រថយន្តស៊េរីទំនើប Ford Raptor បុករះចូលដេប៉ូសាំងខូចខាតស្ទើរទាំងស្រុង

រថយន្តស៊េរីទំនើបម៉ាកFord Ranger Raptor មួយគ្រឿងបើកបរក្នុងល្បឿនលឿនជ្រុលចង្កូតបុករះចូលសួនច្បារដេប៉ូសាំងptt បណ្ដាលឱ្យដើមផ្កាលម្អសួនបាក់ជាច្រើនដើម និងបង្គោលភ្លើងថ្មមួយដើមរងការខូចខាត រួមនឹងរបងដែកបាក់អស់ជាច្រើនផ្ទាំងរាបដល់ដី។

ហេតុការណ៍នេះកើតឡើងកាលពីវេលាម៉ោង១២យប់រំលងអាធ្រាត្រឈានចូលថ្ងៃទី២៤ ខែតុលាឆ្នាំ២០២២ នៅត្រង់ចំណុចដេប៉ូសាំង ptt តាមបណ្ដោយផ្លូវ ៥៩៨ កែងផ្លូវ ១៨០០ ក្នុងសង្កាត់ទួលសង្កែទី២ ខណ្ឌឬស្សីកែវ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុឃើញរថយន្តស៊េរីទំនើបម៉ាក Ford Ranger Raptor ស៊េរីឆ្នាំ២០២៣ មួយគ្រឿងពណ៌ក្រហមពាក់ស្លាកលេខ កម្ពុជា MCH-8586 បើកបរធ្វើដំណើរតាមបណ្ដោយ​ផ្លូវ៥៩៨ ក្នុងទិសដៅពីជើងទៅត្បូងក្នុងល្បឿនលឿនលុះមកដល់ចំណុចកន្លែងកើតហេតុ កែងផ្លូវ ១៨០០ បានជ្រុលបុករះចូលសួនការ៉ាសសាំងptt បាក់ដើមផ្កាលម្អសួនបាក់ជាច្រើនដើម និងបង្គោលភ្លើងថ្មមួយដើមប្រេះបែកបន្តិចបន្តួចនិងរលើងគ្រិះបណ្ដាលឱ្យទ្រេត និងរបងដេប៉ូសាំង បាក់អស់ជាច្រើនផ្ទាំងរាបដល់ដី ចំណែករថយន្តបង្កខូចខាតផ្នែកខាងមុខដាច់កង់មួយចំហៀងចេញពីតួ រងការខូចខាតសំណាងល្អមិនបង្កឱ្យមានអ្នករងរបួស។

ក្រោយកើតហេតុសមត្ថកិច្ចមូលដ្ឋានបានចុះមកដល់ទីតាំងកើតហេតុ និងមានតំណាងភាគីរថយន្តរួមនឹងខាងក្រុមហ៊ុនអគ្គិសនីចុះដល់កន្លែងកើតហេតុ។ ដោយភាគីខាងរថយន្តនិងភាគីដេប៉ូសាំងធ្វើការសម្របសម្រួលគ្នាបញ្ចប់រឿង រួចឱ្យរថយន្តស្ទូចយកទៅជួសជុលដោយខ្លួនឯង។ ចំណែកភាគីខាងរថយន្តបង្ក និងខាងភាគីក្រុមហ៊ុនអគ្គិសនីបានយកលេខទូរស័ព្ទគ្នាទុកទំនាក់ទំនងគ្នាដើម្បីធ្វើការដោះស្រាយគ្នានៅពេលក្រោយ៕

អត្ថបទ៖ សុខា