រដ្ឋមន្ត្រីក្រសួង​ទេសចរណ៍​ជួប​សំណេះសំណាល​ជា​មួយ​ប្រជាពលរដ្ឋ​នៃ​សហគមន៍​ទេសចរណ៍ សំបូរ​ព្រៃគុក

កំពង់ធំ ៖ នៅថ្ងៃទី១៣ ខែតុលា ឆ្នាំ២០២ លោក ហួត ហាក់ រដ្ឋមន្ត្រីក្រសួងទេសចរ ជួប​សំណេះសំណាល ជាមួយប្រជាពលរដ្ឋនៃសហគមន៍ទេសចរណ៍ សំបូរព្រៃគុក ស្ថិតនៅឃុំសំបូរ ស្រុក ប្រាសាទសំបូរ ខេត្តកំពង់ធំ។ ក្នុងឱកាសនោះ លោក ឃុន សុខា ប្រធានសហគមន៍ទេសចរណ៍ សំបូរព្រៃគុក ធ្វើរបាយការណ៍ ដោយលើកឡើងថា សហគមន៍ទេសចរណ៍សំបូរព្រៃគុក បង្កើតឡើងនៅក្នុង ឆ្នាំ២០០៤ ដោយមានការឯកភាពរបស់ប្រជាពលរដ្ឋ សហការជាមួយសាកលវិទ្យាល័យវ៉ាសេដាប្រទេសជប៉ុន មន្ទីរវប្បធម៌និងវិចិត្រសិល្បៈ និងរដ្ឋបាលខេត្តកំពង់ធំ។

សហគមន៍មានសមាជិកសរុបចំនួន ៧ភូមិ រួមមានភូមិសំបូរ ភូមិកំពង់ឈើទាល ភូមិអូរគ្រូកែ ភូមិសំរិត ភូមិជាយសំពៅ ភូនមិអាត់ស៊ូ និងភូមិពោធិ៍ទ្រេត។ សហគមន៍បានបង្កើតជា បង្កើតមុខ របរ ដែលជួយគាំទ្រដល់វិស័យទេសចរណ៍ រួមមាន ផ្ទះស្នាក់ អាហារ សេវាដឹកជញ្ជូនភ្ញៀវទេសចរណ៍ មគ្គទេសក៍ សិប្បកម្មតម្បាញ នំបញ្ចុកខ្មែរ និងសិល្បៈជាដើម។

សហគមន៍បង្កើតឡើងក្នុងគោលបំណង រួមចំណែកអនុវត្ត គោលនយោបាយកាត់បន្ថយភាពក្រីក្ររបស់រាជរដ្ឋាភិបាលកម្ពុជា ចងក្រងសេវាកម្មទេសចរណ៍ក្នុងសហគមន៍ ដើម្បីទទួលភ្ញៀវជាតិ និង អន្តរជាតិ បង្កើនប្រាក់ចំណូល បង្កើតការងារថ្មីជូនប្រជាជនក្នុងសហគមន៍ ចូលរួមចំណែកក្នុងការអភិរក្ស អភិវឌ្ឍន៍ រមណីយដ្ឋានប្រវត្តិសាស្ត្រប្រាសាទសំបូរព្រៃគុក ដែលជាសម្បត្តិវប្បធម៌ និងប្រវត្តិសាស្ត្រដ៏មានតម្លៃ បង្កើតទំនាក់ទំនងរវាងមនុស្ស ប្រាសាទបុរាណ និងធម្មជាតិ ព្រមទាំងចូលរួមថែរក្សាទំនៀមទម្លាប់ប្រពៃណីរបស់ ប្រជាជន និងជនជាតិភាគតិចក្នុងសហគមន៍។

មានប្រសាសន៍ក្នុង​ឱកាស​នោះ លោក ហួត ហាក់ រដ្ឋមន្ត្រីក្រសួងទេសចរណ៍ លើកឡើង កោតសរសើរ និង ថ្លែងអំណរគុណដល់ថ្នាក់ដឹកនាំខេត្ត មន្ទីទេសចរណ៍ ដែលបានចូលរួមលើកកម្ពស់ វិស័យទេសចរណ៏នៅទូទាំងខេត្តកំពង់ធំ ពិសេសសហគមន៍ទេសចរណ៍ សំបូរព្រៃគុក ដែលត្រូវបានទទួលស្គាល់ ពីថ្នាក់ជាតិ និងក្របខណ្ឌអាស៊ាន ដោយផ្ទះស្នាក់មួយចំនួនទទួលបានពានរង្វាន់ ជាស្តង់ដាអាស៊ាន និងទទួល បានវិញ្ញាបនប័ត្រ ទទួលស្គាល់ភូមិមួយ ផលិតផលមួយ វិញ្ញាបនបត្រ ទទួលស្គាល់ជាសហគមន៍ឆ្នើម កាលពីឆ្នាំ២០២២ កន្លងទៅ ។

លោកបន្តថា ដោយមានការយកចិត្តទុកដាក់ពី លោក​ឧបនាយក រដ្ឋមន្ត្រីប្រចាំការ វង្សី វិស្សុត សហការពីរដ្ឋបាលខេត្តកំពង់ធំ ក្រសួងទេសចរណ៍ បានដាក់ចេញនូវផែនការ អភិវឌ្ឍន៍ទេសចរណ៍ខេត្តកំពង់ធំ ឆ្នាំ ២០២៦-២០៣០ ដោយរៀបចំការអភិវឌ្ឍន៍ នៅខេត្តកំពង់ធំត្រូវបានបែងចែកជា៣ប៉ូល គឺ ប៉ូលតំបន់ទេសចរណ៏សំបូរព្រៃគុក តភ្ជាប់និងតំបន់ស្ទឹងព្រៃប្រស់ ប៉ូលទេសចរណ៍សាសនា ភ្នំសន្ទុក និង ទី៣ ប៉ូលទេសចរណីទីក្រុង មានទាំងពេលថ្ងៃ និងពេលរាត្រី ដោយមានការអភិវឌ្ឍន៍តំបន់ដងស្ទឹងសែនជាតំបន់ទេសចរណ៍។ ហេតុនេះគ្រប់តំបន់ទេសចរណ៍ត្រូវពង្រឹង សមត្ថភាពរបស់សហគមន៍ដែលមានស្រាប់ ជម្រុញការបង្កើតផលិតផលថ្មីៗ ពង្រឹងគុណភាពសេវាកម្ម សុវត្ថិភាពចំណីអាហានិងអាណាម័យ ដោយយកចិត្តទុកដាក់នូវភាពស្អាតនិងបៃតង ធ្វើយ៉ាងណាដើម្បីឱ្យភ្ញៀវ ទេសចរណ៍ជាតិនិងអន្តរជាតិមកលេងនិងទស្សនាឱ្យបានច្រើន ដើម្បីលើកកំពស់ជីវភាពប្រជាពលរដ្ឋនៅក្នុង សហគមន៍៕