សង្ស័យបើករថយន្តទាំងងងុយដេក បុករះរថយន្ត និងម៉ូតូ រួមទាំងផ្ទះពលរដ្ឋ រងការខូចខាត

បុរស​ម្នាក់ សង្ស័យ​បើក​រថយន្ត​ទាំង​ងងុយដេក បាន​រេ​ចង្កូត​ទៅ​បុក​រថយន្ត​សាលា​បង្រៀន​បើកបរ និង​ម៉ូតូ ២ គ្រឿង រួម​ទាំង​ផ្ទះ​ប្រជាពលរដ្ឋ បណ្ដាល​ឲ្យ​រង​ការ​ខូចខាត តែ​សំណាង​មិន​មាន​មនុស្ស​រង​របួស។

ហេតុការណ៍​នេះ​បាន​កើត​ឡើង​កាលពី​វេលា​ម៉ោង ១១ និង ២០ នាទី​ព្រឹក ថ្ងៃ​ទី ១៧ ខែ​សីហា ឆ្នាំ ២០២៣ ចំណុច​ខាង​ជើង​បន្ទាយ ង ៧០ តាម​បណ្ដោយ​ផ្លូវជាតិ​លេខ ៣ ស្ថិត​ក្នុង​សង្កាត់​ចោមចៅ​ទី ៣ ខណ្ឌ​ពោធិ៍​សែន​ជ័យ រាជធានី​ភ្នំពេញ។

តាម​ប្រភព​ព័ត៌មាន​បាន​ឲ្យ​ដឹង​ថា នៅ​មុន​ពេល​កើត​ហេតុ រថយន្ត​ម៉ាក​ឡិច​ស៊ី​ស ពាក់​ស្លាក​លេខ​ភ្នំពេញ 2T 0337 ជា​រថយន្ត​សាលា​បង្រៀន​បើកបរ ,ម៉ូតូ​ម៉ាក​ស្កុប​ពី​ពណ៌​ក្រហម ពាក់​ស្លាក​លេខ​ភ្នំពេញ 1HP 4431 និង​ម៉ូតូ​ធុន​ធំ ពណ៌​ទឹកដោះគោ ពាក់​ស្លាក​លេខ​ភ្នំពេញ 1GT 0981 កំពុង​ឈប់​នៅ​លើ​ចិញ្ចើម​ផ្លូវ ភ្លាម​នោះ​ស្រាប់​តែ​មាន​បុរស​ម្នាក់​បើក​រថយន្ត​ម៉ាក ISUZU ពណ៌​ស ពាក់​ស្លាក​លេខ​ភ្នំពេញ 2BE 6448 ធ្វើ​ដំណើរ​តាម​បណ្ដោយ​ផ្លូវជាតិ​លេខ ៣ ទិសដៅ​ពី​ជើង​ទៅ​ត្បូង ខណៈ​ដល់​ចំណុច​កើតហេតុ​ក៏​រេ​ចង្កូត​ទៅ​បុក​រថយន្ត​ឡិច​ស៊ី​ស ហើយ​បន្ត​បុក​ម៉ូតូ ១ គ្រឿង និង​ផ្ទះ​ប្រជាពលរដ្ឋ​មួយ​កន្លែង ខូចខាត​សម្ភារៈ​មួយ​ចំនួន ហើយ​រថយន្ត​បង្ក​នៅ​មិនទាន់​អស់​ល្បឿន ក៏​បន្ត​ទៅ​បុក​ម៉ូតូ​មួយ​គ្រឿង​ទៀត រង​ការ​ខូចខាត តែ​សំណាង​មិន​មាន​មនុស្ស​រង​របួស។

ក្រោយ​កើតហេតុ ភាគី​ខាង​រថយន្ត​បង្ក បាន​សម្របសម្រួល ព្រម​ទទួល​កំហុស​ចេញថ្លៃ​ជួសជុល​ទាំង​អស់​ទៅ​ភាគី​ខាង​រង​គ្រោះ ដើម្បី​បញ្ចប់​រឿង​នៅ​កន្លែង​កើត​ហេតុ៕

អត្ថបទ ៖ សុខា