ChatGPT អាចប្រើនៅខ្មែរបានហើយ មិនចាំបាច់ប្រើ VPN ឬទិញលេខទូរសព្ទបរទេសទៀតទេ

ChatGPT ជាប្រព័ន្ធបញ្ញាសិប្បនិម្មិត (ប្រព័ន្ធ AI) ដែលដំណើរការឱ្យការសន្ទនារវាងអ្នកប្រើប្រាស់ និងប្រព័ន្ធបញ្ញាសិប្បិនិម្មិតនេះ ហើយវាត្រូវបានគេស្គាល់ថាប្រព័ន្ធឆ្លាតវៃ ដែលអាចប្រាប់យើងគ្រប់យ៉ាង នូវអ្វីដែលយើងចង់ដឹង។

ពីមុន នៅកម្ពុជា ដើម្បីអាចដំណើរការ ChatGPT បាន គឺទាមទារឱ្យប្រើ VPN ឬដាក់លេខទូរសព្ទនៅប្រទេសក្រៅ។ ប៉ុន្ដែឥលូវនេះ ChatGPT អាចដំណើរការបានជាផ្លូវការហើយ។ ប្រព័ន្ធឆ្លងឆ្លើយដ៏វៃឆ្លាតមួយនេះ ក៏ដំណើរការដោយឥតគិតថ្លៃផងដែរ លើជំនាន់ chat GPT-3.5 ដែលជាទិន្នន័យចុងក្រោយរបស់វា។

ChatGPT ត្រូវបានបង្កើតឡើងនៅឆ្នាំ២០១៥ ដោយអង្គភាពមិនស្វែងរកប្រាក់ចំណូល OpenAI ដែលមានការិយាល័យកណ្ដាល នៅទីក្រុងសាន់ហ្វ្រាន់ស៊ីស្កូ រដ្ឋកាលីហ្វ័រញ៉ា សហរដ្ឋអាមេរិក ហើយត្រូវបានអភិវឌ្ឍដោយអ្នកវិទ្យាសាស្ត្រ និងវិស្វករល្បីៗជាច្រើន។ សូម្បីតែកំពូលមហាសេដ្ឋី និងអ្នកវិទ្យាសាស្ត្រ Elon Musk ក៏បានចូលរួមក្នុង គំនិតបង្កើតប្រព័ន្ធបញ្ញាសិប្បនិម្មិតនេះឡើងដែរ ដោយលោកគឺជាក្រុមប្រឹក្សាភិបាលមួយរូប។

គួរបញ្ជាក់ថា អ្វីដែលធ្វើឱ្យ OpenAI អាចបង្កើតនិងអភិវឌ្ឍន៍កិច្ចការ AI ដ៏ធំមួយនេះមកដល់សព្វថ្ងៃ ក៏ដូចជាផលិតផល​ដទៃទៀតបាន គឺសុទ្ធតែមានជំនួយដ៏ធំពី Microsoft ដែលបានចំណាយទុនវិនិយោគប្រមាណ ១១ពាន់លានដុល្លារហើយបច្ចុប្បន្ន៕