តាមការផ្សាយរបស់ CNA, ជាមួយនឹងកម្ពស់ទឹករលកខ្ពស់ៗ ស៊ូណាមិ បានវាយប្រហារដូចជា៖

• ក្រុង Urakawa នៃកោះ Hokkaido
• តំបន់ Shono នៃក្រុង Erimo
• កំពង់ផែ Mutsu Ogawara នៃតំបន់ Aomori 
• កំពង់ផែ Hachinohe នៃតំបន់ Aomori 
• ក្រុង Miyako នៃតំបន់ Iwate
• ក្រុង Ofunato នៃតំបន់ Iwate
• ក្រុង Kamaishi នៃតំបន់ Iwate

សូមជម្រាបជាថ្មី រញ្ជួយដីកម្រិតធ្ងន់នេះ បានវាយប្រហារប្រទេសជប៉ុន ឈានដល់ការទាញសញ្ញាព្រមានរលកយក្សស៊ូណាមិ និងប្រកាសអាសន្ន ថែមទាំងជម្លៀសពលរដ្ឋជាបន្ទាន់ទៀតផង។

វាមានចំណុចកណ្តាលមានជម្រៅ១០គីឡូម៉ែត្រ នៅជិតឆ្នេរ Sanriku ខណៈបើយោងតាមក្រុមអ្នកជំនាញរញ្ជួយដីបានឲ្យដឹងថា កម្លាំងរង្គើ គឺខ្លាំងដែលសមល្មមធ្វើឲ្យញ័រដល់អគារខ្ពស់ៗ ក្នុងទីក្រុងតូក្យូបាន ដ្បិតវាមានចម្ងាយរាប់រយគីឡូម៉ែត្រ ពីចំណុចកណ្តាលក៏ដោយ៕

អត្ថបទ៖ សុខ សុវណ្ណ

The post រលកយក្សស៊ូណាមិ វាយប្រហារច្រើនកន្លែងនៅ ជប៉ុន appeared first on Kampuchea Thmey Daily.

តាមការផ្សាយរបស់ NHK, រញ្ជួយដីវាយប្រហារនៅភាគខាងជើងប្រទេស ជាមួយចំណុចកណ្តាលមានជម្រៅ១០គីឡូម៉ែត្រ នៅជិតឆ្នេរ Sanriku។

ការព្រមានរលកយក្សស៊ូណាមិ បានប្រកាសនៅតំបន់ចំនួន៣ដូចជា Iwate, Aomori និង Hokkaido ខណៈរលកសមុទ្រត្រូវគេឃើញមានកម្ពស់រហូតដល់ទៅ ៣ម៉ែត្រឯណោះ។

ស្របពេលជាមួយគ្នានោះ ពលរដ្ឋរស់នៅតាមបណ្តោយឆ្នេរសមុទ្រ ក្នុងតំបន់ខាងលើទាំង៣នេះ ត្រូវព្រមានឲ្យប្រញាប់ជម្លៀសទៅកាន់ទីទួលសុវត្ថិភាព រង់ចាំការជូនដំណឹងបន្ទាប់។

យោងតាមក្រុមអ្នកជំនាញរញ្ជួយដីបានឲ្យដឹងថា កម្លាំងរង្គើ គឺខ្លាំងដែលសមល្មមធ្វើឲ្យញ័រដល់អគារខ្ពស់ៗ ក្នុងទីក្រុងតូក្យូបាន ដ្បិតវាមានចម្ងាយរាប់រយគីឡូម៉ែត្រ ពីចំណុចកណ្តាលក៏ដោយ៕

អត្ថបទ៖ សុខ សុវណ្ណ

The post ជប៉ុនប្រកាសអាសន្នរលកយក្សស៊ូណាមិ និងជម្លៀសពលរដ្ឋបន្ទាន់ ព្រោះរញ្ជួយដីកម្រិតធ្ងន់  appeared first on Kampuchea Thmey Daily.

តាមការផ្សាយរបស់ CNA, រញ្ជួយដី ៧.៤រ៉ិចទ័រ បានវាយប្រហារនៅម៉ោង ៦:៤៨នាទីព្រឹកថ្ងៃព្រហស្បតិ៍ទី២ខែមេសា មានចំណុចកណ្តាលក្នុងសមុទ្រ Molucca ក្បែរកោះ Ternate ជម្រៅ៣៥គីឡូម៉ែត្រ។

ស្របពេលជាមួយគ្នានោះ អង្គភាពអង្កេតភូមិសាស្ត្រសហរដ្ឋអាមេរិក (USGS) បានសង្កេតឃើញរលកយក្សស៊ូណាមិកម្ពស់០.៣ម៉ែត្រ នៅកោះ North Maluku របស់ឥណ្ឌូណេស៊ី ហើយព្រមានអំពីរលកយក្សដ៏គ្រោះថ្នាក់ ដែលអាចនឹងវាយប្រហារឆ្នេរសមុទ្រនៅក្នុងរង្វង់ចម្ងាយ ១ ០០០គីឡូម៉ែត្រ ដូចជានៅហ្វីលីពីននិងម៉ាឡេស៊ី ជាដើម។

មាសេចក្តីរាយការណ៍អំពី អគាររង្គើនៅក្នុងខេត្ត North Sulawesi និងនៅកន្លែងផ្សេងទៀត។ ទោះបីជាយ៉ាងណា​ ភ្លាមៗ មិនទាន់មានរបាយការណ៍អំពីអ្នករងគ្រោះនិងការខូចខាតអ្វីទេ៕

អត្ថបទ៖ សុខ សុវណ្ណ

The post ឥណ្ឌូណេស៊ី ជួបរញ្ជួយដីកម្រិតធ្ងន់ ទាញសញ្ញាអាសន្នស៊ូណាមិ អាចប៉ះដល់ទាំងហ្វីលីពីននិងម៉ាឡេស៊ី appeared first on Kampuchea Thmey Daily.

យោងតាម​ភ្នាក់ងារ​​ព័ត៌មាន​ រ៉យទ័រ និងAP ពល​រដ្ឋ​ អគារ ហេដ្ឋារចនា​សម្ព័ន្ធ​ជា​ច្រើន​ត្រូវ​បាន​លេប​ត្របាក់​ត្រឹមមួយ​រំពេច ខណៈ​រថយន្ត​ខ្នាត​តូច​រុញ​ទៅ​បុក​​ជញ្ជាំង​ទឹក​កម្ពស់១០ម៉ែត្រ ហេតុ​ការណ៍​នេះ​ជា​រលកយក្សស៊ូណាមិ​កើត​​ឡើង​ដោយ​គ្រោះ​រញ្ជួយ​ដីដ៏ធំបំផុតក្នុងប្រវត្តិសាស្ត្រជប៉ុនកាល​ពី​ថ្ងៃ​ទី​១១ ខែមីនា ឆ្នាំ​២០១១ បង្កឱ្យ​ភ័យរន្ធត់​តាមបណ្តោយឆ្នេរ​សមុទ្រ​ភាគ​ឦសាន​ក្នុង​ប្រទេស​។

មនុស្ស​យ៉ាងហោចណាស់ ១ ០០០នាក់ស្លាប់​ភ្លាមៗ​​ ខណៈ​ជញ្ជាំង​ទឹក​បាន​ហូរ​យកអ្វីៗទាំងអស់​ទៅ​តាម​វាដែរ​​។​

រញ្ជួយដីកម្រិត ៨.៩ រ៉ិចទ័រ​បានវាយប្រហារនៅម៉ោង ១:៤៦ រសៀល មានចំណុច​កណ្តាលប្រហែល ១២៥គីឡូម៉ែត្រពីឆ្នេរសមុទ្រ និងកើត​ឡើង​នៅ​ជម្រៅ​ ១០គីឡូ​ម៉ែត្រ​នៅក្រោម​បាតសមុទ្រ។

ចំណែក​រលក​យក្សស៊ូណាមិបោកបក់​មកលើច្រាំងភ្លាមៗ​ ថែម​ទាំង​នាំ​យក​ផ្ទះសម្បែង រោងចក្រ កសិដ្ឋាន ទូកនេសាទ និងអាកាសយាន​ដ្ឋានក្នុងស្រុកទៅ​ជាមួយ​ផង​ បង្កឱ្យមានការប្រកាស​អាសន្ននៅទូទាំង​អាស៊ីបូព៌ា និង​ប៉ាស៊ីហ្វិក​។

មិន​តែ​ប៉ុណ្ណោះ​ប្រជាជននៅ​តំបន់ទំនាបនៃកោះតៃវ៉ាន់ ឥណ្ឌូណេស៊ី ហ្វីលីពីន ​និង​ហាវ៉ៃត្រូវបានជម្លៀសចេញ។​

មនុស្ស​យ៉ាងហោចណាស់ ១០០នាក់​នៅលើកប៉ាល់មួយ​ត្រូវ​បាន​បោក​បក់ទៅឆ្ងាយ។ អ្នក​ផ្សេងទៀតនៅលើដីព្យាយាមរត់គេចខ្លួនតាម​រថ​យន្តនិង​ឡានក្រុង ប៉ុន្តែត្រូវ​បាន​ទឹកសមុទ្រ​វ៉ាដាច់ ខណៈ​រថភ្លើង​ដឹក​អ្នក​ដំណើរ​ពីរគ្រឿងត្រូវ​បាន​រាយការណ៍ថា​រសាត់​ទៅ​តាម​ទឹក។

ចំណែក​ផ្លូវថ្នល់ដួលរលំ និង​បំបែកជាពីរ​ដោយសារការរញ្ជួយដី បង្ខំ​ឱ្យ​អាជ្ញាធរ​បញ្ជូនអ្នកជួយសង្គ្រោះ​តាមកប៉ាល់ និង​ឧទ្ធម្ភាគចក្រ​ជា​ពិសេស​មាន​យន្តហោះ ៣០០គ្រឿង និងនាវា ៤០គ្រឿង​ផង​ដែរ​។

គួរ​បញ្ជាក់​ថា ការរញ្ជួយដី និងរលកយក្សស៊ូណាមិ បង្ក​ឱ្យ​មាន​ការខូចខាតយ៉ាង​ធ្ងន់ធ្ងរ រួមទាំងមាន​វិបត្តិរោងចក្រថាមពលនុយក្លេអ៊ែរ​ក្នុង​ខេត្ត​ Fukushima និង​សម្លាប់​មនុស្ស​សរុប​ជាង ១៨ ០០០នាក់។

វាគឺជាការរញ្ជួយដីនេះ​គឺ​ធំបំផុត​មិន​ធ្លាប់​មាន​ ដែល​បានវាយប្រហារប្រទេសជប៉ុន​ក្នុង​រយៈ​ពេល​១៤០ឆ្នាំ៕

ប្រែសម្រួល៖ ណឺ មិនា

The post ​ហេតុការណ៍​​ដ៏រន្ធត់បំផុត​​កាល​​១៥ឆ្នាំ​មុន ​ការរញ្ជួយ​ដី​និង​​​​រលកយក្សស៊ូណាមិ​​​នៅ​ជប៉ុន ​ជាការចង់ចាំ​ដ៏អាក្រក់បំផុត​​ appeared first on Kampuchea Thmey Daily.

ថ្ងៃទី២៦ខែធ្នូឆ្នាំ២០០៤ មហាសោកនាដកម្មដ៏សាហាវបំផុតមួយ បានឆក់យកជីវិតមនុស្សរាប់សែននាក់ នៅតាមបណ្តោយឆ្នេរនៃមហាសមុទ្រឥណ្ឌា។

នោះគឺ​ រលកយក្សស៊ូណាមិ ដែលបង្កឡើងដោយឥទ្ធិពលនៃគ្រោះរញ្ជួយដីកម្រិតធ្ងន់ ៩.១ រ៉ិចទ័រនៅបាតសមុទ្រនៃកោះស៊ូម៉ាត្រា ភាគខាងជើងប្រទេសឥណ្ឌូណេស៊ី។

យោងតាមគេហទំព័រ Britannica, វាជាគ្រោះមហន្តរាយធម្មជាតិដ៏អាក្រក់បំផុត ដែលវាយប្រហារប្រទេសជាច្រើននៅតំបន់អាស៊ី ដោយសម្លាប់មនុស្សប្រមាណ ២២៦ ៤០០នាក់ និងរាប់ម៉ឺននាក់ត្រូវរបួស ខណៈតំបន់ដែលរងផលប៉ះពាល់ខ្លាំងជាងគេគឺភាគខាងជើងកោះស៊ូម៉ាត្រា ពោលនៅទីនោះមានមនុស្សជាង ១២០ ០០០នាក់ បាត់បង់ជីវិត ក្នុងចំណោមអ្នកស្លាប់សរុប ១៦៥ ៧០៨នាក់របស់ឥណ្ឌូណេស៊ី។ 

សម្រាប់មូលហេតុដែលបណ្តាលឲ្យមានមនុស្សស្លាប់ដល់ខ្ទង់រាប់សែននាក់បែបនេះគឺដោយសារតែ គ្រោះមហន្តរាយនេះកើតចំរដូវកាលឈប់សម្រាក ពោលគឺក្រោយបុណ្យណូអែលមួយថ្ងៃដែលសម្បូរទៅដោយទេសចរ ហើយម្យ៉ាងវិញទៀត កាលនោះ មហាសមុទ្រឥណ្ឌា មិនមានដាក់ប្រព័ន្ធព្រមានអំពីរលកយក្សទេ។

បើនិយាយត្រឹមប្រទេសថៃ គ្រោះធម្មជាតិនេះ សម្លាប់មនុស្សប្រហែល ៥ ៤០០ នាក់, ក្នុងនោះពាក់កណ្តាលគឺជាទេសចរបរទេសមកពីជាង ៤០ប្រទេស។

ក្រៅពីមនុស្សស្លាប់ ក៏មានអ្នកបាត់ខ្លួនជាង ២ ៨០០ នាក់ផងដែរ ខណៈសណ្ឋាគារ ផ្ទះសម្បែង និងជីវភាពអ្នកនេសាទរាប់ម៉ឺននាក់ត្រូវបានបំផ្លាញ។ សរុបជាទឹកប្រាក់ខាតបង់រាប់ពាន់លានដុល្លារ។

កាលនោះ ស៊ូណាមិបានវាយប្រហារខេត្តថៃចំនួន៦ដូចជា៖Phang Nga, Phuket, Krabi, Ranong, Trang និង Satun។

ទោះបីជាយ៉ាងណាក៏ដោយ អ្នកជំនាញបានព្រមានរួចហើយថា អនាគតប្រទេសថៃ អាចនឹងជួបគ្រោះរញ្ជួយដីកម្រិតធ្ងន់ ដែលបង្កជារលកយក្សស៊ូណាមិ បន្តទៀត៕

អត្ថបទ៖ សុខ សុវណ្ណ

The post ភ្លេចឬនៅ! ថ្ងៃ២៦ធ្នូ ២១ឆ្នាំមុន ស៊ូណាមិផ្តាច់ជីវិតមនុស្សជាង ៥ ៤០០នាក់ នៅថៃ appeared first on Kampuchea Thmey Daily.

សេចក្ដីជូនដំណឹង បានឱ្យដឹងថា នៅថ្ងៃទី៨ ខែធ្នូ ឆ្នាំ២០២៥ វេលាម៉ោង១១និង១៥នាទីយប់ (ម៉ោងនៅប្រទេសជប៉ុន) មានគ្រោះរញ្ជួយដីកម្រិត ៧,៦វ៉ិចទ័រ នៅភាគខាងកើតនៃខេត្ត Aomori ដែលធ្វើឱ្យមានការញ្ជួយខ្លាំងនៅខេត្ត Aomori, Hokkaido និងខេត្តIwate។ បន្ថែមលើនេះ អាជ្ញាធរជប៉ុន ក៏បានប្រកាសអាសន្ន អំពីលទ្ធភាពនៃការកើតឡើងនូវរលកយក្សស៊ូណាមិនៅស្រុកមួយចំនួនក្នុងខេត្តខាងលើផងដែរ។

ក្រសួងការងារ បាននិងកំពុងតាមដានស្ថានការណ៍វិវត្តនៃករណីនេះ ដោយធ្វើការយ៉ាងជិតស្និទ្ធជាមួយស្ថាន ឯកអគ្គរាជទូតព្រះរាជាណាចក្រកម្ពុជាប្រចាំប្រទេសជប៉ុន និងទីភ្នាក់ងារជ្រើសរើសឯកជនទាំងអស់ ដើម្បីធានាថា បងប្អូនកម្មសិក្សាការី-ពលករជំនាញដែលកំពុងស្នាក់នៅ និងធ្វើការនៅក្នុងខេត្តដែលរងផលប៉ះពាល់ទទួលបាន ការយកចិត្តទុកដាក់ និងស្ថិតនៅទីកន្លែងសុវត្ថិភាព។

បន្ថែមលើនេះ ក្រសួងការងារ ក៏បានអំពាវនាវដល់បងប្អូនកម្មសិក្សាការី-ពលករជំនាញ ដែលកំពុងស្នាក់នៅ និងធ្វើការនៅប្រទេសជប៉ុន ជាពិសេសក្នុងខេត្តដែលរងផលប៉ះពាល់ សូមបង្កើនការប្រុងប្រយ័ត្នខ្ពស់ និងបន្តយកចិត្តទុកដាក់តាមដានស្ថានការណ៍ ព្រមទាំងអនុវត្តតាមការណែនាំរបស់អាជ្ញាធរជប៉ុន។

បើតាមក្រសួងការងារ ក្នុងករណីទទួលរងផលប៉ះពាល់ ឬទទួលបានព័ត៌មានអំពីបងប្អូនកម្មសិក្សាការី-ពលករជំនាញដែលរងផលប៉ះពាល់ ឬមានសំណួរ សូមទំនាក់ទំនងអនុព័ន្ធការងារ (ទូរស័ព្ទលេខ៖ ០៨០ ៣៣៦២ ៦១៦៨) ឬស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន (ទំព័រ Facebook: Royal Embassy of Cambodia in Japan ឬទូរស័ព្ទលេខ៖ ០៨០ ៤៦៨៩ ៩៣៧៤) ឬនាយកដ្ឋានមុខរបរ និងហត្ថពលកម្ម នៃក្រសួងការងារ និងបណ្តុះបណ្តាល វិជ្ជាជីវៈ (ទំព័រ Facebook៖ ការិយាល័យរកការឱ្យធ្វើនៅបរទេសទី៣-Japan Office ឬទូរស័ព្ទលេខ៖ +៨៥៥ ៨៩ ៩៥៧ ៧៨៩) ឬក្រុមតេឡេក្រាម “សម្រាប់ពលករទេសន្តរប្រវេសន៍” ដែលមានតំណភ្ជាប់ https://t.me/KhmerMigrant Worker ឬ QR code ដូចមានភ្ជាប់ជូនក្នុងសេចក្ដីជូនដំណឹង៕

The post ក្រសួងការងារ អំពាវនាវដល់កម្មសិក្សាការី និងពលករនៅជប៉ុន បង្កើនការប្រុងប្រយ័ត្នចំពោះគ្រោះរញ្ជួយដី និងលទ្ធភាពនៃការកើតឡើងនូវរលកយក្សស៊ូណាមិ appeared first on Kampuchea Thmey Daily.

តាមទីភ្នាក់ងារឧតុនិយមជប៉ុនបានបញ្ចាក់ថា ការរញ្ជួយដីដ៏ខ្លាំងក្លានេះបានកើតឡើងនៅជម្រៅ ១៦ គីឡូម៉ែត្រពីឆ្នេរសមុទ្រ Iwate នៅម៉ោងប្រហែល ៥:0០៣ ល្ងាច ដែលជំរុញឲ្យទីភ្នាក់ងារឧតុនិយម ចេញសេចក្តីជូនដំណឹងអំពីរលកយក្សស៊ូណាមិនៅវេលាម៉ោងប្រហែល ៥:១២ ល្ងាច ព្រមទាំងជំរុញឲ្យមានការជម្លៀសប្រជាជនចេញ នៅក្នុងក្រុងមួយចំនួន។

រលកយក្សស៊ូណាមិដែលមានកម្ពស់ ២០សង់ទីម៉ែត្រនេះ ត្រូវបានគេសង្កេតឃើញនៅកំពង់ផែ Ofunato ក្នុងខេត្ត Iwate នៅម៉ោង ៦:២៥ល្ងាច ខណៈដែលរលកយក្សស៊ូណាមិកម្ពស់ ២០សង់ទីម៉ែត្រមួយផ្សេងទៀត ឃើញនៅកំពង់ផែ Kuji ក្នុង Iwate នៅវេលាម៉ោង ៥:៥២ ល្ងាច ក្នុងថ្ងៃដដែល។

យោងទៅតាមក្រុមហ៊ុន East Japan Railway Co. ឬ JR East ការរញ្ជួយដីនេះបានបណ្តាលឲ្យមានការដាច់ចរន្តអគ្គិសនីជាបណ្តោះអាសន្ននៅលើខ្សែរថភ្លើងល្បឿនលឿន Tohoku Shinkansen របស់ខ្លួន ដោយសេវាកម្មត្រូវបានផ្អាករវាងស្ថានីយ៍ Sendai ក្នុង Miyagi និងស្ថានីយ៍ Shin-Aomori ក្នុងខេត្ត Aomori ភាគខាងជើងនៃ Iwate។ លើសពីនេះ ក៏មានការពន្យារពេលនៅលើខ្សែរថភ្លើង Akita និង Hokkaido Shinkansen ផងដែរ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

កូរ៉េខាងជើង គំរាម វាយលុក និងថ្កោលទោសកិច្ចចរចាសន្តិសុខអាមេរិក-កូរ៉េខាងត្បូង

The post រលកយក្សស៊ូណាមិ វាយប្រហារខេត្តមួយនៅ ជប៉ុន ក្រោយរញ្ជួយដីដ៏ខ្លាំងក្លា appeared first on Kampuchea Thmey Daily.

បើតាមមជ្ឈមណ្ឌលរញ្ជួយដីអឺរ៉ុប-មេឌីទែរ៉ាណេ (EMSC) រញ្ជួយដីនេះបានកើតឡើងក្នុងជម្រៅ ៦២ គីឡូម៉ែត្រ ដោយអង្រួនតំបន់ឆ្នេរ និងដីគោកនៅទូទាំងកោះMindanao។ លើសពីនេះមជ្ឈមណ្ឌលព្រមានរលកយក្សស៊ូណាមិប៉ាស៊ីហ្វិក (PTWC) បានព្រមានអំពីរលកយក្សស៊ូណាមិដ៏មានគ្រោះថ្នាក់ អាចកើតមានក្នុងចម្ងាយ ៣០០ គីឡូម៉ែត្រពីចំណុចកណ្តាល ដែលនាំឲ្យប្រទេសឥណ្ឌូណេស៊ីចេញការព្រមានពីរលកយក្សស៊ូណាមិដែរ។

អាជ្ញាធរក្នុងតំបន់បានជំរុញអ្នកស្រុកនៅក្នុងទីក្រុងឆ្នេរសមុទ្រជម្លៀសទៅកាន់ទីទួលខ្ពស់សុវត្ថិភាពជាបន្ទាន់ ជាពិសេសតំបន់ដែលរងការរញ្ជួយដូចជានៅក្នុងទីក្រុង Davao, Surigao del Sur និង Agusan del Norte។ នៅជិតតំបន់រងផលប៉ះពាល់ ក៏មានការដាច់ចរន្តអគ្គិសនី និងការរអាក់រអួលសេវាទំនាក់ទំនងត្រូវបានរាយការណ៍ផងដែរ។

វិទ្យាស្ថានភ្នំភ្លើង និងរញ្ជួយដីហ្វីលីពីន (PHIVOLCS) កំពុងធ្វើការវាយតម្លៃដើម្បីកំណត់ចំនួនអ្នកស្លាប់ និងការខូចខាត ខណៈរញ្ជួយដីនេះទើបបតែកើតឡើងភ្លាមៗមិនទាន់វាយតម្លៃបានភ្លាមទេ។

គួរបញ្ជាក់ថាប្រទេសហ្វីលីពីនទើបតែរងការវាយប្រហារពីគ្រោះរញ្ជួយដីកម្រិត ៦.៩រ៉ិចទ័រ នៅខេត្ត Cebu ភាគកណ្តាលប្រទេស កាលពីល្ងាចថ្ងៃទី៣០ ខែកញ្ញា បណ្តាលឱ្យមានការបំផ្លិចបំផ្លាញយ៉ាងទូលំទូលាយ និងសម្លាប់មនុស្សយ៉ាងហោចណាស់ ៧២នាក់៕

អត្ថបទ៖ ប៊ុន សុភាព

The post ហ្វីលីពីននិងឥណ្ឌូណេស៊ីប្រកាសអាសន្នរលកយក្សស៊ូណាមិ ក្រោយរញ្ជួយដីកម្រិត ៧.៦ រ៉ិចទ័រ វាយប្រហារកោះ Mindanao appeared first on Kampuchea Thmey Daily.