កូរ៉េខាងជើង គំរាម វាយលុក និងថ្កោលទោសកិច្ចចរចាសន្តិសុខអាមេរិក-កូរ៉េខាងត្បូង

កូរ៉េខាងជើងនាថ្ងៃសៅរ៍ទី៨ វិច្ឆិកា បានថ្កោលទោសកិច្ចចរចាសន្តិសុខប្រចាំឆ្នាំរវាងកូរ៉េខាងត្បូង និងសហរដ្ឋអាមេរិកក្នុងសប្តាហ៍នេះថា ជាការបង្ហាញចេតនានៃលក្ខណៈអរិភាពរបស់សម្ព័ន្ធមិត្តប្រឆាំងនឹងខ្លួន ដោយគំរាមចាត់វិធានការ វាយលុកបន្ថែមទៀត ប្រឆាំងនឹងការគំរាមកំហែងរបស់សត្រូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសារព័ត៌មាន Reuters រដ្ឋមន្ត្រីការពារជាតិកូរ៉េខាងជើង លោក No Kwang-chol បាននិយាយនៅក្នុងសេចក្តីថ្លែងការណ៍មួយថា កូរ៉េខាងជើងបានយល់ត្រឹមត្រូវអំពីអរិភាពរបស់សហរដ្ឋអាមេរិកចំពោះទីក្រុងព្យុងយ៉ាង ខណៈដែលប្រមុខការពារជាតិកូរ៉េខាងត្បូង និងអាមេរិកបានរៀបចំកិច្ចប្រជុំពិគ្រោះយោបល់សន្តិសុខនៅទីក្រុងសេអ៊ូលកាលពីថ្ងៃអង្គារ ដើម្បីពិភាក្សាអំពីបញ្ហាសម្ព័ន្ធមិត្ត និងការពារជាតិសំខាន់ៗ។

លោកក៏បានថ្កោលទោសសមយុទ្ធផ្លូវអាកាសរួមគ្នាចុងក្រោយរបស់ទីក្រុងវ៉ាស៊ីនតោនជាមួយទីក្រុងសេអ៊ូល និងដំណើរទស្សនកិច្ចថ្មីៗនេះទៅកាន់កូរ៉េខាងត្បូង ដោយនាវាផ្ទុកយន្តហោះដើរដោយថាមពលនុយក្លេអ៊ែរ USS George Washington ដោយនិយាយថា សហរដ្ឋអាមេរិកបានបង្ហាញចេតនា និងបង្កើនភាពតានតឹងនយោបាយ ព្រមទាំងយោធានៅលើឧបទ្វីបកូរ៉េ។

យោងតាមប្រព័ន្ធផ្សព្វផ្សាយរដ្ឋកូរ៉េខាងជើង KCNA លោក No បានព្រមានទៀតថា «ការគំរាមកំហែងទាំងអស់ដែលឈ្លានពានលើវិស័យសន្តិសុខរបស់កូរ៉េខាងជើង នឹងក្លាយជាគោលដៅផ្ទាល់ ហើយត្រូវបានគ្រប់គ្រងតាមរបៀបចាំបាច់។ ពួកយើងនឹងបង្ហាញសកម្មភាពវាយលុកបន្ថែមទៀតប្រឆាំងនឹងការគំរាមកំហែងរបស់សត្រូវដោយផ្អែកលើគោលការណ៍នៃការធានាសន្តិសុខ និងការពារសន្តិភាពដោយកម្លាំងដ៏ខ្លាំងក្លា»។

ទោះជាយ៉ាងណា សេចក្តីថ្លែងការណ៍របស់លោក No Kwang-chol បានកើតឡើងមួយថ្ងៃ បន្ទាប់ពីកូរ៉េខាងជើងបានបាញ់មីស៊ីលផ្លោងចម្ងាយខ្លីមួយគ្រាប់ដែលសង្ស័យថា ជាមីស៊ីលផ្លោងឆ្ពោះទៅសមុទ្រខាងកើត។ ប្រព័ន្ធផ្សព្វផ្សាយរដ្ឋរបស់កូរ៉េខាងជើង មិនបានរាយការណ៍អំពីការបាញ់មីស៊ីលចុងក្រោយរបស់ខ្លួនទេ។

ការបាញ់មីស៊ីលនេះបានកើតឡើង បន្ទាប់ពីខ្លួនបានព្រមានអំពីវិធានការ «ត្រឹមត្រូវ» ប្រឆាំងនឹងការដាក់ទណ្ឌកម្មថ្មីរបស់ទីក្រុងវ៉ាស៊ីនតោនលើទីក្រុងព្យុងយ៉ាង។

មិនតែប៉ុណ្ណោះ កូរ៉េខាងជើងនៅតែមិនឆ្លើយតបទៅនឹងការផ្តល់ជូនសម្រាប់ការសន្ទនាដោយទីក្រុងសេអ៊ូល និងទីក្រុងវ៉ាស៊ីនតោន ខណៈពេលដែលកំពុងបន្តការបាញ់មីស៊ីលឡើងវិញក្នុងរយៈពេលប៉ុន្មានសប្តាហ៍ថ្មីៗនេះ។ ដោយឡែក កាលពីសប្តាហ៍មុន កូរ៉េខាងជើងក៏បានបាញ់មីស៊ីលផ្លោងពីសមុទ្រទៅដី មុនពេលដំណើរទស្សនកិច្ចរបស់ប្រធានាធិបតីអាមេរិក ដូណាល់ ត្រាំ មកកាន់ប្រទេសកូរ៉េខាងត្បូង សម្រាប់កិច្ចប្រជុំសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកផងដែរ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

អាល្លឺម៉ង់ ប្រកាសប្រាក់ចំណូលកើនឡើង បន្ទាប់​ពី​ អ៊ុយក្រែនបញ្ជាទិញអាវុធ