ក្នុងសេចក្តីប្រកាសព័ត៌មាន កាលពីថ្ងៃចន្ទទី៨ខែធ្នូឆ្នាំ២០២៥ លោកស្រី Montse Ferrer ដែលជានាយកផ្នែកស្រាវជ្រាវប្រចាំតំបន់របស់អង្គការលើកលែងទោស បាននិយាយថា៖ «ការផ្ទុះឡើងវិញនៃអរិភាពនៅតាមបណ្តោយព្រំដែនកម្ពុជា-ថៃ អាចបង្កជាហានិភ័យដល់ អាយុជីវិតជនស៊ីវិល ការផ្លាស់ទីលំនៅទ្រង់ទ្រាយធំ និង ការបំផ្លិចបំផ្លាញហេដ្ឋារចនាសម្ព័ន្ធជនស៊ីវិលចាំបាច់។ រដ្ឋាភិបាលកម្ពុជា និងថៃ ត្រូវតែចាត់វិធានការចាំបាច់ទាំងអស់ ដើម្បីការពារជនស៊ីវិលស្របតាមច្បាប់មនុស្សធម៌អន្តរជាតិនិងទប់ស្កាត់រាល់ហានិភ័យបន្ថែមទៀតចំពោះជនស៊ីវិល។ ចំពេលមានរបាយការណ៍គួរឲ្យព្រួយបារម្ភអំពី ជនស៊ីវិលរងគ្រោះកាលពីថ្ងៃចន្ទ យើងសូមជំរុញឲ្យសហគមន៍អន្តរជាតិ ដាក់សម្ពាធលើរដ្ឋាភិបាលទាំងពីរឲ្យគោរពតាមកាតព្វកិច្ចរបស់ពួកគេ ដើម្បីកាត់បន្ថយផលប៉ះពាល់នៃជម្លោះមកលើជនស៊ីវិល និងទ្រព្យសម្បត្តិជនស៊ីវិល ឲ្យនៅកម្រិតអប្បបរមា»។

ការអំពាវនាវនេះកើតឡើងស្របពេលអង្គការសហប្រជាជាតិ ក៏ជំរុញ​ឲ្យ​ភាគី​​ជម្លោះ​ថៃ​និង​កម្ពុជា​​​ ​អត់ធ្មត់និង​វិល​ទៅរក​កិច្ចព្រមព្រៀងសន្តិភាព​​វិញ​ផងដែរ។

លោក Stephane Dujarric ដែលជាអ្នកនាំពាក្យរបស់ប្រមុខ UN បាននិយាយថា លោក Antonio Guterres មានក្តីបារម្ភចំពោះរបាយការណ៍នៃការប៉ះទង្គិចគ្នាដោយប្រដាប់អាវុធជាថ្មីរវាងកម្ពុជា និងថៃ ជាពិសេសការវាយប្រហារតាមអាកាស និងការចល័តឧបករណ៍ធុនធ្ងន់នៅតំបន់ព្រំដែន។

ទន្ទឹមនោះ លោក Dujarric ក៏និយាយដែរថា អគ្គលេខាធិការបានរំលឹកឡើងវិញនូវការអំពាវនាវរបស់លោកឲ្យភាគីនានាវិលត្រឡប់ទៅរកក្របខ័ណ្ឌនៃសេចក្តីប្រកាសរួមដែលបានចុះហត្ថលេខាកាលពីថ្ងៃទី ២៦ខែតុលាវិញ ហើយប្តេជ្ញាចិត្តជាថ្មីចំពោះបទឈប់បាញ់ និងអនុវត្តវិធានការកាត់បន្ថយការកើនឡើង និងការកសាងទំនុកចិត្តគ្នា។

លោក Guterres ថែមទាំងអំពាវនាវឲ្យភាគីទាំងពីរប្រើប្រាស់ឲ្យបានពេញលេញនូវរាល់យន្តការសម្រាប់កិច្ចសន្ទនា ដើម្បីស្វែងរកដំណោះស្រាយយូរអង្វែងចំពោះជម្លោះតាមរយៈមធ្យោបាយសន្តិវិធី៕

អត្ថបទ៖ សុខ សុវណ្ណ

The post អង្គការលើកលែងទោសអន្តរជាតិ អំពាវនាវឲ្យកម្ពុជា-ថៃ ទប់ស្កាត់ហានិភ័យបន្ថែមទៀតដល់ជនស៊ីវិល appeared first on Kampuchea Thmey Daily.

តាមរបាយការណ៍, ឆ្នាំ២០២៣ មនុស្សចំនួន២៤នាក់ ត្រូវបានប្រហារជីវិតនៅសហរដ្ឋអាមេរិក ដោយនេះជាការកើនឡើង៣៣% បើធៀបនឹងឆ្នាំ២០២២ ដែលមានត្រឹម ១៨នាក់ប៉ុណ្ណោះ។

ក្នុង​ចំណោម​អ្នក​​ត្រូវប្រហារជីវិត​នៅ​អាមេរិក​កាល​ពី​ឆ្នាំ​មុន​គឺមាន Amber McLaughlin ជា​ស្ត្រី​កែ​ភេទ​ដំបូង​គេ ​ដែល​ត្រូវ​ប្រហារ​ជីវិត​ក្នុងប្រទេសនេះ។ ជាឃាតករនិងជាអ្នករំលោភសេពសន្ថវៈ, McLaughlin ត្រូវបានប្រហារជីវិតនៅរដ្ឋ Missouri ក្នុងខែមករាឆ្នាំ២០២៣ ខណៈដែលការប្រហារជីវិតអ្នកទោសទាំង២៤នាក់ គឺសុទ្ធតែប្រើថ្នាំចាក់សម្លាប់។

សូមបញ្ជាក់ថា រដ្ឋចំនួន២៧របស់សហរដ្ឋអាមេរិកនិងរដ្ឋាភិបាលសហព័ន្ធ បានអនុវត្តការប្រហារជីវិត ភាគច្រើនដោយការចាក់ថ្នាំ។ យ៉ាងណា រដ្ឋ Idaho, Mississippi, Oklahoma, South Carolina និង Utah ឥឡូវនេះ បានអនុញ្ញាតឲ្យមានការប្រហារជីវិតដោយបាញ់សម្លាប់នឹងកាំភ្លើង ចំណែកឯរដ្ឋ Alabama, Arkansas, Florida, Kentucky, Mississippi, Oklahoma, South Carolina និង Tennessee អនុញ្ញាតឲ្យប្រើប្រាស់កៅអីឆក់ រីឯរដ្ឋចំនួន៧ រួមទាំង Alabama ផងនោះ អនុញ្ញាតឲ្យប្រើប្រាស់បន្ទប់បាញ់ឧស្ម័នចូល។

បើគិតជាសកល អង្គការលើកលែងទោសអន្តរជាតិប៉ាន់ប្រមាណថា មានការប្រហារជីវិតអ្នកទោសចំនួន ១ ១៥៣នាក់ នៅក្នុងឆ្នាំ២០២៣ ពោលគឺកើនជាង ៣០% បើធៀបនឹងឆ្នាំ២០២២ ហើយនេះគឺជាតួលេខខ្ពស់បំផុត មិនធ្លាប់មានសោះចាប់តាំងពីឆ្នាំ២០១៥មក ដែលកាលនោះ អ្នកទោសចំនួន ១ ៦៣៤នាក់ ត្រូវបានប្រហារជីវិត៕

អត្ថបទ៖ សុខ សុវណ្ណ

ចុចអាន៖ អ៊ីរ៉ង់ ប្រហារជីវិតមនុស្ស៤នាក់ ព្រោះធ្វើការឲ្យអ៊ីស្រាអែល

The post អាមេរិក ប្រហារជីវិតអ្នកទោសច្រើនបំផុត មិនធ្លាប់មាន ក្នុងរយៈពេល៥ឆ្នាំ appeared first on Kampuchea Thmey Daily.

ទីប្រឹក្សាវិបត្តិជាន់ខ្ពស់លោកស្រី Donatella Rovera បានប្រាប់ទូរទស្សន៍អង់គ្លេស Sky News នៅទីក្រុងឡុងដ៍ កាលពីថ្ងៃព្រហស្បតិ៍ទី២ ខែវិច្ឆិកាថា អង្គការលើកលែងទោសអន្តរជាតិ មានវីដេអូអំពីផូស្វ័រពណ៌ស ដែលត្រូវបានប្រើប្រាស់នៅហ្គាហ្សា និងលីបង់ ខណៈក៏មានការផ្តល់សក្ខីកម្មពីវេជ្ជបណ្ឌិតនៅភាគខាងត្បូងប្រទេសលីបង់ ផងដែរ ។

ស្របពេលជាមួយគ្នានោះដែរ លោកស្រី Rovera ក៏បានស្តីបន្ទោស ភាពអសកម្មរបស់សហគមន៍អន្តរជាតិ ក្នុងការប្រឈមមុខជាមួយមហន្តរាយនិងវិបត្តិមនុស្សធម៌ ដែលកំពុងកើតឡើងផងដែរ ។

លោកស្រីបន្ថែមថា ភាគីក្នុងជម្លោះនេះ គ្មាននរណាគោរពច្បាប់អន្តរជាតិទេ។ មិនត្រឹមប៉ុណ្ណឹង លោកស្រីថែមទាំងអំពាវនាវឲ្យមានការស៊ើបអង្កេតឯករាជ្យ លើការរំលោភបំពានទាំងអស់ផងដែរ ។

​ផូស្វ័រពណ៌ស គឺជាសារធាតុ​បង្កការ​ឆាបឆេះ​យ៉ាង​សន្ធោរ​សន្ធៅ​ និង​អាច​បណ្តាលឲ្យ​មាន​របួស​ធ្ងន់ធ្ងរ ហើយ​ការប្រើប្រាស់​អាវុធប្រភេទ​នេះ​លើ​ជន​ស៊ីវិល ត្រូវបាន​ចាត់ទុក​ជា​ឧក្រិដ្ឋកម្ម​សង្គ្រាម​។​

ការចោទប្រកាន់របស់លោកស្រីកើតឡើងចំពេល ក្រសួងសុខាភិបាល ដែលមានមូលដ្ឋាននៅតំបន់ហ្គាហ្សា អះអាងថា តួលេខជនជាតិប៉ាឡេស្ទីន ដែលត្រូវបានសម្លាប់ដោយការវាយប្រហាររបស់អ៊ីស្រាអែលនៅតំបន់ហ្គាហ្សា ឥឡូវនេះបានកើនដល់ជិត ១ ម៉ឺននាក់ហើយ ។

អ្នកនាំពាក្យក្រសួងលោក Ashraf al-Qedra បាននិយាយក្នុងសន្និសីទសារព័ត៌មានមួយថា ចំនួនអ្នកស្លាប់បានកើនឡើងដល់ ៩,០៦១ នាក់ ក្នុងនោះមានកុមារ ៣,៧៦០ នាក់ និងស្ត្រី ២,៣២៦ នាក់ ខណៈចំនួនអ្នករបួសកើនលើស ៣២,០០០ នាក់ ៕

ប្រែសម្រួល៖ Vann Vann

ប្រភព៖ Arab News

ចុចអាន៖ មានជនស៊ីវិលប៉ាឡេស្ទីនជិត១ម៉ឺននាក់ហើយ ត្រូវសម្លាប់ ក្នុងសង្គ្រាមអ៊ីស្រាអែល-ហាម៉ាស់

The post អង្គការលើកលែងទោសអន្តរជាតិ៖ អ៊ីស្រាអែល​ ​ប្រើ​គ្រាប់បែក​ផូស្វ័រ ​នៅ​ហ្គាហ្សា និង​លីបង់  appeared first on Kampuchea Thmey Daily.

យោងតាមអង្គការឃ្លាំមើលសិទ្ធិមនុស្សមួយនេះ, កងកម្លាំងអ៊ុយក្រែនកំពុងបង្កើតមូលដ្ឋានយោធានៅក្នុងតំបន់លំនៅដ្ឋាន រួមទាំងសាលារៀន និងមន្ទីរពេទ្យ ក៏ដូចជាបើកការវាយប្រហារពីទឹកដីដែលមានប្រជាជនរស់នៅ ផងដែរ។

អគ្គលេខាធិការអង្គការលើកលែងទោសអន្តរជាតិលោកស្រី Agnès Callamard បាននិយាយថា “យើងបានចងក្រងឯកសារ ដែលកងកម្លាំងអ៊ុយក្រែនកំពុងដាក់ជនស៊ីវិលឲ្យប្រឈមនឹងហានិភ័យ និងបំពានច្បាប់សង្រ្គាម នៅពេលពួកគេប្រតិបត្តិការនៅក្នុងតំបន់ដែលមានប្រជាជន ហើយការស្ថិតក្នុងទីតាំងការពារ មិនបានធ្វើឲ្យយោធាអ៊ុយក្រែន គោរពច្បាប់មនុស្សធម៌អន្តរជាតិនោះទេ”។

ក្នុងពេលជាមួយគ្នានោះ អង្គការនេះបានសង្កត់ធ្ងន់ថា ការរំលោភច្បាប់មនុស្សធម៌ដោយអ៊ុយក្រែន មិនបង្ហាញភាពត្រឹមត្រូវចំពោះអ្វីដែលខ្លួនហៅថា ការវាយប្រហារដោយមិនរើសមុខរបស់រុស្ស៊ីឡើយ។

អង្គការលើកលែងទោសអន្តរជាតិបានបន្ថែមថា “គ្រប់ភាគីនៃជម្លោះ ត្រូវតែបែងចែកឲ្យច្បាស់រវាងគោលដៅយោធា និងវត្ថុស៊ីវិលគ្រប់ពេលវេលា ហើយចាត់វិធានការប្រុងប្រយ័ត្នដែលអាចធ្វើទៅបាន រួមទាំងជម្រើសនៃអាវុធផងដែរ ដើម្បីកាត់បន្ថយគ្រោះថ្នាក់ដល់ជនស៊ីវិល”៕

ប្រែសម្រួល៖ Vann Vann

ប្រភព៖ Sputnik

ចុចអាន៖ រុស្ស៊ី ចោទអាមេរិកថា ចូល រួមដោយ ផ្ទាល់ ក្នុង សង្រ្គាម នៅ អ៊ុយក្រែន និងព្រមានកាត់ផ្តាច់ទំនាក់ទំនង

The post យុទ្ធសាស្ត្រប្រយុទ្ធរបស់អ៊ុយក្រែន កំពុងបង្កគ្រោះថ្នាក់ដល់ជនស៊ីវិល appeared first on Kampuchea Thmey Daily.

របាយការណ៍ដែលចេញផ្សាយនៅថ្ងៃចន្ទទី១៣ខែមិថុនានេះ ក៏បានចោទប្រកាន់ទីក្រុងមូស្គូផងដែរ ពីការបាញ់ផ្លោងមិនរើសមុខលើទីក្រុងធំលំដាប់ទីពីររបស់ប្រទេសអ៊ុយក្រែន។

ក្រុមសិទ្ធិមនុស្សបាននិយាយថា “ការទម្លាក់គ្រាប់បែកម្តងហើយម្តងទៀតលើសង្កាត់លំនៅដ្ឋានក្នុងទីក្រុង Kharkov គឺជាការវាយប្រហារមិនរើសមុខ ដែលបានសម្លាប់ និងបណ្តាលឲ្យជនស៊ីវិលរាប់រយនាក់រងរបួស ហើយនោះបង្កទៅជាឧក្រិដ្ឋកម្មសង្រ្គាម”។

ក្នុងរបាយករណ៍នោះ អង្គការលើកលែងទោសបានអះអាងថា ខ្លួនមានភស្តុតាងនៃការប្រើប្រាស់ម្តងហើយម្តងទៀតនៃគ្រាប់បែកចង្កោមប្រភេទ 9N210 និង 9N235 និងគ្រាប់មីនបែកខ្ញែក ដោយកងទ័ពរុស្ស៊ីនៅក្នុងទីក្រុង Kharkov។

គួរបញ្ជាក់ថា សព្វាវុធ​ទាំង​អស់​នេះ ​ត្រូវ​បាន​ហាម​ឃាត់​ក្រោម​ច្បាប់​អន្តរជាតិ៕

ប្រែសម្រួល៖ Vann Vann

ប្រភព៖ Sky

ចុចអាន៖ ភ្ញាក់ផ្អើល ពេលដឹងចំណូលរបស់រុស្ស៊ី ពីការលក់ឥន្ធនៈហ្វូស៊ីល នៅ១០០ថ្ងៃដំបូង នៃសង្គ្រាម

The post អង្គការលើកលែងទោសរកឃើញថា រុស្ស៊ី ប្រើគ្រាប់បែកហាមឃាត់ សម្លាប់ជនស៊ីលរាប់រយនាក់នៅ Kharkiv appeared first on Kampuchea Thmey Daily.

អគ្គលេខាធិការអង្គការលើកលែងទោស លោកស្រី Agnes Callamard និយាយថា ប្រធានាធិបតីអាមេរិកលោក Joe Biden ត្រូវបានគេរំពឹងថា នឹងប្រើមហាសន្និបាតអង្គការសហប្រជាជាតិ ដើម្បីបញ្ជាក់ពីការសន្យាមួយក្នុងការចាក់វ៉ាក់សាំងពេញលេញឲ្យបាន ៧០ភាគរយ ទូទាំងពិភពលោកត្រឹមថ្ងៃទី២២ខែកញ្ញា។

លោកស្រីលើកឡើងថា “យើងត្រូវការមេដឹកនាំដូចជាលោកប្រធានាធិបតី Biden ដើម្បីដាក់វ៉ាក់សាំងរាប់ពាន់លានដូសនៅលើតុ ហើយបញ្ជូនទំនិញទៅ បើមិនដូច្នេះទេ នេះគ្រាន់តែជាកាយវិការទទេមួយទៀត ហើយជីវិតមនុស្សនឹងបន្តបាត់បង់”។

ស្របពេលជាមួយគ្នានោះដែរ អង្គការលើកលែងទោសបានរិះគន់ក្រុមហ៊ុនផលិតវ៉ាក់សាំងកូវីដធំៗដូចជា AstraZeneca, BioNTech, Johnson & Johnson, Moderna, Novavax និង Pfizer ចំពោះការបដិសេធចែករំលែកបច្ចេកវិទ្យានៅពីក្រោយផលិតផលរបស់ពួកគេ ឬការចែករំលែកដូស ដើម្បីឲ្យប្រជាជននៅលើពិភពលោកកាន់តែច្រើនអាចទទួលបាន។

អង្គការសិទ្ធិមនុស្សមួយនេះនិយាយថា ខណៈដែលប្រទេសអ្នកមាន បានចាក់វ៉ាក់សាំងដល់ប្រជាជនរបស់ខ្លួនភាគច្រើនហើយនោះ ស្ថានការណ៍គឺមានភាពខុសប្លែកគ្នានៅតំបន់អាស៊ី អាហ្វ្រិកនិងអាមេរិកឡាទីន ដែលនាំឲ្យមានមនុស្សស្លាប់រាប់ម៉ឺននាក់ក្នុងមួយសប្តាហ៍។

ទោះលោកស្រី Callamard ទទួលស្គាល់ថា ទាំងក្រុមហ៊ុន AstraZeneca និង Johnson & Johnson កំពុងលក់វ៉ាក់សាំងរបស់ពួកគេក្នុងតម្លៃថ្លៃក៏ដោយ ប៉ុន្តែលោកស្រីបានចង្អុលបង្ហាញថា ក្រុមហ៊ុនផលិតវ៉ាក់សាំងទាំង៦ បានជំទាស់នឹងការស្នើសុំពីឥណ្ឌានិងអាហ្វ្រិកខាងត្បូង ដែលស្នើឲ្យលើកលែងសិទ្ធិ កម្មសិទ្ធិបញ្ញាទាក់ទងនឹងផលិតផលរបស់ពួកគេ៕

ប្រែសម្រួល៖ Vann Vann

ប្រភព៖ Thaiger

ចុចអាន៖ ឥណ្ឌា ប្រាប់ពេលវេលាផ្ដល់វ៉ាក់សាំងកូវីដឡើងវិញ ក្រោយផ្អាកនាំចេញកន្លះឆ្នាំ

The post អង្គការលើកលែងទោស រិះគន់ក្រុមហ៊ុនផលិតវ៉ាក់សាំង គិតលុយធំជាងជីវិតមនុស្ស appeared first on Kampuchea Thmey Daily.