លោក វ៉ាត់ ចំរើន Archives - Kampuchea Thmey Daily

លោក វ៉ាត់ ចំរើន វិស័យកីឡាក្រៅពីជួយកិត្យានុភាពជាតិហើយនោះមួយផ្នែកក៏បានជួយដល់សេចកិច្ចសង្គម

Sina Noun — Fri, 27 Mar 2026 07:24:01 +0000

លោក វ៉ាត់ ចំរើន អគ្គលេខាធិការជាតិ នៃគណៈកម្មាធិការជាតិអូឡាំពិកកម្ពុជា ថាវិស័យកីឡាក្រៅពីផ្ដល់សុភាពសាធារណៈកិត្យានុភាពជាតិហើយនោះ មួយផ្នែកទៀតក៏បានចូលរួមជួយដល់សេចកិច្ចសង្គមជាតិផងដែរតាមរយៈការចូលរួមកន្លងមក។

លោក វ៉ាត់ ចំរើន

ថ្លែងនៅទីស្នាក់ការ NOCC លោក វ៉ាត់ ចំរើន បានឲ្យដឹងថា វិស័យកីឡាមិនត្រឹមតែលើកកិត្យានុភាពមុខមាត់ប្រទេសជាតិនោះទេ ពោលក៏ជាផ្នែកមួយជួយដល់សេចកិច្ចក្នុងប្រព័ន្ធផង និងក្រៅប្រព័ន្ធផង។ ក្នុងព្រឹត្តិការណ៍ធំម្ដងៗបានស្រូបទាញអ្នកចូលរួមរាប់ពាន់រាប់ម៉ឺននាក់ឯណោះ។

ថ្នាក់ដឹកនាំកីឡារូបនេះបន្ថែមទៀតថា ដូចបានមើលឃើញអីចឹងដែររាល់ការចូលរួមព្រឹត្តិការណ៍កីឡាផ្សេងៗនោះគឺទាក់ទងទៅហ្នឹងខាងធុរកិច្ច ទាក់ទងខាងផ្នែកទេសចរណ៍ និងអាជីវកម្មផងដែរ។ ហេតុនេះហើយគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា បន្តខំប្រឹងធ្វើយុទ្ធសាស្ត្រ និងជំរុញដល់ការអនុវត្តន៍សុខភាពសាធារណៈនេះឲ្យបានកាន់តែច្រើនថែមទៀត។

ព្រឹត្តិការណ៍កីឡាកន្លងទៅ

បញ្ជាក់ដែរថា បច្ចុប្បន្ននេះចលនាកីឡានៅកម្ពុជាមានការផុលផុសខ្លាំង និងមានសាធារណៈជនចាប់អារម្មណ៍លេងច្រើនតែម្ដងពិសេសនៅរាជធានីភ្នំពេញ។ ព្រឹត្តិការណ៍កីឡាតូច-ធំ មានអ្នកចូលរួមច្រើនទៅៗពិសេសទិវាពាក់កណ្ដាលម៉ារ៉ាតុងអន្តរជាតិនៅខេត្តព្រះសីហនុមានរហូតដល់ ១៥០០០នាក់ឯណោះ៕

លោក វ៉ាត់ ចំរើន

អត្ថបទដោយ៖ នួន ស៊ីណា

The post លោក វ៉ាត់ ចំរើន វិស័យកីឡាក្រៅពីជួយកិត្យានុភាពជាតិហើយនោះមួយផ្នែកក៏បានជួយដល់សេចកិច្ចសង្គម appeared first on Kampuchea Thmey Daily.

នេះជាទិសដៅសំខាន់ៗទាំង ៦ របស់គណៈកម្មាធិការជាតិអូឡាំពិកកម្ពុជាត្រូវអនុវត្តន៍ពីឆ្នាំ២០២៦ ដល់ ២០៣០

Sina Noun — Tue, 24 Mar 2026 03:44:21 +0000

បន្ទាប់ពីបោះឆ្នោតរកឃើញថ្នាក់ដឹកនាំកំពូលៗ និងសមាជិកគណៈកម្មាធិការប្រតិបត្តិក្នុងមហាសន្និបាត NOCC ហើយនោះអគ្គលេខាធិការ លោក វ៉ាត់ ចំរើន បានលើកទិសដៅការងារសំខាន់ៗចំនួន ៦ បន្តដឹកនាំ និងជំរុញអភិវឌ្ឍន៍ចលនាកីឡាអូឡាំពិក អាណត្តិថ្មីទី៩ ឆ្នាំ២០២៦ ដល់ ២០៣០។

លោក វ៉ាត់ ចំរើន អគ្គលេខាធិការ NOCC

ទិសដៅការងារសំខាន់ៗចំនួន ៦ នោះរួមមាន៖

ទី១ ពង្រឹងប្រព័ន្ធគ្រប់គ្រងដឹកនាំប្រកបដោយអភិបាលកិច្ចល្អតាមស្ដង់ដាវាយតម្លៃរបស់គណៈកម្មាធិការអូឡាំពិកអន្តរជាតិ «IOC» លើគ្រប់ភាគីពាក់ព័ន្ធ។

ទី២ ជំរុញការអភិវឌ្ឍន៍មូលធនមនុស្សជំនាញពិសេសមន្ត្រីកីឡា គ្រូបង្វឹក និងកីឡាករកម្រិតខ្ពស់ តាមរយៈការចូលរួមសិក្សាស្រាវជ្រាវ និងវគ្គបណ្ដុះបណ្ដាល និងការហាត់ហ្វឹកហ្វឺនប្រកបដោយគុណភាពទាំងក្នុង និងក្រៅប្រទេស ជាមួយគ្រូបង្វឹកមានគុណវុឌ្ឍិខ្ពស់ និងបរិយាកាសហ្វឹកហាត់ល្អ។

ទី៣ បង្កើតឧស្សាហកម្មកីឡាឲ្យចេញជាសកម្មភាពជាក់ស្ដែង ដើម្បីកៀរគរចំណូលដូចជា «គម្រោងស្វែងរកមូលនិធិអូឡាំពិក L.A ២០២៨ » និងអូឡាំពិក ២០៣២ នៅប្រទេសអូស្ត្រាលី។

ទី៤ រៀបចំប្រព័ន្ធគ្រប់គ្រងព័ត៌មានវិទ្យា «ICT» គ្រប់គ្រងព័ត៌មានកីឡាករឆ្នើម កីឡាករជយលាភីក្នុង Games និងប្រព័ន្ធ KPI វាយតម្លៃសហព័ន្ធកីឡាជាតិ។

ទី៥ ត្រៀមគ្រប់លក្ខណៈសម្បត្តិមុនព្រឹត្តិការណ៍ប្រកួត «AYG» លើកទី៥ ឆ្នាំ២០៣១ និងជួយរៀបចំ «AYPG» លើកទី៦ ឆ្នាំ២០២៩។

ទី៦ ពង្រឹងការលើកកម្ពស់ទស្សនវិជ្ជាអូឡាំពិកនៅកម្ពុជា និងបន្តជំរុញចលនា «យុវជនម្នាក់ចេះកីឡាមួយប្រភេទយ៉ាងតិចប្រចាំជីវិត» របស់រាជរដ្ឋាពិបាល។

រូបភាព Olympic Cambodia

បញ្ជាក់ដែរថា កាលពីថ្ងៃទី១៩ ខែមីនា ឆ្នាំ២០២៦ នេះគណៈកម្មាធិការជាតិអូឡាំពិកកម្ពុជា បានធ្វើមហាសន្និបាតបញ្ចប់អាណត្តិទី៨ និងលើកទិសដៅការងារបន្តអាណត្តិទី៩ ឆ្នាំ២០២៦ ដល់ ២០៣០។ មហាសន្និបាតបញ្ចប់អាណត្តិនោះគឺត្រូវធ្វើការបោះឆ្នោតជ្រើសរើសសមាជិកគណៈកម្មាធិការប្រតិបត្តិថ្មីដើម្បីបន្តដំណើរអភិវឌ្ឍន៍ចលនាកីឡាអូឡាំពិកកម្ពុជាតទៅទៀត។ លោក ថោង ខុន បន្តជាប្រធាន លោក វ៉ាត់ ចំរើន បន្តជាអគ្គលេខាធិការ ស្របពេលអគ្គលេខាធិការរង និងសមាជិកមួយចំនួនត្រូវបានផ្លាស់ប្ដូរ៕

សមាសភាពថ្នាក់ដឹកនាំ NOCC អាណត្តិទី៩

អត្ថបទដោយ៖ នួន ស៊ីណា

The post នេះជាទិសដៅសំខាន់ៗទាំង ៦ របស់គណៈកម្មាធិការជាតិអូឡាំពិកកម្ពុជាត្រូវអនុវត្តន៍ពីឆ្នាំ២០២៦ ដល់ ២០៣០ appeared first on Kampuchea Thmey Daily.

ក្រសួងអប់រំយុវជន និងកីឡា ឆ្នាំនេះអត្តពលិកជាង ៦០០នាក់នឹងចូលជំរំហ្វឹកហាត់ដើម្បីត្រៀមការប្រកួតធំៗ

Sina Noun — Fri, 20 Mar 2026 09:00:32 +0000

រដ្ឋលេខាធិការក្រសួងអប់រំ យុវជន និងកីឡា លោក វ៉ាត់ ចំរើន ថាឆ្នាំនេះអត្ពពលិកទាំងឈុតធំ និងថ្នាល ជាង ៦០០នាក់នឹងត្រូវចូលជំរំហ្វឹកហាត់ដើម្បីត្រៀមការប្រកួតធំៗពិសេសព្រឹត្តិការណ៍កីឡាអាស៊ី នៅទីក្រុង Aichi-Nagoya ឯប្រទេសជប៉ុន ។

កិច្ចប្រជុំ

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា បានលើកឡើងថា តាមការងារប្រចាំឆ្នាំរបស់មជ្ឈមណ្ឌលជាតិហ្វឹកហ្វឺនកីឡាត្រូវប្រមូលផ្ដុំក្រុមជម្រើសជាតិជារៀងរាល់ឆ្នាំ។ តាមគោលការណ៍របស់ក្រសួងនៅឆ្នាំនេះការប្រមូលផ្ដុំនឹងចាប់ផ្ដើមពីដើមខែមេសានេះរហូតដល់ចុងខែតុលា ឆ្នាំ២០២៦ ខាងមុខ។

លោក វ៉ាត់ ចំរើន រដ្ឋលេខាធិការក្រសួងអប់រំ

ការប្រមូលផ្ដុំនេះផងដែរគឺក្រុមជម្រើសជាតិត្រូវហ្វឹកហាត់ពង្រឹងសមត្ថភាពដើម្បីត្រៀមចូលរួមការប្រកួតកីឡាអាស៊ី លើកទី២០ នៅទីក្រុង Aichi-Nagoya ឯប្រទេសជប៉ុន។ លើសពីនេះក៏មានការប្រកួតផ្សេងទៀតដែរដូចជា Beach Games Indoor Games និងការប្រកួតរបស់សហព័ន្ធផងដែរ។ ដូច្នេះការប្រកួតប្រមូលផ្ដុំហ្វឹកហាត់ត្រូវធ្វើឡើងទៅតាមផែនការប្រកបដោយប្រសិទ្ធភាព និងការយកចិត្តទុកដាក់ខ្ពស់។

រូបភាពតំណាង

បញ្ជាក់ផងដែរថា ការលើកឡើងរបស់លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា នេះក្នុងកិច្ចប្រជុំត្រៀមការប្រមូលផ្ដុំក្រុមជម្រើសជាតិកាលពីថ្ងៃទី១៨ ខែមីនា ឆ្នាំ២០២៦ ដោយមានការចូលរួមពីលោក ប៉ុន សុខ អគ្គនាយក នៃអគ្គនាយកដ្ឋានកីឡា ប្រធាន អនុប្រធានមជ្ឈមណ្ឌលជាតិហ្វឹកហ្វឺនកីឡា និងបណ្ដាសហព័ន្ធជាតិផងដែរ៕

អត្ថបទដោយ៖ នូន ស៊ីណា

The post ក្រសួងអប់រំយុវជន និងកីឡា ឆ្នាំនេះអត្តពលិកជាង ៦០០នាក់នឹងចូលជំរំហ្វឹកហាត់ដើម្បីត្រៀមការប្រកួតធំៗ appeared first on Kampuchea Thmey Daily.

គណៈកម្មាធិការជាតិអូឡាំពិកកម្ពុជា អាណត្តិថ្មីនេះយុទ្ធនាការឆ្ពោះទៅកីឡាអូឡាំពិកនៅ LA ជាកត្តាចាំបាច់បំផុត

Sina Noun — Fri, 20 Mar 2026 02:48:19 +0000

អគ្គលេខាធិការ នៃគណៈកម្មាធិការជាតិអូឡាំពិកកម្ពុជា (NOCC) ទិសដៅសំខាន់ការងារនៅអាណត្តិថ្មីទី៩ ឆ្នាំ២០២៦-២០៣០ នេះគឺផែនការឈានទៅសម្រេចក្ដីស្រមៃរកជើងខ្លាំងឆ្ពោះទៅចូលរួមព្រឹត្តិការណ៍កីឡាអូឡាំពិក នៅសហរដ្ឋអាមេរិក ឆ្នាំ២០២៨ ខាងមុខ។

ទិដ្ឋភាពមហាសន្និបាតម្សិលមិញ

លោក វ៉ាត់ ចំរើន អគ្គលេខាធិការ NOCC បានថ្លែងក្នុងមហាសន្និបាតបញ្ចប់អាណត្តិកាលពីម្សិលមិញនេះថា ផែនការសំខាន់ និងជាយុទ្ធនាការដែលគ្រប់គ្នាចាំបាច់ចូលរួមនោះគឺការឆ្ពោះទៅសម្រេចក្ដីស្រមៃបង្កើតវីរបុរសដណ្ដើមមេដាយក្នុងព្រឹត្តិការណ៍កីឡាអាំពិកនៅសហរដ្ឋអាមេរិក ឆ្នាំ២០២៨ ឬឆ្នាំ២០៣២ នៅអូស្ត្រាលីជាដើម។

លោក ថោង ខុន

ថ្នាក់ដឹកនាំកំពូលផ្នែកកីឡាខាងលើបន្ថែមទៀតថា ការប្រកួតកម្រិតកីឡាអូឡាំពិកគឺមានលក្ខណៈខ្ពស់ និងលំបាកខ្លាំងបំផុតក្នុងការប្រកួតប្រជែង។ កន្លងទៅចំពោះប្រទេសកម្ពុជាមានតែអតីតកីឡាការិនី ស៊ន ស៊ីវម៉ី ប៉ុណ្ណោះទេដែលអាចប្រកួតជាប់វគ្គជម្រុះបានចូលរួមនៅព្រឹត្តិការណ៍អូឡាំពិក ឆ្នាំ២០១៦ នៅឯប្រទេសប្រេស៊ីល។ ក្រៅពីនោះមិនដែលមានប្រភេទកីឡាណាអាចឆ្លងកាត់វគ្គជម្រុះបានទៅប្រកួតនៅព្រឹត្តិការណ៍កីឡាកម្រិតខ្ពស់មួយនេះណាស់។

ទិដ្ឋភាពមហាសន្និបាតម្សិលមិញ

ដូច្នេះហើយនៅអាណត្តិទី៩ របស់ NOCC នេះគឺបានបង្កើតនូវយុទ្ធនាការសំខាន់នោះគឺបង្កើតធនធានដែលជាកីឡាករ កីឡាការិនី នៃសហព័ន្ធទាំងប៉ុន្មានដែលត្រូវជ្រើសរើសទៅប្រកួតនៅអាមេរិកនេះតាមរយៈផែនការច្បាស់លាស់ដូចជាឧបត្ថម្ភលើការបោះជំរំហ្វឹកហាត់កម្រិតខ្ពស់តាមបែបស្ដង់ដាអូឡាំពិក។ ផែនការរកថវិកាដើម្បីជួយទ្រទ្រង់សកម្មភាព និងការជំរុញគ្រប់បែបយ៉ាងទៅលើក្រុមកីឡាករ កីឡាការិនី នៃបណ្ដាកីឡាដែលជម្រើសរើសនេះធ្វើយ៉ាងណាឲ្យមានសមត្ថភាពកើនឡើង។ ការជំរុញនេះដើម្បីឲ្យអត្តពលិកមានសមត្ថភាពប្រកួតជាប់វគ្គជម្រុះឲ្យបានកាន់តែច្រើនឈានទៅរកឱកាសឈ្នះមេដាយជាលើកដំបូងជូនកម្ពុជា។ នេះហើយជាផែនការសំខាន់ និងចាំបាច់ក្នុងអាណត្តិតទៅនេះ ព្រោះជារឿងលំបាកមួយចំពោះការដណ្ដើមមេដាយជាប្រវត្តិសាស្ត្រនៅកីឡាអូឡាំពិកជូនប្រទេសកម្ពុជា។

លោក វ៉ាត់ ចំរើន

បញ្ជាក់ដែរថា កាលរសៀលថ្ងៃទី១៩ ខែមីនា ឆ្នាំ២០២៦ នេះគណៈកម្មាធិការជាតិអូឡាំពិកកម្ពុជា (NOCC) បានធ្វើមហាសន្និបាតបញ្ចប់អាណត្តិទី៨ និងលើកទិសដៅការងារបន្តអាណត្តិទី៩ ឆ្នាំ២០២៦ ដល់ ២០៣០។ ក្នុងមហាសន្និបាតនោះគឺលោក ថោង ខុន បន្តជាប្រធាន NOCC លោក វ៉ាត់ ចំរើន បន្តជាអគ្គលេខាធិការ។ ព្រឹត្តិការណ៍កីឡាអូឡាំពិករដូវក្ដៅ ឆ្នាំ២០២៨ នឹងធ្វើឡើងនៅឯសហរដ្ឋអាមេរិក។ កម្ពុជាក៏នឹងទៅចូលរួមប្រជែងមេដាយក្នុងព្រឹត្តិការណ៍ដ៏ខ្ពស់នេះផងដែរ៕

ទិដ្ឋភាពមហាសន្និបាតម្សិលមិញ

អត្ថបទដោយ៖ នួន ស៊ីណា

The post គណៈកម្មាធិការជាតិអូឡាំពិកកម្ពុជា អាណត្តិថ្មីនេះយុទ្ធនាការឆ្ពោះទៅកីឡាអូឡាំពិកនៅ LA ជាកត្តាចាំបាច់បំផុត appeared first on Kampuchea Thmey Daily.

សង្គ្រាមឈ្លានពានរបស់សៀមមកលើកម្ពុជា ប៉ះពាល់សកម្មភាពកីឡាយ៉ាងណាខ្លះ…

Sina Noun — Wed, 31 Dec 2025 09:08:26 +0000

អគ្គលេខាធិការ នៃគណៈកម្មាធិការជាតិអូឡាំពិកកម្ពុជា ថាអំឡុងសង្គ្រាមឈ្លានពានរបស់សៀមមកលើកម្ពុជាថ្មីៗនេះចំពោះទំនាក់ទំនងខាងផ្នែកកីឡាពិសេសការប្រកួត ឬការហ្វឹកហាត់ផ្សេងៗគឺមិនអនុញ្ញាតនោះទេប្រទេសទាំងសងខាង ព្រោះបញ្ហាព្រំដែនមិនទាន់បញ្ចប់។

លោក វ៉ាត់ ចំរើន

លោក វ៉ាត់ ចំរើន អគ្គលេខាធិការ នៃគណៈកម្មាធិការជាតិអូឡាំពិកកម្ពុជា បានឲ្យដឹងថា អំឡុងសង្គ្រាមរបស់សៀមមកលើកម្ពុជាថ្មីៗនេះគឺតែងតែមានការប៉ះពាល់ដល់អារម្មណ៍ប្រជាពលដ្ឋទូទៅ និងផ្នែកកីឡាក៏មានដូចគ្នាដែរ។ ទំនាក់ទំនងរវាង NOCC កម្ពុជាជាមួយខាងប្រសៀមគឺមានជាធម្មតាក្នុងនាមគ្រួសារកីឡាអន្តរជាតិ និងស្មារតីចលនាអូឡាំពិក។

រូបភាព NOCC

យោងតាមស្ថានការណ៍ព្រំដែនជាក់ស្ដែងខាងកម្ពុជាគឺផ្ដោតលើអារម្មណ៍របស់កីឡាករផ្ទាល់ អារម្មណ៍របស់ក្រុមគ្រួសារបារម្ភអំពីសុខសុវត្ថិភាពអំឡុងពេលនេះគឺមិនអនុញ្ញាតឲ្យចូលរួមការប្រកួតផ្សេងៗនោះឡើយ។ ពោលខាងកម្ពុជាមិនទៅចូលរួមរីឯខាងសៀមក៏មិនមកចូលរួមដូចគ្នាដែរ។

រូបភាព NOCC

បញ្ជាក់ដែរថា អំឡុងពេលប៉ុន្មានខែចុងក្រោយនេះបញ្ហាឈ្លានពានរបស់ប្រទេសសៀមមកលើកម្ពុជាមានជាបន្តបន្ទាប់រហូតដល់មានបទឈប់បាញ់ ៧២ម៉ោងកាលពីថ្ងៃ២៧ ខែធ្នូ ឆ្នាំ២០២៥ រហូតមកដល់ពេលនេះ។ ក្នុងអំឡុងការឈ្លានពាននេះខាងកម្ពុជាបានទៅចូលរួមពិធីបើកការប្រកួតស៊ីហ្គេម លើកទី៣៣ នៅឯប្រទេសថៃដែរ ប៉ុន្តែថ្ងៃបន្ទាប់មកក៏ចាកចេញមកកម្ពុជាវិញ ព្រោះតាមបណ្ដោយព្រំដែនកំពុងផ្ទុះអាវុធជាខ្លាំង៕

អត្ថបទដោយ៖ នួន ស៊ីណា

The post សង្គ្រាមឈ្លានពានរបស់សៀមមកលើកម្ពុជា ប៉ះពាល់សកម្មភាពកីឡាយ៉ាងណាខ្លះ… appeared first on Kampuchea Thmey Daily.

ព្រឹត្តិការណ៍រត់ដើម្បីយល់ដឹង«ជំងឺមហារីកសុដន់» បើកពិនិត្យជំងឺរយៈពេល ៣ ថ្ងៃដោយឥតគិតថ្លៃ

Kosal Sem — Mon, 14 Jul 2025 07:53:42 +0000

នៅព្រឹកថ្ងៃ ចន្ទ ទី ១៤ ខែ កក្កដា ឆ្នាំ ២០២៥ គណៈកម្មាធិការជាតិអូឡាំពិកកម្ពុជា (NOCC) បានធ្វើសន្និសីទសារព័ត៌មានប្រកាសជាផ្លូវការអំពីការរៀបចំព្រឹត្តិការណ៍រត់ប្រណាំង«ដើម្បីលើកកម្ពស់ការយល់ដឹង និងទប់ស្កាត់ជំងឺមហារីកសុដន់» ដែលគ្រោងធ្វើនៅថ្ងៃអាទិត្យ ទី ១៩ ខែតុលា ឆ្នាំ ២០២៥។

រូបភាពសន្និសីទសារព័ត៌មាន

ថ្លែងនៅក្នុងពិធីសន្និសីទសារព័ត៌មាន លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានមានប្រសាសន៍ថា ៖«គោលបំណងធំនៃការរៀបចំព្រឹត្តិការណ៍កីឡានេះឡើយ គឺដើម្បីជួយគាំពារទៅដល់ស្ត្រី ដែលមានជំងឺផ្នែកមហារីកសុដន់។ នេះគឺជាគោលបំណងមួយយ៉ាងសំខាន់ ហើយគោលបំណងមួយទៀត គឺផ្តោតលើការចូលរួមខាងផ្នែកសប្បុរសធម៌។ ការធ្វើសប្បុរសធម៌ គឺជាគោលការណ៍របស់គណៈកម្មាធិការជាតិអូឡាំពិក គ្រប់ព្រឹត្តិការណ៍កីឡាទាំងអស់»។

លោក បានបញ្ជាក់ថា ព្រឹត្តិការណ៍រត់ប្រណាំងនេះគឺដើម្បីគាំពារ និងផ្សព្វផ្សាយឲ្យយល់ដឹងពីជំងឺមហារីកសុដន់។ ធ្វើយ៉ាងណាឲ្យស្ត្រីគ្រប់រូបទប់ស្កាត់ បង្ការ និងការពារ ក៏ដូចជាព្យាបាលឲ្យទាន់ពេលវេលា។ ប្រជាជនគ្រប់រូប ជាពិសេសសូមចូលរួមក្នុងកម្មវិធីនេះ។ មិនត្រឹមតែប៉ុណ្ណោះ គ្រប់ស្ត្រីទាំងអស់ ទោះជាអ្នកបានចុះឈ្មោះចូលរួមក្តី ឬមិនបានចុះឈ្មោះក្តី ក៏អាចមកទទួលបានការពិនិត្យជំងឺមហារីកសុដន់ដោយឥតគិតថ្លៃ។ ក្រុមការងារនឹងរៀបចំកន្លែងពិនិត្យជំងឺមហារីកសុដន់រយៈពេល ៣ ថ្ងៃ ពោលគឺមុនថ្ងៃរត់ ២ ថ្ងៃ និងថ្ងៃរត់១ថ្ងៃទៀត នៅឧទ្យានមុខវត្តបទុម។

រូបភាពសន្និសីទសារព័ត៌មាន

ព្រឹត្តិការណ៍រត់ប្រណាំង បានបើកដំណើរការចុះឈ្មោះចាប់ពីពេលនេះ រហូតដល់ថ្ងៃទី ១១ ខែ កញ្ញា ឆ្នាំ ២០២៥។ បច្ចុប្បន្ន មានអ្នកចុះឈ្មោះជាង ១ ពាន់នាក់ជាងហើយ និងរំពឹងទទួលបានអ្នកចុះឈ្មោះហោចណាស់ ៥ ពាន់នាក់។

គួរបញ្ជាក់ថា ព្រឹត្តិការណ៍រត់ប្រណាំងនេះ គឺបានធ្វើចំនួន ២ លើករួចមកហើយ ខណៈទាំងលើកនេះទៀត គឺជាលើកទី ៣។ ព្រឹត្តិការណ៍រត់នឹងប្រព្រឹត្តឡើងនៅថ្ងៃអាទិត្យ ទី ១៩ ខែតុលា ឆ្នាំ ២០២៥ នៅសួនច្បារវត្តបទុមវតី។ ការរត់បែងចែកជា ៣ វិញ្ញាសាគឺ រត់ចម្ងាយ ១០ គីឡូម៉ែត្រ, ៥ គីឡូម៉ែត្រ និង ២.៥ គីឡូម៉ែត្រ សម្រាប់ក្មេងៗ និងជាលក្ខណៈគ្រួសារ៕

រូបភាពសន្និសីទសារព័ត៌មាន

អត្ថបទ៖ សេម កុសល

The post ព្រឹត្តិការណ៍រត់ដើម្បីយល់ដឹង«ជំងឺមហារីកសុដន់» បើកពិនិត្យជំងឺរយៈពេល ៣ ថ្ងៃដោយឥតគិតថ្លៃ appeared first on Kampuchea Thmey Daily.

កម្ពុជា នៅតែបញ្ជូនអត្តពលិកទៅចូលរួមប្រកួត កីឡាស៊ីហ្គេម នៅថៃ ទោះមានជម្លោះព្រំដែន

Kosal Sem — Mon, 23 Jun 2025 07:35:40 +0000

កម្ពុជា និង ថៃ នៅតែស្វាគមន៍គ្នាទៅវិញមកចំពោះវិស័យកីឡា ទោះបច្ចុប្បន្នប្រទេសទាំង ២ កំពុងមានភាពតានតឹងលើបញ្ហាព្រំដែនក៏ដោយ ហើយកម្ពុជា នឹងនៅតែបញ្ជូនអត្តពលិកទៅចូលរួមការប្រកួតកីឡាស៊ីហ្គេមលើកទី ៣៣ នៅប្រទេស ថៃ នាខែធ្នូ ឆ្នាំ ២០២៥។ នេះបើតាមការអះអាងដោយលោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជា អគ្គលេខាធិការនៃ គណៈកម្មាធិការជាតិអូឡាំពិកកម្ពុជា។

លោកវ៉ាត់ ចំរើន

បញ្ហាប្រឈមមុខដាក់គ្នានៅតាមបន្ទាត់ព្រំដែនរវាងកម្ពុជា និងថៃ នៅតែមិនទាន់មានភាពធូរស្រាល បានក្លាយជាចម្ងល់មួយសម្រាប់មហាជន ថា តើកម្ពុជា នឹងនៅតែបន្តបញ្ជូនអត្តពលិកទៅចូលរួមការប្រកួតកីឡាស៊ីហ្គេម លើកទី ៣៣ នៅចុងឆ្នាំ ២០២៥ នេះ ឬយ៉ាងណា។

នៅក្នុងការប្រារព្ធទិវាអូឡាំពិកលើកទី ១៣១ នៅវិមានពហុកីឡដ្ឋានជាតិ មរតកតេជោ កាលពីថ្ងៃ អាទិត្យ ទី ២២ ខែ មិថុនា លោក វ៉ាត់ ចំរើន បានបញ្ជាក់ថា គណៈកម្មាធិការជាតិអូឡាំពិកកម្ពុជា ទើបតែបានចូលរួមកិច្ចប្រជុំក្រុមប្រឹក្សាអូឡាំពិករបស់សហព័ន្ធកីឡា អាស៊ីអាគ្នេយ៍ កាលពីខែមុន។ ជាលទ្ធផល គឺមិនមានអ្វីប្រែប្រួលឡើយ ដោយប្រទេស និងប្រទេសបានបង្ហាញការស្វាគមន៍គ្នាយ៉ាងកក់ក្តៅក្នុងន័យកីឡាទៅវិញទៅមក។ ម្យ៉ាងទៀត កីឡា គឺមិនពាក់ព័ន្ធនឹងនយោបាយ ឬរឿងអ្វីផ្សេងទៀតឡើយ។

លោកវ៉ាត់ ចំរើន បានបន្ថែមថា ខាងភាគីថៃ បានបញ្ជាក់រួចហើយគឺ ពួកគេនឹងនៅតែស្វាគមន៍ជានិច្ចចំពោះគណៈប្រតិភូ និងអត្តពលិកកម្ពុជា រួមទាំងប្រទេសផ្សេងៗទៀតនៅក្នុងតំបន់ អាស៊ាន ដើម្បីរៀបការប្រកួតកីឡាស៊ីហ្គេមលើកទី ៣៣។ ទន្ទឹមនឹងនេះ ខាងថៃក៏បានកោតសរសើរអំពីការរៀបចំកីឡាស៊ីហ្គេម លើកទី ៣២ ក្នុងឆ្នាំ ២០២៣ ដែលកម្ពុជាធ្វើជាម្ចាស់ផ្ទះផងដែរ ថាបានរៀបចំបានល្អ និងមានភាពជោគជ័យខ្ពស់។

លោកវ៉ាត់ ចំរើន បានសង្កត់ធ្ងន់ថា ចំពោះកម្ពុជា គឺគ្មានអ្វីប្រែប្រួលឡើយ ដោយបច្ចុប្បន្នអត្តពលិកទាំងអស់កំពុងត្រៀមខ្លួនជានិច្ច ដើម្បីចូលរួមកីឡាស៊ីហ្គេមនៅ ថៃ ចុងឆ្នាំ ២០២៥។

គួរបញ្ជាក់ថា កីឡាស៊ីហ្គេម លើកទី ៣៣ នៅប្រទេស ថៃ នឹងរៀបចំឡើងចាប់ពីថ្ងៃទី ៩ ដល់ថ្ងៃទី ២០ ខែ ធ្នូ ឆ្នាំ ២០២៥៕

កីឡាស៊ីហ្គេមនៅថៃ

អត្ថបទ៖ សេម កុសល

The post កម្ពុជា នៅតែបញ្ជូនអត្តពលិកទៅចូលរួមប្រកួត កីឡាស៊ីហ្គេម នៅថៃ ទោះមានជម្លោះព្រំដែន appeared first on Kampuchea Thmey Daily.

មូលហេតុសំខាន់២ ប្រធានគុនខ្មែរអន្តរជាតិ ប្រគល់ភារកិច្ចដល់ លោក វ៉ាត់ ចំរើន និងលោក ខូវ ឆាយ ជាប្រធាន-អគ្គលេខាធិការស្តីទី

chean virakbot — Wed, 18 Jun 2025 00:00:00 +0000

សហព័ន្ធកីឡាគុនខ្មែរអន្តរជាតិ បានតែងតាំងលោក វ៉ាត់ ចំរើន ជាប្រធានស្តីទី និងលោក ខូវ ឆាយ ជាអគ្គលេខាធិការស្តីទីរបស់ខ្លួន កាលពីថ្ងៃទី១៧ ខែមិថុនា ឆ្នាំ២០២៥។

ការតែងតាំងសមាសភាពថ្នាក់ដឹកនាំថ្មីនេះបានជំរុញឲ្យមហាជនមានការចាប់អារម្មណ៍ខ្លាំង ដោយសារកាលពីប៉ុន្មានខែមុន សហព័ន្ធគុនខ្មែរអន្តរជាតិ និងសហព័ន្ធកីឡាប្រដាល់គុនខ្មែរហាក់មានសកម្មភាពខ្វែងគំនិតគ្នាតិចតូច។

លោក វ៉ាត់ ចំរើន

ពាក់ព័ន្ធនឹងការតែងតាំងសមាសភាពថ្នាក់ដឹកនាំថ្មីនេះ លោកបណ្ឌិត មាម រ៉ា ប្រធានសហព័ន្ធគុនខ្មែរអន្តរជាតិ បានប្រាប់សារព័ត៌មាន«កម្ពុជាថ្មី»ថា ៖«នេះជាការណែនាំពីថ្នាក់លើដើម្បីឲ្យសហព័ន្ធគុនខ្មែរអន្តរជាតិ និងសហព័ន្ធកីឡាប្រដាល់គុនខ្មែររួបរួមសាមគ្គីគ្នា។ ម្យ៉ាងវិញទៀត ខ្ញុំអត់នៅក្នុងស្រុក។ ខ្ញុំមានបេសកកម្មនៅក្រៅប្រទេស ដូច្នេះតំណែងប្រធាន ខ្ញុំឲ្យឯកឧត្តម វ៉ាត់ ចំរើន ជាប្រធានស្តីទី ពេលខ្ញុំអត់នៅក្នុងស្រុក ដោយសារលោកមានតួនាទីជាអគ្គលេខាធិការ អីចឹងពេលលោកកាន់តំណែងជាប្រធានស្តីទី កន្លែងអគ្គលេខាធិការនៅទំនេរ ហើយឯកឧត្តម វ៉ាត់ ចំរើន បានសម្រេចដាក់ឯកឧត្តម ខូវ ឆាយ ជាអគ្គលេខាធិការស្តីទី។ នេះជាការរួបរួមគ្នា កុំឲ្យមានបញ្ហាខ្វែងគំនិត ឲ្យឯកឧត្តម ខូវ ឆាយ កាន់តួនាទីជាអគ្គលេខាធិការស្តីទីរហូតដល់យើងរៀបចំសន្និបាតដើម្បីរៀបចំសមាសភាពថ្មី»។

លោកបណ្ឌិតបានបញ្ជាក់ថា ៖«អត់មានបញ្ហាអ្វីទេ ដោយសារខ្ញុំនៅក្រៅប្រទេសរហូតដល់ចុងសីហា អីចឹងប្រធានបានលើកជូនឯកឧត្តម វ៉ាត់ ចំរើន ជាប្រធានស្តីទី។ នៅពេលយើងរៀបចំមហាសន្និបាតចុងឆ្នាំនេះ រៀបចំការប្រកួតជើងឯកគុនខ្មែរពិភពលោកប្រចាំឆ្នាំ ដែលសមាជិកទូទាំងពិភពលោកចូលរួម យើងនឹងរៀបចំសម្រួលដើម្បីឲ្យយើងងាយស្រួលក្នុងការបំពេញការងារដើម្បីអភិវឌ្ឍគុនខ្មែរទាំងអស់គ្នា»។

លោក ខូវ ឆាយ

ជារួមមូលហេតុសំខាន់ដែលនាំឲ្យមានការតែងតាំងសមាសភាពថ្មីគឺទី១ លោក មាម រ៉ា ដែលជាប្រធានជាប់រវល់នៅក្រៅប្រទេសច្រើនខែ និងទី២ ចង់ឲ្យសហព័ន្ធគុនខ្មែរ និងសហព័ន្ធកីឡាប្រដាល់គុនខ្មែររួបរួមសាមគ្គីគ្នាជាធ្លុងមួយដើម្បីអភិវឌ្ឍគុនខ្មែរលើឆាកអន្តរជាតិ។

បច្ចុប្បន្ន លោក វ៉ាត់ ចំរើន ជារដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា (NOCC) ខណៈ លោក ខូវ ឆាយ ជាប្រធានសហព័ន្ធគុនខ្មែរ និងប្រធានមជ្ឈមណ្ឌលកីឡានៃកងយោធពលខេមរភូមិន្ទ នៃក្រសួងការពារជាតិ។

នៅពាក់កណ្តាលឆ្នាំ ២០២៥ លោក ខូវ ឆាយ បានដឹកនាំកីឡាប្រដាល់គុនខ្មែរធ្វើសកម្មភាពនៅក្រៅប្រទេសជាច្រើនទាំងរៀបចំកម្មវិធីប្រកួត និងចាប់ដៃគូជាមួយស្ថាប័នកីឡាផ្សេងៗ។ ជាក់ស្តែងលោកបានដឹកនាំកីឡាករ កីឡាការិនី និងរៀបចំការប្រកួតនៅសហរដ្ឋអាមេរិក២ដង នៅប្រទេសបារាំង អេស្ប៉ាញ អូស្ត្រាលី ជប៉ុន ហុងកុង និងក្រិកជាដើម។ លោកក៏បានចាប់ដៃគូជាច្រើនទៀតនៅសហរដ្ឋអាមេរិក បារាំង ក្រិក អេស្ប៉ាញ ចិន ហុងកុង។ ទាំងនេះជាការបើកផ្លូវដ៏សំខាន់ដើម្បីជំរុញកីឡាគុនខ្មែរឲ្យរីកចម្រើនលើឆាកអន្តរជាតិ ស្របពេលថ្នាក់ដឹកនាំកម្ពុជាកំពុងមានគោលដៅដាក់គុនខ្មែរឲ្យចូលក្នុងកីឡាទ្វីបអាស៊ី និងកីឡាអូឡាំពិក៕

អត្ថបទ៖ វីរបុត្រ

The post មូលហេតុសំខាន់២ ប្រធានគុនខ្មែរអន្តរជាតិ ប្រគល់ភារកិច្ចដល់ លោក វ៉ាត់ ចំរើន និងលោក ខូវ ឆាយ ជាប្រធាន-អគ្គលេខាធិការស្តីទី appeared first on Kampuchea Thmey Daily.

លោក វ៉ាត់ ចំរើន Archives - Kampuchea Thmey Daily

សង្គ្រាម​ឈ្លានពាន​របស់​សៀម​មក​លើ​កម្ពុជា​ ប៉ះពាល់​សកម្មភាព​កីឡា​យ៉ាងណា​ខ្លះ…​

ព្រឹត្តិការណ៍​រត់ដើម្បី​យល់​ដឹង«ជំងឺ​មហារីកសុដន់» បើក​ពិនិត្យ​ជំងឺរយៈ​ពេល ៣ ថ្ងៃ​ដោយ​ឥត​គិត​ថ្លៃ

កម្ពុជា នៅតែបញ្ជូនអត្តពលិកទៅចូលរួម​ប្រកួត កីឡា​ស៊ីហ្គេម នៅថៃ ទោះ​មាន​ជម្លោះ​ព្រំដែន

សង្គ្រាមឈ្លានពានរបស់សៀមមកលើកម្ពុជា ប៉ះពាល់សកម្មភាពកីឡាយ៉ាងណាខ្លះ…

ព្រឹត្តិការណ៍រត់ដើម្បីយល់ដឹង«ជំងឺមហារីកសុដន់» បើកពិនិត្យជំងឺរយៈពេល ៣ ថ្ងៃដោយឥតគិតថ្លៃ

កម្ពុជា នៅតែបញ្ជូនអត្តពលិកទៅចូលរួមប្រកួត កីឡាស៊ីហ្គេម នៅថៃ ទោះមានជម្លោះព្រំដែន