ហេតុអ្វីលោក ស៊ី ជីនពីង ធ្វើទស្សនកិច្ចនៅ វៀតណាម ក្នុងពេលនេះ?

តាមការចុះផ្សាយរបស់ Aljazeera បានឲ្យដឹងថា លោក ស៊ី ជីនពីង បានអញ្ជើញទៅដល់ប្រទេសវៀតណាមនៅថ្ងៃអង្គារ ទី១២ ខែធ្នូ សម្រាប់ដំណើរទស្សនកិច្ចផ្លូវរដ្ឋជាលើកដំបូងក្នុងរយៈពេល ៦ ឆ្នាំ ខណៈក្រុមអ្នកជំនាញអន្តរជាតិមើលឃើញថា ដំណើរទស្សនកិច្ចរបស់ប្រធានាធិបតីចិន ទៅប្រជាជាតិអាស៊ីអាគ្នេយ៍នាពេលនេះ គឺដើម្បីពង្រឹងទំនាក់ទំនងរវាងប្រទេសជិតខាងកុម្មុយនិស្តទាំង២ ហើយប្រឆាំងអាមេរិក ខណៈទីក្រុងហាណូយក៏ទើបតែពង្រឹងទំនាក់ទំនងការទូតជាមួយបណ្តាប្រទេសលោកខាងលិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមអ្នកវិភាគនិយាយថា នេះជាដំណើរទស្សនកិច្ចមួយរបស់លោក ស៊ី ដើម្បីទាក់ទាញវៀតណាម និងទប់ស្កាត់ឥទ្ធិពលរបស់អាមេរិកនៅក្នុងប្រជាជាតិអាស៊ីអាគ្នេយ៍មួយនេះ ហើយទស្សនកិច្ចនេះកើតឡើងត្រឹមតែរយៈពេល ៣ ខែប៉ុណ្ណោះ បន្ទាប់ពីប្រធានាធិបតីសហរដ្ឋអាមេរិក លោក ចូ បៃដិន ក៏ធ្វើដំណើរទៅវៀតណាមផងដែរ ស្របពេលដែលប្រទេសមហាអំណាច កំពុងប្រកួតប្រជែងគ្នាដណ្តើមឥទ្ធិពលនៅក្នុងប្រជាជាតិអាស៊ីអាគ្នេយ៍ ។

ក្រសួងការបរទេសវៀតណាមនិយាយថា លោក ស៊ី ត្រូវជួបជាមួយអគ្គលេខាបក្សកុម្មុយនិស្ត Nguyen Phu Trong, ប្រធានរដ្ឋ Vo Van Thuong និងនាយករដ្ឋមន្ត្រី Pham Minh Chinh។

ទន្ទឹមនោះ ប្រព័ន្ធផ្សព្វផ្សាយរដ្ឋចិនក៏រាយការណ៍ដែរថា លោក ស៊ី មានការផ្លាស់ប្តូរទស្សនៈស៊ីជម្រៅលើបញ្ហាយុទ្ធសាស្ត្រ នៃទំនាក់ទំនងរវាងភាគីទាំងពីរ។ លើសពីនេះ មេដឹកនាំមកពីភាគីទាំងពីរ ក៏នឹងពិភាក្សាអំពីបញ្ហាអន្តរជាតិ និងតំបន់ដែលជាកង្វល់រួមផងដែរ។

វៀតណាម ​បាន​អនុវត្ត​វិធីសាស្ត្រ “ការទូត​ដើម​ឫស្សី” ​ជា​យូរ​មក​ហើយ ដោយ​ព្យាយាម​រក្សា​ជំហរ​ល្អ​ជាមួយ​មហាអំណាច​ទាំងពីរ។ វៀតណាម បានចែករំលែកក្តីបារម្ភជាមួយសហរដ្ឋអាមេរិក អំពីការកើនឡើងនៃឥទ្ធិពលរបស់ទីក្រុងប៉េកាំង នៅក្នុងសមុទ្រចិនខាងត្បូង ប៉ុន្តែវានៅតែមានទំនាក់ទំនងនយោបាយដ៏រលូន និងទំនាក់ទំនងសេដ្ឋកិច្ចជិតស្និទ្ធជាមួយប្រទេសចិនដែរ។

អ្នកនាំពាក្យក្រសួងការបរទេសចិន លោក Wang Wenbin និយាយថា ដំណើរទស្សនកិច្ចរបស់លោក ស៊ី នឹងរួមមានកិច្ចពិភាក្សាស្តីពីការនាំយកទំនាក់ទំនងចិន-វៀតណាម ឲ្យឡើងកាន់តែខ្ពស់មួយកម្រិតទៀត។ លោក​បន្ត​ថា របៀបវារៈ​សម្រាប់​ដំណើរ​ទស្សនកិច្ច​នេះ ​រួម​មាននយោបាយ សន្តិសុខ កិច្ចសហប្រតិបត្តិការ​ជាក់ស្តែង ការបង្កើត​មតិសាធារណៈ បញ្ហា​ពហុភាគី និង​បញ្ហា​ដែនសមុទ្រ។

ទោះបីជាមានទំនាក់ទំនងសេដ្ឋកិច្ចជិតស្និទ្ធក៏ដោយ ក៏ប្រទេសជិតខាងទាំងពីរនេះ មានជម្លោះជាមួយគ្នាជុំវិញបញ្ហាព្រំដែននៅសមុទ្រចិនខាងត្បូងដែរ។

ក្នុងរយៈពេលមួយទសវត្សរ៍ចុងក្រោយ ចិនបានពង្រីកការកាន់កាប់ទឹកដី នៅសមុទ្រចិនខាងត្បូង ដោយបង្កើតកោះយោធាដែលមានផ្លូវយន្តហោះ កំពង់ផែ និងប្រព័ន្ធរ៉ាដា។ វៀតណាម រួមជាមួយម៉ាឡេស៊ី ព្រុយណេ ហ្វីលីពីន និងកោះតៃវ៉ាន់ សុទ្ធតែទាមទារទឹកដីខ្លះនៅទីនោះ។

ក្នុង​ដំណើរ​ទស្សនកិច្ច​របស់​លោក បៃដិន កាល​ពី​ខែ​កញ្ញា, វៀតណាមនិង​អាមេរិក ​បាន​ព្រមាន​រួម​គ្នា​ប្រឆាំង​នឹងការ​គំរាម​កំហែង ឬ​ការ​ប្រើ​កម្លាំងនៅ​សមុទ្រ​ចិន​ខាង​ត្បូង។

ចិន គឺជាដៃគូពាណិជ្ជកម្មធំបំផុតរបស់វៀតណាមអស់រយៈពេលជាច្រើនឆ្នាំមកនេះ ជាមួយនឹងទំហំពាណិជ្ជកម្មទ្វេភាគីទឹកប្រាក់ ១៧៥.៦ពាន់លានដុល្លារក្នុងឆ្នាំ២០២២។ យោងតាមទិន្នន័យគយវៀតណាម បានបង្ហាញថា ការនាំចូលទំនិញពីចិន មានប្រមាណ ៦៧ ភាគរយ ហើយលើសពីនេះ ​ចិន​មាន​ទុន​វិនិយោគ​ជាង ២៦ ពាន់​លាន​ដុល្លារ​នៅ​វៀតណាម ជាមួយ​គម្រោង​សកម្ម​ចំនួន ៤០០០ គម្រោង ៕

អត្ថបទ៖ Vann Vann

ចុចអាន៖ លោក Xi Jinping អញ្ជើញទៅដល់ វៀតណាម ជាលើកទី ៣ ក្នុងរយៈពេល ៨ ឆ្នាំ