សេដ្ឋកិច្ច

បណ្ឌិត គី សេរីវឌ្ឍន៍ មើលឃើញ ៣ ចំណុច ធ្វើឱ្យឧត្ដមភាពប្រកួតប្រជែងរបស់កម្ពុជាលើទីផ្សារនៅមានកម្រិត

បានផុស

១០ ខែ មុន

នៅ

ថ្ងៃពុធ ២៤ កញ្ញា ២០២៥

ដោយ

លោក បណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិតសភា មើលឃើញនូវកត្តាសំខាន់ៗចំនួន ៣ ចំណុចដែលធ្វើឱ្យឧត្ដមភាពប្រកួតប្រជែងរបស់កម្ពុជានៅលើទីផ្សារនៅមានកម្រិត បើធៀបទៅនឹងបណ្តាប្រទេសផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់«កម្ពុជាថ្មី» លោក បណ្ឌិត គី សេរីវឌ្ឍន៍ បានមានប្រសាសន៍ថា ពាក់ព័ន្ធនិងឧត្ដមភាពនៃការប្រកួតប្រជែងរបស់កម្ពុជានៅលើទីផ្សារ យើងឃើញថា នៅមានកម្រិតនៅឡើយ។

ជាក់ស្តែង មានកត្តាសំខាន់ៗ ៣ ចំណុច ដែលធ្វើឱ្យកម្ពុជានៅមានកម្រិតនៅឡើយ ទី១ ការិយាធិបតេយ្យ និងអំពើពុករលួយនៅក្នុងប្រព័ន្ធដឹកជញ្ជូន logistic ភស្តុភារកម្មនៅតែខ្ពស់ ដែលធ្វើឱ្យកម្ពុជាបាត់បង់ការប្រកួតប្រជែង។

ទី២ ថ្លៃដើមនៃអគ្គិសនីរបស់កម្ពុជា ក៏នៅតែមានកម្រិតខ្ពស់ដូចគ្នាដែរ បើធៀបជាមួយនឹងបណ្តាប្រទេសផ្សេងៗ និងទី៣ កម្មកររបស់កម្ពុជានៅមិនទាន់មានជំនាញច្បាស់លាស់ ហើយនិងមិនទាន់មាននូវផលិតភាពខ្ពស់ក្នុងការផលិតបើធៀបជាមួយនឹងបណ្តាប្រទេសផ្សេងៗ។

លោកបណ្ឌិត បានសង្កត់ធ្ងន់ថា « ចំណុចទាំង ៣ នេះ យើងឃើញហើយថា ការប្រកួតប្រជែងរបស់យើងគឺនៅមានកម្រិត នៅរួមផ្សំជាមួយការអនុវត្តច្បាប់មិនបានត្រឹមត្រូវ ដែលកត្តាទាំងអស់នេះ គួរតែមានការគិតគូរឡើងវិញ ព្រមទាំងមានការសម្របសម្រួលឱ្យមានការអនុវត្តច្បាប់បានល្អប្រសើរ ត្រឹមត្រូវធានាបានភាពស្មើគ្នា ទាំងអ្នកជំនួញបរទេស និងអ្នកជំនួញក្នុងស្រុក»។

យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) បានបង្ហាញថា ចាប់ពីខែមករា ដល់ខែសីហា ឆ្នាំ ២០២៥ កម្ពុជានាំចេញទំនិញទៅកាន់ទីផ្សារអន្តរជាតិ គិតជាទឹកប្រាក់មានទំហំ ២០.១៨ ពាន់លានដុល្លារអាម៉េរិក មានការកើនឡើង ១៤.៨% បើធៀបនឹងរយៈពេលដូចគ្នាកាលពីឆ្នាំ២០២៤ ដែលមានទំហំប្រមាណជាង ១៧ ពាន់លានដុល្លារអាម៉េរិក៕

ដោយ៖ ឌិន ថារី