សុខភាពបេះដូង Archives - Kampuchea Thmey Daily

ប្រទេសម៉ាឡេស៊ីមានអ្នកស្លាប់ដោយសារជំងឺបេះដូងច្រើនជាងគេ

Minea Neu — Mon, 22 Dec 2025 06:55:48 +0000

ជម្ងឺបេះដូងឬហៅម្យ៉ាងទៀតថាជំងឺសរសៃឈាមបេះដូង គឺជាជំងឺមួយដែលកើតឡើងច្រើនជាងគេក្នុងប្រទេសម៉ាឡេស៊ី ។ នេះបើយោងតាមរបាយការណ៍មួយដែលចេញផ្សាយដោយនាយកដ្ឋានស្ថិតិម៉ាឡេស៊ី (DOSM) ។

Heart Disease. pdincontrol

ស្ថិតិពីវិទ្យាស្ថានជាតិសុខភាពបេះដូង បានបង្ហាញថា ជំងឺនេះកំពុងជះឥទ្ធិពលកាន់តែខ្លាំងឡើងចំពោះប្រជាជនម៉ាឡេស៊ី ជាពិសេសក្មេងៗដោយសារការកើនឡើងនៃអត្រាផ្ទុកជាតិខ្លាញ់ក្នុងសារពាង្គកាយ ការចំណាយពេលអង្គុយច្រើនម៉ោងជាប់ៗគ្នា។

ជំងឺបេះដូង គឺជាពាក្យដ៏ទូលំទូលាយមួយដែលរួមបញ្ចូលកត្តាជាច្រើន ដូចជាទម្លាប់នៃការញ៉ាំអាហារដែលមិនល្អ អង្គុយច្រើនម៉ោងនៅក្នុងបន្ទប់បិទជិត និងចរិតលក្ខណៈដែលឆ្លងពីឪពុកម្តាយទៅកូន [ហ្សែន]។

ការសិក្សាដោយវិទ្យាស្ថានជាតិសុខភាពបេះដូង បានឱ្យដឹងថា ជម្ងឺបេះដូងពាក់ព័ន្ធនឹងការខូចខាតបេះដូងដែលបណ្តាលមកពីសរសៃឈាមបេះដូងរួមតូចផងដែរ។ នៅពេលដែលសរសៃឈាមរួមតូចដោយសារតែការប្រមូលផ្តុំបន្តិចម្តងៗ នៃជាតិខ្លាញ់ក្នុងសារពាង្គកាយ ឈាម និងអុកស៊ីសែនក៏តិចទៅៗទម្រាំដល់សាច់ដុំនៃបេះដូង។

កត្តាដែលបង្កឱ្យមានជម្ងឺនេះ រួមមាន ការជក់បារី ការកើនឡើងនៃសម្ពាធឈាម កូលេស្តេរ៉ុលខ្ពស់ ជំងឺទឹកនោមផ្អែម រាងកាយមិនសូវបញ្ចេញសកម្មភាព និងលើសទម្ងន់ ឬធាត់ ជាដើម។

លើសពីនេះទៅទៀត គ្រួសារដែលធ្លាប់កើតជំងឺនេះក៏រួមចំណែក ដែលអាចមានលទ្ធភាពខ្ពស់ក្នុងការចម្លងទៅកូនៗរបស់ពួកគេផងដែរ។

ស្ថិតិបង្ហាញថា មនុស្សប្រុសងាយកើតជំងឹនេះជាងស្រ្តី។

ដើម្បីបង្កាកុំឱ្យកើតជំងឺនេះ គេគប្បីទៅពិនិត្យសុខភាពទៀតទាត់ កាត់បន្ថយការប្រើប្រាស់អំបិល ស្ករ និងពពួកខ្លាញ់ឆ្អែត ជៀសវាងអាហារកែច្នៃ ហាត់ប្រាណទៀងទាត់ ជាពិសេសការឈប់ជក់បារីអាចកាត់បន្ថយហានិភ័យនៃជំងឺបេះដូងបានយ៉ាងមានប្រសិទ្ធភាព៕

អត្ថបទ៖ ណឺ មិនា

The post ប្រទេសម៉ាឡេស៊ីមានអ្នកស្លាប់ដោយសារជំងឺបេះដូងច្រើនជាងគេ appeared first on Kampuchea Thmey Daily.

ទម្លាប់៥យ៉ាងដែលអាចបំផ្លាញសុខភាពបេះដូង

Ken Malis — Wed, 12 Jul 2023 02:24:53 +0000

ដើម្បីជួយឲ្យបេះដូងមានសុខភាពល្អ មនុស្សមួយចំនួនមានទម្លាប់ហាត់ប្រាណ ញ៉ាំបន្លែ និងផ្លែឈើជាដើម។ ទន្ទឹមនឹងនេះ ក៏មានទម្លាប់មួយចំនួនបែរជាធ្វើឲ្យសុខភាពបេះដូងរបស់អ្នកកាន់តែយ៉ាប់យ៉ឺនទៅវិញ។ ខាងក្រោមនេះជា ទម្លាប់៥ យ៉ាងដែលអាចបំផ្លាញសុខភាពបេះដូងរបស់អ្នកដោយមិនដឹងខ្លួន៖

រូបភាព៖ Google

១. ការហាត់ប្រាណច្រើនជ្រុល

បើទោះបីជាលំហាត់ប្រាណ មានសារៈសំខាន់ចំពោះសុខភាពបេះដូងក៏ពិតមែន ប៉ុន្លែ ការហាត់ប្រាណច្រើនពេកអាចបណ្តាលឲ្យប៉ះពាល់ដល់សុខភាពបេះដូងបានផងដែរ។ ការហាត់ប្រាណហួសកម្រិត អាចបណ្ដាលឲ្យមានអតុល្យភាពអ័រម៉ូន ភាពស៊ាំ និងការធ្វើមេតាប៉ូលីសចុះខ្សោយ ព្រមទាំង បង្កើនស្រ្តេសប្រព័ន្ធសរសៃឈាមបេះដូង។

រូបភាព៖ Google

២. ការគេងច្រើនជ្រុល

នៅពេលដែលអ្នកគេងច្រើនជ្រុល អ្នកនឹងមានពេលវេលាកាន់តែតិចនៅក្នុងការធ្វើសកម្មភាពប្រចាំថ្ងៃ ដែលកត្តានេះអាចរួមចំណែកដល់ការធាត់ជ្រុល សម្ពាធឈាមខ្ពស់ កូលេស្តេរ៉ូលខ្ពស់ និងជំងឺទឹកនោមផ្អែមប្រភេទ២ ហើយវាសុទ្ធតែជាប់ពាក់ព័ន្ធនឹងការវិវត្តនៃជំងឺបេះដូង។ ជាការពិត ការគេងមានមានសារៈសំខាន់ណាស់ចំពោះសុខភាពទាំងមូល ប៉ុន្តែ ការគេងច្រើនជ្រុល អាចបណ្តាលឲ្យប៉ះពាល់ទៅដល់សុខភាពដូង។

រូបភាព៖ Google

៣.ខឹងច្រើន

ការខឹងធ្វើឲ្យប្រព័ន្ធសរសៃប្រសាទមានសកម្មភាពជ្រុល ហើយរាងកាយ នឹងបញ្ចេញអរម៉ូនដែលឲ្យសម្ពាធឈាម និងចង្វាក់បេះដូងកើនឡើង ព្រមទាំងបន្ថែមអរម៉ូនស្ត្រេសនៅលើប្រព័ន្ធសរសៃឈាមបេះដូង។ លើសពីនេះ អ័រម៉ូនស្រ្តេសដូចជាCortisol អាចបណ្ដាលឲ្យមានការចាល់ទឹក (ដោយបង្កឲ្យមានសម្ពាធឈាមខ្ពស់ និងបង្កើនជាហានិភ័យនៃជំងឺគ្រោះថ្នាក់សរសៃជាតិខួរក្បាល) ដែលប៉ះពាល់ដល់កម្រិតជាតិស្ករក្នុងឈាម និងគុណភាពដំណេក ដែលកត្តាទាំងនេះសុទ្ធតែជះឥទ្ធិពលអវិជ្ជមានដល់សុខភាពបេះដូង។ ការខឹងច្រើន ក៏អាចធ្វើឲ្យប្រព័ន្ធភាពស៊ាំចុះខ្សោយ និងអាចបណ្ដាលឲ្យមានការឆ្លងមេរោគកាន់តែច្រើន ការថប់បារម្ភ និងជំងឺបាក់ទឹកចិត្តថែមទៀតផង។

រូបភាព៖ Google

៤. មិនប្រើប្រាស់អំបោះទាក់ធ្មេញ

ការមិនប្រើប្រាស់អំបោះទាក់ធ្មេញជាប្រចាំ អាចបណ្ដាលឲ្យរលាក និងឆ្លងមេរោគអញ្ចាញធ្មេញ។ ជាពិសេស អ្នកដែលមានជំងឺអញ្ចាញធ្មេញធ្ងន់ធ្ងរមានឱកាសខ្ពស់ក្នុងការវិវត្តន៍ទៅជាសម្ពាធឈាមខ្ពស់ និងបង្កើនហានិភ័យនៃបញ្ហាសរសៃឈាមបេះដូង។

៥. មិនចូលរួមក្នុងសង្គម

មនុស្សដែលមិនមានទំនាក់ទំនងក្នុងសង្គម មានហានិភ័យខ្ពស់នៃការកើតមានអាការៈថប់បារម្ភ និងជំងឺបាក់ទឹកចិត្ត ដែលបណ្ដាលឲ្យកើតមានទម្លាប់មិនល្អផ្សេងៗ ដូចជា គេងច្រើនជ្រុល ជក់បារី របបអាហារមិនល្អ និងកង្វះលំហាត់ប្រាណជាដើម ដែលទម្លាប់ទាំងនេះ អាចបង្កជាផលប៉ះពាល់ដល់សុខភាពបេះដូងយ៉ាងធ្ងន់ធ្ងរ៕

ប្រភព៖ Hello Krupet

The post ទម្លាប់៥យ៉ាងដែលអាចបំផ្លាញសុខភាពបេះដូង appeared first on Kampuchea Thmey Daily.

តើអាហារខ្លាញ់ប៉ះពាល់សុខភាពបេះដូងបែបណាខ្លះ?

សាង ស្រីល័ក្ខ — Tue, 21 Mar 2023 01:53:05 +0000

មុខម្ហូបភាគច្រើនដែលចម្អិនដោយខ្លាញ់ តែងមានរសជាតិឆ្ងាញ់ មិនតែប៉ុណ្ណោះក៏ងាយស្រួលចម្អិន និងឆាប់បានញ៉ាំទៀតផង។ ប៉ុន្ដែដឹងទេថា ម្ហូបទាំងនោះក៏អាចប៉ះពាល់ដល់សុខភាពបេះដូងរបស់យើងនៅថ្ងៃអនាគតផងដែរ។

ហេតុអ្វីបានជាអាហារខ្លាញ់ប៉ះពាល់ដល់សុខភាពបេះដូង?

ប្រភេទអាហារដែលបានចម្អិនដោយខ្លាញ់ ហើយជាប្រភេទខ្លាញ់ចម្រាញ់ពីខ្លាញ់សត្វ មិនថា ឆា ចៀន បំពងនោះទេ នឹងបង្កឲ្យអ្នកញ៉ាំប្រឈមកើនឡើងកូលេស្ដេរ៉ូលក្នុងសរសៃឈាម និងបណ្ដាលឲ្យប៉ះពាល់សរសៃឈាមផងដែរ។ មូលហេតុដែលបណ្ដាលឲ្យប៉ះពាល់ដល់សរសៃឈាមនោះព្រោះតែ កូលេស្ដេរ៉ុលដែលមានក្នុងសរសៃឈាមទាំងប៉ុន្មាននឹងប្រមូលផ្ដុំបន្ដិចម្ដងៗ រហូតវិវត្ដទៅជាកំណកខ្លាញ់ធ្វើឲ្យសរសៃឈាមប្រឈមរួមតួចប៉ះពាល់ដល់ចរន្ដឈាម។ ការណ៍នេះ សរសៃឈាមអាចវវិត្ដទៅជាជំងឺក្រិនសរសៃឈាម ដែលមូលហេតុចម្បងបំផុត ប៉ះពាល់ដល់សុខភាពបេះដូង។

តាមការសិក្សាបានបង្ហាញថា ការញ៉ាំអាហារដែលចម្អិនដោយខ្លាញ់ជាប្រចាំ មានហានិភ័យខ្ពស់កើត ជំងឺខ្លាញ់ក្នុងសរសៃឈាមបេះដូង ជំងឺគាំងបេះដូង បេះដូងខ្សោយ និងគ្រោះថ្នាក់សរសៃឈាមខួរក្បាល។

មូលហេតុសំខាន់អាហារខ្លាញ់ប្រឈមកើតជំងឺគាំងបេះដូង

ជំងឺគាំងបេះដូងកើតឡើងនៅពេលដែលសរសៃឈាមមិនអាចបញ្ជូនឈាមទៅកាន់សាច់ដុំបេះដូងបានគ្រប់គ្រាន់។ មូលហេតុនោះគឺដោយសារតែក្នុងសរសៃឈាមមានកំណកខ្លាញ់ច្រើន ធ្វើឲ្យស្ទះសរសៃឈាមមិនអាចដំណើការបានល្អ។ ហើយការកើតមានកំណកខ្លាញ់ក្នុងសរសៃឈាមច្រើន គឺបណ្ដាលមកពីការញ៉ាំអាហារចម្អិនដោយខ្លាញ់សត្វនេះឯង។

ដូចគ្នាផងដែរ ស្របពេលដែលអត្រានៃការកើតមានជំងឺគាំងបេះដូងដោយសារកម្រិតកូលេស្ដេរ៉ូលក្នុងឈាមច្រើន នោះជំងឺគ្រោះថ្នាក់សរសៃឈាមខួរក្បាលក៏ប្រឈមកើតដូចគ្នា ពិសេសនៅពេលដែលសរសៃឈាមមិនអាចបញ្ជូនឈាម ផ្ដល់អុកស៊ីសែន និង សារធាតុចិញ្ចឹមដល់ខួរក្បាលគ្រប់គ្រាន់៕

អត្ថបទផ្ដល់ដោយ៖Hello Krupet

ចុចអាន៖ទោះរវល់ធ្វើការច្រើនមិនសូវចម្អិនម្ហូប តែអាហារប្រភេទនេះគួរកាត់បន្ថយខ្លះ

ចុចអាន៖អាហារ ៥ ប្រភេទ អ្នកដុះសាច់បំពង់កមិនគួរបរិភោគ

The post តើអាហារខ្លាញ់ប៉ះពាល់សុខភាពបេះដូងបែបណាខ្លះ? appeared first on Kampuchea Thmey Daily.

ការសិក្សារកឃើញថា ជាតិផ្អែមសិប្បនិម្មិតអាចបង្កបញ្ហាដល់សុខភាពឈាមនិងបេះដូង

Boa Sokunveary — Tue, 28 Feb 2023 09:22:25 +0000

ការសិក្សាថ្មីរកឃើញថា អេរីទ្រីថុល (erythritol) ដែលជាសារធាតុជំនួសជាតិស្ករត្រូវបានផ្សារភ្ជាប់ទៅនឹងការកកឈាម ជំងឺដាច់សរសៃឈាមខួរក្បាល ជំងឺគាំងបេះដូង និងបង្កើនហានិភ័យនៃការស្លាប់ចំពោះអ្នកមានជំងឺបេះដូង ។

អ្នកស្រាវជ្រាវរកឃើញថាបុគ្គលណាដែលមានហានិភ័យជំងឺបេះដូងស្រាប់ បូកផ្សំជាមួយកម្រិតអេរីទ្រីថុលខ្ពស់ក្នុងឈាមនឹងកើតជំងឺបេះដូងលឿនជាងធម្មតាពីរដង ។

យោងតាមវេជ្ជបណ្ឌិត Stanley Hazen នៅវិទ្យាស្ថានស្រាវជ្រាវ Cleveland ClinicLerner មានប្រសាសន៍ថា “ប្រសិនបើកម្រិតនៃ “អេរីទ្រីថុល” ក្នុងឈាមរបស់អ្នកស្ថិតនៅ ២៥ ភាគរយខ្ពស់បំផុតធៀបនឹង ២៥ ភាគរយទាបបំផុតនោះអ្នកនឹងមានហានិភ័យខ្ពស់ប្រហែល ២ ដងសម្រាប់ការគាំងបេះដូង និងដាច់សរសៃឈាមខួរក្បាល ឬស្មើនឹងកត្តាហានិភ័យបេះដូងខ្ពស់បំផុតដូចជាជំងឺទឹកនោមផ្អែមដែរ” ។

លោក Robert Rankin នាយកប្រតិបត្តិនៃក្រុមប្រឹក្សាត្រួតពិនិត្យកាឡូរីបាននិយាយថា “លទ្ធផលនៃការសិក្សាលើកនេះគឺផ្ទុយស្រឡះពីការស្រាវជ្រាវបែបវិទ្យាសាស្ត្ររាល់ដងដែលតែងបង្ហាញថាអេរីទ្រីថុលមានសុវត្ថិភាពហើយដាក់ឲ្យប្រើប្រាស់ក្នុងអាហារនិងភេសជ្ជៈទៀតផង” ៕

ប្រែសម្រួល ៖ វារី

ប្រភព ៖ People

ចុចអាន ៖ ចូលចិត្តញ៉ាំប្រៃ អាចធ្វើឲ្យប៉ះពាល់ដល់សុខភាពបេះដូង

The post ការសិក្សារកឃើញថា ជាតិផ្អែមសិប្បនិម្មិតអាចបង្កបញ្ហាដល់សុខភាពឈាមនិងបេះដូង appeared first on Kampuchea Thmey Daily.

ចូលចិត្តញ៉ាំប្រៃ អាចធ្វើឲ្យប៉ះពាល់ដល់សុខភាពបេះដូង

សាង ស្រីល័ក្ខ — Thu, 02 Feb 2023 01:53:30 +0000

អំបិលជាជាតិរ៉ែមួយប្រភេទដែលរាងកាយយើងត្រូវការជាប្រចាំផងដែរ ព្រោះវាមានតួនាទី ជួយរក្សាតុល្យភាពជាតិទឹកក្នុងរាងកាយ ជួយបំពេញមុខងារប្រព័ន្ធប្រសាទ និង ជំនួយសាច់ដុំ។ ក៏ប៉ុន្ដែប្រសិនបើយើងញ៉ាំអំបិលច្រើន នោះវានឹងបណ្ដាលឲ្យប៉ះពាល់ដល់បេះដូងវិញដែរ។

លោកវេជ្ជបណ្ឌិត Dr. Laffin នៃមន្ទីពេទ្យ Cleveland បានលើកឡើងថា ការញ៉ាំអំបិលច្រើន ឬអាហារដែលមានជាតិប្រៃខ្លាំង អាចប្រឈមឲ្យកើតមានបញ្ហាចាល់ជាតិទឹកក្នុងរាងកាយ ក៏ជាផ្នែកមួយវិវត្ដទៅរកការលើសសម្ពាធឈាម។ ការលើសសម្ពាធឈាម អាចជាហានិភ័យខ្ពស់កើតជំងឺគាំងបេះដូង ខ្សោយបេះដូង និង គ្រោះថ្នាក់សរសៃឈាមខួរក្បាល។ ដូច្នេះគួរតែកាត់បន្ថយទម្លាប់ការញ៉ាំប្រៃ ញ៉ាំកាន់តែតិច កាន់តែល្អ។

វេជ្ជបណ្ឌិតបានណែរនាំទៀតថា សម្រាប់អ្នកដែលមានសុខភាពធម្មតា ការញ៉ាំអំបិលអាចកំណត់នៅក្រោម ២ ៣០០ មិល្លីក្រាមក្នុងមួយថ្ងៃ។ ចំណែកអ្នកមានសុខភាពប្រឈមកើតជំងឺលើសឈាម ឬអ្នកមានជំងឺបេះដូងស្រាប់ អាចកាត់បន្ថយនៅក្រោម ១ ៥០០ មិល្លីក្រាម ក្នុងមួយថ្ងៃ។

អ្នកជំងឺលើសសម្ពាធឈាម ជំងឺបេះដូង ប្រឈមគ្រោះថ្នាក់ប្រសិនបើមិនអាចកាត់បន្ថយការញ៉ាំប្រៃ ឲ្យនៅកម្រិតទាបបំផុតទៅតាមការណែនាំរបស់គ្រូពេទ្យ។

តើការញ៉ាំប្រៃអាចប៉ះពាល់ដល់សុខភាពមនុស្សចាស់ដែរទេ?

ការញ៉ាំប្រៃក៏ជះឥទ្ធិពលអាក្រក់ដល់សុខភាពមនុស្សចាស់ផងដែរ ពិសេសចាប់ពីវ័យ៦០ឆ្នាំ ឡើងទៅ។ ឈានដល់វ័យកាន់តែចាស់ ការញ៉ាំប្រៃអាចប៉ះពាល់សុខភាព ដូចជាប្រឈមជំងឺលើសសម្ពាធឈាម ជំងឹបេះដូង ប៉ះពាល់ដល់សរសៃឈាមខួរក្បាល ប៉ះពាល់ដល់ប្រព័ន្ធរំលាយអាហារ និងងាយប្រឈមកើតជំងឺមហារីក៕

អត្ថបទផ្ដល់ដោយ៖Hello Krupet

ចុចអាន៖ហេតុផល ១២ យ៉ាង គួរតែប្ដូរទៅទទួលទានអង្ករសម្រូប

ចុចអាន៖ចៀសវាងញ៉ាំអាហារ ៧ ប្រភេទនេះ បើមិនចង់កើតមហារីក

The post ចូលចិត្តញ៉ាំប្រៃ អាចធ្វើឲ្យប៉ះពាល់ដល់សុខភាពបេះដូង appeared first on Kampuchea Thmey Daily.

ជំងឺខ្សោយបេះដូង បង្កឲ្យអ្នកជំងឺប្រឈមបាត់បង់ចំណង់អាហារ

សាង ស្រីល័ក្ខ — Mon, 02 Jan 2023 01:48:03 +0000

មិនថាក្មេង ឬចាស់នោះទេ តែមានជំងឺខ្សោយបេះដូងហើយគឺភាគច្រើនប្រឈមបាត់បង់ចំណង់អាហារ លែងសូវស្រេកឃ្លាន ហើយក៏ជាមូលហេតុចម្បងធ្វើឲ្យសុខភាពអ្នកជំងឺឆាប់ទ្រុឌទ្រោម បណ្ដាលឲ្យជំងឺកាន់តែវិវត្ដទៅរកស្ថានភាពធ្ងន់ធ្ងរ។

ជាក់ស្ដែងណាស់ ជំងឺខ្សោយបេះដូងគឺជាស្ថានភាពមួយដែលបេះដូងចុះខ្សោយដោយសារតែសាច់ដុំបេះដូងមិនអាចប្របាច់ឈាម និង បញ្ជូនអុកស៊ីសែនទៅសរីរាង្គដទៃទៀតបានគ្រប់គ្រាន់ ដែលបណ្ដាលឲ្យអ្នកជំងឺមានអាការៈខ្សោយ អស់កម្លាំង ថប់ៗដង្ហើម និង បាត់បង់ចំណង់អាហារជាដើម។

រោគសញ្ញាសំខាន់ៗនៃជំងឺខ្សោយបេះដូង

ចង្អោរ
ហត់ ថប់ដង្ហើម
ឈឺទ្រូង
អស់កម្លាំង
ឡើងទម្ងន់គ្មានមូលហេតុ
បេះដូងលោតមិនប្រក្រតី
ចេះតែចង់ជុះនោមនៅពេលយប់
ក្អកមានឈាម និងកណ្តាសញឹកញាប់
ហើមពោះ ហើមជើង កជើង និងបាតជើង

មូលហេតុជំងឺខ្សោយបេះដូងបង្កឲ្យអ្នកជំងឺបាត់បង់ចំណង់អាហារ

បាត់បង់ចំណង់អាហារគឺជាផលវិបាកមួយនៃជំងឺខ្សោយបេះដូង ព្រោះថានៅពេលបេះដូងចុះខ្សោយមុខងារនោះមិនអាចបញ្ជូនឈាម និង អុកស៊ីសែនទៅកាន់សរីរាង្គបានគ្រប់គ្រាន់ទេ ពេលនោះសារធាតុរាវក្នុងរាងកាយ នឹងចាប់ផ្ដើមកើនឡើងក្នុងសរសៃឈាម ពិសេសនៅពេលដែលជំងឺនេះបានវិវត្ដប៉ះពាល់ទៅដល់មុខងារតម្រងនោម និង សួត។

តម្រងនោមមានមុខងារច្រោះឈាម បញ្ចេញកាកសំណល់ សារធាតុរាវក្នុងទម្រង់ជាទឹកនោម ចំណែកសួតមានមុខងារប្លាស់ប្តូរឧស្មន័ដែលបានស្រូបចូល ដើម្បីផលិតអុកស៊ីសែនបញ្ជូនក្នុងឈាមទៅចិញ្ចឹមសរីរាង្គ ។ ពេលសរីរាង្គទាំងពីររងផលប៉ះពាល់ពីជំងឺខ្សោយបេះដូង គឺមិនអាចទទួលឈាមបានគ្រប់គ្រាន់ ក៏មិនអាចបំពេញមុខងារ ផលិតអុកស៊ីសែន និង ច្រោះកាកសំណល់បានល្អនោះដែរ។ ហេតុនេះក៏ធ្វើឲ្យចាល់ជាតិទឹកកើនឡើង ប៉ះពាល់ទៅដល់ផ្នែកផ្សេងៗ ដូចជា ហើមជើង ប្រអប់ជើង ក្នុងនោះក៏ប៉ះពាល់ប្រព័ន្ធរំលាយអាហារ ដែលធ្វើឲ្យអ្នកជំងឺបាត់បង់ចំណង់អាហារ លែងឃ្លាន ញ៉ាំឆាប់ឆ្អែត និង ចង្អោរម្ដងៗ ប៉ុន្ដែងាយឡើងគីឡូ។

មូលហេតុសំខាន់ៗដែលបណ្ដាលឲ្យកើតជំងឺខ្សោយបេះដូង

កត្ដាលើសសម្ពាធឈាម
ជំងឺស្ទះសរសៃឈាមបេះដូង
ជំងឺខូចប្រឺសបេះដូង
ជំងឺបេះដូងពីកំណើត
ជំងឺសាច់ដុំបេះដូង
ជំងឺវិបត្តិចង្វាក់បេះដូង
មានជំងឺទឹកនោមផ្អែម

ការពារ និង ព្យាបាលជំងឺខ្សោយបេះដូង

មន្ទីរពេទ្យកាល់ម៉ែត្របានណែនាំអំពីចំណុចសំខាន់ៗក្នុងការការពារ និងព្យាបាលជំងឺខ្សោយបេះដូងដូចជា៖

កុំបរិភោគអាហារសម្បូរជាតិប្រៃ
ឈប់ជក់បារី
រក្សាទំងន់ឲ្យសមស្រប
កាត់បន្ថយ ឬបញ្ឈប់ការញ៉ាំគ្រឿងស្រវឹង
កាត់បន្ថយការបរិភោគអាហារសម្បូរខ្លាញ់
ញ៉ាំបន្លែ ផ្លែឈើ ឲ្យបានច្រើន
ហាត់ប្រាណឲ្យបានទៀងទាត់
កាត់បន្ថយភាពតានតឹង
គ្រប់គ្រងសម្ពាធឈាមឲ្យបានត្រឹមត្រូវ ប្រសិនបើមានជំងឺលើសឈាម
ត្រូវញ៉ាំថ្នាំឲ្យបានទៀងទាត់ និងតាមដានឲ្យបានត្រឹមត្រូវ ជាមួយគ្រូពេទ្យឯកទេស។

អត្ថបទផ្ដល់ដោយ៖ Hello Krupet

ចុចអាន៖ពពួកផ្លែឈើទាំងនេះមានប្រយោជន៍ដល់សុខភាពបេះដូង

The post ជំងឺខ្សោយបេះដូង បង្កឲ្យអ្នកជំងឺប្រឈមបាត់បង់ចំណង់អាហារ appeared first on Kampuchea Thmey Daily.

ពពួកផ្លែឈើទាំងនេះមានប្រយោជន៍ដល់សុខភាពបេះដូង

សាង ស្រីល័ក្ខ — Fri, 23 Dec 2022 06:18:08 +0000

ផ្លែឈើមានច្រើនប្រភេទលើទីផ្សារ យើងអាចដឹងពីរសជាតិរបស់វា ប៉ុន្ដែពេលខ្លះយើងក៏មិនប្រាកដថាអាចដឹងពីគុណសម្បត្ដិផ្លែឈើទាំងនោះចំពោះសុខភាពនោះដែរ។ ពពួកផ្លែឈើមួយចំនួនអាចជួយឲ្យបេះដូងយើងមានសុខភាពល្អ សម្រួលសរសៃឈាម និងអាចការពារបេះដូងពីជំងឺផ្សេងៗផង។

១.ផ្លែប៊ឺរី

ខ្សែស្រឡាយផ្លែឈើប្រភេទនេះមិនថា ប្លូប៊ឺរី ឬស្ដ្រប៊ឺរី មានមុខងារពិសេសប្រឆាំងនឹងអុកស៊ីតកម្ម។ Anthocyanins ជាសារធាតុម្យ៉ាងមាននៅក្នុងផ្លែប៊ឺរី អាចជួយការពារការរលាក កាត់បន្ថយការកើតស្រេ្ដស ជួយសុខភាពបេះដូង និងជំរុញឲ្យចរន្តឈាមរត់បានស្រួល។ ការសិក្សាបង្ហាញថា បង្កើតទម្លាប់ញ៉ាំទឹកប៊ឺរី មួយពែងប្រចាំថ្ងៃ រយៈពេល ៧ខែ នឹងអាចកាត់បន្ថយហានិភ័យជំងឺបេះដូងបាន ១៧%។

២. ផ្លែក្រូច

ផ្លែក្រូចជាផ្លែឈើសម្បូរទៅដោយ វីតាមីន A, C, E និងជាតិសរសៃច្រើនល្អសម្រាប់សុខភាព។ វីតាមីន C មានមុខងារជួយពង្រឹងប្រព័ន្ធភាពស៊ាំ ការពារពីពពួកមេរោគ និង ពីជំងឺផ្សេងៗ។ ចំណែកវីតាមីន E ជួយរក្សាសម្ពាធ ឈាម ជំរុញឲ្យឈាមដំណើរការល្អ និងសម្រួលចង្វាក់បេះដូង។

៣. ផ្លែឪឡឹក

ឪឡឹកទុំក្រៅពីរសជាតិឆ្ងាញ់ ក៏ជាអាហារសម្រាប់សុខភាពបេះដូងផងដែរ។ ការសិក្សាបានបង្ហាញ ក្នុងផ្លែឪឡឹកមានផ្ទុកសារធាតុសំខាន់ ៣យ៉ាងគឺ Citrulline, Nitric, lycopene។ សារធាតុទាំងនេះ ជួយឲ្យធ្វើចរន្ដឈាមដើរស្រួល កាត់បន្ថយអត្រាប្រឈមកើតជំងឺលើសសម្ពាធឈាម និង ជំងឺគាំងបេះដូង។

៤.ផ្លែប៊ឺរ

ផ្លែប៊ឺរជាប្រភេទផ្លែឈើសម្បូរជាតិកាល់ស្យូម និង អាស៊ីដខ្លាញ់អូមេហ្គា៣ ជាសារជាតិសំខាន់អាចកាត់បន្ថយបរិមាណខ្លាញ់ triglyceride ក្នុងសរសៃឈាម។

Triglyceride ជាប្រភេទខ្លាញ់ក្នុងសរសៃឈាមដែលបានបំប្លែងចេញពីរបបអាហារដែលយើងបានញ៉ាំ។ នៅក្នុងសរសៃឈាម ប្រសិនបើបរិមាណខ្លាញ់នេះកើនឡើងលើសពី ១៥០ មិល្លីក្រាម/ដេស៊ីលីត្រឈាម គឺងាយធ្វើឲ្យយើងប្រឈមកើតជំងឺបេះដូង និងលើសម្ពាធឈាមបាន។ ដូច្នេះ អាស៊ីដខ្លាញ់ អូមេហ្គា ៣ អាចជួយកាត់បន្ថយបរិមាណខ្លាញ់នេះ។

៥.ចេក

ចេកទុំសម្បូរទៅដោយប៉ូតាស្យូមដែលជារ៉ែសំខាន់ជួយធ្វើឲ្យចរន្តឈាមដំណើរការល្អ ពិសេសជួយឲ្យបេះដូងជៀសផុតពីជំងឺផ្សេងៗទៀតផង។ បរិមាណចេក ១០០ក្រាម មានផ្ទុកប៉ូតាស្យូម ៣៦០ មិល្លីក្រាម ដូច្នេះការញ៉ាំចេកប្រចាំថ្ងៃអាចជួយដល់សុខភាពបេះដូង។

៦.ល្ហុងទុំ

ល្ហុងទុំជាផ្លែឈើសម្បូរលើទីផ្សារ តម្លៃក៏ធូថ្លៃ ចំណែកគុណសម្បតិ្ដក៏ច្រើនចំពោះសុខភាព។ លក្ខណៈពិសេសរបស់ល្ហុងទុំក៏មានផ្ទុកវីតាមីន A, C, E មិនចាញ់ផ្លែក្រូចនោះដែរ។ លើសពីនេះក៏មានផ្ទុករ៉ែកាល់ស្យូមជួយដល់សុខភាពបេះដូង និងឆ្អឹង។ ល្ហុងទុំ១០០ក្រាម មានផ្ទុកកាល់ស្យូម ៤៦ មិល្លីក្រាម៕

អត្ថបទផ្ដល់ដោយ៖Hello Krupet

ចុចអាន៖អត្ថប្រយោជន៍ពីមើមឈូកទឹកកក ជួយកាត់បន្ថយជាតិខ្លាញ់ និងសម្រក់ទម្ងន់

The post ពពួកផ្លែឈើទាំងនេះមានប្រយោជន៍ដល់សុខភាពបេះដូង appeared first on Kampuchea Thmey Daily.

លំហាត់ប្រាណ ៣ ប្រភេទ អាចជួយឲ្យបេះដូងមានសុខភាពល្អ

សាង ស្រីល័ក្ខ — Tue, 13 Dec 2022 01:21:21 +0000

ការហាត់ប្រាណ ក៏ដូចការបង្កើតទម្លាប់ឲ្យរាងកាយមានចលនាច្រើន ជាវិធីសាស្ដ្រល្អជួយដល់សុខភាពបេះដូង។ អ្នកជំនាញបានណែរនាំថា មិនថាអ្នកមានជំងឺបេះដូង ឬអ្នកមិនទាន់មានជំងឺនោះទេ ត្រូវតែបង្កើតទម្លាប់ហាត់ប្រាណឲ្យបានជាប្រចាំ ជាពិសេសវិធីហាត់ប្រាណ ៣ប្រភេទ ដែលមានប្រសិទ្ធភាពខ្ពស់ដល់បេះដូង។

១.លំហាត់ប្រាណអេរ៉ូបិក

លំហាត់ប្រាណអេរ៉ូបិក (Aerobic Exercise) ជាវិធីហាត់ប្រាណសម្រួលដល់ចង្វាក់បេះដូង ចរន្ដឈាម ពិសេសគ្រប់គ្រងសម្ពាធឈាមបានល្អ។ មិនត្រឹមតែប៉ុណ្ណោះការហាត់បែបនេះ ក៏អាចជួយកាត់បន្ថយហានិភ័យកើតជំងឺទឹកនោមផ្អែម ហើយចំពោះអ្នកជំងឺទឹកនោមផ្អែមក៏អាចជួយការពារនៃការកើនឡើងជាតិស្ករក្នុងឈាមបានដែរ។

ការហាត់ប្រាណបែប Aerobic Exercise មានដូចជា ការរត់ ដើរ ការជិះកង់ ការរាំ ការហែលទឹក ការលោតអន្ទាក់ ក៏ដូចជាការវាយប៉េងប៉ុងជាដើម។ ដូច្នេះយើងគួរអនុវត្ដយ៉ាងហោច ៣០នាទី ក្នុងមួយថ្ងៃ និង ៥ថ្ងៃមួយសប្ដាហ៍អាចជួយឲ្យបេះដូងមានសុខភាពល្អ។

២.ហាត់ប្រាណលើកទម្ងន់

ការលើកទម្ងន់ជាវិធីហាត់ប្រាណដែលប្រើថាមពលខ្លាំង។ ការហាត់ប្រាណបែបនេះមានអត្ថប្រយោជន៍ច្រើន ចំពោះអ្នកមានរាងកាយធាត់លើសគីឡូ មានខ្លាញ់ច្រើន ពិសេសទៀតនោះសម្រាប់អ្នកមានក្បាលពោះធំៗ ដែលប្រឈមខ្លាំងកើតជំងឺបេះដូង និង លើសសម្ពាធឈាម។ លំហាត់ប្រាណបែបនេះអាចជួយសម្រកជាតិខ្លាញ់ និងបង្កើនម៉ាសសាច់ដុំ។ ការសិក្សាបានបង្ហាញថា ប្រសិនបើបានអនុវត្ដការហាត់ប្រាណបានទាំងពីរប្រភេទ គឺការលើកទម្ងន់ និង អេរ៉ូបិក ជាមួយគ្នាកាន់តែជួយកាត់បន្ថយ កូលេស្ដេរ៉ូលអាក្រក់ និងបង្កើនមកវិញនូវកូលេស្ដេរ៉ូលល្អ សម្រាប់សុខភាព។

ជាមធ្យមយើងអាចហាត់ប្រាណបែបនេះចន្លោះពី២ ទៅ ៣ថ្ងៃក្នុងមួយសប្ដាហ៍ រយៈពេលចន្លោះពី៣០នាទី ទៅ១ម៉ោង ល្អប្រសើរសម្រាប់សុខភាព។

៣.ហាត់យូហ្គា

យូហ្គាគឺជាវិធីហាត់ប្រាណមួយដែលមិនត្រឹមតែជួយឲ្យបេះដូងមានសុខភាពល្អប៉ុណ្ណោះទេ សូម្បីផ្នែកប្រព័ន្ធប្រសាទ ផ្នែកស្មារតីក៏ទទួលបានអត្ថប្រយោជន៍ទាំងព្រម។ ជាមធ្យមការហាត់យូហ្គាត្រឹមតែ ៤០នាទី ក្នងមួយថ្ងៃ ៥ថ្ងៃក្នុងមួយសប្ដាហ៍ អាចជួយសម្រួលដល់សរសៃឈាមបេះដូង និង ខួរក្បាល ពិសេសអាចកាត់បន្ថយស្ដ្រេស និងជួយស្មារតីរឹងមាំ។

ដូចគ្នាយើងដឹងហើយថា ស្ដ្រេសរ៉ាំរៃ គឺជាបញ្ហាមួយដែលបង្កការរំខានដល់ជីវិតរស់នៅ ព្រោះថាអាចបង្កឲ្យអ្នកជំងឺគេងមិនលក់ ញ៉ាំច្រើន លើសគីឡូ ប្រឈមកកើតជំងឺផ្សេងៗ ក្នុងនោះមានជំងឺបេះដូង ជំងឺលើសឈាម និង ទឹកនោមផ្អែមប្រភេទ២។ ការគ្រប់គ្រងស្ដ្រេសបានល្អ ក៏ជាចំណែកមួយជួយដល់សុខភាពបេះដូង ដូច្នេះវិធីហាត់ប្រាណមួយប្រភេទនេះ ល្អសម្រាប់អ្នកជំងឺបេះដូងផង និងអ្នកមានបញ្ហាស្ដ្រេសផង៕

អត្ថបទផ្ដល់ដោយ៖Hello Krupet

ចុចអាន៖ចង់បានសុខភាពល្អ ព្យាយាមរត់ហាត់ប្រាណពេលព្រលឹមឲ្យបានទៀងទាត់

ចុចអាន៖មួយថ្ងៃគួរហាត់ប្រាណយ៉ាងតិចប៉ុន្មាននាទី ល្អចំពោះសុខភាព?

The post លំហាត់ប្រាណ ៣ ប្រភេទ អាចជួយឲ្យបេះដូងមានសុខភាពល្អ appeared first on Kampuchea Thmey Daily.

សុខភាពបេះដូង Archives - Kampuchea Thmey Daily

ប្រទេស​ម៉ាឡេស៊ីមាន​អ្នក​ស្លាប់ដោយសារ​ជំងឺ​​បេះ​ដូង​ច្រើន​ជាង​គេ

ទម្លាប់៥យ៉ាងដែលអាចបំផ្លាញសុខភាពបេះដូង

តើអាហារខ្លាញ់ប៉ះពាល់សុខភាពបេះដូងបែបណាខ្លះ?

ការសិក្សារកឃើញថា ជាតិផ្អែមសិប្បនិម្មិតអាចបង្កបញ្ហាដល់សុខភាពឈាមនិងបេះដូង

ចូលចិត្តញ៉ាំប្រៃ អាចធ្វើឲ្យប៉ះពាល់ដល់សុខភាពបេះដូង

ជំងឺខ្សោយបេះដូង បង្កឲ្យអ្នកជំងឺប្រឈមបាត់បង់ចំណង់អាហារ

ពពួកផ្លែឈើទាំងនេះមានប្រយោជន៍ដល់សុខភាពបេះដូង

លំហាត់ប្រាណ ៣ ប្រភេទ អាចជួយឲ្យបេះដូងមានសុខភាពល្អ

ប្រទេសម៉ាឡេស៊ីមានអ្នកស្លាប់ដោយសារជំងឺបេះដូងច្រើនជាងគេ