លោក Xi Jinping Archives - Kampuchea Thmey Daily

កម្មវិធី “ប្រយោគបុរាណចិនដែលលោក Xi Jinping ចូលចិត្ត” (ភាសាខ្មែរ) នឹងចាក់ផ្សាយលើប្រព័ន្ធផ្សព្វផ្សាយធំៗនៅកម្ពុជា

Kang Tola — Thu, 10 Apr 2025 13:32:51 +0000

នៅក្នុងឱកាសដែលលោក Xi Jinping ប្រធានរដ្ឋចិននឹងអញ្ជើញមកបំពេញទស្សនកិច្ចផ្លូវរដ្ឋនៅប្រទេសកម្ពុជា កម្មវិធី ប្រយោគបុរាណចិនដែលលោក Xi Jinping ចូលចិត្ត” (ភាសាខ្មែរ) ដែលផលិតដោយអគ្គស្ថានីយវិទ្យុ និង ទូរទស្សន៍មជ្ឈិមចិន នឹងចាប់ផ្តើមចាក់ផ្សាយចាប់ពីថ្ងៃទី ១៧ ខែមេសា តាមម៉ោងក្នុងស្រុក នៅលើកញ្ចក់ទូរទស្សន៍ជាតិកម្ពុជា ទូរទស្សន៍អប្សរា ទូរទស្សន៍ហង្សមាស គេហទំព័រសារព័ត៌មាន Fresh News និងបណ្តាញផ្សព្វផ្សាយជាច្រើនទៀត។

ប្រព័ន្ធផ្សព្វផ្សាយធំៗក្នុងស្រុកជាច្រើន បានធ្វើការផ្សព្វផ្សាយជាមុនអំពីការចាក់ផ្សាយកម្មវិធីនេះ ដែលបានបង្កឱ្យមានការរំពឹងទុកជាទូទៅ និងការចាប់អារម្មណ៍យ៉ាងទូលំទូលាយពីគ្រប់មជ្ឈដ្ឋាននៅកម្ពុជា។

កម្មវិធី ប្រយោគបុរាណចិនដែលលោក Xi Jinping ចូលចិត្ត” (ភាសាខ្មែរ) យកសម្រង់កំណាព្យ និងសុភាសិតបុរាណចិនដែលដកស្រង់ចេញពីសុន្ទរកថា អត្ថបទ និងកិច្ចសន្ទនាសំខាន់ៗរបស់លោក Xi Jinping ប្រធានរដ្ឋចិនជាចំណុចចាប់ផ្តើម ដោយផ្តោតលើប្រធានបទដូចជាសហគមន៍ជោគវាសនារួមនៃមនុស្សជាតិ ការការពារបរិស្ថាន ការបន្តស្នង និងការច្នៃប្រឌិតវប្បធម៌ ការផ្លាស់ប្តូរ និងការរៀនសូត្រពីគ្នាទៅវិញទៅមករវាងអរិយធម៌នានា បកស្រាយ និងលើកឡើងនូវអត្ថន័យ និង គុណតម្លៃសកលភាវូបនីយកម្មក្នុងយុគសម័យថ្មី ដែលបង្កប់នៅក្នុងវប្បធម៌ប្រពៃណីចិនដ៏ស៊ីជម្រៅ បង្ហាញពីមូលដ្ឋានគ្រឹះវប្បធម៌នៃទំនើបកម្មតាមបែបផែនចិន និងបង្ហាញយ៉ាងរស់រវើកនូវប្រាជ្ញាខាងនយោបាយដ៏ឧត្តុង្គឧត្តម ទឹកចិត្តមនុស្សធម៌ដ៏ជ្រាលជ្រៅ ព្រមទាំងទស្សនវិស័យប្រវត្តិសាស្ត្រ និង ទស្សនវិស័យពិភពលោកដ៏ទូលំទូលាយរបស់លោក Xi Jinping ប្រធានរដ្ឋចិន៕

The post កម្មវិធី “ប្រយោគបុរាណចិនដែលលោក Xi Jinping ចូលចិត្ត” (ភាសាខ្មែរ) នឹងចាក់ផ្សាយលើប្រព័ន្ធផ្សព្វផ្សាយធំៗនៅកម្ពុជា appeared first on Kampuchea Thmey Daily.

រឿងអប់រំ “មីពងមាន់” មួយចាន កែប្រែនិស្ស័យ និងគុណតម្លៃរបស់មេដឹកនាំចិន Xi Jinping

Mean Ratana — Tue, 06 Feb 2024 09:45:55 +0000

ក្រៅពីកិច្ចការនយោបាយដឹកនាំ លោកប្រធានាធិបតី Xi Jinping ក៏ធ្លាប់បានលើកឡើងពីរឿងជាមេរៀនអប់រំគំនិតដល់សាធារណជនបានពិចារណាទូទៅ ។ ក្នុងសាច់រឿងមួយនិយាយអំពីប្រវត្តិរបស់លោកផ្ទាល់ដែលបានជួបកាលពីនៅវ័យក្មេង ហើយលោកក៏បានលើកយកបង្ហាញជាបទពិសោធដល់សាធារណជនទូទៅឲ្យបានស្វែងយល់ដូចគ្នាផងដែរ ដែលជាសាច់រឿងទាក់ទងជាមួយឪពុករបស់លោក និងមីពងមាន់មួយចាន៖

លោកXi Jinping កាលនៅវ័យជំទង់

លោកប្រធានាធិបតីប្រទេសមហាអំណាចចិន Xi Jinping ធ្លាប់បាននិយាយថា កាលខ្ញុំនៅក្មេង ខ្ញុំជាមនុស្សអាត្មានិយមខ្លាំងណាស់ហើយខ្ញុំតែងតែទាមទារអ្វីដែលល្អបំផុតសម្រាប់ខ្លួនខ្ញុំ។ នៅទីបំផុតមនុស្សនៅជុំវិញខ្លួនខ្ញុំបានចាកចេញពីខ្ញុំម្តងមួយៗសូម្បីតែមិត្តភក្តិរបស់ខ្ញុំ ។ ខ្ញុំមិនដែលបន្ទោសថាមកពីខ្លួនឯងទេហើយតែងតែទម្លាក់កំហុសទៅអ្នកដទៃ ព្រមទាំងរិះគន់ពួកគេទៀត ប៉ុន្តែឪពុកខ្ញុំបានបង្រៀនខ្ញុំនូវគោលការណ៍មួយដែលខ្ញុំចងចាំជានិច្ច។

ថ្ងៃមួយគាត់បានធ្វើមី ២ ចាន ហើយដាក់វាលើតុ ។ ១ ចានមានពងមាន់មួយគ្រាប់នៅពីលើ ហើយ ១ ចានទៀតមិនមានពងមាន់នោះទេ បន្ទាប់មកគាត់បានឲ្យខ្ញុំរើសយកចានមួយ ។ នៅគ្រានោះពងមាន់គឺជារបស់មិនងាយបានញ៉ាំទេ នៅក្នុងគ្រួសារខ្ញុំ! ទាល់តែមានបុណ្យទាន ឬចូលឆ្នាំថ្មី ទើបយើងបានញ៉ាំវា ។ ខ្ញុំក៏បានជ្រើសរើសយកចានដែលមានពងមាន់នៅពីលើ។ នៅពេលចាប់ផ្តើមញ៉ាំខ្ញុំគិតក្នុងចិត្តថា ខ្លួនឯងឆ្លាតណាស់ និងមានមោទនភាពជាខ្លាំងចំពោះជម្រើស និងការសម្រេចចិត្តឈ្លាសវៃរបស់ខ្ញុំ ហើយថែមទាំងញ៉ាំពងមាន់យ៉ាងឆ្ងាញ់ទៀតផង។

តែខ្ញុំភ្ញាក់ផ្អើលខ្លាំងនៅពេលដែលចានឪពុកខ្ញុំមានពងមាន់ដល់ទៅ២គ្រាប់ កប់នៅពីក្រោមមីរបស់គាត់! ខ្ញុំសោកស្តាយ ហើយបានស្តីបន្ទោសខ្លួនឯងចំពោះការសម្រេចចិត្តខុសរបស់ខ្ញុំ។

ឪពុកខ្ញុំញញឹមហើយនិយាយមកកាន់ខ្ញុំថា៖”កូនសំលាញ់! កូនត្រូវតែចងចាំថា អ្វីដែលភ្នែកយើងអាចមើលឃើញមិនប្រាកដថាវាជាការពិតនោះទេ។ ប្រសិនបើកូនចង់កេងយកប្រយោជន៍ពីមនុស្សដទៃនោះកូននឹងចាញ់!” ។

នៅថ្ងៃបន្ទាប់ ឪពុកខ្ញុំបានធ្វើមីចំនួន ២ ចានទៀត គឺមួយចានដាក់ពងមាន់មួយគ្រាប់នៅពីលើ និងចានមួយទៀតគ្មានពងមាន់នៅពីលើដដែល ។ ជាថ្មីម្តងទៀតគាត់បានដាក់ចានទាំងពីរនៅលើតុ ហើយនិយាយមកខ្ញុំថា៖”កូនពុក! កូនរើសទៅ! តើកូនចង់បានចានមួយណា?” ពេលនោះខ្ញុំគិតថាខ្ញុំឆ្លាតជាងមុន។ ខ្ញុំបានរើសយកចានដែលគ្មានពងនៅពីលើ ។ ខ្ញុំភ្ញាក់ផ្អើលយ៉ាងខ្លាំងនៅពេលខ្ញុំញែកមីរបស់ខ្ញុំទៅ មិនមានសូម្បីតែពងមាន់មួយគ្រាប់នៅបាតចាន។

លោក Xi (ឆ្វេង) ជាមួយប្អូនប្រុស និងឪពុករបស់លោកឈ្មោះ Xi Zhongxun

ឪពុកខ្ញុំញញឹមហើយនិយាយមកខ្ញុំថា៖ “កូនអើយ! កូនមិនអាចពឹងផ្អែកទៅលើបទពិសោធន៍ដែលកូនធ្លាប់មានជារៀងរហូតនោះទេព្រោះពេលខ្លះជីវិតអាចបោកប្រាស់ ឬលេងសើចជាមួយយើងបាន ។ ប៉ុន្តែកូនក៏មិនត្រូវខូចចិត្តពេកនោះដែរ។ កូនគួរចាត់ទុកវាថាគ្រាន់តែជាមេរៀនដែលបានរៀនទៅចុះ ។ វាជាអ្វីដែលកូនមិនអាចរៀនវាពីសៀវភៅរៀននោះទេ” ។

ថ្ងៃទី៣ ឪពុកខ្ញុំបានធ្វើមីចំនួន ២ ចានម្តងទៀតដូចលើកមុនដែរ ដោយមួយចានដាក់ពងមាន់ ១ គ្រាប់នៅពីលើ និងចានមួយទៀតគ្មានពងនៅពីលើដដែល ។ គាត់បានដាក់ចានទាំង ២ នៅលើតុហើយនិយាយមកខ្ញុំម្តងទៀតថា៖ “កូនអើយ! កូនជ្រើសរើសចុះ។ តើកូនចង់បានចានមួយណា?” ពេលនោះខ្ញុំបានប្រាប់ឪពុកខ្ញុំថា៖ “ពុកគួរតែជាអ្នកត្រូវជ្រើសរើសមុនគេ ។ ពុកគឺជាមេគ្រួសារ ហើយពុកបានលះបង់ច្រើនណាស់ដល់គ្រួសារមួយនេះ។”

ឪពុកខ្ញុំមិនបានបដិសេធទេហើយក៏បានជ្រើសរើសយកចានមួយដែលមានពងមាន់ដាក់នៅពីលើ ។ នៅពេលខ្ញុំញ៉ាំមីរបស់ខ្ញុំ ខ្ញុំប្រាកដក្នុងចិត្តណាស់ថា ចានរបស់ខ្ញុំគ្មានពងមាន់នៅខាងក្នុងចានទេ តែខ្ញុំភ្ញាក់ផ្អើលនៅពេលដែលឃើញពងមាន់ដល់ទៅ ២ គ្រាប់នៅបាតចាន!

ឪពុកខ្ញុំញញឹមដាក់ខ្ញុំដោយក្តីស្រលាញ់នៅក្នុងក្រសែភ្នែករបស់គាត់ហើយនិយាយថា៖”កូនអើយ! កូនត្រូវតែចងចាំណា! នៅពេលដែលកូនគិតពីប្រយោជន៍រួម នោះរឿងល្អនឹងកើតឡើងចំពោះកូនជានិច្ច!” ។ ចាប់ពីពេលនោះមកខ្ញុំបានប្រើប្រាស់ជីវិតរបស់ខ្ញុំដោយឈរលើគោលការណ៍នេះ។ ទោះខ្ញុំធ្វើអ្វីក៏ដោយទោះបីវាជាបញ្ហាផ្ទាល់ខ្លួន ឬបញ្ហាផ្សេងៗ ខ្ញុំតែងតែប្រាប់ខ្លួនឯងថាត្រូវគិតដល់ប្រយោជន៍រួម ជាអាទិភាពសំខាន់ជានិច្ច ៕

លោកXi (ឆ្វេង) និងគ្រួសារ

ដោយ៖ មាន រតនា

The post រឿងអប់រំ “មីពងមាន់” មួយចាន កែប្រែនិស្ស័យ និងគុណតម្លៃរបស់មេដឹកនាំចិន Xi Jinping appeared first on Kampuchea Thmey Daily.

សារឆ្នាំថ្មី ២០២៤ មេដឹកនាំ ចិន ផ្តោតលើគោលដៅ ៣ ចំណុចធំ

Mean Ratana — Tue, 02 Jan 2024 10:41:27 +0000

លោកប្រធានាធិបតីចិន Xi Jinping ក្នុងឱកាសអបអរឆ្នាំថ្មី២០២៤ បានថ្លែងសារស្វាគមន៍ឆ្នាំថ្មី និងផ្តល់ន័យខ្លឹមសារផ្តោតលើ ៣ ចំណុចសំខាន់ៗរួមមាន៖ ទំនុកចិត្ត, ជីវភាពប្រជាជន និងទស្សនពិភពលោក។

លោកប្រធានាធិបតី Xi Jinping ថ្លែងសារតាមប្រព័ន្ធអនឡាញទៅកាន់ប្រជាពលរដ្ឋចិនទូទាំងប្រទេស

ការថ្លែងសារនេះ គឺបង្ហាញពីការប្តេជ្ញាចិត្តរបស់ចិន ទៅលើការធ្វើទំនើបកម្មសម្រាប់ប្រជាជាតិចិន និងផ្តល់នូវជីវភាពកាន់តែប្រសើរឡើងដល់ប្រជាជនចិន ក៏ដូចជាឆ្ពោះទៅបង្កើតឲ្យពិភពលោកជាកន្លែងដ៏ល្អប្រសើរឡើងសម្រាប់ឆ្នាំ២០២៤។

តាមប្រភពព័ត៌មានដដែល គោលដៅទាំងបីធំៗនោះ គឺ៖

១-បន្តនូវទំនុកចិត្ត៖ ខ្លឹមសារលោក Xi បង្ហាញអំពីជំហានដ៏រឹងមាំ និងស្វាហាប់របស់ចិន ទៅកាន់ការអភិវឌ្ឍប្រកបដោយគុណភាព។

២-ជីវភាពប្រសើរ៖ “ប្រជាជន” គឺតែងជាអាទិភាពមុនគេ នៅក្នុងអត្ថន័យខ្លឹមសាររបស់លោក Xi។ បញ្ហាទាក់ទងនឹងជីវភាពប្រជាជន ពិសេសពាក់ព័ន្ធនឹងកុមារ យុវជន និងមនុស្សចាស់ គឺជា “ទិសដៅចម្បងរបស់រដ្ឋាភិបាល”។

៣-ទស្សនៈទៅកាន់ពិភពលោក៖ ទន្ទឹមនឹងផ្តោតការយកចិត្តទុកដាក់ក្នុងប្រទេស លោក Xi ក៏ផ្តោតទៅលើនយោបាយការបរទេស និងកិច្ចការជាសកលផងដែរ។ លោកបានថ្លែងក្នុងសារឆ្នាំថ្មីថា ស្របពេលដែលបន្តការអភវិឌ្ឍរបស់ខ្លួន ប្រទេសចិន ក៏ប្រកាន់ខ្ជាប់ និងបំពេញទំនួលខុសត្រូវទៅកាន់ពិភពលោកក្នុងនាមជាប្រទេសមហាអំណាច៕

ប្រែសម្រួល៖ មាន រតនា

ប្រភព៖ China Daily

ចុចអាន៖ ហេតុអ្វីលោក ស៊ី ជីនពីង ធ្វើទស្សនកិច្ចនៅ វៀតណាម ក្នុងពេលនេះ?

The post សារឆ្នាំថ្មី ២០២៤ មេដឹកនាំ ចិន ផ្តោតលើគោលដៅ ៣ ចំណុចធំ appeared first on Kampuchea Thmey Daily.

លម្អិតដំណើរទស្សនកិច្ចផ្លូវរដ្ឋរយៈពេលជិត ៣០ ម៉ោងរបស់ប្រធានាធិបតីចិន Xi Jinping នៅវៀតណាម

Sok Chivon — Thu, 14 Dec 2023 03:51:58 +0000

អគ្គលេខាបក្សកុម្មុយនីស្ត និងជាប្រធានាធិបតីចិន លោក Xi Jinping និងភរិយាគឺលោកស្រី Peng Liyuan បានអញ្ជើញត្រឡប់ទៅមាតុប្រទេសវិញហើយកាលពីរសៀលថ្ងៃពុធ ក្រោយបញ្ចប់ដំណើរទស្សនកិច្ចផ្លូវរដ្ឋរយៈពេល ២ ថ្ងៃមកកាន់ប្រទេសវៀតណាមជាលើកដំបូងក្នុងរយៈពេល ៦ ឆ្នាំ ។

លោក Xi និងភរិយាបានអញ្ជើញមកដល់អាកាសយានដ្ឋាន Noi Bai ក្នុងទីក្រុងហាណូយនៅវេលាថ្ងៃត្រង់ថ្ងៃអង្គារ ទី១២ ខែធ្នូ ខណៈយន្តហោះរបស់ប្រធានាធិបតីចិនរូបនេះបានចុះចតក្នុងសីតុណ្ហភាពប្រហែល ២៧ អង្សារសេ ហើយនេះក៏ជាដំណើរទស្សនកិច្ចលើកទី ៣ របស់លោក Xi ផងដែរ មកកាន់ទឹកដីនៃប្រទេសវៀតណាម ក្នុងឋានៈជាប្រធានបក្ស និងជាប្រធានាធិបតីរបស់ប្រទេសចិន ខណៈ ២ លើកដំបូងគឺនៅឆ្នាំ ២០១៥ និងឆ្នាំ ២០១៧ ។

ភ្លាមៗក្រោយលោក Xi ចុះពីលើជណ្ដើរយន្តហោះ, នាយករដ្ឋមន្ត្រីវៀតណាមលោក Pham Minh Chinh បានដឹកនាំគណៈប្រតិភូវៀតណាមទទួលស្វាគមន៍លោក Xi នៅអាកាសយានដ្ឋាន ខណៈនៅថ្ងៃដដែលនោះអគ្គលេខាបក្សកុម្មុយនីស្តវៀតណាមលោក Nguyen Phu Trong ក៏បន្តទទួលបដិសណ្ឋារកិច្ចលោក Xi នៅវិមានប្រធានាធិបតីនាវេលាម៉ោង ៤ រសៀល ។

ទន្ទឹមនោះ ក្នុងដំណើរលើកម្រាលព្រំក្រហមអមដោយការបាញ់កាំភ្លើងចំនួន ២១ ដើម ជំទាវទីមួយរបស់ប្រទេសចិនលោកស្រី Peng Liyuan និងលោក Xi រួមទាំងលោក Phu Trong និងភរិយាលោកស្រី Ngo Thi Man ក៏បានអញ្ជើញថតរូបនៅមុខវិមានប្រធានាធិបតីក្នុងពិធីទទួលបដិសណ្ឋារកិច្ចដ៏កក់ក្ដៅមួយ មុនពេលមេដឹកនាំទាំងពីរចូលរួមកិច្ចសន្ទនាជាមួយមន្ត្រីវៀតណាម និងចិនផ្សេងទៀតនៅទីស្នាក់ការកណ្ដាលនៃគណៈកម្មាធិការមជ្ឈិមបក្សក្នុងទីក្រុងហាណូយ ខណៈមេដឹកនាំទាំងពីរក៏បានពិភាក្សាអំពីទិសដៅសម្រាប់ទំនាក់ទំនងទ្វេភាគីផងដែរ ។

នៅថ្ងៃដដែលនោះលោក Xi និងលោក Trong ក៏បានធ្វើជាសាក្សីក្នុងការចុះហត្ថលេខាលើឯកសារកិច្ចព្រមព្រៀងចំនួន ៣៦ សម្រាប់កិច្ចសហប្រតិបត្តិការ និងការអភិវឌ្ឍផ្លូវដែកផងដែរ នៅទីស្នាក់ការកណ្ដាលនៃគណៈកម្មាធិការមជ្ឈិមបក្សនៅទីក្រុងហាណូយ ។

ក្នុងចំណោមឯកសារដែលត្រូវបានចុះហត្ថលេខាងដោយភាគីនៃប្រទេសទាំងពីរ និងអង្គភាពក្រសួងការបរទេស មាន ៤ ឯកសារពាក់ព័ន្ធនឹងនយោបាយ និងកិច្ចការបរទេស ។ ឯកសារ ៤ ទៀត គឺពាក់ព័ន្ធនឹងសន្តិសុខ និងការពារជាតិ, ការទប់ស្កាត់ឧក្រិដ្ឋកម្ម, កិច្ចសហប្រតិបត្តិការដែនសមុទ្រ និងប្រព័ន្ធតុលាការ ។ លើសពីនេះ ឯកសារចំនួន ២៤ គឺទាក់ទងនឹងកិច្ចសហប្រតិបត្តិការលើវិស័យនៅថ្នាក់រដ្ឋាភិបាល និងក្រសួង ចំណែកឯកសារ ៤ ទៀតគឺទាក់ទងនឹងកិច្ចសហប្រតិបត្តិការរវាងថ្នាក់មូលដ្ឋាននៃប្រទេសទាំងពីរ ។

បន្ទាប់ពីសម្រេចបានលើកិច្ចព្រមព្រៀងទាំងនោះហើយ នៅល្ងាចថ្ងៃអង្គារលោក Xi និងលោក Trong ក៏បង្ហាញក្ដីសប្បាយរីករាយក្នុងពិធីទទួលទានទឹកតែនៅទីស្នាក់ការកណ្តាលរបស់បក្ស ។ មេដឹកនាំវៀតណាមបានអញ្ជើញសមភាគីចិនឲ្យសាកល្បងតែវៀតណាមចំនួន ៣ ប្រភេទផ្សេងគ្នា ខណៈក្នុងពិធីទទួលទានទឹកតែ គឺជាពិធីការទូតដ៏ពិសេសមួយបង្ហាញពីទំនាក់ទំនងជិតស្និទ្ធរវាងមេដឹកនាំនៃប្រទេសទាំងពីរ ។

លុះឈានមកដល់ព្រឹកថ្ងៃពុធ ដែលជាថ្ងៃទី២ នៃដំណើរទស្សនកិច្ច, លោក Xi បានអញ្ជើញដាក់កម្រងផ្កានៅវិមានប្រធានាធិបតីហូជីមិញ មុនពេលជួបពិភាក្សាការងារជាមួយប្រធានាធិបតីវៀតណាមលោក Vo Van Thuong នៅវិមានប្រធានាធិបតី និងជួបជាមួយលោកនាយករដ្ឋមន្ត្រី Pham Minh Chinh នៅការិយាល័យរដ្ឋាភិបាល ។

ក្នុងដំណើរជាហូរហែមកទៀត លោក Xi បានអញ្ជើញជួបជាមួយប្រធានរដ្ឋសភាវៀតណាមលោក Vuong Dinh Hue រួមជាមួយនឹងសមាជិកការិយាល័យជាច្រើនផ្សេងទៀតនៅឯការិយាល័យរដ្ឋសភា មុនពេលលោក Xi បន្តជួបជាមួយអ្នកជំនាញការ និងសិស្សនិស្សិតដែលមានទេពកោសល្យនៃប្រទេសទាំងពីរនៅរសៀលថ្ងៃពុធ ។

នៅថ្ងៃចុងក្រោយនោះ ប្រទេសទាំងពីរក៏បានចេញសេចក្ដីថ្លែងការណ៍រួមដើម្បីបន្តធ្វើឲ្យស៊ីជម្រៅ និងលើកម្ពស់ទំនាក់ទំនងភាពជាដៃគូសហប្រតិបត្តិការយុទ្ធសាស្ត្រលើគ្រប់ជ្រុងជ្រោយ និងកសាងសហគមន៍ វៀតណាម-ចិន ជាមួយនឹងអនាគតរួមដែលមានសារៈសំខាន់ជាយុទ្ធសាស្ត្រ ។

ក្រោយបញ្ចប់ដំណើរទស្សនកិច្ចរយៈពេលជិត ៣០ ម៉ោងនោះ លោក Xi និងភរិយាបានអញ្ជើញទៅដល់អាកាសយានដ្ឋាន Noi Bai និងចាកចេញពីប្រទេសវៀតណាមនៅវេលាម៉ោង ៥ និង ១០ នាទីល្ងាចថ្ងៃពុធ ខណៈក្នុងដំណើរទស្សនកិច្ចនេះ ស្ត្រីទីមួយរបស់ប្រទេសចិនក៏បានអញ្ជើញទៅទស្សនាសារមន្ទីរស្ត្រីវៀតណាម និងជួបសំណេះសំណាលជាមួយនិស្សិតសាកលវិទ្យាល័យជាតិ វៀតណាម-ហាណូយ ផងដែរ ។

បើយោងតាមគយវៀតណាមបានឲ្យដឹងថា ប្រទេសចិនគឺជាដៃគូពាណិជ្ជកម្មធំបំផុតរបស់វៀតណាមក្នុងរយៈពេលជាច្រើនឆ្នាំជាប់ៗគ្នា ខណៈដែលវៀតណាមគឺជាដៃគូធំបំផុតរបស់ចិននៅក្នុងអាស៊ាន ។ ពាណិជ្ជកម្មទ្វេភាគីរវាងប្រទេសទាំងពីរឈានដល់ ១៧៥.៦ ពាន់លានដុល្លារកាលពីឆ្នាំមុន ដោយក្នុងនោះការនាំចេញរបស់វៀតណាមឈានដល់ ៥៧.៧ ពាន់លានដុល្លារ ហើយការនាំចូលវិញឈានដល់ ១១៧.៨៧ ពាន់លានដុល្លារ ។

សរុបមក រហូតមកដល់ថ្ងៃទី២០ ខែតុលា ប្រទេសចិនបានជាប់ចំណាត់ថ្នាក់ទី ៦ ក្នុងចំណោមប្រទេស និងដែនដីចំនួន ១៤៣ ដែលមានការវិនិយោគផ្ទាល់ពីបរទេស (FDI) នៅវៀតណាម ជាមួយនឹងគម្រោងសកម្មចំនួន ៤,១០៥ និងមានដើមទុនចុះបញ្ជីសរុបជាង ២៦.៥ ពាន់លានដុល្លារ ៕

អត្ថបទ ៖ ជីវ័ន្ត

ចុចអាន ៖ វៀតណាម ប្រកាន់យកគោលការណ៍ “ចិនតែមួយ” និងគោលនយោបាយ ការបរទេសឯករាជ្យ

The post លម្អិតដំណើរទស្សនកិច្ចផ្លូវរដ្ឋរយៈពេលជិត ៣០ ម៉ោងរបស់ប្រធានាធិបតីចិន Xi Jinping នៅវៀតណាម appeared first on Kampuchea Thmey Daily.

លោក Xi Jinping អញ្ជើញទៅដល់ វៀតណាម ជាលើកទី ៣ ក្នុងរយៈពេល ៨ ឆ្នាំ

Sok Chivon — Tue, 12 Dec 2023 06:27:07 +0000

ប្រធានាធិបតីចិនលោក Xi Jinping រួមជាមួយនឹងភរិយាគឺលោកស្រី Peng Liyuan បានអញ្ជើញទៅដល់អាកាសយានដ្ឋានអន្តរជាតិ Noi Bai ក្នុងទីក្រុងហាណូយហើយនៅរសៀលថ្ងៃអង្គារនេះ ដើម្បីចាប់ផ្តើមដំណើរទស្សនកិច្ចផ្លូវរដ្ឋរយៈពេល ២ ថ្ងៃក្នុងប្រទេសវៀតណាម ។

ដំណើរទស្សនកិច្ចចាប់ពីថ្ងៃអង្គារដល់ថ្ងៃពុធ គឺជាលើកទីបីហើយរបស់លោក Xi មកកាន់ប្រទេសវៀតណាមក្នុងរយៈពេល ៨ ឆ្នាំ ក្នុងនាមជាអគ្គលេខាធិការបក្ស និងជាប្រធានាធិបតីចិន ខណៈដំណើរទស្សនកិច្ច ២ លើកមុនគឺនៅឆ្នាំ២០១៥ និងឆ្នាំ២០១៧ ។

ទន្ទឹមនោះ លោក Xi ក៏ត្រូវបានអមដំណើរដោយមន្ត្រីជាន់ខ្ពស់ចិនជាច្រើនរូបផងដែរ រួមទាំងលោក Cai Qi សមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិន និងជាលេខាធិការនៃលេខាធិការដ្ឋានរបស់គណៈកម្មាធិការមជ្ឈិមបក្សកុម្មុយនីស្តចិន និងរដ្ឋមន្ត្រីការបរទេសលោក Wang Yi ។

ក្នុងដំណើរទស្សនកិច្ចនេះ វៀតណាម និងចិនត្រូវបានគេរំពឹងថានឹងចុះហត្ថលេខាលើកិច្ចព្រមព្រៀងសហប្រតិបត្តិការសំខាន់ៗលើវិស័យជាច្រើន រួមទាំងសន្តិសុខ និងការពារជាតិ ទំនាក់ទំនង ពាណិជ្ជកម្ម ការវិនិយោគ សេដ្ឋកិច្ចឌីជីថល ការអភិវឌ្ឍន៍បៃតង និងកិច្ចសហប្រតិបត្តិការដែនសមុទ្រជាដើម ។

នៅក្នុងបទសម្ភាសន៍មួយកាលពីថ្ងៃអាទិត្យ ឯកអគ្គរដ្ឋទូតចិនប្រចាំនៅវៀតណាម លោក Xiong Bo បានលើកឡើងពីទិដ្ឋភាពថ្មីចំនួន ៤ នៃដំណើរទស្សនកិច្ចរបស់លោក Xi នៅពេលនេះ ដែលរួមមានដូចជា “ស្ថានភាពថ្មី ទិសដៅថ្មី សក្តានុពលថ្មី និងការជំរុញថ្មី” ។

ស្របពេលជាមួយគ្នានេះ អនុរដ្ឋមន្ត្រីក្រសួងការបរទេសវៀតណាម លោក Nguyen Minh Vu ក៏បានលើកឡើងផងដែរថា ទាំងវៀតណាម និងចិនរំពឹងថា ដំណើរទស្សនកិច្ចរបស់លោក Xi នឹងនាំមកនូវ “ជំហរថ្មី” និង “កម្រិតថ្មី” ក្នុងទំនាក់ទំនងទ្វេភាគី ។

បើយោងតាមគយវៀតណាមបានឲ្យដឹងថា ប្រទេសចិន គឺជាដៃគូពាណិជ្ជកម្មធំបំផុតរបស់វៀតណាមក្នុងរយៈពេលជាច្រើនឆ្នាំជាប់ៗគ្នា ខណៈដែលវៀតណាម គឺជាដៃគូធំបំផុតរបស់ចិននៅក្នុងតំបន់អាស៊ាន ។ ពាណិជ្ជកម្មទ្វេភាគីរវាងប្រទេសទាំងពីរឈានដល់ ១៧៥.៦ ពាន់លានដុល្លារកាលពីឆ្នាំមុន ដោយក្នុងនោះការនាំចេញរបស់វៀតណាមឈានដល់ ៥៧.៧ ពាន់លានដុល្លារ ហើយការនាំចូលឈានដល់ ១១៧,៨៧ ពាន់លានដុល្លារ ។

ប្រែសម្រួលដោយ ៖ ជីវ័ន្ត

ប្រភព ៖ VN Express

ចុចអាន ៖ មេធំក្រុមហ៊ុន ណាហ្គា ទទួលមរណភាពក្នុងវ័យ ៧៥ ឆ្នាំ ខណៈកូនប្រុសនឹង ឡើងកាន់តំណែងជំនួសឪពុក

The post លោក Xi Jinping អញ្ជើញទៅដល់ វៀតណាម ជាលើកទី ៣ ក្នុងរយៈពេល ៨ ឆ្នាំ appeared first on Kampuchea Thmey Daily.

ចិន បបួលប្រទេសដែលជាសម្ព័ន្ធមិត្ត រុស្ស៊ី ចូលក្នុងគម្រោងគំនិតផ្ដួចផ្ដើម ខ្សែក្រវាត់ និងផ្លូវ

Sok Chivon — Tue, 05 Dec 2023 07:35:01 +0000

ប្រធានាធិបតីចិនលោក Xi Jinping កាលពីថ្ងៃចន្ទបានអញ្ជើញទទួលស្វាគមន៍ប្រធានាធិបតីបេឡារុសលោក Alexander Lukashenko សាជាថ្មីម្ដងទៀតនៅទីក្រុងប៉េកាំង បន្ទាប់ពីអាក់ខានជួបទល់មុខគ្នាអស់រយៈពេល ៩ ខែកន្លងមកហើយ ។

នៅក្នុងជំនួបនោះ លោក Xi ដែលចាត់ទុកលោក Lukashenko ជា “មិត្តចាស់” ក៏បានបបួលមេដឹកនាំបេឡារុសរូបនេះឲ្យចួលរួមជាសមាជិកស្នូលនៃកម្មវិធីហេដ្ឋារចនាសម្ព័ន្ធក្នុងគម្រោងគំនិតផ្ដួចផ្ដើមខ្សែក្រវាត់ និងផ្លូវ (BRI) ផងដែរ បន្ទាប់ពីមេដឹកនាំទាំងពីរបានយល់ព្រមធ្វើការជាមួយគ្នាដើម្បីជំរុញកិច្ចសហប្រតិបត្តិការឧស្សាហកម្មបន្ថែមទៀត ។

ទន្ទឹមនោះ លោក Xi បានលើកឡើងទៀតថា “ប្រទេសចិនមានឆន្ទៈក្នុងការធ្វើការជាមួយប្រទេសបេឡារុស ដើម្បីពង្រឹងកិច្ចសហប្រតិបត្តិការ និងលើកកម្ពស់អនាគតរួមគ្នាសម្រាប់មនុស្សជាតិ ហើយប្រទេសទាំងពីរថែមទាំងបានបង្រួបបង្រួមការជឿទុកចិត្តគ្នាទៅវិញទៅមកផងដែរ” ។

ចំណែកលោក Lukashenko ដែលបច្ចុប្បន្នកំពុងដឹកនាំប្រទេសបេឡារុសស្ថិតនៅក្រោមការដាក់ទណ្ឌកម្មរបស់លោកខាងលិច ដោយសារតែការគាំទ្រ និងជាសម្ព័ន្ធមិត្តរបស់រុស្ស៊ី បានឆ្លៀតឱកាសនេះដើម្បីលើកកម្ពស់ទំនាក់ទំនងសេដ្ឋកិច្ចជាមួយប្រទេសចិន ព្រោះថា ប្រជាជនបេឡារុសពេញចិត្តយ៉ាងខ្លាំង នៅពេលដែលឃើញមហាយក្សចិនមានការរីកចម្រើនបែបនេះ ។

ប្រធានាធិបតីបេឡារុសរូបនេះបញ្ជាក់ទៀតថា ការមើលឃើញប្រទេសចិនរីកចម្រើន មិនត្រឹមតែជាផលប្រយោជន៍របស់យើងប៉ុណ្ណោះទេ ជាពិសេសវាគឺជាផលប្រយោជន៍នៃភពផែនដីរបស់យើងទាំងមូលតែម្ដង ដោយសារតែបច្ចុប្បន្នពិភពលោកកំពុងពោរពេញទៅដោយភាពចលាចល និងការផ្លាស់ប្ដូរ ។

ពាក់ព័ន្ធនឹងបញ្ហានេះដែរ លោក Xi ប្ដេជ្ញានឹងព្យាយាមបន្ធូរបន្ថយភាពតានតឹងមួយចំនួន នៅពេលដែលលោកអញ្ជើញទទួលស្វាគមន៍ប្រធានក្រុមប្រឹក្សាអឺរ៉ុប លោក Charles Michel និងប្រធានគណៈកម្មការអឺរ៉ុបលោកស្រី Ursula von der Leyen ក្នុងទីក្រុងប៉េកាំងនាថ្ងៃព្រហស្បតិ៍ ទី៧ ខែធ្នូខាងមុខនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ចិន បញ្ចេញឧទ្ធម្ភាចក្រគ្មានមនុស្សបើកដើម្បីឃ្លាំមើលនាវាខុសច្បាប់ចូល សមុទ្រលឿង

The post ចិន បបួលប្រទេសដែលជាសម្ព័ន្ធមិត្ត រុស្ស៊ី ចូលក្នុងគម្រោងគំនិតផ្ដួចផ្ដើម ខ្សែក្រវាត់ និងផ្លូវ appeared first on Kampuchea Thmey Daily.

រុស្ស៊ី វាយបកជំនួស ចិន រឿងលោក Joe Biden ហៅលោក Xi Jinping ជា “មេដឹកនាំផ្ដាច់ការ”

Sok Chivon — Mon, 20 Nov 2023 02:45:00 +0000

លោក Alexander Babakov អនុប្រធានរដ្ឋសភារុស្ស៊ី ឬហៅថា សភា Duma បាននិយាយនៅលើបណ្ដាញសង្គមដើម្បីធ្វើការឆ្លើយតបទៅកាន់ប្រធានាធិបតីសហរដ្ឋអាមេរិកលោក Joe Biden បន្ទាប់ពីបានហៅប្រធានាធិបតីចិនលោក Xi Jinping ថាជា “មេដឹកនាំផ្ដាច់ការ” ។

លោក Babakov បានលើកឡើងថា ការធ្វើអត្ថាធិប្បាយ ក៏ដូចជាការហៅរបស់លោក Biden ទៅលើលោក Xi Jinping ថាជា “មេដឹកនាំផ្ដាច់ការ” គឺជាការបន្តគោលនយោបាយ “អាណានិគមនិយមបែបថ្មី” ហើយបានចាត់ទុកប្រធានាធិបតីសហរដ្ឋអាមេរិករូបនេះ មិនមែនជាដៃគូសកលនោះទេ ។

អនុប្រធានរដ្ឋសភារុស្ស៊ីរូបនេះអះអាងថា “យើងត្រូវតែយល់ ការប្រើពាក្យ ‘ផ្តាច់ការ’ សំដៅលើលោក Xi Jinping ដែលជាមេដឹកនាំនៃប្រទេសមានសេដ្ឋកិច្ចដ៏ធំបំផុតរបស់ពិភពលោក មិនមែនជាការភ្លាត់មាត់របស់លោក Biden ដែលមានវ័យចំណាស់ និងភ្លេចភ្លាំងនោះទេ ។ នេះជាជំហរផ្លូវការរបស់របបអាណានិគមនិយមរបស់នយោបាយអាមេរិកទាំងមូល” ។

លោក Babakov បានអះអាងថា “យើងចាត់ទុកវោហាសាស្ត្រប្រឆាំងនឹងមេដឹកនាំចិនរបស់លោក Biden ជាការបង្ហាញយ៉ាងច្បាស់អំពីការបោកបញ្ឆោត និងគំនិតចង់ជិះជាន់ ក៏ដូចជាជំហានមិនចង់រាប់រកប្រទេសផ្សេងធ្វើជាមិត្តរបស់សហរដ្ឋអាមេរិក ។ លើសពីនេះ ប្រសិនបើលោកប្រធានាធិបតី Biden មិនយល់ពីអំណាចនៃការនិយាយស្ដីរបស់ខ្លួន គាត់ក៏មិនអាចចាត់ទុកថាជាដៃគូសកលរបស់យើងនោះដែរ” ។

លោក Biden បានហៅលោក Xi Jinping ថាជា “មេដឹកនាំផ្ដាច់ការ” កាលពីថ្ងៃទី១៥ ខែវិច្ឆិកា ពោលរយៈពេលតែប៉ុន្មានម៉ោងប៉ុណ្ណោះ បន្ទាប់ពីកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ដែលរៀបចំឡើងនៅទីក្រុង San Francisco ដើម្បីស្តារទំនាក់ទំនងរវាងសហរដ្ឋអាមេរិក និងចិន ។

ទោះយ៉ាងណា នេះមិនមែនជាលើកទី ១ ឡើយដែលលោក Biden ហៅលោក Xi Jinping ជា “មេដឹកនាំផ្ដាច់ការ” នោះ ពោលវាគឺជាលើកទី ២ ហើយដែលប្រធានាធិបតីសហរដ្ឋអាមេរិករូបនេះតែងប្រើពាក្យមិនសមរម្យទៅកាន់មេដឹកនាំចិនដែលកំពុងមានភាពតានតឹងជាមួយគ្នា ។

កាលពីខែមិថុនា ពោលមួយថ្ងៃ បន្ទាប់ពីរដ្ឋមន្ត្រីការបរទេសអាមេរិកលោក Antony Blinken បានធ្វើទស្សនកិច្ចនៅទីក្រុងប៉េកាំងក្នុងកិច្ចខិតខំប្រឹងប្រែងដើម្បីបន្ធូរបន្ថយភាពតានតឹងរវាងប្រទេសទាំងពីរ ប៉ុន្តែលោក បៃដិន បានធ្វើឲ្យប៉ះពាល់ដល់កិច្ចពិភាក្សាទាំងនោះ ដោយសារតែពាក្យសម្ដីហៅលោក Xi Jinping ថាជា “មេដឹកនាំផ្ដាច់ការ” ក្រោយហេតុការណ៍បាឡុងចិនហោះចូលដែនអាកាសអាមេរិក ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក Biden ប្រាប់ អ៊ីស្រាអែល ថា គួរតែទុកឲ្យ ប៉ាឡេស្ទីន ជាអ្នកគ្រប់គ្រង តំបន់ហ្គាហ្សាវិញទៅ

The post រុស្ស៊ី វាយបកជំនួស ចិន រឿងលោក Joe Biden ហៅលោក Xi Jinping ជា “មេដឹកនាំផ្ដាច់ការ” appeared first on Kampuchea Thmey Daily.

ស្គាល់ឈ្មោះ និងតួនាទីមន្ត្រី ចិន ដែលត្រូវសន្តិសុខ អាហ្រ្វិកខាងត្បូង រារាំងមិនឲ្យចូលជាមួយលោក Xi Jinping

Sok Chivon — Sat, 26 Aug 2023 02:16:47 +0000

វីដេអូដែលមន្ត្រីសន្តិសុខអាហ្វ្រិកខាងត្បូងរុញផ្ទប់ និងរារាំងមន្ត្រីចិនមួយរូបដែលរត់សំដៅទៅកាន់លោកប្រធានាធិបតីចិន Xi Jinping ដើរចូលទៅទីតាំងមួយកន្លែងក្នុងកិច្ចប្រជុំកំពូលនៃក្រុមប្រទេស BRICS នៅទីក្រុង Johannesburg កំពុងផ្ទុះការចាប់អារម្មណ៍យ៉ាងខ្លាំង ជាពិសេសចម្ងល់ពាក់ព័ន្ធនឹងតួនាទីរបស់មន្ត្រីរូបនោះ ។

លោក Xi Jinping

ពាក់ព័ន្ធនឹងបញ្ហានេះដែរ មន្ត្រីចិនដែលត្រូវមន្ត្រីសន្តិសុខអាហ្រ្វិកខាងត្បូងរារាំង និងបិទទ្វារមិនឲ្យចូលទៅជាមួយលោក Xi Jinping ក្នុងកិច្ចប្រជុំកំពូល BRICS កាលពីថ្ងៃទី២៣ ខែសីហាកន្លងទៅ គឺមានឈ្មោះ Sun Ning ជាជំនួយការ និងជាអ្នកបកប្រែផ្ទាល់របស់ប្រធានាធិបតីចិន ។

លោក Sun Ning ត្រូវបានគេស្គាល់ថាជា “អ្នកបកប្រែដំបូងគេ” នៅក្នុងប្រទេសចិន ។ លោកកើតនៅទីក្រុង Nanjing ក្នុងឆ្នាំ ១៩៨១ បច្ចុប្បន្នមានវ័យ ៤២ ឆ្នាំ និងបានចូលបម្រើការងារនៅការិយាល័យបកប្រែរបស់ក្រសួងការបរទេសក្នុងខែសីហា ឆ្នាំ ២០០៣ ហើយត្រូវបានបញ្ជូនទៅសិក្សាបន្ថែមនៅចក្រភពអង់គ្លេសក្នុងខែកញ្ញា ឆ្នាំ២០០៤ ។

ចំណែកតួនាទីជាអ្នកបកប្រែនេះ លោក Sun Ning បានធ្វើការឲ្យលោក Xi Jinping អស់រយៈពេលជាង ១០ ឆ្នាំមកហើយ ចាប់តាំងពីលោកប្រធានាធិបតីរូបនេះចូលកាន់តំណែងជាប្រធានបក្សកុម្មុយនិស្តចិនកាលពីឆ្នាំ២០១២ មកម្ល៉េះ ។ បុរសវ័យ ៤២ រូបនេះក៏ជាមនុស្សជំនិតបំផុតរបស់លោក Xi Jinping ផងដែរ នៅពេលដែលប្រធានាធិបតីរូបនេះធ្វើដំណើរទស្សនកិច្ចទៅក្រៅប្រទេស ឬជួបជាមួយភ្ញៀវបរទេស ។

ជាក់ស្ដែង ក្នុងដំណើរទស្សនកិច្ចរបស់លោក Xi Jinping ទៅកាន់សហរដ្ឋអាមេរិកកាលពីថ្ងៃទី៨ ខែមិថុនា ឆ្នាំ២០១៣ និងដំណើរទស្សនកិច្ចរបស់លោកប្រធានាធិបតី Barack Obama មកកាន់ប្រទេសចិនកាលពីថ្ងៃទី១១ ខែវិច្ឆិកា ឆ្នាំ២០១៤ លោក Sun Ning នេះហើយគឺជាអ្នកបកប្រែផ្ទាល់របស់ប្រធានាធិបតីចិន ។

ទន្ទឹមនោះ ក្នុងកិច្ចប្រជុំកំពូលក្រុមប្រទេស G20 នៅទីក្រុង Hangzhou កាលពីថ្ងៃទី៤ ខែកញ្ញា ឆ្នាំ២០១៦ លោក Sun Ning គឺជាឥស្សរជនអាថ៌កំបាំងមួយរូបដែលឈរកាន់កាបូបពណ៌ខ្មៅនៅពីក្រោយលោក Xi Jinping និងអមប្រធានាធិបតីចិនរូបនេះពេញមួយកិច្ចប្រជុំនោះទាំងមូល ។

គួរបញ្ជាក់ថា លោក Xi Jinping បានធ្វើដំណើរទៅចូលរួមកិច្ចប្រជុំកំពូល BRICS ជាប្លុកនៃប្រទេសកំពុងរីកចម្រើនចំនួន ៥ មានដូចជា ប្រេស៊ីល រុស្ស៊ី ឥណ្ឌា ចិន និងអាហ្រ្វិកខាងត្បូង ដែលបានរៀបចំឡើងកាលពីថ្ងៃទី២២ ដល់ថ្ងៃទី២៤ ខែសីហា ៕

សូមទស្សនាវីដេអូ!

A longer one. #XiJinping's translator stopped by South African Security officers from entering #BRICS main venue…Xi Jinping looks quite lost. Seems he also has problem walking steadily.
His absence from yesterdays's key event also caused a lot of speculations. pic.twitter.com/uNB4HWo2eb
— Inconvenient Truths by Jennifer Zeng 曾錚真言 (@jenniferzeng97) August 23, 2023

ប្រែសម្រួលដោយ ៖ ជីវ័ន្ត

ប្រភព ៖ Twitter

ចុចអាន ៖ មកដឹងលេខបន្ទប់ដែលលោក ថាក់ស៊ីន កំពុងសម្រាកព្យាបាលនៅពេទ្យប៉ូលិសក្រុងបាងកក

The post ស្គាល់ឈ្មោះ និងតួនាទីមន្ត្រី ចិន ដែលត្រូវសន្តិសុខ អាហ្រ្វិកខាងត្បូង រារាំងមិនឲ្យចូលជាមួយលោក Xi Jinping appeared first on Kampuchea Thmey Daily.

លោក Xi Jinping Archives - Kampuchea Thmey Daily

រឿងអប់រំ “មីពងមាន់” មួយចាន កែប្រែនិស្ស័យ និងគុណតម្លៃរបស់មេដឹកនាំចិន Xi Jinping

សារឆ្នាំថ្មី ២០២៤ មេដឹកនាំ ចិន ផ្តោតលើគោលដៅ ៣ ចំណុចធំ

លម្អិតដំណើរទស្សនកិច្ចផ្លូវរដ្ឋរយៈពេលជិត ៣០ ម៉ោងរបស់ប្រធានាធិបតី​ចិន Xi Jinping នៅវៀតណាម

លោក Xi Jinping អញ្ជើញទៅដល់ វៀតណាម ជាលើកទី ៣ ក្នុងរយៈពេល ៨ ឆ្នាំ

ចិន បបួលប្រទេសដែលជាសម្ព័ន្ធមិត្ត រុស្ស៊ី ចូលក្នុងគម្រោងគំនិតផ្ដួចផ្ដើម ខ្សែក្រវាត់ និងផ្លូវ

រុស្ស៊ី វាយបកជំនួស ចិន រឿងលោក Joe Biden ហៅលោក Xi Jinping ជា “មេដឹកនាំផ្ដាច់ការ”

ស្គាល់ឈ្មោះ និងតួនាទីមន្ត្រី ចិន ដែលត្រូវសន្តិសុខ អាហ្រ្វិកខាងត្បូង រារាំង​មិនឲ្យចូលជាមួយលោក Xi Jinping

លម្អិតដំណើរទស្សនកិច្ចផ្លូវរដ្ឋរយៈពេលជិត ៣០ ម៉ោងរបស់ប្រធានាធិបតីចិន Xi Jinping នៅវៀតណាម

ស្គាល់ឈ្មោះ និងតួនាទីមន្ត្រី ចិន ដែលត្រូវសន្តិសុខ អាហ្រ្វិកខាងត្បូង រារាំងមិនឲ្យចូលជាមួយលោក Xi Jinping