អគារអង្គរមានជ័យ Archives - Kampuchea Thmey Daily

អភិបាលខណ្ឌ ៧ មករា បន្តដឹកនាំមន្ត្រីជំនាញត្រួតពិនិត្យការដ្ឋានវាយរំលំ អគារអង្គរមានជ័យ

អ៊ិន ពិសី — Sat, 25 Oct 2025 03:11:14 +0000

កាលពីយប់ថ្ងៃទី ២៤ ខែតុលា ឆ្នាំ ២០២៥ ខណៈមេឃកំពុងធ្លាក់ភ្លៀង លោក ថេង សុថុល អភិបាល នៃគណៈអភិបាលខណ្ឌ ៧ មករា បានដឹកនាំក្រុមការងារ ជាមួយ មន្ត្រីជំនាញក្រសួងរៀបចំដែនដី នគរូបនីយកម្ម និងសំណង់ បន្តត្រួតពិនិត្យមើលទីតាំងការដ្ឋាន ដំណើរការគ្រឿងចក្រវាយរំលំ អគារអង្គរមានជ័យ ដើម្បីធានាបានសុខសុវត្ថិភាព បញ្ចៀសចរាចរណ៍ដល់អ្នកធ្វើដំណើរនៅពេលរាត្រី ដែលមានទីតាំងស្ថិតនៅលើមហាវិថីព្រះមុនីវង្ស (ផ្លូវ ៩៣) កែងមហាវិថីកម្ពុជាក្រោម (ផ្លូវ ១២៨) ក្នុងភូមិ ១ សង្កាត់មនោរម្យ ខណ្ឌ ៧ មករា រាជធានីភ្នំពេញ។

លោកអភិបាលខណ្ឌ ៧ មករា បានបញ្ជាក់ថា ម្ចាស់ក្រុមហ៊ុនទទួលម៉ៅការវាយរំលំអគារអង្គរមានជ័យ ដែលចាស់ទ្រុឌទ្រោមខ្លាំង ត្រូវធានាសុវត្ថិភាពជាចម្បង ធ្វើឲ្យមានលក្ខណៈបច្ចេកទេស ជៀសវាងបង្កផលប៉ះពាល់ដល់ប្រជាពលរដ្ឋរស់នៅជិតទីតាំងការដ្ឋាន ជាពិសេសនោះអ្នកធ្វើដំណើរឆ្លងកាត់តំបន់នេះតែម្ដង។

លោកអភិបាលខណ្ឌ ៧ មករា ក៏បានសំណូមពរ និងសូមអធ្យាស្រ័យដល់ប្រជាពលរដ្ឋអ្នកធ្វើដំណើរ ដែលទទួលផលរំខានខ្លះ ការកកស្ទះចរាចរណ៍ ជាដើម ព្រោះថាដំណើរការវាយរំលំនេះអាចនឹងរំខានរយៈពេលយូរគួរសមដែរ ប៉ុន្តែយ៉ាងណាក៏មន្ត្រីជំនាញពាក់ព័ន្ធជួយសម្រួលបានល្អប្រសើរក្នុងអំឡុងការដ្ឋានកំពុងដំណើរការរហូតដល់បញ្ចប់៕

អត្ថបទ ៖ រដ្ឋា

The post អភិបាលខណ្ឌ ៧ មករា បន្តដឹកនាំមន្ត្រីជំនាញត្រួតពិនិត្យការដ្ឋានវាយរំលំ អគារអង្គរមានជ័យ appeared first on Kampuchea Thmey Daily.

អភិបាលខណ្ឌ ៧ មករា ចុះពិនិត្យមើលបច្ចេកទេសសុវត្ថិភាព មុនវាយកម្ទេច អគារអង្គរមានជ័យ

អ៊ិន ពិសី — Tue, 21 Oct 2025 04:55:53 +0000

លោក ថេង សុថុល អភិបាល នៃគណៈអភិបាលខណ្ឌ ៧ មករា ដឹកនាំមន្ត្រីក្រោមឱវាទ ចុះពិនិត្យមើលបច្ចេកទេសរុំព័ទ្ធសំណាញ់សុវត្ថិភាព ដើម្បីធ្វើការវាយកម្ទេចអគារអង្គរមានជ័យទាំងមូល បញ្ចៀសការខ្ទាតកម្ទេចថ្ម ឬក៏ប៉ះពាល់ដល់ប្រជាពលរដ្ឋធ្វើដំណើរ។

ជាក់ស្ដែងនៅព្រឹកថ្ងៃទី ២១ ខែតុលា ឆ្នាំ ២០២៥ នេះ លោកអភិបាលខណ្ឌ ៧ មករា បានចុះពិនិត្យបរិវេណ នៃអតីត«សណ្ឋាគារអង្គរមានជ័យ» ដែលមានទីតាំងស្ថិតនៅកែងមហាវិថីព្រះមុនីវង្ស និងមហាវិថីកម្ពុជាក្រោម ភូមិ ១ សង្កាត់មនោរម្យ ខណ្ឌ ៧ មករា រាជធានីភ្នំពេញ។

លោក សុខ ស៊ីធារ៉ា អគ្គនាយកក្រុមហ៊ុន បានបញ្ជាក់ពីផលប៉ះពាល់ជាមួយអាជ្ញាធរមូលដ្ឋាន ឲ្យ ដឹងថា ទីតាំងបរិវេណអគារអង្គរមានជ័យទាំងមូលនេះ ស្ថិតក្នុងស្ថានភាពពុកផុយ ដោយនៅផ្នែកមួយចំនួន គឺ គ្រាន់តែយកដៃប៉ះក៏ធ្លាក់មកដែរ។

លោកបានបញ្ជាក់បន្ថែមថា ចំពោះដំណើរការ នៃការវាយអគារទាំងមូលនេះ មន្ត្រីជំនាញ ត្រូវធ្វើតាមបច្ចេកទេសស្តង់ដារ ដោយធ្វើការរុំព័ទ្ធសំណាញ់សុវត្ថិភាពជាមុន ដើម្បីបញ្ចៀសការធ្លាក់កម្ទេចថ្មមកលើប្រជាពលរដ្ឋដែលធ្វើដំណើរ។ មួយវិញទៀត នៅពេលកំពុងតែធ្វើការវាយ មន្ត្រីជំនាញ នឹងប្រើប្រាស់បំពង់ទុយោទឹកបាញ់ស្រោចទៅលើបរិវេណ នៃកន្លែងដែលធ្វើការវាយ ដើម្បីកុំឲ្យមានការហុយមកលើអ្នកដំណើរតាមផ្លូវផងដែរ។

លោក ថេង សុថុល បញ្ជាក់ដែរថា ម្ចាស់ក្រុមហ៊ុនទទួលម៉ៅការវាយរំលំអគារអតីត«សណ្ឋាគារអង្គរមានជ័យ» ដែលចាស់ទ្រុឌទ្រោមខ្លាំង ត្រូវធានាសុវត្ថិភាពជាចម្បង ធ្វើឲ្យមានលក្ខណៈបច្ចេកទេស ជៀសវាងបង្កផលប៉ះពាល់ដល់ប្រជាពលរដ្ឋរស់នៅជិតទីតាំងការដ្ឋាន ជាពិសេសនោះអ្នកធ្វើដំណើរឆ្លងកាត់តំបន់នេះតែម្ដង។

លោកអភិបាលខណ្ឌ ៧ មករា ក៏បានសូមអធ្យាស្រ័យដល់ប្រជាពលរដ្ឋអ្នកធ្វើដំណើរឆ្លងកាត់ ដែលទទួលផលរំខានខ្លះ ឬកកស្ទះចរាចរណ៍ ជាដើម ប៉ុន្តែយ៉ាងណា ក៏មន្ត្រីជំនាញពាក់ព័ន្ធជួយសម្រួលបានល្អប្រសើរក្នុងអំឡុងការដ្ឋានកំពុងដំណើររហូតដល់បញ្ចប់៕

អត្ថបទ ៖ ម៉េង

វីដេអូ អភិបាលខណ្ឌ ៧ មករា ចុះពិនិត្យមើលបច្ចេកទេសសុវត្ថិភាពមុនវាយកម្ទេចអគារអង្គរមានជ័យ

The post អភិបាលខណ្ឌ ៧ មករា ចុះពិនិត្យមើលបច្ចេកទេសសុវត្ថិភាព មុនវាយកម្ទេច អគារអង្គរមានជ័យ appeared first on Kampuchea Thmey Daily.

មន្ត្រីជំនាញ និងអាជ្ញាធរ រៀបចំពិធីក្រុងពាលី មុនវាយកម្ទេចអគារអង្គរមានជ័យ

អ៊ិន ពិសី — Fri, 17 Oct 2025 10:33:02 +0000

អគារអង្គរមានជ័យ ដែលចាស់ទ្រុឌទ្រោមខ្លាំង នឹងត្រូវវាយរំលំ ក្រោយមន្ត្រីអាជ្ញាធរជំនាញបានរៀបចំពិធីក្រុងពាលីសុំសេចក្តីសុខពីម្ចាស់ទឹកដី ដើម្បីដំណើរការគ្រឿងចក្រ។

ជាក់ស្ដែងនៅថ្ងៃទី ១៧ ខែតុលា ឆ្នាំ ២០២៥ នេះ លោក ឌី រ័ត្ន ខេមរុណ អភិបាលរង តំណាងលោក ថេង សុថុល អភិបាល នៃគណៈអភិបាលខណ្ឌ ៧ មករា បានដឹកនាំក្រុមការងារចូលរួមជាមួយ ក្រសួងរៀបចំដែនដី នគរូបនីយកម្ម និងសំណង់ ដឹកនាំដោយ លោក យស់ ឆោមណារ៉ាឌី រដ្ឋលេខាធិការ ក្រសួងរៀបចំដែនដីនគរូបនីយកម្ម និង សំណង់ រៀបចំពិធីក្រុងពាលីតាមបែបព្រះពុទ្ធសាសនា សុំសេចក្ដីសុខពីម្ចាស់ទឹក ម្ចាស់ដី ដែលនៅថែរក្សាអគារអង្គរមានជ័យ ដើម្បីដំណើរការគ្រឿងចក្រវាយរំលំ មានទីតាំងស្ថិតនៅលើមហាវិថីព្រះមុនីវង្ស(ផ្លូវ ៩៣) កែងមហាវិថីកម្ពុជាក្រោម(ផ្លូវ ១២៨) ក្នុងភូមិ ១ សង្កាត់មនោរម្យ ខណ្ឌ ៧ មករា រាជធានីភ្នំពេញ។

អគារអង្គរមានជ័យ ដែលចាស់ទ្រុឌទ្រោមខ្លាំង នឹងត្រូវបានក្រសួងរៀបចំដែនដី និងអាជ្ញាធររាជធានីភ្នំពេញ ត្រៀមរៀបចំវាយរំលំ ជៀសវាងបាក់រលំបង្កផលប៉ះពាល់ដល់ពលរដ្ឋ និងអ្នកធ្វើដំណើរ ខណៈពលរដ្ឋនៅសេសសល់ ២ គ្រួសារ ក្នុងចំណោម ៦៥ គ្រួសារ ក៏បានរើសម្ភារៈចេញពីអគាររួចរាល់ផងដែរ ដោយក្រសួងរៀបចំដែនដី នឹងបន្តដោះស្រាយជូនពួកគាត់នៅទីស្តីការក្រសួងបន្ត ដែលបច្ចុប្បន្នពួកគាត់ទាំង ២ គ្រួសារ កំពុងគិតពិចារណា រួចនឹងធ្វើការជាមួយក្រសួងបន្តផងដែរ។

ដំណើរការវាយរំលំអគារនេះ មានការចូលរួមពី លោក យស់ ឆោមណារ៉ាឌី និងអាជ្ញាធរខណ្ឌ ៧ មករា ព្រមទាំងក្រុមហ៊ុនទទួលម៉ៅការ សាជីវកម្ម ពិស្ណុការ អន្តរជាតិ។

លោក សុខ ស៊ីធារ៉ា អគ្គនាយកក្រុមហ៊ុន បានបញ្ជាក់ឲ្យដឹងថា ដំណើរការវាយរំលំអគារនេះ ក្រុមហ៊ុនទទួលម៉ៅការ សាជីវកម្ម ពិស្ណុការ អន្តរជាតិ ពីក្រសួងរៀបចំដែនដី នគរូបនីយកម្ម និងសំណង់ រយៈពេល ៤៥ ថ្ងៃ គិតចាប់ពីថ្ងៃទី ១៣ ខែតុលា ឆ្នាំ ២០២៥ តទៅ នឹងវាយកម្ទេចរួចជាស្ថាពរ។

សូមបញ្ជាក់ថា អគារសហកម្មសិទ្ធិ (អតីតសណ្ឋាគារអង្គរមានជ័យ) មានក្រឡាផ្ទៃបាតទំហំ សរុប ៥៩០ ម៉ែត្រការ៉េ មានកម្ពស់ ៦ ជាន់ ស្មើនឹង ១០៧ បន្ទប់។ អគារនេះមានទីតាំងស្ថិតនៅលើផ្លូវកែងរវាងមហាវិថីព្រះមុនីវង្ស និងមហាវិថីកម្ពុជាក្រោម ស្ថិតនៅក្នុងភូមិ ១ សង្កាត់មនោរម្យ ខណ្ឌ ៧ មករា រាជធានីភ្នំពេញ ត្រូវបានសាងសង់ឡើងតាំងពីអំឡុងឆ្នាំ ១៩៥០ គិតមកដល់បច្ចុប្បន្នសំណង់អគារមានអាយុ ៧៥ ឆ្នាំ មកហើយ៕

អត្ថបទ ៖ ម៉េង

The post មន្ត្រីជំនាញ និងអាជ្ញាធរ រៀបចំពិធីក្រុងពាលី មុនវាយកម្ទេចអគារអង្គរមានជ័យ appeared first on Kampuchea Thmey Daily.

មន្ត្រីជំនាញ នឹងប្រើពេល៤៥ថ្ងៃដើម្បីវាយកម្ទេចអគារ អង្គរមានជ័យ

Sokhom Khon — Tue, 14 Oct 2025 07:44:36 +0000

អគារ អង្គរមានជ័យ ដែលមានអាយុកាលជាង៧០ឆ្នាំ កំពុងទ្រុឌទ្រោមខ្លាំង ខណៈមន្ត្រីជំនាញកំពុងត្រៀមវាយកម្ទេចចោលដើម្បីបង្ការគ្រោះថ្នាក់ដល់ពលរដ្ឋ ក៏ដូចជាអ្នកធ្វើដំណើរ។

លោក សុខ សុធីរ៉ា អគ្គនាយកក្រុមហ៊ុនទទួលម៉ៅការ សាជីវកម្ម ពិស្ណុការ អន្តរជាតិ បានឲ្យដឹងថា ដំណើរការវាយរំលំអគារនេះ នឹងធ្វើឡើងដោយប្រើពេល៤៥ថ្ងៃ ដើម្បីវាយរំលំ គិតចាប់ពីថ្ងៃទី១៣ ខែតុលា ឆ្នាំ២០២៥តទៅ និងដោយមានការចូលរួមពីលោក យស់ ឆោមណារ៉ាឌី រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងអាជ្ញាធរខណ្ឌ ៧មករា។

បើតាមមន្រ្តីជំនាញបញ្ជាក់បន្ថែមថា រហូតមកដល់ថ្ងៃទី១៤ ខែតុលា ឆ្នាំ២០២៥នេះ គ្រួសារដែលរស់នៅក្នុងអគារ ឬម្ចាស់បន្ទប់សរុប៦៥គ្រួសារ ក្នុងនោះមានចំនួន ៦៣គ្រួសារបានស្រុះស្រួលឯកភាពបញ្ឈប់ការរស់នៅក្នុងអគារអង្គរមានជ័យ និងបានរុះរើសម្ភារៈចេញដោយឯកភាពទទួលយកសំណងតាមតម្លៃទីផ្សារ ទៅរស់នៅទីកន្លែងផ្សេងដែលមានសុវត្ថិភាព។

ដោយឡែកនៅសល់គ្រួសារចំនួន២ ទៀត ដែលពុំទាន់ឯកភាពទទួលយកដំណោះស្រាយនៅឡើយ ខណៈក្រសួងជំនាញនឹងបន្តសម្របសម្រួលជាមួយបន្តរហូតបញ្ចាបដោយឯកភាពគ្នា តាមយុទ្ធសាស្រ្តទទួលយកបានទាំងអស់។

តាមការជូនដំណឹងរបស់ក្រសួងរៀបចំដែនដី នគរូបនីយកម្ម និងសំណង់ ទៅអភិបាលខណ្ឌ៧មករា កាលពីថ្ងៃទី១៧កញ្ញា ក្រសួងបានឯកភាពជាគោលការណ៍ដំឡើងតម្លៃដល់ ២ ៥០០ដុល្លារអាមេរិកក្នុង១ម៉ែត្រការ៉េ ដែលធ្វើឱ្យតម្លៃគោល (គិតពីជាន់ផ្ទាល់ដីដល់ជាន់ទី៦) កើនដល់ ៧ ៦៩០ដុល្លារអាមេរិកក្នុង១ម៉ែត្រការ៉េ លើសពីតម្លៃទីផ្សារប្រមាណ ២២% ដោយយោងតាមតម្លៃដែលក្រុមហ៊ុនចំនួន ០៣បានធ្វើការវាយតម្លៃពីឆ្នាំ២០២៣ដល់២០២៥។

សូមបញ្ជាក់ថា អគារសហកម្មសិទ្ធិ (អតីតសណ្ឋាគារអង្គរមានជ័យ) មានក្រឡាផ្ទៃបាតទំហំ សរុប៥៩០ម៉ែត្រការ៉េ មានកម្ពស់៦ជាន់ ស្មើនឹង១០៧បន្ទប់។ អគារនេះមានទីតាំងស្ថិតនៅលើផ្លូវកែងរវាងមហាវិថីព្រះមុនីវង្ស និងមហាវិថីកម្ពុជាក្រោម ស្ថិតនៅក្នុងភូមិ១ សង្កាត់មនោរម្យ ខណ្ឌ៧មករា រាជធានីភ្នំពេញ ត្រូវបានសាងសង់ឡើង តាំងពីអំឡុងឆ្នាំ១៩៥០ គិតមកដល់បច្ចុប្បន្នសំណង់អគារមានអាយុ ៧៥ឆ្នាំមកហើយ៕

អត្ថបទ៖ ម៉េង

The post មន្ត្រីជំនាញ នឹងប្រើពេល៤៥ថ្ងៃដើម្បីវាយកម្ទេចអគារ អង្គរមានជ័យ appeared first on Kampuchea Thmey Daily.

អគារអង្គរមានជ័យ ដែលមានអាយុកាលជាង៧០ឆ្នាំត្រូវបានមន្រី្ដជំនាញសិក្សាចប់រួចរាល់ នឹងវាយកម្ទេចចោលដើម្បីបញ្ចៀសការបាក់ស្រុត

Sokhom Khon — Mon, 13 Oct 2025 07:37:35 +0000

នៅព្រឹកថ្ងៃទី១៣ ខែតុលា ឆ្នាំ២០២៥នេះ មន្ត្រីជំនាញបានចុះសិក្សាចប់រួចរាល់ហើយ លើអគារអគារអង្គរជ័យ ដែលមានអាយុកាលជាង ៧០ឆ្នាំ និងត្រៀមវាយកម្ទេចចោលដើម្បីបញ្ចៀសការបាក់ស្រុតប៉ះពាល់ដល់ពលរដ្ឋ។

អគារអង្គរជ័យមានកម្ពស់៦ជាន់ ស្ថិតនៅកាច់ជ្រុងមហាវិថីកម្ពុជាក្រោម និងមុនីវង្ស ក្នុងភូមិ១ សង្កាត់មនោរម្យ ខណ្ឌ៧មករា រាជធានីភ្នំពេញ ដែលកំពុងមានសភាពទ្រុឌទ្រោម និងពុកផុយ ដែលអាចនឹងបាក់ស្រុតមកដោយឯងៗ ខណៈក្រសួងរៀបចំដែនដី នគរូបនីយកម្ម និងសំណង់ និងអាជ្ញាធរពាក់ព័ន្ធ បានចាប់ផ្តើមដាក់គ្រឿងចក្រចូលដើម្បីធើ្វការវាយកម្ទេចចោល។

សូមបញ្ជាក់ថា អគារសហកម្មសិទ្ធិ (អតីតសណ្ឋាគារអង្គរមានជ័យ) មានក្រឡាផ្ទៃបាតទំហំ សរុប៥៩០ម៉ែត្រការ៉េ មានកម្ពស់៦ជាន់ ស្មើនឹង១០៧បន្ទប់ ត្រូវបានសាងសង់ឡើង តាំងពីអំឡុងឆ្នាំ១៩៥០ គិតមកដល់បច្ចុប្បន្នសំណង់អគារនេះមានអាយុ៧០ឆ្នាំជាងទៅហើយ ។

យោងតាមលិខិតជូនដំណឹងរបស់ក្រសួងរៀបចំដែនដី នគរូបនីយកម្ម និងសំណង់ ទៅអភិបាលខណ្ឌ៧មករា កាលពីថ្ងៃទី១៧ ខែកញ្ញា ឆ្នាំ២០២៥ ក្រសួងបានស្នើឲ្យអភិបាលខណ្ឌ៧មករា សម្របសម្រួលចាត់ចែងឲ្យគ្រួសារចំនួន៤ដែលមិនទាន់ឯកភាពទទួលយកដំណោះស្រាយឲ្យចាកចេញពីអគារអង្គរមានជ័យ ត្រឹមសប្ដាហ៍ទី៤ នៃខែកញ្ញា ឆ្នាំ២០២៥ ដើម្បីផ្ដល់លទ្ធភាពដល់ក្រសួងចាត់ចែកវាយរំលំអគារនេះ ខណៈក្រសួងក៏បានឯកភាពជាគោលការណ៍ដំឡើងតម្លៃដល់ ២ ៥០០ដុល្លារអាមេរិកក្នុង១ម៉ែត្រការ៉េ ដែលធ្វើឱ្យតម្លៃគោល (គិតពីជាន់ផ្ទាល់ដីដល់ជាន់ទី៦) កើនដល់ ៧ ៦៩០ដុល្លារអាមេរិកក្នុង១ម៉ែត្រការ៉េ លើសពីតម្លៃទីផ្សារប្រមាណ ២២% ដោយយោងតាមតម្លៃដែលក្រុមហ៊ុនចំនួន ០៣បានធ្វើការវាយតម្លៃពីឆ្នាំ២០២៣ដល់២០២៥ ហើយគ្រួសារទាំង ៤អាចទាក់ទងមកក្រុមការងារក្រសួងរៀបចំដែនដី នគរូបនីយកម្ម និងសំណង់ ដើម្បីមកទទួលយកថវិកានៅខែកញ្ញា ឆ្នាំ២០២៥។

បើតាមមន្រ្តីជំនាញបានបញ្ជាក់ថា អាគារនេះនឹងត្រូវវាយកម្ទេចនៅថ្ងៃទៅ១៨ ខែតុលា ឆ្នាំ២០២៥ ដោយមុននឹងវាយកម្ទេច ត្រូវធ្វើការសម្អាតកម្ទេចសំរាមតាមកាំជណ្ដើរនៅតាមបន្ទប់នីមួយៗរួចសិន រួចនឹងធ្វើពិធីក្រុងពាលី តាមបែបសាសនា៕

អត្ថបទ៖ ម៉េង

The post អគារអង្គរមានជ័យ ដែលមានអាយុកាលជាង៧០ឆ្នាំត្រូវបានមន្រី្ដជំនាញសិក្សាចប់រួចរាល់ នឹងវាយកម្ទេចចោលដើម្បីបញ្ចៀសការបាក់ស្រុត appeared first on Kampuchea Thmey Daily.

អាជ្ញាធរ ចុះហ៊ុមព័ទ្ធសំណង់អគារអង្គរមានជ័យ ក្រោយផុតឱសានវាទ ១៥ ថ្ងៃ

អ៊ិន ពិសី — Wed, 21 May 2025 04:13:17 +0000

ផុតរយៈពេល ១៥ ថ្ងៃ នៃថ្ងៃឱសានវាទ ក្រុមការងារគណៈកម្មការចម្រុះ បានចុះទៅហ៊ុមព័ទ្ធអគារសហកម្មសិទ្ធ «អតីតសណ្ឋាគារអង្គរមានជ័យ»។

ការចុះហ៊ុមព័ទ្ធនេះធ្វើឡើងនាព្រឹកថ្ងៃទី ២១ ខែឧសភា ឆ្នាំ ២០២៥ នេះ ដោយក្រុមការងារបច្ចេកទេសជំនាញ នៃក្រសួងរៀបចំដែនដី នគរូបនីយកម្ម និងសំណង់ សហការជាមួយអាជ្ញាធរខណ្ឌ ៧ មករា ចុះទៅហ៊ុមព័ទ្ធ «អតីតសណ្ឋាគារអង្គរមានជ័យ» ស្ថិតតាមបណ្ដោយមហាវិថីព្រះមុនីវង្ស សង្កាត់មនោរម្យ ខណ្ឌ ៧ មករា រាជធានីភ្នំពេញ។

លោក ខៀវ ប៊ូរិន អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ដែលជាប្រធានក្រុមការងារក្រសួងទទួលដោះស្រាយការសម្របសម្រួលការងារ បានប្រាប់ឱ្យដឹងថា ការងារនេះ ក្រុមជំនាញបានចំណាយពេលជិត ១ ឆ្នាំ មកហើយ ក្នុងការដោះស្រាយគោលនយោបាយសម្របសម្រួលជូនប្រជាពលរដ្ឋចំនួន ៦៥ គ្រួសារ រស់នៅក្នុងអគារសហកម្មសិទ្ធិនេះ។

លោក ខៀវ ប៊ូរិន បានបន្តថា ដោយមានការព្រួយបារម្ភពីគុណភាពសំណង់មានសភាពចាស់ទ្រុឌទ្រោម ដែលអាចប្រឈមនឹងការបាក់រលំជាយថាហេតុបានគ្រប់ពេល ទើបក្រសួងរៀបចំដែនដី ដែលជាក្រសួងជំនាញ លើការគ្រប់គ្រងសំណង់ ត្រូវចាំបាច់គិតគូរ និងដោះស្រាយកិច្ចការងារនេះឱ្យបានលឿន និងរហ័សបំផុត។

«ការដោះស្រាយបច្ចុប្បន្នសម្រេចបាន ៩៤% ស្មើ ៦១ គ្រួសារ និងនៅសល់ ៤ គ្រួសារនៅបន្តរកដំណោះស្រាយបន្តទៀត តាមការចរចានិងការយោគយល់គ្នា»។ លោក ខៀវ ប៊ូរិន បានបញ្ជាក់បន្ថែម។

លោក ខៀវ ប៊ូរិន បន្តថា អគារសហកម្មសិទ្ធិដែលមានអាយុកាលជាង ៧០ ឆ្នាំនេះ មានសភាពចាស់ទ្រុឌទ្រោមប្រឈមដួលរំលំគ្រប់ពេល ហើយខាងអាជ្ញាធរនឹងធ្វើការវាយកម្ទេចចោលឆាប់ៗតាមបច្ចេកទេសរបស់អ្នកជំនាញ ដោយរុះរើម្តងបន្តិចៗមិនអាចវាយរំលំចោលទាំងស្រុងតែម្តងនោះទេ។

យ៉ាងណាមិញ បើតាមលោក ខៀវ ប៊ូរិន អគារដែលគ្រោងនឹងវាយចោលនេះមិនទាន់ដឹងផែនការជាក់លាក់ គ្រោងនឹងសាងសង់អ្វីទេ ប៉ុន្តែតាមភាពជាក់ស្តែងដោយសារតំបន់នេះជាតំបន់ប្រជុំជនកណ្តាលក្រុង អាចនឹងអភិវឌ្ឍប្រែក្លាយជាអគារពាណិជ្ជកម្មខ្ពស់ៗនៅពេលខាងមុខ។

សូមបញ្ជាក់ថា អគារសហកម្មសិទ្ធិ (អតីតសណ្ឋាគារអង្គរមានជ័យ) មានក្រឡាផ្ទៃបាតទំហំសរុប ៥៩០ ម៉ែត្រការ៉េ កម្ពស់ ៦ ជាន់ ស្មើនឹង ១០៧ បន្ទប់។ អគារនេះ មានទីតាំងស្ថិតនៅលើផ្លូវកែងរវាងមហាវិថីព្រះមុនីវង្ស និង មហាវិថីកម្ពុជាក្រោម ស្ថិតក្នុងភូមិ ១ សង្កាត់មនោរម្យ ខណ្ឌ ៧ មករា រាជធានីភ្នំពេញ ត្រូវបានសាងសង់ឡើងតាំងពីអំឡុងឆ្នាំ ១៩៥០ គិតមកដល់បច្ចុប្បន្ន សំណង់អគារនេះ មានអាយុ ៧៥ ឆ្នាំ ហើយ៕

អត្ថបទ ៖ រដ្ឋា

The post អាជ្ញាធរ ចុះហ៊ុមព័ទ្ធសំណង់អគារអង្គរមានជ័យ ក្រោយផុតឱសានវាទ ១៥ ថ្ងៃ appeared first on Kampuchea Thmey Daily.

គ្រួសារសេសសល់អគារអង្គរមានជ័យ ៣ គ្រួសារ បន្ទាបតម្លៃសំណង ១ គ្រួសារព្រមអភិវឌ្ឍនៅកន្លែង

Dy Bunnara — Thu, 15 May 2025 04:01:27 +0000

ឆ្លងតាមកិច្ចប្រជុំរវាងមន្រ្តីសម្របសម្រួលចុះពិនិត្យសិក្សា និងវាយតម្លៃសំណង់អគារអង្គរមានជ័យ ជាមួយក្រុមគ្រួសារពលរដ្ឋចំនួន ៤ គ្រួសារនៅអគារអង្គរមានជ័យ បានបង្ហាញលទ្ធផលក្នុងការរកដំណោះស្រាយ សម្រាប់ពលរដ្ឋដែលនៅសេសសល់និងកំពុងរស់នៅ និងប្រកបអាជីវកម្មនៅក្នុងអគារដែលមានសភាពចាស់ទ្រុឌទ្រោម។

ក្នុងជំនួបពិភាក្សាជាមួយគ្រួសារពលរដ្ឋដែលនៅសេសសល់ចំនួន ៤ គ្រួសារ បានឯកភាពទៅលើការហ៊ុំពទ័្ធអគារទាំងមូលតាមសេចក្តីជូនដំណឹងរបស់ក្រសួងកំណត់ (តែសុំពេលចរចារបន្តលើតម្លៃ)។

ក្នុងចំណោមគ្រួសារពលរដ្ឋចំនួន ៤ គ្រួសារដែលនៅសេសសល់ មានពលរដ្ឋ ៣ គ្រួសារ សុខចិត្តឱនភាពលើតម្លៃដែលបានដាក់ជូនក្រុមការងារកន្លងមក តែមន្រ្តីបញ្ជាក់ថាតម្លៃនៅតែខ្ពស់ ខណៈ ១ គ្រួសារ (ហាងវែនតា) សុខចិត្តអភិវឌ្ឍន៍នៅនឹងកន្លែង។

ក្រសួងរៀបចំដែនដី នគរូបនីយកម្ម និងសំណង់ កាលពីពេលថ្មីៗនេះ បានចេញសេចក្តីជូនដំណឹងដល់ពលរដ្ឋ ដែលកំពុងរស់នៅអគារសហកម្មសិទ្ធិ (អតីតសណ្ឋាគារអង្គរមានជ័យ) ដែលនៅសល់ចំនួន ៤ គ្រួសារ ត្រូវបញ្ឈប់ការរស់នៅនិងដាក់ឱសានវាទឲ្យចាកចេញក្នុងរយៈពេល ១៥ ថ្ងៃ ដើម្បីបញ្ចៀសគ្រោះថ្នាក់ជាយថាហេតុ។

នៅក្នុងសេចក្តីជូនដំណឹងរបស់ក្រសួងបានបញ្ជាក់ថា អគារសហកម្មសិទ្ធិ (អតីតសណ្ឋាគារអង្គរមានជ័យ) មានទីតាំងស្ថិតនៅលើផ្លូវកែងរវាងមហាវិថីព្រះមុនីវង្សនិង មហាវិថីកម្ពុជាក្រោម ស្ថិតនៅក្នុងភូមិ១ សង្កាត់មនោរម្យ ខណ្ឌ ៧មករា រាជធានីភ្នំពេញ ដែលត្រូវបានសាងសង់ឡើងតាំងពីអំឡុងឆ្នាំ ១៩៥០ គិតមកដល់បច្ចុប្បន្នសំណង់អគារមានអាយុ ៧៥ ឆ្នាំមកហើយ។

គិតត្រឹមខែមេសា ឆ្នាំ២០២៥ ប្រជាពលរដ្ឋចំនួន ៦១ គ្រួសារ ស្មើនឹង ៩៤% បានទទួលយកដំណោះស្រាយ ក្រោមការសម្របសម្រួលរបស់ក្រសួងរៀបចំដែនដី ហើយបានស្ម័គ្រចិត្តចាកចេញទៅរស់នៅទីតាំងថ្មី ដែលមានសុវត្ថិភាពសម្រាប់ក្រុមគ្រួសារ។

ក្រសួងបានបញ្ជាក់ថា ផ្អែកតាមលទ្ធផល នៃការចុះត្រួតពិនិត្យនិងវាយតម្លៃគុណភាពសំណង់ ការវិភាគលើគុណភាពនិងសុវត្ថិភាព គ្រឿងផ្គុំសំណង់ និងលទ្ធផលនៃការពីសោធន៍លើសម្ភារៈសំណង់អគាររបស់មន្ទីរពិសោធន៍ជាតិសំណង់ បានពិនិត្យឃើញថា សំណង់អគារមានសភាពចាស់ទ្រុឌទ្រោមខ្លាំង បាត់បង់តុល្យភាពលំនឹងនៃរចនាសម្ព័ន្ធគ្រឿងផ្គុំសំណង់ និងប្រឈមមុខនឹងការបាក់រលំជាយថាហេតុ ដោយមិនផ្តល់សញ្ញាណជាមុន ដែលអាចនឹងបង្កគ្រោះថ្នាក់ដល់អាយុជីវិត និងទ្រព្យសម្បត្តិរបស់បងប្អូនប្រជាពលរដ្ឋយ៉ាងធ្ងន់ធ្ងរ៕

The post គ្រួសារសេសសល់អគារអង្គរមានជ័យ ៣ គ្រួសារ បន្ទាបតម្លៃសំណង ១ គ្រួសារព្រមអភិវឌ្ឍនៅកន្លែង appeared first on Kampuchea Thmey Daily.

អគារអង្គរមានជ័យ នៅសល់ ៤ គ្រួសារទៀត ក្រសួងដែនដីដាក់ឱសានវាទ ១៥ ថ្ងៃ ឲ្យចាកចេញ

Dy Bunnara — Thu, 08 May 2025 02:32:34 +0000

ក្រសួងរៀបចំដែនដី នគរូបនីយកម្ម និងសំណង់បានចេញសេចក្តីជូនដំណឹងដល់ពលរដ្ឋ ដែលកំពុងរស់នៅអគារសហកម្មសិទ្ធិ (អតីតសណ្ឋាគារអង្គរមានជ័យ) ដែលនៅសល់ចំនួន ៤ គ្រួសារ ត្រូវបញ្ឈប់ការរស់នៅនិងត្រូវធ្វើការចាកចេញក្នុងរយៈពេល ១៥ ថ្ងៃ ដើម្បីបញ្ចៀសគ្រោះថ្នាក់ជាយថាហេតុ។

អគារនេះមានក្រឡាផ្ទៃបាតទំហំសរុប ៥៩០ ម៉ែត្រការ៉េ មានកម្ពស់ ៦ ជាន់ ស្មើនឹង ១០៧ បន្ទប់ និងមានប្រជាពលរដ្ឋរស់នៅសរុបចំនួន ៦៥ គ្រួសារ។

ក្នុងន័យនេះ ផ្អែកតាមច្បាប់ស្តីពីសំណង់ឆ្នាំ២០១៩ និងដើម្បីបញ្ចៀសគ្រោះថ្នាក់ដល់អាយុជីវិត ការបាត់បង់ ទ្រព្យសម្បត្តិនិងគ្រោះថ្នាក់ផ្សេងៗ ដែលអាចកើតមានឡើងជាយថាហេតុ ដោយសារសំណង់អគារអតីតសណ្ឋាគារ អង្គរមានជ័យ ក្រសួងរៀបចំដែនដី នគរូបនីយកម្ម និងសំណង់ បានធ្វើការណែនាំដូចខាងក្រោម៖

១. ប្រជាពលរដ្ឋ ៤ គ្រួសារ ដែលកំពុងស្នាក់នៅ ប្រើប្រាស់ និងប្រកបអាជីវកម្មក្នុងអគារនេះ ត្រូវបញ្ឈប់ការរស់នៅនិងការប្រកបអាជីវកម្មជាបន្ទាន់ និងត្រូវធ្វើការចាកចេញពីអគារនេះ ក្នុងរយៈពេល ១៥ ថ្ងៃ គិតចាប់ពីថ្ងៃជូនដំណឹងនេះតទៅ។ ជាមួយគ្នានេះ ក្រុមការងារក្រសួងនឹងបន្តសម្របសម្រួលដោះស្រាយសំណងជូនប្រជាពលរដ្ឋ ដែលនៅសល់ចុងក្រោយចំនួន ៤ គ្រួសារ។
២. រដ្ឋបាលរាជធានីភ្នំពេញ ត្រូវចាត់វិធានការបន្ទាន់ជាអាទិ៍ ហ៊ុំព័ទ្ធ ហាមចូល និងហាមប្រើប្រាស់អគារនេះ ចាប់ពីថ្ងៃជូនដំណឹងនេះតទៅ ដើម្បីធានាសុវត្ថិភាព សន្តិសុខ និងសណ្តាប់ធ្នាប់សាធារណៈ។
៣. ក្រសួងនឹងសហការជាមួយរដ្ឋបាលរាជធានីភ្នំពេញ ដើម្បីវាយរំលំសំណង់អគារចាស់ទ្រុឌទ្រោមនេះ ក្រោយផុតពេលកំណត់នៃការចាកចេញរបស់គ្រួសារប្រជាពលរដ្ឋចុងក្រោយចំនួន ៤ គ្រួសារ ខាងលើ។

ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ ២០២៤ និងទិសដៅការងារបន្តសម្រាប់ឆ្នាំ២០២៥ របស់ក្រសួងរៀបចំដែនដី នគរូបនីយកម្ម និងសំណង់ កាលពីរសៀលថ្ងៃទី ២៦ ខែវិច្ឆិកា សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក៏បានណែនាំឱ្យក្រសួងស្ថាប័នពាក់ព័ន្ធ ត្រូវគិតគូរដោះស្រាយពីបញ្ហាសំណង់អគារចាស់ៗនៅរាជធានីភ្នំពេញដើម្បីសុវត្ថិភាពប្រជាពលរដ្ឋ តាមរយៈការអនុវត្តរូបមន្ត «ភាពជាដៃគូររវាងរដ្ឋ និងឯកជន» ដូចករណីដោះស្រាយអគារប៊ូឌីញ ឬអគារស ដែលមានការចូលរួមពីវិស័យឯកជនសហការជាមួយរដ្ឋ។

ជាមួយគ្នានេះ សម្តេចនាយករដ្ឋមន្រ្តីបានអំពាវនាវដល់ពលរដ្ឋ ដែលរស់នៅសំណង់អគារចាស់ៗ ត្រូវចូលរួមសហការជាមួយអាជ្ញាធរព្រោះនេះជាសុវត្ថិភាពផ្ទាល់ខ្លួន ដោយសារតែសំណង់អគារចាស់ៗទាំងនោះមានអាយុកាលចំណាស់អាចប្រឈមមុខគ្រោះថ្នាក់គ្រប់ពេល៕

The post អគារអង្គរមានជ័យ នៅសល់ ៤ គ្រួសារទៀត ក្រសួងដែនដីដាក់ឱសានវាទ ១៥ ថ្ងៃ ឲ្យចាកចេញ appeared first on Kampuchea Thmey Daily.