ភ្ញាក់ផ្អើល ពេលដឹងចំណូលរបស់រុស្ស៊ី ពីការលក់ឥន្ធនៈហ្វូស៊ីល នៅ១០០ថ្ងៃដំបូង នៃសង្គ្រាម

ក្នុងរយៈពេល១០០ថ្ងៃដំបូងនៃសង្រ្គាមលើអ៊ុយក្រែន រុស្ស៊ីរកចំណូលបាន៩៣ពាន់លានអឺរ៉ូ (៩៧ ៣៩៧ ៥០៥ ០០០​ ដុល្លារអាមេរិក) ពីការលក់ឥន្ធនៈហ្វូស៊ីលរបស់ខ្លួនទៅឲ្យប្រទេសនានាជុំវិញពិភពលោក។

ចំណូលដ៏គួរឲ្យភ្ញាក់ផ្អើលនេះ បានកើតឡើងថ្វីបើបរិមាណនាំចេញ ធ្លាក់ចុះគួរឲ្យកត់សម្គាល់នៅក្នុងខែឧសភា ខណៈដែលសហគមន៍អន្តរជាតិ ព្យាយាមកាត់បន្ថយការពឹងផ្អែកលើប្រេង និងឧស្ម័នរបស់ទីក្រុងមូស្គូ ក៏ដោយ។

យោងតាមរបាយការណ៍របស់មជ្ឈមណ្ឌលស្រាវជ្រាវថាមពល និងខ្យល់ស្អាត (CREA), សហភាពអឺរ៉ុបបានទទួល ៦១% នៃការនាំចេញឥន្ធនៈហ្វូស៊ីលរបស់រុស្ស៊ី។

ហើយបើទោះបីជាប្រេងរុស្ស៊ី ត្រូវបានលក់ក្នុងតម្លៃបញ្ចុះថ្លៃដោយសារតែប្រភពដើមរបស់ខ្លួនក៏ដោយ ប៉ុន្តែការកើនឡើងជាសកលនៃតម្រូវការឥន្ធនៈហ្វូស៊ីល និងតម្លៃថាមពលកើនឡើង ​នៅតែទទួលបានផលចំណេញសម្រាប់រដ្ឋាភិបាលរបស់លោកប្រធានាធិបតី វ្ល៉ាឌីមៀរ ពូទីន។

លោក Lauri Myllyvirta អ្នកវិភាគឈានមុខរបស់ CREA បាននិយាយអំពីការដាក់ទណ្ឌកម្មអន្តរជាតិនាពេលបច្ចុប្បន្នប្រឆាំងនឹងទីក្រុងមូស្គូថា “វឌ្ឍនភាព​រហូត​មក​ដល់​បច្ចុប្បន្ន​នេះ ​គឺ​យឺត​ពេកហើយ ​ដោយសារតែ​តម្រូវការ​ជំនួយ​បន្ទាន់​របស់​អ៊ុយក្រែន។ សកម្មភាពខ្លាំងជាងនេះ គឺចាំបាច់ ត្រូវកាត់ផ្តាច់លំហូរសាច់ប្រាក់ទៅកាន់ប្រទេសរុស្ស៊ី។ នៅទូទាំងពិភពលោក យើងត្រូវបង្កើនល្បឿននៃការប្រើប្រាស់ថាមពលស្អាត ដើម្បីជំនួសការនាំចូលឥន្ធនៈហ្វូស៊ីល និងសម្រួលដល់តម្លៃប្រេងឥន្ធនៈខ្ពស់ ដែលជំរុញឲ្យប្រាក់ចំណូលរបស់រុស្ស៊ីកើនឡើង”។

សហភាពអឺរ៉ុប បានសន្យារារាំងការនាំចូលប្រេងពីរុស្ស៊ីភាគច្រើននៅចុងឆ្នាំនេះ ថ្វីបើខ្លួនកំពុងពិបាកក្នុងការសម្រេចលើវិធី និងពេលវេលាដែលត្រូវបញ្ចប់ការពឹងផ្អែកលើឧស្ម័នរបស់រុស្ស៊ី ក៏ដោយ។

យ៉ាងណាក្តី ប៉ូឡូញ និងអាមេរិក បានបង្កផលប៉ះពាល់ធំបំផុតលើប្រាក់ចំណូលរបស់រុស្ស៊ី ដោយសារកាត់បន្ថយការនាំចូលយ៉ាងច្រើន រួមជាមួយនឹងប្រទេសនានាដូចជា លីទុយអានី ហ្វាំងឡង់ និងអេស្តូនី ជាដើម។

យោងតាមការស្រាវជ្រាវរបស់ CREA បានបង្ហាញថា ឥណ្ឌា បារាំង ចិន អារ៉ាប់រួម និងអារ៉ាប៊ីសាអូឌីត សុទ្ធតែបានបង្កើនការនាំចូល ដោយឥណ្ឌាបានទិញ ១៨% នៃការនាំចេញប្រេងឆៅរបស់រុស្ស៊ី ហើយបារាំងជាអ្នកទិញធំបំផុតចំពោះទំនិញបញ្ចុះតម្លៃ៕

ប្រែសម្រួល៖ Vann Vann

ប្រភព៖ SKY

ចុចអាន៖ គ្មានការលើកលែងទោសប្រហារជីវិត ចំពោះជនជាតិអង់គ្លេសទាំង ២នាក់ទេ