ថ្ងៃនេះឆ្នាំមុន ថៃ ជួបសោកនាដកម្មរញ្ជួយដី ស្លាប់មនុស្សជាង ១០០នាក់

ភាពភ័យខ្លាចនៅតែតាមលងបន្លាចប្រជាជនថៃទោះកន្លងផុតទៅមួយឆ្នាំហើយក៏ដោយ។ នោះគឺសោកនាដកម្មរញ្ជួយដីដ៏សាហាវថ្ងៃទី២៨ខែមីនាឆ្នាំ២០២៥ ដែលបានឆក់យកជីវិតមនុស្សចំនួន១០៣នាក់។

រញ្ជួយដីនោះ មានកម្រិតចន្លោះពី ៧.៧ ទៅ ៨.២ រិចទ័រ ជាមួយកណ្ដាលក្បែរទីក្រុង Mandalay និង Sagaing នៃប្រទេសមីយ៉ាន់ម៉ា ចម្ងាយប្រហែល ៣២០ គីឡូម៉ែត្រពីខេត្ត Mae Hong Son របស់ថៃ។

ឥទ្ធិពលរញ្ជួយដី បានវាយប្រហារប្រទេសថៃនាវេលាម៉ោងប្រហែល ១:២០ នាទីរសៀល។ ដ្បិតចំណុចកណ្ដាលនៅឆ្ងាយក៏ដោយ ប៉ុន្តែរំញ័រត្រូវបានគេទទួលអារម្មណ៍នៅទូទាំង៦៣ ខេត្តក្នុងប្រទេសថៃ ជាពិសេសនៅ ទីក្រុងបាងកកតែម្តង។

ព្រឹត្តិការណ៍ដែលរន្ធត់បំផុតគឺការ បាក់រលំអគារការិយាល័យសវនកម្មរដ្ឋ កម្ពស់៣៣ជាន់ដែលកំពុងសាងសង់នៅខ័ណ្ឌ ចតុចក្រ។

មនុស្សរាប់ម៉ឺននាក់ក្នុងអគារខ្ពស់ៗនៅបាងកក បានរត់ភៀសខ្លួនចេញមកក្រៅដោយសារអគារយោលខ្លាំង។ ប្រព័ន្ធរថភ្លើងក្រោមដី និងរថភ្លើងលើអាកាសត្រូវបានផ្អាកដំណើរការជាបណ្ដោះអាសន្នផងដែរ នាពេលនោះ៕

អត្ថបទ៖ សុខ សុវណ្ណ