រលកយក្សស៊ូណាមិ វាយប្រហារខេត្តមួយនៅ ជប៉ុន ក្រោយរញ្ជួយដីដ៏ខ្លាំងក្លា

រលកយក្សស៊ូណាមិដែលមានកម្ពស់រហូតដល់២០ សង់ទីម៉ែត្រ បានវាយប្រហារឆ្នេរសមុទ្រប៉ាស៊ីហ្វិកនៃខេត្ត Iwate នៅភាគឦសានប្រទេសជប៉ុន នៅវេលាម៉ោង ៦:២៥ ល្ងាចថ្ងៃអាទិត្យ បន្ទាប់ពីមានគ្រោះរញ្ជួយដីដ៏ខ្លាំងក្លា ដែលមានទំហំប៉ាន់ស្មាន ៦.៩ រ៉ិចទ័រ។ នេះបើតាមការចេញផ្សាយពីសារព័ត៌មាន Nippon នៅថ្ងៃទី១០ វិច្ឆិកា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមទីភ្នាក់ងារឧតុនិយមជប៉ុនបានបញ្ចាក់ថា ការរញ្ជួយដីដ៏ខ្លាំងក្លានេះបានកើតឡើងនៅជម្រៅ ១៦ គីឡូម៉ែត្រពីឆ្នេរសមុទ្រ Iwate នៅម៉ោងប្រហែល ៥:0០៣ ល្ងាច ដែលជំរុញឲ្យទីភ្នាក់ងារឧតុនិយម ចេញសេចក្តីជូនដំណឹងអំពីរលកយក្សស៊ូណាមិនៅវេលាម៉ោងប្រហែល ៥:១២ ល្ងាច ព្រមទាំងជំរុញឲ្យមានការជម្លៀសប្រជាជនចេញ នៅក្នុងក្រុងមួយចំនួន។

រលកយក្សស៊ូណាមិដែលមានកម្ពស់ ២០សង់ទីម៉ែត្រនេះ ត្រូវបានគេសង្កេតឃើញនៅកំពង់ផែ Ofunato ក្នុងខេត្ត Iwate នៅម៉ោង ៦:២៥ល្ងាច ខណៈដែលរលកយក្សស៊ូណាមិកម្ពស់ ២០សង់ទីម៉ែត្រមួយផ្សេងទៀត ឃើញនៅកំពង់ផែ Kuji ក្នុង Iwate នៅវេលាម៉ោង ៥:៥២ ល្ងាច ក្នុងថ្ងៃដដែល។

យោងទៅតាមក្រុមហ៊ុន East Japan Railway Co. ឬ JR East ការរញ្ជួយដីនេះបានបណ្តាលឲ្យមានការដាច់ចរន្តអគ្គិសនីជាបណ្តោះអាសន្ននៅលើខ្សែរថភ្លើងល្បឿនលឿន Tohoku Shinkansen របស់ខ្លួន ដោយសេវាកម្មត្រូវបានផ្អាករវាងស្ថានីយ៍ Sendai ក្នុង Miyagi និងស្ថានីយ៍ Shin-Aomori ក្នុងខេត្ត Aomori ភាគខាងជើងនៃ Iwate។ លើសពីនេះ ក៏មានការពន្យារពេលនៅលើខ្សែរថភ្លើង Akita និង Hokkaido Shinkansen ផងដែរ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

កូរ៉េខាងជើង គំរាម វាយលុក និងថ្កោលទោសកិច្ចចរចាសន្តិសុខអាមេរិក-កូរ៉េខាងត្បូង