កីឡា

ព្រឹត្តិការណ៍រត់ដើម្បីយល់ដឹង«ជំងឺមហារីកសុដន់» បើកពិនិត្យជំងឺរយៈពេល ៣ ថ្ងៃដោយឥតគិតថ្លៃ

បានផុស

១០ ខែ មុន

នៅ

ថ្ងៃចន្ទ ១៤ កក្កដា ២០២៥

ដោយ

នៅព្រឹកថ្ងៃ ចន្ទ ទី ១៤ ខែ កក្កដា ឆ្នាំ ២០២៥ គណៈកម្មាធិការជាតិអូឡាំពិកកម្ពុជា (NOCC) បានធ្វើសន្និសីទសារព័ត៌មានប្រកាសជាផ្លូវការអំពីការរៀបចំព្រឹត្តិការណ៍រត់ប្រណាំង«ដើម្បីលើកកម្ពស់ការយល់ដឹង និងទប់ស្កាត់ជំងឺមហារីកសុដន់» ដែលគ្រោងធ្វើនៅថ្ងៃអាទិត្យ ទី ១៩ ខែតុលា ឆ្នាំ ២០២៥។

ថ្លែងនៅក្នុងពិធីសន្និសីទសារព័ត៌មាន លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានមានប្រសាសន៍ថា ៖«គោលបំណងធំនៃការរៀបចំព្រឹត្តិការណ៍កីឡានេះឡើយ គឺដើម្បីជួយគាំពារទៅដល់ស្ត្រី ដែលមានជំងឺផ្នែកមហារីកសុដន់។ នេះគឺជាគោលបំណងមួយយ៉ាងសំខាន់ ហើយគោលបំណងមួយទៀត គឺផ្តោតលើការចូលរួមខាងផ្នែកសប្បុរសធម៌។ ការធ្វើសប្បុរសធម៌ គឺជាគោលការណ៍របស់គណៈកម្មាធិការជាតិអូឡាំពិក គ្រប់ព្រឹត្តិការណ៍កីឡាទាំងអស់»។

លោក បានបញ្ជាក់ថា ព្រឹត្តិការណ៍រត់ប្រណាំងនេះគឺដើម្បីគាំពារ និងផ្សព្វផ្សាយឲ្យយល់ដឹងពីជំងឺមហារីកសុដន់។ ធ្វើយ៉ាងណាឲ្យស្ត្រីគ្រប់រូបទប់ស្កាត់ បង្ការ និងការពារ ក៏ដូចជាព្យាបាលឲ្យទាន់ពេលវេលា។ ប្រជាជនគ្រប់រូប ជាពិសេសសូមចូលរួមក្នុងកម្មវិធីនេះ។ មិនត្រឹមតែប៉ុណ្ណោះ គ្រប់ស្ត្រីទាំងអស់ ទោះជាអ្នកបានចុះឈ្មោះចូលរួមក្តី ឬមិនបានចុះឈ្មោះក្តី ក៏អាចមកទទួលបានការពិនិត្យជំងឺមហារីកសុដន់ដោយឥតគិតថ្លៃ។ ក្រុមការងារនឹងរៀបចំកន្លែងពិនិត្យជំងឺមហារីកសុដន់រយៈពេល ៣ ថ្ងៃ ពោលគឺមុនថ្ងៃរត់ ២ ថ្ងៃ និងថ្ងៃរត់១ថ្ងៃទៀត នៅឧទ្យានមុខវត្តបទុម។

ព្រឹត្តិការណ៍រត់ប្រណាំង បានបើកដំណើរការចុះឈ្មោះចាប់ពីពេលនេះ រហូតដល់ថ្ងៃទី ១១ ខែ កញ្ញា ឆ្នាំ ២០២៥។ បច្ចុប្បន្ន មានអ្នកចុះឈ្មោះជាង ១ ពាន់នាក់ជាងហើយ និងរំពឹងទទួលបានអ្នកចុះឈ្មោះហោចណាស់ ៥ ពាន់នាក់។

គួរបញ្ជាក់ថា ព្រឹត្តិការណ៍រត់ប្រណាំងនេះ គឺបានធ្វើចំនួន ២ លើករួចមកហើយ ខណៈទាំងលើកនេះទៀត គឺជាលើកទី ៣។ ព្រឹត្តិការណ៍រត់នឹងប្រព្រឹត្តឡើងនៅថ្ងៃអាទិត្យ ទី ១៩ ខែតុលា ឆ្នាំ ២០២៥ នៅសួនច្បារវត្តបទុមវតី។ ការរត់បែងចែកជា ៣ វិញ្ញាសាគឺ រត់ចម្ងាយ ១០ គីឡូម៉ែត្រ, ៥ គីឡូម៉ែត្រ និង ២.៥ គីឡូម៉ែត្រ សម្រាប់ក្មេងៗ និងជាលក្ខណៈគ្រួសារ៕