ចូលរួមជាវាគ្មិនក្នុងកិច្ចពិភាក្សាកម្រិតខ្ពស់នៃវេទិកាវិនិយោគកម្ពុជា ដែលរៀបចំឡើងដោយក្រុមប្រឹក្សាអភិវឌ្ឍន៍កម្ពុជា លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បាន​បង្ហាញពីកំណើននៃគម្រោងវិនិយោគដែលត្រូវបានអនុម័ត និងតួនាទីសំខាន់នៃតំបន់សេដ្ឋកិច្ចពិសេស ក្នុងការទាក់ទាញនិងសម្រួលដល់ការវិនិយោគ។

លោករដ្ឋមន្រ្តីបាន​បញ្ជាក់ថា ​​តំបន់សេដ្ឋកិច្ចពិសេសចំនួន ៣៥ ដែលកំពុង​ដំណើរការជាកាតាលីករសំខាន់ក្នុងការជំរុញកំណើនឧស្សាហកម្ម ការនាំចេញ និងការបង្កើតការងារសម្រាប់​ពលរដ្ឋ។

ក្នុងវេទិកាវិនិយោគកម្ពុជានោះដែរ លោក​រដ្ឋមន្ត្រីក៏​បានលើកឡើងពី​ការគាំទ្រ​សម្រាប់ភ្ជាប់សហគ្រាសធុនតូច និងមធ្យម ទៅក្នុងខ្សែច្រវាក់ផ្គង់ផ្គង់នៃការវិនិយោគផ្ទាល់ពីបរទេស (FDI)។

លោករដ្ឋមន្រ្តី​បានបញ្ជាក់ពីភាពចាំបាច់នៃការធ្វើសាមញ្ញកម្មសេវាសាធារណៈ និងការគាំទ្រពីគ្រប់តួអង្គ រួមទាំងវិស័យ​ហិរញ្ញវត្ថុ ដើម្បីឱ្យសហគ្រាសធុនតូច និងមធ្យម អាចពង្រឹងសមត្ថភាព និងភ្ជាប់ទៅនឹងគម្រោងវិនិយោគផ្ទាល់ពីបរទេស ដែលកំពុងកើនឡើងយ៉ាងឆាប់រហ័សនៅកម្ពុជា។

លោក ហែម វណ្ណឌី បាន​សង្កត់ធ្ងន់ថា ការរៀបចំតំបន់សហគ្រាសធុនតូច និងមធ្យម នៅជិត នៅជាប់ ឬនៅក្នុងតំបន់សេដ្ឋកិច្ច​ពិសេស (SEZ) គឺជាវិធានការគន្លឹះមួយក្នុងការពង្រឹងឧស្សាហកម្មប្រតិគមន៍ ដែលអនុញ្ញាតឱ្យសហគ្រាសក្នុងស្រុកផ្គត់ផ្គង់ទៅកាន់រោងចក្រដែលផលិតសម្រាប់ការនាំចេញ។

ការអភិវឌ្ឍសហគ្រាសធុនមីក្រូ តូច និងមធ្យម ត្រូវការការគាំទ្រពីប្រព័ន្ធហេដ្ឋារចនាសម្ព័ន្ធគុណភាពជាតិរឹងមាំ ជាពិសេសស្តង់ដារូបនីយកម្ម សេវាធ្វើតេស្តវិភាគ និងវិញ្ញាបនបត្រកម្ម ដើម្បីបំពេញតម្រូវការនៃឧស្សាហកម្មធុនធំ និងទីផ្សារនាំចេញ។

បើតាមលោករដ្ឋមន្រ្តី ការគាំទ្រត្រឹមត្រូវចំគោលដៅ សហគ្រាសធុនតូច និងមធ្យម អាចពង្រីកខ្លួនផ្គត់ផ្គង់ទៅ​ឱ្យ​គម្រោង​វិនិយោគ​ផ្ទាល់ពីបរទេស និងដើរតួកាន់តែសំខាន់ក្នុងអនាគតឧស្សាហកម្មកម្ពុជា៕

The post ​តំបន់សេដ្ឋកិច្ចពិសេសចំនួន ៣៥ ក្នុង​ចំណោម ៦២ កន្លែងកំពុង​ដំណើរការ បង្កើត​ការងារ​រាប់ម៉ឺនកន្លែង​ដល់ពលរដ្ឋ appeared first on Kampuchea Thmey Daily.

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីថ្ងៃទី ៣ ខែឧសភា ឆ្នាំ​២០២៦ បានដឹកនាំ​មន្រ្តី​បច្ចេកទេស​ចុះពិនិត្យការដ្ឋានសាងសង់ប្រព័ន្ធទឹកស្អាតសំខាន់ៗនៅក្នុងខេត្តកំពត ដែល​រួម​មាន​ស្ថានីយមូបទឹកឆៅនៅ​ក្នុងស្រុកទឹកឈូ និងគម្រោងសាងសង់រោងចក្រប្រព្រឹត្តកម្មទឹកស្អាតថ្មីដែលមានសមត្ថភាពផលិត ១២,៦០០ ម៉ែត្រគូបក្នុងមួយថ្ងៃ។

បើតាមប្រភពពីមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ គម្រោងសាងសង់ប្រព័ន្ធទឹកស្អាតនៅក្នុងខេត្តកំពត គ្រោងនឹងបញ្ចប់ក្នុងរយៈពេល ២ ឆ្នាំខាងមុខ​ទៀត ដែលនឹងពង្រីកការផ្គត់ផ្គង់ទឹកស្អាតដើម្បីគាំទ្រតម្រូវការប្រើប្រាស់ទឹកស្អាតរបស់ប្រជាពលរដ្ឋក្នុងក្រុងកំពតនិងតំបន់ជុំវិញ និងជំរុញការអភិវឌ្ឍសេដ្ឋកិច្ចក្នុងមូលដ្ឋាន៕

The post ​​រោងចក្រផលិតទឹកស្អាតថ្មី​ខេត្តកំពត បញ្ចប់​ការ​សាងសង់​ ២ ឆ្នាំទៀត បង្កើន​​សមត្ថភាពផលិតទឹកស្អាត​បាន ១២,៦០០ ម៉ែត្រគូបក្នុងមួយថ្ងៃ appeared first on Kampuchea Thmey Daily.

ជាមួយការដាក់ឱ្យដំណើរការប្រព័ន្ធនេះ រដ្ឋាករទឹកបាត់ដំបងបានបង្កើនសមត្ថភាពផលិតទឹកស្អាតរបស់ខ្លួនជាងពីរដង និងពង្រីកការតភ្ជាប់បណ្តាញថ្មីជូនដល់ ១៦.៧៩៨ គ្រួសារបន្ថែមទៀត ដែលគ្របដណ្តប់ប្រមាណ ៧៦% នៃតំបន់សេវាកម្មរបស់ខ្លួន។

ថ្លែងក្នុងពិធីសម្ពោធ ប្រព័ន្ធផ្គត់ផ្គង់ទឹកស្អាតខេត្តបាត់ដំបង លោក​ ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានលើកឡើងថា ប្រព័ន្ធផ្គត់ផ្គង់ទឹកស្អាតថ្មីនេះ​បង្កើនសមត្ថភាពផលិតទឹកស្អាតរបស់រដ្ឋាករទឹកបាត់ដំបងពី ៣៣.៥២០ ម^៣/ ថ្ងៃ ទៅដល់ ៨៣.៥២០ ម^៣/ ថ្ងៃ, កើន ១៤៨%។ មានន័យថា ប្រជាពលរដ្ឋ រួមទាំងផលិតករ សេវាករ និងអាជីវករជាច្រើន នឹងអាចទទួលបានសេវាទឹកស្អាតដែលមានគុណភាព សុវត្ថិភាព ចីរភាព និងថ្លៃសមរម្យ ដើម្បីធ្វើឱ្យសុខុមាលភាពកាន់តែល្អប្រសើរ និងជីវភាពកាន់តែរីកចម្រើន។

ប្រព័ន្ធផ្គត់ផ្គង់ទឹកស្អាតថ្មីដែលដាក់សម្ពោធ​ជា​ផ្លូវការ​ចំណាយថវិកាសរុបប្រមាណ ៣១,៧៧ លានដុល្លារអាមេរិក ដែលជាគម្រោង​សហហិរញ្ញប្បទាន​ពីធនាគារអភិវឌ្ឍន៍អាស៊ី ទីភ្នាក់ងារបារាំងសម្រាប់ការអភិវឌ្ឍ និងថវិកាបដិភាគរបស់រាជរដ្ឋាភិបាលកម្ពុជា។

គម្រោងនេះមានទីតាំងស្ថិតក្នុងភូមិកំពង់សីមានៃក្រុងបាត់ដំបង ដោយបានចាប់ផ្តើមសាងសង់ក្នុងខែកក្កដា ឆ្នាំ២០២២ និងបញ្ចប់ការសាងសង់ក្នុងខែធ្នូ ឆ្នាំ២០២៥ ដែលរួមមានស្ថានីយបូមទឹកឆៅមួយ រោងចក្រប្រព្រឹត្តកម្មទឹកស្អាតសមត្ថភាព ៥០.០០០ ម៉ែត្រគីបក្នុងមួយថ្ងៃ និងបណ្តាញចែកចាយប្រវែង ៩៤ គីឡូម៉ែត្រ។

អ្នកស្រី Yasmin Siddiqi នាយិកាប្រចាំប្រទេសកម្ពុជានៃធនាគារអភិវឌ្ឍន៍អាស៊ី បានរំលេចពីគុណប្រយោជន៍​ដ៏ទូលំទូលាយនៃគម្រោងដោយលើកឡើងថា ការផ្គត់ផ្គង់ទឹកស្អាតដែលអាចទុកចិត្តបាន លើកកម្ពស់សុខភាពសាធារណៈ សន្សំពេលវេលាសម្រាប់គ្រួសារ និងគាំទ្រកំណើនសេដ្ឋកិច្ចក្នុងមូលដ្ឋាន។

ខណៈដែលនគរូបនីយកម្មកំពុងមានសន្ទុះយ៉ាងលឿន ការទទួលបានទឹកស្អាតដែលមានសុវត្ថិភាព និងតម្លៃសមរម្យ មានសារសំខាន់ចំពោះផលិតភាព និងគុណភាពជីវិត។

ដៃគូសំខាន់មួយទៀតរបស់គម្រោងគឺទីភ្នាក់ងារបារាំងសម្រាប់ការអភិវឌ្ឍ (AFD) ដែលបាននិងកំពុងគាំទ្រវិស័យទឹកស្អាតនៅកម្ពុជាតាំងពីទសវត្សរ៍ឆ្នាំ១៩៩០។

អ្នកស្រី Sandrine Boucher នាយិកាប្រចាំប្រទេសកម្ពុជា របស់ AFD បានលើកឡើងថា សមិទ្ធផលថ្មីនេះ​គឺ​លើស​ពី​ហេដ្ឋារចនាសម្ព័ន្ធទឹកស្អាត។ វាគឺជាការវិនិយោគទៅលើប្រជាជន សុខភាពសាធារណៈ និងអនាគតរបស់ក្រុងបាត់ដំបង។

គម្រោងនេះក៏បង្ហាញពីភាពជាដៃគូដ៏រឹងមាំ រវាងរាជរដ្ឋាភិបាលកម្ពុជា និងដៃគូអភិវឌ្ឍន៍ ក្នុងការលើកកម្ពស់វិស័យទឹកស្អាត រួមចំណែកកែលម្អជីវភាពរស់នៅ និងគាំទ្រការអភិវឌ្ឍទីក្រុង និងតំបន់ប្រជុំជនប្រកបដោយចីរភាព​ និងបរិយាបន្ន។  

The post ​ទឹកស្អាតខេត្តបាត់ដំបងពង្រីក​សេវា​​ផ្គត់ផ្គង់ទឹកស្អាត​កើនគុណជាពីរ ក្រោយ​សម្ពោធប្រព័ន្ធផ្គត់​ផ្គង់ទឹកស្អាត​ថ្មី​បន្ថែម appeared first on Kampuchea Thmey Daily.

លោករដ្ឋមន្ត្រី បានលើកឡើងថា កម្ពុជាត្រូវការប្រព័ន្ធអេកូឡូស៊ីនវានុវត្តន៍មួយរឹងមាំ និងមានការតភ្ជាប់គ្នាយ៉ាងជិតស្និទ្ធរវាងតួអង្គសំខាន់ៗដូចជាស្ថាប័នរដ្ឋ គ្រឹះស្ថានសិក្សាស្រាវជ្រាវ វិស័យឯកជន ធុរកិច្ចថ្មី វិនិយោគិន និងនវានុវត្តន៍ករនៅកម្រិតមូលដ្ឋាន ដើម្បីស្វែងរកដំណោះស្រាយបញ្ហាសង្គម ឬតម្រូវការទីផ្សារជាក់លាក់មួយ។

លោករដ្ឋមន្ត្រីលើកឡើងនៅក្នុងវេទិការពិភាក្សា នៃទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ លើកទី៤។

វេទិកាពិភាក្សាកម្រិតខ្ពស់ស្តីពីការកសាងប្រព័ន្ធអេកូឡូស៊ីនវានុវត្តន៍ជាតិ ត្រូវបានរៀបចំឡើងក្នុងឱកាសនៃទិវាជាតិវិទ្យា សាស្ត្រ បច្ចេកវិទ្យា និងនវានុវត្តន៍ លើកទី៤ ដោយមានការចូលរួមពីតំណាងក្រសួង-ស្ថាប័ន ដៃគូអភិវឌ្ឍន៍ និងភាគីពាក់ព័ន្ធ ដោយផ្តោតលើការលើកកម្ពស់សហថាមពលរវាងគោលនយោបាយ ការវិនិយោគ និងតម្រូវការទីផ្សារ ឆ្ពោះទៅការអភិវឌ្ឍសេដ្ឋកិច្ចដែលជំរុញដោយនវានុវត្តន៍។

កិច្ចពិភាក្សាបានផ្តោតលើភាពចាំបាច់នៃការផ្លាស់ប្តូរពីការចាប់យកបច្ចេកវិទ្យា ទៅកំណើនដែលដឹកនាំដោយនវានុវត្តន៍។ វាគ្មិនបានរំលេចចំណុចគន្លឹះនៃការពង្រឹងអភិបាលកិច្ចវិទ្យាសាស្ត្រ បច្ចេកវិទ្យា និងនវានុវត្តន៍ ការអភិវឌ្ឍហេដ្ឋារចនាសម្ព័ន្ធគុណភាពជាតិ ការបង្កើនទុនវិនិយោគលើការស្រាវជ្រាវនិងអភិវឌ្ឍន៍ (R&D) និងការផ្សារភ្ជាប់សមិទ្ធផលនវានុវត្តន៍ទៅនឹងតម្រូវការជាក់ស្តែងរបស់វិស័យឯកជន។

កិច្ចពិភាក្សាបានរំលេចវឌ្ឍនភាពនៃការរៀបចំយុទ្ធសាស្ត្រអភិវឌ្ឍន៍ធុរកិច្ចថ្មី (Startup) ដែលនឹងដាក់ចេញនូវវិធានការ​មុតស្រួច រួមទាំងការផ្តល់ការលើកទឹកចិត្តដល់ធុរកិច្ចថ្មីផ្នែកបច្ចេកវិទ្យា ការបង្កើតយន្តការហិរញ្ញប្បទានចម្រុះសម្រាប់ការស្រាវជ្រាវនិងអភិវឌ្ឍន៍ និងការផ្តល់រយៈពេលអនុគ្រោះដើម្បីអនុញ្ញាតឱ្យសហគ្រិន និងនវានុវត្តន៍ករមានលទ្ធភាពសាកល្បង​គំនិតអាជីវកម្ម ក្នុងបរិយាកាសអនុលោមភាពកម្រិតទាប។

វេទិកាពិភាក្សាបានផ្តោតលើការដោះស្រាយបញ្ហាប្រឈមជាប្រព័ន្ធ និងការបង្កើតបរិយាកាសធុរកិច្ចរឹងមាំសម្រាប់ធុរកិច្ចថ្មី និងសហគ្រាសធុនតូចនិងមធ្យម ដោយកំណត់នវានុវត្តន៍ជាស្នូលនៃបរិវត្តកម្មសេដ្ឋកិច្ច សម្រាប់ជាមាគ៌ាឆ្ពោះទៅការសម្រេចចក្ខុវិស័យកម្ពុជា ជាប្រទេសមានចំណូលខ្ពស់នៅឆ្នាំ២០៥០៕

The post រដ្ឋមន្ត្រីឧស្សាហកម្ម៖ កម្ពុជាត្រូវការប្រព័ន្ធអេកូឡូស៊ី នវានុវត្តន៍រឹងមាំ ដើម្បីស្វែងរកដំណោះស្រាយសង្គម appeared first on Kampuchea Thmey Daily.

ថ្លែងក្នុងពិធីប្រកាសផ្ទេរ និងតែងតាំងមុខតំណែងរដ្ឋាករទឹកស្វយ័តក្រុងភ្នំពេញ លោក​ ហែម វណ្ណឌី បាន​លើក​ឡើង​ថា ការតែងតាំងអគ្គនាយកបន្តវេន តបតាមបទដ្ឋានគតិយុត្តកំណត់ បង្ហាញពី​ការ​ប្តេជ្ញាចិត្ត​របស់​រាជ​រដ្ឋាភិបាល ក្នុង​ការ​ធានា​នូវ​អភិបាលកិច្ចល្អ និរន្តរភាព​ស្ថាប័ន និងការគ្រប់គ្រងប្រកបដោយប្រសិទ្ធភាព សម្រាប់​សហគ្រាស​សាធារណៈ​ដ៏មានសារសំខាន់នេះ។​

លោក​រដ្ឋមន្ត្រីបញ្ជាក់​ថា៖ «វិស័យទឹកស្អាតមិនមែន​មានតួនាទីត្រឹមតែជាមធ្យោបាយ​ដើម្បីដោះ​ស្រាយ​បញ្ហា​សុខុមាល​ភាព និងអនាម័យរបស់ប្រជាពលរដ្ឋប៉ុណ្ណោះទេ ប៉ុន្តែជាកម្លាំងចលករដ៏មានសក្តានុពល ក្នុង​ការជំរុញ​ការ​អភិវឌ្ឍ​សេដ្ឋកិច្ច-សង្គម ជាពិសេសនៅតាមតំបន់ជនបទ តាមរយៈការលើកកម្ពស់ផលិតភាព ការ​បង្កើន​សកម្មភាព​សេដ្ឋកិច្ច និងការគាំទ្រដល់ដំណើរការឧស្សាហូបនីយកម្ម ដែល​រួម​ចំណែក​ដល់​ការ​អភិវឌ្ឍ​សេដ្ឋកិច្ច​ជាតិ»។

ក្នុងរយៈពេលប៉ុន្មានបីទស្សវត្សរ៍កន្លងមក រដ្ឋាករទឹកស្វយ័ត​ក្រុងភ្នំពេញ​បានប្រែក្លាយ​ជា​សហគ្រាស​សាធារណៈ​ដ៏ជោគជ័យមួយនៅកម្ពុជា ដែលត្រូវបានទទួលស្គាល់យ៉ាងទូលំទូលាយ ចំពោះ​ប្រព័ន្ធ​គ្រប់គ្រង​ប្រកប​ដោយ​ប្រសិទ្ធភាព និងសមត្ថភាពបច្ចេក​ទេសខ្ពស់។

បច្ចុប្បន្ន រដ្ឋាករទឹកស្វយ័តក្រុងភ្នំពេញមានសមត្ថភាពផលិតទឹកស្អាតបានជាង ១ លានម៉ែត្រគូបក្នុងមួយថ្ងៃ មានបណ្តាញ​ចែកចាយទឹកស្អាតប្រវែងសរុប ៥.៦៤៦ គីឡូម៉ែត្រ និងផ្គត់ផ្គង់ទឹកស្អាតដល់អតិថិជនចំនួន ៥៣១.៣០១ តំណ នៅក្នុងរាជធានីភ្នំពេញ និងតំបន់ជុំវិញ។

គុណភាពទឹកស្អាតរបស់រដ្ឋាករទឹកស្វយ័តក្រុងភ្នំពេញបន្តរក្សាភាពអនុលោមតាមស្តង់ដាររបស់អង្គការសុខភាពពិភព​លោក ទន្ទឹមនឹងនោះ អត្រាប្រមូលប្រាក់ថ្លៃសេវាទឹកស្អាតសម្រេចបាន ៩៩,៩% ដែលបង្ហាញពីប្រសិទ្ធភាពប្រតិបត្តិការខ្ពស់។

លោក​រដ្ឋមន្ត្រី​ ក៏​បានវាយតម្លៃខ្ពស់ចំពោះសមិទ្ធផល និងការរួមចំណែករបស់​អតីត​អគ្គនាយក​ដែលទើបចូលនិវត្តន៍ និងត្រូវបានរាជរដ្ឋាភិបាលតែងតាំងជារដ្ឋលេខាធិការនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ចំពោះការខិតខំប្រឹងប្រែងដឹកនាំ និងបម្រើស្ថាប័ននេះអស់រយៈពេល ៣៧ឆ្នាំ។

លោក​រដ្ឋ​មន្ត្រី​មាន​ជំនឿថា ក្រោមការដឹកនាំរបស់អគ្គនាយកថ្មី រដ្ឋាករទឹកស្វយ័តក្រុងភ្នំពេញ នឹង​បន្ត​ពង្រឹង​កេរ្តិ៍ឈ្មោះ និងសក្តានុពលរបស់ខ្លួន ក្នុងនាមជា «រៀមច្បង» ក្នុងវិស័យនេះ មានមរតកសមិទ្ធផល និងសមត្ថភាព ដើម្បីជួយរែកពន់ការអភិវឌ្ឍវិស័យទឹកស្អាតក្នុងក្របខណ្ឌទូទាំងប្រទេស។

លោក​រដ្ឋមន្ត្រី​បានលើកទឹកចិត្តឱ្យថ្នាក់ដឹកនាំ និងបុគ្គលិក​ទាំងអស់​របស់​រដ្ឋាករ​ទឹក​ស្វយ័ត​ក្រុង​ភ្នំពេញ បន្តពង្រឹងសមត្ថភាពវិជ្ជាជីវៈ តម្លាភាព និងគោរពវិន័យ ព្រមទាំង​លើក​កម្ពស់​គុណភាព​សេវាកម្ម​ជា​បន្តបន្ទាប់៕

The post វិស័យទឹកស្អាតមិនត្រឹម​តែដោះស្រាយបញ្ហាសុខុមាលភាពពលរដ្ឋ ហើយក៏ជាកម្លាំងចលករជំរុញការអភិវឌ្ឍសេដ្ឋកិច្ច appeared first on Kampuchea Thmey Daily.

ថ្លែង​ក្នុង​ពិធី​បិទ​សន្និបាតលើកទី១៤ របស់សមាគមអ្នកផ្គត់ផ្គង់ទឹកស្អាតកម្ពុជា លោក រដ្ឋមន្ត្រី ហែម វណ្ណឌី បានលើកឡើងថា សមិទ្ធផល​ដែល​សមាគម និង​សមាជិក​សមាគម​សម្រេច​បាន គឺជា​ការ​រួម​ចំណែក​សំខាន់ ក្នុង​ការ​អនុវត្ត​គោល​នយោបាយ​អភិវឌ្ឍសង្គម-សេដ្ឋកិច្ច តាមរយៈ​ការផ្តល់​សេវា​ផ្គត់ផ្គង់​​ទឹកស្អាត​ដល់​អ្នក​ប្រើប្រាស់​ទូទៅ និង​ដល់​​សកម្មភាព​សេដ្ឋកិច្ច​នានា ដូច​ជា​វិស័យ​ឧស្សាហកម្ម ផលិតកម្ម អាជីវកម្ម និង​សេវាកម្ម​ឱ្យកាន់​តែ​រីក​ចម្រើន។

ជា​មួយ​គ្នា​នេះ លោក រដ្ឋមន្ត្រី ក៏បានរំលេចពីតួនាទីសំខាន់របស់សមាគម ជាដៃគូសហការគន្លឹះរបស់ក្រសួង ក្នុង​ការអភិវឌ្ឍ និងគ្រប់គ្រងវិស័យទឹកស្អាតនៅកម្ពុជា ដែលគាំទ្រដល់គោលនយោបាយអភិវឌ្ឍន៍របស់រាជរដ្ឋាភិបាល និង គោលដៅអភិវឌ្ឍន៍ប្រកបដោយចីរភាពទី៦ ស្តីពីទឹកស្អាត និងអនាម័យ។

ជាក់ស្តែង នៅ​ក្នុងឆ្នាំ២០២៥ សមាគមអ្នកផ្គត់ផ្គង់ទឹកស្អាតកម្ពុជា បានបំពេញបេសកកម្មរបស់ខ្លួន ដោយពង្រឹងកិច្ចសហការជាមួយក្រសួង-ស្ថាប័ន និងដៃគូអភិវឌ្ឍន៍ ពង្រីកកម្មវិធីបណ្តុះបណ្តាលដល់សមាជិក និងគាំទ្រការពង្រីកសេវាផ្គត់ផ្គង់ទឹកស្អាតទៅកាន់សហគមន៍។

ទន្ទឹម​នឹង​នេ លោក​រដ្ឋមន្ត្រី ហែម វណ្ណឌី ក៏​បានលើកទឹកចិត្តឱ្យប្រតិបត្តិករទឹកស្អាតទាំងអស់ បន្តពង្រឹង​សមត្ថភាព​ស្ថាប័ន លើក​កម្ពស់​ការ​ប្រើប្រាស់​បច្ចេកវិទ្យា​ទំនើប អភិវឌ្ឍជំនាញបច្ចេកទេស និងការ​គ្រប់គ្រង​អាជីវកម្ម ពិសេសដើម្បីកាត់បន្ថយអត្រាទឹកបាត់បង់ឱ្យនៅកម្រិតអប្បរមា ព្រមទាំងពង្រីកសេវា ដើម្បី​ឱ្យ​ពលរដ្ឋ​ទាំង​​អស់​ក្នុង​ដែន​អាជ្ញាបណ្ណ​របស់ខ្លួនទទួលបានសេវាទឹកស្អាតប្រើប្រាស់។

លោក​រដ្ឋមន្ត្រី ក៏​បានបន្ថែមថា កិច្ចសហការរវាងស្ថាប័នពាក់ព័ន្ធទាំងអស់ នឹងបន្តជំរុញការអភិវឌ្ឍវិស័យទឹកស្អាត និងរួមចំណែកលើកកម្ពស់សុខុមាលភាពប្រជាពលរដ្ឋ និងការអភិវឌ្ឍសេដ្ឋកិច្ចមូលដ្ឋាន៕

The post កម្ពុជាជំរុញឱ្យប្រតិបត្តិករទឹកស្អាតឯកជនពង្រឹងកិច្ចសហការ ចាប់យកបច្ចេកវិទ្យា និងពន្លឿនការពង្រីកសេវាឱ្យបានខ្លាំងក្លាបន្ថែមទៀត appeared first on Kampuchea Thmey Daily.

លើក​ឡើង​ក្នុងសិក្ខាសាលា ស្តីពី «ការពង្រឹងភាពធន់ជាតិ និងកាលា​នុវត្តភាព​នៃ​យុទ្ធសាស្ត្រ​អភិបាល​កិច្ចវិទ្យាសាស្ត្រ បច្ចេកវិទ្យា នវានុវត្តន៍ ឧស្សាហកម្ម និងពាណិជ្ជកម្មកម្ពុជា» លោក ហែម វណ្ណឌី បានរំលេច​អំពី​សមត្ថភាព​ឧស្សាហកម្ម​កម្ពុជា ទោះ​បី​ប្រឈម​នឹង​បញ្ហានានា។

លោក​រដ្ឋមន្រ្តី​បានលើកឡើងថា «ប្រវត្តិសាស្ត្រ​បាន​បញ្ជាក់​ប្រាប់​យើងថា នៅពេល​កម្ពុជា​ទទួល​រងការ​គំរាម​កំហែង កម្ពុជា​នឹងងើបឡើង, នៅពេលគេព្យាយាមបិទខ្ទប់ទីផ្សាររបស់យើង យើងបង្កើតទីផ្សារថ្មីៗ, នៅពេល​គេ​ព្យាយាម​កាត់​ផ្តាច់​ខ្សែច្រវាក់ផ្គត់ផ្គង់របស់យើង យើងពង្រឹងសមត្ថភាពផលិតក្នុងស្រុក ហើយនៅ​ពេល​គេ​គៀប​សង្កត់​យើង​កាន់​តែខ្លាំង យើង​ច្នៃប្រឌិត និងបង្កើតនវានុវត្តន៍កាន់តែច្រើន»។

បន្ថែម​ជា​មួយ​គ្នា​នេះ លោក ហែម វណ្ណឌី ក៏​បាន​គូស​បញ្ជាក់​អំពី​ភាពខ្លាំង​សេដ្ឋកិច្ចគឺជាគ្រឹះសម្រាប់សន្តិសុខជាតិ ហើយ​កម្ពុជាត្រូវបន្តធ្វើពិពិធកម្មសេដ្ឋកិច្ច ពង្រីកទីផ្សារ និងពង្រឹងសមត្ថភាពផលិតក្នុងស្រុក ដើម្បី​កាត់​បន្ថយ​ការ​ពឹងផ្អែក និងបង្កើនភាពម្ចាស់ការ។

គិតត្រឹមចុងឆ្នាំ២០២៥ កម្ពុជាមានរោងចក្រធុនធំកំពុងដំណើរការចំនួន ៣.០៨៣ រោងចក្រ ដែលផ្តល់ការងារជាង ១,២៦ លាននាក់ ក្នុងនោះស្ត្រីមានជាង ៧១ ភាគរយ។

លោក ហែម វណ្ណឌី បានបញ្ជាក់ថា «ទោះបីការផ្គត់ផ្គង់ប្រេង និងឧស្ម័នលើទីផ្សារសកលកំពុងត្រូវបានរំខាន បច្ចុប្យន្ន កម្ពុជាមិនទាន់មានរោងចក្របិទទ្វារ ឬផ្អាកខ្សែច្រវាក់ផលិតកម្ម ដោយសារបញ្ហាថាមពលនោះទេ។

កម្ពុជាមានសហគ្រាសធុនមីក្រូ តូច និងមធ្យមប្រមាណ ៧៥ ម៉ឺនមូលដ្ឋាន ដែលប្រើកម្លាំងពលកម្មជិត ៣ លាននាក់ ដោយមិនទាន់គិតអ្នកសេដ្ឋកិច្ចក្រៅប្រព័ន្ធជាច្រើនលាននាក់ទៀត។

ជា​មួយ​គ្នា​នេះ លោក​រដ្ឋមន្ត្រីក៏បានអំពាវនាវឱ្យមានការគាំទ្រកាន់តែខ្លាំងចំពោះការផលិត និងកែច្នៃក្នុងស្រុក និងលើកកម្ពស់មនសិកាស្នេហាជាតិ ក្នុងការអភិវឌ្ឍសេដ្ឋកិច្ច ដោយលើកឡើងថា៖ “ការឆ្លើយតបដ៏មានឥទ្ធិពលបំផុតចំពោះការគំរាមកំហែងសេដ្ឋកិច្ច មិនមែនជាកំហឹងនោះទេ ប៉ុន្តែគឺ ផលិតភាព នវានុវត្តន៍ និងសាមគ្គីភាពជាតិ៕

The post លោក ហែម វណ្ណឌី៖ ទាំងសង្គ្រាមឈ្លានពាន-ពន្ធបដិកា-បញ្ហានៅមជ្ឈឹមបូព៌ា មិនបានធ្វើឱ្យរង្គោះរង្គើខឿនឧស្សាហកម្មកម្ពុជាឡើយ appeared first on Kampuchea Thmey Daily.

ថ្លែងក្នុងពិធីបិទសន្និបាតបូកសរុបលទ្ធផលការងារអាជីវកម្មឆ្នាំ ២០២៥ និងលើកទិសដៅការងារឆ្នាំ២០២៦ របស់រដ្ឋាករទឹកស្វយ័តក្រុងភ្នំពេញ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យា​សាស្ត្រ បច្ចេកវិទ្យា និងនវានុវត្តន៍ បានថ្លែង​ថា សមិទ្ធផលទាំងនេះគឺជាសក្ខីភាពនៃការរីកចម្រើនឥតឈប់ឈរ និងជាមោទនភាពរបស់អង្គភាព និងបុគ្គលិកគ្រប់លំដាប់ថ្នាក់។

បច្ចុប្បន្ន រដ្ឋាករទឹកស្វយ័តក្រុងភ្នំពេញកំពុងផ្តល់សេវាទឹកស្អាតជូនអតិថិជនជាង ៥៣ ម៉ឺនតំណ ដែលមានប្រជាពលរដ្ឋជិត ៣ លាននាក់ក្នុងរាជធានីភ្នំពេញ និងតំបន់ជុំវិញ។

ទន្ទឹមនឹងសមិទ្ធផលទាំងនេះ រដ្ឋមន្រ្តីក្រសួង ឧស្សាហកម្ម វិទ្យា​សាស្ត្រ បច្ចេកវិទ្យា និងនវានុវត្តន៍ ​បានណែនាំឱ្យរដ្ឋាករទឹកស្វយ័តក្រុងភ្នំពេញ យកចិត្តទុកដាក់ដោះស្រាយបញ្ហាប្រឈមជាយុទ្ធសាស្ត្រ ដើម្បីធានានិរន្តរភាពរយៈពេលវែង តាមរយៈការពង្រីកការលក់ទឹកដុំទៅតំបន់សក្តានុពលសេដ្ឋកិច្ច, ពន្លឿនការពង្រីកបណ្តាញដើម្បីឱ្យប្រជាជន ១០០% ក្នុងរាជធានីភ្នំពេញ និងក្រុងតាខ្មៅ មានទឹកស្អាតប្រើប្រាស់យ៉ាងយូរត្រឹមឆ្នាំ២០២៨, និងត្រួតពិនិត្យឡើងវិញនូវការផ្តល់សេវាដោយភាគីទីបី។

បន្ថែមពីនេះ លោក​រដ្ឋមន្រ្តី​ក៏បានជំរុញការ​បន្តធ្វើសវនកម្មថាមពលក្នុងដំណើរការផលិតកម្ម ការពង្រឹងទំនើបកម្មស្ថាប័ន និងការកាត់បន្ថយអត្រាទឹកគ្មានចំណូល ដោយលើកឡើងថា ការកាត់បន្ថយបាន ១% គឺស្មើនឹងបង្កើនចំណូលបាន ១លានដុល្លារ។

ចំពោះសន្តិសុខសាយប័រ និងការការពារប្រព័ន្ធបច្ចេកវិទ្យាសំខាន់ៗ លោក​បានណែនាំឱ្យរដ្ឋាករទឹក​ស្វយ័ត​ក្រុងភ្នំពេញ ធានាឱ្យបាននូវនិរន្តរភាពប្រតិបត្តិការ ដោយសង្កត់ធ្ងន់ថា ទឹកស្អាតគឺជាសេវា
សាធារណៈដ៏សំខាន់បំផុតសម្រាប់ប្រជាពលរដ្ឋ និងសកម្មភាពសេដ្ឋកិច្ច។

ក្នុងពិធីបិទសន្និបាតបូកសរុបលទ្ធផលការងារអាជីវកម្មឆ្នាំ ២០២៥ និងលើកទិសដៅការងារឆ្នាំ២០២៦ របស់រដ្ឋាករទឹកស្វយ័តក្រុងភ្នំពេញ មាន​ការ​ចុះអនុស្សរណៈលើកិច្ចសហការផ្គត់ផ្គង់ទឹកដុំដល់ប្រតិបត្តិករ​ស្អាតឯកជន និងការដាក់ឱ្យដំណើរការជាផ្លូវការនូវកម្មវិធីផ្តល់សេវាតាមទូរសព្ទដៃ PPWSA Mobile App ដែលនឹងបន្ត​ពង្រឹងការផ្តល់សេវា និងកៀរគរការចូលរួមពីអតិថិជន៕

The post ឆ្នាំ២០២៥ រដ្ឋាករទឹកស្វយ័តក្រុងភ្នំពេញ ពង្រីកបណ្តាញ​ទឹក​ស្អាត​បន្ថែម ៣៩៩ គីឡូម៉ែត្រ គ្រប​ដណ្តប់​ដល់ ៨៨៧ ភូមិ ស្មើ ៩២% appeared first on Kampuchea Thmey Daily.