លោក រូប៊ីយ៉ូ៖ អាមេរិកចង់ឱ្យចិន ជួយបញ្ចុះបញ្ចូលអ៊ីរ៉ង់ បញ្ឈប់​សកម្មភាព​ក្នុងតំបន់ឈូងសមុទ្រ

នៅក្នុងបទសម្ភាសន៍ជាមួយស្ថានីយទូរទស្សន៍ Fox News កាលពីថ្ងៃពុធ ទី១៣ ខែឧសភា រដ្ឋមន្ត្រីការបរទេសអាមេរិក លោក ម៉ាកូ រូប៊ីយ៉ូ បានថ្លែងឱ្យដឹងថា រដ្ឋាភិបាលអាមេរិក កំពុងមានក្តីសង្ឃឹមយ៉ាងមុតមាំ ក្នុងការបញ្ចុះបញ្ចូលឱ្យប្រទេសចិន ងាកមកដើរតួនាទីឱ្យកាន់តែសកម្មជាងមុន ដើម្បីជួយទាញអ៊ីរ៉ង់ឱ្យដើរចេញពីសកម្មភាពតានតឹង ដែលកំពុងកើតឡើងនៅក្នុងតំបន់ឈូងសមុទ្រ។

យោងតាម​ការផ្សាយ​របស់ Asia One លោក រូប៊ីយ៉ូ បានលើកឡើងពីចំណុចនេះ ក្នុងកិច្ចសន្ទនាជាមួយពិធីករលោក Sean Hannity ដោយលោកបានគូសបញ្ជាក់ថា ឥទ្ធិពលរបស់ទីក្រុងប៉េកាំងលើទីក្រុងតេហេរ៉ង់ គឺជាកត្តាសំខាន់ ដែលអាចជួយសម្រាលភាពតានតឹង និងរក្សាសន្តិសុខក្នុងតំបន់ ឱ្យមានស្ថិរភាព។ តាមរយៈការជំរុញនេះ អាមេរិកចង់ឃើញចិនចូលរួមចំណែកដោយផ្ទាល់ ក្នុងការដាក់សម្ពាធការទូត ដើម្បីឱ្យអ៊ីរ៉ង់បញ្ឈប់រាល់សកម្មភាព ដែលបង្កហានិភ័យដល់សន្តិសុខពិភពលោក។

ការអត្ថាធិប្បាយរបស់ប្រមុខការទូតអាមេរិកម្នាក់នេះ ឆ្លុះបញ្ចាំងពីការផ្លាស់ប្តូរយុទ្ធសាស្ត្រមួយ ដែលអាមេរិកព្យាយាមប្រើប្រាស់ទំនាក់ទំនងរវាងមហាអំណាចទាំងពីរ ដើម្បីដោះស្រាយជម្លោះដ៏ស្មុគស្មាញនៅមជ្ឈិមបូព៌ា ដែលកំពុងជះឥទ្ធិពលអាក្រក់ដល់សេដ្ឋកិច្ច និងសន្តិសុខសកល៕

ប្រែសម្រួល៖ ឈាង