ទីភ្នាក់ងារព័ត៌មាន Reuters បានដកស្រង់សម្តីរបស់លោករូប៊ីយ៉ូ ដែលឆ្លើយតប ក្នុងអំឡុងពេល ការសួរដេញដោលពីសំណាក់សមាជិកសភា ស្តីអំពីជម្លោះជាមួយអ៊ីរ៉ង់ កាលពីថ្ងៃអង្គារ ទី២ ខែមិថុនា ឆ្នាំ២០២៦ ថា៖ «អ្វីគ្រប់យ៉ាងដែលត្រូវបានពិភាក្សាជាមួយពួកគេ (អ៊ីរ៉ង់) គឺថា រាល់ការបន្ធូរបន្ថយទណ្ឌកម្មណាមួយ ត្រូវផ្អែកលើលក្ខខណ្ឌជាក់ស្តែង ដែលមានន័យថា វាត្រូវតែធ្វើឡើង ជាការដោះដូរទៅនឹងមូលហេតុចម្បង ដែលនាំឲ្យមានការដាក់ទណ្ឌកម្មទាំងនោះតាំងពីដំបូង ពោលគឺកម្មវិធីនុយក្លេអ៊ែររបស់ពួកគេ តែម្តង»។

នេះមានន័យថា ទោះច្រកសមុទ្រ Hormuz បើកឡើងវិញ ក៏អាមេរិក អត់ដកទណ្ឌកម្មដែរ បើចង់ឲ្យអាមេរិក ដក គឺមានលក្ខខណ្ឌតែមួយគត់ នោះគឺ អ៊ីរ៉ង់ ត្រូវបោះបង់ចោល កម្មវិធីនុយក្លេអ៊ែរ ជាមុនសិន។

ការដកទណ្ឌកម្មនេះ ត្រូវបានដាក់បញ្ជូលជាលក្ខខណ្ឌមួយ ក្នុងការចរចានៃកិច្ចព្រមព្រៀងសន្តិភាព រវាងអាមេរិកនិងអ៊ីរ៉ង់ ប៉ុន្តែការចរចាត្រូវជាប់គាំង ដោយសារតែមានឧបសគ្គមួយចំនួន។

អ្វីដែលកាន់តែយ៉ាប់យ៉ឺន គឺចុងក្រោយនេះ អ៊ីរ៉ង់ ដល់ថ្នាក់ប្រកាសថា ខ្លួនផ្អាកកិច្ចចរចាសន្តិភាពជាមួយ អាមេរិកហើយ ព្រោះតែអ៊ីស្រាអែល មិនព្រមឈប់វាយប្រហារ នៅលីបង់ សោះ។

ក្រោយមក ប្រធានាធិបតីអាមេរិក ដូណាល់ ត្រាំ ក៏ប្រកាសដែរ​ថា លោកអត់ខ្វល់ទេ ជុំវិញវាសនានៃកិច្ចចរចាសន្តិភាពជាមួយអ៊ីរ៉ង់ ព្រោះលោកមានអារម្មណ៍ថា ការចរចានេះ ចាប់ផ្តើមទៅជាគួរឲ្យធុញទ្រាន់ និងស៊ីពេលវែងឆ្ងាយហួសហេតុពេក ដោយសារតែភាគីអ៊ីរ៉ង់ ហាក់មានចេតនាអូសពន្យារពេល។

យ៉ាងណា មុននេះប្រមុខសេតវិមាន បានបញ្ជាក់ថា គ្មានការលើកលែងឡើយ កិច្ចព្រមព្រៀងណាមួយ ត្រូវតែច្បាស់ថា ទីក្រុងតេហេរ៉ង់ នឹងគ្មានថ្ងៃមានអាវុធនុយក្លេអ៊ែរ ដាច់ខាត។

រឿងនុយក្លេអ៊ែរ និងសារធាតុអ៊ុយរ៉ាញ៉ូម គឺជាឧបសគ្គធំ ដែលធ្វើឲ្យការចរចាត្រូវជាប់គាំង ដោយកន្លងមក ទីក្រុងតេហេរ៉ង់ តែងបញ្ជាក់ជំហរយ៉ាងច្បាស់ថា ខ្លួននឹងមិនព្រមបោះបង់ចោលកម្មវិធីនុយក្លេអ៊ែរ និងប្រគល់សារធាតុអ៊ុយរ៉ាញ៉ូម ទៅឲ្យអាមេរិក ដាច់ខាត៕

អត្ថបទ៖ សុខ សុវណ្ណ

The post រូប៊ីយ៉ូ បញ្ជាក់ច្បាស់ថា អាមេរិក អត់ដកទណ្ឌកម្មអ៊ីរ៉ង់ទេ ទោះ ច្រក Hormuz បើកវិញក៏ដោយ appeared first on Kampuchea Thmey Daily.

យោងតាមការចេញផ្សាយពីសារព័ត៌មាន timesofisrael សេចក្តីថ្លែងការណ៍ពីការិយាល័យប្រធានាធិបតី បានគូសបញ្ជាក់ថា លោក Aoun បានសង្កត់ធ្ងន់ថា បទឈប់បាញ់គឺជារឿងចាំបាច់បំផុត ដើម្បីបើកផ្លូវឆ្ពោះទៅរក «ជំហានបន្ទាប់ណាមួយ»។

ជាមួយគ្នានេះ លោក  រូប៊ីយ៉ូ ក៏បានសង្កត់ធ្ងន់ជាថ្មីផងដែរ អំពីការគាំទ្ររបស់រដ្ឋាភិបាលទីក្រុងវ៉ាស៊ីនតោន ចំពោះស្ថិរភាព ឯករាជ្យភាព និងអធិបតេយ្យភាពរបស់លីបង់ នៅលើទឹកដីទាំងអស់របស់ខ្លួន ក៏ដូចជាសិទ្ធិមិនអាចកាត់ថ្លៃបាន ក្នុងការសម្រេចវាសនាដោយខ្លួនឯង។

ក្រសួងការបរទេសអាមេរិក បានសម្តែងការកោតសរសើរចំពោះ «ភាពក្លាហាន និងចក្ខុវិស័យ» របស់លោក Aoun ក្នុងការបន្តការចរចាដោយផ្ទាល់ជាមួយអ៊ីស្រាអែល «សូម្បីតែនៅក្នុងស្ថានភាពដែលក្រុមហេសបូឡា នៅតែបន្តព្យាយាមរារាំងកិច្ចចរចាទាំងនោះ ដោយយកប្រជាជនលីបង់ធ្វើជាចំណាប់ខ្មាំងក៏ដោយ»។

លោក  រូប៊ីយ៉ូ បានបញ្ជាក់ជាថ្មីថា ក្រុមហេសបូឡា ត្រូវទទួលខុសត្រូវទាំងស្រុងចំពោះការប្រយុទ្ធគ្នាដែលកំពុងបន្ត ហើយបានសង្កត់ធ្ងន់ លើតម្រូវការឲ្យក្រុមហេសបូឡា បញ្ឈប់ការវាយប្រហារលើអ៊ីស្រាអែលជាបន្ទាន់ ដើម្បីបើកផ្លូវឲ្យមានការបន្ធូរបន្ថយភាពតានតឹង។

ក្រសួងការបរទេសអាមេរិកក៏បានបញ្ជាក់បន្ថែមទៀតថា «លោករដ្ឋមន្ត្រីបានអះអាងជាថ្មីថា ទីក្រុងវ៉ាស៊ីនតោន គាំទ្រយ៉ាងពេញទំហឹងចំពោះរដ្ឋាភិបាលលីបង់ ខណៈខ្លួនកំពុងធ្វើការដើម្បីចាប់យកឱកាសប្រវត្តិសាស្ត្រមួយនេះ ក្នុងការនាំមកនូវសន្តិភាព ការស្តារឡើងវិញ និងអនាគតដ៏ល្អប្រសើរសម្រាប់ប្រជាជនរបស់ខ្លួន»។

មន្ទីរបញ្ចកោណ បានធ្វើជាម្ចាស់ផ្ទះរៀបចំកិច្ចសន្ទនាយោធាជុំដំបូងរវាងលីបង់ និងអ៊ីស្រាអែលកាលពីថ្ងៃសុក្រ ទោះបីជាមានការវាយប្រហារបន្តបន្ទាប់ពីសំណាក់អ៊ីស្រាអែល ទៅលើអ្វីដែលខ្លួនអះអាងថា ជាគោលដៅរបស់ក្រុមហេសបូឡានៅទូទាំងប្រទេសលីបង់ក៏ដោយ៕

អត្ថបទ ៖ សាង ស្រីល័ក្ខ

The post លីបង់ ចាត់ទុកបទឈប់បាញ់ជាមួយ អ៊ីស្រាអែល ជាលក្ខខណ្ឌចាំបាច់បំផុត ដើម្បីបន្តកិច្ចចរចា appeared first on Kampuchea Thmey Daily.

ថ្លែងប្រាប់អ្នកសារព័ត៌មាន ក្នុងអំឡុងដំណើរទស្សនកិច្ចទៅកាន់ប្រទេសឥណ្ឌា នៅថ្ងៃអង្គារ ទី២៦ ខែឧសភា ឆ្នាំ២០២៦ ប្រមុខការទូតកំពូលរបស់ទីក្រុងវ៉ាស៊ីនតោន បញ្ជាក់យ៉ាងច្បាស់ថា លោកមានជំនឿយ៉ាងមុតមាំថា អាមេរិក នឹងនៅតែអាចឈានដល់កិច្ចព្រមព្រៀង ជាមួយទីក្រុងតេហេរ៉ង់ បើទោះបីជាមាន ការវាយប្រហារលើកំពង់ផែ Bandar Abbas ភាគខាងត្បូងប្រទេសអ៊ីរ៉ង់ ក៏ដោយ។

យ៉ាងណា​ បើតាមសម្តីរបស់រដ្ឋមន្ត្រីរូបនេះ, លោកក៏កំពុងរង់ចាំអ៊ុតមើលលទ្ធផល នៃកិច្ចចរចាក្នុងប្រទេសកាតា ដូចគ្នា ថាតើ វានឹងមានវឌ្ឍនភាព ដែរឬក៏អត់?

នៅព្រឹកថ្ងៃអង្គារ (ពេលវេលានៅកម្ពុជា), សហរដ្ឋអាមេរិក បានបើកការវាយប្រហារថ្មី លើទីតាំងនុយក្លេអែរ នៅភាគខាងត្បូង ប្រទេសអ៊ីរ៉ង់ និងទូកអ៊ីរ៉ង់ដែលប៉ុនប៉ងដាក់មីន នៅច្រកសមុទ្រ Hormuz ក្នុងអ្វីដែលខ្លួន អះអាងថា គឺជាការបាញ់ការពារខ្លួន ប៉ុណ្ណោះ។

អ្នកនាំពាក្យបញ្ជាការដ្ឋានកណ្តាល សហរដ្ឋអាមេរិក (CENTCOM) លោក Timothy Hawkins បានថ្លែងប្រាប់ទូរទស្សន៍ CNN ថា៖ «កងកម្លាំងសហរដ្ឋអាមេរិកបានបើកការវាយប្រហារការពារខ្លួន ក្នុងតំបន់ភាគខាងត្បូងប្រទេសអ៊ីរ៉ង់នៅថ្ងៃនេះ ដើម្បីការពារកងទ័ពរបស់យើង ពីការគំរាមកំហែងនានាដែលបង្កឡើងដោយកងកម្លាំងអ៊ីរ៉ង់»។

ទោះបែបនេះក្តី ភ្លាមៗ CENTCOM មិនលម្អិតឡើយថាតើ ខ្លួនប្រើប្រាស់សព្វាវុធអ្វីខ្លះ ក្នុងការវាយប្រហារនេះ ខណៈភាគីអ៊ីរ៉ង់​ ក៏មិនទាន់ចេញមកនិយាយអ្វីដែរ៕

អត្ថបទ៖ សុខ សុវណ្ណ

The post ទើបវាយអ៊ីរ៉ង់ហើយ តែ លោក រូប៊ីយ៉ូ អះអាងថា កិច្ចព្រមព្រៀងសន្តិភាព នឹងនៅតែអាច សម្រេចបាន appeared first on Kampuchea Thmey Daily.

ទីភ្នាក់ងារ​​ព័ត៌មាន AFP ​រាយការណ៍​ថា​ ការឆ្លើយតបដ៏ក្តៅគគុករបស់​រដ្ឋមន្ត្រីការបរទេសអាមេរិក បានកើតឡើង បន្ទាប់ពីលោក Naim Qassem មេដឹកនាំក្រុមហេសបូឡា បានថ្លែងពីមុនមកថា «ប្រជាជនមានសិទ្ធិចូលរួមធ្វើបាតុកម្មតាមដងផ្លូវ និងផ្តួលរំលំរដ្ឋាភិបាល» ដើម្បីជាការឆ្លើយតបទៅនឹងការវាយប្រហាររបស់អ៊ីស្រាអែល និងការដាក់ទណ្ឌកម្មរបស់អាមេរិកលើស្ថាប័ន​ហិរញ្ញវត្ថុ al-Qard al-Hassan។

គួរបញ្ជាក់ថា al-Qard al-Hassan គឺជាស្ថាប័នមួយដែលមានទំនាក់ទំនងជាមួយក្រុមហេសបូឡា ដោយផ្តល់ប្រាក់កម្ចីគ្មានការប្រាក់ដល់សហគមន៍មូស្លីម Shia ដែលភាគច្រើនកំពុងជួបប្រទះការលំបាកផ្នែកហិរញ្ញវត្ថុ ចំពេលដែលលីបង់កំពុងរងវិបត្តិសេដ្ឋកិច្ច។

លោក Qassem បានលើកឡើងថា «ការឈ្លានពានលើ al-Qard al-Hassan គឺជាការឈ្លានពានប្រឆាំងនឹងប្រជាជនក្រីក្រ និងអ្នកមានប្រាក់ចំណូលមានកម្រិតរាប់សែននាក់»។ កន្លងមក រដ្ឋាភិបាលលីបង់បានរងសម្ពាធយ៉ាងខ្លាំងពីអាមេរិក ឲ្យចាត់វិធានការប្រឆាំងនឹងក្រុមហ៊ុនហិរញ្ញវត្ថុមួយនេះ ខណៈទីក្រុងវ៉ាស៊ីនតោនបង្កើនសម្ពាធលើក្រុម ហេសបូឡា។

លោក រូប៊ីយ៉ូ បានព្រមានត្រឡប់ទៅវិញថា «ការគំរាមកំហែងដោយអំពើហិង្សា និងការប៉ុនប៉ងផ្តួលរំលំរបស់ហេសបូឡា នឹងមិនត្រូវបានអនុញ្ញាតឲ្យទទួលបានជោគជ័យឡើយ។ យុគសម័យដែលក្រុមភេរវករចាប់ប្រទេសមួយទាំងមូលធ្វើជាចំណាប់ខ្មាំង ជិតដល់ទីបញ្ចប់ហើយ»។

បច្ចុប្បន្ន អាមេរិកកំពុងចរចាលើកិច្ចព្រមព្រៀងមួយជាមួយអ៊ីរ៉ង់ ដើម្បីបញ្ចប់សង្គ្រាមនៅមជ្ឈិមបូព៌ា។ យោងតាមរបាយការណ៍ពីសារព័ត៌មាន Axios បានឲ្យដឹងថា សេចក្តីព្រាងអនុស្សរណៈនៃការយោគយល់គ្នា (MOU) រវាងភាគីទាំងពីរ មានការចែងយ៉ាងច្បាស់ថា «សង្គ្រាមរវាងអ៊ីស្រាអែល និងក្រុមហេសបូឡា នៅលីបង់នឹងត្រូវបញ្ចប់»។

លោក Qassem បានបង្ហាញក្តីសង្ឃឹមចំពោះកិច្ចព្រមព្រៀងរវាងអ៊ីរ៉ង់ និងអាមេរិក ហើយសង្ឃឹមថា លីបង់នឹងត្រូវរាប់បញ្ចូលក្នុងលក្ខខណ្ឌនោះ។ ទោះជាយ៉ាងណាក៏ដោយ លោកបានអំពាវនាវម្តងទៀតដល់រដ្ឋាភិបាលលីបង់ ឲ្យបោះបង់ចោលការចរចាផ្ទាល់ជាមួយអ៊ីស្រាអែល ខណៈដែលការចរចាជុំទីបួនត្រូវបានគ្រោងធ្វើឡើងនៅថ្ងៃទី២ និងទី៣ នៃខែមិថុនា ខាងមុខនេះ នៅក្នុងទីក្រុងវ៉ាស៊ីនតោន។

ទោះបីជាមានកិច្ចព្រមព្រៀងឈប់បាញ់ ដែលបានចូលជាធរមានកាលពីថ្ងៃទី១៧ ខែមេសា និងត្រូវបានពង្រីកសុពលភាពបន្ថែមជាច្រើនសប្តាហ៍ក៏ដោយ ក៏អ៊ីស្រាអែលនៅតែបន្តវាយប្រហារលើអ្វីដែលខ្លួនពិពណ៌នាថាជាគោលដៅរបស់ក្រុមហេសបូឡា នៅលីបង់ ចំណែកឯក្រុមហេសបូឡា វិញ ក៏នៅតែបន្តការវាយប្រហារលើគោលដៅរបស់អ៊ីស្រាអែលនៅភាគខាងត្បូងប្រទេសផងដែរ៕

អត្ថបទ៖ សាង ស្រីល័ក្ខ

អ៊ីរ៉ង់ ព្រមាន ត្រាំ ពីការវាយបក បើហ៊ានបង្កសង្គ្រាមឡើងវិញ ស្រប​ពេល ប៉ាគីស្ថាន​កំពុង​ខ្នះខ្នែង​សម្របសម្រួល​

The post លោក រូប៊ីយ៉ូ ចោទក្រុម ហេសបូឡា ថា ព្យាយាម​រុញ​លីបង់ចូលក្នុង «ភាពវឹកវរ» ក្នុងដំណាក់​កាល​ចរចា​ appeared first on Kampuchea Thmey Daily.

រដ្ឋមន្ត្រី​ការបរទេស​គុយបា បានសរសេរនៅលើបណ្តាញសង្គម X ថា៖ «រដ្ឋមន្ត្រីការបរទេសអាមេរិកកំពុងភូតកុហកម្តងទៀត ដើម្បីញុះញង់ឲ្យមានការឈ្លានពានខាងយោធា ដែលនឹងបង្កឲ្យមានការបង្ហូរឈាមទាំងចំពោះពលរដ្ឋគុយបា និងពលរដ្ឋអាមេរិក»។

ការលើកឡើងរបស់លោក បានធ្វើឡើង បន្ទាប់ពីលោក រូប៊ីយ៉ូ  បានថ្លែងថា ប្រទេសគុយបាកំពុងបង្កជា «ការគំរាមកំហែងដល់សន្តិសុខជាតិ» ដល់សហរដ្ឋអាមេរិក។

លោក Rodriguez Parrilla បាននិយាយថា «គុយបាមិនមែនជាការគំរាមកំហែង ហើយក៏មិនដែលជាការគំរាមកំហែងដល់សន្តិសុខជាតិរបស់សហរដ្ឋអាមេរិកនោះឡើយ។ រដ្ឋាភិបាលអាមេរិកទៅវិញទេ ដែលបានធ្វើបាបប្រជាជនគុយបាយ៉ាងសាហាវឃោរឃៅ និងជាប្រព័ន្ធ ហើយនៅក្នុងប៉ុន្មានខែថ្មីៗនេះ បានចូលរួមក្នុងការបង្កឲ្យមានភាពអស់សង្ឃឹមក្នុងចំណោមប្រជាជន និងធ្វើឲ្យសេដ្ឋកិច្ចដួលរលំ តាមរយៈការហាមឃាត់ការនាំចូលប្រេងឥន្ធនៈ និងការបង្កើនការអនុវត្តច្បាប់ហ៊ុមព័ទ្ធក្រៅដែនដីរបស់ខ្លួន»។

លោក Rodriguez Parrilla ក៏បានទាត់ចោលផងដែរ ចំពោះការចាត់ថ្នាក់របស់សហរដ្ឋអាមេរិក ដែលថាគុយបាជាប្រទេសគាំទ្រភេរវកម្ម។

លោកបានបន្ថែមថា «លោក រូប៊ីយ៉ូ នៅតែជម្នះលើការភូតកុហក ដោយចាត់ទុកគុយបាជាប្រទេសឧបត្ថម្ភធនដល់ភេរវកម្ម ខណៈដែលអាមេរិកខ្លួនឯងទៅវិញទេ ដែលបានធ្វើសកម្មភាពដោយឃុបឃិតគ្នា និងមិនមានទោសទណ្ឌអស់រយៈពេលរាប់ទសវត្សរ៍មកហើយ តាមរយៈការអនុញ្ញាតឲ្យមានការរៀបចំ និងការអនុវត្តសកម្មភាពភេរវកម្មប្រឆាំងនឹងគុយបាចេញពីទឹកដីរបស់ខ្លួន និងការផ្តល់ជម្រកប្រកបដោយសុវត្ថិភាពដល់ជនភេរវករដែលបានសារភាពទោសរួចជាស្រេច»។

សូមរម្លឹកដែរថា ភាពតានតឹងរវាងក្រុងវ៉ាស៊ីនតោន និងក្រុង Havana បានផ្ទុះឡើងជាថ្មីយ៉ាងខ្លាំង បន្ទាប់ពីរដ្ឋបាលអាមេរិកថ្មីរបស់លោក ដូណាល់ ត្រាំ និងរដ្ឋមន្ត្រីការបរទេស លោក ម៉ាកូ រូប៊ីយ៉ូ បានបង្ហាញជំហររឹងត្អឹង។ ស្ថានភាពកាន់តែអាក្រក់ទៅៗ បន្ទាប់ពីក្រសួងយុត្តិធម៌អាមេរិក បានប្រកាសចោទប្រកាន់ជាផ្លូវការលើអតីតប្រធានាធិបតីគុយបា លោក រ៉ាអ៊ូល កាស្ត្រូ (Raúl Castro) ពីបទមនុស្សឃាត ពាក់ព័ន្ធនឹងព្រឹត្តិការណ៍បាញ់ទម្លាក់យន្តហោះកាលពីឆ្នាំ ១៩៩៦៕

អត្ថបទ៖ សាង ស្រីល័ក្ខ

The post ​រដ្ឋមន្ត្រីការបរទេស​គុយបា ព្រមាន សម្តី​ លោក រូប៊ីយ៉ូ ​អាច​បង្ក​ការបង្ហូរ​ឈាម appeared first on Kampuchea Thmey Daily.

ថ្លែងប្រាប់អ្នកសារព័ត៌មាន កាលពីថ្ងៃព្រហស្បតិ៍ ទី២១ ខែឧសភា ឆ្នាំ២០២៦ និងផ្សាយដោយ BBC, លោករូប៊ីយ៉ូ ចោទថា គុយបា គឺជាអ្នកឧបត្ថម្ភឈានមុខគេមួយ ចំពោះអំពើភេរវកម្ម ក្នុងតំបន់ទាំងមូល​។ លោកក៏បង្ហើបដែរថា លទ្ធភាពនៃការឈានទៅរកកិច្ចព្រមព្រៀងសន្តិភាពមួយគឺ មិនខ្ពស់នោះទេ។

យ៉ាងណា គុយបា បានច្រានចោលការចោទប្រកាន់ទាំងនេះ ដោយរដ្ឋមន្ត្រីការបរទេស ប្រ៊ូណូ រ៉ូឌ្រីហ្គេស ចាត់ទុកសម្តីរបស់លោករូប៊ីយ៉ូ ថាជាការ «កុហក» និងញុះញង់ ឲ្យមានការឈ្លានពានផ្នែកយោធា លើប្រទេសរបស់លោក។ 

បច្ចុប្បន្ន ប្រទេសគុយបា កំពុងស្ថិតក្នុងភាពដុនដាប និងប្រឈមវិបត្តិ ដ៏ធ្ងន់ធ្ងរបំផុតមិនធ្លាប់មានទាល់តែ ក្នុងរយៈពេលជាច្រើនទសវត្សរ៍ចុងក្រោយនេះ។

ក្រសួងថាមពលគុយបា ប្រកាសថា ប្រទេសនេះ បានអស់ប្រេងម៉ាស៊ូត និងប្រេងឥន្ធនៈស្របច្បាប់ទាំងស្រុង សម្រាប់ដំណើរការរោងចក្រអគ្គិសនី។

បណ្តាញអគ្គិសនីជាតិ បានដួលរលំជាបន្តបន្ទាប់ ខណៈនៅតាមតំបន់ភាគច្រើន រួមទាំងរដ្ឋធានីឡាហាវ៉ាន ផងនោះ ត្រូវដាច់ភ្លើងចាប់ពី ១៥ រហូតដល់ ២២ ម៉ោងក្នុងមួយថ្ងៃ ដែលធ្វើឲ្យជីវភាពរស់នៅប្រចាំថ្ងៃ ត្រូវជាប់គាំងស្ទើរតែទាំងស្រុង។

មិនត្រឹមប៉ុណ្ណឹង អង្គការសហប្រជាជាតិ ព្រមានថា មន្ទីរពេទ្យនានា មិនមានអគ្គិសនី និងប្រេងគ្រប់គ្រាន់សម្រាប់ដំណើរការឡើយ។ ការវះកាត់មិនបន្ទាន់រាប់សែនករណី ត្រូវបានពន្យារពេល គ្រូពេទ្យត្រូវស្ពាយទឹកតាមជណ្តើរជើង សម្រាប់ស្ត្រីសម្រាលកូន ហើយថ្នាំសង្កូវ ក៏មានការខ្វះខាតយ៉ាងខ្លាំងផងដែរ៕

អត្ថបទ៖ សុខ សុវណ្ណ

The post រូប៊ីយ៉ូ ចោទថា គុយបា គំរាមកំហែងដល់អាមេរិក ដូច្នេះ ត្រាំ មានសិទ្ធ ការពារប្រទេសរបស់ខ្លួន appeared first on Kampuchea Thmey Daily.

ថ្លែងប្រាប់ NBC News ក្នុងកិច្ចសម្ភាសដែលធ្វើឡើង ក្រោយជំនួបជាមួយមន្ត្រីកំពូលចិន នៅទីក្រុងប៉េកាំង, លោក រូប៊ីយ៉ូ អះអាងថា៖ «តាមទស្សនៈរបស់យើង រាល់ការផ្លាស់ប្តូរណាមួយដោយបង្ខំ ទៅលើស្ថានភាពបច្ចុប្បន្ន នឹងជះឥទ្ធិពលមិនល្អ សម្រាប់ប្រទេសទាំងពីរ។ អ្វីមួយដែលភាគីចិន បានសង្កត់ធ្ងន់ ហើយដែលយើងក៏យល់ស្របដែរនោះ គឺស្ថិរភាពយុទ្ធសាស្ត្រ នៅក្នុងទំនាក់ទំនងរបស់យើង»។

លោកបញ្ជាក់ថា «គោលនយោបាយរបស់អាមេរិក លើបញ្ហាតៃវ៉ាន់ គឺមិនមានការផ្លាស់ប្តូរទេ គិតត្រឹមថ្ងៃនេះ ក៏ដូចជាគិតត្រឹមពេលជំនួប ដែលយើងបានធ្វើនៅទីនេះ នាថ្ងៃនេះដែរ។ បញ្ហា ត្រូវបានលើកយកមកនិយាយ! ខាងភាគីពួកគេ តែងតែលើកឡើងពីបញ្ហានេះជានិច្ច ចំណែកយើងវិញ ក៏តែងតែបញ្ជាក់យ៉ាងច្បាស់ នូវជំហររបស់យើងដែរ»។

ម្យ៉ាងវិញទៀត បើតាមការលើកឡើងរបស់លោក រូប៊ីយ៉ូ, បញ្ហានៃការលក់អាវុធរបស់អាមេរិក ទៅឲ្យតៃវ៉ាន់ នាពេលអនាគត ធ្លាប់ត្រូវបានពិភាក្សាកាលពីពេលមុន ប៉ុន្តែ រឿងនេះមិនមែនជា ប្រធានបទសំខាន់ ដែលត្រូវលើកឡើងនៅក្នុងការពិភាក្សានេះទេ។

បញ្ហាតៃវ៉ាន់នេះ ស្ថិតក្នុងចំណោមបន្ទាត់ក្រហមទាំង៤ ដែលចិនបានដាក់ចេញ ក្នុងជំនួបរវាងមេដឹកនាំចិន ស៊ី ជិនពីង ជាមួយប្រធានាធិបតីអាមេរិក ដូណាល់ ត្រាំ ក្នុងទីក្រុងប៉េកាំង។

អាមេរិក គឺជាអ្នកគាំទ្រដ៏ធំធេងបំផុតរបស់តៃវ៉ាន់ ដោយបានផ្គត់ផ្គង់អាវុធសំខាន់ៗ ដើម្បីការពារខ្លួនពីការវាយប្រហារណាមួយ។ ជាក់ស្តែង កាលពីខែធ្នូ កន្លងទៅ លោក ត្រាំ បានធ្វើឲ្យពិភពលោកភ្ញាក់ផ្អើល ដោយប្រកាសលក់កញ្ចប់អាវុធក្នុងតម្លៃជាង ១១ពាន់លានដុល្លារ ឲ្យទៅតៃវ៉ាន់ ដែលជាចំនួនច្រើនបំផុតមិនធ្លាប់មាន ក្នុងប្រវត្តិសាស្ត្រ។

កាលនោះ ចិនក៏បានឆ្លើយតបវិញភ្លាមៗ ដោយការធ្វើសមយុទ្ធយោធា ព័ទ្ធជុំវិញតៃវ៉ាន់ ដើម្បីជាការព្រមានដល់កម្លាំងខាងក្រៅ ដែលចូលមកជួយជ្រោមជ្រែង កោះមួយនេះ៕

អត្ថបទ៖ សុខ សុវណ្ណ

The post រូប៊ីយ៉ូ អះអាងនៅ ចិន ថា​ ជំហរអាមេរិក ចំពោះតៃវ៉ាន់ គឺមិនផ្លាស់ប្តូរឡើយ appeared first on Kampuchea Thmey Daily.

បើតាម​ការ​ចុះផ្សាយ​នា​ថ្ងៃទី​១៤ ខែ​ឧសភា នេះ របស់​សារព័ត៌មាន Al Jazeera ដើម្បីអាចសម្រួលដល់ដំណើរទស្សនកិច្ចដ៏សំខាន់នេះ និងចៀសវាងការខូចខាតដល់ទំនាក់ទំនងការទូត ភាគីចិនបានប្រើប្រាស់ «ល្បិចបច្ចេកទេស» ដ៏ឆ្លាតវៃមួយ ដើម្បីជម្នះឧបសគ្គផ្លូវច្បាប់ ដែលខ្លួនបានបង្កើតឡើង។ តាមរយៈការផ្លាស់ប្តូរអក្ខរាវិរុទ្ធឈ្មោះរបស់លោក រ៉ូប៊ីយ៉ូ នៅក្នុងឯកសារផ្លូវការ សម្រាប់ដំណើរទស្សនកិច្ចនេះ ចិនបាន «កែសម្រួល» នីតិវិធីផ្ទៃក្នុងរបស់ខ្លួន ដើម្បីឱ្យរដ្ឋមន្ត្រីការបរទេសអាមេរិកអាចមានវត្តមាន នៅក្នុងប្រទេស ដោយស្របច្បាប់តាមទម្រង់ឯកសារថ្មី។

និយាយ​ឱ្យ​ងាយយល់ គឺ​ថា ឈ្មោះ​របស់រដ្ឋមន្ត្រី​ការបទេស​អាមេរិក ត្រូវបាន​ប្ដូរ​ទៅ​ជាភាសាចិន ថា Lu biao ដែលពីមុន​ក្នុង​បញ្ជីទណ្ឌកម្ម លោកត្រូវគេសរសេរ​ឈ្មោះ​​ថា Lubi ao។

ការប្រើប្រាស់ល្បិចកលតាមបែបការទូតបែបនេះ បង្ហាញឱ្យឃើញថា ទោះបីជាមានភាពតានតឹង ឬការដាក់ទណ្ឌកម្មគ្នាកន្លងមកយ៉ាងណាក៏ដោយ ក៏ទាំងអាមេរិក និងចិន នៅតែមានឆន្ទៈខ្ពស់ ក្នុងការរំលងបញ្ហាផ្ទាល់ខ្លួន ដើម្បីផ្តោតលើកិច្ចពិភាក្សាធំៗ ដែលប៉ះពាល់ដល់សេដ្ឋកិច្ច និងសន្តិសុខសកល។ ការដែលលោក រូប៊ីយ៉ូ អាចចូលរួមក្នុងជំនួបដ៏ខ្ពង់ខ្ពស់នេះ បានឆ្លុះបញ្ចាំងពីតថភាពនៃការទូត ដែលថា ផលប្រយោជន៍ជាតិ និងយុទ្ធសាស្ត្រនយោបាយ តែងតែមានទម្ងន់ធ្ងន់ជាងការប្រកាន់ខ្ជាប់នូវបញ្ជីទណ្ឌកម្មចាស់ៗ៕

ប្រែសម្រួល៖ ឈាង

The post លោក រូប៊ីយ៉ូ ជាប់​ក្នុង​បញ្ជី​ទណ្ឌកម្មចិន ចុះហេតុអ្វី​បាន​អាច​អម​ដំណើរ ត្រាំ ក្នុងក្រុងប៉េកាំង? appeared first on Kampuchea Thmey Daily.