សហគ្រាសចិន Archives - Kampuchea Thmey Daily

រោងចក្រកែច្នៃជ័រកៅស៊ូតម្លៃ ៣០ លានដុល្លារ បើកដំណើរការនៅខេត្តត្បូងឃ្មុំ

deth leng — Wed, 27 May 2026 02:54:51 +0000

រោងចក្រផលិតកែច្នៃកៅស៊ូរបស់ក្រុមហ៊ុន គីមស៍ រ៉ាប់ប៊ើរ តម្លៃ ៣០ លានដុល្លារ សាងសង់នៅលើផ្ទៃដីជិត ១៥ ហិកតា និងមាសមត្ថភាពផលិត ១០ ម៉ឺនតោ ក្នុងមួយឆ្នាំ បើកសម្ពោធដាក់ឱ្យដំណើរការនៅព្រឹកថ្ងៃទី ២៧ ឧសភា ២០២៦ នៅស្រុកត្បូងឃ្មុំ ខេត្តត្បូងឃ្មុំ។

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ នៅក្នុងពិធីសម្ពោធរោងចក្រ គីមស៍ រ៉ាប់ប៊ើរថា ការសម្រេចវិនិយោគ សាងសង់រោងចក្រផលិតកែច្នៃជ័រកៅស៊ូនេះ បានឆ្លុះបញ្ចាំងអំពីសារសំខាន់ នៃកត្តាសុខសន្តិភាពដែលជាមូលដ្ឋានគ្រឹះ នៃការអភិវឌ្ឍន៍សង្គម សេដ្ឋកិច្ចជាតិឱ្យរីកចម្រើនឆាប់រហ័ស ព្រមទាំងបង្ហាញពីទំនុកចិត្ត និងភាពជឿជាក់របស់វិនិយោគិនទាំងខ្មែរ និងបរទេសមកលើបរិយាកាសធុរកិច្ចអំណោយផលរបស់កម្ពុជា។

ក្រុមហ៊ុន គីមស៍ រ៉ាប់ប៊ើរ បានបោះទុនវិនិយោគ ៣០ លានដុល្លារ សាងសង់រោងចក្រផលិតកែច្នៃជ័រកៅស៊ូ នៅលើផ្ទៃដីជិត ១៥ ហិកតា និងមាសមត្ថភាពផលិតជ័រកៅស៊ូ ១០ ម៉ឺនតោ ក្នុងមួយឆ្នាំ ព្រមទាំងផ្ដល់ការងារផ្ទាល់ប្រមាណ ៣០០ កន្លែង និងការងារប្រយោលប្រមាណជាង ៥ ម៉ឺននាក់។

សម្ដេច ហ៊ុន ម៉ាណែត បានបញ្ជាក់ថា នៅក្នុងឆ្នាំ ២០២៥ ចំណូលសរុបបានពីការលក់ផលិតផលជ័រកៅស៊ូចំនួន ៨៣៣ លានដុល្លារ កើនឡើងប្រមាណ ២៤% ធៀបនឹងឆ្នាំ ២០២៤ មួយផ្នែកដោយសារតម្លៃកៅស៊ូកើនឡើង និងផ្ទៃដីកើន។

សម្រាប់ចំណូលពីការនាំចេញប្រមាណ ៦០៤ លានដុល្លារ ថយចុះ ៩,១% ប៉ុន្តែចំណូលពីការលក់ជ័រកៅស៊ូក្នុងស្រុក ប្រមាណ ២២៣ លានដុល្លារ កើនឡើង ១៣១% ពោលគឺលក់ក្នុងស្រុកដើម្បីបំពេញតម្រូវការ ច្រើនជាងនាំចេញ។

សម្ដេច ហ៊ុន ម៉ាណែត បន្ថែមថា ការអភិវឌ្ឍន៍វិស័យកសិកម្ម ដំបូងឡើយគឺការផលិត និងនាំចេញនូវត្ថុធាតុដើម បន្ទាប់មកគឺការនាំចេញផលិតផលពាក់កណ្ដាលសម្រេច និងផលិតផលសម្រេច ដែលជំរុញឱ្យមានកសិឧស្សាហកម្ម ដែលនេះគឺជាគោលដៅសំខាន់ណាស់ ដើម្បីរក្សាតម្លៃបន្ថែមនៅក្នុងប្រទេស។

សម្ដេច ហ៊ុន ម៉ាណែត បញ្ជាក់ថា៖ «បើយើងផលិតនាំចេញតែវត្ថុធាតុដើមទៅក្រៅ ទៅដល់ប្រទេសផ្សេងគេយកទៅ វៃក្នុង កែច្នៃមួយចំនួន ច្រកបៅវៃផ្លាក ស្រុកគេ តម្លៃវាទៅដល់នោះ អញ្ចឹងផល និងតម្លៃទៅដល់កសិករក៏វាតិច តែបើយើងរក្សានៅក្នុងស្រុករបស់យើង តាមរយៈការកែច្នៃជាវត្ថុពាក់កណ្ដាលសម្រេច ឬផលិតផលសម្រេច គឺជាគោលដៅធំសម្រាប់យើង ហើយបើយើងអាចជំរុញការកែច្នៃឱ្យបាននៅនឹងកន្លែង មិនត្រឹមតែ កសិកម្មទេ គឺកសិឧស្សាហកម្ម បានន័យថា មិនមែនតែកសិករ ឬមួយម្ចាស់ចម្ការ ម្ចាស់ស្រែនោះទេ ប៉ុន្តែអ្នកដែលធ្វើការនៅក្នុងរោងចក្រកែច្នៃ បង្កើតការងារដឹកជញ្ជូនផ្សេងៗ គឺជាខ្សែច្រវាក់ផលិតកម្មដែលយើងចង់បាន»។

លោក ម៉ែន សុភក្តិ ប្រធានសមាគមអភិវឌ្ឍន៍កៅស៊ូ ប្រាប់កម្ពុជាថ្មីថា ថ្វីត្បិតស្ថានភាពសេដ្ឋកិច្ច នយោបាយ នៅលើពិភពលោកជួបបញ្ហា ប៉ុន្តែការនាំចេញនៅក្នុងវិស័យកៅស៊ូកម្ពុជា បន្តមានស្ថិរភាពល្អ ខណៈតម្លៃក៏បានខ្ពស់គួរសម ឆ្លុះបញ្ចាំងពីការរក្សាបាននូវស្ថិរភាពទីផ្សារតម្លៃជ័រកៅស៊ូ។

យោងតាមក្រសួងកសិកម្ម រុក្ខាប្រមាញ់ និងនេសាទ គិតមកដល់ពេលនេះ កម្ពុជាមានផ្ទៃដីដាំដុះកៅស៊ូជិត ៤៥ ម៉ឺន ហិកតា ផ្ដល់ទិន្នផលប្រមាណ ៤២ ម៉ឺនតោន ក្នុងមួយឆ្នាំ ដែលពីមុនជ័រកៅស៊ូមានការនាំចេញទាំងស្រុង ខណៈបច្ចុប្បន្ន កម្ពុជាមានលទ្ធភាពកែច្នៃ និងលក់ក្នុងស្រុក៕

អត្ថបទ៖ ឡេង ដេត

The post រោងចក្រកែច្នៃជ័រកៅស៊ូតម្លៃ ៣០ លានដុល្លារ បើកដំណើរការនៅខេត្តត្បូងឃ្មុំ appeared first on Kampuchea Thmey Daily.

ក្រុមហ៊ុនចិន ចាប់អារម្មណ៍វិនិយោគរោងចក្រចម្រាញ់ប្រេងនៅកម្ពុជា

Dy Bunnara — Thu, 07 May 2026 02:04:10 +0000

ក្រុមហ៊ុនមានមូលដ្ឋាននៅប្រទេសចិនបានបង្ហាញការចាប់អារម្មណ៍ សម្រាប់ការវិនិយោគសាងសង់រោងចក្រចម្រាញ់ប្រេងនៅក្នុងប្រទេសកម្ពុជា។

នៅក្នុងជំនួបពិភាក្សាការងារជាមួយ លោក ហ៊ាន សាហ៊ីប ប្រធានក្រុមការងារជំរុញការវិនិយោគក្នុងខេត្តព្រះសីហនុ លោក Liu Hui ប្រធានក្រុមហ៊ុន Zhisheng Energy បានលើកឡើងពីអាជីវកម្មរបស់ក្រុមហ៊ុន ព្រមទាំងបានបង្ហាញនូវចំណាប់ក្នុងការស្វែងយល់អំពីបរិយាកាសវិនិយោគ ជាពិសេសការសិក្សាអំពីលទ្ធភាពវិនិយោគរោងចក្រចម្រាញ់ប្រេងនៅក្នុងប្រទេសកម្ពុជា។

ជាការឆ្លើយតប លោក ហ៊ាន សាហ៊ីប បានស្វាគមន៍ចំពោះគណៈប្រតិភូក្រុមហ៊ុន Zhisheng Energy ដែលបានមកសិក្សាស្វែងយល់អំពីកាលានុវត្តភាពវិនិយោគនៅព្រះរាជាណាចក្រកម្ពុជា ជាពិសេសសិក្សាអំពីលទ្ធភាពវិនិយោគលើការចម្រាញ់ប្រេងនៅកម្ពុជា ដែលជាវិស័យអាទិភាពនិងទទួលបានការយកចិត្តទុកដាក់ខ្ពស់ពីរាជរដ្ឋាភិបាល។

ក្នុងខណៈផ្តល់បទសម្ភាសដល់អ្នកសារព័ត៌មាន នៅក្នុងពិធីបើកកិច្ចប្រជុំកំពូលធុរកិច្ចអាស៊ានកម្ពុជាឆ្នាំ២០២៦ នៅសណ្ឋាគារសូហ្វីតែលភ្នំពេញកាលពីថ្ងៃទី៤ ខែមីនា ឆ្នាំ២០២៦នេះ លោក កែវ រតនៈ រដ្ឋមន្រ្តីក្រសួងរ៉ែ និងថាមពលបានបញ្ជាក់ថា រាជរដ្ឋាភិបាលបានកំពុងតែជជែកជាមួយនឹងក្រុមហ៊ុនវិនិយោគមួយចំនួន ដើម្បីឈានទៅបង្កើតរោងចក្រចម្រាញ់ប្រេងកាតនៅកម្ពុជា។

លោករដ្ឋមន្រ្តីបានអះអាងថា បើពុំមានអីប្រែប្រួល រោងចក្រនេះនឹងចេញជារូបរាងនៅត្រឹមប្រហែលជា ៣ ឆ្នាំទៀតយ៉ាងយូរ។

ពាក់ព័ន្ធការយឺតយូរក្នុងការសាងសង់រោងចក្រចម្រាញ់ប្រេង រដ្ឋមន្រ្តីក្រសួងរ៉ែ និងថាមពលបានពន្យល់ថា ការបង្កើតរោងចក្រចម្រាញ់ប្រេងកាតទាល់តែមានមាត្រដ្ឋានសេដ្ឋកិច្ចធំ ខណៈប៉ុន្មានឆ្នាំមុនសម្តេចតេជោ ហ៊ុន សែន អតីតនាយករដ្ឋមន្ត្រីក៏ធ្លាប់ចង់ធ្វើដែរ ប៉ុន្តែកម្ពុជានៅមានមាត្រដ្ឋានសេដ្ឋកិច្ចទីផ្សារទាបនៅឡើយ៕

The post ក្រុមហ៊ុនចិន ចាប់អារម្មណ៍វិនិយោគរោងចក្រចម្រាញ់ប្រេងនៅកម្ពុជា appeared first on Kampuchea Thmey Daily.

មកស្គាល់រោងចក្រធំៗកំពុងកែច្នៃដំឡូងមីស្រស់នាំចេញទៅក្រៅប្រទេស

Dy Bunnara — Wed, 06 May 2026 02:31:23 +0000

កម្ពុជាស្ថិតនៅក្នុងចំណោមប្រទេសនាំចេញដំឡូងមីដ៏ធំមួយនៅលើពិភពលោក។ កម្ពុជានាំចេញដំឡូងមីស្រស់ ៩៥% ខណៈការកែច្នៃក្នុងស្រុកមានប្រមាណ ៥%។

ខណៈការផ្លាស់ប្តូរពីការនាំចេញមើមដំឡូងមីស្រស់ទៅជាការកែច្នៃក្នុងស្រុកជួយបង្កើតតម្លៃសេដ្ឋកិច្ចបន្ថែម, លើកកម្ពស់ជីវភាពរបស់ប្រជាកសិករ, និងធ្វើពិពិធកម្មឧស្សាហកម្ម បច្ចុប្បន្នកម្ពុជាមានរោងចក្រកែច្នៃដំឡូងមីដែលកែច្នៃដំឡូងមីស្រស់ទៅជាម្សៅដំឡូងមីនាំចេញទៅក្រៅប្រទេស។

រោងចក្រកែច្នៃដំឡូងមីរបស់ក្រុមហ៊ុន Singsong Industrial (Cambodia)

រោងចក្រកែច្នៃដំឡូងមីរបស់ក្រុមហ៊ុន Singsong Industrial (Cambodia) សាងសង់នៅលើផ្ទៃដីជិត ២៣ ហិកតា ក្រោមទុនវិនិយោគប្រមាណ ៣០ លានដុល្លារអាមេរិក មានទីតាំងនៅសង្កាត់អូរឫស្សី ក្រុងក្រចេះ ខេត្តក្រចេះ ដែលកំពុងដើរតួនាទីយ៉ាងសំខាន់ក្នុងវិស័យកសិឧស្សាហកម្មនៅក្នុងតំបន់។

រោងចក្រនេះវិនិយោគមកពីប្រទេសកូរ៉េ ដែលបច្ចុប្បន្នមានបុគ្គលិកនិងកម្មករបម្រើការងារសរុបចំនួន ៥៩ នាក់ (ខ្មែរ ៥៤ នាក់ និងបរទេស ៥នាក់)។

សមត្ថភាពផលិតកម្ម រោងចក្រអាចផលិតម្សៅដំឡូងមីបានចំនួន ២៤០ តោនក្នុងមួយថ្ងៃ ដោយត្រូវការវត្ថុធាតុដើមជាដំឡូងមីស្រស់រហូតដល់ ៨៩០ តោនជារៀងរាល់ថ្ងៃ។ ចំពោះទីផ្សារវិញ ក្រុមហ៊ុនបាននាំចេញទៅកាន់ប្រទេសកូរ៉េចំនួន ២០% និងផ្គត់ផ្គង់ក្នុងស្រុកចំនួន ៨០%។

រោងចក្របានចាប់ផ្តើមដំណើរការកាលពីអំឡុឆ្នាំ២០១៧ ដែលជាសហគ្រាសឈានមុខគេក្នុងខេត្តក្រចេះ តាមរយៈការប្រមូលទិញកសិផលពីប្រជាកសិករ បង្កើតឱកាសការងារ និងចូលរួមចំណែកក្នុងការការពារបរិស្ថាន។

រោងចក្រកែច្នៃម្សៅដំឡូងមីរបស់ក្រុមហ៊ុន ជា ទូច

រោងចក្រកែច្នៃម្សៅដំឡូងមីរបស់ក្រុមហ៊ុន ជា ទូច មានទីតាំងស្ថិតនៅភូមិសោមគល់ ឃុំសោមធំ ស្រុកអូរយ៉ាដាវ ខេត្តរតនគិរី។

ក្រុមហ៊ុនបានដាក់ទុនវិនិយោគសាងសង់រោងចក្រអស់ទឹកប្រាក់ចំនួនជាង ៣០ លានដុល្លារអាមេរិក លើផ្ទៃដីជាង ៤០ ហិកតា ហើយបានសម្ភោធដាក់ឲ្យដំណើរការសកម្មភាពនៅថ្ងៃទី៧ ខែឧសភា ឆ្នាំ២០១៨។

ក្នុងដំណើរទស្សនកិច្ចរបស់ក្រុមអ្នកសារព័ត៌មានទៅខេត្តភាគឦសាន លោក ញ៉ែម សំអឿន អភិបាលនៃគណៈអភិបាលខេត្តរតនគិរីបានគូសបញ្ជាក់ថា រោងចក្រដែលស្ថិតនៅតាមផ្លូវទៅច្រកអន្តរជាតិអូរយ៉ាដាវនេះ មានសមត្ថភាពអាចផលិតម្សៅមីបានប្រមាណ ១ ០០០ តោនក្នុងមួយថ្ងៃ សម្រាប់នាំចេញទៅប្រទេសចិន និងសិង្ហបុរី។

សហគ្រាស HLH

ក្រៅតែពីជំរុញការដាំដុះដំឡូងមីនៅខេត្តកំពង់ស្ពឺ ក្រុមហ៊ុន «HLH Agriculture» បានបង្កើតរោងចក្រកែច្នៃដំឡូងមីជាម្សៅសម្រាប់នាំចេញនៅឆ្នាំ ២០១៥។

រោងចក្រកែច្នៃដំឡូងមីរបស់ក្រុមហ៊ុន HLH អាចផលិតម្សៅមីបានប្រមាណ ១២០ តោនក្នុងមួយថ្ងៃ ហើយក្នុងមួយខែរោងចក្រផលិតម្សៅមីចន្លោះពី ៣ ០០០ ទៅ ៥ ០០០តោន សម្រាប់ផ្គត់ផ្គង់អតិថិជននៅក្រៅប្រទេស។

ក្រុមហ៊ុន «HLH Agriculture» ជាក្រុមហ៊ុនវិនិយោគមានមូលដ្ឋានមកពីប្រទេសសិង្ហបុរី។ កាលពីឆ្នាំ ២០០៨ ក្រុមហ៊ុនទទួលបានដីសម្បទានសេដ្ឋកិច្ចពីរាជរដ្ឋាភិបាលជិត ១ ម៉ឺនហិកតា ដើម្បីអភិវឌ្ឍលើវិស័យកសិកម្មនៅស្រុកឱរ៉ាល់ ខេត្តកំពង់ស្ពឺ។

ក្រុមហ៊ុន Green Leader

រោងចក្រកែច្នៃដំឡូងមីរបស់ក្រុមហ៊ុន Green Leader បានបើកការដ្ឋានសាងសង់កាលពីថ្ងៃទី ១ ខែមេសា ឆ្នាំ២០១៨ នៅលើផ្ទៃដីទំហំជាង ២០ ហិតា នៅក្នុងតំបន់សេដ្ឋកិច្ចពិសេសស្រុកស្នួល ខេត្តក្រចេះ ក្រោមទុនវិនិយោគប្រមាណ ២០ លានដុល្លារ ។

រោងចក្រកែច្នៃដំឡូងមីរបស់ក្រុមហ៊ុន មានសមត្ថភាពកែច្នៃដំឡូងមីទៅជាម្សៅបានចំនួន ១៣០ ពាន់តោនក្នុងមួយឆ្នាំ និងអាចស្រូបយកវត្ថុធាតុដើមដំឡូងមីចំនួន ៥០០ ពាន់តោន។

ក្រុមហ៊ុនបានដាក់ចេញផែនការ ក្នុងរយៈពេល ៥ ឆ្នាំ មានគម្រោងសាងសង់រោងចក្រខ្នាតធំឲ្យបាន ២០ រោងចក្រទូទាំងប្រទេស។

ក្រុមហ៊ុន «Guanshen Shengda Agriculture Industry Co., Ltd.»

កាលពីអំឡុងខែមេសា ឆ្នាំ ២០២៦ រោងចក្រផលិតម៉្សៅដំឡូងមីរបស់ក្រុមហ៊ុន «Guanshen Shengda Agriculture Industry Co., Ltd.» បានបើកការដ្ឋានសាងសង់ដែលមានទីតាំងស្ថិតនៅភូមិចេក ឃុំអូរ ស្រុកភ្នំស្រួច ខេត្តកំពង់ស្ពឺ នៅចន្លោះគីឡូម៉ែត្រ ៧៤-៧៥។

ក្រោមការបណ្តាក់ទុនប្រមាណ ២០ លានដុល្លារ បន្ទាប់ពីបញ្ចប់ការសាងសង់ ក្រុមហ៊ុនអាចបង្កើតចំណូលលក់ប្រចាំឆ្នាំប្រមាណ ៩០ លានដុល្លារ ដោយផលិតម្សៅដំឡូងមី ១០ ម៉ឺនតោន ដំឡូងមីស្ងួត ១០ ម៉ឺនតោន និងកាកដំឡូងមីប្រើសម្រាប់ផលិតចំណីសត្វប្រមាណ ៣ ម៉ឺនតោន។

កម្ពុជាជាប់ចំណាត់ថ្នាក់ជាប្រទេសនាំចេញដំឡូងមីធំជាងគេទី ៤ នៅអាស៊ី និងទី១០ នៅលើពិភពលោក ជាមួយផ្ទៃដីដាំដុះប្រមាណ ៦០០ ០០០ ទៅ ៨០០ ០០០ ហិកតា។

រោងចក្រកែច្នៃដំឡូងមីចំនួន ១៦ ទីតាំង បានបោះមូលដ្ឋានស្រូបប្រមូលកសិផលដំឡូងមីកែច្នៃនាំចេញទៅក្រៅប្រទេស។ នេះបើយោងតាមរបាយការណ៍របស់ក្រសួងពាណិជ្ជកម្ម។

នៅក្នុងឆ្នាំ ២០២៥ កម្ពុជារកចំណូលបាន ៦៤៦ លានដុល្លារ ពីការនាំចេញដំឡូងមីទៅទីផ្សារអន្តរជាតិ៕

The post មកស្គាល់រោងចក្រធំៗកំពុងកែច្នៃដំឡូងមីស្រស់នាំចេញទៅក្រៅប្រទេស appeared first on Kampuchea Thmey Daily.

រដ្ឋមន្ត្រីឧស្សាហកម្ម លើកទឹកចិត្តរោងចក្រស៊ីម៉ងត៍ចក្រីទីង ពង្រីការវិនិយោគ និងនាំចេញ

deth leng — Tue, 05 May 2026 02:34:52 +0000

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកទឹកចិត្តឱ្យក្រុមហ៊ុនពង្រីកការវិនិយោគ ពង្រឹងភាពប្រកួតប្រជែង និងស្វែងរកឱកាសសម្រាប់ការនាំចេញ។

លោក ហែម វណ្ណឌី ថ្លែងក្នុងពេលចុះទស្សនកិច្ច និងពិភាក្សាការងារជាមួយថ្នាក់ដឹកនាំសួនឧស្សាហកម្មសម្ភារសំណង់ ហ័រស៊ីន (កម្ពុជា) ដែលរួមមានរោងចក្រស៊ីម៉ងត៍ចក្រីទីង រោងចក្របេតុង រោងចក្រសំបកបាវ និងរោងចក្រក្ដារបន្ទះស្មាតបតចក្រីទីង ក្នុងខេត្តកំពត នៅថ្ងៃទី ០៤ ឧសភា ២០២៦។

លោក Ke Hongwei អគ្គនាយកសួនឧស្សាហកម្មបានបង្ហាញប្រតិបត្តិការសកល និងអាជីវកម្មចម្រុះរបស់ក្រុមហ៊ុន ហ័រស៊ីន ដោយបញ្ជាក់ថា សម្រាប់អាជីវកម្មនៅកម្ពុជា ក្រុមហ៊ុនបានបោះទុនវិនិយោគលើរោងចក្រស៊ីម៉ងត៍ចក្រីទីងក្នុងឆ្នាំ២០១២ ដើម្បីធ្វើទំនើបកម្មរោងចក្រនេះ និងពង្រីកអាជីវកម្មបន្ថែមទៀត។

លោកបានលើកឡើងថា៖ “ក្នុងរយៈពេលជាងមួយទសវត្សរ៍កន្លងមកនេះ យើងបន្តប្តេជ្ញាចិត្តវិនិយោគរយៈពេលវែងនៅកម្ពុជា ដោយលើកកម្ពស់គុណភាពផលិតផល ប្រសិទ្ធភាពផលិតកម្ម និងសេវាកម្ម ដើម្បីធានាការផ្គត់ផ្គង់ទីផ្សារក្នុងស្រុកប្រកបដោយនិរន្តរភាព។ ក្រុមហ៊ុនក៏កំពុងពង្រីកអាជីវកម្មបន្ថែមទៅការផលិតម្នាងសិលា និងសម្ភារសំណង់ផ្សេងៗ។”

រោងចក្រស៊ីម៉ងត៍ចក្រីទីង ត្រូវបានបង្កើតឡើងក្នុងឆ្នាំ១៩៦១ ជារោងចក្រស៊ីម៉ងត៍ដំបូងគេបង្អស់នៅកម្ពុជា។ ទីតាំងនេះត្រូវបានពង្រីកជាសួនឧស្សាហកម្មសម្ភារសំណង់ ហ័រស៊ីន ដើម្បីផ្គត់ផ្គង់សម្ភារសំណង់សម្រាប់គម្រោងហេដ្ឋារចនាសម្ព័ន្ធធំៗនៅកម្ពុជា។

លោក ហែម វណ្ណឌី បានកោតសរសើរចំពោះការវិនិយោគរយៈពេលវែងរបស់ក្រុមហ៊ុន ដោយលើកឡើងថា៖ “រាជរដ្ឋាភិបាលកម្ពុជាវាយតម្លៃខ្ពស់ចំពោះវត្តមាន និងការបន្តពង្រីកការវិនិយោគរបស់ក្រុមហ៊ុន ដែលបង្ហាញពីទំនុកចិត្តរបស់ក្រុមហ៊ុនលើស្ថិរភាពសេដ្ឋកិច្ច និងសក្តានុពលអភិវឌ្ឍរយៈពេលវែងរបស់យើង។”

លោករដ្ឋមន្ត្រីបានលើកទឹកចិត្តឱ្យក្រុមហ៊ុនសិក្សាលទ្ធភាពនាំចេញ ពិភាក្សាបរិយាកាសប្រកួតប្រជែងដោយយុត្តិធម៌ក្នុងឧស្សាហកម្ម និងសារសំខាន់នៃនិរន្តរភាពវត្ថុធាតុដើម ពិសេសថ្មកំបោរ សម្រាប់ការអភិវឌ្ឍរយៈពេលវែង។

តំណាងក្រុមហ៊ុនក៏បានស្នើសុំកិច្ចសហការពីក្រសួង ដើម្បីលើកកម្ពស់ការប្រើប្រាស់ផលិតផលសំបកបាវដែលផលិតក្នុងស្រុក។ ឆាប់ៗខាងមុខនេះ ក្រុមហ៊ុននឹងបញ្ចេញលក់នូវសម្ភារសំណង់ថ្មីទៀតដែលផលិតសម្រាប់ទីផ្សារក្នុងស្រុក ជំនួសឱ្យការនាំចូល។

រដ្ឋមន្ត្រីបានស្វាគមន៍សំណើនេះ និងលើកទឹកចិត្តឱ្យក្រុមហ៊ុនវិនិយោគលើការស្រាវជ្រាវ និងអភិវឌ្ឍន៍ ដើម្បីពង្រីកការផលិតសម្ភារសំណង់ថ្មីៗ ពិសេសសម្ភារដែលនៅបន្តមាន ការនាំចូលច្រើន ដូចជាឥតការូ និងម៉ាបជាដើម។

លោក ហែម វណ្ណឌី បន្ថែមថា៖ “វិទ្យាសាស្ត្ររូបធាតុមានសារសំខាន់ណាស់ចំពោះការអភិវឌ្ឍឧស្សាហកម្ម។ ក្រសួងលើកទឹកចិត្តឱ្យក្រុមហ៊ុន ហ័រស៊ីន សហការជាមួយវិទ្យាស្ថានជាតិវិទ្យាសាស្រ្ត បច្ចេកវិទ្យា និងនវានុវត្តន៍ លើការស្រាវជ្រាវ និងអភិវឌ្ឍន៍រួម ដូចជាលើការគ្រប់គ្រង និងកែច្នៃសំណល់សម្រាប់ផលិតសម្ភារប្រើប្រាស់ជាដើម។”

The post រដ្ឋមន្ត្រីឧស្សាហកម្ម លើកទឹកចិត្តរោងចក្រស៊ីម៉ងត៍ចក្រីទីង ពង្រីការវិនិយោគ និងនាំចេញ appeared first on Kampuchea Thmey Daily.

ខេត្តក្រចេះចម្រាញ់រ៉ែមាសសុទ្ធបានប្រមាណ ៤៧៧ គីឡូក្រាម ដោយក្រុមហ៊ុនវិនិយោគពីក្រៅប្រទេស

Dy Bunnara — Wed, 11 Mar 2026 02:39:41 +0000

ខេត្តក្រចេះ មានក្រុមហ៊ុនធ្វើអាជីវកម្មរ៉ែមាស ១ កន្លែង ស្ថិតនៅស្រុកអូរគ្រៀងសែនជ័យ វិនិយោគិនមកពីប្រទេសចិន ដែលសម្រេចបានការចម្រាញ់មាសសុទ្ធចាប់ពីខែតុលា ឆ្នាំ២០២២ រហូតមកបច្ចុប្បន្នសរុបបានចំនួន ៤៧៧,៩៥១គីឡូក្រាម។

នៅក្នុងពិធីប្រកាសចូលកាន់មុខតំណែង ប្រធានមន្ទីររ់ែ និង ថាមពល ខេត្តក្រចេះ កាលថ្ងៃទី១០ ខែមិនា ឆ្នាំ២០២៦ ក្រោមអធិបតីភាព លោក អ៊ិត ប្រាំង រដ្ឋលេខាធិការនៃក្រសួងរ៉ែ និងថាមពល លោក វ៉ា ថន អភិបាលខេត្តក្រចេះ បានរំលេចអំពីវឌ្ឍនភាពនៃភាពរីកចម្រើនក្នុង វិស័យរ៉ែ និង ថាមពល ក្នុងខេត្តសព្វថ្ងៃ មានក្រុមហ៊ុន សហគ្រាសសិក្សាស្រាវជ្រាវរ៉ែលោហៈ ក្រុមហ៊ុនអាជីវកម្មរ៉ែមាស ក្រុមហ៊ុនអាជីវកម្មថ្មក្រានីត អណ្តូងរ៉ែ ការដ្ឋានវាយថ្ម និងអាជីវករធ្វើអាជីវកម្មគ្រួស ខ្សាច់ ថ្មសំណង់ សរុបចំនួន ៥៦ក្រុមហ៊ុន/សហគ្រាស/អាជីវករ ស្មើនឹង ៦១អាជ្ញាបណ្ណ។

ក្នុងនោះ ក្រុមហ៊ុនធ្វើអាជីវកម្មរ៉ែមាសមានចំនួន ៣ ក្រុមហ៊ុន, ក្រុមហ៊ុនធ្វើអាជីវកម្មថ្មកំបោរ សម្រាប់ផលិតស៊ីម៉ងត៍មានចំនួន ១ ក្រុមហ៊ុន, ក្រុមហ៊ុនរុករករ៉ែលោហៈចំនួន ៨ ក្រុមហ៊ុន, ក្រុមហ៊ុនរ៉ែសំណង់ចំនួន ៣ ក្រុមហ៊ុន, ក្រុមហ៊ុនថ្មអារមានចំនួន ១៤ក្រុមហ៊ុន, សហគ្រាសធ្វើអាជីវកម្មគ្រួស-ខ្សាច់មានចំនួន ៧ សហគ្រាស, និងសិប្បកម្មជីកដីចល័តចំនួន ២០អាជីវករ ស្មើនឹង ២០អាជ្ញាបណ្ណ៕

ក្នុងឱកាសនោះលោកអភិបាលខេត្តបានលើកពីលទ្ធផលនៃការវិនិយោគលើអាជីវកម្មរ៉ែមាសក្នុងខេត្តរហូតមកបច្ចុប្បន្នសម្រេចបានប្រមាណ ៤៧៧,៩៥១ គីឡូក្រាម ដែលរកចំណូលចូលរដ្ឋបានរាប់លានដុល្លារ៕

អត្ថបទ៖ ប្រុញ វិធិន

The post ខេត្តក្រចេះចម្រាញ់រ៉ែមាសសុទ្ធបានប្រមាណ ៤៧៧ គីឡូក្រាម ដោយក្រុមហ៊ុនវិនិយោគពីក្រៅប្រទេស appeared first on Kampuchea Thmey Daily.

វត្តមានសហគ្រាសចិនបង្កើតការងារជាង ១ លានកន្លែងដល់ពលរដ្ឋកម្ពុជា

Dy Bunnara — Wed, 11 Feb 2026 03:15:51 +0000

ខណៈដែលចិនជាប្រភពទុនវិនិយោគដ៏ធំ វិនិយោគិនចិនក៏បានរួមចំណែកបង្កើតការងារប្រមាណ ១ លានកន្លែងដល់ពលរដ្ឋកម្ពុជា តាមរយៈវត្តមានរោងចក្រសហគ្រាសរាប់ពាន់មូលដ្ឋាន ដែលកំពុងប្រតិបត្តិការនៅក្នុងប្រទេសកម្ពុជា។

នៅក្នុងវេទិកាកិច្ចសន្ទនាលើកទី ១ រវាងរដ្ឋ និងវិស័យឯកជន កម្ពុជា-ចិន ក្រោមវត្តមាន លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លោក Wang Wenbin ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំកម្ពុជាបានលើកឡើងថា តាមរយៈវត្តមានសហគ្រាសចិនជាច្រើនបានបង្កើតការងារជាង ១ លានកន្លែងដល់ពលរដ្ឋកម្ពុជា និងបានរួមចំណែកជំរុញកំណើនសេដ្ឋកិច្ចប្រកបដោយនិរន្តរភាព និងការពង្រីកពាណិជ្ជកម្មរវាងកម្ពុជាជាមួយចិន និងបណ្តាប្រទេសផ្សេងៗទៀត។

ក្នុងគោលដៅរួមពិនិត្យ និងពិភាក្សាអំពីការចូលរួមកែលម្អធ្វើឱ្យប្រសើរឡើងនូវបរិយាកាសវិនិយោគ និងធុរកិច្ចនៅកម្ពុជា ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំកម្ពុជា ក៏បានទាញការចាប់អារម្មណ៍ពាក់ព័ន្ធកិច្ចសហការរៀបចំកិច្ចសន្ទនារវាងរដ្ឋ និងវិស័យឯកជន កម្ពុជា-ចិន ដែលនឹងជួយពង្រឹងនិងពង្រីកវត្តមានសហគ្រាសចិនឱ្យមកវិនិយោគនៅកម្ពុជាបន្ថែមទៀត។

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានគូសបញ្ជាក់ថា ប្រទេសចិនគឺជាអ្នកវិនិយោគ និងដៃគូពាណិជ្ជកម្មធំបំផុតរបស់កម្ពុជា។

លោកឧបនាយករដ្ឋមន្ត្រី បានមើលឃើញការរៀបចំវេទិកាកិច្ចសន្ទនារវាងរដ្ឋនិងវិស័យឯកជន កម្ពុជា-ចិន មានសារៈសំខាន់ព្រោះអាចជួយវិនិយោគិនដោះស្រាយឧបសគ្គនានា និងធ្វើឱ្យប្រសើរឡើងបរិយាកាសវិនិយោគ និងការធ្វើពាណិជ្ជកម្មនៅកម្ពុជា។

«ការរៀបចំកិច្ចសន្ទនានេះក៏ដើម្បីបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្នុងការផ្តល់ឱកាសដល់វិនិយោគិនចិនដែលកំពុងវិនិយោគនៅកម្ពុជា អាចលើកឡើងពីបញ្ហាប្រឈមនានា ក្នុងគោលដៅស្វែងរកដំណោះស្រាយសមស្រប សំដៅពង្រឹងនិងជំរុញកិច្ចសហប្រតិបត្តិការផ្នែកសេដ្ឋកិច្ច ពាណិជ្ជកម្ម និងការវិនិយោគ ព្រមទាំងកសាងទំនុកចិត្តពីសហគមន៍ធុរកិច្ចចិន»។ លោក ស៊ុន ចាន់ថុល បញ្ជាក់បន្ថែម។

បន្ថែមពីនេះ បើតាមលោកឧបនាយករដ្ឋមន្រ្តី កិច្ចសន្ទនានេះនឹងត្រូវធ្វើជាប្រចាំរៀងរាល់ប្រាំមួយខែម្តង ដើម្បីតាមដានការដោះស្រាយបញ្ហាប្រឈម ដោយស្មារតីស្វែងរកដំណោះស្រាយឈ្នះឈ្នះ ដើម្បីធានាបរិយាកាសវិនិយោគដែលមានភាពសុខដុមរមនា និងមានទំនុកចិត្តសម្រាប់វិនិយោគិនចិន។

គិតពីទសវត្សឆ្នាំ១៩៩០ ទុនវិនិយោគពីប្រទេសចិននៅកម្ពុជា មានប្រមាណ ៣៦ ពាន់លានដុល្លារ។ វិនិយោគិនចិនបានឈរលំដាប់ទី ១ សម្រាប់ការវិនិយោគក្នុងប្រទេសកម្ពុជាជាច្រើនឆ្នាំជាប់គ្នា ខណៈប៉ុន្មានឆ្នាំចុងក្រោយទំនាក់ទំនងនៃប្រទេសទាំងពីរបានឈានដល់កម្រិតខ្ពស់បំផុត តាមរយៈការពង្រីកកិច្ចសហប្រតិបត្តិការ ការតភ្ជាប់ទាំងផ្នែកនយោបាយ សេដ្ឋកិច្ច និងសង្គម-វប្បធម៌។

ថ្លែងក្នុងវេទិកាពិសេសស្តីពី «មិត្តភាពដែកថែបកម្ពុជា-ចិន ក្នុងយុគសម័យថ្មី៖ កិច្ចសហប្រតិបត្តិការឈ្នះ-ឈ្នះ និងវិបុលភាពរួម» នៅរាជបណ្ឌិត្យសភាកម្ពុជា លោក ហឿន សំនៀង អគ្គលេខាធិការរងនៃអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជាបានគូសបញ្ជាក់ថា ក្រោមកិច្ចសហការទ្វេភាគីរវាងកម្ពុជា-ចិន បានជំរុញដល់ការរីកចម្រើនយ៉ាងខ្លាំងលើការវិនិយោគឯកជន ដែលនាំមកនូវផ្លែផ្កាជាផលប្រយោជន៍យ៉ាងច្រើនសន្ធឹកសន្ធាប់។ ក្នុងនោះទុនវិនិយោគរបស់ចិននៅកម្ពុជា បើគិតចាប់ពីទសវត្សឆ្នាំ១៩៩០ មកទល់ដើមឆ្នាំ ២០២៥ មានទំហំប្រមាណ ៣៦ ពាន់លានដុល្លារអាម៉េរិក ខណៈក្នុងរយ:ពេល ៥ ឆ្នាំចុងក្រោយ (២០២១-២០២៥) ប្រភពទុនវិនិយោគចិនបានឈរនៅលំដាប់លេខ ១ ឬ ២ សម្រាប់ការវិនិយោគឯកជននៅកម្ពុជា។

ចំពោះកិច្ចសហប្រតិបត្តិការទ្វេភាគីលើកិច្ចការអភិវឌ្ឍ ក៏បានផ្តល់នូវផ្លែផ្កាដ៏មហាសាលដល់កម្ពុជា។ បើយោងតាមប្រព័ន្ធទិន្នន័យ ( ODA Database) របស់គណៈកម្មាធិការសហប្រតិបត្តិការអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជាចាប់ពីទសវត្សរ៍ឆ្នាំ១៩៩០ ដល់ដើមឆ្នាំ២០២៥ រដ្ឋាភិបាលចិនបានផ្តល់ជំនួយអភិវឌ្ឍន៍ផ្លូវការមកកម្ពុជាសរុបប្រមាណជិត ៦ ពាន់លានដុល្លារអាម៉េរិក សម្រាប់ការអភិវឌ្ឍលើវិស័យសំខាន់ៗដូចជា ហេដ្ឋារចនាសម្ព័ន្ធ ថាមពលនិងអគ្គិសនី អប់រំ សុខាភិបាល កសិកម្ម និងប្រព័ន្ធធារាសាស្ត្រជាដើម៕

The post វត្តមានសហគ្រាសចិនបង្កើតការងារជាង ១ លានកន្លែងដល់ពលរដ្ឋកម្ពុជា appeared first on Kampuchea Thmey Daily.

រោងចក្រដំឡើងរថយន្ត BYD នៅខេត្តព្រះសីហនុបញ្ចប់ការសាងសង់ ឈានទៅដំណើរការដំឡើងលក់លើទីផ្សារ

Dy Bunnara — Mon, 22 Dec 2025 02:20:20 +0000

រោងចក្រដំឡើងរថយន្ត BYD នៅខេត្តព្រះសីហនុបានបញ្ចប់ការសាងសង់ ខណៈកាលពីចុងសប្តាហ៍នេះ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានចុះពិនិត្យទីតាំងដំណើរការខ្សែសង្វាក់ផលិតកម្មរោងចក្រដែលមានទីតាំងនៅតំបន់សេដ្ឋកិច្ចពិសេសខេត្តព្រះសីហនុ។

ក្នុងឱកាសចុះពិនិត្យនេះ លោកឧបនាយករដ្ឋមន្ត្រីបានសង្កត់ធ្ងន់ថា វត្តមានរបស់ក្រុមហ៊ុនខ្នាតយក្សដូចជា BYD គឺជាភស្តុតាងមិនអាចប្រកែកបានដែលបង្ហាញថា កម្ពុជាគឺជាគោលដៅវិនិយោគដ៏មានសក្តានុពល សុវត្ថិភាព និងផ្ដល់ផលចំណេញខ្ពស់។

ការចុះពិនិត្យដោយផ្ទាល់នាឱកាសនេះ ក៏ជាការផ្ញើសារយ៉ាងរឹងមាំទៅកាន់វិនិយោគិនអន្តរជាតិថា រាជរដ្ឋាភិបាលកម្ពុជាជានិច្ចកាលតែងតែនៅកៀកកិត និងត្រៀមខ្លួនជួយជ្រោមជ្រែងគ្រប់បែបយ៉ាង ដើម្បីឱ្យការវិនិយោគនៅកម្ពុជាទទួលបានជោគជ័យ និងមាននិរន្តរភាព។ លោក ស៊ុន ចាន់ថុលបន្ថែម។

លោក ស៊ុន ចាន់ថុល បញ្ជាក់ថា តាមរយៈវត្តមានក្រុមហ៊ុន BYD នឹងពាំនាំនូវបទពិសោធន៍វិជ្ជមានក្នុងការវិនិយោគនៅកម្ពុជា ទៅផ្សព្វផ្សាយបន្តនៅក្នុងសហគមន៍ធុរកិច្ច និងបណ្តាញទំនាក់ទំនងវិនិយោគរបស់ខ្លួនបន្ថែមទៀត។

បើតាមលោក ស៊ុន ចាន់ថុល ក្រុមប្រឹក្សាអភិវឌ្ឍន៍កម្ពុជានឹងបន្តតួនាទីជាអ្នកសម្របសម្រួលការងារវិនិយោគដ៏ល្អ សម្រាប់រាល់គ្រប់ការវិនិយោគដោយផ្ទាល់ពីបរទេស (FDI) ក៏ដូចជាសម្រាប់ក្រុមហ៊ុន BYD ផ្ទាល់តាំងពីដើមរៀងមក។ លើសពីនេះ លោកនឹងយកបទពិសោធន៍នៃការសម្របសម្រួលជូនក្រុមហ៊ុន BYD ធ្វើជាគំរូដើម្បីពង្រឹងប្រសិទ្ធភាពសេវាវិនិយោគ សម្រាប់ក្រុមហ៊ុនផ្សេងៗទៀតនាពេលអនាគត។

ក្នុងឱកាសនោះ លោកឧបនាយករដ្ឋមន្ត្រីក៏ផ្តល់អនុសាសន៍មួយចំនួនដល់ក្រុមហ៊ុន ដើម្បីបានជាមូលដ្ឋានពិចារណា ក្នុងការផ្តល់តម្លៃបន្ថែមដល់ខ្សែចង្វាក់ផ្គត់ផ្គង់ក្នុងស្រុក និងការពង្រីកផលិតកម្ម ដោយបានស្នើឱ្យក្រុមហ៊ុនពិនិត្យលទ្ធភាពក្នុងការបញ្ជាទិញវត្ថុធាតុដើម ឬគ្រឿងបន្លាស់មួយចំនួនដែលផលិតរួចជាស្រេចនៅក្នុងស្រុក ដើម្បីគាំទ្រដល់សហគ្រាសក្នុងស្រុក និងកាត់បន្ថយការនាំចូល និងជំរុញឱ្យក្រុមហ៊ុនពិនិត្យលទ្ធភាពក្នុងការបន្ថែមវគ្គផលិតកម្មផ្សេងៗទៀត (Production Process) នៅក្នុងរោងចក្រនៅកម្ពុជាឱ្យកាន់តែសម្បូរបែប ដើម្បីបង្កើតតម្លៃបន្ថែមខ្ពស់, បង្កើនការផ្ទេរចំនេះដឹងបច្ចេកវិទ្យា និងបង្កើតឱកាសការងារបន្ថែមជូនដល់បងប្អូនប្រជាពលរដ្ឋខ្មែរ៕

The post រោងចក្រដំឡើងរថយន្ត BYD នៅខេត្តព្រះសីហនុបញ្ចប់ការសាងសង់ ឈានទៅដំណើរការដំឡើងលក់លើទីផ្សារ appeared first on Kampuchea Thmey Daily.

ក្រុមហ៊ុនចិនធំៗ បោះទុនវិនិយោគខ្ទង់ពាន់លានដុល្លារ កំពុងមានវត្តមាននៅកម្ពុជា

Dy Bunnara — Wed, 17 Dec 2025 03:24:30 +0000

ប្រទេសចិនជាប្រភពវិនិយោគដ៏ធំក្នុងប្រទេសកម្ពុជា ដែលបានបោះទុនវិនិយោគស្ទើរគ្រប់វិស័យ។ ក្រុមហ៊ុនចិនកាន់តែមានទំនុកចិត្តក្នុងការបោះទុនពង្រីកការវិនិយោគនៅក្នុងប្រទេសកម្ពុជា ស្របពេលដែលរដ្ឋាភិបាលកម្ពុជាបានដាក់ចេញគោលការណ៍លើកទឹកចិត្តដល់វិនិយោគិន ដែលនាំឲ្យមានការបង្កើនទំហំទុនវិនិយោគដល់រាប់រយរាប់ពាន់លានដុល្លារ។

ក្រុមហ៊ុនចិនធំៗចំនួន ៦ នេះ កំពុងវិនិយោគលើវិស័យសំខាន់ៗមានដូចជា ឧស្សាហកម្ម អចលទ្រព្យ ហេដ្ឋារចនាសម្ព័ន្ធ និងបដិសណ្ឋារកិច្ចក្រោមទុនវិនិយោគខ្ទង់ពាន់លានដុល្លារ។

ក្រុមហ៊ុន“សាជីវកម្មថ្នល់ និងស្ពានចិន (CRBC)

ក្រុមហ៊ុន “សាជីវកម្មថ្នល់ និងស្ពានចិន (CRBC) ជាក្រុមហ៊ុនបុត្រសម្ព័ន្ធនៃក្រុមហ៊ុន China Communications Construction Company ដែលមានការិយាល័យកណ្ដាលនៅទីក្រុងបេកាំង ប្រទេសចិន។

ប្រតិបត្ដិការអាជីវកម្មចម្បងរបស់ក្រុមហ៊ុន ផ្តោតលើការសាងសង់ផ្នែកហេដ្ឋារចនាសម្ព័ន្ធផ្លូវនិងស្ពាន។ បច្ចុប្បន្នក្រុមហ៊ុនបានអភិវឌ្ឍផ្លូវល្បឿនលឿនចំនួនពីរខ្សែនៅក្នុងប្រទេសកម្ពុជាក្នុងនោះមាន ផ្លូវល្បឿនលឿនភ្នំពេញ-ក្រុងព្រះសីហនុ ក្រោមទុនវិនិយោគប្រមាណ ២ ប៊ីលានដុល្លារ ដែលបានបញ្ចប់ដាក់ឲ្យដំណើរការកាលពីឆ្នាំ២០២២ និងផ្លូវល្បឿនលឿនទីពីរភ្នំពេញ-បាវិត ក្រោមទុនវិនិយោគប្រមាណ ១,៣៥ ប៊ីលានដុល្លារ ដែលកំពុងដំណើរការសាងសង់តាមផែនការគ្រោងបញ្ចប់នៅក្នុងឆ្នាំ ២០២៧។

បន្ថែមពីនេះ ក្រុមហ៊ុនក៏កំពុងសិក្សាគម្រោងសាងសង់ផ្លូវល្បឿនលឿនទី ៣ ភ្នំពេញ-សៀមរាបផងដែរ។

ក្រុមហ៊ុនអភិវឌ្ឍតំបន់សេដ្ឋកិច្ចពិសេសក្រុងព្រះសីហនុ (SSEZ)

តំបន់សេដ្ឋកិច្ចពិសេសក្រុងព្រះសីហនុ ត្រូវបានប្រសិទ្ធិនាមថាជាគំរូនៃកិច្ចសហប្រតិបត្តិការជាក់ស្ដែងរវាងរដ្ឋាភិបាលកម្ពុជា-ចិន។

តំបន់សេដ្ឋកិច្ចពិសេសក្រុងព្រះសីហនុ បានសម្ពោធដាក់ឲ្យដំណើរការនៅឆ្នាំ២០០៨ និងនៅឆ្នាំ២០០៩ បានក្លាយជាតំបន់សហប្រតិបត្តិការសេដ្ឋកិច្ចនិងពាណិជ្ជកម្មក្រៅប្រទេសដំបូងគេ ដែលឆ្លងកាត់ការវាយតម្លៃរបស់ក្រសួងពាណិជ្ជកម្មចិន។

តំបន់សេដ្ឋកិច្ចក្រុងព្រះសីហនុជាសួនឧស្សាហកម្មដែលមានបណ្តុំរោងចក្រឧស្សាហកម្មដ៏ធំនៅខេត្តជាប់មាត់សមុទ្រប៉ែកនិរតីនៃប្រទេសកម្ពុជា ដែលបច្ចុប្បន្នមានរោងចក្រចំនួន ២០២ កំពុងដំណើរការ ដែលបង្កើតឱកាសការងារបានប្រមាណ ៣ ម៉ឺន ២ ពាន់កន្លែង។

នៅក្នុងឆ្នាំ ២០២៤ តំបន់សេដ្ឋកិច្ចពិសេសក្រុងព្រះសីហនុសម្រេចបានការនាំចេញនាំចូល គិតជាទំហំទឹកប្រាក់ប្រមាណ ៤,៧៨ ប៊ីលានដុល្លារកើនឡើង ២១,៣% ធៀបឆ្នាំ ២០២៣។

ក្រុមហ៊ុនអភិវឌ្ឍន៍ Peninsula Bay Investment

ក្រុមហ៊ុន ផឹនីនស៊្យូឡឺ បេ អ៊ិនវេសម៉ិន (Peninsula Bay Investment) កំពុងអភិវឌ្ឍសណ្ឋាគារលំដាប់ផ្កាយប្រាំ និងមជ្ឈមណ្ឌលពាណិជ្ជកម្មនៅលើផ្ទៃដីទំហំ ១៦ ហិកតា នៅជិតទីលានតេជោ ភូមិ៤ សង្កាត់លេខ៤ ក្រុងព្រះសីហនុ ដែលចាយទុនប្រមាណ ១ ប៊ីលានដុល្លារ។

Peninsula Bay Investment ជាគម្រោងអភិវឌ្ឍដ៏សំខាន់មួយនៅខេត្តព្រះសីហនុ ដែលជាខេត្តតំបន់ឆ្នេររបស់ប្រទេសកម្ពុជា។ ការអភិវឌ្ឍន៍របស់ក្រុមហ៊ុនបែងចែកជា ២ តំបន់៖

-តំបន់ A: មានសណ្ឋាគារលំដាប់ផ្កាយ ៥ (កម្ពស់ ៣៧ ជាន់), ផ្សារទំនើប និងសួនកម្សាន្តផ្សេងៗដែលគ្រោងបញ្ចប់នៅឆ្នាំ២០២៨
-តំបន់ B: អគារខុនដូរ និងអគារពាណិជ្ជកម្ម ដែលគ្រោងបញ្ចប់នៅដើមឆ្នាំ២០២៦

ចាយទុនជាង ១ ប៊ីលានដុល្លារ គម្រោងអភិវឌ្ឍន៍របស់ក្រុមហ៊ុន Peninsula Bay Investment នឹងចូលរួមចំណែកយ៉ាងសកម្មក្នុងការប្រែក្លាយខេត្តព្រះសីហនុឱ្យទៅជាតំបន់ពាណិជ្ជកម្ម និងទេសចរណ៍លំដាប់អន្តរជាតិ។

ក្រុមហ៊ុនផលិតសំបកកង់ Sailun

ក្រុមហ៊ុន Sailun បានបោះទុនវិនិយោគប្រមាណ ១ ប៊ីលានដុល្លារ ដើម្បីដំណើរការរោងចក្រផលិតសំបកកង់យានយន្តក្នុងប្រទេសកម្ពុជា ដែលមានទីតាំងនៅខេត្ដស្វាយរៀង។

ដំណើរការខ្សែសង្វាក់ផលិតកម្មរបស់ក្រុមហ៊ុន ក្នុងមួយថ្ងៃប្រើប្រាស់ជ័រកៅស៊ូអស់ជាង ៥០០ តោន ជាមួយសមត្ថភាពផលិតបានប្រមាណ ៣០ លានគ្រាប់ក្នុងមួយឆ្នាំ។

ក្នុងឱកាសជំនួបពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាឱកាសចូលរួមកិច្ចប្រជុំកំពូលមហាអនុតំបន់មេគង្គ (GMS) លើកទី ៨ នាថ្ងៃទី៦ ខែវិច្ឆិកា ឆ្នាំ២០២៤ នៅទីក្រុងគុនមិញ ខេត្តយូណាន ប្រទេសចិន លោក Yuan Zhongxue ប្រធានកិត្តិយសក្រុមហ៊ុន Sailun Group បានលើកអំពីគោលបំណងរបស់ក្រុមហ៊ុនក្នុងការពង្រីកការវិនិយោគរបស់ខ្លួននៅកម្ពុជា ដោយផ្ដោតលើការកែច្នៃផលិតផលកៅស៊ូ ដើម្បីផលិតចេញជាផលិតផលផ្សេងៗ រួមទាំងការបង្កើតសួនឧស្សាហកម្មសម្រាប់ខ្សែច្រវាក់ផលិតកម្មនៃឧស្សាហកម្មកែច្នៃកៅស៊ូ ក៏ដូចជាសមត្ថភាពផលិតរបស់ក្រុមហ៊ុននៅក្នុងតំបន់។

ក្រុមហ៊ុនអភិវឌ្ឍន៍តំបន់វិស្សមកាលឆ្នេរមាស ឆ្នេរប្រាក់

លោក ហ្វូ ហាង អគ្គនាយកក្រុមហ៊ុន យិះ ចៀ ដែលវិនិយោគនៅតំបន់ឆ្នេរមាសឆ្នេរប្រាក់ក្នុងខេត្តព្រះសីហនុបានឲ្យដឹងថា ក្នុងរយៈពេលជិត ១០ ឆ្នាំ ក្រុមហ៊ុនបានចាយទុនវិនិយោគអស់ប្រមាណ ៦០០ លានដុល្លារ ក្នុងទុនបម្រុងគ្រោងចំណាយសរុបប្រមាណ ៥ ០០០ លានដុល្លារ ខណៈការវិនិយោគទាំងមូលខ្ទង់ប្រើប្រាស់ពេលប្រហែល ២០ ឆ្នាំ។

លោកថា គម្រោងអភិវឌ្ឍន៍ឆ្នេរមាស ឆ្នេរប្រាក់ជាគម្រោងខ្នាតយក្សនៅខេត្តព្រះសីហនុ ដែលត្រូវបានអភិវឌ្ឍតាមដំណាក់កាលផ្ដោតលើវិស័យទេសចរណ៍។

នៅតំបន់វិស្សមកាលឆ្នេរមាសឆ្នេរប្រាក់ ក្រុមហ៊ុនកំពុងអភិវឌ្ឍនៅលើផ្ទៃដីទំហំជាង ៣ ០០០ ហិកតា។ ក្រៅពីការសាងសង់ហេដ្ឋារចនាសម្ពន្ធនានាដែលមានខ្សែផ្លូវប្រវែងជាង ១០០ គីឡូម៉ែត្រ ប្រព័ន្ធភ្លើងអគ្គិសនី ទឹកស្អាត ក្រុមហ៊ុនបានសាងសង់សណ្ឋាគារជាច្រើនកន្លែង រៀបចំតំបន់ទេសចរនៅកោះសំពោច (កោះរាជបុត្រ) បង្កើតសួនផ្កា បូករួមទីលានបាញ់ព្រួយ ហើយទៅថ្ងៃមុខនឹងរៀបចំឲ្យមានតំបន់ទេសចរណ៍ជាច្រើនថែមទៀត។

គម្រោង Bay Of Light

Bay of Lights ជាគម្រោងអភិវឌ្ឍទីក្រុងជាមួយទំហំទឹកប្រាក់វិនិយោគប្រមាណ ១៦ ពាន់លានដុល្លាអាមេរិក ដើម្បីកែប្រែមុខមាត់ឆ្នេរសមុទ្រកម្ពុជា តាមរយៈការបង្កើតទីក្រុងអនាគតមួយដែលលាតសន្ធឹងលើផ្ទៃដី ៩៣៤ ហិកតាតាមបណ្តោយឆ្នេរសមុទ្ររាម។

ចក្ខុវិស័យរបស់គម្រោង Bay of Lights គឺប្រែក្លាយខេត្តព្រះសីហនុក្លាយទៅជាមជ្ឈមណ្ឌលពាណិជ្ជកម្ម វប្បធម៌ និងកិច្ចសហប្រតិបត្តិការអន្តរជាតិ ដោយទីក្រុងនេះនឹងមិនត្រឹមតែជាកន្លែងរស់នៅ និងធ្វើការ ប៉ុន្តែនឹងក្លាយទៅជាចំណុចចាប់ផ្ដើមថ្មីមួយ ដែលបង្ហាញពីអនាគត ការច្នៃប្រឌិត និងសក្តានុពលរបស់តំបន់ឆ្នេរសមុទ្រកម្ពុជា៕

The post ក្រុមហ៊ុនចិនធំៗ បោះទុនវិនិយោគខ្ទង់ពាន់លានដុល្លារ កំពុងមានវត្តមាននៅកម្ពុជា appeared first on Kampuchea Thmey Daily.

សហគ្រាសចិន Archives - Kampuchea Thmey Daily

​រោងចក្រ​កែច្នៃ​ជ័រកៅស៊ូ​តម្លៃ ​៣០ ​លានដុល្លារ ​បើក​ដំណើរការ​នៅ​ខេត្តត្បូងឃ្មុំ​

ក្រុមហ៊ុន​​ចិន ចាប់អារម្មណ៍​​វិនិយោគ​រោងចក្រ​​ចម្រាញ់​ប្រេងនៅកម្ពុជា

មកស្គាល់​រោងចក្រ​ធំៗកំពុង​កែច្នៃ​ដំឡូងមី​ស្រស់​នាំ​ចេញទៅក្រៅប្រទេស​

រដ្ឋមន្ត្រីឧស្សាហកម្ម លើកទឹកចិត្តរោងចក្រស៊ីម៉ងត៍ចក្រីទីង ពង្រីការវិនិយោគ និងនាំចេញ

​​ខេត្ត​ក្រចេះ​ចម្រាញ់​រ៉ែមាសសុទ្ធ​បាន​ប្រមាណ ៤៧៧ គីឡូក្រាម ដោយ​ក្រុមហ៊ុន​វិនិយោគ​ពី​ក្រៅ​ប្រទេស

វត្តមាន​សហគ្រាស​ចិនបង្កើតការងារជាង ១ លានកន្លែងដល់​ពលរដ្ឋកម្ពុជា

រោងចក្រដំឡើងរថយន្ត BYD នៅ​ខេត្ត​ព្រះសីហនុ​បញ្ចប់​ការ​សាង​សង់​ ឈាន​ទៅ​ដំណើរការ​ដំឡើង​លក់​លើទីផ្សារ