លោកបណ្ឌិត គី សេរីវឌ្ឍន៍ Archives - Kampuchea Thmey Daily

អ្នកជំនាញសេដ្ឋកិច្ច៖ ហេតុអ្វីបានជាពលករខ្មែរនៅតែបន្តចំណាកស្រុកទៅថៃទាំងខុសច្បាប់ បើទោះបីជាមានឱកាសការងាររាប់ម៉ឺនកន្លែងនៅក្នុងស្រុកក៏ដោយ?

Kang Tola — Tue, 23 Jun 2026 11:21:00 +0000

ភ្នំពេញ ៖ រាជរដ្ឋាភិបាល ដែលមានក្រសួងការងារ និងបណ្ដុះបណ្ដាលវិជ្ជាជីវៈជាសេនាធិការ បានខិតខំប្រឹងប្រែងប្រមូល និងផ្សព្វផ្សាយពីឱកាសការងារគ្រប់ទម្រង់ ដើម្បីផ្ដល់ជូននូវឱកាសការងាររាប់ម៉ឺនកន្លែងដល់អតីតពលករខ្មែរដែលបានវិលត្រឡប់ពីប្រទេសថៃ ដោយក្នុងនោះមានអតីតភាគច្រើនបានចាប់យកឱកាសការងារតាមរយៈវេទិកាការងារនៅមូលដ្ឋានរបស់ខ្លួន, ទាក់ទងទៅលេខ ១២៩៧, ពិព័រណ៍ការងារនៅតាមទីប្រជុំជន និងក្រោមរូបភាពផ្សេងៗជាច្រើនទៀត។

ដោយឡែកនៅមានបងប្អូនអតីតពលករមួយចំនួនតូច នៅតែមានបំណងចង់វិលត្រឡប់ទៅធ្វើាការងារនៅក្នុងប្រទេសថៃ បើទោះបីជារងការប្រមាថ មើលងាយ មើលថោក ប្រើប្រាស់ហឹង្សា និងការរំលោភបំពានក្រោមរូបភាពផ្សេងៗជាច្រើនពីសំណាក់ជនជាតិថៃក៏ដោយ។ ជុំវិញទឡ្ហីករណ៍ទាំងនេះ អ្នកជំនាញសេដ្ឋកិច្ច បានលើកឡើងនូវកត្តា ៣ចំណុច ដែលធ្វើឱ្យពលករខ្មែរនៅតែបន្តចំណាកស្រុកទៅថៃទាំងខុសច្បាប់។

លោកបណ្ឌិត គី សេរីឌ្ឍន៍ អ្នកជំនាញសេដ្ឋកិច្ច នៃរាជបណ្ឌិតសភាកម្ពុជា បានយល់ឃើញថា «ទី១. ទម្លាប់ប្រជាពលរដ្ឋ ដែលធ្លាប់រស់នៅស្រុកគេ ហើយការរស់នៅក្នុងភូមិស្រុកខ្លួនឯង ធ្វើឱ្យគាត់មិនទម្លាប់ ធ្វើឱ្យគាត់ពិបាក វាទៅជាការប្លែកក្នុងការរស់នៅ។ ទី២. ការយល់ដឹងរបស់គាត់ គាត់នៅតែយល់ថា ទៅធ្វើការនៅក្រៅប្រទេសមានប្រយោជន៍ជាងការធ្វើការនៅក្នុងស្រុក និងទី៣. ការអូសទាញដោយមេខ្យល់ដែលដើរតួនាទីសំខាន់ក្នុងការអូសទាញកម្លាំងពលកម្មឱ្យទៅធ្វើការនៅក្រៅប្រទេស ដើម្បីទទួលបានប្រាក់កម្រៃពីប្រទេសដែលខ្វះកម្លាំងពលកម្ម»។

លោកបណ្ឌិតបានបន្ថែមថា អាជ្ញាធរភូមិ ឃុំ ដូចជា ក្រុមការងាររាជរដ្ឋាភិបាលដែលជាអាណាព្យាបាលដោយប្រយោលរបស់ប្រជាពលរដ្ឋ ត្រូវជួយលើកទឹកចិត្តពួកគាត់ឱ្យរស់នៅក្នុងស្រុក បំពេញការងារក្នុងស្រុក បង្កើតភាពស្និទ្ធស្នាលជាមួយពួកគាត់ ដើម្បីឱ្យពួកគាត់អាចរស់នៅក្នុងស្រុកភូមិបាន និងអាចបំពេញការងារក្នុងស្រុកវិញបាន។

លើសពីនេះ លោកបណ្ឌិតបានសង្កត់ធ្ងន់ទៅលើប្រធានភូមិ មេឃុំ និងចៅសង្កាត់ គឺមានតួនាទីសំខាន់ណាស់ ក្នុងការផ្ដល់នូវភាពកក់ក្ដៅដល់ប្រជាពលរដ្ឋនៅក្នុងភូមិ។ ក្នុងនោះគឺការរួមចំណែក ដើម្បីបង្កើនធនធានការផលិតនៅក្នុងស្រុកឱ្យបានច្រើន ប្រសើរជាងការជំរុញពួកគាត់ឱ្យទៅធ្វើការនៅក្រៅប្រទេស ដែលជាផ្នែកមួយដ៏សំខាន់ក្នុងការលើកកម្ពស់សេដ្ឋកិច្ចជាតិតាមរយៈការបង្កើតការងារ បង្កើនប្រាក់ចំណូល និងទាកទាញវិនិយោគបរទេសបន្ថែមសម្រាប់ប្រទេសកម្ពុជា។

បើតាមក្រសួងការងារ និងបណ្ដុះបណ្ដាលវិជ្ជាជីវៈបានឱ្យដឹងថា យន្តការឆ្លើយតប និងអន្តរាគមន៍របស់របស់រាជរដ្ឋាភិបាល ជូនចំពោះបងប្អូនពលករ និងប្រជាពលរដ្ឋខ្មែរដែលត្រឡប់មកកម្ពុជាវិញ ត្រូវបានរៀបចំដាក់ចេញ លក្ខណៈជាប្រព័ន្ធ និងតាមដំណាក់កាល ដើម្បីឱ្យការវិលត្រឡប់ប្រកបដោយសុវត្ថិភាព, កាត់បន្ថយបន្ទុកចំណាយ, ទទួលបានព័ត៌មានឱកាសការងារ និងឱកាសបណ្ដុះបណ្ដាល, ទទួលបានការងារ ប្រាក់ចំណូលសមរម្យ និងការគាំពារសង្គម, ការទប់ស្កាត់ និងកាត់បន្ថយការវិលត្រឡប់ទៅប្រទេសថៃវិញដោយប្រថុយប្រថាន, សក្ដានុពលគាំទ្រឧស្សាហកម្មក្នុងស្រុក និងជំរុញកំណើនសេដ្ឋកិច្ច។

ក្រសួងការងារ បានសម្របសម្រួល ដើម្បីឱ្យពលករ និងប្រជាពលរដ្ឋអាចឆ្លងកាត់ព្រំដែន, ការទទួលដោយផ្ដល់ភាពកក់ក្ដៅ, ផ្ដល់អាហារ និងសម្រួលមធ្យោបាយធ្វើដំណឹរត្រឡប់ទៅស្រុកកំណើតវិញ។ បង្កើតយុទ្ធនាការចុះឈ្មោះពលករ ដើម្បីផ្គូផ្គងការងារ និងបញ្ជូនទៅវគ្គបណ្ដុះបណ្ដាល និងបំពេញព័ត៌មានតាមលេខ ១២៩៧ ក៏ដូចជា ការបង្កើតយុទ្ធនាការប្រមូលព័ត៌មានឱកាសការងារ និងបណ្ដុះបណ្ដាល។

គួររំលឹកថា រយៈពេលជាង ១ឆ្នាំនៃជម្លោះព្រំដែនរវាងកម្ពុជា និងថៃ ដែលបានកើតឡើងកាលពីចុងខែឧសភា ឆ្នាំ២០២៥ បានធ្វើឱ្យមានភាពតានតឹងផ្នែកទំនាក់ទំនង ជម្លោះរវាងប្រទេសទាំងពីរ បានជះឥទ្ធិពលដល់ពលករខ្មែរចំណាកស្រុកវិលត្រឡប់មកដែនដីកំណើតវិញប្រមាណជាង ៧៧ម៉ឺននាក់ ក្នុងនោះមានចំនួន ៦៥ម៉ឺននាក់ដែលទទួលបានការងារធ្វើនៅក្នុងស្រុក៕

The post អ្នកជំនាញសេដ្ឋកិច្ច៖ ហេតុអ្វីបានជាពលករខ្មែរនៅតែបន្តចំណាកស្រុកទៅថៃទាំងខុសច្បាប់ បើទោះបីជាមានឱកាសការងាររាប់ម៉ឺនកន្លែងនៅក្នុងស្រុកក៏ដោយ? appeared first on Kampuchea Thmey Daily.

អ្នកជំនាញ ៖ មានតែប្រទេសផលិតប្រេងខ្លួនឯងប៉ុណ្ណោះទើបអាចទប់ស្កាត់ការហក់ឡើងនៃថ្លៃប្រេង

Din Thary — Mon, 09 Mar 2026 08:05:00 +0000

អ្នកជំនាញសេដ្ឋកិច្ច នៃរាជបណ្ឌិតសភាកម្ពុជា លោកបណ្ឌិត គី សេរីវឌ្ឍន៍ មើលឃើញថា ចំពោះការហក់ឡើងនៃតម្លៃប្រេងនាពេលបច្ចុប្បន្ននេះ គឺជាគ្រោះដែលកើតឡើងពីសង្គ្រាម ហើយក៏មិនមានប្រទេសណាអាចទប់ស្កាត់បានទេ គឺមានតែប្រទេសដែលផលិតប្រេងខ្លួនឯងប៉ុណ្ណោះ ទើបអាចទប់ស្កាត់ការឡើងថ្លៃប្រេងនេះបាន។

ជុំវិញការប្រែប្រួលនៃតម្លៃប្រេងឥន្ធនៈលើទីផ្សារក្នុងតំបន់ និងអន្តរជាតិ ដែលបង្ករឡើងដោយសង្គ្រាមនៅមជ្ឈិមបូព៌ា រវាងអាមេរិក អ៊ីស្រាអែល និងអ៊ីរ៉ង លោកបណ្ឌិត គី សេរីវឌ្ឍន៍ បានលើកឡើង៖«ថា ចំណុចនេះយើងឃើញថាសេដ្ឋកិច្ចពិភពលោកកំពុងនៅទ្រឹងប្រឈមនឹងការដាំក្បាលចុះ ហើយការឡើងថ្លៃប្រេងនេះទៀតសោតក៏នឹងទាញឱ្យសេដ្ឋកិច្ចកាន់តែថមថយជាងមុន»។

លោកសង្កត់ធ្ងន់ថា «នេះហើយដែលជាទ្វេរគ្រោះរបស់សេដ្ឋកិច្ចពិភពលោកនៅក្នុងឆ្នាំ២០២៦ ហើយក្នុងនោះ កម្ពុជាយើងក៏រងគ្រោះនូវទ្វេរគ្រោះនេះដូចគ្នាដែរ ដែលយើងមិនអាចជៀសផុតនោះទេ»។

លោកបណ្ឌិត គី សេរីវឌ្ឍន៍ ក៏បានបន្តថា យ៉ាងណាក៏ដោយប្រសិនបើក្រឡេកទៅមើលសកម្មភាពនេះ ថ្លៃដើមនៃការឡើងថ្លៃប្រេង មិនមែនតែក្នុងប្រទេសកម្ពុជាទេ គឺនៅគ្រប់កន្លែងទាំងអស់សុទ្ធសឹងតែមានការកើនឡើង ដូច្នេះបានន័យថា ថ្លៃដើមសកល គឺមានការកើនឡើង។

ជុំវិញបញ្ហានេះ លោកបណ្ឌិត បញ្ជាក់ថា៖«ការនាំចេញរបស់កម្ពុជានៅតែបន្ត គ្រាន់តែការនាំចេញរបស់កម្ពុជាមួយចំណែកមានការថយចុះ ហើយដោយសារតែថ្លៃប្រេងឡើងខ្ពស់ក៏ជាហេតុធ្វើឱ្យអ្នកប្រើប្រាស់កាត់បន្ថយការប្រើប្រាស់ផងដែរ»។

«ត្រង់ចំណុចនេះ យើងនៅទទួលស្គាល់ថាសកម្មភាពសេដ្ឋកិច្ចរបស់កម្ពុជានឹងមានការបន្ថយល្បឿនជាងមុនដែរ ហើយម្យ៉ាងវិញទៀតនៅពេលប្រេងឡើងថ្លៃ គឺធ្វើឱ្យថ្លៃកសិផលមានការកើនឡើងដោយសារតែកសិផលរបស់កម្ពុជាត្រូវការម៉ាស៊ីនបូមទឹកដើម្បីបូម ដូច្នេះហើយការចំណាយថ្លៃកសិកម្មរបស់កសិករនឹងកើនឡើងខ្ពស់ជាងមុន ដែលទាមទារឱ្យមានការយកចិត្តទុកដាក់ ព្រោះការឡើងថ្លៃប្រេង បូករួមនឹងការឡើងថ្លៃប្រេង គឺរួមចំណែកធ្វើឱ្យអតិថរណាកើនឡើងផងដែរ»។ លោកបណ្ឌិត គី សេរីវឌ្ឍន៍ បន្ថែមដូចនេះ។

យោងតាមក្រសួងពាណិជ្ជកម្ម ស្តីពីថ្លៃលក់រាយប្រេងឥន្ធនៈនៅតាមស្ថានីយ បានគូសបញ្ជាក់ឱ្យដឹងថា ក្នុងគោលបំណងជួយសម្រួលដល់ជីវភាពរបស់ប្រជាពលរដ្ឋ សម្តេច ហ៊ុន ម៉ាណែត នាយករដ្ឋមន្ត្រីកម្ពុជា បានអនុញ្ញាតឱ្យបន្តបញ្ចុះតម្លៃលក់រាយប្រេងឥន្ធនៈនៅកម្ពុជាចំនួន ៦,៥ សេនដុល្លារ/លីត្រ។ ដូច្នេះថ្លៃលក់រាយប្រេងឥន្ធនៈអនុវត្ត ចាប់ពីថ្ងៃទី៨ ដល់ថ្ងៃទី១០ ខែមីនា ឆ្នាំ២០២៦ គឺត្រូវលក់ ៤ ៤០០រៀលលីត្រ សម្រាប់ប្រេងសាំងធម្មតា និង ៥ ១៥០រៀល/លីត្រ សម្រាប់ប្រេងម៉ាស៊ូត៕

ដោយ៖ ឌិន ថារី

The post អ្នកជំនាញ ៖ មានតែប្រទេសផលិតប្រេងខ្លួនឯងប៉ុណ្ណោះទើបអាចទប់ស្កាត់ការហក់ឡើងនៃថ្លៃប្រេង appeared first on Kampuchea Thmey Daily.

អ្នកជំនាញស្នើសុំកំហិតការផ្សាយគ្រឿងស្រវឹងត្រឹមម៉ាក និងឡូហ្គោ ដើម្បីកាត់បន្ថយការទាក់ទាញកុមារ ពិសេសយុវជនឱ្យសេពគ្រឿងស្រវឹង

Sous Sith — Mon, 09 Mar 2026 07:51:26 +0000

យោងតាមការសិក្សារបស់អ្នកស្រាវជ្រាវរបស់រាជបណ្ឌិត្យសភាកម្ពុជា បានបង្ហាញថាការអនុវត្តប្រកាសលេខ ០៨៤ ប្រក.ពម ស្ដីពីការកំណត់អំពីបែបបទនីតិវិធី និងវិធានការក្នុងការគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹង នឹងមិនមានប្រសិទ្ធភាពគ្រប់គ្រាន់ក្នុងការបង្ការកុមារ និងយុវជនពីការទាក់ទាញឱ្យសេពគ្រឿងស្រវឹងនោះទេ។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា បានលើកឡើងថា ភាគច្រើនការផ្សព្វផ្សាយគ្រឿងស្រវឹងគឺមកពីការទាក់ទាញតាមរយៈការអូសទាញឱ្យប្រើប្រាស់គ្រឿងស្រវឹងតាមរូបភាពណាមួយ។ លោកបន្តថា តាមរយៈការសិក្សាស្រាវជ្រាវកន្លងមក របាយការណ៍បង្ហាញថា អ្នកទទួលទានគឿងស្រវឹងកាន់តែមានចំនួនច្រើនឡើងៗពីមួយឆ្នាំទៅមួយឆ្នាំ។ ជាក់ស្ដែង លទ្ធផលចុងក្រោយនេះ ហាក់មិនទាន់ឆ្លើយតបបានទៅនឹងគោលនយោបាយរបស់រដ្ឋាភិបាលដែលបានដាក់ចេញកាលពីពេលកន្លងទៅ។

យ៉ាងណាមិញ លោកបណ្ឌិត គី សេរីវឌ្ឃន៍ មើលឃើញថា ៦៦% នៃការផ្សាយពាណិជ្ជកម្មគ្រឿងស្រវឹងតាមទូរទស្សន៍ ចន្លោះម៉ោង១៨:០០-២០:០០ បានផ្សារភ្ជាប់ជាមួយរង្វាន់ ពាក្យពេចន៍ជំរុញការផឹក សកម្មភាពយុវជនផឹកជុំគ្នា និងរូបភាពតារាកាន់ដបគ្រឿងស្រវឹងជាដើម ដែលបំពានទៅនឹងគោលការណ៍ទី៦ នៃប្រកាស។

ជាមួយគ្នានោះ ជាង៦០% នៃការផ្សាយពាណិជ្ជកម្មគ្រឿងស្រវឹង ស្ថិតនៅជិតជាងចម្ងាយ២០០ម៉ែត្រជុំវិញគ្រឹះស្ថានសិក្សា ដែលជាការប្រព្រឹត្តផ្ទុយទៅនឹងគោលការណ៍ទី៧ នៃសេចក្ដីប្រកាស។

ចំណែកជាង៨០% នៃការផ្សព្វផ្សាយផលិតផលគ្រឿងស្រវឹង តាមទម្រង់អេឡិចត្រូនិក ឬឌីជីថល ឬបណ្ដាញទំនាក់ទំនងសង្គម មិនបានរចនាទំព័រចែងអំពីការហាមអនីតិជនចូលទស្សនា ដូចការកំណត់ក្នុងប្រកាសនោះទេ។ ជាងពាក់កណ្តាលនៃការផ្សាយពាណិជ្ជកម្មគ្រឿងស្រវឹង មិនបានដាក់សារអប់រំ តាមការចង្អុលបង្ហាញក្នុងគោលការណ៍ទី៩ នៃសេចក្ដីប្រកាស។

ដោយរកឃើញថា ការអនុវត្តវិធានការសំខាន់ៗគ្រប់គ្រងការផ្សាយពាណិជ្ជកម្មគ្រឿងស្រវឹង ដូចមានចែងក្នុងប្រកាសលេខ០៨៥ ពុំមានប្រសិទ្ធភាពគ្រប់គ្រាន់ និងមានភាពលំបាកខ្លាំងក្នុងការពង្រឹងការអនុវត្ត ក្រុមការងារស្រាវជ្រាវ នៃរាជបណ្ឌិត្យសភាកម្ពុជា ស្នើសុំក្រុមការងារគ្រប់គ្រងការផ្សាយពាណិជ្ជកម្មគ្រឿងស្រវឹង ពិចារណាដាក់ចេញបន្ថែមនូវវិធានការកំហិតការផ្សាយពាណិជ្ជកម្ម ដែលងាយស្រួលក្នុងការពង្រឹងការអនុវត្ត និងដែលត្រូវបានកំណត់ដោយអង្គការសុខភាពពិភពលោក ថាមានប្រសិទ្ធភាពដើម្បីបង្ការកុមារ និងយុវជនពីការទាក់ទាញឱ្យសេពគ្រឿងស្រវឹង។

ស្ថិតក្នុងដំណាក់កាល ដែលកម្ពុជាមិនទាន់អាចហាមឃាត់ការផ្សាយពាណិជ្ជកម្មគ្រឿងស្រវឹងទាំងស្រុងបាន យើងគួរកំហិតការផ្សាយពាណិជ្ជកម្មឱ្យមានត្រឹមម៉ាកនិងឡូហ្គោគ្រឿងស្រវឹង ដោយហាមមិនឱ្យមានការផ្សារភ្ជាប់ជាមួយរង្វាន់ ប្រើតារា និងបុគ្គលមានឥទ្ធិពល និងការផ្សាយតាមប្រព័ន្ធឌីជីថល ជាដើម។

ការប្រើប្រាស់គ្រឿងស្រវឹងក្នុងចំណោមមនុស្សវ័យក្មេងកំពុងកើនឡើងគួរឱ្យព្រួយបារម្ភ ទាំងក្នុងចំណោមបុរសនិងស្ត្រី។ ផលប៉ះពាល់ នៃការសេពគ្រឿងស្រវឹង រួមមាន ជំងឺជាង២០០មុខ គ្រោះថ្នាក់ចរាចរណ៍ អំពើហិង្សា ការខាតបង់ថវិកា ជាពិសេសផលប៉ះពាល់លើមូលធនមនុស្សរបស់កម្ពុជា៕

The post អ្នកជំនាញស្នើសុំកំហិតការផ្សាយគ្រឿងស្រវឹងត្រឹមម៉ាក និងឡូហ្គោ ដើម្បីកាត់បន្ថយការទាក់ទាញកុមារ ពិសេសយុវជនឱ្យសេពគ្រឿងស្រវឹង appeared first on Kampuchea Thmey Daily.

អ្នកជំនាញអះអាង តម្លៃប្រេងពិភពលោក រួមទាំងកម្ពុជា នឹងកើនឡើង ដោយសារសង្គ្រាមអ៊ីស្រាអ៊ែល-អ៊ីរ៉ង់

Din Thary — Mon, 02 Mar 2026 08:26:14 +0000

លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា មើលឃើញពីផលប៉ះពាល់ចំនួន ៣ ដែលអាចនឹងជះឥទ្ធិផលមកកាន់ប្រទេសកម្ពុជា តាមរយៈសង្គ្រាមរវាងអ៊ីស្រាអែល និងអ៊ីរ៉ង់។

ថ្លែងប្រាប់«កម្ពុជាថ្មី» នៅថ្ងៃទី០២ ខែមិនា ឆ្នាំ២០២៦ នេះ លោកបណ្ឌិត គី សេរីវឌ្ឍន៍ បានមានប្រសាសន៍ថា ចំពោះសង្គ្រាមរវាងអ៊ីស្រាអែល និងអ៊ីរ៉ង់ ដែលកំពុងតែកើតមានឡើងនាពេលនេះអ្វីដែលយើងគិតទុក គឺអាចនឹងមានផលប៉ះពាល់មួយចំនួនមកដល់ប្រទេសកម្ពុជា។ ទី១ ប៉ះពាល់ដល់ការចេញទំនិញទៅកាន់ទីក្រុងឌូបៃ ហើយជំរុញឱ្យតម្លៃប្រេងកើនឡើង ម្យ៉ាងទៀតសង្គ្រាមនេះនឹងជះឥទ្ធិផលអតិផរណាមកលើប្រទេសកម្ពុជា។

យោងតាមក្រសួងពាណិជ្ជកម្ម តម្លៃប្រេងសាំងធម្មតា លក់ចេញក្នុងតម្លៃ ៣៨៥០ រៀល ក្នុងមួយលីត្រ កើនឡើង ១០០ រៀល ចាប់ពីថ្ងៃទី ០១ ខែមីនា ឆ្នាំ ២០២៦ ដល់ថ្ងៃទី ១០ ខែមីនា។

យោងតាមប្រព័ន្ធផ្សព្វផ្សាយបរទេស តម្លៃប្រេងអន្តរជាតិបានហក់ឡើងខ្លាំងជិត ១០ ដុល្លារ ពេលបើកការជួញដូរលើទីផ្សារអាស៊ីនាព្រឹកថ្ងៃចន្ទ (២ មីនា) នេះ ដោយសារតែជម្លោះមជ្ឈិមបូព៌ា ដែលផ្ទុះឡើងក្រោយអ៊ីស្រាអែល និងអាមេរិករួមដៃគ្នាវាយប្រហារអ៊ីរ៉ង់ទ្រង់ទ្រាយធំ ដែលបង្កការវាយបកសងសឹកខ្លាំង និងប៉ះពាល់ដល់លំហូរប្រេងចេញពីតំបន់៕

យោងតាមក្រសួងពាណិជ្ជកម្ម ទំហំពាណិជ្ជកម្មកម្ពុជា អេមីរ៉ាតអារ៉ាប់រួម នៅក្នុងឆ្នាំ២០២៥ សម្រេចបានប្រមាណជិត១០០ លានដុល្លារ កាលពីឆ្នាំ ២០២៥ ក្នុងនោះកម្ពុជានាំចេញទៅអេមីរ៉ាតអារ៉ាប់រួមមានតម្លៃប្រមាណ ៧៤ លានដុល្លារ កើនឡើង ៩,៨១% ចំណែកឯអេមីរ៉ាតអារ៉ាប់រួមនាំចូលមកវិញមានតម្លៃ ២៤,៤៣ លានដុល្លារ កើន ៤,៥៧% ប្រៀបធៀបនឹងឆ្នាំ ២០២៤។

កម្ពុជាបានធ្វើការនាំចេញនូវសម្លៀកបំពាក់ ស្បែកជើង កាបូប កៅស៊ូធម្មជាតិ និងទំនិញផ្សេងៗទៀតទៅកាន់ទីផ្សារអារ៉ាប់រួម និងនាំចូលមកវិញនូវរ៉ែប្រើជាគ្រឿងចំហេះ ផលិតផលប្លាស្ទិក ថ្នាំជក់ កៅស៊ូសំយោគ និងទំនិញផ្សេងទៀត៕

ដោយ៖ ឌិន ថារី

The post អ្នកជំនាញអះអាង តម្លៃប្រេងពិភពលោក រួមទាំងកម្ពុជា នឹងកើនឡើង ដោយសារសង្គ្រាមអ៊ីស្រាអ៊ែល-អ៊ីរ៉ង់ appeared first on Kampuchea Thmey Daily.

ការដោះដូរទំនិញអន្តរជាតិកម្ពុជា សម្រេចបានជាង ៦ ពាន់លានដុល្លារ កើនឡើង ១៩% នៅខែមករា

deth leng — Tue, 10 Feb 2026 04:58:50 +0000

ការដោះដូរទំនិញកម្ពុជា ជាមួយដៃគូពាណិជ្ជកម្មអន្តរជាតិសម្រេចបាននូវទំហំទឹកប្រាក់ ៦ ពាន់លានដុល្លារ នៅក្នុងខែមករា ឆ្នាំ ២០២៦ កើនឡើង ១៩% ប្រៀបធៀបនឹងរយៈពេលដូចគ្នានៅក្នុងឆ្នាំ ២០២៥។

ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា បង្ហាញថា នៅក្នុងខែមករា ឆ្នាំ ២០២៦ ការនាំចេញ-នាំចូលទំនិញរវាងកម្ពុជា ជាមួយដៃគូអន្តរជាតិមានទំហំទឹកប្រាក់សរុប ៦ ពាន់លានដុល្លារ កើនឡើង ១៩% ក្នុងនោះកម្ពុជានាំចេញមានតម្លៃ ២,៩១ ពាន់លានដុល្លារ កើនឡើង ២៦,៦% និងនាំចូលមានតម្លៃ ៣,១០ ពាន់លានដុល្លារ កើន ២២,៥%។

ទំនិញសំខាន់ៗរបស់កម្ពុជា ដែលនាំចេញទៅទីផ្សារអន្តរជាតិ មានសំបកកង់រថយន្ត គ្រឿងបន្លាស់ គ្រឿងបង្គុំគ្រឿងអគ្គិសនី និងសង្ហារឹម ព្រមទាំងសម្លៀកបំពាក់ ស្បែកជើង និងសម្ភារធ្វើដំណើរ។ ដៃគូពាណិជ្ជកម្មសំខាន់ៗរបស់កម្ពុជារួមមាន ចិន អាស៊ាន អាមេរិក សហភាពអឺរ៉ុប ជប៉ុន កាណាដា អង់គ្លេស កូរ៉េខាងត្បូង អូស្ត្រាលី និងឥណ្ឌា។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ប្រាប់កម្ពុជាថ្មីនៅថ្ងៃទី ១០ ខែកុម្ភៈ ឆ្នាំ ២០២៦ ថា គម្រោងវិនិយោគនៅកម្ពុជាកើនឡើងបានបង្កើនការផលិត ខណៈកម្ពុជានៅបន្តទទួលបានប្រព័ន្ធអនុគ្រោះពន្ធដូចជា EBA និង GSP ពីបណ្ដាប្រទេសមួយចំនួន ឬក៏កិច្ចព្រមព្រៀងពាណិជ្ជកម្មសេរី កម្ពុជា-ចិន, កម្ពុជា-កូរ៉េ និងបណ្ដាប្រទេសមួយចំនួនទៀត ដែលនាំឱ្យការនាំចេញរបស់កម្ពុជាកើនឡើង។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា កម្ពុជានៅតែរក្សាបានទីផ្សារសំខាន់ៗរបស់ខ្លួន ដែលជាទីផ្សារពិភពលោក ធានាបាននូវការផ្គត់ផ្គង់ បង្កើតសក្ដានុភាព ក្នុងខ្សែច្រវាក់តម្លៃ និងខ្សែច្រវាក់ផ្គត់ផ្គង់ និងរក្សាបាននូវជំនឿចិត្តពីអ្នកបញ្ជាទិញ។

លោកបណ្ឌិត គី សិរីវឌ្ឍន៍ អ្នកស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា ប្រាប់កម្ពុជាថ្មីថា កម្លាំងសេដ្ឋកិច្ចកម្ពុជានៅតែមានសន្ទុះលើវិស័យមួយចំនួន ខណៈវិស័យមួយចំនួនក៏រងផលប៉ះពាល់។

លោកបណ្ឌិត គី សិរីវឌ្ឍន៍ យល់ឃើញថា៖ «ការនាំចេញច្រើន ទីផ្សារយើងធំ ៣០% គឺ សហរដ្ឋអាមេរិក ជិត ២០% គឺអឺរ៉ុប ហើយទីផ្សារមួយចំណែកនៅក្នុងតំបន់អាស៊ាន និងចិន»។

បើតាមអ្នកស្រាវជ្រាវរូបនេះ ទោះជាវិស័យមួយចំនួនកំពុងជាប់គាំងក៏ដោយ ក៏ប៉ុន្តែវិស័យឧស្សាហកម្ម កមន្តសាល និងនាំចេញកំពុងជំរុញសេដ្ឋកិច្ចកម្ពុជាឱ្យមានកំណើន ដែលបានផ្ដល់ការងារដល់កម្លាំងពលកម្មក្នុងស្រុក។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ទំហំពាណិជ្ជកម្មអន្តរជាតិរបស់កម្ពុជា សម្រេចបាននូវទំហំទឹកប្រាក់ ៦៥,២៥ ពាន់លានដុល្លារ កើនឡើង ១៨% ធៀបនឹងឆ្នាំ ២០២៤ ក្នុងនោះកម្ពុជានាំចេញទៅទីផ្សារអន្តរជាតិសម្រេចបាន ៣១,២៨ ពាន់លានដុល្លារ កើនឡើង ១៧% និងនាំចូលមកវិញមានតម្លៃ ៣៣,៩៦ ពាន់លានដុល្លារ កើនឡើង ១៨%៕

អត្ថបទ៖ ឡេង ដេត

The post ការដោះដូរទំនិញអន្តរជាតិកម្ពុជា សម្រេចបានជាង ៦ ពាន់លានដុល្លារ កើនឡើង ១៩% នៅខែមករា appeared first on Kampuchea Thmey Daily.

អ្នកជំនាញ៖ ការលុបអត្រាពន្ធសម្រាប់ទំនិញនាំចូលពីអាមេរិក នឹងផ្តល់ឱកាសដល់វិនិយោគិននៅកម្ពុជា

Din Thary — Tue, 28 Oct 2025 03:25:00 +0000

លោកបណ្ឌិត គី សិរីវឌ្ឍន៍ អ្នកជំនាញសេដ្ឋកិច្ច បានមានប្រសាសន៍ថា ចំពោះការលុបចោលនូវអត្រាពន្ធរបស់ប្រទេសកម្ពុជាសម្រាប់ការនាំទំនិញពីអាមេរិកនឹងធ្វើឱ្យបណ្តាប្រទេសដែលចូលមកវិនិយោគនៅកម្ពុជាទទួលបានអត្រាបង់ពន្ធទាបបើធៀបជាមួយនឹងបណ្តាប្រទេសផ្សេងៗ ដូចជាវៀតណាមជាដើមនោះដែលរងសម្ពាធពន្ធ ២០% ពីអាមេរិក។

ក្នុងសេចក្ដីថ្លែងការណ៍របស់សេតវិមាន កម្ពុជាបានប្តេជ្ញាលុបបំបាត់ពន្ធគយលើគ្រប់មុខទំនិញឧស្សាហកម្ម និងផលិតផលម្ហូបអាហារ និងកសិកម្មរបស់សហរដ្ឋអាមេរិកដែលនាំចូលមកកម្ពុជា។ ជុំវិញបញ្ហានេះ លោកបណ្ឌិត គី សិរីវឌ្ឍន៍ បានលើកឡើងថាសម្រាប់ទំនិញដែលផលិតនៅសហរដ្ឋអាមេរិក នឹងត្រូវបាននាំចូលមកប្រទេសកម្ពុជានោះមិនជាប់ពន្ធនោះទេ។

ចំណែកឯអ្នកវិនិយោគទាំងអស់ផលិតនៅប្រទេសកម្ពុជា ហើយនាំចេញទៅកាន់សហរដ្ឋអាមេរិកវិញ ត្រូវជាប់ពន្ធ MFN មានន័យថាប្រទេសដែលទទួលបានការអនុគ្រោះពន្ធ ហើយក៏ត្រូវបូកបន្ថែមអត្រាពន្ធលើគ្នាទៅវិញទៅមកអត្រាពន្ធគយ ១៩ % ទៀត។ ប៉ុន្តែប្រសិនបើវិនិយោគនៅក្នុងប្រទេសកម្ពុជា ហើយប្រសិនបើអ្នកវិនិយោគទាំងអស់មកប្រទេសកម្ពុជា គឺគាត់នឹងទទួលបាននូវអត្រាបង់ពន្ធទាបបើធៀបជាមួយនឹងបណ្តាប្រទេសផ្សេងៗ។

ទន្ទឹមនេះ លោកបណ្ឌិត ក៏បានមានប្រសាសន៍ដែរថា លុបបំបាត់ពន្ធគយ ១០០% លើម្ហូបអាហារដែលនាំចូលពីសហរដ្ឋអាមេរិកនេះ នឹងមិនប៉ះពាល់ដល់ផលិតផលក្នុងស្រុកនោះទេ ដោយសារតែផលិតផលម្ហូបអាហារអាមេរិកមានតម្លៃខ្ពស់ បើធៀបទៅនឹងម្ហូបអាហារដែលផលិតនៅក្នុងប្រទេសកម្ពុជា។

ដូច្នេះហើយ ការលើកលែងពន្ធនេះ គឺគ្រាន់តែជាការបង្ហាញនូវឆន្ទៈនយោបាយប្រទេស និងប្រទេស ប៉ុន្តែធាតុពិតជាក់ស្តែងនៅក្នុងពាណិជ្ជកម្មវាអាចនឹងមានលំហូរចូលនូវកសិផលអាមេរិកក្នុងចំនួនតិចតួចប៉ុណ្ណោះ ជាពិសេសទាក់ទងទៅនិងម្ហូបអាហារ។

មួយវិញទៀត ម្ហូបអាហារអាមេរិកត្រូវបានគេចាត់ទុកថាជាម្ហូបអាហារដែលល្អដូច្នេះការនាំចូលដោយរួចពន្ធនេះនឹងធ្វើឱ្យថ្លៃទំនិញអាមេរិកមានតម្លៃទាបជាងមុន ហើយអាចនឹងធ្វើឱ្យការនាំចូលមានការកើនឡើងប្រសើរជាងមុន ដែលធ្វើឱ្យអ្នកប្រើប្រាស់មានលទ្ធភាពអាចប្រើប្រាស់បានច្រើនជាងមុននូវទំនិញដែលមានគុណភាពល្អផងដែរ។

យោងតាមសេចក្តីថ្លែងការណ៍រួម ដែលចេញផ្សាយដោយសេតវិមាន សហរដ្ឋអាមេរិកនឹងរក្សាអត្រាពន្ធគយ ១៩ %លើទំនិញនាំចូលអាមេរិករបស់កម្ពុជា ម៉ាឡេស៊ី និងថៃ ខណៈប្រទេសទាំង៣ នឹងទម្លាក់ពន្ធដល់ ០ % លើទំនិញនាំចូលពីអាមេរិកមួយចំនួន។ សេចក្ដីថ្លែងការណ៍ក៏បានប្រកាសពីកិច្ចព្រមព្រៀងក្របខ័ណ្ឌស្រដៀងគ្នានេះផងដែរ ជាមួយវៀតណាម ដែលរងពន្ធអាមេរិក ២០ %។

ក្រោមកិច្ចព្រមព្រៀងពាណិជ្ជកម្មបដិការដដែល ប្រទេសអាស៊ានទាំង ៤ បានសន្យាថានឹងលុបបំបាត់របាំងពាណិជ្ជកម្ម និងផ្តល់អនុគ្រោះទីផ្សារដល់ទំនិញផ្សេងៗរបស់អាមេរិក។ ក្រៅពីនេះ ក៏មានការប្តេជ្ញាចិត្តលើពាណិជ្ជកម្មឌីជីថល សេវាកម្ម និងការវិនិយោគ រួមជាមួយនឹងការសន្យាការពារសិទ្ធិការងារ និងពង្រឹងស្តង់ដារបរិស្ថាន។

ថៃ ម៉ាឡេស៊ី និងវៀតណាមឯណោះវិញ បានយល់ព្រមនាំចូលយានយន្តអាមេរិកដែលបំពេញតាមស្តង់ដារសុវត្ថិភាព និងការបំភាយឧស្ម័នរបស់អាមេរិក៕

ដោយ៖ ឌិន ថារី

The post អ្នកជំនាញ៖ ការលុបអត្រាពន្ធសម្រាប់ទំនិញនាំចូលពីអាមេរិក នឹងផ្តល់ឱកាសដល់វិនិយោគិននៅកម្ពុជា appeared first on Kampuchea Thmey Daily.

អ្នកជំនាញ៖ ឧស្សាហកម្មផលិតកម្មក្នុងស្រុក ចាប់ផ្ដើមងើបឡើង ក្រោយពលរដ្ឋពហិការទំនិញថៃ

deth leng — Mon, 06 Oct 2025 04:11:26 +0000

លោកបណ្ឌិត គី សិរីវឌ្ឍន៍ អ្នកស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា បានលើកឡើងថា វិស័យឧស្សាហកម្មផលិតកម្មនៅកម្ពុជា ចាប់ផ្ដើមងើបឡើង បន្ទាប់ពីប្រជាពលរដ្ឋងាកមកគាំទ្រផលិតផលក្នុងស្រុក ជំនួសឱ្យទំនិញនាំចូល ក្រោយពីមានបញ្ហាព្រំដែនកម្ពុជា-ថៃ។

លោកបណ្ឌិត គី សិរីវឌ្ឍន៍ បានលើកឡើងថា កន្លងមកប្រជាពលរដ្ឋធ្លាប់បានគាំទ្រផលិតផលក្នុងស្រុកដែរ ប៉ុន្តែសកម្មភាពផុសផុល មិនទាន់បានច្រើនដូចនៅក្នុងពេលនេះ ដែលសន្ទុះគាំទ្រមានការកើនឡើង ហើយមានទំនិញមួយចំនួនបានផលិតមកហើយ តម្រូវការខ្ពស់ជាងការផលិត ដែលធ្វើឱ្យខ្វះទំនិញមួយចំនួនផងដែរ។

បើតាមអ្នកជំនាញផ្នែកសេដ្ឋកិច្ចរូបនេះ ស្ថានភាពបច្ចុប្បន្ន ផ្នែកផលិតកម្ម មានកំណើនយឺត ចំណែកឯតម្រូវការមានកំណើនលឿន ដែលនេះគឺជាភាពបត់បែននៅក្នុងទ្រឹស្ដីសេដ្ឋកិច្ច ដូច្នេះហើយ ក្នុងខណៈពេលដែលសន្ទុះ ងាកមកគាំទ្រផលិតផលក្នុងស្រុក មានសន្ទុះឡើងលឿន ដូច្នេះ ឧស្សាហកម្ម ដែលផលិតក្នុងស្រុក នឹងផ្គត់ផ្គង់ មានកម្រិតតិចជាងតម្រូវការ នៅឡើយ។

លោកបណ្ឌិត គី សិរីវឌ្ឍន៍ បញ្ជាក់ថា៖ «ឧស្សាហកម្មយើងមិនទាន់អាចបំពេញតម្រូវការបានគ្រប់ជ្រុងជ្រោយនៅឡើយទេ មានទំនិញខ្លះក៏យើងអាចផ្គត់ផ្គង់បាន ដោយសារតម្រូវការនៅតូច ហើយមានទំនិញខ្លះតម្រូវការមានសន្ទុះលឿន ក៏មិនអាចផ្គត់ផ្គង់បាន ប៉ុន្តែ យើងនិយាយជារួមថា បច្ចុប្បន្ន ឧស្សាហកម្មនៅក្នុងស្រុកចាប់ផ្ដើមងើបឡើងបន្តិចម្ដងៗ ដើម្បីឈានទៅរក ការផ្គត់ផ្គង់ឱ្យបានគ្រប់ជ្រុងជ្រោយជូនទៅដល់ទីផ្សារនៅក្នុងប្រទេសកម្ពុជា»។

អ្នកស្រី សម្បត្តិ អមរៈ វិប្បស្សិនី នាយិកាគ្រប់គ្រងក្រុមហ៊ុន Sabara Best Food មានប្រសាសន៍ថា សន្ទុះគាំទ្រផលិតផលក្នុងស្រុកបានហក់ឡើង បន្ទាប់ពីមានជម្លោះព្រំដែនកម្ពុជា-ថៃ ខណៈផលិតកម្មរបស់អ្នកស្រី បានបង្កើនការផលិតដោយបន្ថែមម៉ោងការងារ។

អ្នកស្រី សម្បត្តិ អមរៈ វិប្បស្សិនី បន្តថា ផលិតផលខ្មែរភាគច្រើន ស្ថិតក្នុងរង្វង់សិប្បកម្មខ្នាតតូច និងមធ្យមនៅឡើយ ជាហេតុធ្វើឱ្យពិបាកប្រជែងនឹងក្រុមហ៊ុនក្រៅស្រុកធំៗ ដែលបណ្តុំដោយផលិតផលមានតម្រូវការចាំបាច់ច្រើនមុខ។

អ្នកស្រី សម្បត្តិ អមរៈ វិប្បស្សិនី ជឿជាក់យ៉ាងមុតមាំថា បើសន្ទុះនៃការគាំទ្រផលិតផលក្នុងស្រុកនៅតែបន្ត នៅ៤-៥ឆ្នាំខាងមុខ ទីផ្សារផលិតផលខ្មែរនឹងពង្រីកខ្លួនកាន់តែធំ ពិសេសគឺហុចប្រយោជន៍ដល់សង្គមជាតិទាំងមូល។

ស្របពេលដែលដំណើរការនៃការពង្រឹង និងពង្រីកការផលិតផលិតផលក្នុងស្រុក មិនទាន់អាចឆ្លើយតបនឹងតម្រូវការភ្លាមៗនៅឡើយ អ្នកស្រី សម្បត្តិ អមរៈ វិប្បស្សិនី សំណូមពរដល់ពលរដ្ឋខ្មែរមានការអត់ធ្មត់សិន។

អ្នកស្រីជឿថា បើសន្ទុះនៃការគាំទ្រផលិតផលក្នុងស្រុកមានអាយុវែងឆ្ងាយ យ៉ាងយូរបំផុត ៤-៥ឆ្នាំខាងមុខ នឹងហុចប្រយោជន៍ដល់សង្គមជាតិទាំងមូល៕

អត្ថបទ៖ ឡេង ដេត

The post អ្នកជំនាញ៖ ឧស្សាហកម្មផលិតកម្មក្នុងស្រុក ចាប់ផ្ដើមងើបឡើង ក្រោយពលរដ្ឋពហិការទំនិញថៃ appeared first on Kampuchea Thmey Daily.

បណ្ឌិត គី សេរីវឌ្ឍន៍ មើលឃើញ ៣ ចំណុច ធ្វើឱ្យឧត្ដមភាពប្រកួតប្រជែងរបស់កម្ពុជាលើទីផ្សារនៅមានកម្រិត

Din Thary — Wed, 24 Sep 2025 05:00:40 +0000

លោក បណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិតសភា មើលឃើញនូវកត្តាសំខាន់ៗចំនួន ៣ ចំណុចដែលធ្វើឱ្យឧត្ដមភាពប្រកួតប្រជែងរបស់កម្ពុជានៅលើទីផ្សារនៅមានកម្រិត បើធៀបទៅនឹងបណ្តាប្រទេសផ្សេងៗ។

ថ្លែងប្រាប់«កម្ពុជាថ្មី» លោក បណ្ឌិត គី សេរីវឌ្ឍន៍ បានមានប្រសាសន៍ថា ពាក់ព័ន្ធនិងឧត្ដមភាពនៃការប្រកួតប្រជែងរបស់កម្ពុជានៅលើទីផ្សារ យើងឃើញថា នៅមានកម្រិតនៅឡើយ។

ជាក់ស្តែង មានកត្តាសំខាន់ៗ ៣ ចំណុច ដែលធ្វើឱ្យកម្ពុជានៅមានកម្រិតនៅឡើយ ទី១ ការិយាធិបតេយ្យ និងអំពើពុករលួយនៅក្នុងប្រព័ន្ធដឹកជញ្ជូន logistic ភស្តុភារកម្មនៅតែខ្ពស់ ដែលធ្វើឱ្យកម្ពុជាបាត់បង់ការប្រកួតប្រជែង។

ទី២ ថ្លៃដើមនៃអគ្គិសនីរបស់កម្ពុជា ក៏នៅតែមានកម្រិតខ្ពស់ដូចគ្នាដែរ បើធៀបជាមួយនឹងបណ្តាប្រទេសផ្សេងៗ និងទី៣ កម្មកររបស់កម្ពុជានៅមិនទាន់មានជំនាញច្បាស់លាស់ ហើយនិងមិនទាន់មាននូវផលិតភាពខ្ពស់ក្នុងការផលិតបើធៀបជាមួយនឹងបណ្តាប្រទេសផ្សេងៗ។

លោកបណ្ឌិត បានសង្កត់ធ្ងន់ថា « ចំណុចទាំង ៣ នេះ យើងឃើញហើយថា ការប្រកួតប្រជែងរបស់យើងគឺនៅមានកម្រិត នៅរួមផ្សំជាមួយការអនុវត្តច្បាប់មិនបានត្រឹមត្រូវ ដែលកត្តាទាំងអស់នេះ គួរតែមានការគិតគូរឡើងវិញ ព្រមទាំងមានការសម្របសម្រួលឱ្យមានការអនុវត្តច្បាប់បានល្អប្រសើរ ត្រឹមត្រូវធានាបានភាពស្មើគ្នា ទាំងអ្នកជំនួញបរទេស និងអ្នកជំនួញក្នុងស្រុក»។

យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) បានបង្ហាញថា ចាប់ពីខែមករា ដល់ខែសីហា ឆ្នាំ ២០២៥ កម្ពុជានាំចេញទំនិញទៅកាន់ទីផ្សារអន្តរជាតិ គិតជាទឹកប្រាក់មានទំហំ ២០.១៨ ពាន់លានដុល្លារអាម៉េរិក មានការកើនឡើង ១៤.៨% បើធៀបនឹងរយៈពេលដូចគ្នាកាលពីឆ្នាំ២០២៤ ដែលមានទំហំប្រមាណជាង ១៧ ពាន់លានដុល្លារអាម៉េរិក៕

ដោយ៖ ឌិន ថារី

The post បណ្ឌិត គី សេរីវឌ្ឍន៍ មើលឃើញ ៣ ចំណុច ធ្វើឱ្យឧត្ដមភាពប្រកួតប្រជែងរបស់កម្ពុជាលើទីផ្សារនៅមានកម្រិត appeared first on Kampuchea Thmey Daily.

លោកបណ្ឌិត គី សេរីវឌ្ឍន៍ Archives - Kampuchea Thmey Daily

អ្នកជំនាញ ៖ មានតែប្រទេសផលិតប្រេងខ្លួនឯងប៉ុណ្ណោះទើបអាចទប់ស្កាត់ការហក់ឡើងនៃថ្លៃប្រេង

អ្នកជំនាញអះអាង តម្លៃប្រេងពិភពលោក រួមទាំងកម្ពុជា នឹងកើនឡើង ដោយសារសង្គ្រាមអ៊ីស្រាអ៊ែល-អ៊ីរ៉ង់

ការ​ដោះដូរ​ទំនិញ​អន្តរជាតិ​កម្ពុជា ​សម្រេច​បាន​ជាង ​៦ ​ពាន់លានដុល្លារ ​កើនឡើង ១៩% ​នៅ​​ខែ​មករា​

អ្នកជំនាញ៖ ការលុបអត្រាពន្ធសម្រាប់ទំនិញនាំចូលពីអាមេរិក នឹងផ្តល់ឱកាសដល់វិនិយោគិននៅកម្ពុជា

​អ្នក​ជំនាញ​៖ ​ឧស្សាហកម្ម​ផលិតកម្មក្នុងស្រុក ​ចាប់ផ្ដើម​ងើបឡើង​ ក្រោយ​ពលរដ្ឋ​ពហិការ​ទំនិញថៃ​

បណ្ឌិត គី សេរីវឌ្ឍន៍ មើលឃើញ ៣ ចំណុច ធ្វើឱ្យឧត្ដមភាពប្រកួតប្រជែងរបស់កម្ពុជាលើទីផ្សារនៅមានកម្រិត

ការដោះដូរទំនិញអន្តរជាតិកម្ពុជា សម្រេចបានជាង ៦ ពាន់លានដុល្លារ កើនឡើង ១៩% នៅខែមករា

អ្នកជំនាញ៖ ឧស្សាហកម្មផលិតកម្មក្នុងស្រុក ចាប់ផ្ដើមងើបឡើង ក្រោយពលរដ្ឋពហិការទំនិញថៃ