រុស្ស៊ី ចោទអាមេរិកថា ចូល​រួមដោយ​ផ្ទាល់​ក្នុង​សង្រ្គាម​នៅ​អ៊ុយក្រែន និងព្រមានកាត់ផ្តាច់ទំនាក់ទំនង

នេះជាលើកដំបូងហើយ ដែលប្រទេសរុស្ស៊ី ​បាន​ចោទប្រកាន់សហរដ្ឋ​អាមេរិក ​ពី​ការ​ចូល​រួមដោយ​ផ្ទាល់​ក្នុង​សង្រ្គាម​នៅ​អ៊ុយក្រែន​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការពារជាតិទីក្រុងមូស្គូ បានចោទប្រកាន់ថា សហរដ្ឋអាមេរិកកំពុងយល់ព្រមលើគោលដៅសម្រាប់កាំភ្លើងធំផលិតដោយអាមេរិក Himars ដែលប្រើប្រាស់ដោយកងកម្លាំងរបស់ទីក្រុង កៀវ។

លោកឧត្តមសេនីយឯក Igor Konashenkov បាននិយាយថា ការលបស្តាប់ការហៅទូរស័ព្ទរវាងមន្ត្រីអ៊ុយក្រែន គឺបានបង្ហាញពីទំនាក់ទំនងទាំងនេះ។

កាលពីមុន រុស្ស៊ី​ធ្លាប់​បាន​ចោទទី​ក្រុង​វ៉ាស៊ីនតោន ​ពី​ការ​ប្រយុទ្ធ​នឹង​សង្គ្រាម​ប្រូកស៊ី​នៅ​អ៊ុយក្រែន។

Himars គឺជាប្រព័ន្ធបាញ់រ៉ុកកែតពហុមុខងារ ដែលអាចបាញ់ចំគោលដៅយ៉ាងជាក់លាក់ ក្នុងរយៈចម្ងាយ ៧០គីឡូម៉ែត្រ ពោលគឺឆ្ងាយជាងកាំភ្លើងធំដែលអ៊ុយក្រែនធ្លាប់មានពីមុនមក។

លោក Konashenkov និយាយថា “គឺជារដ្ឋបាលរបស់លោក Biden ដែលទទួលខុសត្រូវដោយផ្ទាល់ចំពោះការវាយប្រហារដោយគ្រាប់រ៉ុកកែតទាំងអស់ ដែលត្រូវបានអនុម័តដោយទីក្រុង កៀវ លើតំបន់លំនៅដ្ឋាន និងហេដ្ឋារចនាសម្ព័ន្ធស៊ីវិលនៅក្នុងតំបន់ Donbas និងតំបន់ផ្សេងទៀតដែលបណ្តាលឲ្យមានការស្លាប់ជនស៊ីវិលយ៉ាងច្រើន”។

ការចោទប្រកាន់នេះ បានកើតឡើងបន្ទាប់ពីក្រសួងការបរទេសរុស្ស៊ី ព្រមានថា ប្រសិនបើក្រុមជនស្រឡាញ់សង្គ្រាមនៅក្នុងសភាអាមេរិក ទទួលបានការគាំទ្រ ហើយឲ្យទីក្រុងវ៉ាស៊ីនតោន ចាត់តាំងរុស្ស៊ីជាអ្នកឧបត្ថម្ភរដ្ឋនៃអំពើភេរវកម្មនោះ វាទំនងជានឹងនាំឲ្យមានការបែកបាក់ទាំងស្រុងនៃទំនាក់ទំនងការទូតរវាងប្រទេសទាំងពីរ។

លោកស្រី Maria Zakharova អ្នក​នាំពាក្យ​ក្រសួង ​បាន​ប្រាប់​អ្នក​កាសែត​ក្នុង​អំឡុង​ពេល​សន្និសីទ​សារព័ត៌មាន​មួយ​ថា “គ្មានអ្វីត្រូវ​សង្ស័យ​ទេ​ ប្រសិនបើមនុស្សនៅទីក្រុងវ៉ាស៊ីនតោនសម្រេចចិត្តបញ្ឈប់ទាំងស្រុងនូវអន្តរកម្មណាមួយជាមួយទីក្រុងមូស្គូ យើងអាចរស់នៅជាមួយរឿងនោះបាន”៕

ប្រែសម្រួល៖ Vann Vann

ប្រភព៖ Al Jazeera, RT

ចុចអាន៖ លោក ពូទីន បញ្ជាក់ជាថ្មី! កុំឲ្យមានសង្គ្រាមនុយក្លេអ៊ែរឲ្យសោះ គ្មានអ្នកឈ្នះទេ