លោក តូច ចៅចេក Archives - Kampuchea Thmey Daily

គិតត្រឹមឆ្នាំ២០២៥ ប្រតិបត្តិការតាមរយៈប្រព័ន្ធបាគងបានកើន ១,២ ដង ដល់ ១.៣២៥,៦៥ លាន

Din Thary — Mon, 26 Jan 2026 08:41:00 +0000

ធនាគារជាតិនៃកម្ពុជាបានឱ្យដឹងថា គិតត្រឹមឆ្នាំ២០២៥ ប្រតិបត្តិការតាមរយៈប្រព័ន្ធបាគងបានកើនឡើង ១,២ ដង ដល់ ១.៣២៥,៦៥ លានប្រតិបត្តិការ ដែលក្នុងនោះ ៧៧១,២ លានប្រតិបត្តិការជាប្រាក់រៀល និង ៥៥៤,៥ លានប្រតិបត្តិការ ជាប្រាក់ដុល្លារអាមេរិក ខណៈដែលចំនួនគណនីកាបូបអេឡិចត្រូនិក មានប្រមាណ ១៨,៩ លានគណនី។

លោកស្រី ជា សិរី ទេសាភិបាលនៃធនាគារជាតិនៃកម្ពុជា បានមានប្រសាសន៍ថា បរិយាបន្នហិរញ្ញវត្ថុត្រូវបានបន្តលើកកម្ពស់ និងមានវឌ្ឍនភាពល្អប្រសើរ ដែលឆ្លុះបញ្ចាំង តាមរយៈកំណើនអ្នកប្រើប្រាស់សេវាហិរញ្ញវត្ថុផ្លូវការ។ ជាក់ស្តែង ចំនួនអ្នកដាក់ប្រាក់បញ្ញើបានកើនដល់ ១៨,៦ លាននាក់ និងចំនួនអ្នកប្រើប្រាស់សេវាឥណទានកើនដល់ ៤,៣ លាននាក់។ លើសពីនេះ ចំនួនស្ត្រីដែលបានប្រើប្រាស់សេវាហិរញ្ញវត្ថុផ្លូវការក្នុងវិស័យធនាគារមានប្រមាណ ៥៣% សម្រាប់ សេវាឥណទាន និង ៥១% សម្រាប់សេវាប្រាក់បញ្ញើ។

លោកស្រី ជា សិរី បានបន្ថែមថា «ប្រតិបត្តិការតាមរយៈប្រព័ន្ធបាគងបានកើនឡើង ១,២ ដង ដល់ ១.៣២៥,៦៥ លានប្រតិបត្តិការ នៅក្នុងឆ្នាំ២០២៥ ដែលក្នុងនោះ ៧៧១,២ លានប្រតិបត្តិការជាប្រាក់រៀល និង ៥៥៤,៥ លានប្រតិបត្តិការជាប្រាក់ដុល្លារអាមេរិក ខណៈដែលចំនួនគណនីកាបូបអេឡិចត្រូនិក មានប្រមាណ ១៨,៩ លានគណនី»។

ជាមួយគ្នានេះ លោកស្រីទេសាភិបាល បានបន្តថា យុទ្ធសាស្ត្រជាតិស្តីពីបរិយាបន្នហិរញ្ញវត្ថុកំពុងត្រូវបានធ្វើបច្ចុប្បន្នកម្មសម្រាប់ឆ្នាំ២០២៦-២០៣០ ដើម្បីបន្តធានាបានការអភិវឌ្ឍវិស័យហិរញ្ញវត្ថុប្រកបដោយបរិយាបន្ន និងចីរភាព។

ដោយឡែក ចំពោះកិច្ចការពារអតិថិជន ធនាគារជាតិនៃកម្ពុជាបានទទួល ឮបណ្តឹងអតិថិជនតាមរយៈប្រព័ន្ធហតឡាញចំនួន ៧២១ ករណី ក្នុងនោះ ៦៨៣ ករណី ត្រូវបានដោះស្រាយរួចរាល់ ១២ ករណី កំពុងត្រូវបានដោះស្រាយ និង ២៦ ករណី ស្ថិតក្នុងនីតិវិធីតុលាការ។

លោកស្រី ជា សិរី បន្តថា កិច្ចសហប្រតិបត្តិការទ្វេភាគី និងពហុភាគី ត្រូវបានបន្តពង្រឹង និងពង្រីក តាមរយៈការចុះ អនុស្សរណៈនៃការយោគយល់ ការផ្លាស់ប្តូរចំណេះដឹងនិងបទពិសោធ និងការអនុវត្តគម្រោងជំនួយ បច្ចេកទេស។

លោក តូច ចៅចេក ជាសមាជិកក្រុមប្រឹក្សាភិបាលនៃសមាគមធនាគារនៅកម្ពុជា (ABC) និងជាប្រធាននាយកប្រតិបត្តិធនាគារ ប្រៃសណីយ៍កម្ពុជា បានមានប្រសាសន៍ថា របាយការណ៍របស់ធនាគារជាតិនៃកម្ពុជា បានឆ្លុះបញ្ចាំងជាមធ្យមរបស់ឧស្សាហកម្ម (industry) ហើយធនាគារប្រៃសណីយ៍ដែលធ្វើប្រតិបត្តិការក៏ប្រហាក់ប្រហែលទៅនឹងរបាយការណ៍ពីឧស្សាហកម្មនេះដូចគ្នាដែរ។

លោក តូច ចៅចេក ក៏បានបញ្ជាក់ថា នៅឆ្នាំ២០២៦ នេះ ធនាគារប្រៃសណីយ៍ក៏មាននូវផែនការបង្កើននូវកំណែសេវាធនាគាររបស់ខ្លួនឱ្យកាន់តែមានភាពងាយស្រួល រលូន និងសុវត្ថិភាពជាងមុនផងដែរ។

ធនាគារជាតិនៃកម្ពុជា បានបន្តចូលរួមពង្រឹងកិច្ចសហប្រតិបត្តិការក្នុងក្របខណ្ឌអាស៊ាន និងអាស៊ាន+៣ ព្រមទាំងចុះអនុស្សរណៈយោគយល់ និងសហការជាមួយស្ថាប័នអន្តរជាតិនិងដៃគូ អភិវឌ្ឍន៍នានា ដើម្បីជំរុញការតភ្ជាប់ប្រព័ន្ធទូទាត់ទាំងក្នុង និងក្រៅតំបន់ ហិរញ្ញប្បទានឌីជីថលបៃតង និងការគ្រប់គ្រងវិបត្តិ ជាដើម។

កិច្ចសហប្រតិបត្តិការទាំងនេះក៏បានលើកកម្ពស់សមត្ថភាពមន្ត្រី ជំនាញស្របតាមការវិវត្តនៃវិស័យហិរញ្ញវត្ថុ និងបច្ចេកវិទ្យាជាសកល និងបានរួមចំណែកយ៉ាងសំខាន់ ក្នុងការអភិវឌ្ឍប្រព័ន្ធធនាគារ ជាពិសេសពង្រឹងសំណាញ់សុវត្ថិភាពហិរញ្ញវត្ថុទាំងក្នុងស្រុក និងតំបន់៕

The post គិតត្រឹមឆ្នាំ២០២៥ ប្រតិបត្តិការតាមរយៈប្រព័ន្ធបាគងបានកើន ១,២ ដង ដល់ ១.៣២៥,៦៥ លាន appeared first on Kampuchea Thmey Daily.

វិស័យធនាគារនឹងរងផលប៉ះពាល់នូវឥណទានប្រមាណ ២០ លានដុល្លារជុំវិញបញ្ហាជម្លោះព្រំដែនកម្ពុជា-ថៃ

Din Thary — Wed, 27 Aug 2025 01:57:00 +0000

លោក តូច ចៅចេក ជាសមាជិកក្រុមប្រឹក្សាភិបាលនៃសមាគមធនាគារនៅកម្ពុជា (ABC) និងជាប្រធាននាយកប្រតិបត្តិធនាគារ ប្រៃសណីយ៍កម្ពុជា បានធ្វើការវាយតម្លៃ នូវផលប៉ះពាល់នៃការខាតបង់ប្រាក់កម្ចីពាក់ព័ន្ធនឹងបញ្ហាជម្លោះព្រំដែនកម្ពុជា-ថៃ ក្នុងវិស័យធនាគារប្រមាណជា២០លានដុល្លារនៃសមតុល្យឥណទានសរុប ផ្អែកទៅលើការលុបចោលការប្រាក់ និងការអនុគ្រោះនានាដែលវិស័យនេះបានផ្តល់ជូនដល់យយោធិនជួរមុខ និងក្រុមគ្រួសារជនភាសឹក។ ប៉ុន្តែលោកថា ចំនួនទឹកប្រាក់នេះពុំបង្អាក់ដំណើរនៃការរីកលូតលាស់នៃវិស័យនេះឡើយ។

ថ្លែងប្រាប់ «កម្ពុជាថ្មី» នៅថ្ងៃទី២៦ ខែសីហា ឆ្នាំ២០២៥ លោក តូច ចៅចេក បានឱ្យដឹងថា ពាក់ព័ន្ធនិងការលុបចោលការប្រាក់ទាហានជួរមុខ កន្លងមកធនាគារសម្រេចលុបការប្រាក់រយៈពេល ៣ ខែ ប៉ុន្តែបច្ចុប្បន្នធនាគារបានសម្រេចលុបការប្រាក់របស់យោធិនជួរមុខរយៈពេលដល់ ៦ ខែ វិញ។ ក្នុងនោះពីមុនមក ធនាគារយល់ឃើញថា ទាហានជួរមុខមានចំនួនតិចតួច ប៉ុន្តែជាលទ្ធផលដែលទទួលបាននាពេលថ្មីៗនេះ ទាហានជួរមុខ គឺមានចំនួនច្រើនដែលស្ទើរតែជិតពាក់កណ្ដាលនៃចំនួនទាំងអស់ជាទាហានជួរមុខ ជាពិសេសនៅសាខាខេត្តព្រះវិហារ ឧត្តរមានជ័យ ភាគច្រើន គឺជាទាហានជួរមុខ។

ជុំវិញការលុបការប្រាក់ទាហានជួរមុខនេះដែរ លោក តូច ចៅចេក ក៏បានបង្ហើបឱ្យដឹងថា៖«ការសម្រេចលុបនូវការប្រាក់របស់ទាហានជួរមុខរយៈពេលពី ៣ ទៅ ៦ ខែ បានបង្កឱ្យមានផលប៉ះពាល់ដល់សមតុលឥណទានរបស់ធនាគារប្រៃសណីយ៍ ប្រហាក់ប្រហែលជា ២០ លានដុល្លារ នៃសមតុល្យឥណទានសរុប»។

«ដូច្នេះ ដូចដែលខ្ញុំបានលើកឡើងពីខាងដើមថា ការលុបចោលនេះ គឺធ្វើឱ្យប៉ះពាល់ទៅដល់ចំណូលរបស់ធនាគារពីការប្រាក់ដែលបានលុបចោល ស្ថិតនៅក្នុងចំនួនមួយច្រើនជិតខ្ទង់លានដុល្លារ។ ប៉ុន្តែ តួលេខនៃផលប៉ះពាល់នេះ និងមិនបង្កផលប៉ះពាល់ខ្លាំងដល់ធនាគារនោះទេ ព្រោះមិនមែនប៉ះពាល់តែក្នុងរយៈពេល ១ខែ គឺប៉ះពាល់ក្នុងរយៈពេល ៦ ខែ ហេតុដូចនេះ ប្រសិនបើចែកទៅតាមខែនីមួយៗ គឺជាចំនួនមួយដែលអាចលៃលក និងអាចចាត់ចែងបាន»។ លោក តូច ចៅចេក បន្ថែមបែបនេះ។

លោកថា ជារួមនៅក្នុងឆ្នាំនេះនឹងធ្វើឱ្យប៉ះពាល់ទៅដល់កំណើនសេដ្ឋកិច្ច គុណភាពឥណទាន ក៏ដូចជាកំណើនឥណទាន ។ ព្រោះ ធនាគារប្រៃសណីយ៍មានច្រើនសាខា ដែលស្ថិតតាមបណ្ដោយព្រំដែនកម្ពុជា-ថៃ គឺមានប្រមាណជាង ១០ សាខា ដូច្នេះហើយធ្វើឱ្យមានផលប៉ះពាល់ច្រើន។

លោកបានពន្យល់ដែរថា ចំពោះផលប៉ះពាល់នេះ គឺសម្រាប់ធនាគារប្រៃសណីយ៍មួយតែប៉ុណ្ណោះ ហើយធនាគារដទៃទៀតក៏ប៉ះពាល់ដូចគ្នាដែរ ហេតុដូចនេះហើយគុណភាពឥណទាននៅតាមព្រំដែន គឺច្បាស់ណាស់ថាមិនមានភាពល្អប្រសើរនោះទេ ហើយតមកទៀត គឺប៉ះពាល់ទៅដល់ចំណាយ ព្រោះធនាគារទាំងអស់ គឺបានលុបការប្រាក់របស់ទាហានជួរមុខរយៈពេលពី ៣ ខែ ទៅ ៦ ខែ។

បន្ថែមជាមួយគ្នានេះ ធនាគារ ក៏មិនអាចបញ្ចេញឥណទានតទៅមុខទៀតបានដូចគ្នាដែរ ដោយសារតែប្រជាពលរដ្ឋដែលរស់នៅតាមខេត្តជាប់ព្រំដែនរវាងប្រទេសទាំងពីរ កម្ពុជា-ថៃ នៅមិនទាន់មានឱកាសអាចរក ឬប្រកបរបរអាជីវកម្មបាននៅឡើយ ដូច្នេះ សម្រាប់ឆ្នាំនេះ បញ្ហាច្បាស់ណាស់ថានឹងប៉ះពាល់ បើទោះបីជាបញ្ហាអាចបញ្ចប់លឿន ឬក៏យូរជាងនេះក៏ដោយ។

ជាក់ស្តែង ប្រសិនបើបញ្ហាបញ្ចប់លឿន ផលប៉ះពាល់អាចនិងមានតិចតួច ប៉ុន្តែប្រសិនបើបញ្ហាបញ្ចប់យូរ នោះប៉ះពាល់នឹងមានកាន់តែខ្លាំង។

គួររំលឹកថា ឆ្លើយតបទៅនឹងការអំពាវនាវរបស់ប្រមុខរាជរដ្ឋាភិបាល និងធនាគារជាតិនៃកម្ពុជាក្នុងការជួយសម្រួលបន្ទុកដល់យោធិនពលី យោធិនជួរមុខ និងក្រុមគ្រួសារ ជនភាសសឹក និងពលករចំណាកស្រុកពីប្រទេសថៃ សំដៅធ្វើយ៉ាងណាកុំឱ្យពួកគាត់មានក្តីបារម្ភនៃបញ្ហាសំណងកម្ចី កាលពីថ្ងៃទី ៣០ ខែកក្កដា ឆ្នាំ ២០២៥ ធនគារជាតិនៃកម្ពុជាបានចេញវិធានការណែនាំឱ្យគ្រឹះស្ថានធនាគារ និងហិរញ្ញវត្ថុលុបចោលឥណទានរហូតដល់ចំនួន ១០ លានរៀល របស់អតិថិជនជាកងទ័ពពិការនៅសមរភូមិបច្ចុប្បន្ន និងលុបចោលឥណទានរហូតដល់ចំនួន ៨០ លានរៀល របស់អតិថិជន ឬអ្នករួមខ្ចី ជាយោធិនពលី។

ក្នុងនោះធនាគារជាតិសម្រេចឱ្យគ្រឹះស្ថានធនាគារ និងហិរញ្ញវត្ថុលើកលែងរាល់កម្រៃ និងការផាកពិន័យ ពាក់ព័ន្ធនឹងឥណទានរយៈពេល ៦ ខែ គិតចាប់ពីថ្ងៃនេះ រហូតដល់ថ្ងៃទី ៣១ ខែមករា ឆ្នាំ ២០២៦ ដល់អតិថិជនជាយោធិន ដែលធ្វើប្រតិបត្តិការផ្ទាល់ក្នុងសមរភូមិប្រយុទ្ធ។

លើកលែងការទូទាត់សងប្រាក់ និងពន្យាពេលទូទាត់សងប្រាក់ដើម រយៈពេល ៦ ខែ គិតចាប់ពីថ្ងៃនេះ រហូតដល់ថ្ងៃទី ៣១ ខែមករា ឆ្នាំ ២០២៦ ដល់អតិថិជនជាយោធិនដែលធ្វើប្រតិបត្តិការដោយផ្ទាល់ក្នុងសមរភូមិប្រយុទ្ធ។ ចំពោះការអនុគ្រោះនេះ គ្រឹះស្ថានធនាគារ និងហិរញ្ញវត្ថុមិនត្រូវធ្វើមូលធនកម្មការប្រាក់លើប្រាក់ដើមនោះទេ៕

ដោយ៖ ឌិន ថារី

The post វិស័យធនាគារនឹងរងផលប៉ះពាល់នូវឥណទានប្រមាណ ២០ លានដុល្លារជុំវិញបញ្ហាជម្លោះព្រំដែនកម្ពុជា-ថៃ appeared first on Kampuchea Thmey Daily.

លោក តូច ចៅចេក៖ ទោះបីការលុបចោលឥណទានប៉ះពាល់ខ្លះដល់ចំណូលរបស់គ្រឹះស្ថានធនាគារនិងហិរញ្ញវត្ថុ ក៏មិនបង្កហានិភ័យខ្ពស់ដែរ

Din Thary — Fri, 08 Aug 2025 07:15:18 +0000

លោក តូច ចៅចេក ជាសមាជិកក្រុមប្រឹក្សាភិបាលនៃសមាគមធនាគារនៅកម្ពុជា (ABC) និងជាប្រធាននាយកប្រតិបត្តិធនាគារ ប្រៃសណីយ៍កម្ពុជា បានមានប្រសាសន៍ថា ទោះបីជាការប្រកាសលុបចោលឥណទានចំពោះគ្រួសារយោធិនពលី ពិការ និងរបួស ប៉ះពាល់ដល់បញ្ហាចំណូលរបស់ធនាគារក្នុងទំហំទឹកប្រាក់ខ្ទង់លានដុល្លារក៏ពិតមែន ប៉ុន្តែវាមិនបង្ករឱ្យមានការដួលរលំនៃវិស័យនេះឡើយ។

ឆ្លើយតបទៅនិងការអំពាវនាវរបស់រាជរដ្ឋាភិបាលកម្ពុជាពាក់ព័ន្ធទៅនិងការលុបចោលនូវឥណទានមួយចំនួនទាក់ទងគ្រួសារយោធិនពលី យោធិនពិការ ក៏ដូចជាយោធិនត្រូវរបួស លោក តូច ចៅចេក បានមានប្រសាសន៍ថា ចំពោះធនាគារដែលបានប្រកាសលុបចោលឥណទាននេះបានធ្វើឱ្យប៉ះពាល់ទៅដល់ សម្ពាធឥណទាន (Portfolio) តែមិនច្រើនណាស់ណានោះទេ ព្រោះយោធិនដែលពលី ពិការ និងរបួស ក៏មានមិនច្រើនដែរ។

លោកថា ដូច្នេះបញ្ហានេះធនាគារក៏ប៉ះពាល់ដែរ គឺនៅពេលដែលធនាគារបានលុបចោលការប្រាក់ចំនួន ៣ ខែ សម្រាប់ប្រជាពលរដ្ឋកម្ពុជាដែលភៀសសឹក និងលុបចោលនូវការប្រាក់ចំនួន ៦ ខែ សម្រាប់កងកម្លាំងជួរមុខ គឺបានធ្វើឱ្យប៉ះពាល់ចំណូលរបស់ធនាគារ តែមិនមែនធ្វើឱ្យប៉ះពាល់ដល់សមតុលឥណទាន (Outstanding) នោះទេ។

«ហេតុដូច្នេះហើយ បញ្ហានេះបានធ្វើឱ្យធនាគារមួយចំនួនរងផលប៉ះពាល់ ហើយធនាគារប្រៃសណីយ៍កម្ពុជាក៏រងផលប៉ះពាល់ដូចគ្នាដែរ បើគិតជាទំហំទឹកប្រាក់ខ្ទង់លានដុល្លារ តែមិនមែនប៉ះពាល់ដល់សមតុលឥណទាននោះទេ»។ លោក តូច ចៅចេក បន្ថែមនេះ។

លោក តូច ចៅចេក បានបន្តថា ជារួមតាមសញ្ញានៃការប៉ះពាល់លើឥណទានមិនដំណើការ ឬ Nonperforming Loan (NPL) របស់ធនាគារមានការកើនឡើងជាងមុន។ ប៉ុន្តែសម្រាប់ជនភៀសសឹក និងសម្រាប់ទាហានជួរមុខតែម្តង គឺមិនមានផលប៉ះពាល់នោះទេ ដោយសារខាងធនាគារបានលុបចោលការប្រាក់របស់ពួកគាត់ចោលចំនួន ៣ ខែ ហើយរយៈពេល ៣ ខែទៀត គាត់មិនមានចេញយឺតយ៉ាវនោះទេ ហើយចំពោះទាហានជួរមុខពីពេលនេះទៅ ៦ ខែទៀត ក៏មិនមានភាពយឺតយ៉ាវដូចគ្នាដែរ។

ទន្ទឹមនេះ លោក ក៏បានបន្ថែមដែរថា៖«ចំពោះបញ្ហានេះសម្រាប់ប្រជាជនទូទៅ គឺអាចមានផលប៉ះពាល់នានាទៅលើមុខជំនួញរបស់ពួកគាត់ ដោយយើងអាចសង្ឃឹមថា ប្រសិនបើស្ថានភាពបានល្អប្រសើរឡើងវិញ ដូច្នេះគុណភាពឥណទានក៏នឹងល្អប្រសើរដូចគ្នាដែរ ក៏ប៉ុន្តែ ប្រសិនបើស្ថានភាពនេះកាន់តែអាក្រក់ទៅ គុណភាពឥណទានក៏មានការប្រែប្រួលទៅតាមនេះដូចគ្នាដែរ»។

សូមជម្រាបថា ឆ្លើយតបទៅនឹងការអំពាវនាវរបស់ប្រមុខរាជរដ្ឋាភិបាល និងធនាគារជាតិនៃកម្ពុជាក្នុងការជួយសម្រួលបន្ទុកដល់យោធិនពលី យោធិនជួរមុខ និងក្រុមគ្រួសារ ជនភាសសឹក និងពលករចំណាកស្រុកពីប្រទេសថៃ សំដៅធ្វើយ៉ាងណាកុំឱ្យពួកគាត់មានក្តីបារម្ភនៃបញ្ហាសំណងកម្ចី គិតត្រឹមរសៀលថ្ងៃទី៣០ ខែកក្កដា នេះ មានគ្រឹះស្ថានធនាគារ និងហិរញ្ញវត្ថុក្នុងស្រុកសរុប ប្រមាណ ២៧ ស្ថាប័ន បានសម្រេចលុបចោលនូវបំណុលទាំងអស់របស់យោធិន។

ក្នុងនោះ ធនាគារជាតិនៃកម្ពុជា នៅថ្ងៃទី ៣០ ខែកក្កដា ឆ្នាំ ២០២៥ បានចេញវិធានការណែនាំឱ្យគ្រឹះស្ថានធនាគារ និងហិរញ្ញវត្ថុលុបចោលឥណទានរហូតដល់ចំនួន ១០ លានរៀល របស់អតិថិជនជាកងទ័ពពិការនៅសមរភូមិបច្ចុប្បន្ន និងលុបចោលឥណទានរហូតដល់ចំនួន ៨០ លានរៀល របស់អតិថិជន ឬអ្នករួមខ្ចី ជាយោធិនពលី។

ដោយ៖ ឌិន ថារី

The post លោក តូច ចៅចេក៖ ទោះបីការលុបចោលឥណទានប៉ះពាល់ខ្លះដល់ចំណូលរបស់គ្រឹះស្ថានធនាគារនិងហិរញ្ញវត្ថុ ក៏មិនបង្កហានិភ័យខ្ពស់ដែរ appeared first on Kampuchea Thmey Daily.

អ្នកជំនាញ៖ បិទព្រំដែន បើប៉ះពាល់សេដ្ឋកិច្ចហើយ វិស័យធនាគារក៏ប៉ះពាល់ដែរ

Din Thary — Thu, 03 Jul 2025 01:32:00 +0000

ប្រធាននាយកប្រតិបត្តិធនាគារ ប្រៃសណីយ៍កម្ពុជា លោក តូច ចៅចេក បានអះអាងថា ពាក់ព័ន្ធទៅនិងបញ្ហាបិទព្រំដែនទាំងអស់រវាងកម្ពុជា-ថៃ ច្បាស់ណាស់ថានិងប៉ះពាល់ដល់សេដ្ឋកិច្ចប្រទេសទាំងពីរ ដូច្នេះកាលណាប៉ះពាល់ដល់កំណើនសេដ្ឋកិច្ចហើយ វិស័យធនាគារក៏មានផលប៉ះពាល់ដូចគ្នាដែរ។

ថ្លែងនៅក្នុងបទសម្ភាសជាមួយ «កម្ពុជាថ្មី» លោក តូច ចៅចេក បានមានប្រសាសន៍ថា សេដ្ឋកិច្ចរវាងប្រទេសទាំងពីរកម្ពុជា-ថៃ ទាំងការដោះដូរទំនិញផ្សេងៗ គឺសេដ្ឋកិច្ចមានទំហំធំជាមួយគ្នា ដូច្នេះកាលណាបិទព្រំដែនដែលធ្លាប់តែរកស៊ី និងដោះដូរទំនិញទៅមកជាមួយគ្នាជាយូរមកហើយនោះ ច្បាស់ណាស់ថានិងប៉ះពាល់ដល់សេដ្ឋកិច្ចប្រទេសទាំងពីរ។

«ជាក់ស្តែង កាលណាប៉ះពាល់ដល់កំណើនសេដ្ឋកិច្ចហើយ ធនាគារក៏ជាផ្នែកមួយនៃសេដ្ឋកិច្ចដែរ ដូច្នេះបើប៉ះពាល់សេដ្ឋកិច្ច ធនាគារក៏ប៉ះពាល់ដូចគ្នាដែរ ហើយបើប៉ះពាល់ដល់ធនាគារ ក៏ដូចជាប៉ះពាល់ដល់ធនាគារប្រៃសណីយ៍ដែរ»។ លោក តូច ចៅចេក គូសបញ្ជាក់យ៉ាងដូច្នេះ។

ជុំវិញបញ្ហានេះ ប្រធាននាយកប្រតិបត្តិធនាគារ ប្រៃសណីយ៍កម្ពុជា រូបនេះ បានពន្យល់ថា «ទោះបីជាយ៉ាងណាក៏ដោយធនាគារប្រៃសណីយ៍ នៅក្នុងវិស័យធនាគារ កាលដើមឡើយនៅពេលស្រុកគេមានស្ថានភាពល្អជាធម្មតា គេអាចដាក់ដើមទុន ១០០ដុល្លារ នោះគេអាចរកចំណេញបានប្រហែលជា ៨ដុល្លារ ឬក៏ ៦ដុល្លារ។ ប៉ុន្តែនៅកម្ពុជាយើងវិញ នៅពេលស្រុកយើងមិនសូវមានស្ថានភាពសេដ្ឋកិច្ចល្អ យើងអាចចំណេញបាន ៥-៦ ដុល្លារ ប៉ុន្តែនៅពេលជួបបញ្ហា យើងក៏នៅចំណេញដូចគ្នាដែរ តែអាចចុះមកនៅត្រឹម ៣-៤ ដុល្លារ ប៉ុន្តែនៅក្នុងការរកស៊ីយើងត្រូវតែទទួលថាពេលខ្លះក៏អាចទទួលបានកាក់កប ឬពេលខ្លះខាតបង់ជាដើម»។

លោកថា «ទោះស្ថានភាពសេដ្ឋកិច្ចមិនសូវល្អ យើងនៅតែអាចទទួលបានចំណេញ មានន័យថាយើងនៅរក្សាគ្រប់គ្រងលទ្ធភាពចំណេញដែរ ប៉ុន្តែគ្រាន់តែមានការថយចុះ ពី ៨ ដុល្លារ មក ៦ ដុល្លារ ឬចុះមកដល់ ៤ ដុល្លារ ជាដើម»។

ទន្ទឹមនេះ លោក តូច ចៅចេក ក៏បានឱ្យដឹងបន្ថែមថា ធនាគារប្រៃសណីយ៍ទាំងអស់មាន ៦៤ សាខា ទូទាំងប្រទេស ក្នុងនោះសម្រាប់ខេត្តទាំង ៧ នៅជាប់ព្រំដែនកម្ពុជា-ថៃ មាន ១៦ សាខា ប៉ុន្តែនៅក្នុង ១៦ សាខានេះ មានសាខានាគារប្រៃសណីយ៍ចំនួន ៨ សាខាតែប៉ុណ្ណោះដែលស្ថិតនៅជាប់ផ្ទាល់ព្រំដែន ដូចជា សាខាប៉ោយប៉ែត ប៉ៃលិន សំពៅលូន ជាដើម៕

ដោយ៖ ឌិន ថារី

The post អ្នកជំនាញ៖ បិទព្រំដែន បើប៉ះពាល់សេដ្ឋកិច្ចហើយ វិស័យធនាគារក៏ប៉ះពាល់ដែរ appeared first on Kampuchea Thmey Daily.

កម្ពុជា នៅមានតម្រូវការពលកម្មច្រើន ទាំងវិស័យវាយនភណ្ឌ កសិកម្ម និងសំណង់

Din Thary — Wed, 02 Jul 2025 05:20:00 +0000

ពាក់ព័ន្ធទៅនិងស្ថានភាពនាពេលបច្ចុប្បន្ននេះ តម្រូវការពលកម្មនៅក្នុងប្រទេសនៅមានតម្រូវការច្រើនទាំងវិស័យវាយនភណ្ឌ វិស័យកសិកម្ម និងវិស័យសំណង់ ដូច្នេះពលករចំណាកស្រុកនៅថៃទាំងអស់ អាចវិលត្រឡប់មកធ្វើការនៅស្រុកខ្មែរវិញបាន។ នេះគឺជាការលើកឡើងរបស់លោក តូច ចៅចេក ប្រធាននាយកប្រតិបត្តិធនាគារ ប្រៃសណីយ៍កម្ពុជា នៅក្នុងបទសម្ភាសសេដ្ឋកិច្ចជាមួយ«កម្ពុជាថ្មី»។

ពាក់ព័ន្ធទៅនិងបញ្ហាព្រំដែនរវាងកម្ពុជា-ថៃ ដែលឈានទៅដល់ការបិទច្រកព្រំដែនទាំងអស់រវាងប្រទេសទាំងពីរ និងការវិលត្រឡប់មកវិញពីពលករចំណាកស្រុកពីថៃ លោក តូច ចៅចេក បានមានប្រសាសន៍ថា ពលករដែលចំណាកស្រុកទៅធ្វើការនៅប្រទេសថៃ មិនមែនទៅដល់ធ្វើការនៅការិយាល័យទេ ប៉ុន្តែធ្វើការជាពលករ ដូច្នេះកម្លាំងពលកម្មនៅពេលត្រឡប់មកស្រុកខ្មែរវិញប្រហែលជាមានកន្លែងជាច្រើនដែលត្រូវការ។

លោកបានគូសបញ្ជាក់ថា «ប្រសិនបើគ្មានពន្ធបដិការជាមួយសហរដ្ឋអាមេរិកទេ ពន្ធនៅធម្មតា ចំនួនរោងចក្រនៅកម្ពុជាកាន់តែមានច្រើន ហើយពលករត្រឡប់មកពីថៃទាំងអស់នោះវិញ ប្រហែលជាមិនគ្រប់គ្រាន់សម្រាប់តម្រូវការរោងចក្រនៅក្នុងស្រុកខ្មែរផង»។

លោក តូច ចៅចេក បានបន្ថែមថា ពលករដែលចំណាកស្រុកទៅធ្វើការនៅប្រទេសទាំងអស់នោះ គឺអាចត្រឡប់មកស្រុកខ្មែរវិញបាន ព្រោះតម្លៃកម្លាំងពលកម្មក៏មិនខុសពីស្រុកថៃប៉ុន្មានដែរ ដោយលោកសង្កេតឃើញថា កម្មកររោងចក្រអាចទទួលបានប្រាក់កម្រៃជាមធ្យមចន្លោះពី ៣០០ដុល្លារ ទៅជាង ៣០០ ដុល្លារ ឬអាចលើសនេះទៅតាមស្ថានភាពការងារជាក់ស្ដែង ដែលនេះក៏ជាចំណែកមួយសមរម្យ ដូច្នេះប្រសិនបើពួកគេត្រឡប់មកពីថៃវិញ គាត់អាចមានឱកាសអាចធ្វើការបានជាពិសេសនៅតាមរោងចក្រវាយនភណ្ឌ និងវិស័យមួយចំនួនទៀតនៅកម្ពុជា។

ក្រៅពីវិស័យវាយនភណ្ឌ លោក តូច ចៅចេក បានបន្តថា ក៏នៅមានក្រុមហ៊ុនមួយចំនួនទៀតដែលទាក់ទងកសិកម្ម ព្រោះវិស័យកសិកម្មនៅកម្ពុជា ក៏ជាវិស័យមួយដែលធំល្មម និងមានតម្រូវការកម្លាំងពលកម្មច្រើនដូចគ្នាដែរ។

បន្ថែមពីនេះ ក៏នៅមានវិស័យសំណង់ ដែលមានតម្រូវការខាងពលកម្មខ្ពស់ ព្រោះវិស័យសំណង់នៅកម្ពុជា ប្រសិនបើតទៅមុខទៀតវិស័យអចលនទ្រព្យនៅកម្ពុជាមានការរីកចម្រើនដូចដើមវិញ នោះវិស័យមួយនេះក៏ទាមទារឱ្យមានតម្រូវការពលកម្មច្រើនដូចគ្នាដែរ។

បើតាមលោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានគូសបញ្ជាក់ថា គិតពីដំណាច់ឆ្នាំ២០២៤ ដល់ត្រឹមខែមេសា ឆ្នាំ២០២៥ នេះ សហគ្រាស គ្រឹះស្ថាន បានកើនពីចំនួនជាង ៤៤ពាន់ (៤៤ ៧៩៨) ដល់ចំនួនជាង ៤៥ ពាន់(៤៥ ៣៨៦) សហគ្រាស ហើយកម្មករនិយោជិតបានកើន ពីប្រមាណ ១,៨២លាននាក់ ដល់ប្រមាណ១,៨៧លាននាក់ ដែលអាចផ្តល់ប្រាក់ឈ្នួលដល់កម្មករនិយោជិកជាមធ្យមសរុបប្រចាំឆ្នាំប្រមាណ ៦ ពាន់លានដុល្លារអាម៉េរិក។ ក្នុងនោះ វិស័យកាត់ដេរមានសហគ្រាស គ្រឹះស្ថានសរុបចំនួន ១ ៦៥៧ សហគ្រាស មានកម្មករនិយោជិកប្រមាណ ៩៧ ម៉ឺននាក់ ទទួលបានប្រាក់ឈ្នួលមធ្យមសរុបប្រចាំឆ្នាំប្រមាណ ៣,១ពាន់ លានដុល្លារ៕

ដោយ៖ ឌិន ថារី

The post កម្ពុជា នៅមានតម្រូវការពលកម្មច្រើន ទាំងវិស័យវាយនភណ្ឌ កសិកម្ម និងសំណង់ appeared first on Kampuchea Thmey Daily.

សមាគមធនាគារ និង មីក្រូហិរញ្ញ៖ រហូតមកទាល់បច្ចុប្បន្នពុំទាន់មានពលករចំណាកស្រុកពីថៃដាក់ពាក្យស្នើសុំរៀបចំឥណទានឡើងវិញនៅឡើយទេ

May Kunmakara — Wed, 02 Jul 2025 01:34:21 +0000

សមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុកម្ពុជា (CMA) កំពុងបានការតាមដាននូវការការត្រឡប់មកវិញនៃពលករចំណាកស្រុកពីថៃ ខណៈពុំទាន់ទទួលបានរបាយការណ៍នៃការដាក់ពាក្យស្នើសុំរៀបចំឥណទានពីក្រុមគ្រួសារដែលរងផលប៉ះពាល់នៅឡើយទេ។

កាលពីចុងខែឧសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពានាវដល់សមាគមធនាគារនៅកម្ពុជា (ABC) និងសមាគមមីក្រូហិរញ្ញ វត្ថុកម្ពុជា (CMA) ពិនិត្យលទ្ធភាពក្នុងការ ជួយសម្រាលបន្ទុកហិរញ្ញវត្ថុសម្រាប់បងប្អូនប្រជាពលករដែលត្រលប់មកពីប្រទេសថៃវិញ ចំពោះអ្នក ដែលមានជាប់ជំពាក់កម្ចីជាមួយធនាគារ ឬគ្រឹះស្ថានមីក្រូហិរញ្ញវត្ថុ ទៅតាមលទ្ធភាព ឬ ក្នុងមួយរយៈ ពេលកំណត់ណាមួយដែលអាចធ្វើទៅបាន។

នៅក្នុងបទសម្ភាសជាមួយ«កម្ពុជាថ្មី» លោក តូច ចៅចេក បានមានប្រសាសន៍ថា ពាក់ព័ន្ធទៅនិងការវិលត្រឡប់មកវិញរបស់ពលករចំណាកស្រុកពីថៃ ឃើញថា ក្នុងមួយថ្ងៃអាចមានក្នុងរង្វង់ពី ៨០០-១០០០ នាក់ ក្នុងនោះពលករមួយចំនួនក៏មានសំណាងដែរ ដោយត្រឡប់មកវិញភ្លាម មានការងារធ្វើភ្លាម និងមួយចំនួនទៀត ក៏មិនទាន់អាចជួបការលំបាកអ្វីដែរ ដោយសារពួកគេអាចសល់នូវថវិកាមួយចំនួនដើម្បីផ្គត់ផ្គង់ជីវភាពគ្រួសារ។

លោកបានសង្កត់ធ្ងន់ថា៖«រហូតមកដល់ពេលបច្ចុប្បន្ននេះយើងនៅមិនទាន់មានចំណុចណាដែលគួរឱ្យចាប់អារម្មណ៍ថា ពលករដែលត្រឡប់មកពីថៃវិញពិបាកសង ឬក៏មកសុំកម្មវិធីជំនួយពីធនាគារ គឺនៅមិនទាន់មាននៅឡើយទេ។ ប៉ុន្តែធនាគារក៏មានយន្តការរួចជាស្រេច ដូច្នេះប្រសិនបើមានពលរដ្ឋស្នើសុំយន្តការណាមួយពីធនាគារ នោះយើងនឹងចុះទៅវិភាគ និងពិនិត្យជាក់ស្តែង ប្រសិនបើពួកគេពិតជាពលករដែលទើបត្រឡប់មកពីថៃវិញមែន និងជួបការលំបាកពិតមែន នោះធនាគារនឹងមានយន្តការនៅការបន្ធូរបន្ថយណាមួយ»។

លោកថា «ជារួមកម្មករដែលទៅធ្វើការចំណាកស្រុកនៅប្រទេសថៃនោះ ភាគច្រើនជាកម្មករពេញកម្លាំង ដូច្នេះអ្នកដែលខ្ចីឥណទានភាគច្រើនគឺជាសាច់ញាតិរបស់គាត់នៅស្រុកខ្មែរ ចឹងគាត់ក៏មិនមែនមានចំណូលតែពីក្រៅស្រុកមួយដែរ គាត់ក៏មានចំណូលក្នុងស្រុកដែរ គិតមកដល់ពេលនេះ រយៈពេល ១ ខែ នេះ យើងគិតថា ឱ្យមានផលវិបាកណាស់ណានៅមិនទាន់មានគួរឱ្យកត់សម្គាល់នោះទេ»។

ទន្ទឹមនេះ លោក តូច ចៅចេក ក៏បានបន្ថែមដែរ ឆ្លើយតបទៅនិងសំណើរបស់រាជរដ្ឋាភិបាលកម្ពុជា ក្នុងការជួយសម្រួលដល់ពលករចំណាកស្រុកពីថៃ នេះដែរ សមាគមធនាគារនៅកម្ពុជា ក៏ដូចជាសមាគមមីក្រូហិរញ្ញវត្ថុក៏បានគាំទ្រដល់សំណើនេះ ហើយក៏មានយន្តការមួយចំនួនដើម្បីជួយសម្រួលដល់ពលករចំណាកស្រុកចូលមកកម្ពុជាវិញ។

យោងតាមលោក កាំង តុងងី អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុកម្ពុជាថ្លែងមកកាន់កម្ពុជាថ្មីនៅថ្ងៃទី១ ខែកក្កដាមកថា រហូតមកទាល់ពេលនេះពុំទាន់មានរបាយការណ៍ជាក់ស្តែងនៃពលករដែលបានដាក់ពាក្យសុំការជួយសម្រួលបន្ទុកនៃការបង់ប្រាក់តាមរយៈយន្តការរៀបចំឥណទានឡើងវិញឡើយ។ លោកថា រាល់សមាជិកសមាគមស្វាគមន៍ចំពោះពលករដែលបានដាក់ពាក្យស្នើសុំ។

លោកបានថ្លែងបញ្ចាក់ថា៖«គិតត្រឹមខែឧសភាឆ្នាំ២០២៥ វិស័យមីក្រូហិរញ្ញវត្ថុបានរៀបចំឥណទានឡើងវិញជូនអតិថិជនរហូតដល់១៦ម៉ឺននាក់ឬ១០ ភាគរយនៃអតិថិជនសរុបក្នុងវិស័យ ដែលគិតជាទំហំឥណទានសរុបចំនួនជាង៦៣០លានដុល្លារ ឬ ជាង១០ភាគរយនៃទំហំឥណទានសរុបជាង៥ពាន់លានដុល្លារ»។

សមាគមទាំងពីរ នឹងបន្តសហការជាមួយធនាគារជាតិនៃកម្ពុជា និងភាគីពាក់ព័ន្ធ ដើម្បីធានាថា គ្រឹះស្ថានហិរញ្ញវត្ថុនៅតែចូលរួមយ៉ាងពេញលេញនិងទូលំទូលាយក្នុងការគាំទ្រដល់ការអភិវឌ្ឍសង្គម-សេដ្ឋកិច្ចជាតិ និងលើកស្ទួយជីវភាពរបស់ប្រជាជន ទៅតាមលទ្ធភាពជាក់ស្តែង និងការដឹកនាំចង្អុល បង្ហាញរបស់ធនាគារជាតិ នៃកម្ពុជា និងរាជរដ្ឋាភិបាល»។ នេះបើយោងតាមសេចក្តីថ្លែងការណ៍នេះ។

យោងតាមរបាយការណ៍របស់ក្រសួងការងារ និងបណ្ដុះបណ្ដាលវិជ្ជាជីវៈ បច្ចុប្បន្នមានពលករកម្ពុជា ប្រមាណ១លាន៣សែន៨ម៉ឺននាក់ កំពុងបម្រើការងារនៅតាមប្រទេសនានា ចំនួន៧ ដោយពួកគេបានផ្ញើថវិកាមកសាច់ញាតិនៅកម្ពុជា ជាមធ្យមប្រមាណជិត៣ពាន់លានដុល្លារក្នុង១ឆ្នាំ។ ក្នុងនោះ ថៃ បានក្លាយជាប្រទេសដែលស្រូបទាញកម្លាំងពលកម្មពីកម្ពុជា ច្រើនជាងគេ ដែលបច្ចុប្បន្នមានរហូតដល់ជាង១លាន២សែននាក់ និងបានផ្ញើថវិកាត្រឡប់មកប្រទេសកម្ពុជាវិញ ជាមធ្យមប្រមាណា២ពាន់១រយលានដុល្លារក្នុង១ឆ្នាំ៕

The post សមាគមធនាគារ និង មីក្រូហិរញ្ញ៖ រហូតមកទាល់បច្ចុប្បន្នពុំទាន់មានពលករចំណាកស្រុកពីថៃដាក់ពាក្យស្នើសុំរៀបចំឥណទានឡើងវិញនៅឡើយទេ appeared first on Kampuchea Thmey Daily.

លោក តូច ចៅចេក៖ មិនទាន់មានពលរដ្ឋចំណាកស្រុកពីថៃ មកស្នើសុំយន្តការជំនួយពីធនាគារនៅឡើយទេ

Din Thary — Tue, 01 Jul 2025 07:30:00 +0000

ឆ្លើយតបទៅនិងសំណើរបស់រាជរដ្ឋាភិបាលកម្ពុជា ក្នុងការជួយសម្រួលដល់ពលករចំណាកស្រុកពីថៃ លោក តូច ចៅចេក អគ្គនាយកធនាគារប្រៃសណីយ៍កម្ពុជា បានលើកឡើងថា មកដល់ពេលបច្ចុប្បន្ននេះ គឺនៅមិនទាន់មានពលរដ្ឋចំណាកស្រុកពីថៃ មកស្នើសុំយន្តការជំនួយពីធនាគារនៅឡើយទេ។

ក្នុងនោះសមាគមធនាគារនៅកម្ពុជា ក៏ដូចជាសមាគមមីក្រូហិរញ្ញវត្ថុ ក៏បានអនុវត្តនូវវិធានការមានស្រាប់ ដែលធនាគារជាតិនៃកម្ពុជាណែនាំ និងចង្អុលបង្ហាញឱ្យធនាគារទាំងអស់ធ្វើតាម ដូចជា ការពន្យាពេលសងប្រាក់, ការឱ្យសងតែការប្រាក់ទុកប្រាក់ដើម ឬការបន្ធូរបន្ថយលក្ខខណ្ឌមួយចំនួន ឬក៏រឿងមួយចំនួនទៀតក៏អាចបញ្ចុះការប្រាក់ដល់អតិថិជន។

លោក បានអះអាងថា៖« ទាំងអស់នេះហើយដែរធនាគារប្រៃសណីយ៍ ក៏ដូចជាធនាគារដទៃទៀត ដែលកំពុងរៀបចំដើម្បីជួយសម្រួលបន្ទុក និងផលវិបាកមួយចំនួនដល់ពលករដែលទើបត្រឡប់មកពីប្រទេសថៃវិញ»៕

ដោយ៖ ឌិន ថារី

The post លោក តូច ចៅចេក៖ មិនទាន់មានពលរដ្ឋចំណាកស្រុកពីថៃ មកស្នើសុំយន្តការជំនួយពីធនាគារនៅឡើយទេ appeared first on Kampuchea Thmey Daily.

ឥណទានក្នុងវិស័យធនាគារនៅកម្ពុជា ២០២៥ អាចនឹងមានកំណើនតិចតួច

Din Thary — Fri, 06 Jun 2025 07:10:00 +0000

លោក តូច ចៅចេក សមាជិកក្រុមប្រឹក្សាភិបាលនៃសមាគមធនាគារនៅកម្ពុជា បានព្យាករណ៍ថា នៅក្នុងឆ្នាំ២០២៥នេះ ការរីកចម្រើនឥណទាននៅកម្ពុជាអាចនឹងមានភាពល្អប្រសើរតិចតួច ឬក៏ប្រហាក់ប្រហែលនៅក្នុងឆ្នាំ២០២៤ ដែរ។ ការព្យករណ៍របស់លោក ដោយផ្អែកទៅលើអត្រាកំណើនទាបនៅក្នុងត្រីមាសទី១ឆ្នាំនេះ ដោយសារតែស្ថានភាពសេដ្ឋកិច្ចហាក់ពុំទាន់មានសភាពល្អប្រសើរខ្លាំង។

ប្រាប់ «កម្ពុជាថ្មី» នៅថ្ងៃទី០៦ ខែឧសភា នេះ លោក តូច ចៅចេក ក៏ជាប្រធាននាយកប្រតិបត្តិធនាគារប្រៃសណីយ៍កម្ពុជា បានមានប្រសាសន៍ថា តាមការបានមានប្រសាសន៍ថា ជារួមការរីកចម្រើនឥណទានកាលពីដើមឆ្នាំយើងព្យាករណ៍ថាអាចនឹងមានភាពល្អប្រសើរ ហើយរីកចម្រើនដល់រង្វង់ប្រមាណ ១០% ។ ប៉ុន្តែតាមត្រីមាសទី១ និងឈានមកដល់ត្រីមាសទី២ នេះ ការរីកចម្រើនប្រហែលជាមិនអាចដូចការព្យាករណ៍ទុកនោះទេ គឺវាអាចមានការរីកចម្រើនប្រហាក់ប្រហែលទៅនិងឆ្នាំ២០២៤ ដែរ ឬក៏អាចមានភាពល្អប្រសើរជាងឆ្នាំ២០២៤ តិចតួច។

លោកថា ការព្យាករណ៍ដែលថាឥណទាននៅក្នុងប្រទេសកម្ពុជាអាចមានការកើនឡើងតិចតួច ឬក៏ប្រហាក់ប្រហែលទៅនិងឆ្នាំមុននេះ ទី១ គឺដោយសារតែសេដ្ឋកិច្ចសកលគឺហាក់បីដូចជានៅមិនទាន់មានភាពល្អប្រសើរឡើងនៅឡើយ មួយទៀតពាក់ព័ន្ធនិងបញ្ហាពន្ធបដិការរបស់សហរដ្ឋអាមេរិកដែលដាក់មកលើកម្ពុជាធ្វើឱ្យមានការព្រួយបារម្ភមួយចំនួនដល់ការរកស៊ី។

លោកថា បញ្ហាមួយទៀតនោះ គឺការរីកចម្រើនផ្នែកឥណទាននៅកម្ពុជាផ្នែកដែលរីកចម្រើនគឺ ទាក់ទងពាណិជ្ជកម្មលក់ រាយតូចៗ(small retail trade) ឬក៏សហគ្រាសធនតូច និងមធ្យម (SME) មានន័យថានៅពេលដែលពួកគេរកស៊ីគឺត្រូវការឥណទានបន្តដែលធ្វើឱ្យការរកស៊ីរបស់ពួកគេអាចទទួលបានការរីកចម្រើនបានខ្លះ ជារួមនៅចុងឆ្នាំ២០២៥ នេះចំនួននៃការរីកចម្រើននៅកម្ពុជាអាចថានឹងមានភាពប្រសើរឡើង ឬក៏ប្រហាក់ប្រហែលទៅនិងក្នុងឆ្នាំ២០២៤។

មួយចំណែកទៀតទាក់ទងទៅនិងគុណភាពឥណទាន ឬច្រើនតែគេស្គាល់ថា non-performing loan (NPL) ដោយថ្មីៗនេះ NPL គឺនៅតែបន្តមិនបានថមថយនោះទេ ប៉ុន្តែវាមានភាពកើនឡើងតែកើនឡើងក្នុងរង្វង់តិចតួច ប៉ុណ្ណោះ។

លោក តូច ចៅចេក បានពន្យល់ថា «ការកើនឡើងតិចតួចនេះវាបង្កឡើយមានបញ្ហាមួយចំនួន កាលពីមុនយើងថាវាបណ្ដាលមកពីមុខរបរ តែជាក់ស្ដែង គឺដោយសារមានអ្នកខ្លះមានចេតនាដែរ ដោយឃើញអ្នកផ្សេងមិនសង ឬសងយ៉ើតមកកាន់ធនគារ ពួកគេក៏ផ្ដេកផ្ដួលទៅតាមគេដែរ តែនេះជាច្បាប់ធនាគារប្រសិនបើអ្នកណាមានលទ្ធភាពសង ឬមានចេតនាមិនព្រមសង ដូច្នេះធនាគារត្រូវតែទាមទារឱ្យពួកគេអនុវត្តតាមកិច្ចសន្យាមកវិញ»។

លោកក៏បានបន្ថែមថា ជាទូទៅគុណភាពឥណទាន NPL អាចថាមិនទាន់មានភាពល្អប្រសើរទេនៅក្នុងឆ្នាំ២០២៥ នេះ វាអាចនិងប្រហាក់ប្រហែល ឬក៏អាក្រក់ជាងឆ្នាំ២០២៤ តិចតួច។

ក្រុមហ៊ុនក្រេឌីត ប្យួរ៉ូ ខេមបូឌា (CBC) បានចេញផ្សាយនៅក្នុងរបាយការណ៍នៅថ្ងៃទី ០៧ ខែឧសភាថា នៅក្នុងត្រីមាសទី១ ឆ្នាំ ២០២៥ សន្ទស្សន៍ឥណទានលក្ខណៈបុគ្គលបានកើនឡើង ដែលមានទំហំទឹកប្រាក់ឥណទានសរុបជាង ២,១២ លានដុល្លារ ស្មើរនឹង ២,២៤ ភាគរយ។

យោងតាមរបាយការណ៍បង្ហាញថា ពាក្យស្នើសុំឥណទានលក្ខណៈបុគ្គល តំណាងឱ្យចេតនារបស់អ្នកប្រើប្រាស់ក្នុងការទទួលបានឥណទានក្នុងទម្រង់ជាឥណទានប្រើប្រាស់ផ្ទាល់ខ្លួន ប័ណ្ណឥណទាន ឬកម្ចីអចលនទ្រព្យ មានការកើឡើង ៦% នៃចំនួនពាក្យស្នើសុំ។

ដំណើរការឥណទានលក្ខណៈបុគ្គល ដែលឆ្លុះបញ្ចាំងពីបរិមាណឥណទានលក្ខណៈបុគ្គលគិតត្រឹមត្រីមាសទី១ ឆ្នាំ២០២៥ បានបង្ហាញពីទីផ្សារឥណទានមានការកើនឡើង ២,២៤ ភាគរយ បើធៀបនឹងត្រីមាសទី ៤ ឆ្នាំ ២០២៤។

ក្រុមហ៊ុនក្រេឌីត ប្យួរ៉ូ ខេមបូឌា បានបញ្ជាក់ថា គុណភាពឥណទានលក្ខណៈបុគ្គល ដែលវាស់ដោយអនុបាតនៃឥណទានសំណងយឺតលើសពី ៣០ ថ្ងៃ (30+DPD) បានកើនឡើង ៧,០៧ ភាគរយ ដែលបង្ហាញថាលទ្ធភាពនៃការប្រើប្រាស់ឥណទាន និងហានិភ័យនៃការខកខានបង់ប្រាក់កម្ចីមានការកើនឡើង។

យោងតាម CBC គិតត្រឹមដំណាច់ឆ្នាំ ២០២៤ ប្រជាពលរដ្ឋកម្ពុជាចំនួន ៥,០៤ លាននាក់ កំពុងប្រើប្រាស់កម្ចីពីប្រព័ន្ធធនាគារ ដែលមានទំហំទឹកប្រាក់ប្រមាណ ៥៩ ពាន់លានដុល្លារ។

CBC បង្ហាញថា ក្នុងចំណោមសមតុល្យឥណទានដែលមាន ៥៩ ពាន់លានដុល្លារ ក្នុងឆ្នាំ ២០២៤ គឺមានឥណទានប្រមាណ ៦០ ភាគរយ ត្រូវបានគ្រឹះស្ថានធនាគារ និងហិរញ្ញវត្ថុ ផ្ដល់ទៅឱ្យប្រជាជននៅរាជធានីខេត្តចំនួន ៣ គឺរាជធានីភ្នំពេញាមានអ្នកខ្ចីច្រើនជាងគេរហូតដល់ ១១៩ ០២១ ៩៤៧ លានរៀល ប្រមាណ ២៩,៧ ពាន់លានដុល្លារ និងស្មើនឹង ៥០% នៃទំហំឥណទានទូទាំងប្រទេសដោយមានអ្នកខ្ចីសរុបចំនួន ៦៩,៦ ម៉ឺនាក់៕

The post ឥណទានក្នុងវិស័យធនាគារនៅកម្ពុជា ២០២៥ អាចនឹងមានកំណើនតិចតួច appeared first on Kampuchea Thmey Daily.

លោក តូច ចៅចេក Archives - Kampuchea Thmey Daily

គិតត្រឹមឆ្នាំ២០២៥ ប្រតិបត្តិការតាមរយៈប្រព័ន្ធបាគងបានកើន ១,២ ដង ដល់ ១.៣២៥,៦៥ លាន

វិស័យធនាគារនឹងរងផលប៉ះពាល់នូវឥណទានប្រមាណ ​​​២០ លានដុល្លារជុំវិញបញ្ហាជម្លោះព្រំដែនកម្ពុជា-ថៃ ​

អ្នកជំនាញ៖ បិទព្រំដែន បើប៉ះពាល់សេដ្ឋកិច្ចហើយ វិស័យធនាគារក៏ប៉ះពាល់ដែរ

​កម្ពុជា នៅមានតម្រូវការពលកម្មច្រើន ទាំងវិស័យវាយនភណ្ឌ កសិកម្ម និងសំណង់

លោក តូច ចៅចេក៖ មិនទាន់មានពលរដ្ឋចំណាកស្រុកពីថៃ មកស្នើសុំយន្តការជំនួយពីធនាគារនៅឡើយទេ

ឥណទានក្នុងវិស័យធនាគារនៅកម្ពុជា ២០២៥ អាចនឹងមានកំណើនតិចតួច

វិស័យធនាគារនឹងរងផលប៉ះពាល់នូវឥណទានប្រមាណ ២០ លានដុល្លារជុំវិញបញ្ហាជម្លោះព្រំដែនកម្ពុជា-ថៃ

កម្ពុជា នៅមានតម្រូវការពលកម្មច្រើន ទាំងវិស័យវាយនភណ្ឌ កសិកម្ម និងសំណង់