ហ្វីលីពីននិងឥណ្ឌូណេស៊ីប្រកាសអាសន្នរលកយក្សស៊ូណាមិ ក្រោយរញ្ជួយដីកម្រិត ៧.៦ រ៉ិចទ័រ វាយប្រហារកោះ Mindanao

យោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី១០ ខែ តុលា មានការព្រមានពីរលកយក្សស៊ូណាមិក្នុងប្រទេសហ្វីលីពីននិងឥណ្ឌូណេស៊ី បន្ទាប់ពីគ្រោះរញ្ជួយដីកម្រិត ៧.៦ រ៉ិចទ័រ បានវាយប្រហារកោះ Mindanao ភាគខាងត្បូងប្រទេសហ្វីលីពីន ខណៈទំហំនៃខូចខាតមិនទាន់ដឹងនៅឡើយ។

បើតាមមជ្ឈមណ្ឌលរញ្ជួយដីអឺរ៉ុប-មេឌីទែរ៉ាណេ (EMSC) រញ្ជួយដីនេះបានកើតឡើងក្នុងជម្រៅ ៦២ គីឡូម៉ែត្រ ដោយអង្រួនតំបន់ឆ្នេរ និងដីគោកនៅទូទាំងកោះMindanao។ លើសពីនេះមជ្ឈមណ្ឌលព្រមានរលកយក្សស៊ូណាមិប៉ាស៊ីហ្វិក (PTWC) បានព្រមានអំពីរលកយក្សស៊ូណាមិដ៏មានគ្រោះថ្នាក់ អាចកើតមានក្នុងចម្ងាយ ៣០០ គីឡូម៉ែត្រពីចំណុចកណ្តាល ដែលនាំឲ្យប្រទេសឥណ្ឌូណេស៊ីចេញការព្រមានពីរលកយក្សស៊ូណាមិដែរ។

អាជ្ញាធរក្នុងតំបន់បានជំរុញអ្នកស្រុកនៅក្នុងទីក្រុងឆ្នេរសមុទ្រជម្លៀសទៅកាន់ទីទួលខ្ពស់សុវត្ថិភាពជាបន្ទាន់ ជាពិសេសតំបន់ដែលរងការរញ្ជួយដូចជានៅក្នុងទីក្រុង Davao, Surigao del Sur និង Agusan del Norte។ នៅជិតតំបន់រងផលប៉ះពាល់ ក៏មានការដាច់ចរន្តអគ្គិសនី និងការរអាក់រអួលសេវាទំនាក់ទំនងត្រូវបានរាយការណ៍ផងដែរ។

វិទ្យាស្ថានភ្នំភ្លើង និងរញ្ជួយដីហ្វីលីពីន (PHIVOLCS) កំពុងធ្វើការវាយតម្លៃដើម្បីកំណត់ចំនួនអ្នកស្លាប់ និងការខូចខាត ខណៈរញ្ជួយដីនេះទើបបតែកើតឡើងភ្លាមៗមិនទាន់វាយតម្លៃបានភ្លាមទេ។

គួរបញ្ជាក់ថាប្រទេសហ្វីលីពីនទើបតែរងការវាយប្រហារពីគ្រោះរញ្ជួយដីកម្រិត ៦.៩រ៉ិចទ័រ នៅខេត្ត Cebu ភាគកណ្តាលប្រទេស កាលពីល្ងាចថ្ងៃទី៣០ ខែកញ្ញា បណ្តាលឱ្យមានការបំផ្លិចបំផ្លាញយ៉ាងទូលំទូលាយ និងសម្លាប់មនុស្សយ៉ាងហោចណាស់ ៧២នាក់៕

អត្ថបទ៖ ប៊ុន សុភាព