្នក​ទាំង​អស់​គ្នា ហើយ​អ្នក​ទាំង​អស់​គ្នា​នឹង​ស្ថិត​នៅ​ក្នុង​បេះ​ដូង​ខ្ញុំ​ជា​និច្ច»។ កីឡាករ​បាន​បន្ថែម​ចុង​ក្រោយ។

កីឡាករ Andres Neito បានលេង​​ឲ្យ​ ភ្នំពេញ​ក្រោន រយៈ​ពេល ៥ រដូវ​កាល​គិត​ចាប់​តាំង​ពី​ឆ្នាំ២០២០ រហូត​ដល់ ឆ្នាំ ២០២៥ ដែល​ផ្តល់​ឱកាស​ឲ្យ​រូប​គេ​គ្រប់​លក្ខខណ្ឌ​ក្នុង​ការ​ទទួល​បាន​សញ្ជាតិ​ខ្មែរ ហើង​លេង​​តំណាងឲ្យ​ជម្រើស​ជាតិ​កម្ពុជា​លើ​ឆាក​អន្តរជាតិ។

នៅ​រដូវ​កាល ២០២៥-២៦ រូប​គេ​បាន​ចាក​ចេញ​ពី ភ្នំពេញ​ក្រោន ដែល​ជា​រដូវ​កាល​ក្លិប​មួយ​នេះ​ផ្លាស់​ប្តូរ​ទ្រង់​ទ្រា​ធំ ហើយ​បាន​ទៅ​ចូល​រួម​ជា​មួយ​ក្លិបឥណ្ឌូណេស៊ី​ Bhayangkara Presisi បាន​តែ​ពាក់​កណ្តាល​រដូវ​កាល​ប៉ុណ្ណោះ ក៏​បាន​វិល​ត្រឡប់​មក​ចូល​រួម​ជា​មួយ ភ្នំពេញ​ក្រោន វិញ។ នៅ​ចុង​បញ្ចប់​រដូវ​កាល​នេះ រូប​គេ​បាន​ប្រកាស​ចាក​ចេញ​តែ​ម្តង។

សម្រាប់​ការ​លេង​ឲ្យ​ភ្នំពេញ​ក្រោន Andres Neito បាន​ឈ្នះ​ជើង​ឯក​លីគ​កំពូលកម្ពុជា ២ លើក​គឺ​ឆ្នាំ ២០២១ និង ២០២២, ឈ្នះ​ជើង​ឯក​ពាន​រង្វាន់​សម្តេច​តេជោ ហ៊ុន សែន ១ លើក រដូវ​កាល ២០២៤-២៥, ឈ្នះ​ជើង​ឯក ខេមបូឌានស៊ុបភើខាប់ ២ លើក ឆ្នាំ ២០២២ និង ២០២៣ និង​ឈ្នះជើង​ឯក ខេមបូឌានលីគ​ខាប់ ២ លើក ឆ្នាំ ២០២២ និង ២០២៣។

ជា​មួយ​គ្នា​នេះ រូប​គេបាន​ឈ្នះ​ពាន​រង្វាន់​ឯកត្តជន​ជា​ច្រើន​ទៀត​ដូច​ជា ពាន​ស្បែក​ជើង​មាសក្នុង​នាម​ជា​កីឡាករ​រក​បាន​គ្រាប់​បាល់​ច្រើន​ជាង​គេ ជា​កីឡាករ​ល្អ​បំផុត​ប្រចាំ​រដូវ​កាល និង​ពាន​កីឡាករ​ជម្រើស ១១ នាក់​ល្អ​បំផុត​ប្រចាំ​រដូវ​កាល៕

អត្ថបទ៖ វិរបុត្រ

The post ខ្សែប្រយុទ្ធ​សញ្ជាតិ​កម្ពុជា Andres Neito បាន​សម្រេច​ចាក​ចេញ​ពី ភ្នំពេញ​ក្រោន ហើយ​ appeared first on Kampuchea Thmey Daily.

ការប្រជែងតំណែងលេខ ២ នៅក្នុងលីគកំពូល កម្ពុជា នៅតែជាប្រធានបទក្តៅក្នុងរដូវកាលនេះ បន្ទាប់ពី ភ្នំពេញក្រោន និង អង្គរថាយហ្គឺរ​ ឈ្នះដូចគ្នាកាលពីល្ងាចថ្ងៃ អាទិត្យ ទី ១០ ខែ ឧសភា ឆ្នាំ ២០២៦។ លទ្ធផលក្នុងសប្តាហ៍ទី ២៩ គឺ ភ្នំពេញក្រោន បានឈ្នះក្រុម ណាហ្គាវើលដ៍ នៅទឹកដីខ្លួន ៣-០ ខណៈ អង្គរថាយហ្គឺរ​ ឈ្នះ អឹមអូអាយ កំពង់ដេវ៉ា ២-១ នៅកីឡដ្ឋាន វិសាខា។

បច្ចុប្បន្នក្រុម ភ្នំពេញក្រោន បានហក់ឡើងមកឈរ ២ វិញ​ ដោយមាន ៥៣ ពិន្ទុស្មើគ្នា ជាមួយនឹងក្រុមលេខ ៣ អង្គរថាយហ្គឺរ។ ក្រុមទាំង ២ ត្រូវរង់ចាំអ៊ុតមើលដល់សប្តាហ៍ទី ៣០ ដែលជាការប្រកួតចុងក្រោយក្នុងលីគរដូវកាលនេះ ទើបនឹងរកឃើញក្រុមទទួលបានតំណែងលេខ ២ ជាផ្លូវការ ដើម្បីទទួលបានកន្លះកៅអីចូលរួមការប្រកួតក្នុងពាន AFC Champions League Two។

ប្រកួតនៅថ្ងៃ អាទិត្យ ចុងសប្តាហ៍នេះ ក្រុម ភ្នំពេញក្រោន ត្រូវជួបក្រុមម្ចាស់ជើងឯក ព្រះខ័នរាជស្វាយរៀង នៅពហុកីឡដ្ឋានជាតិមរតកតេជោ។ ចំណែក អង្គរថាយហ្គឺរ​ ត្រូវជួបក្រុម ណាហ្គាវើលដ៍ នៅទឹកដីខេត្ត សៀមរាប។ ប្រសិនបើ ភ្នំពេញក្រោន និង អង្គរថាយហ្គឺរ ឈ្នះ ឬ ចាញ់ដូចគ្នា នោះ ភ្នំពេញក្រោន នឹងនៅបន្តកាន់កាប់តំណែងលេខ ២ ដដែល ដោយផ្អែកលើរូបមន្ត head to head។ ដូច្នេះ ករណីដែល អង្គរថាយហ្គឺរ​ អាចឡើងមកឈរលេខ ២ បាន ទាល់តែពួកគេឈ្នះ ហើយ ភ្នំពេញក្រោន ចាញ់ការប្រកួតចុងក្រោយនេះ។

ងាកទៅកាន់ក្រុម បឹងកេត វិញ គឺបានអស់ឱកាសប្រជែងលេខ ២ ហើយ ទោះពេលនេះពួកគេមាន ៥០ ពិន្ទុ ដោយចាញ់ពិន្ទុក្រុមលេខ ២ តែ ៣ ពិន្ទុក៏ដោយ។ ប្រការនេះ មានន័យ ថា ការប្រកួតចុងក្រោយក្រោយទល់នឹងក្រុម អឹមអូអាយ កំពង់ដេវ៉ា ទោះ បឹងកេត ឈ្នះ ហើយក្រុម ភ្នំពេញក្រោន និង អង្គរថាយហ្គឺរ ចាញ់ដូចគ្នា ក៏ក្រុមនាគខៀវមិនអាចឡើងមកលេខ ២ បានដែរ ដោយសារតែគិតលើរូបមន្ត head to head។

គិតត្រឹមពេលនេះ មានតែ ភ្នំពេញក្រោន និង អង្គរថាយហ្គឺរ​ ប៉ុណ្ណោះ ដែលនៅស្ថិតជាបេក្ខភាពប្រជែងតំណែងលេខ ២ ដល់ការប្រកួតចុងក្រោយ។ យ៉ាងណា ភ្នំពេញក្រោន ហាក់មានតែមជាងបន្តិច ត្រង់ ថា អង្គរថាយហ្គឺរ មិនបានជាប់ក្នុងអាជ្ញាបណ្ណក្លិប AFC នោះទេ។ ចំណុចនេះ ធ្វើឱ្យក្រុមមានមូលដ្ឋាននៅខេត្តសៀមរាបហាក់មានភាគរយទាបក្នុងការតំណាងឱ្យ កម្ពុជា ឡើងទៅលេងពានទី ២ របស់ទ្វីប អាស៊ី ទោះពួកគេដណ្តើមបានលេខ ២ ក្នុងលីគ។

គ្រប់យ៉ាងមានតែរង់់ចាំដល់ដំណាក់កាលចុងក្រោយតែម្តង ដោយសារប្រធានក្លិបរបស់ អង្គរថាយហ្គឺរ​ លោក Akihiro Kato បានលើកឡើង ថា ក្រុមលោកនឹងតស៊ូដល់ទីបញ្ចប់ ហើយកំពុងដាក់បណ្តឹងឧទ្ធរណ៍ ដើម្បីតវ៉ាអំពីអាជ្ញាប័ណ្ណក្លិប AFC នេះ។ ដូច្នេះ អង្គរថាយហ្គឺរ នៅតែមានឱកាសអាចលេងពាន AFC2 បាន ប្រសិនបើការតវ៉ាទទួលបានជោគជ័យ៕

អត្ថបទ៖ សេម កុសល

The post បឹងកេត អស់ឱកាសលេខ ២ ខណៈ ភ្នំពេញក្រោន និង អង្គរថាយហ្គឺរ ត្រូវប្រជែងគ្នាដល់ប្រកួតចុងក្រោយ appeared first on Kampuchea Thmey Daily.

ភ្នំពេញ​ក្រោន បាន​ធ្លាក់​ពី​ពាន​រង្វាន់​សម្តេច​តេជោ ហ៊ុន សែន និង​ពាន​រង្វាន់​អាស៊ី​កម្រិត​ទី​៣ AFC Challenge League ហើយ​ក៏​ស្ទើរ​តែ​អស់​ឱកាស​ក្នុង​ការ​ប្រជែង​ជើង​ឯក​ក្នុង​លីគ​បាល់ទាត់​កំពូល​កម្ពុជា​ថែម​ទៀត បន្ទាប់​ពី​ធ្វើ​មិន​បាន​ល្អ​ទាល់​តែ​សោះ​ក្នុង​ប្រមាណ ៨ ប្រកួត​ចុង​ក្រោយ។

ការ​ជួប​ព្រះ​ខ័ន​រាជ​ស្វាយរៀង នៅ​ថ្ងៃ​សៅរ៍​នេះ ភ្នំពេញ​ក្រោន ត្រូវ​ធ្វើ​យ៉ាង​ណា ដើម្បី​រក​ឲ្យ​​បាន​ពិន្ទុ​សម្រាប់​រក្សា​ខ្លួន​ឲ្យ​បន្ត​ស្ថិត​នៅ​ចំណាត់​ថ្នាក់​លេខ ២ ។ ពួក​គេ​មាន ៤៧ ពិន្ទុ ​នាំ​មុខ​តែ ៥ ពិន្ទុ​ប៉ុណ្ណោះ​លើ​ក្រុម​ចំណាត់​ថ្នាក់​លេខ ៣ គឺ ណាហ្គាវើលដ៍​ ដែល​មាន ៤២ ពិន្ទុ និង​ក្រុមលេខ​៣ អង្គរថាយហ្គឺរ មាន ៤១ ពិន្ទុ ហើយក្រុម​លេខ ៤​ បឹងកេត មាន ៤០ ពិន្ទុ។

ប្រការ​នេះ ប្រសិន​បើ​ភ្នំពេញ​ក្រោន ភ្លាត់​ចាញ់ ១ ឬ ២ ប្រកួត​ទៀត នោះ​ចំណាត់​ថ្នាក់​លេខ ២ ​នឹង​ធ្លាក់​ទៅ​ក្រុម​ផ្សេង​ ពី​ព្រោះ​ក្រុម​ចំណាត់​ថ្នាក់​លេខ ២ នៃ​លីគ​កំពូល​កម្ពុជា ត្រូវ​លេង​ពាន​អាស៊ី​កម្រិត​ទី​២ AFC Champions League  Two វគ្គ​ជម្រុះ ដូច្នេះ​ ភ្នំពេញក្រោន ត្រូវ​លះ​បង់​គ្រប់​បែប​យ៉ាង​​ដើម្បី​ឱកាស​ចុង​ក្រោយ។

ព្រះ​ខ័ន​រាជ​ស្វាយរៀង មាន ៥៩ ពិន្ទុ ឈរ​លើ​កំពូល​តារាង ដោយ​នាំ​មុខ ១២ ពិន្ទុ លើ​ភ្នំពេញ​ក្រោន។ ពួក​គេ​ត្រូវ​ការ​តែ ៤ ពិន្ទុ​ទៀត​ប៉ុណ្ណោះ​ដើម្បី​ក្លាយ​ជា​ជើង​ឯក​លីគកំពូល​កម្ពុជា​រដូវ​កាល​នេះ និង​អាច​ជា​ការឈ្នះ​ជើង​ឯក​លីគ ៣ រដូវ​កាល​ជាប់​គ្នា។

ការ​ជួប​គ្នា​នេះ​អាច​ចាត់​ទុក​ជា​សំណាង​ខ្លះ​​សម្រាប់​ ភ្នំពេញ​ក្រោន ពី​ព្រោះ​ ព្រះ​ខ័ន​រាជស្វាយរៀង ទំនង​ជា​មិន​ព្យាយាម​លេង​អស់​ពី​កម្លាំង​កាយ​ចិត្ត និង​ប្រើ​ប្រាស់កីឡាករ​​​អស់​ពី​លទ្ធភាព​នោះ​ទេ។ ព្រះ​ខ័ន​រាជ​ស្វាយរៀង មាន​ការ​ប្រកួត​សំខាន់​បំផុត​ជា​មួយ Manila Digger នៅ​ ៤ ថ្ងៃ​បន្ទាប់ ជើង​ទី​១ ​វគ្គ​ពាក់​កណ្តាល​ផ្តាច់​ព្រ័ត្រ AFC Challenge League។ ​បើ​ទោះ​ជា​ចាញ់ ភ្នំពេញក្រោន ក៏​ ព្រះ​ខ័ន​រាជ​ស្វាយរៀង មិន​មាន​បញ្ហា​អាក្រក់​ខ្លាំង​​​នោះ​ទេ ដោយសារកម្មវិធី​ប្រកួត​លីគ​​​នៅ​សល់ ៦ ​ប្រកួត​ទៀត ហើយ​ពួក​គេ​ត្រូវ​ការ​តែ ៤ ពិន្ទុ​ទៀត​ប៉ុណ្ណោះ។

រឿង​សំខាន់​ថា តើ ភ្នំពេញ​ក្រោន អាច​យក​ឈ្នះ ព្រះ​ខ័ន​រាជ​ស្វាយរៀង បាន​ទេ បន្ទាប់​ពី​ជួប​គ្នា ៣ លើក​ចុង​ក្រោយ​ គឺ​មិន​ឈ្នះ​សោះ ក្នុង​នោះ​ចាញ់ ២-៣ ក្នុង​លីគ ហើយ​ចាញ់ ១-៤ និងចាញ់​ ១-២ ​ក្នុង​ពាន AFC Challenge League វគ្គ ៨ ក្រុម​ចុង​ក្រោយ។

ស្ថិតិ ៨ ប្រកួត​ចុង​ក្រោយ របស់ ភ្នំពេញ​ក្រោន មិន​ឈ្នះ​សោះ

• ស្មើ អង្គរថាយហ្គឺរ ០-០ (លីគ)
• ចាញ់ អឹមអូអាយ កំពង់ដេវ៉ា ១-២ (លីគ)
• ចាញ់ បឹងកេត ១-២ (លីគ)
• ចាញ់​ ណាហ្គាវើលដ៍ ០-១ (លីគ)
• ស្មើ អាយអេសអាយ ដង្កោសែន​ជ័យ ២-២ (ពាន​សម្តេច​តេជោ)
• ចាញ់ អាយអេសអាយ ដង្កោសែន​ជ័យ ៣-១ (ពាន​សម្តេច​តេជោ)
• ចាញ់ ព្រះ​ខ័ន​រាជ​ស្វាយរៀង ១-៤ (ពាន AFC)
• ចាញ់ ព្រះ​ខ័ន​រាជ​ស្វាយរៀង ១-២ (ពាន AFC)

អត្ថបទ៖ វិរបុត្រ

The post ភ្នំពេញក្រោន ត្រូវ​ការឈ្នះ ព្រះ​ខ័ន​រាជ​ស្វាយរៀង ថ្ងៃ​សៅរ៍​នេះ​ដើម្បី​លេខ ២ ក្នុងលីគ appeared first on Kampuchea Thmey Daily.